រាជធានីភ្នំពេញ៖ចោរមួយក្រុមមានគ្នា៤នាក់ជិះម៉ូតូ២គ្រឿងប្រដាប់ដោយដាវសាមម៉ូរ៉ៃគ្រប់ដៃបានធ្វើសកម្មភាពកាប់ប្រហារលើយុវជនម្នាក់ប្លន់យកម៉ូតូ MSX មួយគ្រឿងបានសម្រេចដោយសុវត្ថិភាព។ ករណីនេះកើតឡើងនៅវេលាម៉ោង៩ និង៣០នាទីយប់ថៃ្ងទី២៦ ខែមេសា ឆ្នាំ២០១៦ នៅចំណុចក្នុងវត្តនាគគវ័ន្ត សង្កាត់បឹងកក់២ ខណ្ឌទួលគោក។
ជនរងគ្រោះមានឈ្មោះ ប៉ែ ឡេងហួត អាយុ២១ ឆ្នាំ មុខរបរធ្វើការអោយក្រុមហ៊ុន ស្នាក់ផ្ទះជួលនៅម្តុំស្តុបចំការមន សង្កាត់ទន្លេបាសាក់ ខណ្ឌចំការមន ។ បន្ទាប់ពីកើតហេតុជនរងគ្រោះត្រូវបានប្រជាពលរដ្ឋម្តុំនោះជួយដឹកតាមម៉ូតូយកមកព្យាបាលនៅមន្ទីរពេទ្យលោកសង្ឃ។
ប្រភពពីនៅកន្លែងកើតហេតុបានដឹងថា មុនពេលកើតហេតុគេបានឃើញ យុវជនម្នាក់ បានជិះម៉ូតូមួយគ្រឿងម៉ាកMSX ពណ៌ស ពាក់ស្លាកលេខ ភ្នំពេញ1CZ-7538 បានជិះធ្វើដំណើរចេញពីរផ្ទះជួលនៅម្តុំស្តុបចំការមន ហើយមកជួបមិត្តភក្តិផឹកការហ្វេនៅម្តុំកាំកូស៊ីធី ឈ្មោះ ឆាតលីកា ខណៈត្រលប់ទៅផ្ទះវិញរូបគេបានជិះធ្វើដំណើរតាមផ្លូវលេខ ៦០៨ ក្នុងទិសដៅពីកើតទៅលិច ស្រាប់តែមកដល់ចំណុចកើតហេតុ ក៏មានក្រុមចោរ៤នាក់ជិះម៉ូតូ២គ្រឿង ប្រដាប់ដោយដាវសាមេរៃគ្រប់ដៃបានដេញកាប់ប្លន់យុវជនរងគ្រោះរហូតមកដល់ចំណុចក្នុងវត្តនាគគវ័ន្ត ធ្វើអោយជនរងគ្រោះដូលម៉ូតូមួយគ្រឿងក៏ត្រូវក្រុមចោរកាប់ប្រហារត្រូវមួយកាំបិតបណ្តាលអោយរបួសដៃម្ខាង ធ្ងន់ហូរឈាមស្រោចខ្លួន។ ហើយភ្លាមៗនោះជនសង្ស័យក្នុងចំណោមបក្ខពួកគេនោះ ក៏មកលើកម៉ូតូរបស់ជនរងគ្រោះជិះទៅបាត់ដោយសុវត្ថិភាពតែម្តង៕
