រាជធានីភ្នំពេញ៖សាកសពបុរសម្នាក់ត្រូវបានប្រជាពលរដ្ឋប្រទះឃើញនៅក្នុងប្រឡាយទឹកមួយកន្លែង ដោយមានពាក់មួយសុវត្ថិភាព និងម៉ូតូមួយគ្រឿងទៀត។ ហេតុការណ៍ភ្ញាក់ផ្អើលនេះកើតឡើងកាលពីវេលាម៉ោង០៦ និង១៥នាទីព្រឹកថ្ងៃទី១៥ ខែកក្កដា ឆ្នាំ២០១៦នេះ ស្ថិតនៅចំណុចផ្លូវបេតុងលេខ១៩៦២ ក្នុងភូមិជាងទង សង្កាត់ក្រាំងធ្នង់ ខណ្ឌសែនសុខ។
ប្រភពឱ្យដឹងថា ជនរងគ្រោះមានគេស្គាល់ឈ្មោះ សឹម អាយុប្រហែល៣០ឆ្នាំ មានទីលំនៅក្នុងសង្កាត់គោករកា ខណ្ឌព្រែកព្នៅ ជិះម៉ូតូសង់ C125 ស៊េរីឆ្នាំ២០១៥ មានពាក់ស្លាកលេខ1Q-9501 ដួលក្បែរកន្លែងកើតហេតុ ។
បើតាមការសន្និដ្ឋានជំហានដំបូងថា ជនរងគ្រោះអាចស្រវឹងស្រា ព្រោះនៅជិតសាកសពក៏ឃើញមានកំប៉ុងស្រាបៀរ អាចជិះម៉ូតូមកជួបគ្រោះថ្នាក់ចរាចរណ៍បណ្តាលឱ្យធ្លាក់ចូលប្រឡាយលង់ស្លាប់ ទាំងមួកសុវត្ថិភាពតែម្តង។ ទោះបីជាយ៉ាងណាសមត្ថកិច្ចកំពុងធ្វើការស្រាវជ្រាវ និងរកក្រុមគ្រួសារ៕
