ខេត្តកំពង់ធំ ៖ ដោយសារតែភ្លើងប្រចណ្ឌស្រ្តីម្នាក់បានយកកាំបិតប៉័ងតោកាប់លើប្រដាប់ភេទប្រុសស្នេហ៍ស្ទើរដាច់ និងមុតភ្លៅស្ទើរដល់ឆ្អឹងរួចបោះកាំបិតចោលគេចខ្លួនបាត់។ ហេតុការណ៍នេះកើតឡើង កាលពីវេលាម៉ោង១០ និង៣០នាទីព្រឹកថ្ងៃទី៣០ ខែមិថុនា ឆ្នាំ២០២០ នៅភូមិពោន ឃុំច្រនាង ស្រុកតាំងគោក ខេត្តកំពង់ធំ។
ប្រភពព័ត៌មានពីកន្លែងកើតហេតុបានឲ្យដឹងថាជនសង្ស័យមានឈ្មោះរិទ្ធ ស្រីនាង ភេទស្រីអាយុ២៨ឆ្នាំមុខរបរមន្រ្តីនគរបាលចរាចរណ៍ រស់នៅភូមិដំរីជាន់ខ្លា សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ។
ចំណែកបុរសឈ្មោះខៀន សុខល័ក្ខ ភេទប្រុអាយុ៣៣ឆ្នាំ មុខរបរមន្រ្តីនគរបាលចរាចរណ៍ រស់នៅភូមិតាំងក្រសៅ ឃុំតាំងក្រសៅ ស្រុកប្រាសាទសំបូរ ខេត្តកំពង់ធំ ទើបចាត់តាំងពីខេត្តកំពង់ធំមកបំពេញការងារចរាចរណ៍នៅស្រុកតាំងគោកបាប្រមាណ៣-៤ថ្ងៃប៉ុណោះ។ បុរសនេះមានប្រពន្ធ និងកូន២នាក់ហើយបានលួចបង្កាត់ភ្លើងស្នេហ៍លួចលាក់ជាមួយស្រ្តីជាជនដៃដល់យូរខែមកហើយដែរ។
មុនកើតហេតុស្រ្តីដៃដល់ដឹងថា ប្រុសស្នេហ៍របស់ខ្លួនចង់ដោះដៃមានស្រីថ្មីនៅស្រុកតាំងគោកក៏តាមទៅរករឿងដល់ទីនោះ ហើយបានយកកាំបិតបុ័ងតោកាប់ទៅលើប្រដាប់ភេទប្រុសស្នេហ៍យ៉ាងសាហាវបណ្តាលឲ្យដាច់រយះដល់សាច់ភ្លៅម្ខាងស្ទើរដល់ឆ្អឹង។
ករណីខាងលើនេះលោក សន តាល់ អធិការស្រុកតាំងគោក បានឲ្យដឹងថា លោកពុំហ៊ានផ្តល់ព័ត៌មានទេ សូមឲ្យទាក់ទងសួរលោក ស្នងការទៅ។ ចំណែកលោក អ៊ុក កុសល ស្នងការនគរបាលខេត្តកំពង់ធំ បានបដិសេធថានារីជាជនដៃដល់ខាងលើនេះ មិនមែនជាមន្រ្តីនគរបាលខេត្តកំពង់ធំទេគឺជា អតីតនារីបម្រើសេវាខារ៉ាអូខេប៉ុណ្ណោះ ហើយកម្លាំងរបស់លោកកំពុងស្វែងរកចាប់ខ្លួនហើយ៕
ខេត្តរតនគិរី ៖ លោក សាយ សំអាល់ រដ្ឋមន្ត្រីក្រសួងបរិស្ថានបានថ្លែងនូវការព្រមានថ្មីទៀតថា នឹងចាត់វិធានការតាមផ្លូវច្បាប់ចំពោះសកម្មភាពទន្ទ្រានកាន់កាប់ដីរដ្ឋដោយខុសច្បាប់ពីក្រុមមនុស្សមួយចំនួនដោយលោកសង្កត់ធ្ងន់ថា ការទន្ទ្រានកាន់កាប់ដីរដ្ឋគឺជាទង្វើខុសច្បាប់ និងជាការលួចទ្រព្យសម្បត្តិរបស់យើងទាំងអស់គ្នា។
លោករដ្ឋមន្ត្រីក្រសួងបរិស្ថានបានថ្លែងដូច្នេះកាលពីព្រឹកថ្ងៃទី៣០ ខែមិថុនា ឆ្នាំ ២០២០នេះ នៅសាលាខេត្តរតនគិរីក្នុងកិច្ចប្រជុំស្តីពីការគ្រប់គ្រងដីសាធារណៈរបស់រដ្ឋនៅក្នុងតំបន់ការពារធម្មជាតិក្នុងភូមិសាស្ត្រខេត្តរតនគិរី ដោយមានការចូលរួមពីសមាជិកនៃគណៈកម្មាធិការទី៣ នៃព្រឹទ្ធសភា និងរដ្ឋសភា សមាជិកក្រុមប្រឹក្សាខេត្ត គណៈអភិបាលខេត្តរតនគិរី និងអាជ្ញាធរពាក់ព័ន្ធរួមមានអភិបាលក្រុងស្រុកនិងមេឃុំ ចៅសង្កាត់ក្រោមចំណុះរដ្ឋបាលខេត្តរតនគិរីជាច្រើនរូបទៀត ។
ជាមួយគ្នានោះ លោកក៏បានក្រើនរម្លឹកផងដែរចំពោះអាជ្ញាធរមូលដ្ឋានដែលមានតួនាទីចូលរួមការពារ និងអភិរក្សធនធានធម្មជាតិ មិនត្រូវបើកដៃឱ្យមានការកាប់រាន ដុតឆ្ការ ទន្ទ្រានកាន់កាប់ដៃរដ្ឋដោយខុសច្បាប់ ហើយស្នើសុំកាត់ឆ្វៀលដីរំលោភទន្ទ្រានទាំងនោះឱ្យក្រុមជនខិលខូចឡើយ នេះជាទង្វើខុសច្បាប់ ហើយចាំបាច់ត្រូវទទួលខុសត្រូវចំពោះមុខ ច្បាប់ដោយគ្មានការលើកលែងឡើយ៕
បាងកក ៖ ប្រទេសថៃ នឹងលើកលែងចំពោះបម្រាមមិនឱ្យមានការហោះហើរឆ្លងប្រទេស ចាប់ពីថ្ងៃពុធ ទី០១ ខែកក្កដា ឆ្នាំ២០២០នេះតទៅ ប៉ុន្តែចំនួនជើងហោះហើរអន្តរជាតិ អាចត្រូវបានកាត់បន្ថយ។ នេះបើយោងតាមការចុះផ្សាយរបស់សារព័ត៌មានបាងកកប៉ុស្តិ៍ នៅថ្ងៃទី៣០ ខែមិថុនា។
អាជ្ញាធរអាកាសចររស៊ីវិលថៃ បានកំណត់លក្ខខណ្ឌខ្លះៗ សម្រាប់ការអនុញ្ញាតឱ្យមានជើងហោះហើរអន្តរជាតិឡើងវិញនេះ។ យ៉ាងណាមិញ មិនមានការបញ្ជាក់លម្អិតនូវលក្ខខណ្ឌទាំងនេះឡើយ ប៉ុន្តែ អាជ្ញាធរដែលអនុវត្តច្បាប់អន្តោរប្រវេសន៍ ច្បាប់ជំងឺឆ្លង អាកាសចរណ៍ និងច្បាប់គ្រាអាសន្ន ត្រូវទទួលខុសត្រូវចំពោះអ្នកដំណើរដែលចូលទៅប្រទេសថៃ។
សេចក្ដីប្រកាសរបស់អាជ្ញាធរអាកាសចរស៊ីវិលថៃ បានធ្វើឡើង បន្ទាប់ពីរាជរដ្ឋាភិបាលថៃ កាលពីថ្ងៃចន្ទម្សិលមិញ បានសម្រេចអនុញ្ញាតឱ្យជនបរទេស ជាអ្នកជំនួញ និងជាអ្នកដែលបានរៀបការជាមួយជនជាតិថៃ ពលករស្របច្បាប់ និងអ្នកស្នាក់នៅអចិន្ត្រៃយ៍ នៅក្នុងប្រទេសថៃ ចូលទៅកាន់ប្រទេសថៃឡើងវិញ។
តាមរបាយការណ៍ អ្នកដំណើរតិចជាង ៤,២លាននាក់ បានឆ្លងកាត់ព្រលានយន្តហោះទាំង ២៨ របស់ថៃ គិតចាប់ពីដើមឆ្នាំ២០២០នេះ បើធៀបនឹងរយៈពេលដូចគ្នាឆ្នាំមុន ដែលមានចំនួន ៩,៣លាននាក់។ បញ្ហាកូវីដ១៩ បានបង្ខំឱ្យថៃ ផ្អាកការហោះហើរក្នុងស្រុក និងក្រៅស្រុក កាលពីដើមខែមេសាកន្លងទៅ៕
ភ្នំពេញ ៖ ក្រសួងសុខាភិបាល ប្រកាសឱ្យដឹងនៅព្រឹកថ្ងៃទី០១ ខែកក្កដា ឆ្នាំ២០២០នេះថា អ្នកជំងឺកូវីដ១៩ម្នាក់ទៀតហើយ ត្រូវបានព្យាបាលឱ្យជាសះស្បើយឡើងវិញ សរុប១៣១នាក់ហើយ នៅសល់តែ ១០នាក់ទៀតប៉ុណ្ណោះកំពុងសម្រាកព្យាបាល។ នេះបើយោងតាមសេចក្តីប្រកាសរបស់ក្រសួងសុខាភិបាលដែលទទួបានមុននេះបន្តិច។
ក្រសួងសុខាភិបាលបញ្ជាក់ថា បុរសដែលព្យាបាលឱ្យជាសះស្បើយឡើងវិញនេះ ជាជនជាតិឥណ្ឌូនេស៊ី អាយុ២២ឆ្នាំ ស្នាក់នៅបណ្តោះអាសន្នក្នុងក្រុងព្រះសីហនុ ខេត្តព្រះសីហនុ។ ក្រសួងបានឱ្យដឹងថា បន្ទាប់ពីសម្រាកព្យាបាលអស់មួយរយៈ បុរសរូបនេះត្រូវបានពិនិត្យមិនឃើញមានមេរោគកូវីដ១៩ ចំនួនពីរដង និងត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត កាលពីថ្ងៃទី២៨ ខែមិថុនា កន្លងទៅនេះ។
សូមបញ្ជាក់ថា មកដល់ព្រឹកថ្ងៃទី០១ ខែកក្កដា ឆ្នាំ២០២០នេះ រកឃើញអ្នកឆ្លងជំងឺកូវីដ១៩សរុប ១៤១នាក់។ ប៉ុន្តែអ្នកជំងឺសរុប ១៣១នាក់ហើយ ត្រូវបានព្យាបាលឱ្យជាសះស្បើយ នៅសល់តែ ១០នាក់ទៀតប៉ុណ្ណោះកំពុងសម្រាកព្យាបាល ក្រោមការយកចិត្តទុកដាក់ខ្ពស់បំផុតពីកងទ័ពអាវសដ៏អង់អាចរបស់កម្ពុជា៕
បរទេស ៖ យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា គិតត្រឹមម៉ោង ៧ព្រឹកថ្ងៃពុធ ទី០១ ខែកក្កដា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១០,៥៧៤,៣៩៨នាក់ហើយ។ ក្នុងនោះអ្នកស្លាប់មានចំនួន ៥១៣,១៤៣នាក់ និងជាសះស្បើយឡើងវិញ ៥,៧៨៣,៩៩៦នាក់។
គេហទំព័រដដែល បានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។ ក្នុងនោះសហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ២,៧២៧,០៦១នាក់ ស្លាប់ចំនួន ១៣០,១០៦នាក់ និងជាសះស្បើយចំនួន ១,១៣៦,៥៧១នាក់។
ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល។ ប្រេស៊ីលមានអ្នកឆ្លង ១,៤០៨,៤៨៥នាក់ ស្លាប់ចំនួន ៥៩,៦៥៦នាក់ និងជាសះស្បើយ ៧៩០,០៤០នាក់។
ប្រទេសឈរនៅចំណាត់ថ្នាក់ទី៣ គឺប្រទេសរុស្ស៉ី។ រុស្ស៉ី មានអ្នកឆ្លង ៦៤៧,៨៤៩នាក់ ស្លាប់ ៩,៣២០នាក់ និងជាសះស្បើយ ៤១២,៦៥០នាក់៕
ភ្នំពេញ ៖ រដ្ឋបាលរាជធានីភ្នំពេញ មានគម្រោងនឹងកសាងចំណតរថយន្តចំនួន៣ទីតាំង ដែលគម្រោងនេះនឹងចំណោយទឹកប្រាក់វិនិយោគប្រមាណ១៦០លានដុល្លារ ហើយក្រុមហ៊ុនបានពិនិត្យទីតាំងរួចរាល់ចំនួន២កន្លែង គឺនៅតំបន់រង្វង់មូលកួរស្រូវជាប់ព្រំប្រទល់ខេត្តកណ្តាលមួយកន្លែង និងនៅតំបន់ផ្លូវជាតិលេខ៦មួយកន្លែង និងកំពុងរកទីតាំងមួយកន្លែងទៀតដែលស្ថិតនៅជាយក្រុង។
លោក ឃួង ស្រេង អភិបាលរាជធានីភ្នំពេញ បានថ្លែងបែបនេះ ខណៈលោកទទួលជួបម្ចាស់ក្រុមហ៊ុនចិន Good Car investment របស់ប្រទេសចិន កាលពីរសៀលថ្ងៃទី៣០ ខែមិថុនា ឆ្នាំ២០២០ នៅរាជធានីភ្នំពេញ។ លោកបានបញ្ជាក់ថា ចំណតក្រោមដី ស្របតាមគោលបំណងរបស់រដ្ឋបាលរាជធានីភ្នំពេញ ដែលត្រូវការចំណត រថយន្តជាចំណុចអាទិភាពក្នុងទីក្រុងសព្វថ្ងៃ ដែលកំពុងខ្វះចំណត។
លោកស្រី ចាន់ សុទ្ធា ម្ចាស់គម្រោងបានជម្រាបជូនពីគោលបំណង វិនិយោគ លើចំណតរថយន្ត និងនាំចូលរថយន្ត ដឹកជញ្ជូនទំនិញ និងរថយន្តដឹកជញ្ជូនអ្នកដំណើរ មករាជធានីភ្នំពេញ។ តំណាងក្រុមហ៊ុនបានបង្ហាញពីគោលដៅត្រូវ កសាងចំណតរថយន្ត ចំនួន៣ទីតាំងក្នុងរាជធានីភ្នំពេញ លើទឹកប្រាក់វិនិយោគ១៦០លាន ដុល្លារអាម៉េរិក ដែល ក្រុមហ៊ុនបាន ពិនិត្យទីតាំងរួចចំនួន២កន្លែង គឺនៅតំបន់រង្វង់មូលកួរស្រូវជាប់ព្រំប្រទល់ខេត្ត កណ្តាលមួយកន្លែងនិងនៅតំបន់ផ្លូវជាតិលេខ៦មួយកន្លែង និងកំពុងរកទីតាំងមួយកន្លែង ទៀតដែលស្ថិតនៅជាយក្រុង។
លោកអភិបាលបានផ្តល់អនុសាសន៍ឱ្យ ក្រុមហ៊ុនសិក្សាឱ្យច្បាស់លាស់មុនសម្រេច ចិត្តវិនិយោគ គឺធ្វើឱ្យបានជោគជ័យ ព្រោះកន្លងមកមានក្រុមហ៊ុនច្រើនមកហើយ បានលើកឡើងពីការចង់វិនិយោគបែបនេះ តែមិនទទួលបានលទ្ធផលទេ បានត្រឹមតែមក បង្ហាញគម្រោងធំ និងទំនើបរបស់ខ្លួនប៉ុណ្ណោះ៕
ហុងកុង ៖ មេសកម្មជនគាំទ្រលិទ្ធិប្រជាធិបតេយ្យនៅហុងកុង គឺលោក ចូសហ័រ វ៉ុង (Joshua Wong) បានបង្ហាញពីភាពភ័យខ្លាច និងបានប្រកាសដកខ្លួនចេញពីសកម្មភាពនយោបាយកាលព្រឹកថ្ងៃអង្គារនេះ បន្ទាប់ពីសភាប្រជាជនចិនបានសម្រេច អនុម័តច្បាប់ថ្មីមួយដ៏ចម្រូងចម្រាស់ ស្តីអំពីសន្តិសុខថ្មីសម្រាប់ដែនដីហុងកុង។ នេះបើយោងតាមការចេញផ្សាយ ដោយសារព័ត៌មាន BBC នាល្ងាចថ្ងៃអង្គារ ទី៣០ ខែមិថុនា ឆ្នាំ២០២០។
សកម្មជនគាំទ្រលទ្ធិប្រជាធិបតេយ្យដ៏លេចធ្លោនៅហុងកុងរូបនេះបានលើកឡើងថា នៅក្រោយច្បាប់សន្តិសុខថ្មីនេះបានអនុម័តយ៉ាងដូច្នេះថា «វាជាទីបញ្ចប់នៃហុងកុង ដែលពិភពលោកធ្លាប់ស្គាល់ពីមុនមក»។ ការលើកឡើងដូច្នេះ បន្ទាប់ពីសកម្មជនរូបនេះ បានប្រកាសដើរចេញពីចលនាគាំទ្រប្រជាធិបតេយ្យ ដែលគេស្គាល់ថា ដេម៉ូស៊ីសស្តូ (Demosisto)។
ចំណែកឯលោក ណាថាន់ ឡរ (Nathan Law) ដែលជាប្រធានស្ថាបនិកនៃចលនា Demosisto និងជាអតីតមេដឹកនាំនិស្សិតហុងកុង ក៏បានប្រកាសចាកចេញពី Demosisto ដូចគ្នាដែរ។ តាមរយៈសំណេរនៅលើគណនីហ្វេសប៊ុករបស់ខ្លួន លោក Law បានលើកឡើងយ៉ាងដូច្នេះថា «ច្បាប់ថ្មីនេះគឺជាចាប់ផ្តើមនៃបដិវត្តវប្បធម៌បង្ហូរឈាម»។ ប៉ុន្តែសកម្មជនរូបនេះបានបញ្ជាក់ថា បើទោះជាលោកបានចាកចេញពី Demosisto ក៏ដោយក៏លោកប្តេជ្ញានឹងបន្តប្រយុទ្ធ ដើម្បីលិទ្ធិប្រជាធិបតេយ្យទៅតាមសមត្ថភាពរបស់ខ្លួន។
ទោះជាបែបនេះក្តី អភិបាលក្រុងហុងលុងលោកស្រី ខារី ឡាំ និងសមាជិកសភាហុងកុងជាច្រើនទៀត ធ្លាប់បានបញ្ជាក់ថា ច្បាប់ថ្មីរបស់ចិននេះ នឹងមិនប៉ះពាល់ដល់សិទ្ធិស្វ័យភាពរបស់ទីក្រុងមួយនេះឡើយ ហើយលោកស្រីក៏បានអំពាវនាវផងដែរ ឲ្យគ្រប់គ្នាស្វែងយល់លម្អិត អំពីច្បាប់នេះសិន មុននឹងងើបឡើងប្រឆាំងតវ៉ានោះ។
ចិនបានបង្កើតច្បាប់ខាងលើនេះ ដោយស្ថិតនៅក្នុងគោលដៅដោះស្រាយបញ្ហា ជុំវិញអំពើហិង្សា និងតវ៉ានៅក្នុងទីក្រុងហុងកុង ដែលត្រូវបានអូសបន្លាយ ចាប់តាំងពីឆ្នាំ២០១៩។ ច្បាប់នេះមានគោលដៅប្រយុទ្ធប្រឆាំង ការធ្វើវិទ្ធង្សនា, អំពើភេរវកម្ម, ការបំបែកខ្លួន និងការគប់គិតជាមួយបរទេសជាដើម។ ទោះបីជាអាមេរិក បានចាត់វិធានការមួយចំនួន ដូចជាការរឹតត្បិតទិដ្ឋាការលើមន្ត្រីចិន និងដកឋានៈពិសេស របស់ហុងកុងក្នុងនាមជាមជ្ឈមណ្ឌលហិរញ្ញវត្ថុអាស៊ី ស្របតាមច្បាប់របស់អាមេរិករួចទៅហើយក្តី ក៏ប្រទេសចិន មិនបានបង្ហាញសញ្ញាថា នឹងដកថយវិញនោះដែរ៕
ភ្នំពេញ ៖ ក្នុងរយៈពេល៦ខែដើមឆ្នាំ២០២០ កម្ពុជានាំចេញអង្ករសម្រេចបាន ៣៩៧,៦៦០តោន កើនឡើង១១៦,១២២ តោន ស្មើនឹង៤១.២៥% ដែលធៀបទៅនឹងរយៈពេល ៦ខែដើមឆ្នាំ២០១៩ មានចំនួន ២៨១,៥៣៨តោន។ នេះបើតាមការបញ្ជាក់របស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
លោកឲ្យដឹងទៀតថា សម្រាប់ខែមិថុនា ឆ្នាំ២០២០ សម្រេចការនាំចេញអង្ករបាន ចំនួន៤១,៥៦៣ តោន កើនឡើងចំនួន ១០,១៩៧តោន ស្មើនឹង ៣២.៥១% ធៀបទៅនឹងខែឧសភា ឆ្នាំ២០១៩ ដែលក្នុងនេះមាន៖ អង្ករក្រអូបគ្រប់ប្រភេទមានចំនួន ៤១,៨៦៤តោន, អង្ករចម្រុះគ្រប់ប្រភេទមានចំនួន ៨,៧៥២ តោន, អង្ករចំហ៊ុយមានចំនួន ៩២៤តោន និងអង្ករក្រហមមានចំនួន២៣តោន។
លោក វេង សាខុន បានបញ្ជាក់ទៀតថា ប្រទេសដែលបានបញ្ជាទិញអង្ករ ពីកម្ពុជាក្នុងរយៈពេល៦ខែនេះ មានចំនួន៥៦ប្រទេស៖ នៅក្នុងសហភាពអឺរ៉ុបមានប្រទេសចំនួន២៤ ក្នុងចំណោម២៨ប្រទេស, ប្រទេសចិន, ប្រទេសសមាជិកអាស៊ានចំនួន ៦ ហើយនឹងនៅទ្វីបដទៃទៀតចំនួន២៥ ប្រទេស។ ទន្ទឹមនឹងនេះក៏មានក្រុមហ៊ុនចំនួន៥ ក្នុងចំណោម៦៦ ក្រុមហ៊ុន ដែលបាននាំចេញអង្ករច្រើនជាងគេ។
សូមបញ្ជាក់ថា ការនាំចេញអង្ករកម្ពុជាក្នុងរយៈពេល ៦ខែដើមឆ្នាំនេះ មានកំណើននៅគ្រប់គោលដៅនាំចេញទាំងអស់៖ សហភាពអឺរ៉ុបកើនឡើងចំនួន ៤៥.១៩%, ប្រទេសចិនកើនចំនួន២៥.២០%, បណ្តាប្រទេសសមាជិកអាស៊ានកើនចំនួន៤៧.៦៩% និងគោលដៅដទៃទៀតបានកើនឡើងចំនួន ៧៩.២៦%៕
វេណេហ្សុយអេឡា ៖ លោក នីកូឡាស ម៉ាឌូរ៉ូ ប្រធានាធិបតីវេណេហ្សុយអេឡា បានបញ្ជាឱ្យលោក Brilhante Pedrosato ឯកអគ្គរដ្ឋទូតសហភាពអឺរ៉ុប ចេញពីប្រទេសក្នុងរយៈពេល ៧២ម៉ោង បន្ទាប់ពី EU បានដាក់ទណ្ឌកម្មលើមន្រ្តីវេណេហ្សុយអេឡា។ លោកថ្លែងដូច្នេះ តាមកញ្ចក់ទូរទស្សន៍កាលពីថ្ងៃទី២៩ ខែមិថុនា ឆ្នាំ២០២០។ នេះបើយោងតាមសារព័ត៌មាន Sputnik។
លោកថ្លែងបញ្ជាក់ដូច្នេះថា៖ «ខ្ញុំបានសម្រេចចិត្តទុកពេល ៧២ម៉ោង ឱ្យឯកអគ្គរដ្ឋទូតសហភាពអឺរ៉ុប ចាកចេញពីប្រទេស។ វាគ្រប់គ្រាន់ហើយចំពោះអាណានិគមរបស់អឺរ៉ុប មកលើវេណេហ្សុយអេឡា»។ លោក Pedrosato ត្រូវបានអនុញ្ញាតឱ្យជិះយន្តហោះចាកចេញពីប្រទេស។
សូមជម្រាបថា ក្រុមប្រឹក្សាសហភាពអឺរ៉ុប បានដាក់ទណ្ឌកម្មលើមន្រ្តីវេណេហ្សុយអេឡា ១១នាក់ រួមមាន សមាជិកសភា, ចៅក្រម និងយោធាជាន់ខ្ពស់ ដែលធ្វើសកម្មភាពប្រឆាំងនឹងសភាដែលគ្រប់គ្រងដោយបក្សប្រឆាំង។ ទណ្ឌកម្មនោះ មានដូចជាការហាមឃាត់ការធ្វើដំណើរ និងការបង្កកទ្រព្យសម្បត្តិជាដើម។ រហូតមកទល់ពេលនេះ មន្រ្តីវេណេហ្សុយអេឡា ៣៦នាក់ហើយ ដែលរងការដាក់ទណ្ឌកម្ម៕
ភ្នំពេញ ៖ ដើម្បីលើកសោភ័ណភាព និងបរិស្ថាននៅក្នុងរាជធានីភ្នំពេញអាជ្ញាធររាជធានីភ្នំពេញបានដាក់ឱ្យប្រើប្រាស់ម៉ាស៊ីនបូមសម្អាតធូលី និងសំរាម ចំនួន២គ្រឿង ដើម្បីបោសនៅតាមដងផ្លូវ និងតាមសួនច្បារនានានៅក្នុងរាជធានីភ្នំពេញ។ ម៉ាស៊ីនទាំងពីរគ្រឿងនេះ ជាអំណោយរបស់ទីក្រុង ណាននីង នៃសាធារណរដ្ឋប្រជាមានិតចិន ដែលជាទីក្រុងចងសម្ព័ន្ធមេត្រីភាពជាមួយរាជធានីភ្នំពេញ។
ការដាក់ឱ្យប្រើប្រាស់ម៉ាស៊ីនបូមសម្អាតធូលី ស្លឹកឈើទាំងពីគ្រឿងនេះស្របតាមការណែនាំរបស់អភិបាលរាចធានីភ្នំពេញ ឯកឧត្តម ឃួង ស្រេង ក្នុងកិច្ចប្រជុំកន្លងមកជាមួយអាជ្ញាធរពាក់ព័ន្ធ និងការយកចិត្តទុកដាក់ជាចម្បង ដើម្បីថែរក្សាអនាម័យ និងសុខមាលភាពជូនប្រជាពលរដ្ឋក្នុងទីក្រុង និងដើម្បីសោភ័ណភាពទីក្រុងភ្នំពេញផងដែរ ដោយលោកបានចាត់ចែងដល់អង្គភាពជំនាញធ្វើកិច្ចការងារនេះដោយផ្ទាល់។
ពាក់ព័ន្ធការងារនេះ លោក នួន សំណាវុធ អភិបាលរដ្ឋាករស្វយ័តគ្រប់គ្រងសំរាម និងសំណល់រឹងរាជធានីភំ្នពេញ បានឲ្យដឹងថា ម៉ាស៊ីនបូមធូលី ស្លឹកឈើ និងសំរាមនេះជាអំណោយរបស់ទីក្រុង ណាននីង ប្រទេសចិន ដែលបានបញ្ជូនមកឲ្យរាជធានីភ្នំពេញ ស្របពេលដែលទីក្រុងណាននីង ផ្តល់បរិក្ខារពេទ្យមួយចំនួន ដើម្បីប្រយុទ្ធប្រឆាំងនឹងជំងឺកូវីដ-១៩ កាលពីប៉ុន្មានខែកន្លងមកនេះ។
លោកក៏បានបញ្ជាក់ទៀតថា ម៉ាស៊ីនបូមទាំងពីរខាងលើនេះ គឺសមត្ថភាពប្រើប្រាស់សម្រាប់បោសសម្អាតនៅក្នុងបរិវេណដែលផ្ទៃដីទំហំ ១៦០០០ ម៉ែត្រការ៉េក្នុង១ម៉ោង និងអាចបូមសម្អាតបាន ៨គីឡូម៉ែត្រក្នុងមួយម៉ោង។
ម៉ាស៊ីនបូមទាំងពីរនេះកាលពីល្ងាចថ្ងៃទី២៩ ខែមិថុនា ឆ្នាំ២០២០ ត្រូវបានរដ្ឋបាលរាជធានីភ្នំពេញ យកមកធ្វើសកម្មភាពបូមសម្អាតនៅតាមផ្លូវដើរលើសួនច្បារមាត់ទន្លេ ចាប់ពីមុខផ្សារចាស់ រហូតដល់មុខ វត្តឧណ្ណាឡោម ហើយជាក់ស្តែងម៉ាស៊ីននេះ ពិតជាមានគុណភាពដែលអាចបូមសម្អាតធូលី ស្លឹកឈើ និងសំរាម បានស្អាត និងមិនធ្វើឱ្យធូលីហុយនោះទេ ព្រោះមានទឹកសម្រាប់បាញ់ ស្រោចនៅពេលកំពុងប្រតិបត្តិការបូមធូលី។
លោក នួន សំណាវុធ ក៏បានបញ្ជាក់ផងដែរថា៖ ម៉ាស៊ីនបូមមទាំងពីរនេះ ជាម៉ាស៊ីនប្រើប្រាស់អាគុយ ដែលមិនបង្កផលប៉ះពាល់បរិស្ថានហើយបើខណ្ឌមួយចំនួន ត្រូវការអាចយកទៅប្រើប្រាស់នៅក្នុងមូលដ្ឋានរបស់ខ្លួនបាន៕
ភ្នំពេញ ៖ សម្តេចនាយករដ្ឋមន្រ្តី ហ៊ុន សែន នៅថ្ងៃទី៣០ ខែមិថុនា ឆ្នាំ២០២០ បានប្រកាសដាក់ចេញបទបញ្ជាដល់អាជ្ញាធរមូលដ្ឋាន ពិសេសចំពោះអ្នកអនុវត្តផ្ទាល់នៅតាមឃុំសង្កាត់ទាំងអស់ ត្រូវផ្តោតការយកចិត្តទុកដាក់បំពេញការងារក្នុង កម្មវិធីផ្តល់ប្រាក់ឧបត្ថម្ភជូនប្រជាពលរដ្ឋក្រីក្រ និងងាយរងគ្រោះ ឱ្យបានត្រឹមត្រូវ ហើយត្រូវចៀសវាងដាច់ខាតនូវការឃុំឃិតគ្នា ដាក់បញ្ចូលសាច់ញាតិបងប្អូនកូនក្មួយខ្លួនឯង ដែលមិនមែនជាគ្រួសារក្រីក្រ និងងាយរងគ្រោះពិតប្រាកដ។
សម្តេចព្រមានថា សម្តេចនឹងចាត់វិធានការក្តៅ ហើយនឹងមិនមានការលើកលែងឡើយ ប្រសិនបើរកឃើញថានៅក្នុងភូមិ និងឃុំសង្កាត់មួយណា មានករណីមិនប្រក្រតីនេះ កើតមានឡើង។
សម្តេច ហ៊ុន សែន បានសរសេរនៅលើទំព័រហ្វេសប៊ុកយ៉ាងដូច្នេះថា៖ «កាលពីពេលថ្មីៗកន្លងមកនេះ ខ្ញុំបានប្រកាសដាក់អោយប្រើជាផ្លូវការនូវ កម្មវិធីផ្តល់សាច់ប្រាក់ជូនប្រជាពលរដ្ឋដែលមានជីវភាពក្រីក្រ និងងាយរងគ្រោះដោយសារផលប៉ះពាល់នៃជំងឺកូវីដ-១៩។ ដើម្បីធានាថាបងប្អូនប្រជាពលរដ្ឋក្រីក្រដែលកំពុងជួបបញ្ហាលំបាកពិតប្រាកដទទួលបាននូវជំនួយឧបត្ថម្ភពីរាជរដ្ឋាភិបាល គឺការងារធ្វើបច្ចុប្បន្នភាពគ្រួសារក្រីក្រ និងជនងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ នេះមានសារៈសំខាន់ខ្លាំងណាស់។ ការងារនេះគឺត្រូវពឹងផ្អែកស្ទើរតែទាំងស្រុងលើអាជ្ញាធរមូលដ្ឋាន គឺមេភូមិ និងក្រុមប្រឹក្សាឃុំ/សង្កាត់ដែលត្រូវតែធ្វើអោយបានច្បាសលាស់និងហ្មត់ចត់បំផុត ។ ដូច្នេះដើម្បីធានាឲ្យបាននូវតម្លាភាព និងសុច្ចរិតភាពក្នុងការផ្តល់សេវាសម្រាប់កម្មវិធីឧបត្ថម្ភសាច់ប្រាក់នេះ»៕
អ៊ីរ៉ង់ ៖ តលការប្រទេសអ៊ីរ៉ង់បានសម្រេចចេញដីកាចាប់ខ្លួន និងបានស្នើស្ថាប័នប៉ូលិសអន្តរជាតិ Interpol ឲ្យជួយដើម្បីចាប់លោក ដូណាល់ ត្រាំ ដែលជាប្រធានាធិបតីរបស់សហរដ្ឋអាមេរិក និងមនុស្សរាប់សិបនាក់ទៀត ដែលមានជាប់ពាក់ព័ន្ធក្នុងការធ្វើឃាតលោក Qassem Soleimani ជាមេទ័ពកំពូលម្នាក់របស់អ៊ីរ៉ង់ នៅឯទីក្រុងបាកដាដនៃប្រទេសអ៊ីរ៉ាក់។ នេះបើតាមការចេញផ្សាយដោយសារព័ត៌ មាន Aljazeera ។
ប្រមុខរដ្ឋអាជ្ញានៃទីក្រុងតេហេរ៉ង់ លោក Ali Alqasimehr កាលពីថ្ងៃចន្ទនេះ បាននិយាយថា លោក ត្រាំ និងបុគ្គលជាង៣០នាក់ទៀត ដែលមានជាប់ពាក់ព័ន្ធក្នុងការវាយប្រហារដោយយន្តហោះដ្រូនកាលពីថ្ងៃទី០៣ ខែមករា ឆ្នាំ២០២០ ដែលបានផ្តាច់ជីវិតលោក Soleimani គឺ ត្រូវចោទប្រកាន់ពីបទឃាតកម្ម និងភេរវកម្ម។
បើតាមលោក Ali អ៊ីរ៉ង់បានចេញដីកាចាប់ខ្លួនលោក ត្រាំ និងបុគ្គលពាក់ព័ន្ធដទៃទៀត ហើយឈ្មោះពួកគេត្រូវបានបញ្ជូនទៅកាន់ស្ថាប័ន Interpol ដែលមានមូលដ្ឋាននៅទីក្រុង Lyon នៃប្រទេសបារាំងថែមទៀតផង។ អ៊ីរ៉ង់ដែលជាសមាជិក Interpol ដែរនោះ បានស្នើឲ្យខាង Interpol ចេញសេចក្តីប្រកាស «ពណ៌ក្រហម» ជាការអំពាវនាវឲ្យចាប់ខ្លួន។
រដ្ឋអាជ្ញាក្រុងតេហេរ៉ង់បាននិយាយថា «លោក ត្រាំ និងមនុស្ស៣៥នាក់ផ្សេងទៀត ប្រឈមនឹងការចោទប្រកាន់ពីបទឃាតកម្ម និងអំពើភេរវកម្ម ហើយបានស្នើឲ្យប៉ូលិសអន្តរជាតិអាំងទែប៉ូល (Interpol) ជួយចាប់ខ្លួន»។
សូមរម្លឹកថា យោធាអាមេរិកបានសម្លាប់លោក Soleimani និងបុគ្គលប៉ុន្មានរូបទៀត ដោយប្រើយន្តហោះដ្រូន នៅក្បែរអាកាសយានដ្ឋាន អន្តរជាតិបាកដាដ។ ការវាយប្រហារនេះ បានធ្វើឲ្យអ៊ីរ៉ង់បាញ់មីស៊ីលស្រោចលើមូលដ្ឋានទ័ពអាមេរិក នៅប្រទេសអ៊ីរ៉ាក់ដែលបណ្តាលឲ្យទាហានអាមេរិកមួយចំនួនរងរបួស៕
ហុងកុង ៖ ភ្នាក់ងារព័ត៌មាន Reuters បានរាយការណ៍នៅមុនបន្តិចថា សភាប្រជាជនចិនបានអនុម័តច្បាប់សន្តិសុខជាតិថ្មី ដើម្បីប្រើប្រាស់លើទីក្រុងសេដ្ឋកិច្ចកំពូលមួយនេះហើយ នៅព្រឹកថ្ងៃអង្គារ ទី៣០ ខែមិថុនា ឆ្នាំ២០២០ ចំពោះមុខការព្រមានរបស់សហភាពអឺរ៉ុប និងសហរដ្ឋអាមេរិក។
ទូរទស្សន៍ហុងកុង (Cable TV) បានបញ្ចេញព័ត៌មានអំពីការអនុម័តច្បាប់ ក្រោយទទួលបានប្រភពមួយដែលសុំមិនបញ្ចេញអត្តសញ្ញាណ។ ទូរទស្សន៍នេះថែមទាំងបានចេញផ្សាយទៀតថា ច្បាប់ខាងលើនេះត្រូវបានអនុម័តជាឯកច្ឆន្ទ ដោយគណៈកម្មាធិការអចិន្ត្រៃយ៍នៃសភាប្រជាជនប្រជាជនចិនទៀតផង។
សូមជម្រាបថា ចិនបានបង្កើតច្បាប់ខាងលើនេះ ដោយស្ថិតនៅក្នុងគោលដៅដោះស្រាយបញ្ហាជុំវិញអំពើហិង្សា និងតវ៉ានៅក្នុងទីក្រុងហុងកុង ដែលត្រូវបានអូសបន្លាយចាប់តាំងពីឆ្នាំ២០១៩។ ច្បាប់នេះមានគោលដៅប្រយុទ្ធប្រឆាំងការធ្វើវិទ្ធង្សនា, អំពើភេរវកម្ម, ការបំបែកខ្លួន និងការគប់គិតជាមួយបរទេសជាដើម។
ទោះបីជាអាមេរិកបានចាត់វិធានការមួយចំនួន ដូចជាការរឹតត្បិតទិដ្ឋាការលើមន្ត្រីចិន និងដកឋានៈពិសេសរបស់ហុងកុងក្នុងនាមជាមជ្ឈមណ្ឌលហិរញ្ញវត្ថុអាស៊ី ស្របតាមច្បាប់របស់អាមេរិករួចទៅហើយក្តី ក៏ប្រទេសចិនមិនបានបង្ហាញសញ្ញាថា នឹងដកថយវិញនោះដែរ៕
ហ្សឺណែវ ៖ ប្រធាននៃអង្គការសុខភាពពិភពលោកលោក Tedros Adhanom Ghebreyesus បានប្រាប់សន្និសីទសារព័ត៌មានមួយកាលពីថ្ងៃច័ន្ទទី២៩ ខែមិថុនាថា ជំងឺរាតត្បាតកូវីដ១៩នៅមិនទាន់ជិតដល់ទីបញ្ចប់នៅឡើយទេ ខណៈប្រទេសមួយចំនមួយកំពុងបន្តរីករាលដាល។នេះបើយោងតាមប្រភពពី CNA។
លោក Tedros បានកត់សំគាល់ថាក្នុងរយៈពេល៦ខែបន្ទាប់ពីប្រទេសចិនបានជូនដំណឹងដល់អង្គការសុខភាពពិភពលោក ទើបតែលោតរំលងតួលេខ ១០លាននាក់ ខណៈមនុស្សស្លាប់កើនដល់ជាងកន្លះលាននាក់។ ជុំវិញបញ្ហាដែលចេះតែបន្តទៅមុខនេះ លោកប្រធាន WHO បានលើកឡើងថា «មនុស្សភាគច្រើននៅតែងាយទទួលរងគ្រោះ ព្រោះវីរុសនេះនៅមានចន្លោះទំនេរជាច្រើន ដែលវាអាចបន្តរាតត្បាត»។
លោក Tedros បានឲ្យដឹងថា យើងទាំងអស់គ្នាចង់អោយវីរុសនេះផុតរលត់ ។ យើងទាំងអស់គ្នាចង់ធ្វើឱ្យជីវិតរបស់យើងមានភាពប្រសើរឡើង។ប៉ុន្តែវាពិតជាលំបាកព្រោះគឺថាវីរុសនេះមិនទាន់ខិតទៅជិត ទីបញ្ចប់នៃជំងឺរាតត្បាតសកលនេះនៅឡើយទេ។បើទោះបីជាប្រទេសមួយចំនួន បានបង្ហាញសញ្ញាវិជ្ជមាននៃការទប់ស្កាត់ក្តី ប៉ុន្តែអ្វីដែលជាការពិត គឺជំងឺរាតត្បាតសកលនេះ កាន់តែបង្កើនល្បឿននៃការរាតត្បាត។
ប្រធានកម្មវិធីផ្នែកសង្គ្រោះបន្ទាន់របស់អង្គការសុខភាពពិភពលោកលោក Mike Ryan បានប្រាប់សន្និសីទកាសែតថាការរីកចម្រើនដ៏ធំធេងត្រូវបានធ្វើឡើងឆ្ពោះទៅរកវ៉ាក់សាំងដែលមានសុវត្ថិភាពនិងប្រសិទ្ធភាពដើម្បីការពារការឆ្លងប៉ុន្តែនៅតែមិនមានការធានាថាកិច្ចខិតខំប្រឹងប្រែងនឹងទទួលជោគជ័យនោះទេ។ លោកបាននិយាយថាក្នុងពេលបច្ចុប្បន្ននេះប្រទេសនានាអាចប្រយុទ្ធប្រឆាំងនឹងការរីករាលដាលនៃជំងឺនេះតាមរយៈការធ្វើតេស្តិ៍,និងវីធានការណ៍ដាក់ឡែក ដែលបានបញ្ជាក់និងតាមដានទំនាក់ទំនងរបស់ពួកគេធ្លាប់ប៉ះពាល់អ្នកជំងឺតែប៉ុណ្ណោះ។
គួរបញ្ជាក់ថា ប្រទេសដែលធ្លាប់តែបានធ្វើការទប់ស្កាត់ COVID-19 ប្រកបដោយជោគជ័យដូចជា ចិន កូរ៉េខាងត្បូង និងអូស្ត្រាលី ត្រូវបានគេមើលឃើញថា បានផ្ទុះករណីឆ្លងជាចង្កោមៗឡើងវិញ ដែលជាហេតុនាំឲ្យវឌ្ឍនភាពនៃការប្រយុទ្ធនឹងវីរុសនេះ មានភាពស្រពិចស្រពិល៕
ចិន ៖ ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃចន្ទថា ភ្លៀងធ្លាក់ខ្លាំងកាលពីចុងសប្តាហ៍បានសម្លាប់មនុស្សយ៉ាងហោចណាស់ ១២ នាក់នៅក្នុងខេត្ត Sichuan ភាគនិរតីប្រទេសចិន ខណៈទឹកកំពុងឡើងបានបណ្តាលឲ្យមានការជម្លៀសមនុស្សជាច្រើនក្នុងរដូវទឹកជំនន់ប្រចាំឆ្នាំ។ ចំនួនអ្នកស្លាប់ដោយសារជំនន់ទឹកភ្លៀងខ្លាំងនៅក្នុងស្រុក Mianning រួមមានមនុស្ស ២ នាក់បានស្លាប់នៅពេលដែលរថយន្តជាច្រើនគ្រឿងបានហូរចូលទន្លេ បន្ទាប់ពីទឹកជំនន់បានបំផ្លាញផ្លូវហាយវ៉េ។
ទីភ្នាក់ងារព័ត៌មានស៊ីនហួបាននិយាយថា មនុស្ស ១០ នាក់ផ្សេងទៀតបានបាត់ខ្លួន ហើយមនុស្សជាង ៧ ពាន់នាក់ត្រូវបានជម្លៀសចេញពីផ្ទះរបស់ពួកគេ។ យោងតាមក្រសួងគ្រប់គ្រងគ្រាអាសន្នបានឲ្យដឹងថា ភាគខាងត្បូងប្រទេសចិនត្រូវបានទទួលរងនូវការវាយប្រហារដោយព្យុះភ្លៀងដែលបង្កជាការបាក់ដី និងទឹកជំនន់ចាប់តាំងពីដើមខែមិថុនាមកដោយយ៉ាងហោចណាស់មានមនុស្ស ៧៨ នាក់បានស្លាប់។ មនុស្ស ១២ លាននាក់ផ្សេងទៀតបានរងផលប៉ះពាល់ដោយការខូចខាតទ្រព្យសម្បត្តិ ការបិទផ្លូវ និងការរំខានផ្សេងៗទៀត ខណៈដែលប្រជាជន ៧២០,០០០ នាក់ត្រូវបានជួយសង្គ្រោះ ឬផ្លាស់ទីលំនៅពីទឹកជំនន់ដោយបុគ្គលិកគ្រាអាសន្ន។
ក្រសួងបានឲ្យដឹងទៀតថា រដូវទឹកជំនន់បានបង្កការខាតបង់ផ្នែកសេដ្ឋកិច្ចចំនួន ២៥.៧ ពាន់លានយ័ន (៣.៦ ពាន់លានដុល្លារ) ដែលជាផលប៉ះពាល់មួយបន្ថែមទៀតដល់សេដ្ឋកិច្ចក្នុងស្រុក បន្ទាប់ពីទទួលរងពីការរាតត្បាតនៃវីរុសកូរ៉ូណារួចទៅហើយ។
នៅក្នុងក្រុង Chongqing នៅក្បែរនោះកម្រិតទឹកបានឡើងជាងប្រាំម៉ែត្រពីលើខ្សែសុវត្ថិភាពទឹកជំនន់ដោយបង្កើតកំណត់ត្រាថ្មី។ ក្រសួងគ្រប់គ្រងគ្រាអាសន្នបាននិយាយកាលពីថ្ងៃអាទិត្យថា រដ្ឋាភិបាលកណ្តាលរបស់ប្រទេសចិនគ្រោងនឹងចំណាយប្រាក់យ៉ាងតិច ២០០ លានយ័នសម្រាប់ឧបករណ៍សង្គ្រោះទឹកជំនន់រួមទាំងតង់ និងគ្រែសម្រាប់អ្នកដែលត្រូវជម្លៀសផងដែរ៕
