រាជធានីភ្នំពេញ៖មន្ត្រី CNRP មិនបានឆ្លើយនឹងសំណួរអ្នកកាសែត ដែលបានសួរថា តើពេលនេះលោក កឹម សុខា កំពុងនៅទីណា ក្នុងពេលដែលសាធារណមតិបានលើកឡើងផ្ទុយគ្នាអំពីការអនុវត្តនិតិវិធីរបស់ តុលាការ ចំពោះដីកាកោះហៅលោក កឹម សុខា ឲ្យចូលបំភ្លឺនៅថ្ងៃស្អែក ។
អ្នកតាមដានស្ថានភាពនយោបាយ បាននឹងកំពុងតាមដានយ៉ាងយកចិត្តទុកដាក់ទាក់ទងសំណុំរឿងលោក កឹម សុខា ខណដែលតុលាការបានកោះហៅឲ្យលោកចូលបំភ្លឺជាលើកទី២នៅថ្ងៃទី២៦ ខែឧសភានេះ ក្នុងនាមជាសាក្សី ពាក់ព័ន្ធសំណុំរឿងសញ្ចរកម្មជាមួយកញ្ញា ខុម ចាន់ដារ៉ាទី ហៅស្រីមុំ ។ ប៉ុន្តែលេចឮព័ត៌មានថា លោក កឹម សុខា បានចាកចេញពីប្រទេសកាលពីម្សិលមិញ ឆ្ពោះទៅកាន់ប្រទេសថៃ ដោយស្ងៀមស្ងាត់ សូម្បីតែមន្ត្រីជាន់ខ្ពស់ CNRP ក៏មិនបានដឹងដែរ ។ ទន្ទឹមនោះក៏លេចឮព័ត៌មានមួយទៀតថា លោក កឹម សុខា បានទៅមើលចំការម្រេចរបស់លោកនៅឯខេត្តកំពង់ចាម ។
យ៉ាងណាក៏ដោយរហូតមកដល់ពេលនេះ មន្ត្រីជាន់ខ្ពស់ CNRP ហាក់នៅតែបិទបាំងព័ត៌មានទាក់ទងលោក កឹម សុខា ក្នុងពេលដែលលោកត្រូវចូលបំភ្លឺនៅតុលាការនៅថ្ងៃស្អែកនេះ ។ មិនតែប៉ុណ្ណោះ មន្ត្រីដែលជិតស្និទ្ធបំផុតជាមួយលោក កឹម សុខា ក៏ព្យាយាមលាក់បាំងវត្តមានលោក កឹម សុខា ផងដែរ ៕
