ភ្នំពេញ ៖ សម្តេច​ក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តី​ក្រសួង​មហាផ្ទៃ បាន​សម្រេច​បញ្ចប់​មុខតំណែង លោកវរសេនីយ៍ឯក រុំ សុវិជ្ជា នាយការិយាល័យនគរបាលចរាចរណ៍​ផ្លូវគោកនៃស្នងការដ្ឋាន​នគរបាល​ខេត្តកំពង់ធំ។ នេះបើតាមប្រកាស​ចុះថ្ងៃទី២១ ខែឧសភា ឆ្នាំ​២០២០។

ការ​បញ្ចប់មុខតំណែងនេះ ធ្វើឡើង​ក្រោយពេល​ដែល​មន្រ្តីខាងលើ បាន​ប្រព្រឹត្តករណី​បើករថយន្ត​ទាំងស្រវឹង​បុករនាំងបរិវេណ​រូបសំណាក លោកតា​អាចារ្យលាក់ និង​បានជេរប្រមាថ​ទៅលើ​អភិបាលខេត្តកំពង់ធំថា មិនដាក់ភ្លើងបំភ្លឺ និងដាក់ចំណាំងផ្លាត ទើបធ្វើឱ្យខ្លួន​ជួបគ្រោះថ្នាក់បែបនេះ។

សូមរំលឹកថា លោក រុំ សុវិជ្ជា កាលពីថ្ងៃទី២៦ ខែមីនា ឆ្នាំ២០២០ ត្រូវបានសម្តេច ស ខេង បានចេញលិខិតព្រមានលើកទី១ ដោយសារតែធ្វេស ប្រហែសក្នុងការអនុវត្តភារកិច្ចរបស់ខ្លួន ហើយសម្តេចក្រឡាហោម បានបញ្ជាក់ទៀតថា បើនៅតែប្រព្រឹត្តផ្ទុយពីការណែនាំនេះ នឹងចាត់វិធានការណ៍ តាមវិន័យរបស់កងកម្លាំង នគរបាលជាតិ ជាក់ជាពុំខាន៕

ភ្នំពេញ ៖ រយៈពេល២សប្ដាហ៍ដើមខែឧសភា ឆ្នាំ២០២០នេះ ចលនាទេសចរក្នុងស្រុកបានបន្តកើនឡើងបណ្ដើរៗវិញហើយ ជាក់ស្ដែងភ្ញៀវទេសចរប្រមាណជាង២៥ម៉ឺននាក់បានចេញដើរទស្សនាកម្សាន្តនៅទូទាំងប្រទេស ដែលមានការកើនឡើងជិត ៤៧% បើធៀបនឹងពីរសប្តាហ៍ចុងខែមុន។ នេះបើតាមការចេញផ្សាយព័ត៌មានរបស់ក្រសួងទេសចរណ៍ នៅថ្ងៃទី២២ ខែឧសភា ឆ្នាំ២០២០នេះ។

បើតាមលោករដ្ឋមន្ត្រីបានថ្លែងថា “សម្រាប់រយៈពេលចាប់ពីថ្ងៃទី៤-១៧ ខែឧសភា ឆ្នាំ២០២០ ភ្ញៀវទេសចរ ដែលបានធ្វើដំណើរកម្សាន្ត នៅតាមគោលដៅទេសចរណ៍នានាទូទាំងប្រទេសបានបន្តកើនឡើងគួរឲ្យកត់សម្គាល់ ដោយមានចំនួនសរុបប្រមាណ ២៥៦.៥៤១នាក់ កើនឡើង ៤៦,៧៦ភាគរយធៀប នឹងពីរសប្តាហ៍នៃចុងខែមេសាកន្លងមក”។

លោករដ្ឋមន្ត្រីបានបន្តថា ចំណោមភ្ញៀវទេសចរសរុបជាង ២៥ម៉ឺននាក់នោះ មានភ្ញៀវជាតិមានប្រមាណ ២៥៣.២៥៦ នាក់កើនឡើង ៤៦,៦៤ ភាគរយ និងភ្ញៀវបរទេសមានប្រមាណ ៤.២៨៥ នាក់កើនឡើង ៧,៤៧ ភាគរយ។

លោករដ្ឋមន្ត្រី ថោង ខុន បានបង្ហាញការកត់សម្គាល់ថា ប្រជាពលរដ្ឋ និងទេសចរបរទេសផ្ទៃក្នុង ភាគច្រើនបានធ្វើដំណើរ ទៅកាន់តំបន់អេកូទេសចរណ៍ នាភូមិភាគឦសាន ភាគនិរតី និងតំបន់ឆ្នេរ ពិសេសខេត្តព្រះសីហនុ ខេត្តកំពត និងខេត្តកែប។

លោករដ្ឋមន្ត្រីបានបញ្ជាក់ទៀតថា ចំពោះមុខ នៃការកើនឡើងចលនាទេសចរផ្ទៃក្នុងនេះ ក្រសួងទេសចរណ៍ បានសហការជាមួយវិស័យឯកជន រៀបចំនូវវិធានការ (ស្ដង់ដារពិសេស) សម្រាប់សុវត្ថិភាពទេសចរណ៍ ក្នុងនោះរួមមានក្រមប្រតិបត្តិ គោលការណ៍ណែនាំចាំបាច់មួយចំនួនបន្ថែម ពីលើវិធានការសុវត្ថិភាព និងអនាម័យ ដែលបានដាក់ចេញដោយក្រសួងសុខាភិបាល ជាពិសេសលក្ខខណ្ឌតម្រូវចាំបាច់មួយចំនួន ចំពោះបុគ្គលិក ភ្ញៀវទេសចរ និងដៃគូសហប្រតិបត្តិការ តាមរមណីយដ្ឋាន សហគមន៍ទេសចរណ៍ សណ្ឋាគារ ភោជនីយដ្ឋាន ដែលនឹងបញ្ចប់ក្នុងសប្តាហ៍ក្រោយនេះ៕

ភ្នំពេញ ៖ លោក ងិន ឆាយ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម បានជួបពិភាក្សាការងារជាមួយតំណាងក្រុមហ៊ុនឯកជនចំនួន ២មកពីប្រទេសជប៉ុន គឺក្រុមហ៊ុន NIPPON Express និង ក្រុមហ៊ុន Xamato Green ដែលមានចំណាប់អារម្មណ៍ និងមានបំណងវិនិយោគលើអនុវិស័យដំណាំកសិកម្ម នៅប្រទេសកម្ពុជា។ ជំនួបពិភាក្សាការងារនេះ ធ្វើឡើង​កាលពីថ្ងៃទី២១ ខែឧសភា ឆ្នាំ២០២០។

លោក Nabeshima Katsuhito នាយកក្រុមហ៊ុន Xamato Green បានសង្ខេបអំពីគម្រោងវិនិយោគ និងអភិវឌ្ឍន៍លើដំណាំបន្លែ និងផ្លែឈើ ដោយរាប់ចាប់តាំងពីការដាំដុះ កែច្នៃ វេចខ្ចប់ រហូតដល់ការនាំចេញទៅកាន់ទីផ្សារបរទេស។ លោកបានបញ្ជាក់ថា រហូតមកទល់នឹងពេលនេះ គម្រោងខាងលើបានចេញជារូបរាងហើយ ប៉ុន្តែការងារដែលក្រុមហ៊ុនរបស់លោកត្រូវអនុវត្តបន្ទាប់គឺកិច្ចសហការ និងការគាំទ្រពីអគ្គនាយកដ្ឋានកសិកម្ម តាមរយៈការចុះហត្ថលេខាលើអនុស្សារណៈនៃការយោគយល់ដើម្បីឱ្យគម្រោងនេះអាចអនុវត្តទៅបានដោយរលូន និងជោគជ័យ។

ឆ្លើយតបទៅនឹងការលើកឡើងនេះ លោកប្រតិភូ បានសំដែងការរីករាយ និងគាំទ្រពេញទំហឹងលើការវិនិយោគរបស់ក្រុមហ៊ុនទាំងពីរក្នុងការអភិវឌ្ឍដំណាំបន្លែ និងផ្លែឈើនៅក្នុងប្រទេសកម្ពុជា។ គម្រោងនេះពិតជាឆ្លើយតបចំទិសដៅ និងគោលនយោបាយរបស់រាជរដ្ឋាភិបាលកម្ពុជា ក្នុងការជំរុញអនុវិស័យសាកវប្បកម្មឱ្យមានការរីកចម្រើន។

អគ្គនាយកដ្ឋានកសិកម្ម ជឿជាក់ថា ការរួមសហការវិនិយោគរវាងក្រុមហ៊ុនធំទាំងពីរខាងលើ នឹង​អាច​ទាក់ទាញក្រុមហ៊ុនឯកជនផ្សេងៗទៀតឱ្យមានចំណាប់អារម្មណ៍ និងវិនិយោគលើវិស័យកសិកម្មនៅកម្ពុជាជាបន្តបន្ទាប់។ អគ្គនាយកដ្ឋានកសិកម្ម ក៏បាន​ត្រៀមលក្ខណៈសហការយ៉ាងជិតស្និតក្នុងការងារនេះ និងបានលើកទឹកចិត្តឱ្យក្រុមហ៊ុនឯកជនទាំងពីរពន្លឿនការរៀបចំអនុស្សារណៈនៃការ​យោគយល់ ដើម្បីអាចចាប់ផ្តើមការងារនេះ៕

ភ្នំពេញ ៖ កិច្ចប្រជុំកំពូលអាស៊ី-អឺរ៉ុប លើកទី១៣ (ASEM13) ដែលកម្ពុជានឹងធ្វើជាម្ចាស់ផ្ទះនៅតែបន្តធ្វើតាមការគ្រោងទុក ប៉ុន្តែឈរលើស្ថានភាពវិវត្តន៍ជាក់ស្តែង នៃការរីករាលដាលជំងឺកូវីដ១៩។ នេះបើតាម លោក លុយ ដាវីត រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងជាប្រធានលេខាធិការដ្ឋានជាតិរៀបចំកិច្ចប្រជុំ ASEM13។

លោក លុយ ដាវីត បានបញ្ជាក់យ៉ាងដូច្នេះថា៖ «រហូតមកទល់ថ្ងៃនេះ គណៈកម្មការជាតិរៀបចំកិច្ចប្រជុំកំពូលអាស៉ី-អឺរ៉ុបលើកទី១៣ ក៏ដូចជាលេខាធិការដ្ឋាន នៃគណៈកម្មការជាតិនេះ នៅតែបន្តការរៀបចំកិច្ចប្រជុំកំពូលនេះ តាមពេលវេលាដែលបានគ្រោងទុក ដូចដែលបានឯកភាពគ្នា ជាមួយថ្នាក់ដឹកនាំអាស៉ី-អឺរ៉ុប ទាំង៥៣។ ម្យ៉ាងវិញទៀត លិខិតអញ្ជើញដែលបានចុះហត្ថលេខាដោយប្រមុខរាជរដ្ឋាភិបាលកម្ពុជា តាមរយៈក្រសួងការបរទេស គឺបានបញ្ជូនទៅគ្រប់ភាគីដែលនឹងចូលរួមរួចរាល់អស់ហើយ, ហើយរហូតមកទល់ពេលនេះ មានថ្នាក់ដឹកនាំមួយចំនួន បានឆ្លើយតប និងបញ្ជាក់ពីការចូលរួមកិច្ចប្រជុំកំពូលនេះ រួចហើយដែរ»។

សូមបញ្ជាក់ថា ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ និងជាប្រធានគណៈកម្មការជាតិរៀបចំកិច្ចប្រជុំកំពូល ASEM13 នាព្រឹកថ្ងៃទី២១ ខែឧសភា ឆ្នាំ២០២០នេះ បានអញ្ជើញជាអធិបតីក្នុងកិច្ចប្រជុំពិភាក្សា អំពីដំណើរការរៀបចំកិច្ចនេះ នៅទីស្តីការក្រសួង ដោយមានការចូលពីមន្រ្តីជាន់ខ្ពស់ នៃក្រសួង-ស្ថាប័នពាក់ព័ន្ធនានាជាច្រើនរូបផងដែរ។ ASEM13 ដែលកម្ពុជាត្រូវធ្វើជាម្ចាស់ផ្ទះ ត្រូវបានប្រកាសកាលពីថ្ងៃទី១០ ខែមីនា ឆ្នាំ២០២០។

កម្ពុជាបានក្លាយជាសមាជិករបស់ ASEM នៅឆ្នាំ២០០៤ និងត្រូវបានផ្តល់សេចក្តីទុកចិត្តឲ្យធ្វើជាម្ចាស់ផ្ទះ ដែលគ្រោងនឹងប្រព្រឹត្តទៅនៅថ្ងៃទី១៦-១៧ ខែវិច្ឆិកា ឆ្នាំ២០២០ ក្រោមប្រធានបទ ៖ «ការពង្រឹងពហុភាគីនិយម ដើម្បីកំណើនរួម» ដោយនឹងមានការចូលរួមពីសំណាក់ថ្នាក់ដឹកនាំកំពូល នៃប្រទេសនៅតំបន់អឺរ៉ុប និងអាស៉ី ចំនួន៥១ប្រទេស លេខាធិការដ្ឋានអាស៊ាន និងសហភាពអឺរ៉ុប៕

ខេត្តកំពង់ចាម ៖ លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមខេត្ត ននិងលោក ខ្លូត ផន ប្រធានក្រុមប្រឹក្សាខេត្ត បានអញ្ជើញចុះសាកសួរសុខទុក្ខ និងនាំយកអំណោយមនុស្សធម៌របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចែកជូនដល់បងប្អូនប្រជាពលរដ្ឋដែលរងគ្រោះដោយខ្យល់កន្ត្រាក់ ចាស់ ជរាគ្មានទីពឹង ជនពិការ ស្រ្តីម៉េម៉ាយមានកូនច្រើន និងអ្នកជំងឺរាំរ៉ៃចំនួន៦០គ្រួសារ នៅស្រុកបាធាយ ខេត្តកំពង់ចាម។

ពិធីធ្វើឡើងនាព្រឹកថ្ងៃទី២១ ខែឧសភា ឆ្នាំ២០២០ ដោយមានការអញ្ជើញចូលរួមពីក្រុមការងាររាជរដ្ឋាភិបាលចុះមូលដ្ឋានស្រុកបាធាយ លោកជំទាវអនុប្រធានអចិន្ត្រៃយ៍គណៈកម្មាធិការសាខា និង មន្ត្រីពាក់ព័ន្ធជាច្រើនរូបផងដែរ។

ឆ្លៀតក្នុងឱកាសនោះដែរ លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមខេត្តបានពាំនាំនូវប្រសាសន៍ផ្តាំផ្ញើដោយក្តីនឹករលឹកពីសំណាក់ប្រមុខថ្នាក់ដឹកនាំដែលមានសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដល់ប្រជាពលរដ្ឋទាំង៦០គ្រួសារដោយក្តីនឹករលឹកអាណិតអាសូរបំផុតដោយមិនប្រកាន់ពូជសាសន៍ សាសនា ឬនិន្នាការនយោបាយនោះឡើយ ពោលគឺទីណាដែលពលរដ្ឋមានទុក្ខលំបាក ទីនោះគឺមានសម្តេចទាំងទ្វេ  ដែលជានិច្ចជាកាល តែងតែគិតគូខ្វល់ខ្វាយពីសុខទុក្ខ ពលរដ្ឋខ្មែរគ្រប់ៗរូប។

គួរបញ្ជាក់ផងដែរថា អំណោយដែលត្រូវចែកជូនដល់បងប្អូនប្រជាពលរដ្ឋរងគ្រោះដោយខ្យល់កន្ត្រាក់ ចាស់ជរាគ្មានទីពឹង ជនពិការ ស្រ្តីម៉េម៉ាយមានកូនច្រើន និងអ្នកជំងឺរាំរ៉ៃចំនួន៦០គ្រួសារ ដោយក្នុង១គ្រួសារៗទទួលបាន ៖ អង្ករ២៥គីឡូក្រាម ទឹកស៊ីអ៊ីវ០១យួរ ទឹកត្រី០១យួរ ត្រីខ១០កំប៉ុង ម៉ាស់០៥បន្ទះ និងថវិកា២០,០០០រៀលផងដែរ៕ ដោយ ៖ ប៉ែន សុផល

ខេត្តបន្ទាយមានជ័យ ៖ ពលរដ្ឋខ្មែរ១១០នាក់ ត្រូវបានទាហានឈុតខ្មៅរបស់ថៃ ចាប់បញ្ជូនមកវិញ នៅថ្ងៃទី២១ ខែឧសភា ឆ្នាំ២០២០នេះ ក្រោយលួចឆ្លងដែនចូលទៅប្រទេសគេដោយខុសច្បាប់ ខណៈកំពុងរឹតបន្ដឹងប្រទេសកម្ពុជា-ថៃ កំពុងរឹតបន្ដឹងច្រកព្រំដែន។

យោងតាមរបាយការណ៍របស់សមត្ថកិច្ចបានឲ្យដឹងថា ពលរដ្ឋខ្មែរជាង១០០នាក់នេះ ត្រូវបានទាហានថៃ ប្រគល់មកឲ្យកម្លាំងនគបាលប៉ុស្តិ៍ ការពារព្រំដែនគោកគីឡូ១៣ នៃវរសេនាតូចការពារព្រំដែន៨១៧ ស្ថិតក្នុងភូមិគីឡូ១៣ ស្រុកសំពៅលូន ខេត្តបាត់ដំបង ជាប់ព្រំប្រទល់ជាមួយខេត្តបន្ទាយមសនជ័យ។

លោកអនុសេនីយ៍ឯក កែវ ឌឿន មេប៉ុស្តិ៍នគបាលការពារព្រំដែនគីឡូ១៣ នៃវរសេនាតូចការពារព្រំដែន៨១៧ បានបញ្ជាក់ថា ពលរដ្ឋខ្មែរដែលត្រូវចាប់បញ្ជូនមកវិញនេះ មានស្ដ្រី៤៥នាក់ ក្មេង៤នាក់។

ក្រោយបញ្ជូនត្រឡប់មកវិញ ពលករខ្មែរខាងលើត្រូវបានយកទៅដាក់ឲ្យនៅដាច់ដោយឡែក នៅវិទ្យាល័យសំពៅលូន ដើម្បីពិនិត្យសុខភាព ដោយមានការអប់រំណែនាំថ្នាក់ដឹកនាំខេត្តផងដែរ៕

ដោយ ៖ កូវ ប៊ុនហេង

ខេត្តព្រះវិហារ ៖ ព្រឹកថ្ងៃទី ២១ ខែ ឧសភា ឆ្នាំ២០២០ លោក មាស សុភា ទេសរដ្ឋមន្រ្តីទទួលបន្ទុកបេសកកម្មពិសេស និងជាប្រធានកិត្តិយសសាខា និងលោក ប្រាក់ សុវណ្ណ ប្រធានគណ:កម្មាធិការសាខាកាកបាទ ក្រហមកម្ពុជាខេត្តព្រះវិហារ រួមទាំងក្រុមការងារបាននាំយកអំណោយមនុស្សធម៌ទៅផ្តល់ជូនប្រជា ពលរដ្ឋមានជីវភាពខ្វះខាត ចាស់ជរាគ្មានទីពឹង អ្នករស់នៅជាមួយមេរោគអេដស៍ កុមារកំព្រា សរុបចំនួន១០៨ គ្រួសារ ក្នុងឃុំម្លូព្រៃមួយ ៤៥ គ្រួសារ ឃុំម្លូព្រៃពីរ៣០ គ្រួសារ ឃុំសង្កែពីរ ៣៣ ស្រុកឆែប ខេត្តព្រះវិហារ។

នៅក្នុងឱកាសនោះដែរឯកឧត្តមប្រធានកិត្តិយស សាខាកាកបាទ ក្រហមកម្ពុជា ខេត្តព្រះវិហារ បានពាំនាំប្រសាសន៍ផ្តាំផ្ញើសាកសួរទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចតែងតែគិតគូរពីសុខ ទុក្ខបងប្អូនប្រជាពលរដ្ឋជានិច្ច ” ពោលគឺទីណាមានការលំបាក ទីនោះមានកាកបាទក្រហមកម្ពុជា”។ឯកឧត្តមក៏បានផ្តាំផ្ញើសុំឱ្យថែរទាំសុខភាព ត្រូវមានអនាម័យ ជាប់ជាប្រចាំ ក្នុងការចូលរួមទប់ស្កាត់ការរីករាលដាលមេរោគកូវីដ ១៩។

សម្ភារផ្តល់ជូនក្នុងមួយគ្រួសារៗរួមមាន៖អង្ករ ២៥ គីឡូ មី១កេស ត្រីខ ១យួរ ទឹកស៊ីអ៉ីវ ១យួរ និងថវិកាចំនួន ២០,០០០រៀល ។
-ក្នុងនោះគ្រួសារអាទិភាព ១០គ្រួសារថែម សារុង ១ ភួយ១ ក្រមា១ មុង១ និងថវិកា ២០០,០០០ រៀល។

-ប្រគេនព្រះសង្ឃ អង្ករ២ បេ មី២ កេស ត្រីខ២ យួរ ទឹក២កេស ទឹកផ្លែឈើ២ កេស ថវិកា ២០០,០០០ រៀលគត់ យាយជីតាជី៤ នាក់ ម្នាក់ៗ២០,០០០រៀលគត់៕ 

ភ្នំពេញ ៖ អាជ្ញាធរខណ្ឌដូនពេញ បានដឹកនាំកម្លាំងចំរុះចុះទៅបិទទីតាំងអាហារដ្ឋានច្រើនកន្លែងជាបណ្តោះអាសន្នកុំអោយមានការជួបជុំប្រមូលផ្តុំគ្នាផឹកស៊ី  ដើម្បីការពារការឆ្លងនឹងរីកដុះដាលនៃជំងឺកូវដ១៩ ជាបន្តទៅទៀត។ ការចុះរអនុវតនេះ បានធ្វើឡើងបន្ទាប់ពីសាលារាជធានីភ្នំពេញ ចេញសេចក្តីជូនដំណឹងដល់ម្ចាស់ហាងភោជនីយដ្ឋាន និងអាហារដ្ឋានទាំងអស់ក្នុងរាជធានីភ្នំពេញ ក្រោយពេលព្យាបាលជំងឺកូវីដ-19(Covid-19)ជាសះស្បើយអស់នៅកម្ពុជា។

ការអនុវត្តច្បាប់នេះបានចាប់ផ្តើមពីម៉ោង១០នឹង០៥នាទីយប់ថ្ងៃទី២០ខែឧសភាឆ្នាំ២០២០តាមបណ្តោយផ្លូវលេខ១១០កែងផ្លូវព្រះសុីសុវត្ថិស្ថិតនៅក្នុងសង្កាត់វត្តភ្នំខណ្ឌដូនពេញ។

ការដឹកនាំកម្លាំងគណៈបញ្ជាការឯកភាពខណ្ឌដូនពេញក្រោមការបញ្ជាផ្ទាល់របស់លោកសុខ ពេងវុធអភិបាលនិងគណៈអភិបាលខណ្ឌដូនពេញបានឲ្យដឹងថាក្រោយពីបានទទួលបទបញ្ជាពីសាលារាជធានីភ្នំពេញបានចេញនៃសេចក្តីប្រកាសណែនាំម្ចាស់ទីតាំងបើកភោជនីដ្ឋាននឹងអាហារដ្ឋានទាំងអស់នៅក្នុងរាជធានីភ្នំពេញជាពិសេសនៅក្នុងខណ្ឌដូនពេញដូចជាទីតាំងផ្សារសូរិយាម៉លផ្លូវលេខ៥១ ទីតាំងផ្លូវលេខ១៧២សង្កាត់ជ័យជំនះផ្លូវលេខ១១០នឹងកែងផ្លូវព្រះសុីសុវត្ថិសង្កាត់ផ្សារចាស់នឹងសង្កាត់វត្តភ្នំ នឹងទីតាំងផ្លូវលេខ១៣៦សង្កាត់ផ្សារកណ្តាលទី១ក្រោយសណ្ឋាគារភ្នំពេញបឹងកក់សរុប៥ទីតាំងដែលគណះបញ្ជាការឯកភាពខណ្ឌដូនពេញបានសំណូមពរឲ្យម្ចាស់ហាងផឹកសុីទាំងអស់ផ្អាក់ជាបណ្តោះអាសន្នដោយខាងសាលារាជធានីភ្នំពេញបានសង្កេតឃើញថាជំងឺកូវីដ19(Covid-19)ទើបតែបានជាសះស្បើយអស់នៅកម្ពុជាដូច្នេះរដ្ឋបាលរាជធានីភ្នំពេញសង្កេតឃើញថាប្រជាពលរដ្ឋមិនមានការភ័យខ្លាចនឹងបាត់ការប្រុង
ប្រយ័ត្នចំពោះជំងឺ(Covid-19)ហើយនៅតាមភោជនីដ្ឋាននឹងអាហារដ្ឋានមួយចំនួនខ្វះការប្រុងប្រយ័ត្នទាំងម្ចាស់ភោជនីដ្ឋាននឹងភ្ញៀវដោយពុំបានអនុវត្តន៍តាមការណែនាំរបស់ក្រសួងសុខាភិបាលសូមបញ្ជាក់ដើម្បីចូលរួមទប់ស្កាត់នឹងរីករាលដាលជំងឺ(Covid-19)រដ្ឋបាលរាជធានីភ្នំពេញចេញសេចក្តីប្រកាសដូចតទៅ៖ទី១ម្ចាស់អាជីវកម្មភោជនីដ្ឋាននឹងអាហារដ្ឋានទាំងអស់នៅរាជធានីភ្នំពេញត្រូវគោរពអោយបានត្រឹមត្រូវតាមការណែនាំរបស់ក្រសួងសុខាភិបាលស្តីពីផែនការទប់ស្កាត់រីករាលដាលនៃជំងឺកូវីដ19(Covid-19)។

ទី ២ត្រូវការៀបចំអោយមានទឹកអាល់កុលរឺសាប៊ូសម្រាប់លាងដៃនៅមុខច្រកទ្វារចេញចូលនឹងត្រូវចាត់តាំងបុគ្គលិកធ្វើការវាសកំដៅផ្ញៀវទាំងអស់មុននឹងអនុញ្ញាតិឲ្យចូលក្នុងភោជនីដ្ឋានឬអាហារដ្ឋាននឹងទី៣ត្រូវរក្សាគម្លាតសង្គមអោយបានត្រឹមត្រូវតាមការណែនាំរបស់ក្រសួងសុខាភិបាលគឺរយៈ១,៥ម៉ែត្រ។

យោងតាមសេចក្តីប្រាស់របស់សាលារាជធានីភ្នំពេញ ក្នុងករណីម្ចាស់ភោជនីដ្ឋាននឹងអាហារដ្ឋានណាដែលមិនអនុវត្តន៍តាមការណែនាំរបស់នេះរដ្ឋាបាលរាជធានីភ្នំពេញនឹងបិតអាជីវកម្មភោជនីដ្ឋាននឹងអាហារដ្ឋាននោះមិនបន្តអាជីវកម្មតទៅទៀតផងដែរ៕