ភ្នំពេញ ៖ គិតចាប់ពីឆ្នាំ២០១៤ ដល់ខែមិថុនា ឆ្នាំ២០២០នេះ មានជនបរទេស សរុបចំនួន១៧,២៣០នាក់ ស្រី២,៩៧១នាក់ ស្មើនឹង១០៤សញ្ជាតិ ត្រូវបានបណ្ដេញចេញពីប្រទេសកម្ពុជា ក្រោយរកឃើញថាចូលមកធ្វើការ និងរស់នៅដោយខុសច្បាប់។

របាយការណ៍ក្នុងកិច្ចប្រជុំបូកសរុបលទ្ធផលការងារ ប្រចាំឆមាសទី១ និងលើកទិសដៅបន្ដរបស់អគ្គនាយកដ្ឋានអន្ដោប្រវេសន៍ នៅព្រឹកថ្ងៃទី១៧ ខែកក្កដា ឆ្នាំ២០២០នេះ បានបង្ហាញថា បច្ចុប្បន្ន មានជនបរទេសកំពុងស្នាក់នៅកន្លែងត្រៀមបណ្ដេញចេញ នៅមណ្ឌលភ្នំពេញ សៀមរាប និងខេត្តព្រះសីហនុ ចំនួន៩៣នាក់ ស្រី៨នាក់ មាន២០សញ្ជាតិ។

ដោយឡែក ក្នុងឆមាសទី១នេះ បទល្មើសបង្កដោយជនបរទេស មានចំនួន ៤០២នាក់/ ៧៧៦នាក់ ថយចុះ ៤៨,១៩% បើប្រៀបធៀបទៅនឹងឆមាសទី១ ឆ្នាំ២០១៩។ ជាក់ស្តែងបានឃាត់ខ្លួនចំនួន ៣៦៤នាក់/៧៥៦នាក់ មាន ៣៤សញ្ជាតិ (ភាគច្រើន ជនជាតិចិន ១២៣នាក់, វៀតណាម ១០៩នាក់ នីហ្សេរីយ៉ា ៣៨នាក់,អាមេរិក ១៦នាក់ និង ៣០សញ្ជាតិទៀត ពី១ដល់៩នាក់)។

យោងតាមរបាយការណ៍បានបង្ហាញថា ដោយស្ថានភាពប្រឈមជាទូទៅនៅលើពិភពលោក ចំពោះការរាតត្បាតនៃជំងឺរីកូរីដ-១៩ បានធ្វើឲ្យអាជ្ញាធរគ្រប់ប្រទេស ផ្អាកជាបណ្ដោះអាសន្នការចរាចរឆ្លងដែន ទាំងផ្លូវអាកាស ផ្លូវគោក និងផ្លូវ ទឹក ចាប់ពីខែមីនាមក បណ្ដាលឲ្យភ្ញៀវបរទេសចូលកម្ពុជាមានការថយចុះយ៉ាងគំហុក។

ជាក់ស្តែង ក្នុងឆមាសទី១នេះ ភ្ញៀវថយចុះ ៥៥,៦៨% ប្រៀបធៀបទៅឆមាសទី១ ឆ្នាំ២០១៩ ក្នុងនោះ ភ្ញៀវទេសចរថយចុះ ៥៣,៨៦% អ្នកជំនួញ៦៦,១០% ។

ជាមួយនោះ ប្រជាពលរដ្ឋខ្មែរដែលធ្វើដំណើរចេញទៅ បរទេស ថយចុះ ៦២,១៦% និងពលករខ្មែរទៅធ្វើការខុសច្បាប់នៅក្រៅប្រទេស ដែលត្រូវបានអាជ្ញាធរបរ ទេសចាប់បញ្ជូនមកវិញ ក៏ថយចុះ ៦០,៣៩%៕

ខេត្តកំពង់ចាម ៖ គម្រោង មូលនិធិ ឃុំ -សង្កាត់ ឆ្នាំ ២០២០ របស់ គណៈកម្មការ ជាតិ សម្រាប់ ការអភិវឌ្ឍន៍ តាម បែប ប្រជាធិបតេយ្យ នៅ ថ្នាក់ ក្រោម ជាតិ ត្រូវ បាន ដាក់ ឲ្យ ដំណើរ ការ ដេញ ថ្លៃ ចំនួន៣គម្រោង នា ព្រឹក ថ្ងៃ ទី ១៦ ខែកក្កដា ឆ្នាំ ២០២០ នៅ សាលា ស្រុក ស្រីសន្ធរ ក្រោម វត្តមាន លោក ឡី មិច នាយក រង រដ្ឋបាល សាលា ខេត្ត កំពង់ចាម និង លោក បេត រ៉េងឃីម អភិបាល រង ស្រុក ស្រីសន្ធរ ដោយ មាន ការ ចូលរួម ពី គណៈកម្មការ ម្ចាស់ លទ្ធកម្ម និង តំណាង ក្រុម ហ៊ុន អ្នក ទទួល ការ ជា ច្រើន រូប ផង ដែរ ។
ក្នុង នាម អាជ្ញាធរ ខេត្ត លោក ឡី មិច បាន ថ្លែង អំណរគុណ ដល់ អាជ្ញាធរ ស្រុក ស្រីសន្ធរ ដែល បាន រៀបចំ នីតិវិធី នៃ ការ ដេញ ថ្លៃ នេះ ឲ្យ មាន សណ្ដាប់ ធ្នាប់ របៀបរៀបរយ ល្អ ព្រមទាំង បាន សំណូមពរ ដល់ តំណាង ក្រុម ហ៊ុន ឲ្យ គោរព តាម ក្រមសីលធម៌ របស់ អ្នក ទទួល ការ និង ចូលរួម សហការ ជាមួយ អាជ្ញាធរ ដេីម្បី លុបបំបាត់នូវ ភាព អនាធិបតេយ្យ ដែល បង្ក ឡើង ដោយ ក្រុម ឆ្លៀត ឱកាស មួយ ចំនួន ផងដែរ ។

ជាមួយគ្នា នោះ លោក បេត រ៉េងឃីម អភិបាល រង ស្រុក ស្រីសន្ធរ ក៏បាន ធ្វើ ការ សំណូមពរ ដល់ ក្រុម អ្នក ទទួល ការ ដែល បាន ធ្វើ ការ ប្រកួតប្រជែង ដេញ ថ្លៃ បាន គម្រោងនេះ គឺសូម ឲ្យ ការអនុវត្ត គម្រោង ធ្វើ យ៉ាងណា ត្រូវ ឲ្យ មាន តម្លាភាព ហេីយ ធ្វើ ការ សាងសង់ ឲ្យ ត្រូវ តាម បទដ្ឋាន លក្ខណៈ បច្ចេកទេស ប្រយោជន៍ ដល់ ការ ប្រើប្រាស់ ដោយ គម្រោង ដែល បាន ដាក់ ឲ្យ ដេញ ថ្លៃ នេះ គឺមាន ផ្លូវ ចំនួន ៣ខ្សែ ដែល ត្រូវ ស្ថាបនា ជូន ប្រជាពលរដ្ឋ ប្រើប្រាស់ ក្នុង នោះ មាន ១-ឃុំទងត្រឡាច សាងសង់ផ្លូវបេតុងអាមេ ប្រវែង០.៤៣០ គ.ម ទទឹង៣ម កម្រាស់០.១៥ម នៅភូមិទងត្រឡាច ។
២-ឃុំ ព្រែក ដំបូក សាងសង់ផ្លូវបេតុងអាមេ ប្រវែង០.៥៧០ គ.ម ទទឹង៤ម នៅភូមិស្វាយម៉ូ ។
៣-ឃុំ ស្វាយ ខ្សាច់ ភ្នំ សាងសង់ផ្លូវបេតុងអាមេ ប្រវែង០.២៩០ គ.ម ទទឹង៦ម នៅភូមិស្វាយត្បូង ៕ ដោយ ៖ ប៉ែន សុផល

ភ្នំពេញ ៖​ក្នុងខែមិថុនា ឆ្នាំ២០២០ លេខាធិការដ្ឋានរបស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ចាប់បានរថយន្តដឹកទំនិញលើសទម្ងន់កម្រិតកំណត់ ចំនួន ២២៨គ្រឿង និងពិន័យបានថវិកាសរុបចំនួន ៤០៤ ៨៤០ ០០០រៀល។ តាមរបាយការណ៍ ចំនួនរថយន្តដែលចាប់បានមានការថយចុះចំនួន ៤៨គ្រឿង បើប្រៀបធៀបទៅនឹងតួលេខខែមេសា ឆ្នាំ២០២០ ដែលមានចំនួន ២៧៦គ្រឿង។

ក្នុងចំណោមរថយន្តដែលចាប់បាននោះគិតចំនួនជាភាគរយមានដូចខាងក្រោម៖

• លើសពី ៥%-១០% មានចំនួន ១០គ្រឿង
• លើសពី ១០%-២០% មានចំនួន ១៣០គ្រឿង
• លើសពី ២០% មានចំនួន ៨៨គ្រឿង

សូមម្ចាស់រថយន្តដឹកទំនិញមេត្តាគោរពច្បាប់ និងកុំដឹកលើសទម្ងន់កម្រិតកំណត់ ដែលអាចបំផ្លាញផ្លូវជាតិ និងខាតបង់ថវិកាជាតិ៕

ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១៦ ខែកក្កដានេះ បានចេញប្រកាស ស្តីពីការអនុញ្ញាតឲ្យកម្មករនិយោជិត នៃរោងចក្រ សហគ្រាសទាំងអស់ ឈប់សម្រាករយៈពេល៥ ថ្ងៃ នៅថ្ងៃទី១៧ ទី១៨ ទី១៩ ទី២០ និងទី២១ ខែសីហា ឆ្នាំ២០២០ ដោយមានប្រាក់ឈ្នួល ដើម្បីសងថ្ងៃឈប់សម្រាក ក្នុងឱកាសបុណ្យចូលឆ្នាំថ្មីប្រពៃណីជាតិ ឆ្នាំ២០២០។

សូមជម្រាបថា កាលពីថ្ងៃទី០៨ ខែមេសា ឆ្នាំ២០២០ ប្រមុខរាជរដ្ឋាភិបាលកម្ពុជា បានចេញអនុក្រឹត្យ សម្រេចលើកពេលដោយមិនកំណត់ សម្រាប់ការឈប់សម្រាករយៈពេល៤ថ្ងៃ នៅក្នុងឱកាសបុណ្យចូលឆ្នាំថ្មី ដោយអំឡុងពេលនោះមន្រ្តីរាជការ កម្មករនិយោជិត ត្រូវបំពេញការងារជាធម្មតា ដើម្បីចូលរួមបង្ការ ទប់ស្កាត់ និងប្រយុទ្ធប្រឆាំងនឹងការរីករាលដាលជំងឺកូវីដ១៩ នៅក្នុងប្រទេសកម្ពុជា។
នៅថ្ងៃទី១៥ ខែកក្កដា ឆ្នាំ២០២០ សម្តេចតេជោ បានចេញអនុក្រឹត្យផ្លូវការ ស្តីពីការអនុញ្ញាតឲ្យមន្ត្រីរាជការ កម្មករ និយោជិត ឈប់សម្រាកការងារចាប់ពីថ្ងៃទី១៧-២១ ខែសីហា ឆ្នាំ២០២០ សងថ្ងៃបុណ្យចូលឆ្នាំថ្មី៕ 

ខេត្តកំពង់ចាម ៖ លោក ឡី មិច នាយករងរដ្ឋបាលសាលាខេត្តកំពង់ចាមបានសំណូមពរដល់អ្នកសារព័ត៌មាន ក៏ដូចជាអាជ្ញាធរស្រុក និងម្ចាស់លទ្ធកម្មសូមឲ្យចូលរួមទាំងអស់គ្នាក្នុងការជួយពិនិត្យ និង តាមដានក្នុងដំណើរការដេញថ្លៃគម្រោងមូលនិធិឃុំ បេីមានភាពមិនប្រក្រតីណាមួយ គឺសូមឲ្យរាយការណ៍ជាបន្ទាន់ដេីម្បីចូលរួមដោះស្រាយលុបបំបាត់នូវភាពអសកម្មដែលបង្កឡើងដោយជនឆ្លៀត ឱកាសទាំងឡាយណានោះ។ ការស្នើឡើងយ៉ាងដូច្នេះក្នុងពិធីប្រកាសដាក់ដេញថ្លៃគម្រោងមូលនិធិ ឃុំចំនួន៨គម្រោងរបស់ឃុំទាំង៧នៃស្រុកស្ទឹងត្រង់ នាព្រឹកថ្ងៃទី១៤ ខែកក្កដា ឆ្នាំ២០២០។

ឆ្លៀត ក្នុង ឱកាស នោះ ដែរ លោក ជៀម វុត្ថា អភិបាល រង ស្រុក ស្ទឹងត្រង់ បាន សំណូមពរ ដល់ តំណាង ក្រុម ហ៊ុន ឲ្យ រក្សា របៀបរៀបរយ និង កុំ បង្កភាព អនាធិបតេយ្យ ដែល នាំឲ្យ មាន ការ ប៉ះពាល់ ដល់ ដំណើរការ ដេញ ថ្លៃ និង ការ អភិវឌ្ឍន៍ នៅ មូលដ្ឋាន ទៀត ផង ។

គួរ បញ្ជាក់ ផង ដែរ ថា គម្រោង ដែល បាន ដាក់ ឲ្យ ដេញ ថ្លៃ ខាង លើ នេះ គឺមាន ចំនួន ៨គម្រោង ដែល ត្រូវ ស្ថាបនា ផ្លូវ និង ស្តារ ប្រឡាយ ជូន ប្រជាពលរដ្ឋ ប្រើប្រាស់ ក្នុង នោះ មាន ១-ឃុំ អារក្ស ត្នោត សាងសង់ផ្លូវបេតុងអាមេ ប្រវែង ០.៤០០ គ.ម ទទឹង៤ម កម្រាស់០.១៥ម នៅភូមិ បែកអន្លូង ។
២-ឃុំ ពាមកោះស្នា សាងសង់ផ្លូវបេតុងអាមេ ប្រវែង ០.២១៩ គ.ម ទទឹង៤ម នៅភូមិ កោះកណ្តាល និង ភូមិស្រែស ។
៣-ឃុំ ពាមកោះស្នា ស្តារប្រឡាយដីទួលរការ ប្រវែង ០.៧០០ គ.ម ទទឹងមធ្យម ២២.០៦ម ជម្រៅ១.៧០ ម នៅភូមិទួលរការ ។
៤-ឃុំ ខ្ពបតាងួន សាងសង់ផ្លូវបេតុងអាមេ ប្រវែង ០.៤៣៧ គ.ម ទទឹង៤ម នៅភូមិ ខ្ពបតាងួន ភូមិអន្លង់សំឡី និង ភូមិអូររុន ។
៥-ឃុំ ព្រះ អណ្តូង សាងសង់ផ្លូវបេតុងអាមេ ប្រវែង ០.២៦៧គ.ម ទទឹង៤ម នៅភូមិ ព្រះអណ្តូង២ ។
៦-ឃុំ ព្រែក បាក់ សាងសង់ផ្លូវបេតុងអាមេ ប្រវែង ០.៣៨០គ.ម ទទឹង៤ម នៅភូមិ ព្រែករលួស និង ភូមិព្រែកកក់ ។
៧-ឃុំ មេសជ្រៃ សាងសង់ផ្លូវបេតុងអាមេ ប្រវែង ០.៤០៧គ.ម ទទឹង៤ម នៅភូមិ ក្បាលអូរ និង ភូមិត្រពាំងឈូក ។
៨-ឃុំ សូភាស ជួសជុលផ្លូវក្រាលក្រួសក្រហម ប្រវែង ១.៥០ គ.ម ទទឹង៤ម នៅភូមិ ស្រប ៕ ដោយ ៖ ប៉ែន សុផល

ខេត្តកំពង់ចាម ៖ រដ្ឋរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានអញ្ជើញចូលរួមប្រកាសតែងតាំងលោកស្រី សម ផល្លា ជាប្រធានមន្ទីរព័ត៌មានខេត្តកំពង់ចាមថ្មី ជំនួសលោក ជា ក្រូច ដែលត្រូវចូលនិវត្តន៍។

ពិធីនេះត្រូវបានធ្វើឡើងនាព្រឹកថ្ងៃទី១៥ ខែកក្កដា ឆ្នាំ២០២០ នៅសាលាខេត្តកំពង់ចាមក្រោមវត្តមានលោក ខ្លូត ផន ប្រធាន ក្រុមប្រឹក្សាខេត្ត និងលោក អ៊ុន ចាន់ដា អភិបាលខេត្តកំពង់ចាម ដោយ មានការអញ្ជើញចូលរួមពីប្រតិភូក្រសួងព័ត៌មាន និងថ្នាក់ដឹកនាំមន្ទីរព័ត៌មាន ព្រមទាំងថ្នាក់ដឹកនាំ មន្ទីរអង្គភាពពាក់ព័ន្ធជុំវិញខេត្ត និងអ្នកសារព័ត៌មានជាច្រើនរូបផងដែរ។

បន្ទាប់ ពី ទទួលបាន ការ តែងតាំង លោកស្រី សម ផល្លា ប្រធានមន្ទីរ ព័ត៌មាន ថ្មី បានឡើងប្តេជ្ញាចិត្ត ខិតខំពង្រឹងសាមគ្គីភាពផ្ទៃក្នុង ឲ្យបានល្អនៅក្នុងមន្ទីរ និងបណ្តាការិយាល័យ អង្គភាព ពាក់ព័ន្ធ ជុំវិញខេត្ត កងកម្លាំងប្រដាប់អាវុធអាជ្ញាធរមូលដ្ឋាន ពិសេសអាជ្ញាធរខេត្ត ដោយឈរលើមូលដ្ឋានគោរពតាមបទដ្ឋាននានា និងច្បាប់របស់រដ្ឋ ការពាររដ្ឋធម្មនុញ្ញនៃ ព្រះរាជាណាចក្រ កម្ពុជា។

ថ្លែង ក្នុង ឱកាសនោះ ដែរ ឯកឧត្ដម ខៀវ កាញារីទ្ធ បានផ្ដាំផ្ញើដល់ប្រធាន មន្ទីរ ព័ត៌មាន ថ្មី ឲ្យ ធ្វើ ការ ដឹកនាំ ប្រកប ដោយ ភាព យុត្តិធម៌ និង ត្រូវ មាន ការ ប្រជុំ ជា រៀងរាល់ ព្រឹក ដើម្បី ប្រមូល រាល់ ទិន្នន័យ សកម្មភាព និង ហេតុការណ៍ ផ្សេង ៗ ដេីម្បី រាយការណ៍ ទៅ ដល់ ថ្នាក់ដឹកនាំ និង ធ្វើ ការ ផ្សព្វផ្សាយ ទៅ ដល់ មហាជន ផង ដែរ ។

ជាមួយគ្នា នោះ លោក អ៊ុន ចាន់ដា អភិបាលខេត្ត កំពង់ចាម ក៏បាន ណែនាំ ដល់ ប្រធាន មន្ទីរ ថ្មី ឲ្យ មាន ការ ខិតខំ ពង្រឹង សមត្ថភាព វិវត្តន៍ តាម សម័យ កាល ជឿនលឿន ហើយ ទាមទារ ឲ្យ មាន ការ តាំងចិត្ត មុតមាំ ក្នុង ការ ដឹកនាំ មន្ត្រី ក្រោម ឱវាទ ជាពិសេស ត្រូវ ខិតខំ គ្រប់គ្រងនិង តាមដាន ព័ត៌មាន ដេីម្បី ធ្វើ ការ ប្រឆាំង រាល់ ព័ត៌មាន ក្លែងក្លាយ ហើយ ត្រូវ ខិតខំ ផលិត ព័ត៌មាន បទ យកការណ៍ ដេីម្បី ធ្វើ ការ ផ្សព្វផ្សាយ ផងដែរ ៕ ដោយ ៖ ប៉ែន សុផល

ភ្នំពេញ ៖ ក្រសួងសុខាភិបាល នៅព្រឹកថ្ងៃទី១៦ ខែកក្កដា ឆ្នាំ២០២០នេះ បានចេញសេចក្តីប្រកាសព័ត៌មាន ស្តីពីការរកឃើញករណីវិជ្ជមានវីរុសកូវីដ-១៩ ថ្មី ចំនួន០១នាក់ទៀត លើបងប្អូនខ្មែរដែលធ្វើដំណើរត្រឡប់មកពីប្រទេសអារ៉ាប់ប៊ីសាអូឌី កាលពីថ្ងៃទី១០ ខែកក្កដា ឆ្នាំ២០២០ កន្លងទៅ។

ក្រសួងសុខាភិបាលបានឲ្យដឹងថា អ្នកជំងឺកូវីដ១៩ ដែលទើបរកឃើញនេះ ជាបុរសជានជាតិខ្មែរអាយុ ២៥ឆ្នាំ មានអាស័យដ្ឋាន នៅសង្កាត់ច្រាំងចំរះខណ្ឌឫស្សីកែវ រាជធានីភ្នំពេញ។ បុរសនេះ ជាអ្នកធ្វើដំណើរតាមជើងហោះហើរមកពីប្រទេសអារ៉ាប់ប៊ីសាអូឌី និងបានបន្តជើងហោះហើរពីប្រទេសម៉ាឡេស៊ី មកដល់កម្ពុជានៅថ្ងៃទី១០ ខែកក្កដា ឆ្នាំ២០២០ វេលាម៉ោង១៧៖២៥នាទីល្ងាច។ វត្ថុសំណាកលើកទីបីរបស់ពួកគាត់ ដែលបានធ្វើវិភាគដោយវិទ្យាស្ថានប៉ាស្ទ័រកម្ពុជា ទទួលបានលទ្ធផល វិជ្ជមានវីរុសកូវីដ-១៩ នៅយប់ថ្ងៃទី១៥ ខែកក្កដា ឆ្នាំ២០២០ ហើយ បច្ចុប្បន្នអ្នកជំងឺខាងលើនេះ ត្រូវបានដាក់ឱ្យសម្រាកព្យាបាល នៅមណ្ឌលសុខភាពចាក់អង្រែ រាជធានីភ្នំពេញ។

ក្រសួងសុខាភិបាលបានបញ្ជាក់ទៀតថា ចំពោះអ្នកដំណើរចំនួន៦៩នាក់ ដែលធ្វើដំណើរតាមជើងហោះហើរជាមួយអ្នកវិជ្ជមានកូវីដ-១៩ កំពុងត្រូវបានបន្តធ្វើចត្តាឡីស័កចំនួន១៤ថ្ងៃ នៅមណ្ឌលចត្តាឡីស័កជំពូរវ័ន្ត ក្នុងរាជធានីភ្នំពេញ។

សូមជម្រាបថា គិតត្រឹមម៉ោង០៧៖០០ព្រឹក ថ្ងៃទី១៦ ខែកក្កដា ឆ្នាំ២០២០ នៅកម្ពុជាបានរកឃើញអ្នកជំងឺកូវីដ១៩ សរុបចំនួន១៦៦នាក់ (ស្ត្រី ៤០នាក់ និងបុរស ១២៦នាក់) ចំនួនអ្នកព្យាបាលជាសះស្បើយ សរុបទូទាំងប្រទេសមានចំនួន ១៣៣នាក់ (ស្រី ៣៩នាក់ និងបុរស ៩៤នាក់) អ្នកសម្រាកព្យាបាលនៅក្នុងមន្ទីរពេទ្យរដ្ឋ មានចំនួន៣៣នាក់៕