​ខេត្តសៀមរាប ៖ កាលពី​ម្សិលមិញ​កម្លាំង​សមត្ថ​កិច្ចសហការ​ចុះបង្ក្រាប​បទល្មើស​សត្វព្រៃ​នៅ​អាហា​រដ្ឋា​ន​ចំនួន ៣ ទីតាំងនៅ​ខេត្តសៀមរាប ក្រោយ​ទទួល​ព័ត៌មាន​ថា អាហា​រដ្ឋា​ន​ទាំងនេះ​បាន​យក​សាច់សត្វ​ព្រៃ​មក​ធ្វើ​ម្ហូបអាហារ​លក់​ជូន​ភ្ញៀវ។​

​សមត្ថកិច្ច​បញ្ជាក់ថា អាហា​រដ្ឋា​ន​ទាំង​៣​កន្លែង​ដែល​ត្រូវ​ចុះបង្ក្រាប​រួមមាន​១៖ អាហា​រដ្ឋា​ន​ម្លប់​មហា​ហេង ស្ថិតនៅ​ភូមិ​ទ្រាំង​សង្កាត់​ស្លក្រាម ក្រុង​សៀមរាប ដោយ​រឹបអូស​បាន​សត្វ​ទោម​ងាប់​ចំនូ​ន ១១​ក្បាល លលក​ងាប់​ចំនួន ៥០​ក្បាល និង​ចាប​ស្រូវ​ងាប់​ចំនួន ២៣០​ក្បាល​។​

២៖ អាហា​រដ្ឋា​ន​ថា​រី​ម៉ាក់​ប្រាង្គ ស្ថិតនៅ​ភូមិ​ទ្រាំង សង្កាត់​ស្លក្រាម ក្រុង​សៀមរាប ដោយ​រឹបអូស​បាន​សាច់ជ្រូក​ព្រៃ​ស្រស់​ចំនួន ៣​គីឡូក្រាម លលកទ្រាំង​ងាប់​ចំនួន ៣៧​ក្បាល ចាប​ស្រូវ​ងាប់​ចំនួន ១៥០​ក្បាល និង​ក្រួច​អ៉ឺ​ត​ងាប់​ចំនួន ១០​ក្បាល​។​

៣៖ អាហារ​ដ្ឋា​ន​សម្រស់​ម្លប់​ម៉ាក់​ប្រាង្គ​ថ្មី ស្ថិតនៅ​ភូមិ​ទ្រាំង សង្កាត់​ស្លក្រាម ក្រុង​សៀមរាប ដោយ​រឹបអូស​បាន​សាច់​អ​ន្ស​ង​ស្រស់​ចំនួន ៣.៣​គីឡូក្រាម សាច់ជ្រូក​ព្រៃ​ស្រស់​ចំនួន ៥.៣​គីឡូក្រាម ចាប​ស្រូវ​ងាប់​ចំនួន ៨០​ក្បាល លលក​បាយ​ងាប់​ចំនួន ១០​ក្បាល និង​អណ្តើក​ស្រែ​ងាប់ ១​ក្បាល ស្មើនឹង ០.៨​គីឡូក្រាម​។​

​យ៉ាងណាក៏ដោយ​វត្ថុតាង​រិ​ប​អូស​បាន​ទាំងអស់​ត្រូវបាន​កម្លាំង​ជំនាញ​បំផ្លាញចោល​នៅ​ថ្នល់​ផងដែរ៕

ដោយ ៖ ​កូវ ប៊ុនហេង

ខេត្តព្រះវិហារ ៖ អាជ្ញារធរខេត្តព្រះវិហារ នៅថ្ងៃសុក្រកន្លងមកនេះ បានធ្វើការបកស្រាយចំពោះ បណ្តាញផ្សព្វផ្សាយមួយចំនួននៅក្នុងខេត្ត ដែលបានចុះផ្សាយព៍ត៌មានលើសពីរការពិត ធ្វើអោយប៉ះពាល់ដល់អាជ្ញាធរថ្នាក់ស្រុក ក៍ដូចជាអាជ្ញារធរថ្នាក់ខេត្ត។

ជាក់ស្តែង នារសៀលថ្ងៃទី២២ ខែឧសភា ឆ្នាំ២០២០ ឯកឧត្ដម ស៊ូ សិរី អភិបាលរង ដោយទទួុលបទបញ្ជារពីរសំណាក់ឯកឧត្តម ប្រាក់ សុវណ្ណ អភិបាលខេត្តព្រះវិហារ បានចុះទៅដល់ទីតាំងដីម្ចាស់ការរ៉ាស់ហ្គាស យីហ៊ោ សូរសរ៉ាក់២ ស្ថិតនៅក្នុងភូមិស្រអែម ឃុំស្រអែម ស្រុកជាំក្សាន្ត ខេត្តព្រះវិហារ ដែលបានសាងសង់រំលោភយកដីចំនីអូរធ្វើជាកម្មសិទ្ធ នោះឃើញថាម្ចាស់ការរ៉ាស់ហ្គាស គាត់បានស្តាប់ ធ្វើតាមការណែនាំរបស់អាជ្ញារធរ នឹងស្របតាមច្បាប់របស់ភូមិបាលហើយ ដោយគាត់ បានកាត់រោងមួុយចំហៀង នៅឡើយតែអាច៍ដីនោះទេ ដែលគាត់ពុំទាន់បានកាយចេញ ដោយសារតែបញ្ហារកូវីដ គាត់រកអេស្ការវ៉ាទ័រកាយដែល តែរកពុំទាន់បាន បើសិនកាយ នឹងដៃ គឺមានការលំបាក ចឹងវាមិនពិតដូចការដែលមានបណ្តាញផ្សព្វផ្សាយមួុយចំនួុន បានចុះផ្សាយនោះទេ ។

ក្នុងនោះឯកឧត្តម ក៍បានសំនូមពរដល់ណ្តាញ ដែលបានចុះផ្សាយ សូមអញ្ជើញចុះមកយករូបភាព មើលសកម្មភាព ផ្ទាល់នឹងភ្នែកផង កុំយករូបភាពចាស់ៗយកមុខចុះផ្សាយដើម្បីបំភាន់ភ្នែកមហាជន.អោយមានការយល់ច្រឡំ នឹងមានការរិះគន់ដល់អាជ្ញារធរថ្នាក់ស្រុក នឹងថ្នាក់ខេត្ត៕

ខេត្តឧត្តរមានជ័យ ៖ សត្វទន្សោងឈ្មោលមួយក្បាលបានស្លាប់បាត់បង់ជីវិត នៅក្នុងព្រៃសហគមន៍សង្ឃរុក្ខវ័ន្តនៅក្នុងដែនជម្រកសត្វព្រៃសង្ឃរុក្ខវ័ន ខេត្តឧត្តរមានជ័យ នៅល្ងាចថ្ងៃទី ២៤ ខែឧសភា ឆ្នាំ ២០២០នេះ ដោយសារតែស្ថានភាពសុខភាពចុះខ្សោយខ្លាំង និងរបួសធ្ងន់ ដោយសារតែជាប់អន្ទាក់របស់ព្រានជាយូរថ្ងៃមកហើយ ទោះបីជាក្រុមជំនាញបសុសត្វ និងមន្ត្រីពាក់ព័ន្ធខិតខំព្យាយាមសង្គ្រោះយ៉ាងយកចិត្តទុកដាក់យ៉ាងណាក៏ដោយ។ នេះគឺជាការថ្លែងឱ្យដឹងរបស់លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាននៅល្ងាចថ្ងៃទី២៤ ខែឧសភា ឆ្នាំ ២០២០នេះ។

លោកបានថ្លែងថា សត្វទន្សោង ដែលជាប់អន្ទាក់ព្រានព្រៃនោះត្រូវបានប្រទះឃើញនៅក្នុងភូមិសាស្រ្តចំណុចអូរថ្ម ក្នុងព្រៃសហគមន៍សង្ឃរុក្ខាវ័នស្ថិតក្នុងដែនជម្រកសត្វព្រៃសង្ឃរុក្ខវ័ន និងបានទទួលការសង្គ្រោះបឋមមុននឹងសត្វ ទន្សោងនេះបានស្លាប់បាត់បង់ជីវិត។ លោកបញ្ជាក់ថា សាកសពសត្វទ្សោងនេះនឹងត្រូវមន្ត្រីឧទ្យានុរក្ស និងព្រះតេជគុណ ប៊ុន សាលួត បញ្ចុះនៅទីស្នាក់ការកណ្តាលនៃសហគមន៍ព្រៃសង្ឃរុក្ខវ័ននៅថ្ងៃទី២៥ ខែឧសភា ឆ្នាំ ២០២០ វេលាម៉ោង៧ព្រឹក។

លោករដ្ឋលេខាធិការក្រសួងបរិស្ថាន បានថ្លែងថា សត្វទន្សោងមួយក្បាលដែលត្រូវបានជួយសង្គ្រោះនេះពិតជាគួរឱ្យអាណិតអាសូរខ្លាំងណាស់។ នៅលើមុខរបស់វា មានស្នាមហូរទឹកភ្នែកដែលទំនងជាអស់ក្តីសង្ឃឹម និងជឿថាខ្លួនប្រាកដជាត្រូវបានព្រានព្រៃគ្មានក្តីមេត្តាសម្លាប់ជាមិនខាន ប៉ុន្តែទីបំផុតត្រូវបានជួយសង្គ្រោះរួចផុតពីក្រញ៉ាំដៃក្រុមព្រានព្រៃ តែអកុសល សត្វទន្សោងនេះនោតែស្លាប់បាត់បង់ជីវិតគួរ ឱ្យសង្វេគបំផុត ដោយសារតែសុខភាពចុះខ្សោយខ្លាំង អត់ចំណីជាច្រើនថ្ងៃ និងឈឺស្នាមរបួសជាប់អន្ទាក់៕

ភ្នំពេញ ៖ ក្រសួងវប្បធម៌ និងវិចិត្រសិល្បៈ ប្រកាសឲ្យសារមន្ទីរនានាបើកដំណើរការជូនភ្ញៀវជាតិ និងអន្តរជាតិ បានចូលទស្សនាឡើងវិញ ចាប់ពីថ្ងៃទី០១ ខែមិថុនា ឆ្នាំ២០២០ តទៅ តែត្រូវមានវិធានការអនាម័យដើម្បីទប់ស្កាត់ការរីករាលដាលវីរុស Covid-19។

ក្រសួងសុខាភិបាលកាលពីថ្ងៃទី១៩ ខែឧសភា ឆ្នាំ២០២០ បានផ្ញើលិខិតមួយ ជូនក្រសួងវប្បធម៌ និងវិចិត្រសិល្បៈ ដោយស្នើឱ្យមានការបើកដំណើរការសារមន្ទីរនានា នៅក្នុងប្រទេសកម្ពុជាឡើងវិញ ដើម្បីឱ្យភ្ញៀវទេសចរជាតិ និងអន្តរជាតិទស្សនា ចាប់ពីខែមិថុនា ឆ្នាំ២០២០តទៅ ក្រោយអ្នកជំងឺកូវីដ១៩ ទាំងអស់នៅកម្ពុជា បានជាសះស្បើយជាស្ថាពរ។

លិខិតរបស់រដ្ឋមន្រ្តីក្រសួងសុខាភិបាល ផ្ញើទៅកាន់រដ្ឋមន្រ្តីក្រសួងវប្បធម៌ បានបញ្ជាក់ថា ក្រសួងសុខាភិបាល សូមធ្វើការណែនាំជូនដល់ក្រសួងវប្បធម៌ និងវិចិត្រសីល្បៈថា មុនពេលបើកដំណើរការនូវសារមន្ទីរឡើងវិញនេះ ត្រូវរៀបចំវិធានការការពារនានាឱ្យរួចជាមុន ដើម្បីចៀសវាងនូវហានិភ័យ នៃការចម្លងវីរុសកូវីដ១៩ ដូចជាការស្កេនកំដៅភ្ញៀវ មុនអនុញ្ញាតឱ្យចូលទស្សនា មានប្រើប្រាស់អាល់កុល ឬជែលលាងដៃ និងត្រូវរៀបចំឱ្យមានគម្លាតសុវត្ថិភាពបុគ្គល ព្រមទាំងត្រូវពាក់ម៉ាស់ ហើយត្រូវអនុវត្តឱ្យបានគ្រប់បុគ្គល (ទាំងភ្ញៀវ អ្នកនាំភ្ញៀវ និងអ្នកបម្រើការនៅទីនោះ) និងមិនត្រូវអនុញ្ញាតឱ្យបុគ្គលណាម្នាក់ ដែលមានបញ្ហាសុខភាព ឬសង្ស័យ ចូលទស្សនាសារមន្ទីរឡើយ៕

ភ្នំពេញ ៖ លោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យ នៃអគ្គស្នងការដ្ឋាននគរបាលជាតិបានឲ្យដឹងថា រយៈពេល២២ថ្ងៃ នៃការរឹតបន្ដឹងច្បាប់ចរាចរណ៍ផ្លូវគោក ដោយបង្កើនប្រាក់ពិន័យ តាមអនុក្រឹត្យលេខ៣៩ ពោលគឺថ្ងៃទី០១-២២ ខែឧសភា ឆ្នាំ២០២១នេះ នគរបាលចរាចរណ៍ទូទាំងប្រទេស បានត្រួតពិនិត្យ និងផាកពិន័យយានយន្ត ៣៣៤០៤គ្រឿង ក្នុងនោះម៉ូតូ ២៤៤១៧គ្រឿង និងរថយន្តគ្រប់ប្រភេទ ៨៩៨៧គ្រឿង។

បើតាមលោកឧត្តមសេនីយ៍ឯកបានបន្តថា សម្រាប់ថ្ងៃទី២២ ខែឧសភា ឆ្នាំ២០២០នេះ មានករណីគ្រោះថ្នាក់ចរាចរណ៍ចំនួន ៩លើក ស្លាប់៥នាក់ របួស១៩នាក់ (របួសធ្ងន់១០នាក់)។ សម្រាប់ថ្ងៃទី២២ ខែឧសភា ឆ្នាំ២០២០នេះដែរ មានយានយន្ត ១៣៩៣គ្រឿង ត្រូវបានត្រួតពិនិត្យ និងផាកពិន័យ។ ក្នុងនោះ ម៉ូតូមាន ៩៧០គ្រឿង ខណៈរថយន្តមានចំនួន ៤២៣គ្រឿង។ លោកបញ្ជាក់ថា បទល្មើសកត់សម្គាល់សម្រាប់ម៉ូតូ គឺអត់មួក ល្មើសភ្លើងសញ្ញា គ្មានស្លាកលេខ ដឹកលើសទម្ងន់ និងប្រើប្រាស់ទូរស័ព្ទដៃ ដោយឡែកបទល្មើសកត់សម្គាល់ សម្រាប់រថយន្ត គឺលើសល្បឿន អត់ខ្សែក្រវាត់ លើសទម្ងន់ ប្រើប្រាស់ទូរស័ព្ទ និងស្រវឹង។

លោកបានបន្តថា រយៈពេល ២២ថ្ងៃនេះ ការអនុវត្តតាមអនុក្រឹត្យថ្មី ក្នុងការផាកពិន័យយានយន្តល្មើស បានដំណើរការទៅយ៉ាងល្អប្រសើរ៕

ភ្នំពេញ ៖ នៅថ្ងៃទី២៣ ខែឧសភា ឆ្នាំ២០២០នេះ ក្រសួងសុខាភិបាល បានចេញសេចក្តីប្រកាសព័ត៌មាន បញ្ជាក់ពីការរកឃើញករណីឆ្លងជំងឺកូវីដ១៩ ចំនួន១ករណីទៀត ដែលជាស្ត្រីខ្មែរត្រឡប់មកពីសហរដ្ឋអាមេរិក។ នេះបើតាមសេចក្តីប្រកាសព័ត៌មានដែលទទួលបាននៅថ្ងៃទី២៣ ខែឧសភានេះ។ 

ក្រសួងសុខាភិបាលបញ្ជាក់ថា ស្ត្រីជនជាតិខ្មែរដែលបានឆ្លងជំងឺកូវីដ១៩ មានអាយុ៣៩ឆ្នាំ រស់នៅសង្កាត់ទឹកថ្លា ខណ្ឌសែនសុខ រាជធានីភ្នំពេញ ជាអ្នកដំណើរដែលបានវិលត្រឡប់មកពីសហរដ្ឋអាមេរិក ឆ្លងកាត់បន្តជើងហោះហើរតាមសាធារណរដ្ឋកូរ៉េ និងបានមកដល់កម្ពុជា តាំងពីថ្ងៃទី០៨ ខែឧសភា ឆ្នាំ២០២០។

តាមព័ត៌មានផ្តល់ដោយស្ត្រីរូបនេះ គឺគាត់បានទៅសហរដ្ឋអាមេរិក (ទីក្រុងញូវយ៉ក) តាំងពីខែកុម្ភៈ ឆ្នាំ២០២០ រួចបានបន្តនៅទីនោះមួយរយៈ ដោយមានការបិទ ជើងហោះហើរធ្វើដំណើរត្រឡប់មកវិញមិនបាន។ ពេលមកដល់កម្ពុជាវិញ គាត់បានធ្វើការរស់នៅដាច់ដោយឡែកដោយខ្លួនឯង (Self quarantine ) ហើយបានទៅពិនិត្យសុខភាព និងធ្វើតេស្តនៅមន្ទីរពេទ្យមិត្តភាពខ្មែរ-សូវៀត នៅថ្ងៃទី១២ ខែឧសភា ឆ្នាំ ២០២០ ដោយសារគាត់មានបញ្ហាក្អក តឹងច្រមុះ និងស្ងួតបំពង់ក ដែលទទួលបានលទ្ធផលអវិជ្ជមាននៅ ពេលនោះ។ គ្រូពេទ្យបានណែនាំឱ្យគាត់បន្តធ្វើចត្តាឡីស័កឱ្យគ្រប់១៤ថ្ងៃ រហូតដល់ថ្ងៃទី២០ ខែឧសភា ឆ្នាំ២០២០ អាការៈរបស់គាត់មិនមានភាពធូរស្រាល ហើយនៅថ្ងៃទី២២ ខែឧសភា ឆ្នាំ២០២០ គាត់ក៏ត្រូវបានក្រុមគ្រូពេទ្យយកវត្ថុសំណាក របស់គាត់ទៅវិភាគសាជាថ្មីម្ដងទៀត ដែលទទួលបានលទ្ធផល វិជ្ជមានវីរុសកូវីដ-១៩។

ក្រសួងសុខាភិបាលបញ្ជាក់ទៀតថា បច្ចុប្បន្នស្ត្រីរូបនេះ ត្រូវបានបញ្ជូនទៅសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។

សូមជម្រាបថា គិតមកដល់ថ្ងៃទី២៣ ខែឧសភា ឆ្នាំ២០២០នេះ ចំនួនអ្នកមានវីរុសកូវីដ-១៩ មានចំនួនសរុប១២៤នាក់ (ស្រី ៣៩នាក់ និងបុរស ៨៥នាក់) ព្យាបាលជាសះស្បើយសរុបទូទាំងប្រទេស មានចំនួន១២២នាក់ និងអ្នកសម្រាកព្យាបាលនៅក្នុងមន្ទីរពេទ្យមានចំនួន០២នាក់ (ស្ត្រី០១នាក់ និងបុរស០១នាក់)។

ជាមួយគ្នានេះ ក្រសួងសុខាភិបាល សូមបន្តអំពាវនាវដល់បងប្អូនប្រជាពលរដ្ឋ ត្រូវបន្តអនុវត្តវិធានការការពារ ខ្លួនជាចាំបាច់ នៅក្នុងដំណាក់កាលប្រយុទ្ធនឹងជំងឺកូវីដ-១៩ នេះ ដើម្បីការពារការចម្លងវីរុសកូវីដ-១៩ ពី បុគ្គលម្នាក់ទៅបុគ្គលម្នាក់ និងការពារកុំឱ្យមានរលកទីពីរនៃការចម្លងវីរុសនេះ ទៅតាមការណែនាំរបស់ ក្រសួងសុខាភិបាល ដែលបានផ្តល់ជាហូរហែររួចមកហើយ៕

បន្ទាយមានជ័យ ៖ ដោយមើលឃើញពីកង្វះខាតសម្រាប់ព្យាបាលកូនរលាក់ទឹកក្តៅនិងកង្វះខាតថែទាំកូនពិការ នៅព្រឹកថ្ងៃទី២២ខែឧសភាឆ្នាំ២០២០សមាគមចលនាយុវជនកម្ពុជា (ក្រុម១៥៧) សាខាខេត្តបន្ទាយមានជ័យបានពាំនាំយកនូវអំណោយនិងថវិកាមួយចំនួនរបស់ឯកឧត្តម ម៉ឹង ពន្លក ទៅចែកជូនដើម្បីសម្រាលជីវភាព។

លោក ជា សុវណ្ណធួន ប្រធានសមាគមចលនាយុវជនកម្ពុជា (ក្រុម១៥៧) ក្រុងសិរីសោភ័ណ បានឲ្យដឹងថា ក្រោមការចង្អុលបង្ហាញពីលោក ហ៊ុន ម៉ាណែត និងឯកឧត្តម ម៉ឹង ពន្លក សមាគមចលនាយុវជនកម្ពុជា (ក្រុម១៥៧)សាខាខេត្តបន្ទាយមានជ័យបាននិងតែងតែរុករកជនក្រីក្រ ជនងាយរងគ្រោះ ផ្ទុកមេរោគអេដស៍ កំព្រា ពិការ ស្ត្រីមេម៉ាយ គ្មានទីពឹង ដើម្បីផ្តល់ជំនួយទាំងស្បៀងអាហារ និងស្មារតី ។ជាក់ស្តែងនៅព្រឹកថ្ងៃទី២២ខែឧសភានេះ កម្លាំងសមាគមន៍ចលនាយុវជន១៥៧យើងបាននាំយកអំណោយទៅចែកជូន គ្រួសារពលរដ្ឋជួបការលំបាកខាងលើនេះ ប្រព្រឹត្តទៅ នៅតាមទីតាំងផ្ទាល់របស់ប្រជាពលរដ្ឋ ក្នុងមន្ទីរពេទ្យក្រុងសិរីសោភ័ណ១គ្រួសារមេម៉ាយកូនតូចត្រូវ រលាកទឹកក្ដៅ គ្រួសារនាំកូនមកព្យាបាល៣គ្រួសារ និងគ្រួសារកម្មករសំណង់ដែលមានជីវភាពក្រលំបាក កូនពិការស្វិតដៃជើងពីកំណើតរស់ក្នុងបន្ទប់ជួល ។
លោក ជា សុវណ្ណធួន បានបញ្ជាក់ថា គ្រួសារទទួលបាននាំយកអំណោយមាន២គ្រួសារ ១.ឈ្មោះ យិន ស្រីនាង ភេទស្រីអាយុ៧ឆ្នាំ(រលាក់ទឹកក្តៅ) ២.ឈ្មោះ រ៉ា សុខជា ភេទស្រីអាយុ១០ឆ្នាំ(ពិការភាព)។ អំណោយ១គ្រួសារមាន ៖ អង្ករ១ការ៉ុងទំងន់ ២៥គីឡូក្រ -ទឹកស៊ីអ៊ីវ១យួរស្មើ៦ដប ទឹកត្រី១យួរស្មើ៦ដប -ត្រីខ១ដុំស្មើ៦កំប៉ុង -សាប៊ូ១កញ្ចប់ស្មើកន្លះគីឡូក្រាមមី១កេសធំ -ប្រេងឆារ១ដបស្មើ១លីត្រ -ស្កសរ១ថងស្មើ១គីឡូក្រាម -អំបិលអ៊ីយ៉ូត១គីឡូក្រាម -ទឹកសុទ្ធ៥យួរ -ថវិការចំនួន៤៤០.០០០រៀល។
ថ្លែងជាមួយអ្នកយកព័ត៌មាន លោក ផូរ ស៊ីតាល់ ប្រធានរដ្ឋបាលសមាគមចលនាយុវជនកម្ពុជា (ក្រុម១៥៧) សាខាខេត្តបន្ទាយមានជ័យ បានឲ្យដឹងដែរថា អនុវត្តន៍តាមការណែនាំរបស់ឯកឧត្តម ចៅ ជីអាន ប្រធានសមាគមយុវជនកម្ពុជា (ក្រុម១៥៧) សាខាខេត្តបន្ទាយមានជ័យ ក៏ដូចជា តាម ផែនការប្រចាំឆ្នាំ២០២០ របស់សមាគមចលនាយុវជនកម្ពុជា (ក្រុម១៥៧) សាខាខេត្ត បានពាំនាំ អំណោយជាគ្រឿងឧបភោគ បរិភោគ រួមនិងថវិកាដើម្បីចែកជូនគ្រួសារប្រជាពលរដ្ឋដែលកំពុងជួបការលំបាក និងគ្រួសារ សំរាកព្យាបាលក្នុងមន្ទីរពេទ្យ ។
លោក ផូរ ស៊ីតាល់ បន្តថា ៖ ក្រៅពី អំណោយ និងថវិការដែលបានរៀបចំរួច សម្រាប់ ២គ្រួសារក្រុងសិរីសោភ័ណ ក្រុមកាងារដែលរួមមាន លោកផ្ទាល់ លោក អ៊ុង ស្រម៉ៅ ប្រធានទំនាក់ទំនង និងសាខាស្រុកក្រុង បានគៀងគរជួយឧបត្ថមថវិកាចំនួន ១៣៣ម៉ឺនរៀល ជូនដល់គ្រួសារនាំកូនមកព្យាបាលនៅមន្ទីរពេទ្យក្រុងសិរីសោភ័ណ៣គ្រួសារ និងគ្រួសារចាស់ជរា១គ្រសារទៀតនៅផ្សារអូរអំបិល។
លោក ផូរ ស៊ីតាល់ ប្រធានរដ្ឋបាលសមាគមចលនាយុវជនកម្ពុជា (ក្រុម១៥៧) សាខាខេត្តបន្ទាយមានជ័យ ក៏បានសំណូមពរដល់អ្នកពាក់ព័ន្ធទាំងអស់ បន្តអនុវត្តន៍តាមការណែនាំរបស់រាជរដ្ឋាភិបាល រក្សាគម្លាតសុវត្ថិភាព អនាម័យជាប្រចាំ មិនចេញក្រៅបើមិនចាំបាច់ បន្តឧបត្ថម្ភស្បៀង សង្គ្រោះដល់គ្រួសារជនក្រីក្ររងផល ប៉ះពាល់ធ្ងន់ធ្ងរដោយសារជំងឺកូវីដ១៩ បំផុសជំរុញឱ្យធ្វើកសិកម្ម ដាំដំណាំរួមផ្សំ និងចិញ្ចឹមសត្វដើម្បីជួយទ្រទ្រង់សេដ្ឋកិច្ចគ្រួសារ៕