អត្ថបទ៖លោក សុត្ថារ៉ូ
ភ្នំពេញ៖ក្រសួងធនធានទឹក និងឧតុនិយម បានជូនដំណឹងដល់ប្រជាពលរដ្ឋ ឲ្យមានការ ប្រុងប្រយ័ត្នពីការប្រែប្រួលអាកាសធាតុ ខ្យល់មូសុងនិរតី ដែលកំពុងបង្កើនឥទ្ធិពលមកលើកម្ពុជា អាចបណ្ដាលឲ្យមានភ្លៀងធ្លាក់ស្ទើរគ្រប់តំបន់ក្នុងប្រទេសកម្ពុជា។
ចាប់ពីថ្ងៃទី ១៤ ដល់ ២២ មិថុនា ឆ្នាំ២០១៦នេះ ប្រទេសកម្ពុជានឹងទទួលឥទ្ធិពលខ្យល់ មូសុងនិរតី ដែលអាចបង្កឲ្យមានការប្រែប្រួលអាកាសធាតុនៅស្ទើរទូទាំងប្រទេស ក្នុងនោះតំបន់ខ្ពង់រាប នឹងមានភ្លៀងធ្លាក់រាយប៉ាយពីបង្គួរទៅច្រើន ហើយតំបន់វាលទំនាប នឹងមានភ្លៀងធ្លាក់រាយប៉ាយពីមធ្យមទៅច្រើន ខណៈតំបន់មាត់សមុទ្រ នឹងមានភ្លៀងធ្លាក់ជាប់ជាបន្តបន្ទាប់ជាពិសេសក្នុងខេត្តព្រះសីហនុ និងខេត្តកោះកុង។នេះបើតាមការជូន ដំណឹង របស់ក្រសួងធនធានទឹក និងឧតុនិយម។
ជាមួយគ្នានេះ ក្រសួងធនធានទឹក និងឧតុនិយម បានអំពាវនាវដល់ប្រជាពលរដ្ឋនៅក្នុងតំបន់ឆ្នេរ នឹងនៅលើផ្ទៃសមុទ្រ អោយមានការប្រុងប្រយ័ត្នខ្ពស់ ចំពោះបាតុភូតខ្យល់បោកបក់ខ្លាំង ក្នុងតំបន់ឆ្នេរចាប់ពីថ្ងៃទី ១៤ ដល់ ២០ មិថុនា ឆ្នាំ២០១៦នេះ។
ភ្លៀងដើមរដូវវស្សាបានចាប់ផ្តើមធ្លាក់នៅស្ទើរទូទាំងប្រទេសកម្ពុជា ទន្ទឹមនោះ បាតុភូតខ្យល់មូសុងនិរតី កាលពីពេលថ្មីនេះបាននាំឲ្យមានភ្លៀងធ្លាក់រាយប៉ាយតាមបណ្ដាខេត្តមួយចំនួន ដោយឡែក នៅរាជធានីភ្នំពេញ ដែលបណ្ដាលឲ្យមានភ្លៀងធ្លាក់លាយខ្យល់បានបង្កឲ្យដើមឈើមួយចំនួនដួលបាក់រលំ៕
