លោក អ៊ូ វីរៈ មិនគាំទ្រលោក សម រង្ស៊ី រឿងទាមទារឲ្យអឺរ៉ុបបិទទីផ្សារសម្រាប់កម្ពុជា
រាជធានីភ្នំពេញ៖លោក អ៊ូ វីរៈ បានសរសេរលើ face book នាពេលថ្មីៗ នេះ ដោយបានរិះគន់និងមិនគាំទ្រ លោក សម រង្ស៊ី ដែលបានទាមទារឲ្យសហគមន៍អឺរ៉ុបបិទទីផ្សារនាំចេញសម្លៀកបំពាក់ពីកម្ពុជា។ ទន្ទឹមនោះលោកក៏បានរិះគន់ការលើកឡើងរបស់លោក សម រង្ស៊ី ដែលចោទប្រកាន់គណបក្សកាន់អំណាច នៅពីខ្នងក្រោយការសម្លាប់លោក កែម ឡី ជារឿងខុសឆ្គង។
លោក អ៊ូ វីរៈ បានសរសេរថា គណបក្សប្រឆាំងក្រោមការដឹកនាំរបស់ លោក សម រង្ស៊ី [គ្មានលក្ខណៈប្រជាធិបតេយ្យ] ហើយត្រូវតែធ្វើការកែទម្រង់តាមប្រជាធិបតេយ្យ ពិតប្រាកដ ដោយមិនត្រូវបន្តដឹកនាំ តាមវប្បធម៌អត្តនោម័តនោះទេ។ លោក សម រង្ស៊ី ខ្វះភាពជាអ្នកដឹកនាំ ហេតុដូច្នេះហើយ ទើបកម្លាំងប្រឆាំងមិនអាចរួបរួមបាន។ លោកបានបន្តនិយាយថា សូម្បីខ្លួនលោកផ្ទាល់ក៏រងគ្រោះ ដោយសារការចោទលាបពណ៌ពីលោក សម រង្ស៊ី នេះដែរ៕
