ប៉េកាំង ៖ អាជ្ញាធរសុខាភិបាលចិនបាននិយាយនៅថ្ងៃអង្គារនេះថា ខ្លួនបានទទួលរបាយការណ៍នៃករណីឆ្លងកូវីដ១៩ថ្មីចំនួន៨ដែលត្រូវបានបញ្ជាក់នៅលើចិនដីគោកកាលពីថ្ងៃច័ន្ទ ដែលករណីទាំងអស់នេះសុទ្ធតែជាករណីនាំចូល។
គណៈកម្មការសុខភាពជាតិបាននិយាយនៅក្នុងរបាយការណ៍ប្រចាំថ្ងៃរបស់ខ្លួនថា គ្មានអ្នកស្លាប់ថ្មីនោះទេ ទាក់ទងនឹងជំងឺនេះត្រូវបានគេរាយការណ៍ទេកាលពីថ្ងៃច័ន្ទ ខណៈទីក្រុងប៉េកាំងរាយការណ៍គ្មានករណីឆ្លងសូម្បីតែម្នាក់។
សូមជម្រាបថា គិតត្រឹមថ្ងៃទី៦ខែកក្កដា ប្រទេសចិនមានករណីឆ្លងវីរុសកូរ៉ូណាសរុបចំនួន ៨៣.៥៦៥ នាក់ ខណៈចំនួនអ្នកស្លាប់នៅតែមាន ៤.៦៣៤ នាក់ដដែល៕
ភ្នំពេញ ៖ នៅព្រឹកថ្ងៃទី០៧ ខែកក្កដា ឆ្នាំ២០២០នេះ សមត្ថកិច្ចអង្គភាពប្រឆាំងអំពើពុករលួយបាននាំខ្លួនលោក ស៊ូ អារ៉ាហ្វាត់ អភិបាលរងខេត្តបាត់ដំបង និងឧកញ៉ា សង ថន ដែលជាឈ្មួញដីធ្លីម្នាក់ទៅកាន់សាលាដំបូងរាជធានីភ្នំពេញ ជាថ្មីម្តងទៀត ដើម្បីឱ្យតំណាងអយ្យការបន្តបើកការសាកសួរ អំពីករណីពុករលួយរឿងដីធ្លី នៅស្រុកគាស់ក្រឡ ខេត្តបាត់ដំបង។
សំណុំរឿងនេះ ស្ថិតនៅក្រោមការសាកសួររបស់ លោក សឿន មុន្នីរត្ន័ ព្រះរាជអាជ្ញារង អមសាលាដំបូងរាជធានីភ្នំពេញ ប៉ុន្តែក្នុងការសាកសួររយៈពេល១ថ្ងៃពីម្សិលមិញនេះ តុលាការនៅមិនទាន់ចោទប្រកាន់អ្នកទាំងពីរនៅឡើយទេ។
សូមបញ្ជាក់ថា វិវាទដីធ្លីនៅស្រុកគាស់ក្រឡរវាងឧកញ៉ា សង ថន និងប្រជាពលរដ្ឋបានក្លាយជាព្រឹត្តិការណ៍កក្រើក និងចាប់អារម្មណ៍ខ្លាំងក្នុងមជ្ឈដ្ឋានប្រជាពលរដ្ឋខ្មែរ។ វិវាទដីធ្លីនេះ នាំឱ្យសម្តេចតេជោ ហ៊ុន សែន សម្រេចបញ្ចប់តំណែងអភិបាលស្រុកគាស់ក្រឡលោក ម៉ៅ សុចាន់។
ជាមួយគ្នានេះ លោកឧកញ៉ា សង ថន និងអភិបាលរងខេត្តបាត់ដំបង គឺលោក ស៊ូ រ៉ាហ្វាត់ ត្រូវបានអង្គភាពប្រឆាំងអំពើពុករលួយ (ACU) ហៅមកសួរនាំផងដែរ កាលពីព្រលប់ថ្ងៃទី១ ខែកក្កដា ឆ្នាំ២០២០ បន្ទាប់ពីលោកឧកញ៉ា សង ថន ដែលត្រូវបាន ACU នាំខ្លួនទៅសាកសួរក្នុងសំណុំរឿងមួយនេះផងដែរ កាលពីល្ងាចថ្ងៃទី២៧ ខែមិថុនា ឆ្នាំ២០២០ និងក៏ដកតួនាទីអភិបាលស្រុកកោះក្រឡពីតួនាទីផងដែរ។
ចំពោះការនាំខ្លួន លោក ស៊ូ អារ៉ាហ្វាត់ អភិបាលរងខេត្តបាត់ដំបង ដោយACUនេះ ដោយសារលោកធ្លាប់ជាប្រធានគណៈកម្មការថ្នាក់ខេត្តដោះស្រាយវិវាទដីធ្លី នៅស្រុកគាស់ក្រឡ នេះតែម្តង។ ចំណែកលោកឧកញ៉ា សង ថន គឺជាបុគ្គលតែម្នាក់ដែលមានដីប្រមាណ៥ពាន់ហិកតា ដែលស្មើនឹង១ភាគ៤ នៃផ្ទៃដីស្រុកគាស់ក្រឡទាំងមូល។ រីឯលោក ម៉ៅ សុចាន់ អភិបាល ស្រុកគាស់ក្រឡ ក៏ត្រូវបានដកតួនាទីឱ្យទៅបម្រើការងារនៅសាលាខេត្តបាត់ដំបងវិញ៕
ប្រេស៊ីល ៖ ក្រសួងសុខាភិបាលបាននិយាយថា ចំនួនអ្នកស្លាប់ដោយសារ COVID-១៩ នៅប្រទេសប្រស៊ីល បានកើនឡើង៦៥.៤៨៧ នាក់កាលពីថ្ងៃច័ន្ទបន្ទាប់ពីអ្នកជំងឺ ៦២០ នាក់បានស្លាប់នៅក្នុង ២៤ ម៉ោងចុងក្រោយ។ នេះបើយោងតាមប្រភពពីស៊ិនហួរ។
ចំនួនអ្នកឆ្លងសរុប COVID-១៩ ចាប់តាំងពីការផ្ទុះបានកើនឡើងដល់ ១.៦២៣.២៨៤ នាក់បន្ទាប់ពីមានអ្នកឆ្លង២០.២២៩ ករណីបន្ថែមទៀតក្នុងរយៈពេលដូចគ្នា។ ក្រសួងបាននិយាយថា អ្នកជំងឺប្រមាណ ៩២៧,២៩២ នាក់បានជាសះស្បើយផងដែរ។
ទីក្រុងសៅប៉ូឡូដែលមានប្រជាជនច្រើនជាងគេនៅប្រទេសនេះ នៅតែកន្លែងរងផលប៉ះពាល់ធ្ងន់ធ្ងរជាងគេ ដោយសារជំងឺរាតត្បាតមួយនេះដែលមានអ្នកឆ្លង ៣២៣.០៧០ ករណីនិងមានមនុស្សស្លាប់ ១៦.១៣៤ នាក់ បន្ទាប់មកគឺទីក្រុងរីយ៉ូដឺហ្សាណេរ៉ូមាន១២១.៨៧៩ ករណី និងស្លាប់១០.៦៩៨ នាក់៕
បរទេស ៖ យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា គិតត្រឹមម៉ោង ៧ព្រឹកថ្ងៃអង្គារ ទី០៧ ខែកក្កដា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១១,៧៣១,៥៨២នាក់ហើយ។ ក្នុងនោះអ្នកស្លាប់មានចំនួន ៥៤០,០៣១នាក់ និងជាសះស្បើយឡើងវិញ ៦,៦២៣,០៨៩នាក់។
គេហទំព័រដដែល បានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។ ក្នុងនោះសហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដែលមានអ្នកឆ្លងជំងឺ COVID-19 ចំនួន ៣,០៣៩,៦៦៦នាក់ ស្លាប់ចំនួន ១៣២,៩៥២នាក់ និងជាសះស្បើយចំនួន ១,៣១០,៦២១នាក់។
ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល ដែលមានអ្នកឆ្លង ១,៦២៦,០៧១នាក់ ស្លាប់ចំនួន ៦៥,៥៥៦នាក់ និងជាសះស្បើយ ៩៧៨,៦១៥នាក់។ ចំណែកប្រទេសឈរនៅចំណាត់ថ្នាក់ទី៣ គឺប្រទេសឥណ្ឌា ដែលមានអ្នកឆ្លង ៧២០,៣៤៦នាក់ ស្លាប់ ២០,១៧៤នាក់ និងជាសះស្បើយ ៤៤០,១៥០នាក់៕
បរទេស ៖ អ្នកវិទ្យាសាស្ត្ររាប់រយនាក់និយាយថា មានភ័ស្តុតាងដែលថាវីរុសកូរ៉ូណាក្នុងភាគល្អិតតូចៗនៅលើអាកាស អាចឆ្លងទៅមនុស្ស ហើយបានអំពាវនាវឱ្យអង្គការសុខភាពពិភពលោកពិនិត្យឡើងវិញនូវអនុសាសន៍ឬការណែនាំរបស់ខ្លួន។ នេះបើតាមការចេញផ្សាយទីភ្នាក់ងារសារព័ត៌មាន CNA។
អង្គការសុខភាពពិភពលោកបាននិយាយថា ជំងឺ COVID-19 អាចឆ្លងពីមនុស្សម្នាក់ទៅមនុស្សម្នាក់ទៀត តាមរយៈតំណក់ទឹកតូចចេញពីច្រមុះ ឬមាត់ នៅពេលដែលអ្នកមានផ្ទុកជំងឺនេះកណ្ដាស់ ក្អកឬនិយាយ។
នៅក្នុងលិខិតចំហមួយច្បាប់ផ្ញើជូន WHO របស់ក្រុមអ្នកវិទ្យាសាស្ត្រ ២៣៩នាក់មកពីប្រទេសចំនួន៣២ ដែលគ្រោងនឹងចេញផ្សាយការសិក្សាថ្មីមួយ នៅសប្ដាហ៍ក្រោយនេះបានឱ្យដឹងថា មានភស្ដុតាងថ្មីបន្ថែមទៀត អាចបញ្ជាក់បានថា ភាគល្អិតតូចៗនៃវីរុសកូរ៉ូណាថ្មី (COVID-19) នៅក្នុងខ្យល់អាកាស ក៏អាចចម្លងដល់មនុស្សផងដែរ នៅពេលស្រូបវាចូល។ នេះបើយោងតាមការដងស្រង់របស់ទីភ្នាក់ងារសារព័ត៌មាន New York Times។
យ៉ាងណាមិញជុំវិញបញ្ហានេះ WHO មិនទាន់ធ្វើការអត្ថាប្បាយអ្វីឡើយនៅទេ តែកាលពីពេលមុន ទីភ្នាក់ងារសុខាភិបាលអង្គការសហប្រជាជាតិមួយនេះ ធ្លាប់បានបញ្ជាក់ថា ភស្តុតាងដែលក្រុមអ្នកស្រាវជ្រាវរកឃើញថា វីរុសកូរ៉ូណាថ្មីអាចរស់នៅ ឬចម្លងទៅមនុស្សតាមខ្យល់អាកាស មិនទាន់មានភាពប្រាដកជា ឬអាចជឿជាក់បានទាំងស្រុងនោះទេ៕
ភ្នំពេញ ៖ ក្រសួងធនធានទឹក និងឧតុនិយម នៅថ្ងៃទី០៧ ខែកក្កដា ឆ្នាំ២០២០នេះ បានចេញសេចក្ដីជូនដំណឹង ស្ដីពីស្ថានភាពធាតុអាកាស នៅកម្ពុជា ចាប់ពីថ្ងៃទី ០៨ ដល់ថ្ងៃទី ១៤ ខែកក្កដា ឆ្នាំ២០២០។
ក្រសួងធនធានទឹកបញ្ជាក់ថា តាមរយៈនៃការប្រែប្រួលជាបន្តបន្ទាប់ នៃស្ថានភាពអាកាសធាតុ សង្កេតឃើញថា ខ្យល់មូសុងនិរតីបក់ក្នុងល្បឿនមធ្យម ជាមួយនឹងជ្រលងសម្ពាធទាបអូសបន្លាយលើព្រះរាជាណាចក្រកម្ពុជា។ ស្ថានភាពបែបនេះធ្វើឱ្យ៖
១- បណ្ដាខេត្តនៅតំបន់វាលទំនាបកណ្ដាល៖
* សីតុណ្ហភាពអប្បបរមាមានពី ២៦-២៧°C
* សីតុណ្ហភាពអតិបរមា មានពី ៣២-៣៥°C ។
នៅថ្ងៃទី៨-១០ ខែកក្កដា នឹងអាចមានភ្លៀងធ្លាក់រាយប៉ាយក្នុងកម្រិត ពីខ្សោយទៅមធ្យម និងបន្ទាប់ពីនោះ ភ្លៀងនៅក្នុងកម្រិតពីតិចទៅបង្គួរ។
២៖ បណ្តាខេត្តនៅតំបន់ជួរភ្នំដងរែក និងខ្ពង់រាបឦសាន៖
* សីតុណ្ហភាពអប្បបរមាមានពី ២២-២៦°C
* សីតុណ្ហភាពអតិបរមាមានពី ៣១-៣៣°C ។
នឹងអាចមានភ្លៀងធ្លាក់រាយប៉ាយ នៅក្នុងកម្រិតខ្សោយទៅមធ្យម។
៣៖ បណ្តាខេត្តនៅតំបន់មាត់សមុទ្រ៖
* សីតុណ្ហភាពអប្បបរមាមានពី ២៥-២°C
* សីតុណ្ហភាពអតិបរមាមានពី ៣០-៣២°C ។
នឹងអាចមានភ្លៀងធ្លាក់រាយប៉ាយនៅក្នុងកម្រិតពីតិចទៅមធ្យម។
ជាមួយគ្នានេះក្រសួងបានអំពាវនាវ ដល់បងប្អូនប្រជាពលរដ្ឋ សូមបង្កើនការប្រុងប្រយ័ត្នចំពោះ បាតុភូតផ្គរ រន្ទះ និងខ្យល់កន្ត្រាក់ ដែលនឹងអាចកើតមានជាយថាហេតុ៕
ភ្នំពេញ ៖ សម្តេចតេជោ ហ៊ុន សែន នាយករដ្ឋមន្រ្តីនៅថ្ងៃទី០៧ ខែកក្កដា ឆ្នាំ២០២០នេះ បានផ្ញើសារចូលរួមអបអរសាទរ ខួប១២ឆ្នាំនៃការដាក់បញ្ចូលប្រាសាទព្រះវិហារក្នុងបញ្ជីបេតិកភណ្ឌពិភពលោក។
នៅលើទំព័រហ្វេសប៊ុកផ្លូវការ សម្តេចបានសរសេរថា ៖« ថ្ងៃទី៧ ខែកក្កដា ឆ្នាំ២០២០ នេះ ជាខួប១២ឆ្នាំនៃការដាក់បញ្ចូលប្រាសាទព្រះវិហារក្នុងបញ្ជីបេតិកភណ្ឌពិភពលោក។ ព្រឹត្តិការណ៍ដែលកើតឡើងកាលពីថ្ងៃទី៧ ខែកក្កដា ឆ្នាំ២០០៨ ត្រូវបានចាត់ទុកជាព្រឹត្តិការណ៍ប្រវត្តិសាស្ត្រថ្មីមួយ បើគិតចាប់តាំងពីកម្ពុជាទទួលបានប្រាសាទដ៏ពិសិដ្ឋមួយនេះ ក្រោយឈ្នះក្តីលើប្រទេសថៃនៅតុលាការអន្តរជាតិក្រុងឡាអេនាថ្ងៃទី១៥ ខែមិថុនា ឆ្នាំ១៩៦២»។
សម្តេចបន្តថា ព្រះវិហារ ប្រាសាទដ៏ពិសិដ្ឋរបស់កម្ពុជាដែលស្ថិតនៅលើភ្នំដងរែក ត្រូវបានចុះបញ្ជីជាសម្បត្តិបេតិកភណ្ឌពិភពលោកនាកិច្ចប្រជុំទី៣២របស់គណៈកម្មាធិការបេតិកភណ្ឌពិភពលោករបស់អង្គការយូណេស្កូ កាលពីថ្ងៃទី៧ ខែកក្កដា ឆ្នាំ២០០៨ នៅទីក្រុងកេបិច ប្រទេសកាណាដា៕
អេស្ប៉ាញ ៖ ក្រុមមន្រ្តីនៅតំបន់ហ្គាលីស្សា (Galicia) ស្ថិតនៅភាគពាយព្យនៃប្រទេសអេស្ប៉ាញ បានដាក់ចេញនូវវិធានការរឹតបន្តឹងការដើរហើរឡើងវិញក្នុងសង្កាត់មួយដែលមានពលរដ្ឋរស់នៅប្រហែល៧ម៉ឺននាក់បន្ទាប់ពីមានការផ្ទុះឡើងនៃករណីឆ្លងវីរុសកូវីដ១៩។ មានតែអ្នកដែលត្រូវធ្វើដំណើរទៅធ្វើការប៉ុណ្ណោះដែលនឹងត្រូវបានអនុញ្ញាតឱ្យចាកចេញ ឬចូលសង្កាត់ម៉ារីណា (Marina) ចាប់ពីថ្ងៃចន្ទនេះរហូតដល់ថ្ងៃសុក្រ។
ចំណាត់ការនេះបានកើតឡើងមួយថ្ងៃបន្ទាប់ពីតំបន់កាតាឡូនីញ៉ា (Catalonia) ដែលស្ថិតនៅភាគឦសានប្រទេសអេស្ប៉ាញបានដាក់ចេញនូវវិធានស្រដៀងគ្នានេះដែរក្នុងមូលដ្ឋានរបស់ខ្លួន។
បច្ចុប្បន្នបើគិតជារួមការផ្ទុះឡើងនៃករណីឆ្លងវីរុសកូវីដ១៩ក្នុងប្រទេសអេស្ប៉ាញកំពុងស្ថិតនៅក្រោមការគ្រប់គ្រង។ ប្រទេសអេស្ប៉ាញមានអ្នកឆ្លងវីរុសកូវីដ១៩ជិត៣សែននាក់ដោយក្នុងនោះមានអ្នកស្លាប់២៨,៣៨៥នាក់។ ប៉ុន្តែចំនួនស្លាប់ប្រចាំថ្ងៃមិនឡើងលើសដប់នាក់ទេអស់រយៈពេល៣សប្តាហ៍មកហើយ។
សូមជម្រាបថា អេស្ប៉ាញបានចាប់ផ្ដើមបើកព្រំដែនរបស់ខ្លួនជាមួយបណ្ដាប្រទេសផ្សេងៗទៀតនៅក្នុងសហភាពអឺរ៉ុប រួមទាំងអង់គ្លេសផងដោយរំពឹងថានឹងមានការកើនឡើងនៃការធ្វើដំណើរក្នុងថ្ងៃឈប់សម្រាកប្រចាំរដូវក្តៅនេះ៕
ភ្នំពេញ ៖ កិច្ចប្រជុំកំពូលអាស៊ី-អឺរ៉ុប លើកទី១៣ ដែលកម្ពុជាគ្រោងធ្វើជាម្ចាស់ផ្ទះលើកដំបូង ពីថ្ងៃទី១៦-១៧ ខែវិច្ឆិកា ឆ្នាំ២០២០ គឺត្រូវបានលើកពេលទៅធ្វើនៅពាក់កណ្តាលឆ្នាំ២០២១វិញ ដោយសារតែជំងឺកូវីដ១៩។ នេះបើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ។
ការសម្រេចលើកពេលនេះ ត្រូវបានធ្វើឡើងក្នុងកិច្ចប្រជុំឧត្តមមន្រ្តីអាស៊ី-អឺរ៉ុប តាមប្រព័ន្ធវីដេអូ កាលពីថ្ងៃទី២-៣ កក្កដា ២០២០ ក្រោមអធិបតីភាពលោក សុក ស៊ីផាន់ណា ទីប្រឹក្សាជាន់ខ្ពស់របស់រាជរដ្ឋាភិបាល និងជាឧត្តមមន្រ្តីកម្ពុជាទទួលបន្ទុកកិច្ចប្រជុំអាស៊ី-អឺរ៉ុប៕
ភ្នំពេញ ៖ នៅព្រឹកថ្ងៃច័ន្ទនេះ អង្គភាពប្រឆាំងអំពើពុករលួយ ( ACU ) បាននាំខ្លួនលោក ស៊ូ អារ៉ាហ្វាត់ អភិបាលរងខេត្តបាត់ដំបងទៅតុលាការរាជធានីភ្នំពេញ ករណីពុករលួយរឿងដីធ្លីនៅស្រុកគាស់ក្រឡ ខេត្តបាត់ដំបង។
សូមជម្រាបថា ACU បាននាំខ្លួនលោក ស៊ូ អារ៉ាហ្វាត់ មកកាន់ស្នាក់ការ ACU នៅព្រលប់ថ្ងៃទី០១ ខែកក្កដា ឆ្នាំ២០២០ដែលគេសង្ស័យថា ពាក់ព័ន្ធនឹងអំពើពុករលួយរឿងដីធ្លី នៅស្រុកគាស់ក្រឡ ខេត្តបាត់ដំបង។ ទន្ទឹមនោះ ACU ដដែលកាលពីថ្ងៃទី២៧ ខែមិថុនា ឆ្នាំ២០២០ ក៏បាននាំខ្លួនលោកឧកញ៉ា សង ថន មកសាកសួរពាក់ព័ន្ធនឹងករណីពុករលួយរឿងដីធ្លីប្រមាណ៥០០០ហិកតា នៅស្រុកគាស់ក្រឡ ខេត្តបាត់ដំបងនេះផងដែរ។
ជុំវិញរឿងរ៉ាវខាងលើនេះ គេកំពុងរង់ចាំមើលថា តើមានមន្ត្រីអាជ្ញាធរប៉ុន្មាននាក់ទៀតដែលជាប់ពាក់ព័ន្ធករណីដីធ្លីនៅស្រុកគាស់ក្រឡ ខេត្តបាត់ដំបងនេះ ព្រោះថា ទំហំនៃសាច់រឿងនេះដូចជា មិនធម្មតានោះឡើយ ហើយមន្ត្រីម្នាក់ឬពីរនាក់ក៏មិនអាចធ្វើបានដែល៕
ចិន ៖ អាជ្ញាធរសុខាភិបាលចិននៅថ្ងៃចន្ទនេះ បានរាយការណ៍ថាមានករណីឆ្លងកូវីដ១៩ថ្មីចំនួន៤ករណីបន្ថែមទៀតកាលពីម្សិលមិញ ដោយក្នុងនោះ៣ករណីជាករណីនាំចូលនិង១ករណីទៀតជាករណីឆ្លងក្នុងស្រុក ដែលរកឃើញនៅទីក្រុងប៉េកាំង និងគ្មានអ្នកស្លាប់ថ្មីទេ។ នេះបើយោងតាមប្រភពពី CGTN។
គិតមកដល់ពេលនេះចំនួនករណីសរុបដែលត្រូវបានបញ្ជាក់នៅលើចិនដីគោកមានចំនួន ៨៣.៥៥៧ នាក់ និងចំនួនអ្នកស្លាប់កើនដល់ ៤.៦៣៤ នាក់ជាមួយនឹងអ្នកជំងឺមិនបញ្ចេញរោគសញ្ញាមានចំនួន១០៩ នាក់ដែលកំពុងស្ថិតក្រោមការសង្កេតពីក្រុមគ្រូពេទ្យ៕
ហ្សឺណែវ ៖ អគ្គនាយកអង្គការសុខភាពពិភពលោក (WHO) លោក Tedros Adhanom Ghebreyesus បាននិយាយកាលពីចុងសប្តាហ៍កន្លងទៅថា WHO គួរតែទទួលបានលទ្ធផលឆាប់ៗនេះពីការសាកល្បងព្យាបាលដែលខ្លួនកំពុងរៀបចំធ្វើឡើងលើថ្នាំដែលអាចមានប្រសិទ្ធភាពក្នុងការព្យាបាលអ្នកជំងឺ COVID-19។
លោកបានប្រាប់សន្និសីទសារព័ត៌មានខ្លីមួយដោយសម្ដៅលើការសិក្សាព្យាបាលដែលភ្នាក់ងារ UN កំពុងរៀបចំធ្វើឡើងថា “អ្នកជំងឺជិត ៥,៥០០ នាក់នៅក្នុងប្រទេសចំនួន ៣៩ មកទល់ពេលនេះត្រូវបានជ្រើសរើសសម្រាប់ការសាកល្បងព្យាបាលដែលមានឈ្មោះថាសាមគ្គីភាព”។ លោកបាននិយាយថា “យើងរំពឹងឃើញលទ្ធផលបណ្តោះអាសន្នក្នុងរយៈពេលពីរសប្តាហ៍ខាងមុខនេះ”។
ការសាកល្បងព្យាបាល “សាមគ្គីភាព” បានចាប់ផ្តើមជា ៥ ផ្នែកដោយពិនិត្យមើលវិធីសាស្ត្រនៃការព្យាបាលដែលអាចកើតមានចំពោះជំងឺ COVID-19 ដូចជា ការថែទាំតាមស្តង់ដារ ថ្នាំ Remdesivir ថ្នាំប្រឆាំងនឹងជំងឺគ្រុនចាញ់ ថ្នាំ Hydroxychloroquine ថ្នាំជំងឺអេដស៍ Lopinavir/Ritonavir និងថ្នាំ Lopanivir/Ritonavir ផ្សំជាមួយថ្នាំ Interferon។
កាលពីដើមខែនេះវាបានបញ្ឈប់ការធ្វើតេស្តថ្នាំ Hydroxychloroquine បន្ទាប់ពីការសិក្សាបានបង្ហាញថា វាមិនមានអត្ថប្រយោជន៍ចំពោះអ្នកដែលមានជំងឺនេះទេ ប៉ុន្តែការងារជាច្រើនទៀតនៅតែត្រូវការដើម្បីមើលថាតើវាអាចមានប្រសិទ្ធភាពជាថ្នាំបង្ការដែរឬយ៉ាងណា។
លោក Mike Ryan ប្រធានកម្មវិធីសង្គ្រោះបន្ទាន់របស់ WHO បាននិយាយថា វាជាការមិនសមហេតុផលនោះទេក្នុងការទស្សទាយនៅពេលដែលវ៉ាក់សាំងអាចត្រូវបានត្រៀមខ្លួនប្រឆាំងនឹងជំងឺ COVID-19 ដែលបានសម្លាប់មនុស្សជាងកន្លះលាននាក់។
លោកបានប្រាប់សមាគមន៍អ្នកសារព័ត៌មាន ACANU របស់ UN ក្នុងទីក្រុងហ្សឺណែវថា ខណៈពេលដែលបេក្ខជនតេស្តវ៉ាក់សាំងអាចបង្ហាញពីប្រសិទ្ធភាពរបស់វានៅចុងឆ្នាំសំណួរគឺថាតើវាអាចត្រូវបានផលិតឲ្យបានឆាប់តាមរបៀបណា។ ឥឡូវនេះមិនមានវ៉ាក់សាំងប្រឆាំងនឹងជំងឺនេះនោះទេ ខណៈពេលដែលបេក្ខជនដែលសក្តានុពលចំនួន ១៨ នាក់កំពុងត្រូវបានធ្វើតេស្តលើមនុស្ស។
មន្ត្រីអង្គការសុខភាពពិភពលោកបានការពារការឆ្លើយតបរបស់ពួកគេចំពោះវីរុសដែលបានកើតឡើងនៅក្នុងប្រទេសចិនកាលពីឆ្នាំមុនដោយនិយាយថា ពួកគេត្រូវបានជំរុញដោយវិទ្យាសាស្ត្រនៅពេលវាបានអភិវឌ្ឍ។ លោក Ryan បាននិយាយថា អ្វីដែលលោកសោកស្តាយគឺបណ្តាញផ្គត់ផ្គង់សកលបានរងផលប៉ះពាល់ និងកង្វះខាតឧបករណ៍ការពាររបស់បុគ្គលិកពេទ្យ។ លោកបាននិយាយថា “ខ្ញុំសោកស្តាយដែលមិនមានសិទ្ធិប្រើប្រាស់ឧបករណ៍ COVID ដោយយុត្តិធម៌។ ខ្ញុំសោកស្តាយដែលប្រទេសខ្លះមានច្រើនជាងប្រទេសដទៃទៀត ហើយខ្ញុំសោកស្តាយដែលកម្មករជួរមុខបានស្លាប់ដោយសារបញ្ហានោះ”៕
បរទេស ៖ យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា គិតត្រឹមម៉ោង ៧ព្រឹកថ្ងៃចន្ទ ទី០៦ ខែកក្កដា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១១,៥៤៦,៤៩៣នាក់ហើយ។ ក្នុងនោះអ្នកស្លាប់មានចំនួន ៥៣៦,៣៩២នាក់ និងជាសះស្បើយឡើងវិញ ៦,៥២៦,៧៤៩នាក់។
គេហទំព័រដដែល បានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។ ក្នុងនោះសហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ២,៩៨០,៩៨៣នាក់ ស្លាប់ចំនួន ១៣២,៥៥២នាក់ និងជាសះស្បើយចំនួន ១,២៨៥,៤៥០នាក់។
ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល។ ប្រេស៊ីលមានអ្នកឆ្លង ១,៦០៤,៥៨៥នាក់ ស្លាប់ចំនួន ៦៤,៩០០នាក់ និងជាសះស្បើយ ៩៧៨,៦១៥នាក់។
ប្រទេសឈរនៅចំណាត់ថ្នាក់ទី៣ គឺប្រទេសឥណ្ឌា។ ឥណ្ឌា មានអ្នកឆ្លង ៦៩៧,៨៣៦នាក់ ស្លាប់ ១៩,៧០០នាក់ និងជាសះស្បើយ ៤២៤,៨៩១នាក់៕
កូរ៉េខាងត្បូង ៖ ប្រទេសកូរ៉េខាងត្បូងបានរាយការណ៍ពីករណីឆ្លងវីរុសកូរ៉ូណាថ្មីចំនួន ៦៣ ករណីគិតត្រឹមថ្ងៃព្រហស្បតិ៍ដែលភាគច្រើនពីការឆ្លងក្នុងគ្រួសារនៅខាងក្រៅទីក្រុងសេអ៊ូលដោយបង្កឲ្យមានការវិលត្រឡប់ទៅរកការរឹតបន្តឹងគម្លាតសង្គមនៅក្នុងទីក្រុងមួយ ខណៈដែលរលកទីពីរនៃជំងឺនេះបានធ្វើឲ្យអាជ្ញាធរព្រួយបារម្ភ។
ប្រទេសកូរ៉េខាងត្បូងត្រូវបានគេកោតសរសើរចំពោះការទប់ស្កាត់ការផ្ទុះឡើងលើកដំបូងរបស់ខ្លួននៃជំងឺ COVID-19 ប៉ុន្តែប្រទេសដែលមានសេដ្ឋកិច្ចធំលំដាប់ទី ៤ នៅអាស៊ីមួយនេះបានទទួលរងនូវការផ្ទុះឡើងជាបន្តបន្ទាប់ក្នុងប៉ុន្មានសប្តាហ៍ថ្មីៗនេះភាគច្រើននៅក្នុងរដ្ឋធានី។
ជាលើកដំបូងក្នុងរយៈពេលជិតពីរខែករណីប្រចាំថ្ងៃថ្មីពីទីក្រុងផ្សេងៗបានកើនលើសអ្នកដែលមកពីតំបន់ទីក្រុងសេអ៊ូល ។ ភាគនិរតីទីក្រុង Gwangju បានកត់ត្រាករណីឆ្លងចំនួនជាង ៥០ករណីក្នុងរយៈពេលប៉ុន្មានថ្ងៃកន្លងមកនេះដែលជំរុញឲ្យមានការផ្អាកប្រតិបត្តិការនៅតាមកន្លែងសាធារណៈដូចជា បណ្ណាល័យសាធារណៈ និងសារមន្ទីរជាដើម។
លោកនាយករដ្ឋមន្ត្រី Chung Sye-kyun បានប្រាប់កិច្ចប្រជុំមួយកាលពីថ្ងៃសុក្រថា “ទីក្រុង Gwangju បានធ្វើឲ្យប្រសើរឡើងនូវគោលការណ៍ណែនាំនៃគម្លាតសង្គមទៅដំណាក់កាលទី ២ ដោយកំណត់ការជួបជុំក្នុងផ្ទះក្រោម ៥០ នាក់ និងការជួបជុំនៅខាងក្រៅក្រោម ១០០ នាក់”។ ថ្មីៗនេះអាជ្ញាធរសុខាភិបាលបានចាត់ថ្នាក់ច្បាប់នៃគម្លាតសង្គមជា ៣ ដំណាក់កាលគឺដំណាក់កាលទី ១ មានសភាពខ្លាំងក្លាបំផុត និងដំណាក់កាលទី ៣ គឺតឹងតែងបំផុតដែលសាលារៀន និងអាជីវកម្មត្រូវបានគេជំរុញឲ្យបិទ។
ការកើនឡើងនាពេលថ្មីៗនេះកំពុងមានការព្រួយបារម្ភនៅពេលដែលការឆ្លងជាចង្កោមថ្មីកំពុងលេចចេញនៅលើតំបន់ជាច្រើនដែលធ្វើឲ្យវាកាន់តែពិបាកសម្រាប់ការពិនិត្យរោគរាតត្បាត ។ អនុរដ្ឋមន្ត្រីក្រសួងសុខាភិបាលលោក Kim Gang-lip បានប្រាប់សន្និសីទកាសែតថា ប៉ុន្តែជាមួយនឹងករណីនៅតែអាចគ្រប់គ្រងបានរដ្ឋាភិបាលក្នុងតំបន់នឹងធ្វើការសម្រេចចិត្តថាតើត្រូវធ្វើឲ្យប្រសើរឡើងនូវគោលការណ៍ណែនាំរបស់ពួកគេឬយ៉ាងណា។
គួរបញ្ជាក់ផងដែរថា ករណីថ្មីនេះបានធ្វើឲ្យប្រទេសកូរ៉េខាងត្បូងកើនដល់ ១២,៩៦៧ នាក់ និងមានមនុស្សស្លាប់ ២៨២ នាក់កាលពីថ្ងៃព្រហស្បតិ៍៕
បរទេស ៖ យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា គិតត្រឹមម៉ោង ៧ព្រឹកថ្ងៃសៅរ៍ ទី០៤ ខែកក្កដា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១១,១៨០,០៥៣នាក់ហើយ។ ក្នុងនោះអ្នកស្លាប់មានចំនួន ៥២៨,៣៧៦នាក់ និងជាសះស្បើយឡើងវិញ ៦,២៦៦,៥០៤នាក់។
គេហទំព័រដដែលបានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។ ក្នុងនោះសហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ២,៨៩០,៤០៦នាក់ ស្លាប់ចំនួន ១៣២,១០១នាក់ និងជាសះស្បើយចំនួន ១,២១០,៧៩២នាក់។
ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល។ ប្រេស៊ីលមានអ្នកឆ្លង ១,៥៤៣,៣៤១នាក់ ស្លាប់ចំនួន ៦៣,២៥៤នាក់ និងជាសះស្បើយ ៩៤៥,៩១៥នាក់។
ប្រទេសឈរនៅចំណាត់ថ្នាក់ទី៣ គឺប្រទេសរុស្ស៉ី។ រុស្ស៉ី មានអ្នកឆ្លង ៦៦៧,៨៨៣នាក់ ស្លាប់ ៩,៨៥៩នាក់ និងជាសះស្បើយ ៤៣៧,៨៩៣នាក់៕
