ភ្នំពេញ ៖ នៅថ្ងៃព្រហស្បតិ៍ ១២កើត ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី ០២ ខែកក្កដា ឆ្នាំ២០២០ នេះ គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី ខេត្ត( គ.យ.ក.ស) បានចេញសេចក្តីប្រកាសព័ត៌មានស្តីពី វឌ្ឍនភាពនៃយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី ខេត្ត ជូនសាធារណ ជនឱ្យបានជ្រាបផងដែរថា យុទ្ឋនាការនេះ ត្រូវបានប្រកាសដាក់ចេញឱ្យអនុវត្ត កាលពីថ្ងៃទី១៨ ខែឧសភា ឆ្នាំ២០២០។

បើគិតត្រឹមថ្ងៃទី ០២ ខែកក្កដា ឆ្នាំ២០២០ នេះ គ.យ.ក.ស បានដំណើរការចំនួន៤២ថ្ងៃប៉ុណ្ណោះ ជាលទ្ធផលសំណុំរឿងព្រហ្មទណ្ឌនៅតាមសាលាដំបូងរាជធានី ខេត្ត ដែលកកស្ទះចំនួន៣៤៥៤ សំណុំរឿង ស្មើនឹង២៧% នៃសំណុំរឿងកកស្ទះសរុបត្រូវបានជំនុំជម្រះរួច។ ទន្ទឹមនឹងនេះ គ.យ.ក.ស រំពឹងទុកថា សាលាដំបូងរាជធានី ខេត្ត ទូទាំងប្រទេសនឹងបន្តការខិតខំដោះស្រាយសំណុំរឿងកកស្ទះទាំងនេះ ឱ្យបានចប់សព្វគ្រប់នៅត្រឹមដំណាច់ឆ្នាំ២០២០នេះ ដោយប្រកាន់ខ្ជាប់នូវអភិក្រមការងារក្នុងយុទ្ធនាការគឺ លឿន ត្រឹមត្រូវ យុត្តិធម៌ និងមិនពុករលួយ៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅព្រឹកថ្ងៃសុក្រ ទី០៣ ខែកក្កដា ឆ្នាំ២០២០នេះ នឹងអញ្ជើញដឹកនាំកិច្ចប្រជុំពេញអង្គរបស់គណៈរដ្ឋមន្រ្តី ដើម្បីពិនិត្យសេចក្តីព្រាងច្បាប់ចំនួន២ និងបញ្ហាផ្សេងៗទៀត។

របៀបវារៈ ដែលគណៈរដ្ឋមន្រ្តី ពិនិត្យនិងពិភាក្សា នៅថ្ងៃសុក្រនេះមានដូចជា ៖
១៖ សេចក្ដីព្រាងច្បាប់ស្ដីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ។
២៖ សេចក្ដីព្រាងច្បាប់ស្ដីពីការគ្រប់គ្រងល្បែងពាណិជ្ជកម្ម។
៣៖ បញ្ហាផ្សេងៗ មួយចំនួនទៀត៕

ភ្នំពេញ ៖ នៅថ្ងៃទី២ ខែកក្កដា ឆ្នាំ២០២០ ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានទទួលជួបសមាគមធុរកិច្ចជប៉ុននៃកម្ពុជា (JBAC) ដើម្បីពិភាក្សាការងារទាក់ទងនឹងការវិនិយោគរបស់ជប៉ុន នៅកម្ពុជា។

ក្នុងជំនួបឯកឧត្តមរដ្ឋមន្ត្រី បានជម្រាបជូនពីការអនុវត្តគោលនយោបាយរបស់កម្ពុជា ក្នុងការពង្រីកទីផ្សារ ក៏ដូចជាទាក់ទាញវិនិយោគ។ តាមរយៈការអនុវត្តគោលនយោបាយ ក្រសួងពាណិជ្ជកម្ម បានដឹកនាំការចរចាកិច្ចព្រមព្រៀងពាណិជ្ជកម្មសេរីក្នុងតំបន់ និងទ្វេភាគី ដោយក្នុងនោះ កិច្ចព្រមព្រៀងភាពជាដៃគូគ្រប់ជ្រុងជ្រោយតំបន់ (RCEP) ដែលកម្ពុជា និងជប៉ុនជាភាគីនឹងបញ្ចប់ និងឈានទៅរកការចុះហត្ថលេខាក្នុងឆ្នាំនេះ។

កិច្ចព្រមព្រៀង RCEP នឹងបង្កើតនូវទីផ្សារទូលំទូលាយសម្រាប់កម្ពុជា ហើយកម្ពុជាក៏កំពុងតែឈានទៅរកការធ្វើឧស្សាហនីយកម្មសេដ្ឋកិច្ចរបស់ខ្លួន ដើម្បីបង្កើតការងារ ក៏ដូចជាបង្កើតតម្លៃបន្ថែមសម្រាប់ផលិតផលក្នុងស្រុក។ ដូចនេះ ឯកឧត្តមរដ្ឋមន្ត្រី បានលើកទឹកចិត្តឲ្យក្រុមហ៊ុនជប៉ុនធ្វើការវិនិយោគបន្ថែមនៅកម្ពុជា ជាពិសេសក្នុងវិស័យឧស្សាហកម្ម និងកែច្នៃផលិតផលកសិកម្ម ដើម្បីទាញយកផលប្រយោជន៍ពីកិច្ចព្រមព្រៀងនេះ។

សមាគម JBAC បានទទួលយកសំណើរបស់ ឯកឧត្តមរដ្ឋមន្ត្រី ហើយក៏បានជម្រាបថា ក្រុមហ៊ុនជប៉ុននៅតែមានបំណងពង្រីក និងមកវិនិយោគបន្ថែមនៅកម្ពុជា ហើយសមាគមនឹងប្រឹងប្រែងឲ្យអស់ពីសមត្ថភាព ដើម្បីទាក់ទាញវិនិយោគិនទាំងនោះមកកម្ពុជា។

ភ្នំពេញ ៖ ក្រសួង​សាធារណការ និង​ដឹកជញ្ជូន បាន​ប្រកាស​ពន្យារពេល​ដល់ការផ្ទេរកម្មសិទ្ធិយានយន្ត​ដែល​រកម្ចាស់ដើមមិនឃើញ ដល់ថ្ងៃទី៣០ ខែកញ្ញា ឆ្នាំ​២០២០។ ការសម្រេចនេះ បន្ទាប់ពីក្រសួង​សង្កេត​ឃើញថា ប្រជាពលរដ្ឋ​ដែលមកទទួលសេវានេះ មានការកើនឡើង​ជាបន្តបន្តាប់ពី​មួយថ្ងៃទៅមួយថ្ងៃ និង​ដោយមានការ​ភ្ញាក់រលឹក​ក្នុងការ​អនុវត្ត​កាតព្វកិច្ច​របស់​ប្រជាពលរដ្ឋ។

ក្នុងករណី​ផុតកំណត់​រយៈពេលខាងលើនេះ ក្រសួង​​គឺតម្រូវ​ឱ្យ​អនុវត្តរាល់​ការផ្ទេរកម្មសិទ្ធិយានយន្ត​គ្រប់​ប្រភេទ ត្រូវមាន​ម្ចាស់ដើម​មកផ្តិតមេដៃ​លើសំណុំឯកសារ​ស្នើសុំ​ផ្ទេរកម្មសិទ្ធិ​យានយន្ត៕

ភ្នំពេញ ៖ តាម​ព័ត៌មាន​ទទួលបាន​អង្គភាព​ប្រឆាំង​អំពើពុករលួយ ( ACU ) បាន​នាំខ្លួន លោក ស៊ូ អា​រ៉ា​ហ្វា​ត់ អភិបាលរង​ខេត្តបាត់ដំបង មក​សាកសួរ ពាក់ព័ន្ធ​នឹង​រឿង​ដីធ្លី​ដ៏​រសើបនៅ​ស្រុក​គាស់ក្រឡ ខេត្តបាត់ដំបង​។ ការនាំ​ខ្លួន​អភិបាលរង​រូបនោះ​គឺធ្វើឡើង កាលពី​ម្សិលមិញ​ដោយ​នាំមក​ទីស្នាក់ការ ACU តែម្តង​។

​សូមជម្រាបថា លោក ស៊ូ អា​រ៉ា​ក់​ហ្វា​ត់ ក៏​ធ្លាប់​ធ្វើជា​ប្រធាន​គណៈកម្មការ​ថ្នាក់​ខេត្ត​ដោះស្រាយ វិវាទ​ដីធ្លី នៅ​ស្រុក​គាស់ក្រឡ នេះ​ផងដែរ​។ នេះ​ជាការ​នាំខ្លួន​មន្ត្រី​សំខាន់ៗ ដែល​គេ​ដឹងថា បាន​ជាប់​ពាក់ព័ន្ធ​ទៅនឹង​បញ្ហាដីធ្លី​នៅ​ស្រុក​គាស់ក្រឡ ខេត្តបាត់ដំបង ខណៈដែល​កាលពី​ថ្មីៗ នេះ ACU ក៏បាន​នាំខ្លួន​និង​ឃុំខ្លួន​ឧកញ៉ា សង ថន ម្នាក់​រួចមកហើយ ហើយក៏​មានការ​ដកតំណែង​ស្រុក​ថែមទៀត។​

​មន្ត្រី ACU បាន​ថ្លែងប្រាប់​បណ្តាញសារព័ត៌មាន​ថា ការឃាត់ខ្លួន​លោក​ឧកញ៉ា សង ថន នេះ ធ្វើឡើង​បន្ទាប់ពី​មាន​ពាក្យបណ្តឹង​របស់​ប្រជាពលរដ្ឋ ខណៈដែល​ឧកញ៉ា​នេះ មាន​ដី​ប្រមាណ​៥​ពាន់​ហិកតា ដែល​ស្មើនឹង​១​ភាគ​៤ នៃ​ផ្ទៃដី​ស្រុក​គាស់ក្រឡ​ទាំងមូល​។ នេះ​ក៏​ជាការ​បង្ហាញ​នូវ​ភាពមិនប្រក្រតី​ផងដែរ​ក្នុង​ការចេញ​ឯកសារ​ផ្តល់​សិទ្ធិ​គ្រប់គ្រង​ដី​ដ៏​ច្រើន​សន្ធឹកសន្ធាប់​នោះ។​

​សូមជម្រាបថា កាលពី​ថ្មីៗ នេះ សម្តេច ហ៊ុន សែន នាយករដ្ឋមន្ត្រី​នៃ​កម្ពុជា ក៏​បានចេញ​អនុក្រឹត្យ បញ្ចប់​មុខតំណែង​លោក ម៉ៅ សុ​ចាន់ ពី​អភិបាល​នៃ​គណៈ​អភិបាល ស្រុក​គាស់ក្រឡ ខេត្តបាត់ដំបង​ដែល​គេ​ដឹងថា មាន​ជាប់​ពាក់ព័ន្ធ​នឹង​បញ្ហាដីធ្លី​នៅ​ស្រុក​គាស់ក្រឡ​នេះ៕

​

ភ្នំពេញ ៖ មហាផ្ទៃ បាន​សម្រេច​ផ្ទេរសមត្ថកិច្ច​ពីអធិការនគរបាលក្រុង ស្រុក ខណ្ឌ ជូនទៅនាយប៉ុស្តិ៍​នគរបាលឃុំ សង្កាត់ ក្នុងការពិនិត្យ និង​សម្រេចផ្តល់សៀវភៅ​ស្នាក់នៅ ទុតិយតាសៀវភៅស្នាក់នៅ លិខិតបញ្ជាក់ទីលំនៅ ការប្រែប្រួល​នៃសមាជិកគ្រួសារ ការផ្លាស់ប្តូរ​ទីលំនៅ និង​រាល់​ការកែតម្រូវ​ទិន្នន័យ​ក្នុងបញ្ជី​ស្នាក់នៅ​ស្របតាម​លិខិតបទដ្ឋាន​គតិយុត្តកំណត់។

សូមអានបន្ថែមខាងក្រោម៖ 

ភ្នំពេញ ៖ លោក វេង​ សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានបញ្ជាក់ឲ្យដឹងថា គិតត្រឹមថ្ងៃទី០១ ខែកក្កដា ឆ្នាំ២០២០ ការងារបង្កបង្កើនផលស្រូវរដូវវស្សា នៅទូទាំងប្រទេសសម្រេចជិត១.៨លានហិកតាស្មើនឹង៦៩.២៤% នៃផែនការជាង២.៥លានហិកតា ខណៈការនាំចេញកសិផលវិញ សម្រេចចំនួនជាង៤លានតោន ដែលមានការកើនឡើងល្អប្រសើរ។

លោកដ្ឋមន្ត្រី វេង សាខុន បានបង្ហាញនូវរបាយការណ៍ល្បឿនការងារបង្កបង្កើនផលរដូវវស្សា និងការនាំចេញផលិផលកសិកម្មយ៉ាងដូច្នេះថា៖

១៖ ល្បឿនការងារបង្កបង្កើនផលស្រូវរដូវវស្សាឆ្នាំ២០២០

គិតមកត្រឹមថ្ងៃទី០១ ខែកក្កដា ឆ្នាំ២០២០ ការងារបង្កបង្កើនផលស្រូវរដូវវស្សា នៅទូទាំងប្រទេសសម្រេចធ្វើការស្ទូង និងព្រួសបាន ១ ៧៩១ ៩៦៤ ហិកតា ស្មើនឹង ៦៩.២៤% នៃផែនការចំនួន ២ ៥៨៨ ១៣០ ហិកតា លើសឆ្នាំមុន ៣៣៧ ៥៩១ ហិកតា ក្នុងនោះមាន៖ ស្រូវស្រាលចំនួន ៥៩៥ ៣០៥ ហិកតា លើសឆ្នាំមុន ៨៤ ៦៨៥ ហិកតា, ស្រូវកណ្តាលចំនួន ៨៣១ ១៦៨ ហិកតា លើសឆ្នាំមុន ២២៤ ៣២២ ហិកតា, ស្រូវធ្ងន់ចំនួន ៣១៤ ៧៩៩ ហិកតា លើសឆ្នាំមុន ២៧ ៧៦៤ ហិកតា, ស្រូវចម្ការចំនួន ១៧ ៦៨២ ហិកតា តិចជាងឆ្នាំមុន ១ ៣២៩ ហិកតា, ស្រូវឡើងទឹកចំនួន ៣៣ ០០៦ ហិកតា ។
ទន្ទឹមនឹងនេះ កសិករបានប្រមូលផលស្រូវស្រាលដើមរដូវវស្សាបានជាបណ្តើរៗ បានចំនួន ១៣ ៨៣៧ ហិកតា ទទួលបរិមាណផលសរុបចំនួន ៥៥ ៥០៥ តោន ទិន្នផលគិតជាមធ្យម ៤.០១តោន/ហិកតា។

២៖ ល្បឿនការងារបង្កបង្កើនផលដំណាំសាកវប្បកម្ម និងដំណាំឧស្សាហកម្ម រដូវវស្សាឆ្នាំ២០២០

ក៖ ការដាំដុះដំណាំសាកវប្បកម្ម៖ (ពោតស, ដំឡូងជ្វា, បន្លែគ្រប់មុខ, ម្ទេស, ឪឡឹក) សម្រេចបាន ៤៣ ៨៩២ ហិកតា ស្មើនឹង៨៨.៨១% នៃផែនការ ៤៩ ៤២០ ហិកតា លើសឆ្នាំមុន ៧ ៩២៩ ហិកតា។

ខ៖ ការដាំដំណាំឧស្សាហកម្ម៖ (ពោតក្រហម ដំឡូងមី សណ្តែកបាយ សណ្តែកដី, សណ្តែកសៀង, ល្ង, អំពៅ, ក្រចៅ, ថ្នាំជក់, និងឈូក) សម្រេចបានចំនួន ៦៤៥ ៥១១ ហិកតា ស្មើនឹង ៧៣.៨១% នៃផែនការ ៨៧៤ ៥៩៥ ហិកតា លើសឆ្នាំមុន ១៤ ៥៧០ ហិកតា។

៣៖ ការនាំចេញផលិតផលកសិកម្ម ឆ្លងកាត់ច្រកចេញចូលតែមួយ និងមិនបានឆ្លងកាត់

ចំពោះការនាំចេញផលិតផលកសិកម្ម ក្នុងរយៈពេល៦ខែ ក្រសួងបានពិនិត្យឃើញថាមានការកើនឡើងល្អប្រសើរ។ ដោយ
ឡែកចំពោះបរិមាណ នៃការនាំចេញផលិតផលកសិកម្មសរុប ចំនួនជាង៤លានតោន ដែលក្នុងនេះមានផលិតផលសំខាន់ៗមួយចំនួនដូចខាងក្រោម៖

១៖ អង្ករ សម្រេចបាន ៣៩៧ ៦៦០ តោន មានកំណើន ៤១.២៥% ដែលធៀបទៅនឹងរយៈពេល៦ខែដើមឆ្នាំ២០១៩ បាននាំចេញទៅកាន់ ៥៦ ប្រទេស។
២៖ ស្រូវ សម្រេចបាន ៩៨៣ ៥០៨ តោន ថយចុះ ៥១.៩០%, នាំចេញទៅកាន់ប្រទេសវៀតណាម (ក្រៅផ្លូវការ)។
៣៖ គ្រប់ស្វាយចន្ទី សម្រេចបាន ១៩៣ ២១៣ តោន មានកំណើន ១៨.០៣%, នាំចេញទៅកាន់ប្រទេស វៀតណាម, ជប៉ុន, រុស្សី, ចិន, ហុងកុង បារាំង និងថៃ
៤៖ ចេកស្រស់ សម្រេចបាន ១៤០ ៥៦៦ តោន មានកំណើន ១៥០.៤២%, បាននាំចេញទៅកាន់ប្រទេស ចិន វៀតណាម និងជប៉ុន ។
៥៖ ក្រូចថ្លុង សម្រេចបាន ១១ ៤០០ តោន ទៅកាន់ប្រទេសថៃ ។
៦៖ ដំណាប់ស្វាយ សម្រេចបាន ៤ ២៧៦ តោន មានកំណើន ២២១,៩៦%, បាននាំចេញទៅកាន់ប្រទេស ចិន, ជប៉ុន, ថៃ, កូរ៉េ និងវៀតណាម។
៧៖ ម្សៅដំឡូងមី សម្រេចបាន ១២ ០០២ តោន បានថយចុះ ៥៣,៩៦%, បាននាំចេញទៅកាន់ប្រទេស ឥណ្ឌា, ចិន, ប៊ែលហ្សិក និងអ៊ីតាលី។
៨៖ ស្វាយស្រស់ សម្រេចបាន ៤៦ ២០០ តោន មានកំណើន ៥៨,១៤%, បាននាំចេញទៅកាន់ប្រទេស ថៃ, វៀតណាម, បារាំង, រុស្សី, កូរ៉េ និងហុងកុង ។
៩៖ ម្រេច សម្រេចបាន ២ ៧៩៦ តោន មានកំណើន ១៨,៧៥%, បាននាំចេញទៅកាន់ប្រទេស ជប៉ុន, ប៊ែលហ្សិក, ហូឡង់,បារាំង, អាល្លឺម៉ង់, ស្វីស,វៀតណាម, អាមេរិច, រុស្ស៊ី, អង់គ្លេស, ឥណ្ឌា, បេឡារូស, កូរ៉េ, ឆេក, ណូវែហ្សែឡង់ និងប្រទេសអូស្ត្រាលី។
១០៖ ម្ទេសស្រស់ ៣៥ ៣៧៧ តោន មានកំណើន ១៧៣,០៨% និងម្ទេសក្រៀម ១ ២០០ តោន ស្មើនឹងឆ្នាំ២០១៩, បាននាំចេញទៅកាន់ប្រទេសថៃ ។
១១៖ មានផលិតផលជាង៥០មុខដទៃទៀត៕