ភ្នំពេញ ៖ នារសៀលថ្ងៃពុធ ០៩កើត ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៩ ខែកក្កដា ឆ្នាំ២០២០នេះ រដ្ឋបាលរាជធានីភ្នំពេញបានបើកកិច្ចប្រជុំស្ដីពីការត្រួតពិនិត្យសំណង់ក្នុងរាជធានីភ្នំពេញ ក្រោមអធិបតីភាពឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ ដោយមានការចូលរួមពីមន្ទីរអង្គភាពជំនាញពាក់ព័ន្ធ និងលោក លោកស្រី អភិបាល អភិបាលរងខណ្ឌទាំង១៤ក្នុងរាជធានីភ្នំពេញ។

ថ្លែងក្នុងកិច្ចប្រជុំ ឯកឧត្តម ឃួង ស្រេង បានលើកឡើងថា គ្រប់សំណង់អគារទាំងអស់ក្នុងរាជធានីភ្នំពេញ ត្រូវតែគោរពតាមបទដ្ឋានបច្ចេកទេសសំណង់ និងមានច្បាប់អនុញ្ញាតសាងសង់ ដើម្បីធានាឱ្យបាននូវគុណភាពសំណង់អគារគង់វង្សយូរអង្វែង ចំពោះសំណង់ដែលមានសភាពចាស់ទ្រុឌទ្រោមរដ្ឋបាលខណ្ឌទាំង១៤ ត្រូវចេញសេចក្ដីជូនដំណឹង និងចុះណែនាំជូនបងប្អូនប្រជាពលរដ្ឋដែលរស់នៅក្នុងនោះមានការប្រុងប្រយ័ត្នខ្ពស់។

ជាមួយគ្នានោះ ឯកឧត្តម ឃួង ស្រេង បានព្រមានវាយកម្ទេចចោល ចំពោះសំណង់ខុសប្លង់អនុញ្ញាត ដែលអាចបង្កហានិភ័យដល់មនុស្ស ហើយត្រូវអាជ្ញាធរខណ្ឌ និងមន្ត្រីពាក់ព័ន្ធទាំងអស់ត្រូវចាត់វិធានការ គ្រប់ការដ្ឋានសំណង់ដែលបានសាងសង់ឡើងដោយគ្មានច្បាប់ និងមានច្បាប់ហើយ តែការសាងសង់ខុសពីច្បាប់ដែលបានអនុញ្ញាតជៀសវាងនូវហានិភ័យផ្សេងៗ។

ឯកឧត្តមបានថ្លែងយ៉ាងដូច្នេះថា «ការសង់សំណង់ខុសច្បាប់អនុញ្ញាតិ ត្រូវបានហាមឃាត់ ឬវាយចោលតែម្ដង ដោយមិនត្រូវទុកឲ្យមានការភ័យ កើតឡើងទេ។ បញ្ហាបែបនេះយើងធ្លាប់បានវាយ និងកាត់សំណង់កំពស់១០ជាន់រួចម្តងហើយ ការធ្វើដូច្នេះ គឺដើម្បីកុំឲ្យមានហានិភ័យកើតឡើងប៉ះពាល់ ដល់អាយុជីវិតមនុស្ស»។

អភិបាលរាជធានីភ្នំពេញ បានបញ្ជាក់ផងដែរថា ក្នុងនាមរដ្ឋបាលរាជធានីភ្នំពេញ ឯកឧត្តមគាំទ្រជានិច្ចចំពោះការបើកការដ្ឋានឲ្យសាងសង់សំណង់ផ្សេងៗ ដើម្បីអភិវឌ្ឍន៍រាជធានីភ្នំពេញឲ្យកាន់តែរីកចម្រើន ប៉ុន្តែអាជ្ញាធររាជធានីភ្នំពេញ មិនគាំទ្រចំពោះសំណង់គ្មានច្បាប់ និងសំណង់ដែលធ្វើខុសប្លង់អនុញ្ញាតនោះដែរ។

ដោយឡែក ចំពោះសំណង់ដែលមានអាយុកាលចាស់ទ្រុឌទ្រោម ឯកឧត្តមជំរុញឲ្យអាជ្ញាធរខណ្ឌទាំងអស់ ត្រូវយកចិត្តទុកដាក់ឲ្យបានខ្លាំងក្លា ពិសេសត្រូវធ្វើការណែនាំ ប្រជាពលរដ្ឋដែលលក់ដូរនៅក្រោមអគារចាស់ៗ និងអ្នកស្នាក់នៅអគារចាស់ក្នុងរាជធានីភ្នំពេញ ឲ្យឲ្យពួកគាត់ប្រុងប្រយ័ត្ន និងធ្វើកិច្ចសន្យាជាមួយពួកគាត់ជៀស វាងមានហានិភ័យអ្វីកើតឡើង បន្ទោសអាជ្ញាធរ ថាមិនបានយកចិត្តទុកដាក់ចំពោះពួកគាត់។

ទោះបីជាយ៉ាងណាក្តី អាជ្ញាធររាជធានីភ្នំពេញនឹងពិនិត្យលទ្ធភាព ដើម្បីស្វែងរកអ្នកវិនិយោគ ក្នុងការទិញទីតាំងអាគារចាស់ៗទាំងនេះ ជាមួយនឹងការស្ម័គ្រចិត្តរបស់ប្រជាពលរដ្ឋ ដែលស្នាក់នៅក្នុងតម្លៃឯកភាពគ្នាណាមួយ ព្រោះថាការរស់នៅក្នុងអគារចាស់ៗទាំងនេះ មានហានិភ័យខ្ពស់ណាស់៕ 

ខេត្តកំពង់ចាម ៖ បន្ទាប់ពីមានការឯកភាពនៅក្នុងអង្គប្រជុំ អភិបាលខេត្តកំពង់ចាម លោក អ៊ុន ចាន់ដា បានចាត់ឲ្យអភិបាលរងខេត្តលោក អ៊ុភឿន គុណវុឌ្ឍ ដឹកនាំក្រុមការងារចុះប្រតិបត្តិការដើម្បីរៀបចំសណ្ដាប់ធ្នាប់ទីប្រជុំជនផ្សារផ្អាវឡើងវិញ។

ដូចការគ្រោងទុក ប្រតិបត្តិការនេះបានចាប់ផ្ដើមអនុវត្តក្រោយមានកិច្ចប្រជុំដោយអភិបាលខេត្តកំពង់ចាម ឯកឧត្តម អ៊ុន ចាន់ដា កាលពីថ្ងៃទី២៥ ខែកក្កដា ឆ្នាំ ២០២០ ពិភាក្សាទៅលើកិច្ចការរៀបចំសណ្ដាប់ធ្នាប់ទីប្រជុំជនផ្សារផ្អាវ ដោយហេតុថាកន្លងមក នៅតំបន់ទីប្រជុំជនផ្សារផ្អាវនេះ មានការលក់ដូររំលោភលើចំណីផ្លូវ និងបង្ករភាពអនាធិបតេយ្យ ធ្វើឱ្យមានការកកស្ទះបាត់បង់សណ្ដាប់ធ្នាប់ ។

បើតាមអភិបាលស្រុកបាធាយ លោកផេន សុផល បានឲ្យដឹងថា នៅក្នុងផ្សារផ្អាវ មានជាង ២០០ តូប ដោយឡែកនៅផ្នែកខាងក្រៅផ្សារ ជាប់នឹងដងផ្លូវលេខ៦ នឹងផ្លូវសម្ដេចតេជោ មានជាង ៥០ គ្រែលក់មុខផ្សារ និងក្រោយ ១០ផ្ទះ និង កន្លែងលក់ត្រី មាន ១៥០ កន្លែង ។

ហើយកន្លែងលក់ ដែលបង្ករភាពអណាធិបតេយ្យ គឺមានជាង ១០០ កន្លែង អមសងខាងផ្លូវ សម្តេចតេជោ ខាងកើត និងខាងលិច ។

ចំណែកជាប់ផ្លូវលេខ៦ មានជាង ៨០ កន្លែង ដែលក្នុងនោះមានការធ្វើសំយ៉ាបខិតមកថ្នល់ ដែលបង្ករឲ្យមានការបាត់សោភ័ណភាព នៅទីប្រជុំជនផ្សារនេះផងដែរ ។

នៅព្រឹកថ្ងៃទី២៨ ខែកក្កដា នេះផងដែរ ក្រុមមន្ត្រីជំនាញនិងអាជ្ញាធរដែនដី បានចុះវាស់វែងដោយកំណត់ យកត្រឹមមាត់លូចូលក្នុងប្រវែង ២ ម៉ែត្រ នៃថ្នល់ជាតិទាំងសងខាង ។

ទន្ទឹមនឹងនោះក្រុមអាជ្ញាធរបានធ្វើការផ្សព្វផ្សាយដល់ប្រជាពលរដ្ឋក៏ដូចជាក្រុមអាជីវករដែលបានសាងសង់ប៉ះពាល់លើដីចំណីផ្លូវ នឹងត្រូវឲ្យរៀបចំរួសរើក្នុងរយៈពេល ៣ថ្ងៃ មុនពេលអាជ្ញាធរចុះធ្វើការឈូសឆាយ ។

ក្នុងខណៈពេលដែលក្រុមអាជ្ញាធរចេញប្រតិបត្តិការរៀបចំសណ្ដាប់ធ្នាប់ទីប្រជុំជនផ្សារផ្អាវនេះ ក៏មានមតិប្រជាពលរដ្ឋជាច្រើនបានសាទរ ពេញចិត្តនឹងចំណាត់ការនេះ ដោយពួកគាត់អះអាងថា នឹងអស់កង្វល់បញ្ហាកកស្ទះ ឬបង្ករការគ្រោះថ្នាក់ចរាចរណ៍ផ្សេងៗ និងអាចនាំទីប្រជុំជនជនផ្សារផ្អាវមានសោភ័ណភាពល្អ៕ ដោយ ៖ ប៉ែន សុផល

ភ្នំពេញ ៖ ឯកឧត្តម កុយ គួង អ្នកនាំពាក្យក្រសួងការបរទេសកម្ពុជាបានបញ្ជាក់ថា កម្ពុជាគ្រោងនឹងរៀបចំកិច្ចប្រជុំកំពូលអាស៊ី-អឺរ៉ុប (ASEM) លើកទី១៣ ក្នុងខែឧសភា ឬខែមិថុនា នៅពាក់កណ្ដាលឆ្នាំក្រោយ បន្ទាប់ពីកិច្ចប្រជុំដែលគ្រោងធ្វើនៅពាក់កណ្តាល ខែវិច្ឆិកា ឆ្នាំ២០២០ ក្រោមមូលបទ “ការពង្រឹងពហុភាគីនិយម ដើម្បីកំណើនរួមគ្នា” ត្រូវបានខកខាន ដោយសារតែវិបត្តិនៃជំងឺកូវីដ-១៩។
បើតាមសេចក្ដីប្រកាសព័ត៌មានស្ដីពីកិច្ចប្រជុំនេះកាលពីថ្ងៃទី២ ដល់ថ្ងៃទី៣ ខែកក្កដា ឆ្នាំ២០២០ បានបញ្ជាក់ថា ដោយសារតែផលវិបាកអាក្រក់នៃការរីករាលដាលនៃជំងឺកូវីដ-១៩ ឧត្ដមមន្ដ្រីទទួលបន្ទុកកិច្ចប្រជុំអាស៊ី-អឺរ៉ុប ទាំងអស់បានបង្ហាញការឯកភាពប្រកបដោយស្មារតីយោគយល់ និងគាំទ្រជាឯកច្ឆន្ទចំពោះសំណើរបស់កម្ពុជា សុំលើកពេលរៀបចំកិច្ចប្រជុំកំពូលនេះទៅប្រព្រឹត្តនៅពាក់កណ្ដាលឆ្នាំ២០២០ វិញ។

យោងតាមសេចក្ដីប្រកាសព័ត៌មានស្ដីពីកិច្ចប្រជុំនេះកាលពីថ្ងៃទី២ ដល់ថ្ងៃទី៣ កក្កដា ឆ្នាំ២០២០ បានឱ្យដឹងថា ដោយសារតែផលវិបាកអាក្រក់នៃការរីករាលដាលនៃជំងឺកូវីដ-១៩ ឧត្ដមមន្ដ្រីទទួលបន្ទុកកិច្ចប្រជុំអាស៊ី-អឺរ៉ុប ទាំងអស់បានបង្ហាញការឯកភាពប្រកបដោយស្មារតីយោគយល់ និងគាំទ្រជាឯកច្ឆន្ទចំពោះសំណើរបស់កម្ពុជា សុំលើកពេលរៀបចំកិច្ចប្រជុំកំពូលនេះទៅប្រព្រឹត្តនៅពាក់កណ្ដាលឆ្នាំ២០២១ វិញ៕

ខេត្តបន្ទាយមានជ័យ ៖ មានការភ្ញាក់ផ្អើលមួយបានកើតឡើងកាលពីវេលាម៉ោង៥ល្ងាចថ្ងៃទី២៨ ខែកក្កដាឆ្នាំ២០២០ខណៈដែលមានសំលេងផ្ទុះចេញពីចំនុចចំការមីនក្បែរបន្ទាត់ព្រំដែនកម្ពុជា-ថៃចន្លោះបង្គោលសីម៉ាលេខ២៨-២៩ នៅចំណុចខាងលិចភូមិដងរ៉ែក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។ក្រោយមានករណីផ្ទុះកម្លាំងនគរបាលព្រំដែនបានចុះពិនិត្យទីតាំងផ្ទុះហើយបានជួយសង្គ្រោះយុវជនម្នាក់បញ្ជូនទៅកាន់មន្ទីរពេទ្យ។
លោកវរសេនីយ៍ឯក សៅ សារឿន អធិការនគរបាល ស្រុកថ្មពួក បានឲ្យដឹងថាក្មេងប្រុសដែលជួយសង្គ្រោះចេញពីចំការមីនមាន ឈ្មោះ ឈុំ ខេន អាយុ១៤ឆ្នាំ មានទីលំនៅភូមិដងរ៉ែក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ។
លោក អធិការបានបញ្ជាក់ថានៅមុនពេលកើតហេតុ ក្មេងរងគ្រោះបានបានចេញពីផ្ទះដើរចូលទៅក្នុងទឹកដីថៃតាមបន្ទាត់ព្រំដែន ដើម្បីដាក់អន្ទាក់សត្វនិងដើររកជីកទំពាំងយកមកធ្វើម្ហូប។ តែដោយខ្វះការប្រុងប្រយត្ន័បានជាន់មីនបណ្តាលឲ្យផ្ទុះរងរបួសធ្ងន់ជើងទាំង២និងខ្លួនប្រាណសុះសាច់ ។
លោកវរសេនីយ៍ឯក សៅ សារឿន អធិការនគរបាលស្រុថ្មពួក បានបញ្ជាក់ថាចំនុចចំការមីនខាងលើបានសំលាប់និងបង្កគ្រោះថ្នាក់ដល់មនុស្សជាច្រើននាក់មកហើយ ដែលអ្នកទាំងនោះសុទ្ធសឹងជាអ្នកដែលចូលទៅជីកទំពាំង ដាក់អន្ទាក់សត្វ គោះអង្ក្រង បេះផ្លែឈើនិងរុករកអនុផលព្រៃឈើ។លោកបានធ្វើការអំពាវនាវដល់បងប្អូនប្រជាពលរដ្ឋ សូមបង្កើនការប្រុងប្រយ័ត្ន បញ្ឈប់ការរុករកអនុផលព្រៃឈើឬក៏ដាក់អន្ទាក់សត្វ ក្នុងតំបន់គ្រោះថ្នាក់នេះទៀតព្រោះមីននិងគ្រាប់យុទ្ធភ័ណ្ឌមិនទាន់ផ្ទុះដែលបន្សល់ទុកក្រោមដីមិនភ្លេចយើងទេ អោយតែយើងធ្វេសប្រហែសតែមួយវិនាទីគឺបន្សល់វិប្បដិសារីអស់មួយជីវិត៕

ភ្នំពេញ ៖ ក្រសួងធនធានទឹក និងឧតុនិយម នៅព្រឹកថ្ងៃទី២៩ ខែកក្កដា ឆ្នាំ២០២០នេះ បានបង្ហាញស្ថានភាពកម្ពស់ទឹក នៅតាមបណ្តាស្ថានីយជលសាស្ត្រទាំង៨ រួមមានស្ថានីយ៖

១- ទន្លេមេគង្គ-ស្ទឹងត្រែង
២- ទន្លេមេគង្គ-ក្រចេះ
៣- ទន្លេមេគង្គ-កំពង់ចាម
៤- ទន្លេបាសាក់-ចតុមុខ
៥- ទន្លេមេគង្គ-អ្នកលឿង
៦- ទន្លេបាសាក់-កោះខែល
៧- ទន្លេសាប-ព្រែកក្តាម
៨- ទន្លេសាប-កំពង់លួង៕

​ភ្នំពេញ ៖ កម្ពុជា​នឹងមាន​ទំនិញ​ជាង​៣០០​មុខ​នាំទៅ​ចិន ក្នុងនោះ​៩៥% ​មិន​គិត​ពន្ធ​នៅពេល​កិច្ចព្រមព្រៀង​ពាណិជ្ជកម្ម​សេរី​ទ្វេ ភាគី​កម្ពុជា​ចិន ​(FTA) ​ចូល​ជា​ធរមាន នៅ​ដើមឆ្នាំ​២០២១​ខាងមុខ។ នេះ​បើ​យោងតាម​ការអះអាង​រួមគ្នា​របស់​មន្ត្រីជាន់ខ្ពស់​មកពី​ក្រសួងពាណិជ្ជកម្ម នៅក្នុង​សន្និសីទ​សារព័ត៌មាន​រៀបចំ​ដោយ​ទីស្ដីការគណៈរដ្ឋមន្ត្រី​នៅ​ថ្ងៃទី​២៨ ខែកក្កដា ឆ្នាំ​២០២០​នេះ។​

​រដ្ឋលេខាធិការ​ក្រសួងពាណិជ្ជកម្ម លោក សុខ សុ​ភ័​ក្រ បាន​ថ្លែងថា ទំនិញ​ជាង​៣០០​មុខ​ដែល​ត្រូវ​នាំទៅ​ចិន​ភាគច្រើន​គឺជា​ផ​លិ​ផល​កសិកម្ម និង​ផលិតផល​សម្រេច​ចេញពី​ឧស្សាហកម្ម​កែច្នៃ​។ ក្នុងចំណោម​មុខទំនិញ​ជាង​៣០០​មុខ​នេះ គឺ​ផលិតផល​កសិកម្ម​៩៥​ភាគរយ​ត្រូវបាន​រួច​ពន្ធ​សម្រាប់​ការនាំ​ចេញទៅ​ចិន​ដូចជាៈ​ម្រេច ម្ទេស​ក្រៀម ផ្លែឈើ ត្រី​សាច់ ជាដើម​។ ចំណែក​មុខទំនិញ ដែល​ចិន​គិត​ពន្ធ​ពី​ក​កម្ពុជា គឺជា​ប្រភេទ​គ្រឿងចក្រ និង​យានយន្ត​ផ្សេងៗ​។ លោក​ថា មូលហេតុ​ដែល​ចិន គិត​ពន្ធ​លើ​មុខទំនិញ​ទាំងនេះ​ដោយសារ​ចិន មិន​ចង់ឱ្យ​ការ​នាំចូល​ទីផ្សារ​ខ្លួន ប៉ះពាល់​ផលិតផល​ក្នុងស្រុក​។​

លោក សុខ សុភ័ក្ត្រ បាន​បញ្ជាក់ដែរថា កាលពីមុន មុខទំនិញ​ដែល​ប្រទេស​កម្ពុជា នាំចូល​ទៅកាន់​ប្រទេស​ចិន រួមមាន​៖ ម្រេច ត្រូវ​ភាគី​ចិន យកពន្ធ ២០​ភាគរយ ប៉ុន្តែ ក្រោយ​កិច្ចព្រមព្រៀង​ពាណិជ្ជកម្ម​សេរី​កម្ពុជា​-​ចិន​ចូល​ជា​ធរមាន​នោះ ម្រេច​កម្ពុជា​ត្រូវបាន បញ្ចុះ​ពន្ធ ០% បន្ថែម​ពីនេះ​សម្រាប់​ម្រេច​ក្រៀម​ដែល​ប្រជាកសិករ​ដាំ​បានន​ភ​ខេត្តតាកែវ ក៏ត្រូវ​បាន​ចុះ​ពន្ធ​០% បូករួម​ទាំង​ម្ទេស​ក្រៀម​ជាដើម។​

​មន្ត្រីជាន់ខ្ពស់​រូបនេះបាន​បន្តថា ក្រៅពី​មុខទំនិញ​ទាំងនេះ កម្ពុជា​ក៏​អាច​នាំចេញ​ត្រី សាច់ គ្រំ ខ្យង ក្តាម ព្រមទាំង​ផលិត​មួយចំនួនធំ​ទៀត ទៅកាន់​ប្រទេស​ចិន​ផងដែរ​។​

​ចំពោះ​ការឆ្លើយតប​ទៅនឹង​ការលើកឡើង​ដែលថា ចិន​ចំណេញ​ជាង​កម្ពុជា ពី​កិច្ច​ព្រម​ព្រៀម​ពាណិជ្ជកម្ម​សេរី​ទ្វេភាគី​នោះ លោកបាន​គូសបញ្ជាក់ថា គ្មាន​នរណា​ចំណេញ​ជាង​នរណា​ឡើយ​ក្នុង​កិច្ចព្រមព្រៀង​នេះ​។ លោកថា ទោះជា​គ្មាន​កិច្ចព្រមព្រៀង​ពាណិជ្ជកម្ម​សេរី​ក៏​កម្ពុជា​ត្រូវតែ​នាំ​ទំនិញ​មកពី​ចិន​ដដែល​។ ផ្ទុយទៅវិញ​កម្ពុជា​ទទួល​បានការ​អនុគ្រោះ​ក្នុងការ​នាំចេញ​ទំនិញ​ទៅ​ចិន​ដោយ​មិន​គិត​ពន្ធ​ប្រមាណ​៩៥% ឯណោះ។ បន្ថែម​លើ​នេះ​ប្រយោជន៍​ដែល​កម្ពុជា​ទទួលបាន​ពី​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​គឺ​ការនាំចេញ​ទំនិញ​ទៅ​ចិន​អាចមាន​ការកើនឡើង​២៥​ភាគរយ៕