រាជធានីភ្នំពេញ៖បុរសម្នាក់បានស្លាប់ភ្លាមៗនៅនឹងកន្លែង ខណៈម្នាក់ទៀតរងរបួសធ្ងន់ ដោយសង្ស័យជិះម៉ូតូលឿនជ្រុលបុករថយន្តកុងតឺន័រពីក្រោយបណ្តាលឲ្យដួលបោកក្បាលនឹងថ្នល់។ ហេតុការណ៍នេះកើតឡើងវេលាម៉ោងជាង ៤ទៀបភ្លឺ ថ្ងៃទី២២ ខែមេសា ឆ្នាំ២០១៦ នៅលើផ្លូវលេខ២១៧ ភូមិម័ល ក្បែរវត្តសំបួរមាស សង្កាត់ដង្កោ ខណ្ឌដង្កោ។
ប្រជាពលរដ្ឋបាននិយាយថា ករណីគ្រោះថ្នាក់នេះ គឺទំនងបុរសពីរនាក់នោះ ជិះម៉ូតូឌុបគ្នាលឿន ហើយជ្រុលល្បឿនបុកឡានកុងទឺន័រ ពីក្រោយបណ្តាលឲ្យដួលម៉ូតូ ហើយបុរសម្នាក់ដួលបោកក្បាល នឹងបាក់កស្លាប់ ភ្លាមៗតែម្តង ចំណែកម្នាក់ទៀតរងរបួសធ្ងន់ ត្រូវបានរថយន្តសង្គ្រោះបន្ទាន់នៃមន្ទីរបង្អែកខណ្ឌដង្កោអន្តរាគមន៍ ដឹកយកទៅសង្គ្រោះ នៅមន្ទីរពេទ្យភ្លាមៗ។ ប្រភពបន្តថា មុនពេលកើតហេតុ ជនរងគ្រោះជិះម៉ូតូ១គ្រឿង ម៉ាកស្មាស់វី ពណ៌ក្រហម ពាក់ស្លាកលេខភ្នំពេញ1AR-790២ឌុបគ្នា ធ្វើដំណើរត្បូងទៅជើង លុះមកជិះដល់ក្លោងទ្វារបត់ចូលវត្តសំបួរ ស្រាប់កើតមានហេតុនេះ តែម្តងទៅ ។
ដោយឡែកសមត្ថកិច្ចប្រាប់ថា ករណីគ្រោះចរាចរណ៍នេះ ស្លាប់ម្នាក់របួសធ្ងន់ម្នាក់ ហើយពុំឃើញមានអត្តសញ្ញាណសម្គាល់ទេ ក្រោយពីឆែកទៅឃើញតែវិក្កយបត្រខារ៉ាអូខេតែប៉ុណ្ណោះ៕
