ខេត្តកណ្តាល៖បុរសម្នាក់បានស្លាប់ពេលបញ្ជូនទៅសង្គ្រោះនៅមន្ទីរពេទ្យបន្ទាប់ពីហូបត្រីកំពតអស់ចំនួន៦ក្បាល។ ហេតុការណ៍នេះកើតឡើងកាលពីថ្ងៃទី២៥ ខែមេសា ឆ្នាំ២០១៦ ម៉ោង១៦ និង០០នាទី ចំណុចផ្ទះជនរងគ្រោះក្នុងបរិវេណឡឥដ្ឋផាច លាងស្រេង ភូមិឈើទាល ឃុំព្រែកអញ្ចាញ ស្រុកមុខកំពូល ខេត្តកណ្ដាល។ ជនរងគ្រោះឈ្មោះ ឈិន នាង ភេទប្រុសអាយុ៣៣ឆ្នាំ នៅភូមិទួលក្រសាំង ឃុំសិត្បូ ស្រុកស្អាង ខេត្តកណ្ដាល។
តាមប្រភពព័ត៌មានអោយដឹងថា នៅថ្ងៃកើតហេតុវេលាម៉ោង០៩ និង០០នាទីព្រឹកជនរងគ្រោះ និងប្រពន្ធឈ្មោះ គិប ច្រឹប បាននាំគ្នាទៅរកត្រីនៅចំណុចបឹងព្រែកអញ្ចាញរហូតដល់ម៉ោង១២ និង០០នាទី ត្រឡប់មក វិញបានត្រីបន្តិចបន្តួច ក្នុងនោះមានត្រីកំពតចំនួន០៦ក្បាល ពេលមកដល់ផ្ទះជន រងគ្រោះបានយកកំពតទៅដុតហូប។ ប្រភពបន្តថា ក្នុងពេលនោះប្រពន្ធជនរងគ្រោះបានប្រាប់ថា កុំហូបកំពតអី ព្រោះកំពតនេះភ្នែកឡើងក្រហមប្រយ័ត្នពុល តែជនរងគ្រោះមិនស្ដាប់ ក៏យកកំពតទាំង០៦នោះដុតហើយហូបក្រោយពេល ហូបរួចក៏ទៅដេកនៅលើផ្ទះ។
ប្រភពបន្តទៀតថា រហូតដល់ម៉ោង១៦ និង០០នាទី ជនរងគ្រោះបានស្រែកហៅប្រពន្ធឲ្យជួយលើកឡើងបត់ជើង ហើយបានប្រាប់ប្រពន្ធថា អញឈឺចុកចាប់ អស់ពេញទាំងខ្លួន អញពុលកំពតហើយ ពេលនោះ ប្រពន្ធជនរងគ្រោះបានហៅអ្នកជិតខាងឲ្យយកជនរងគ្រោះទៅព្យាបាលនៅពេទ្យព្រែកអញ្ចាញ លុះដល់ម៉ោង១៨ និង០០នាទីជនរងគ្រោះបានដាច់ខ្យល់ស្លាប់ នៅក្នុងមន្ទីរពេទ្យតែម្ដង។ បន្ទាប់មកទើបក្រុមគ្រួសារនាំសពមកតម្កល់ទុកនៅវត្តព្រែក អញ្ចាញដើម្បីធ្វើបុណ្យ។
បើតាមមន្ត្រីជំនាញដែលបានចុះទៅពិនិត្យបានបញ្ជាក់ថា លើខ្លួនសាកសពពុំមានស្លាកស្នាមអ្វីកត់សំគាល់ និងពាក់ព័ន្ធបទល្មើសព្រហ្មទណ្ឌ ហើយបានប្រគល់សពជូនក្រុមគ្រួសារដើម្បីធ្វើបុណ្យតាមប្រពៃណី៕
