ខេត្តកណ្ដាល ៖ រថយន្តដឹកដីបានបុកជាមួយរថយន្តដឹកកម្មករ កម្មការិនីពេញទំហឹងកាលពីវេលាម៉ោង ១៨ និង២០នាទី ថ្ងៃទី២៤ ខែមិថុនា ឆ្នាំ២០២០ នៅចន្លោះគីឡូម៉ែត្រលេខ៤៨-៤៩ ផ្លូវជាតិលេខ១ ស្ថិតនៅភូមិ ពោធិ៍មៀវ ឃុំគគីរធំ ស្រុកកៀនស្វាយ ខេត្តកណ្តាល បណ្តាលឲ្យតៃកុងរថយន្តដឹកដីស្លាប់ភ្លាមៗ នៅកន្លែងកើតហេតុ ខណៈដែលកម្មករ កម្មការិនី១៣នាក់រងរបួសធ្ងន់ស្រាល។
បើតាមប្រភពព័ត៌មានដែលទទួលបាន បញ្ជាក់ថា ហេតុការណ៍នេះបង្កឡើងដោយរថយន្តដឹកដីបើកលឿនជ្រុលមកបុកចំឡានដឹកកម្មករ-កម្មការនីដែលបើកបញ្ច្រាសទិសយ៉ាងពេញទំហឹងតែម្ដង បណ្ដាលឱ្យឡានក្រឡាប់ចាក់កម្មករ-កម្មការិនីចោលពេញថ្នល់ រីឯតៃកុងឡានដឹកដីវិញ គៀបជាប់នឹងកាប៊ីនបណ្ដាលឱ្យស្លាប់ភ្លាមៗ នៅកន្លែងកើតហេតុ៕
បរទេស ៖ យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា គិតត្រឹមម៉ោង ៧ព្រឹកថ្ងៃព្រហស្បតិ៍ ទី២៥ ខែមិថុនា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ៩,៥១៦,០៧៨នាក់ហើយ។ ក្នុងនោះអ្នកស្លាប់មានចំនួន ៤៨៣,៩០៥នាក់ និងជាសះស្បើយឡើងវិញ ៥,១៦៣,២៥៨នាក់។
គេហទំព័រដដែលបានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។ សហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ២,៤៦២,៧១១នាក់ ស្លាប់ចំនួន ១២៤,២៧៣នាក់ និងជាសះស្បើយចំនួន ១,០៣៤,២៩២នាក់។
ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល។ ប្រេស៊ីលមានអ្នកឆ្លង ១,១៩២,៤៧៤នាក់ ស្លាប់ចំនួន ៥៣,៨៧៤នាក់ និងជាសះស្បើយ ៦៤៩,៩០៨នាក់។
ប្រទេសឈរនៅចំណាត់ថ្នាក់ទី៣ គឺប្រទេសរុស្ស៉ី។ រុស្ស៉ី មានអ្នកឆ្លង ៦០៦,៨៨១នាក់ ស្លាប់ ៨,៥១៣នាក់ និងជាសះស្បើយ ៣៦៨,៨២២នាក់៕
ខេត្តសៀមរាប ៖ ក្រុមអ្នកជំនាញអាជ្ញាធរជាតិអប្សរាបានប្រទះឃើញសិលាចារឹកជាភាសាសំស្ក្រឹតចារលើផ្ទាំងថ្មភក់ដែលគេយកមករៀបជាគ្រឿងបង្គុំថ្មកម្រាលខ្លោងទ្វារខាងមុខប្រាង្គកណ្តាលនៃប្រាសាទទន្លេស្ងួតក្នុងពេលលាងសម្អាតថ្ម មុនយកទៅរៀបផ្គុំនៅទីតាំងដើមវិញ។ ថ្មចារឹកនេះ អាជ្ញាធរជាតិអប្សរាបានយកមករក្សាទុកក្នុងទីស្នាក់ការនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ នាព្រឹកថ្ងៃទី២៤ ខែមិថុនា ឆ្នាំ២០២០។
លោក អ៊ឹម សុខរិទ្ធី ប្រធាននាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការ ឱ្យដឹងថា ផ្ទាំងថ្មចារឹកនេះអាចពុំមែនជារបស់មន្ទីរពេទ្យទន្លេស្ងួតទេ ប្រហែលជាគេយកចេញពីប្រាសាទណាមួយមកប្រើធ្វើជាថ្មកម្រាល ដោយរៀបដាក់ផ្កាប់ផ្ទៃមានអក្សរចារឹកទៅក្រោម។ ចំណែកផ្ទៃខាងក្រោយពុំមានអក្សរគេដាក់ផ្ងារឡើងលើ ហើយដាប់ធ្វើជាល្បាក់សម្រាប់ទ្រថ្មធ្នឹមទ្វារ។ករណីនេះ បានធ្វើឱ្យបាត់បង់តួអក្សរមួយផ្នែក តែក៏នៅមានសេចក្តីច្រើនដែលអាចសិក្សាស្រាវជ្រាវបន្ថែមបាន ហើយនេះក៏មិនចាត់ទុកជាករណីបំផ្លាញដែរ ព្រោះគេកាត់តម្រឹមឱ្យត្រូវចន្លោះដើម្បីធ្វើជាថ្មកម្រាលក្នុងការកាសាងប្រាសាទទន្លេស្ងួតពីបុរាណការយកថ្មចាស់ពីកន្លែងផ្សេងមកកសាងប្រាសាទថ្មីបន្ទាប់ ក៏ជាទម្លាប់ធម្មតានាសម័យបុរាណដែរ។ លក្ខណៈពិសេសនៃសិលាចារឹកនេះ គឺពុំទាន់មានការសិក្សានៅឡើយ ដែលសរសេរជាភាសាសំស្ក្រឹត មានចំនួន៥៥បន្ទាត់ កម្ពស់ ១០០ ស.ម ទទឹង៤០ ស.ម និងកម្រាស់២០ស.ម។
បើយោងតាមការសន្និដ្ឋានដំបូងលើលក្ខណៈតួអក្សរឆ្មារៗ និងពិចិត្រ ដែលប្រៀបនឹងសិលាចារឹកនៅប្រាសាទភ្នំដី ស្ថិតនៅខាងជើងប្រាសាទទន្លេស្ងួតនោះ យើងអាចស្មានបានថា សិលាចារឹកនេះ ប្រហែលចារនៅចុងស.វ.ទី១១ ដល់ដើមស.វ.ទី១២។
លោក សុខរិទ្ធី បញ្ជាក់ថា នៅពេលនេះយើងមិនទាន់ដឹងខ្លឹមសារនៅក្នុងសិលាចារឹកនេះទេ គឺត្រូវការពេលវេលាដើម្បីឱ្យអ្នកជំនាញប្រែសម្រួលពីភាសាសំស្ក្រឹត ដើម្បីស្វែងយល់ពីរឿងរ៉ាវផ្សេងៗ និងកាលបរិច្ឆទនៃអក្សរចារឹកមួយផ្ទាំងនេះ។ តែវាបានផ្តល់ព័ត៌មានសំខាន់មួយឱ្យយើងដឹងអំពីប្រវត្តិនៃការសាងសង់ប្រាសាទទន្លេស្ងួត និងភស្តុតាងបុរាណវិទ្យាដែលបង្ហាញអំពីការតាំងទីមនុស្សសម័យអង្គរនៅក្នុងតំបន់នេះ ក្នុងរាជ្យព្រះបាទជ័យវរ្ម័នទី៧ (១១៨១ ដល់ ១២១៨ គ.ស.)៕
ខេត្តកោះកុង ៖ អណ្តើកហ្លួងចំនួន ២ក្បាល ត្រូវបានប្រជាពលរដ្ឋប្រគល់ឱ្យក្រសួងបរិស្ថានធ្វើការអភិរក្ស ក្រោយពីបានទទួលទិញពីអ្នកនេសាទខុសច្បាប់នៅក្នុងភូមិសាស្ត្រស្រុកស្រែអំបិល ខេត្តកោះកុង នាពេលកន្លងមកនេះ។ អ្នកនាំពាក្យក្រសួងបរិស្ថាន បញ្ជាក់ថា សត្វអណ្តើកហ្លួងជាសត្វកម្រ នៅលើពិភពលោក។
អណ្តើកហ្លួងចំនួន២ក្បាលត្រូវបានប្រជាពលរដ្ឋប្រគល់ឱ្យក្រសួងបរិស្ថានធ្វើការអភិរក្ស ក្រោយពីបានទទួលទិញពីអ្នកនេសាទខុសច្បាប់នៅក្នុងភូមិសាស្ត្រស្រុកស្រែអំបិល ខេត្តកោះកុង។ ពិធីប្រគល់សត្វអណ្តើកហ្លួងនេះធ្វើឡើងនៅ ព្រឹកថ្ងៃទី២៤ ខែមិថុនា ឆ្នាំ២០២០ ដោយមានវត្តមាន ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន។ ឯកឧត្តម នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានឱ្យដឹងថា អណ្តើកហ្លួងទាំង២ក្បាលនេះ ត្រូវប្រគល់បន្តទៅឲ្យអង្គការសមាគមអភិរក្សសត្វព្រៃប្រចាំកម្ពុជា ហៅកាត់ WCS ដើម្បីធ្វើការអភិរក្ស។ ឯកឧត្តម បានកោតសរសើរចំពោះការស្ម័គ្រចិត្តដោយលះបង់ថវិកាផ្ទាល់ខ្លួន ក្នុងការចូលរួមថែរក្សា និងអភិរក្សប្រភេទសត្វអណ្តើកកម្រនេះរបស់ក្រុមគ្រួសារលោកស្រី ឡាយ ផុនថេង។ ឯកឧត្តមមានប្រសាសន៍ថា ការបញ្ឈប់ការបរិភោគសត្វព្រៃរបស់ប្រជាពលរដ្ឋ នឹងបញ្ចប់បាននូវការបរបាញ់ និងការជួញដូរខុសច្បាប់។
លោកស្រី ឡាយ ផុនថេង ដែលបានប្រគល់ពូជអណ្ដើកកម្រនេះដល់ក្រសួងបរិស្ថាន បានឲ្យដឹងថា អណ្តើកហ្លួងចំនួន២ក្បាលនេះ ត្រូវបានលោកស្រី និងក្រុមគ្រួសារទិញពីអ្នកនេសាទក្នុងមួយក្បាលតម្លៃ៤០០ ដុល្លារអាមេរិកក្នុងអំឡុងធ្វើដំណើរកម្សាន្តទៅកាន់ខេត្តកោះកុងកាលពីចុងសប្តាហ៍មុននេះ។ ប្រជាពលរដ្ឋដែលបច្ចុប្បន្នរស់នៅភ្នំពេញរូបនេះ បានបញ្ជាក់ថា អណ្តើកកម្រចំនួន២ក្បាលនេះ ត្រូវបានអ្នកនេសាទបញ្ចុះបញ្ចូលលក់ឱ្យនៅក្នុងចំណុចចំណតអាហារដ្ឋានមួយកន្លែង ក្នុងភូមិសាស្ត្រស្រុកស្រែអំបិល ខេត្តកោះកុង។
លោក សោម ស៊ីថា ប្រធានគម្រោងអភិរក្សអណ្ដើកហ្លួង នៃអង្គការសមាគមអភិរក្សសត្វព្រៃ WCS បានមានប្រសាសន៍ថា អណ្ដើកហ្លួងដែលទទួលបាននេះ លោកនឹងបញ្ជូនទៅ មជ្ឈមណ្ឌលសង្គ្រោះនិងអភិរក្សសត្វល្មូន នៅស្រុកស្រែអំបិល ខេត្តកោះកុង។ លោកក៏បានបន្ថែមទៀតថា អណ្ដើកទាំងពីរក្បាលនេះ មានអាយុប្រហែល១៤ឆ្នាំ ខណៈដែលគេប៉ាន់ស្មានថាវាអាចរស់បានរហូតដល់ទៅ១០០ឆ្នាំ។ អណ្ដើកហ្លួង ធ្លាប់ត្រូវបានគេគិតថា ផុតពូជពីកម្ពុជាទៅហើយ រហូតដល់ឆ្នាំ២០០០ នៅពេលរដ្ឋបាលជលផល និងអង្គការWCS បានសិក្សាស្រាវជ្រាវ និងរកឃើញចំនួនសេសសល់តិចតួចរបស់វាមាននៅតាមប្រព័ន្ធព្រែកស្រែអំបិលក្នុងប្រទេសកម្ពុជា។
គួរបញ្ជាក់ផងដែរថា អណ្ដើកហ្លួងគឺជាសត្វកម្រ និងជិតផុតពូជ ហើយត្រូវទទួលរងការគម្រាមកំហែង ដោយសារការនេសាទ ការប្រមាញ់ខុសច្បាប់ ការបំផ្លាញព្រៃលិចទឹក ជាពិសេសគែការបូមខ្សាច់តែម្ដង។ ក្នុងពេលបច្ចុប្បន្ននេះ កម្ពុជាមានកូនអណ្ដើកហ្លួងចំនួន៤៥០ក្បាល ហើយបានស្ថិតនៅក្នុងការចិញ្ចឹមរបស់មជ្ឈមណ្ឌលសង្គ្រោះនិងអភិរក្សសត្វល្មូន នៅស្រុកស្រែអំបិល ខេត្តកោះកុង ខណៈអណ្ដើកស្ថិតក្នុងវ័យជំទង់មាន៨៦ក្បាលនិងត្រូវបានប្រលែងឲ្យទៅរស់ធម្មជាតិវិញ។ អណ្តើកហ្លួង ជាប្រភេទល្មូនដែលស្ថិតក្នុងបញ្ជីក្រហមរបស់អង្គការសហភាពអន្តរជាតិដើម្បីការអភិរក្សធម្មជាតិ ហៅកាត់ IUCN ជាប្រភេទរងគ្រោះថ្នាក់ជិតផុតពូជ ក្នុងចំណោមអណ្តើកទាំង២៥ប្រភេទដែលកំពុងរងគ្រោះថ្នាក់ខ្លាំងជាងគេនៅលើភពលោក៕
ខេត្តបន្ទាយមានជ័យ ៖ បុរសវ័យ៦៤ឆ្នាំម្នាក់បានរងរបួសដាច់ជើងទាំងពីរ ក្រោយពីគាត់ដើរដាក់អន្ទាក់ សត្វនៅតាមព្រំដែនកម្ពុជា-ថៃរួចក៏ជាន់មីន។ ហេតុការណ៍នេះកើតឡើងកាលពីវេលាម៉ោង៣រសៀល ថ្ងៃទី២៣ ខែមិថុនា ឆ្នាំ២០២០ នៅចំណុចបង្គោលព្រំដែនកម្ពុជា-ថៃ លេខ៤៨ ស្ថិតភូមិទំនប់ដាច់.ឃុំ អូរបីជាន់ ស្រុកអូរជ្រៅ ខេត្ដបន្ទាយមានជ័យ។
លោកវរសេនីយ៍ទោ សែស វិបុល អធិការនគរបាលស្រុកអូរជ្រៅបានឲ្យដឹងថា ជនរងគ្រោះឈ្មោះ ញ៉ែម សឹម អាយុ៦៤ឆ្នាំ នៅភូមិជោគជ័យ ឃុំអូរបីជាន់ ស្រុកអូរជ្រៅ.ខេត្តបន្ទាយមានជ័យ។ លោកអធិការ បានបញ្ជាក់ថា នៅមុនពេលកើតហេតុជនរងគ្រោះបានដើរដាក់អន្ទាក់សត្វនៅកន្លែងកើតហេតុ ចំណុច បង្គោលព្រំដែនកម្ពុជា-ថៃ លេខ៤៨ ស្ថិតភូមិទំនប់ដាច់ ឃុំអូរបីជាន់បានជាន់មីនស្គរ ប្រភេទអាកា៥៨ នៅសេសសល់ពីសម័យសង្គ្រាមបណ្តាលឲ្យផ្ទុះរងរបួសធ្ងន់ ដាច់ជើងទាំង២ត្រូវបានកម្លាំងនគរបាល ប៉ុស្តិ៍ការពារព្រំដែននៃវរសេនាតូចនគរបាលការពារព្រំដែនគោកលេខ៩១១ និងកម្លាំងនគរបាលប៉ុស្តិ៍ រដ្ឋបាលឃុំអូរបីជាន់ទៅជួយសែងយកជនរងគ្រោះពីកន្លែងកើតហេតុដឹកទៅសង្គ្រោះនៅមន្ទីរពេទ្យ បង្អែកក្រុងប៉ោយប៉ែត៕
ខេត្តសៀមរាប ៖ កាលពីព្រឹកថ្ងៃទី២៣ ខែមិថុនា ឆ្នាំ២០២០ លោក ទៀ សីហា អភិបាលនៃគណៈអភិបាលខេត្ត បានដឹកនាំក្រុមការងារបច្ចេកទេស ឈ្មោះផ្លូវ និងលេខផ្លូវក្នុងក្រុងសៀមរាប។ ផ្លូវក្នុងក្រុងសៀមរាប ដែលក្រុមការងារបានសិក្សា និងរៀបចំមានចំនួន១៨១៦ខ្សែ ក្នុងនោះផ្លូវប្រមាណជាង ៥០ខ្សែត្រូវបានដាក់ឈ្មោះ។
កិច្ចប្រជុំ ក៏បានឯកភាពលើការកំណត់លេខផ្លូវបានកំណត់ជាប្លុកចំនួន៤ប្លុក ក្នុងនោះប្លុក (ក) មានចំនួន ៥៧៥ខ្សែ ប្រវែងសរុប ១១៤ ៦០០ម៉ែត្រ , ប្លុក (ខ) មាន ចំនួន ៣០៥ខ្សែ មានប្រវែងសរុប ១៤៨ ៩៩០ម៉ែត្រ , ប្លុក (គ) មានចំនួន៤៤០ខ្សែ មានប្រវែងសរុប ១៣៤ ៣៨០ម៉ែត្រ និង ប្លុក (ឃ) មានចំនួន៤៩៦ខ្សែ មានប្រវែងសរុប ១១៥ ៦៣០ម៉ែត្រ។
ដោយឡែក ឈ្មោះផ្លូវត្រូវធ្វើការកែសម្រួលមួយចំនួនដោយត្រូវដាក់ជាឈ្មោះវីរជន ឥស្សរជន, សប្បុរសជន និង ឈ្មោះពីប្រវត្តិសាស្ត្រ ឬជាឈ្មោះតាមភូមិសាស្ត្រធម្មជាតិ តាមវប្បធម៌ និងឈ្មោះពីបុរាណ និងទៅតាមទម្លាប់មួយចំនួន ហើយត្រូវស្នើសុំគោលការណ៍ពីថ្នាក់ដឹកនាំជាមុនផងដែរ។
លោកអភិបាលខេត្ត ក៏បានសង្កត់ធ្ងន់ផងដែរថា សមត្ថកិច្ចគ្រប់គ្រងផ្លូវថ្នល់ ក៏ត្រូវរៀបចំផែនការមេអភិវឌ្ឍន៍ផ្លូវថ្នល់ គម្រោងប្លង់ និង កំណត់គម្រោង សាងសង់ ស្តារឡើងវិញ ក្នុងការកែលម្អ ពង្រីក និង ថែទាំផ្លូវថ្នល់ ព្រមទាំងសកម្មភាពអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ក្នុងក្រុង ក្នុង ការស្នើសុំគោលការណ៍ឯកភាពពីរដ្ឋាភិបាលផងដែរ។ ដូចនេះ រដ្ឋបាលខេត្តនឹងសម្រេចដាក់ឲ្យប្រើប្រាស់ជាផ្លូវការនូវលេខផ្លូវ និងឈ្មោះផ្លូវនាពេលឆាប់ៗ ខាងមុខនេះ៕
សេអ៊ូល ៖ ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍នៅថ្ងៃពុធទី ២៤ ខែមិថុនានេះថា មេដឹកនាំកូរ៉េខាងជើង លោក គីម ជុងអ៊ុន ក្នុងកិច្ចប្រជុំគណៈកម្មាធិការយោធាកណ្តាលរបស់គណបក្សពលករកូរ៉េ ដែលជាបក្សកាន់អំណាចបានសម្រេចចិត្តផ្អាកផែនការសកម្មភាពយោធាប្រឆាំងនឹងប្រទេសកូរ៉េខាងត្បូង។ នេះបើតាមសារព័ត៌មាន CNA។
ប្រភពពីសារព័ត៌មានរដ្ឋកូរ៉េខាងជើង KCNA ក៏ត្រូវបានដកស្រង់បន្ថែមទៀតដែរថា ក្រៅពីការប្រកាសផ្អាកសកម្មភាពយោធា ទីក្រុងព្យុងយ៉ាងក៏បានរៀបចំ ដំណោះស្រាយផ្សេងទៀត ដោយស្ថិតនៅក្នុងគោលដៅពង្រឹងសមត្ថភាពប្រយុទ្ធ នៅក្នុងពេលធ្វើសង្គ្រាមផងដែរ។ ការសម្រេចចិត្តរបស់កូរ៉េខាងជើង បានកើតឡើងតែពីរថ្ងៃប៉ុណ្ណោះ ក្រោយពីខ្លួនបានប្រកាសថា នឹងបង្ហោះខិត្តប័ណ្ណប្រឆាំងកូរ៉េខាងត្បូងវិញចំនួន ១២លានសន្លឹក ជាការសងសឹកឲ្យសមតម្លៃ ចំពោះអ្វីដែលកូរ៉េខាងត្បូងបានធ្វើ។
គួរបញ្ជាក់ថា ទំនាក់ទំនងរវាងកូរ៉េទាំងពីរ បានប្រែជាតានតឹងខ្លាំងឡើងវិញ បន្ទាប់ពីក្រុមជនជាតិកូរ៉េខាងជើង ដែលរស់នៅនិរទេសក្នុងទឹកដីកូរ៉េខាងត្បូង បានប្រមូលផ្តុំគ្នាបង្ហោះបាឡុងមានផ្ទុកខិត្តប័ណ្ណ ប្រឆាំងមេដឹកនាំកំពូលកូរ៉េខាងជើង នៅតាមតាមតំបន់ព្រំដែនរវាងកូរ៉េទាំងពីរ។
ជាការឆ្លើយតបកូរ៉េខាងជើងបានបំផ្ទុះអគារ ការិយាល័យទំនាក់ទំនង ២៤ម៉ោងរវាងកូរ៉េទាំងពីរ ដែលត្រូវបានដំណើរការកាលពីឆ្នាំ២០១៨ និងប្រកាសដាក់ពង្រាយយោធានៅតាមចំណុចព្រំដែនមួយចំនួន នៅជាប់កូរ៉េខាងត្បូងឡើងវិញ។ ប៉ុន្តែតាមរយៈសេចក្តីប្រកាសខាងលើនេះ ការដាក់ពង្រាយយោធាត្រូវបានផ្អាកវិញហើយ៕
ភ្នំពេញ ៖ នៅថ្ងៃទី២៤ ខែមិថុនា ឆ្នាំ២០២០នេះ ពុំមានករណីឆ្លងជំងឺកូវីដ១៩ថ្មី នៅក្នុងប្រទេសកម្ពុជា ខណៈមានអ្នកជាសះស្បើយ១នាក់ទៀត ត្រូវបានព្យាបាលឱ្យជាសះស្បើយ ដែលធ្វើឱ្យអ្នកជំងឺកូវីដ១៩ នៅកម្ពុជា នៅសល់ត្រឹម២នាក់ប៉ុណ្ណោះ ដែលកំពុងសម្រាកព្យាបាល។ នេះបើតាមសេចក្តីប្រកាសរបស់ក្រសួងសុខាភិបាល។
អ្នកជំងឺកូវីដ១៩ ដែលត្រូវបានព្យាបាលឱ្យជាសះស្បើយថ្មីនេះ ជាជនជាតិខ្មែរ មានអាយុ២១ឆ្នាំ មានទីលំនៅនៅភូមិស្រែអំបិល ឃុំស្រែអំបិល ស្រុកស្រែអំបិល ខេត្តកោះកុង ដែលជាអ្នកធ្វើដំណើរមកពីប្រទេសម៉ាឡេស៊ី ហើយត្រូវបានរកឃើញថា មានវិជ្ជមានមេរោគកូវីដ១៩។
សូមបញ្ជាក់ថា រហូតដល់ពេលនេះ កម្ពុជាបានរកឃើញអ្នកមានជំងឺកូវីដ១៩ នៅទូទាំងប្រទេស សរុបចំនួន ១៣០នាក់ (ស្ត្រី ៣៩នាក់ និងបុរស ៩១នាក់) ក្នុងនោះមានអ្នកសរុបចំនួន១២៨នាក់ ត្រូវបានព្យាបាលជាសះស្បើយ និងអ្នកកំពុងសម្រាកព្យាបាលនៅក្នុងមន្ទីរពេទ្យមិត្តភាពខ្មែរ-សូវៀត មានចំនួន០២នាក់ប៉ុណ្ណោះ។
ទោះជាយ៉ាងនេះក្តី រាជរដ្ឋាភិបាលកម្ពុជា និងក្រសួងសុខាភិបាល នៅតែបន្តអំពានាវឱ្យប្រជាពលរដ្ឋ មានការប្រុងប្រយ័ត្ន និងរស់នៅប្រកបដោយអនាម័យ ហើយអនុវត្តតាមវិធានការនានារបស់រាជរដ្ឋាភិបាល និងក្រសួងសុខាភិបាល៕
ខាងក្រោមនេះជាសេចក្តីប្រកាសរបស់ក្រសួងសុខាភិបាល៖
ខេត្តតាកែវ ៖ បន្លែដែលមានផ្ទុកសំណល់ថ្នាំសំលាប់សត្វល្អិតប្រមាណ៤តោន ត្រូវបានមន្រ្តីកាំកុងត្រូលសាលាខេត្តតាកែវរកឃើញកាលពីថ្ងៃទី២៣ ខែមិថុនា ឆ្នាំ២០២០ម្សិលមិញ ក្រោយឈ្មួញដឹកនាំចូលតាមច្រកទ្វារអន្តរជាតិភ្នំដិន ស្ថិតក្នុងស្រុកគិរីវង់។
បើតាមមន្រ្តីបានឲ្យដឹងថា ក្នុងសកម្មភាពចុះត្រួតពិនិត្យ មន្ត្រីជំនាញបានដកយកគំរូបន្លែមួយចំនួន ដើម្បីធ្វើការត្រួតពិនិត្យស្វែងរកសារធាតុគីមីហាមឃាត់ដែលធ្វើឲ្យប៉ះពាល់ដល់សុខភាពប្រជាពលរដ្ឋ។ មន្រ្តីដដែលបញ្ជាក់ថា ជាលទ្ធផលមន្ត្រីជំនាញបានរកឃើញបន្លែដែលមានផ្ទុកសំណល់ថ្នាំសំលាប់សត្វល្អិតរួមមាន ៖ ខ្ញីចំនួន ១ តោន, ម្ទេសស្រស់ចំនួន ៥០០ គីឡូក្រាម, ក្រូចខ្វិចតូចចំនួន៥០០ គីឡូក្រាមនិងស្ពៃគួយឡេងចំនួន ២ តោន។
បន្ទាប់មកមន្ត្រីសាខា ក.ប.ប ខេត្តតាកែវ បានធ្វើកំណត់ និងបានណែនាំឱ្យអាជីវករខាងលើធ្វើកិច្ចសន្យាបញ្ឈប់ការនាំចូល ម្ហូបអាហារ បន្លែ ផ្លែឈើ ណាដែលមានផ្ទុកសារធាតុគីមីហាមឃាត់បន្តទៀត៕ 
ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា នៅព្រឹកថ្ងៃទី២៤ ខែមិថុនា ឆ្នាំ២០២០ នេះ អញ្ជើញប្រកាសអនុវត្តន៍កម្មវិធីផ្តល់សាច់ប្រាក់ជូនប្រជាពលរដ្ឋ មានជីវភាពក្រីក្រ និងងាយរងគ្រោះដោយសារជំងឺកូវីដ១៩ ប្រមាណ៦០ម៉ឺនគ្រួសារ ខណៈដែលពិធីនេះនឹងធ្វើឡើងនៅវិមានសន្តិភាព។
ក្នុងពេលចុះពិនិត្យការដ្ឋានសាងសង់ព្រលានយន្តហោះថ្មីនៅក្នុងខេត្តកណ្តាល សម្តេចតេជោ ហ៊ុន សែន បានប្រកាសថា រាជរដ្ឋាភិបាលបញ្ចេញថវិកាប្រមាណ ២៥លានដុល្លារអាមេរិកក្នុងមួយខែ ដើម្បីជួយដល់ប្រជាពលរដ្ឋមានការលំបាកក្នុងជីវភាពប្រមាណជា ៦០ម៉ឺនគ្រួសារ។
បើតាមអនុក្រឹត្យស្តីពីការឧបត្ថម្ភសាច់ប្រាក់បានគូសបញ្ជាក់ថា គ្រួសារក្រីក្រ និងងាយរងគ្រោះ ដែលត្រូវទទួលបានប្រាក់ឧបត្ថម្ភ ត្រូវមានបណ្ឌសមធម៌ ដែលមានសុពលភាព ដោយឈរលើកម្រិតភាពក្រីក្រ៖ ក្រកម្រិត១ (ទីទ័លក្រ) ឬ ក្រកម្រិត២ (ក្រ) និងបានទៅផ្ទៀងផ្ទាត់បញ្ជីឈ្មោះ នៃកម្មវិធីឧបត្ថម្ភសាច់ប្រាក់ជូនគ្រួសារក្រីក្រ ក្នុងកំលុងពេលប្រយុទ្ធប្រឆាំងជំងឺកូវីដ១៩ នៅសាលាឃុំ សង្កាត់ណាមួយ។
ក្នុងអនុក្រឹត្យ ក៏បានបញ្ជាក់ផងដែរថា ចំនួនទឹកប្រាក់ ត្រូវផ្តល់ជូនក្នុងមួយខែមានចន្លោះពី១៦,០០០រៀល ទៅដល់១២០,០០០រៀល។ កម្រិតសាច់ប្រាក់ ដែលត្រូវឧបត្ថម្ភនេះ ធ្វើឡើងតាមប្រភេទគ្រួសារក្រីក្រក្នុងកម្រិត១ ឬកម្រិត២ ហើយក៏បែងចែកទៅតាមប្រភេទគ្រួសារនៅក្នុងរាជធានី និងជនបទផងដែរ។
សូមបញ្ជាក់ថា មកដល់ត្រឹមថ្ងៃទី២៣ ខែមិថុនា ឆ្នាំ២០២០ កម្ពុជារកឃើញអ្នកកើតជំងឺកូវីដ១៩ ចំនួន ១៣០នាក់។ ក្នុងនោះព្យាបាលជាសះស្បើយចំនួន ១២៧នាក់ និង ៣នាក់ទៀតកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត៕
ខេត្តស្ទឹងត្រែង ៖ ប្រធានមន្ទីរកសិកម្មខេត្តស្ទឹងត្រែង អំពាវនាវឲ្យប្រជាពលរដ្ឋផ្អាកការនេសាទ ជាពិសេសការនេសាទត្រីប៉ាសេអ៊ី នៅរដូវត្រីពង ដើម្បីរក្សាចំនួនត្រីឲ្យមានស្ថេរភាព និងបង្កើនបរិមាណមច្ឆជាតិ។
ថ្លែងនៅក្នុងសន្និសីទកាសែតស្តីពីវឌ្ឍនភាព និងទិសដៅបន្តរបស់រដ្ឋបាលខេត្តស្ទឹងត្រែង លោក លាង សេង បានឲ្យដឹងថា រដូវត្រីពងបានចូលមកដល់ រាល់ការ នេសាទលក្ខណៈទ្រង់ទ្រាយធំជាអាជីវកម្មអាជីវកម្ម ត្រូវបានបិទជាបណ្តោះអាសន្ន។ លោកបានក្រើនរំលឹកដល់ប្រជានេសាទ ចូលរួមគោរពច្បាប់ និងទប់ស្កាត់ បទល្មើសនេសាទនៅរដូវត្រីពងកូន ដើម្បីបង្កើនទិន្នផលត្រីឲ្យកាន់តែច្រើនថែមទៀត។ ជាពិសេសប្រជានេសាទ ត្រូវផ្អាកការនេសាទត្រីនៅរដូវនេះ ដើម្បីទុកឱកាស សម្រាប់ការបន្តពូជរបស់ត្រី ជាពិសេសគឺត្រីប៉ាសេអ៊ី ដែលជាប្រភេទត្រីកម្រនិងស្ទើរតែជិតផុតពូជទៅហើយនោះ។ លោកពន្យល់ថា ខេត្តស្ទឹងត្រែងបានបិទការនេសាទ តាំងតែពីថ្ងៃទី០១ ខែឧសភា ពោលគឺបិទមុនខេត្តផ្សេងៗនៅក្នុងប្រទេសកម្ពុជា១ខែ ដោយសារតែខេត្តនេះមានលក្ខណៈពិសេសគឺជាជំរុំមេត្រីពូជ ពិសេសគឺត្រីប៉ាសេអ៊ី។
លោកបានបន្ថែមទៀតថា ត្រីប៉ាសេអ៊ីគឺជាប្រភេទត្រីដែលមានរសជាតិឆ្ងាញ់ជាងប្រភេទត្រីនានា ដូច្នេះហើយទើបធ្វើឲ្យត្រីនេះមានតម្លៃថ្លៃ។ ត្រីដែលមានទម្ងន់ក្រោមមួយគីឡូក្រាម មានតម្លៃចាប់ពី ១០ម៉ឺនរៀលទៅ ១៥ម៉ឺនរៀល ឯត្រីដែលមានទម្ងន់លើសមួយគីឡូក្រាម ក្នុងមួយគីឡូមានតម្លៃចាប់ពី ៤០ម៉ឺនរៀលទៅ៦០ម៉ឺនរៀល។
គួរបញ្ជាក់ផងដែរថា ទិន្នផលត្រីដែលប្រជានេសាទ នេសាទបានក្នុងលក្ខណៈគ្រួសារមុនពេលបិទការនេសាទ នៅក្នុងឆ្នាំ២០២០នេះ គឺទទួលបានទិន្នផលសរុបជិត១០០តោនផងដែរ៕
ភ្នំពេញ ៖ គណៈកម្មាធិការរៀបចំព្រឹត្តិការណ៍ស៊ីហ្គេមឆ្នាំ ២០២៣ ហៅកាត់ថា CAMSOC នាព្រឹកថ្ងៃទី២៣ ខែមិថុនា នេះ បានសម្រេចលើការជ្រើសរើសស្លាកសញ្ញា និមិត្តសញ្ញា និងបាវចនា ដែលមានពី ២ទៅ ៣ទម្រង់ ដើម្បីឆ្លងកិច្ចប្រជុំធំរបស់ CAMSOC ដែលគ្រោងនឹងដឹកនាំដោយសម្តេចពិជ័យសេនា ទៀ បាញ់ នាថ្ងៃទី២កក្កដា ខាងមុខ។
លោក វ៉ាត់ ចំរើន អគ្គលេខាធិការ CAMSOC បញ្ជាក់ថា កិច្ចប្រជុំក៏បានពិនិត្យមើលវឌ្ឍនភាពការងារហិរញ្ញវត្ថុ និងផ្គត់ផ្គង់ ដោយសម្របសម្រួលឲ្យដំណើរការល្អប្រសើរ និងជម្រះបញ្ជីចាស់ ដើម្បីបន្តធ្វើដំណើរតទៅមុខទៀត ប្រកបដោយភាពរលូន។
លោក បញ្ជាក់ទៀតថា ឯកឧត្តម ថោង ខុន ប្រធានអង្គប្រជុំក៏បានលើកឡើងអំពីគណៈកម្មការសម្រប សម្រួលអន្តររដ្ឋាភិបាលកម្ពុជា-ចិន ក្នុងការរៀបចំឡើងវិញក្នុងការបញ្ជូនអត្តពលិកកម្ពុជាចេញទៅហ្វឹកហាត់នៅប្រទេសចិន ដែលនេះឯកឧត្តមចាត់ទុកថា ជាការពន្លឿននៃស្ថានភាពវិបត្តិជំងឺកូវីដ-១៩ កាន់តែល្អប្រសើរ ដើម្បីពង្រឹងគុណភាព បច្ចេកទេសរបស់អត្តពលិកជម្រើសជាតិកម្ពុជា ឆ្ពោះទៅស៊ីហ្គេម ឆ្នាំ២០២៣។
សូមបញ្ជាក់ថាស្លាកសញ្ញា និមិត្តសញ្ញា និងបាវចនា ២ទៅ៣ដែលបានសម្រេចជ្រើសក្នុងកិច្ចប្រជុំនេះ និងយកទៅឆ្លងសម្តេច ពិជ័យសេនា ទៀ បាញ់ នាថ្ងៃទី២កក្កដា ខាងមុខនេះ ដើម្បីយកប្រើប្រាស់ជានិមិត្តសញ្ញាផ្លូវការនៃព្រឹត្តិការណ៍ស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ ដោយស្លាកសញ្ញា និមិត្តសញ្ញា និងបាវចនាទាំងនោះ ចាប់ផ្តើមប្រាស់ផ្លូវការសម្រាប់ធ្វើការផ្សព្វផ្សាយពីចុងឆ្នាំ២០២០ទៅដល់ស៊ីហ្គេមឆ្នាំ២០២៣៕
ភ្នំពេញ ៖ រដ្ឋមន្រ្តីក្រសួងការងារ និបណ្តុះបណ្តាលវិជ្ជាជីវៈ បានជម្រុញដល់ក្រសួង ស្ថាប័នពាក់ព័ន្ធ ដែលជាសមាជិក គណៈកម្មការ សម្រាប់ដោះស្រាយបញ្ហា កូដកម្ម បាតុកម្មនៅតាមគ្រប់មុខសញ្ញា គណៈបញ្ជាការឯកភាពគ្រប់ថ្នាក់ កងកម្លាំងមានសមត្ថកិច្ច មន្ទីរការងាររាជធានី-ខេត្ត ត្រូវបន្តចូលរួមសហការគ្នាឱ្យកាន់តែជិតស្និត ប្រឹងប្រែងដោះស្រាយ នូវសំណូមពរ ការទាមទារស្របតាមច្បាប់ជូនប្រជាពលរដ្ឋនិងកម្មករនិយោជិត ហើយបន្តចាត់វិធានការចំពោះអ្នកមានចេតនាញុះញង់ធ្វើឱ្យខាតបង់ផលប្រយោជន៍ប្រជាពលរដ្ឋប៉ះពាល់សណ្តាប់ធ្នាប់សាធារណៈ និងបង្កអំពើហិង្សានានានៅក្នុងសង្គមជាតិ។
ការជំរុញនេះ បានធ្វើឡើងនៅក្នុងកិច្ចប្រជុំគណៈកម្មការសម្រាប់ដោះស្រាយកូដកម្ម បាតុកម្ម នាព្រឹកថ្ងៃទី២៣ ខែមិថុនា ឆ្នាំ២០២០នៅទីស្តីការក្រសួង។ជាមួយនោះ ឯកឧត្តមប្រធានអង្គប្រជុំ បានស្នើអោយបន្តការផ្សព្វផ្សាយ ការយល់ដឹងដល់កម្មករនិយោជិត ពីផលវិបាកដោយសារជំងឺកូវីត១៩ និង វិធាការនានារបស់រាជរដ្ឋាភិបាល ដែលបានដាក់ចេញ ដើម្បីជួយសម្រួលដល់ប្រក្រតីភាព នៃអាជីវកម្ម ផលិតកម្ម របស់រោងចក្រ សហគ្រាស ក៏ដូចជាការជួយឧបត្ថម្ភគាំទ្រ ដើម្បីសម្រួលដល់ជីវភាពរស់នៅរបស់បងប្អូនកម្មករនិយោជិត ប្រជាពលរដ្ឋក្រីក្រ និងជនងាយរងគ្រោះ។
លោកបណ្ឌិត អ៊ិត សំហេង បានស្នើដល់គណៈបញ្ជាការឯកភាពនិងគណៈកម្មការដោះស្រាយ បញ្ហាកូដកម្ម បាតុកម្មនិងគ្រប់ភាគីពាក់ព័ន្ធ ត្រូវមានផែនការអនុវត្ត ក្នុងភូមិសាស្រ្តរបស់ខ្លួន។ រាល់ការកើតមានបញ្ហាណាមួយ នៅតាមភូមិសាស្រ្តរបស់ខ្លួន ត្រូវទទួលខុសត្រូវដឹកនាំបញ្ជាដោះស្រាយរាល់ករណីជាក់ស្តែង និងត្រូវខិតខំដោះស្រាយឱ្យអស់លទ្ធភាព ជាពិសេសត្រូវក្តាប់នូវមូលហេតុ នៃបញ្ហា ភស្តុតាង និងមុខសញ្ញា ដោយខិតខំការពារសន្តិសុខសុវត្ថិភាព ជូនសហជីព កម្មករនិយោជិត ដែលធ្វើកូដកម្ម បាតុកម្មស្របច្បាប់។
លោករដ្ឋមន្ត្រី បានជំរុញឲ្យអាជ្ញាធរថ្នាក់ក្រោមជាតិ ត្រូវចុះជួបជាប្រចាំ ជាមួយកម្មករនិយោជិត នៅតាមតំបន់ផ្ទះជួល ឬ កន្លែងស្នាក់នៅរបស់កម្មករនិយោជិត ដើម្បីក្តាប់ឱ្យបាននូវស្មារតី ស្ថានភាពរស់នៅ បញ្ហាថ្លៃបន្ទប់ ថ្លៃអគ្គិសនី ថ្លៃទឹកស្អាត និងសំណូមពររបស់កម្មករនិយោជិត ព្រមទាំងពិនិត្យហានិភ័យនានា ដែលអាចកើតមាន ចំពោះកម្មករនិយោជិត នៅក្នុងតំបន់ភូមិសាស្ត្ររបស់ខ្លួន។ ផ្តល់លេខទូរស័ព្ទទំនាក់ទំនងរបស់ក្រុមមេធាវី ស្ម័គ្រចិត្តសម្តេចតេជោសែន ក្នុងករណីកម្មករនិយោជិត ត្រូវការប្រើប្រាស់សេវាផ្នែកច្បាប់ដើម្បីការពារខ្លួនពីករណីរំលោភបំពាននានា ដែលអាចកើតមានចំពោះពួកគាត់ ក្នុងវិស័យការងារ៕
ខេត្តបន្ទាយមានជ័យ ៖ ថ្ងៃទី២៣ មិថុនា ឆ្នាំ២០២០នេះ លោក អ៊ុំ រាត្រី អភិបាលខេត្តបន្ទាយមានជ័យ បានប្រជុំជាមួយ លោក វរ៉ាផាន់ សុវាណុន H.E .WORAPHAN SUWANNUN អភិបាលខេត្តស្រះកែវ ព្រះរាជាណាចក្រថៃ តាមរយៈប្រព័ន្ធបញ្ជូនសារសំឡេង រូបភាព (Video Conference)។
របៀបវារៈនៃកិច្ចប្រជុំមាន ៖ ១.ការបើកច្រកនៅថ្ងៃទី០១ ខែកក្កដា ឆ្នាំ២០២០ ឬបន្តបិទច្រក។ ២.ពិភាក្សាសុំឲ្យមានការចេញ-ចូលលក់ដូរត្រឹមផ្សាររុងក្លឿ។ ៣.ពិភាក្សាករណីពលករ(ចេញ-ចូល)។ ៤.បញ្ហាផ្សេងៗ ។
ជាលទ្ធផល ឆ្លងកិច្ចពិភាក្សាយ៉ាងយកចិត្តទុកដាក់ អភិបាលខេត្តបន្ទាយមានជ័យ និងអាជ្ញាធរថៃបានឯកភាពជាគោលការណ៍ឲ្យមានការចូលទៅផ្សាររុងក្លឿ ពិនិត្យទំនិញ និងដឹកទំនិញឥវ៉ាន់មកវិញតាមរយៈរថយន្តចំនួន៥០ឡាន មនុស្សក្នុង១ឡាន ២នាក់ ដោយមានការបំពេញបែបបទ ពិនិត្យសុខភាព តាមការណែនាំ និងវិធានការក្រសួងសុខាភិបាលដោយពុំអនុញ្ញាតឲ្យមានការចូលទៅលក់ដូរនោះទេ។ ហើយរយៈពេល នៃការចូលទៅផ្សារនោះ គឺចាប់ពីម៉ោង៨ និង០០ ដល់ម៉ោង១០នាទីព្រឹកឲ្យចូលឲ្យអស់ នៅវេលាម៉ោង១៣ និង០០ នាទីរៀលចេញពីទឹកដីថៃវិញ។ ចំពោះការអនុញ្ញាតឲ្យចូលទៅនៅថ្ងៃណា ពេលណានោះ មិនទាន់កំណត់នោះទេ រង់ចាំការជូនដំណឹងពីរាជរដ្ឋាភិបាលថៃ។
សម្រាប់ករណីច្រកទ្វារព្រំដែនអន្តរជាតិប៉ោយប៉ែត-ខ្លងលឹក គឺនៅបន្តបិទដដែល។ ចំពោះប្រជាពលរដ្ឋខ្មែរ ដែលធ្វើដំណើរចេញមកពីប្រទេសថៃ ត្រឡប់មកកម្ពុជាវិញ គឺមានការសម្របសម្រួលដោយរក្សាការឯកភាព ឱ្យចេញតាមច្រកអូរបីជាន់ដដែល៕
ភ្នំពេញ ៖ រហូតមកទល់នឹងឆ្នាំ២០២០នេះ កម្ពុជាបានលក់ ឥណទានកាបូនក្នុងទីផ្សារស្ម័គ្រចិត្តបានថវិកាចំនួន១១,៦ លានដុល្លារសហរដ្ឋអាមេរិក ហើយកម្ពុជាបាននិងកំពុងស្វះស្វែងរកដៃគូផ្សេងៗ ទៀតដើម្បី បន្តទិញឥណទានកាបូននេះ បន្ថែមទៀត ខណៈកាបូនដែលបានបំភាយចេញ ពីព្រៃឈើនៅតាមតំបន់ការពារធម្មជាតិ នានាដែលកម្ពុជាមាន នៅសេសបរិមាណច្រើន។
លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថានបានថ្លែងឲ្យដឹងដូច្នេះ ក្នុងឱកាសដែលលោកនិងប្រតិភូក្រសួងបរិស្ថានចុះ ពិនិត្យការគ្រប់គ្រងនិង អភិរក្សតំបន់ដែន ជម្រកសត្វព្រៃតាតៃក្នុងខេត្តកោះកុងកាលពីថ្ងៃទី២០ ខែមិថុនា ឆ្នាំ ២០២០ ខណដែលលោក ក៏បានគូសបញ្ជាក់ថា តំបន់ដែនជម្រកសត្វព្រៃតាតៃជាទីតាំងមួយ ក្នុងចំណោមទីតាំង៣ ដែលកម្ពុជាលក់កាបូនបានក្នុងនោះក៏មានដែនជម្រក សត្វព្រៃកែវសីមា ឧទ្យានជាតិជួរភ្នំ ក្រវ៉ាញខាងត្បូង។
លោករដ្ឋលេខាធិការក្រសួងបរិស្ថានបានថ្លែងបញ្ជាក់ថា ក្រុមហ៊ុនដែលបានទិញឥណទាន ការបូនក្នុងទីផ្សារស្ម័គ្រចិត្តមានក្រុមហ៊ុន Disney ក្រុមហ៊ុន Shell និងក្រុមហ៊ុន Gucci។ រហូតមកដល់ពេលនេះ មានតែប្រទេសកម្ពុជានិងប្រទេសឥណ្ឌូនេស៊ីប៉ុណ្ណោះក្នុង ចំណោម ប្រទេសអាស៊ាន ដែលបានលក់ឥណទានកាបូនក្នុងទីផ្សារកាបូនស្ម័គ្រចិត្តនេះ។
គួរបញ្ជាក់ថា ប្រទេសកម្ពុជាត្រូវបានគេទទួលស្គាល់ថា មានធនធានធម្មជាតិ និងជីវៈចម្រុះ ដ៏សំបូរបែប។ ព្រៃឈើគ្របដណ្តប់ប្រមាណ ៥០% នៃផ្ទៃប្រទេស ដែលជាអត្រាខ្ពស់បំផុត នៅក្នុងតំបន់អាស៊ីអាគ្នេយ៍។ មកទល់បច្ចុប្បន្ននេះ រាជរដ្ឋាភិបាលបានបង្កើនផ្ទៃដីតំបន់ ការពារធម្មជាតិដែលស្ថិតនៅក្រោមយុត្តាធិការរបស់ក្រសួងបរិស្ថាន រហូតដល់ប្រមាណ ៤១% នៃផ្ទៃដីប្រទេសកម្ពុជា គឺស្មើនឹងប្រមាណ ៧,៣ លាន ហិកតាដែលក្នុងនោះមានឧទ្យានជាតិ ដែនជម្រកសត្វព្រៃ តំបន់ប្រើប្រាស់ច្រើន យ៉ាង តំបន់រ៉ាមសារ តំបន់ការពារបេតិកភណ្ឌ ធម្មជាតិ និងរបៀងអភិរក្សជីវៈចម្រុះសរុបចំនួន ៦៩ កន្លែង និងមានមន្ត្រីឧទ្យានុរក្សចំនួន ១២៦០ នាក់ដោយសហការជាមួយសហគមន៍តំបន់ ការពារធម្មជាតិ និងអង្គការដៃគូនានា បាននិងកំពុងឈរជើងការពារ។
ចំណូលបន្ថែមនិងបង្កើតជម្រើសថ្មីសម្រាប់ការប្រកបមុខរបរចិញ្ចឹមជីវិតដើម្បីកាត់ផ្តាច់ពីការពឹងអាស្រ័យលើអនុផលព្រៃឈើដែលជាទម្លាប់មានពីយូរលង់ណាស់មក ហើយរបស់ប្រជាពល រដ្ឋនៅតាមសហគមន៍មូលដ្ឋានតាមរយៈនៃការបង្កើតមុខរបរថ្មីបម្រើឱ្យវិស័យអេកូទេសចរណ៍ ព្រមទាំង ការបណ្តុះបណ្តាលសហគមន៍ឱ្យចេះគ្រប់គ្រង និងការចិញ្ចឹមសត្វផ្គត់ផ្គង់ទីផ្សារ ការដាំដំណាំ រួមផ្សំផ្សេងទៀតមានបន្លែបង្ការសម្រាប់ប្រើប្រាស់ប្រចាំថ្ងៃខ្លួនឯងផង និង សម្រាប់បម្រើសេវា កម្មដល់ភ្ញៀវទេសចរដែលទៅទស្សនាកម្សាន្តនៅក្នុងតំបន់ សហគមន៍ របស់ពលរដ្ឋផងដែរ៕
