ភ្នំពេញ ៖ រដ្ឋលេខាធិការ និង​ជាអ្នកនាំពាក្យ​ក្រសួង​សុខាភិបាល លោកស្រី ឱ វណ្ណឌីន បាន​ឱ្យដឹងថា អ្នក​ជំងឺកូវីដ១៩ ចំនួន២នាក់​នៅខេត្តបន្ទាយមានជ័យ និងខេត្តកំពង់ឆ្នាំង ដែល​មិនជាសះស្បើយ សោះនោះ នៅថ្ងៃនេះ​ក្រសួង​សម្រេច​ឱ្យ​បញ្ជូនមកព្យាបាល​នៅមន្ទីរពេទ្យ​មិត្តភាពខ្មែរ-សូវៀត ទាំង២នាក់ហើយ។

លោកស្រី​បាន​បញ្ជាក់​តាមបណ្តាញ Telegram យ៉ាង​ដូច្នេះ​ថា ៖ «មិនធ្ងន់ទេ​ តាម​សភាព​ទូទៅ​របស់អ្នកជំងឺ​ តែវីរុស​នៅមានក្នុង​ខ្លួន​គាត់នៅឡើយ។ ថ្ងៃនេះ​ ក្រសួង​បាន​សម្រេច​ឲ្យបញ្ជូន​មក​បន្ត​ការព្យាបាល​នៅ​មន្ទីរពេទ្យ​មិត្តភាពខ្មែរ-សូវៀត​ទាំងពីរ​នាក់ហើយ។ វីរុស​នេះ​ យើង​ពិបាក​នឹង​ដឹងណាស់​ ដោយសារអ្នកទាំងពីរ​ ម្នាក់ជា​បុរសវ័យ៧៥ឆ្នាំ​ មានបញ្ហា​សុខភាព​ប្រចាំកាយ​ និង​ម្នាក់ទៀត​ជាស្ត្រីវ័យ៣៦ឆ្នាំ​ មាន​បញ្ហា​ប៉ះពាល់​ផ្លូវចិត្ត​ តម្រូវឲ្យ​មានការ​ពិនិត្យ​ព្យាបាល​នៅមន្ទីរពេទ្យថ្នាក់ជាតិ​បន្តទៀត។ ជូនពរពួកគាត់ឲ្យបានឆាប់ជាសះស្បើយ​ ពេលមកដល់មន្ទីរពេទ្យមិត្តភាពខ្មែរ-សូវៀត។ ដូច្នេះហើយ​ សូមបងប្អូនប្រជាពលរដ្ឋ​ លោកបន្តការប្រុងប្រយ័ត្នការពារការចម្លងរលកទីពីរនៃវីរុសកូវីដ-១៩​ នេះជាចាំបាច់​ ត្រូវចងចាំថា ៖​ “យើងអាចភ្លេចវីរុសកូវីដ-១៩​ តែវីរុសកូវីដ-១៩​ មិនដែលភ្លេចយើងនោញទេ»៕

ភ្នំពេញ ៖ អង្គការទេសចរណ៍ពិភពលោក (UNWTO) បាននិងកំពុងរិះរកដំណោះស្រាយ និងកំពុងប្រមូលធាតុចូលពីបណ្ដាអ្នកជំនាញ អ្នកប្រាជ្ញ ព្រមទាំងពីបណ្ដាប្រទេសជាសមាជិកនានា ដើម្បីដាក់ចេញនូវវិធាការ ឬដំណោះស្រាយរួម លើការដោះស្រាយផលប៉ះពាល់វិស័យទេសចរណ៍ ក្នុងដំណាក់កាលវិបត្តិជំងឺកូវីដ១៩ និងក្រោយពេលវិបត្តិនេះត្រូវបានបញ្ចប់។
ការឱ្យដឹងនេះត្រូវបានធ្វើឡើងក្រោយពេលរដ្ឋមន្ត្រីក្រសួងទេសចរណ៍កម្ពុជា លោក ថោង ខុន ចូលរួមប្រជុំជាមួយអង្គការទេសចរណ៍ពិភពលោក នាថ្ងៃទី០៧ ខែឧសភា ឆ្នាំ២០២០ តាមរយៈប្រព័ន្ធ Video Conference ពីទីក្រុងម៉ាឌ្រីដ ប្រទេសអេស្ប៉ាញ ដោយមានការចូលរួមពីលោក ហ្ស៊ូរ៉ាប់ ផូឡូលិក សាស្វីល្លី (Zurab Pololiksashvili) អគ្គលេខាធិការអង្គការទេសចរណ៍ពិភពលោក តំណាងអង្គការសុខភាពពិភពលោក អង្គការអន្តរជាតិផ្សេងៗ និងបណ្ដាប្រទេសជាសមាជិកជាង ១០០ ប្រទេស។

អ្នកជំនាញ និងអង្គការទេសចរណ៍ពិភពលោកបានបង្ហាញអំពីដំណោះស្រាយមួយចំនួន ដែលរដ្ឋជាសមាជិកអាចពិចារណា ដើម្បីដោះស្រាយផលប៉ះពាល់លើវិស័យទេសចរណ៍ ក្នុងដំណាក់កាលវិបត្តិកូវីដ១៩ និងដំណាក់កាលក្រោយវិបត្តិ ក្នុងនោះរួមមាន៖ ការអនុវត្តវិធានសុវត្ថិភាព អនាម័យ សុខភាព ស្របតាមវិធាននានា ណែនាំដោយអង្គសុខភាពពិភពលោក តាមរយៈការប្រើប្រាស់បច្ចេកវិទ្យាទំនើប ការរៀបចំផែនការបន្ទាប់វិបត្តិ និងការប្រើប្រាស់បច្ចេកវិទ្យាឌីជីថលក្នុងវិស័យទេសចរណ៍កាន់តែខ្លាំងឡើង។
សន្និសីទបានផ្ដោតលើដំណោះស្រាយចំនួន៣ គឺដំណោះស្រាយសម្រាប់ប្រជាជន (Healing for People) ពោលគឺធានាឲ្យបាននូវសុវត្ថិភាព និងសុខភាពល្អប្រសើរដល់ទេសចរ ដំណោះស្រាយដើម្បីវិបុលភាព (Healing for Prosperity) ដោយផ្ដោតជាសំខាន់លើការប្រើប្រាស់បច្ចេកវិទ្យាឌីជីថល បញ្ញាសិប្បនិម្មិតក្នុងអាជីវកម្មទេសចរណ៍ និងដំណោះស្រាយសម្រាប់គោលដៅទេសចរណ៍ (Healing for Destination) ពោលធ្វើឲ្យគោលដៅទេសចរណ៍មានភាពរស់រវើកឡើងវិញ និងកាន់តែរឹងមាំ។
អង្គការទេសចរណ៍ពិភពលោកនឹងរៀបចំជារបាយការណ៍រួមលម្អិតរំលេចអំពីដំណោះស្រាយទាំងនេះ សម្រាប់ជាធាតុចូលដល់ប្រទេសជាសមាជិកទាំងអស់។

ក្រោយចប់កិច្ចប្រជុំនេះ លោក ទ្រី ឈីវ ប្រធាននាយកដ្ឋានសហប្រតិបត្តិការអន្តរជាតិ និងអាស៊ាន បានថ្លែងប្រាប់អ្នកសារព័ត៌មានថា មកដល់ពេលនេះ អង្គការទេសចរណ៍ពិភពលោកមិនទាន់មានដំណោះស្រាយយ៉ាងណានៅឡើយទេ ចំពោះការដោះស្រាយផលប៉ះពាល់លើវិស័យទេសចរណ៍ដោយសារវិបត្តិកូវីដនេះ ប៉ុន្តែការអនុវត្តនានាក្នុងវិស័យទេសចរណ៍នៅចំពោះមុខនេះ គឺត្រូវអនុលោមតាមអង្គការសុខភាពពិភពលោកជាចាំបាច់។

លោក ទ្រី ឈីវ បានបន្តថា បន្ទាប់ពីកិច្ចប្រជុំនេះទៅ អង្គការទេសចរណ៍ពិភពលោកនឹងប្រមូលធាតុចូលពីបណ្ដាអ្នកប្រាជ្ញ អ្នកជំនាញ និងបណ្ដាប្រទេសជាសមាជិកនានា ដើម្បីវិភាគរិះរកនូវដោះស្រាយរួម ដែលមានសុវត្ថិភាព និងប្រសិទ្ធភាពបំផុត ក្នុងការអនុវត្តដំណើរការវិស័យទេសចរណ៍ទូទាំងពិភពលោក។
លោកបន្តទៀតថា នៅក្នុងកិច្ចប្រជុំនោះ គេបានបង្ហាញធាតុចូលច្រើនដែរ ទាំងទ្រឹស្ដី និងភាពជាក់ស្ដែង ទាំងឧបករណ៍វៃឆ្លាតថ្មីៗសម្រាប់សម្រួលដល់ទេសចរ និងប្រតិបត្តិករទេសចរណ៍ ការទំនាក់ទំនងការងារពីចម្ងាយតាមប្រព័ន្ធឌីជីថល និងចំណុចល្អៗជាច្រើនទៀត។ ការរិះរកដំណោះស្រាយនេះ មិនត្រឹមតែប្រើសម្រាប់អនុវត្តក្នុងពេលកើតមានជំងឺកូវីដនេះទេ អង្គការទេសចរណ៍ពិភពលោកក៏នឹងបង្កើតនូវវិធានការ សម្រាប់អនុវត្តនៅពេលវិបត្តិកូវីដនេះត្រូវបានផុតរលត់ចេញពីផែនដី ឬក៏អាចយកមកអនុវត្តសម្រាប់វិបត្តិនាពេលក្រោយទៀតផងដែរ។
លោក ទ្រី ឈីវ បានបញ្ជាក់ថា សម្រាប់កម្ពុជា ទោះបីជាកំពុងរង់ចាំអនុវត្តតាមដំណោះស្រាយរបស់អង្គការសុខភាពពិភពលោកក៏ពិតមែន ប៉ុន្តែកម្ពុជាក៏បាននិងកំពុងអនុវត្តនូវវិធានការក្នុងប្រទេសជាបន្តបន្ទាប់មកហើយដែរ ខណៈមិនមានករណីឆ្លងថ្មីទៀតឡើយ ហើយអ្នកដែលឆ្លងកន្លងមកក៏ទទួលបានការព្យាបាលជាសះស្បើយជិតអស់ហើយដែរ ពោលនៅសល់តែពីរនាក់ទៀតប៉ុណ្ណោះ៕

ភ្នំពេញ ៖ នៅថ្ងៃទី០៨ ខែឧសភា ឆ្នាំ២០២០នេះក្រសួងសុខាភិបាល បានចេញសេចក្តីប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១២០នាក់។

ចំណែកអ្នកកំពុងសម្រាកព្យាបាលជំងឺកូវីដសរុបចំនួន២នាក់ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី០៨ ខែឧសភា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាលដែលទទួលបានមុននេះបន្តិច៕ 

ខេត្តកំពង់ធំ ៖ ដើម្បីពង្រឹងការគ្រប់គ្រងធនធានធម្មជាតិនៅក្នុងតំបន់ នៅរសៀលថ្ងៃព្រហស្បតិ៍ ១រោច ខែពិសាខ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី៧ ខែឧសភា ឆ្នាំ២០២០ ក្រុមការងារក្រសួងបរិស្ថាន ដឹកនាំដោយលោក សៅ សុភាព រដ្ឋលេខាធិការក្រសួងបរិស្ថាន បានចុះពិនិត្យទីតាំងជុំវិញព្រៃឡង់ ភូមិសាស្ត្រខេត្តកំពង់ធំ និងព្រះវិហារ ក្នុងគោលស្វែងរកទីតាំងសមស្របសម្រាប់សាងសង់ស្នាក់ការរួមមួយ ដើម្បីបង្កើនប្រសិទ្ធភាព ក្នុងការការពារ និងអភិរក្សធនធានធម្មជាតិ នៅក្នុងដែនជម្រកសត្វព្រៃ «ព្រៃឡង់»។

លោក សៅ សុភាព បានបញ្ជាក់ថា ស្នាក់ការនេះក៏នឹងប្រើប្រាស់ជាកន្លែងប្រមូលផ្តុំនូវធនធាន បច្ចេកទេស ការអនុវត្តន៍ច្បាប់ ការគ្រប់គ្រងកម្លាំងការពារ ល្បាត ប្រចាំការ និងអន្តរាគមន៍លើបទល្មើសធនធានធម្មជាតិ ដែលអាចកើតឡើងនៅក្នុងតំបន់ការពារធម្មជាតិនេះ ហើយដែលផ្តល់លទ្ធភាពឱ្យមានការចូលរួមពីក្រសួង ស្ថាប័ន និងដៃគូសហការផ្សេងទៀត។

សូមជម្រាបថា ដែនជម្រកសត្វព្រៃ «ព្រៃឡង់» ស្ថិតនៅក្នុងភូមិសាស្រ្តខេត្តចំនួន៤ គឺខេត្តកំពង់ធំ ព្រះវិហារ ក្រចេះ និងស្ទឹងត្រែង ដែលមានផ្ទៃដីសរុប៤៣១ ៦៨៣ហិកតា៕

ភ្នំពេញ ៖ លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យនៃក្រសួងបរិស្ថានបានថ្លែង នៅថ្ងៃទី៧ ខែឧសភា ឆ្នាំ២០២០ថា ដោយយោងលើរបាយការណ៍ស្តីពីការគ្រប់គ្រងនិងអភិរក្សតំបន់ដែនជម្រកសត្វព្រៃ ព្រៃឡង់របស់ក្រសួងបរិស្ថានបានបង្ហាញថា មន្ត្រីឧទ្យានុរក្សនៃក្រសួងបរិស្ថាន ដោយមានការចូលរួមពីសមាជិកនៃសហគមន៍តំបន់ការពារធម្មជាតិ និងអាជ្ញាធរពាក់ព័ន្ធបានចុះល្បាតដើម្បីការពារ និងអភិរក្ស​ធនធានធម្មជាតិនៅក្នុងខេត្តទាំង៤ នៃភូមិសាស្ត្រតំបន់ដែនជម្រកសត្វព្រៃព្រៃឡង់បានចំនួន៥១១លើក និងបានបង្ក្រាបបទល្មើសធនធានធម្មជាតិរួមមានការលួចកាប់ឈើខុសច្បាប់ ទន្ទ្រានកាន់កាប់ដីព្រៃ ការបរបាញ់សត្វខុសច្បាប់បានចំនួន៣៩៩ ករណីនៅក្នុងរយៈពេល៤ ខែពីខែមករាដល់ខែមេសា ឆ្នាំ២០២០។

លោកបានថ្លែងបន្តថា បទល្មើសកាប់ឈើនិងទន្ទ្រានដីព្រៃ ខុសច្បាប់ចំនួន ៣២ ករណី ត្រូវបានកសាងសំណុំរឿង និងបញ្ជូនទៅតុលាការ ដើម្បីដំណើរការនីតិវិធី និងបានធ្វើកិច្ចសន្យា អប់រំណែនាំចំនួន ៤២ ករណីដែលមានមនុស្សពាក់ព័ន្ធជិត ១០០ នាក់។
​
នៅក្នុងការចុះទប់ស្កាត់ និងបង្ក្រាបបទល្មើស នៅក្នុងដែនជម្រកសត្វព្រៃព្រៃឡង់ក្នុងទំហំដីជាង ៤៣ ម៉ឺនហិកតាស្ថិតក្នុងភូមិសាស្ត្រខេត្តកំពង់ធំ ខេត្តព្រះវិហារ ខេត្តស្ទឹងត្រែង និងក្រចេះ, លោករដ្ឋលេខាធិការក្រសួងបរិស្ថាន នេត្រ ភក្ត្រា បានឱ្យដឹងថា មន្ត្រីឧទ្យានុ រក្សនិងប្រជាសហគមន៍តំបន់ ការពារធម្មជាតិបានរឹបអូសវត្ថុតាងជាច្រើនក្នុងនោះរួមមាន៖រឹបអូសរណាយន្តបានចំនួន ១៩៣ គ្រឿង រថយន្ត ២ គ្រឿង គោយន្តចំនួន ៣៤ គ្រឿង ម៉ូតូ ២៥ គ្រឿង និងរឹបអូស ដែលបានកាប់បំផ្លាញចំនួន ១៧៩ ម៉ែត្រគូប និងឈើហ៊ុប និងឈើដុំចំនួន ១៦៥ កំណាត់។ រដ្ឋលេខាធិការក្រសួងបរិស្ថានក៏បាន បង្ហាញផងដែរថានៅក្នុងអំឡុងនៃការទប់ស្កាត់និងបង្ក្រាបបទល្មើសរយៈពេល ៤ ខែដើមឆ្នាំ ២០២០ នេះ កម្លាំងមន្ត្រីឧទ្យានុក្សក៏បានបំផ្លាញរុះរើរោងអនាធិបតេយ្យក្នុងតំបន់ដែនជម្រកសត្វព្រៃព្រៃឡង់ចំ នួន ៣៤ រោង និងបានដកហូតកាំភ្លើងកែច្នៃដែលប្រើប្រាស់សម្រាប់ការបរបាញ់សត្វខុសច្បាប់បានចំនួន ២៩ ដើម និងបានដោះអន្ទាក់បានចំនួន ៧២៤ អន្ទាក់។

រដ្ឋលេខាធិការក្រសួងបរិស្ថានលោក នេត្រ ភក្ត្រា បានគូសបញ្ជាក់ថា នេះគឺជាកិច្ចខិតខំប្រឹង ប្រែងរបស់មន្ត្រីឧទ្យានុរក្ស និងសហគមន៍នៃតំបន់ការពារធម្មជាតិ ក្នុងការការពារនិងអភិរក្សធនធានធម្មជាតិក្នុងតំបន់ព្រៃ ឡង់ឱ្យបានគង់វង្សសម្រាប់មនុស្សរាប់ជំនាន់ទៅមុខទៀត។ ជាមួយគ្នានេះ រដ្ឋលេខាធិការក្រសួងបរិ ស្ថានរូបនេះក៏បានលើកឡើងថា ទោះបីជាមានការចុះទប់ស្កាត់ និងបង្ក្រាបទាំង យប់ទាំងថ្ងៃពីសំណាក់មន្ត្រីឧទ្យានុរក្សនិងសមាជិកនៃសហគមន៍តំបន់ការពារធម្មជាតិក៏បទល្មើសធនធានធម្មជាតិទ្រង់ទ្រាយតូចដូចជាការលបលួចកាប់ឈើ ការទន្ទ្រានរានយកដី ធ្វើជាកម្មសិទ្ធិការបរ បាញ់និងការដាក់អន្ទាក់សត្វព្រៃនៅតែបន្ដកើតមាននៅក្នុងតំបន់ព្រៃឡង់ដែលចាំបាច់ត្រូវចាត់វិធានការទប់ស្កាត់និងបង្ក្រាបបន្តទៀត។

លោក នេត្រ ភក្ត្រា បានគូសបញ្ជាក់ថា មានកត្តាផ្សេងៗដែល ជំរុញឱ្យមានបទល្មើសទាំងនេះក្នុងនោះរួមមាន កត្ដាជីវភាពរបស់ប្រជាសហគមន៍ ដែលធ្លាប់តែពឹង អាស្រ័យ ទៅលើផល អនុផលព្រៃឈើ និងការទាក់ទាញ និងញុះញង់ពីសំណាក់ក្រុមឈ្មួញទុច្ចរិត គួបផ្សំនឹងចំនួនមន្រ្ដីឧទ្យានុរក្សដែលបានឈរជើងនៅក្នុងតំបន់នោះនៅមានកម្រិតនៅឡើយ។ ទោះយ៉ាងណា លោករដ្ឋលេខាធិការក្រសួងបរិស្ថានបានថ្លែងថា កម្លាំងមានសមត្ថកិច្ចនៃរាជរដ្ឋាភិបាលកម្ពុជាមានការតាំងចិត្តខ្ពស់ក្នុងការទប់ស្កាត់និងបង្ក្រាបយ៉ាងហ្មឺងម៉ាត់ប្រឆាំងនឹងបទល្មើសធនធានធម្មជាតិដែលកើតឡើងស្របតាមច្បាប់នានា។

​លោករដ្ឋលេខាធិការក្រសួងបរិស្ថាន នេត្រ ភក្ត្រា ក៏បានលើកឡើងផងដែរថា រាជរដ្ឋាភិបាលកម្ពុជា ក្រសួងបរិស្ថាន និងដៃគូអភិវឌ្ឍបានយកចិត្ដទុកដាក់ខ្ពស់លើការរៀបចំ និងពង្រឹងយន្ដ
ការគ្រប់គ្រង ការផ្ដល់មធ្យោបាយ ឧបករណ៍ សម្ភារ ក៏ដូចជាការជួយលើកស្ទួយជីវភាពរបស់ប្រជាសហគមន៍មូលដ្ឋានបន្ថែមទៀតតាមរយៈការបង្កើតមុខរបរថ្មី បង្កើតសេដ្ឋកិច្ចនៅមូលដ្ឋាន បង្កើនចំណូល ការជំរុញទេសចរណ៍ធម្មជាតិជាដើម ដើម្បីធានា ប្រសិទ្ធភាពនៃការងារគ្រប់គ្រង ការពារ និងអភិរក្សតំបន់ព្រៃឡង់។ បច្ចុប្បន្ននេះ ក្រសួងបរិស្ថាន បាននិងកំពុងសហការអនុវត្តគម្រោងការពារ និងអភិរក្សតំបន់ដែន ជម្រកសត្វព្រៃព្រៃឡង់ជាមួយគម្រោងព្រៃឡង់បៃតងគាំទ្រថវិកាដោយUSAID របស់សហ រដ្ឋអាមេរិកសម្រាប់រយៈពេល ៥ ឆ្នាំ (២០១៨-២០២៣) ក្នុងទំហំទឹកប្រាក់ ២១ លានដុល្លារ។

លោកបានបន្តថា គម្រោងព្រៃឡង់បៃតងមានគោល បំណងធ្វើឱ្យប្រសើរឡើងនូវការអភិរក្ស ជីវៈចម្រុះ និង ស្ថានភាពប្រព័ន្ធអេកូឡូស៊ី ព្រមទាំង បង្កើតឱ្យមាននិរន្តរភាព និងសមធម៌នៃកាលានុ វត្តភាព ផ្នែក សេដ្ឋកិច្ច ជីវភាពសហគមន៍ និងទុនធម្មជាតិសម្រាប់ការវិនិយោគឡើងវិញ នៅក្នុងដែន ជម្រកសត្វព្រៃ «ព្រៃឡង់»និងតំបន់កាពារធម្មជាតិ ជុំវិញតំបន់ព្រៃឡង់។ គម្រោងនេះ មានកិច្ចសហ ការជាមួយក្រសួង បរិស្ថាន ក្រសួង ស្ថាប័ន និងរដ្ឋបាលថ្នាក់ក្រោមជាតិពាក់ព័ន្ធ ដើម្បីពង្រឹងការការ ពារ អភិរក្សធនធាន ធម្មជាតិ និងជីវៈចម្រុះ ផ្តោតលើការងារកំណត់ និងបែងចែកតំបន់គ្រប់គ្រង ការ បោះបង្គោលព្រំប្រទល់ ការរៀបចំផែនការគ្រប់គ្រង និងការចុះបញ្ជីដីរដ្ឋ នៅដែនជម្រកសត្វព្រៃ «ព្រៃ ឡង់» និងតំបន់ការពារ ធម្មជាតិមួយចំនួនជុំវិញ តំបន់ព្រៃឡង់ បណ្តុះបណ្តាល និងពង្រឹងសមត្ថភាព មន្ត្រីឧទ្យានុរក្ស ក៏ដូចជាលើកកម្ពស់ជីវភាពប្រជាសហគមន៍អភិរក្សប្រពៃណីជនជាតិដើមភាគតិច៕

ភ្នំពេញ ៖ តុលាការ​យោធា​ប្រកាស​សាលក្រមផ្តន្ទា​ទោស​អតីត​យោធាផ្កាយពីរ និង​បក្ខពួកឲ្យជាប់​ពន្ធនាគារ​រយៈពេលពី១៦ឆ្នាំទៅ១៩ឆ្នាំ និងត្រូវបានបណ្តេញ​ចេញ​ពីក្របខណ្ឌកងយោធពលខេមរភូមិន្ទ ក្នុង​សំណុំរឿង​បង្កើត​កម្លាំង​ប្រដាប់​អាវុធ​ខុសច្បាប់​នៅ​រាជធានីភ្នំពេញ ខេត្ត​កំពង់ស្ពឺ និងខេត្តកំពង់ឆ្នាំង។ ការ​ប្រកាស​សាលក្រមនេះ បាន​ធ្វើ​ឡើងនាព្រឹក​ថ្ងៃទី៧ ខែឧសភា ឆ្នាំ២០២០ គឺបន្ទាប់ពី​បើកសវនាការជំនុំជម្រះកាលពី​ថ្ងៃទី២៨ ខែមេសា ឆ្នាំ២០២០។

ជនជាប់ចោទ ៖ ១. ឈ្មោះ សុខ ប៊ុនធឿន ភេទប្រុស អាយុ៦៣ឆ្នាំ ជនជាតិខ្មែរ មុខរបរយោធា ជាអតីតជាឧត្តមសេនីយ៍ទោ មុខងារ នាយករងទីចាត់​ការបច្ចេក​ទេសអគ្គបញ្ជាការ ផ្តន្ទាទោស ១៦ឆ្នាំ។ ២. ឈ្មោះ រ័ត្ន ច័ន្ទមន្នី ហៅជ័យ មឿន ភេទប្រុស អាយុ៤៧ឆ្នាំ ជនជាតិខ្មែរ មុខរបបយោធា ជាអតីតជំនួយការសេនាធិការ កងពលអន្តរាគមន៍លេខ ១ ផន្ទាទោស ១៩ឆ្នាំ។

តុលាការយោធាបានបញ្ជាក់ថា ជនជាប់ចោទទាំងពីរ ជាប់ចោទ​ពីបទបង្កើត​ដោយខុសច្បាប់នូវកងកម្លាំងប្រដាប់អាវុធដោយគ្មានសិទ្ធិ និងគ្មានការអនុញ្ញាត​ពីអាជ្ញាធរស្របច្បាប់ ប្រព្រឹត្ត​នៅខេត្ត​កំពង់ឆ្នាំង ខេត្ត​កំពង់ស្ពឺ និងរាជធានី​ភ្នំពេញ កាលពីអំឡុង​ឆ្នាំ២០១៦ ដល់ខែមិថុនា ឆ្នាំ២០១៨ បទល្មើស​ដែលមានចែងឲ្យផ្តន្ទាទោសតាមមាត្រា ៤៦៣ នៃក្រមព្រហ្មទណ្ឌ។

មាត្រា ៤៦៣ នៃក្រមព្រហ្មទណ្ឌៈ បទបង្កើតដោយខុសច្បាប់នូវកម្លាំងប្រដាប់អាវុធៈ អំពើ​បង្កើតកម្លាំងប្រដាប់អាវុធដោយគ្មានសិទ្ធិ ឬគ្មានការអនុញ្ញាតពីអាជ្ញាធរស្របច្បាប់ ត្រូវផ្តន្ទាទោសដាក់ពន្ធនាគារពី ១៥ឆ្នាំ ទៅ ៣០ឆ្នាំ៕

ភ្នំពេញ ៖ នៅថ្ងៃទី០៧ ខែឧសភា ឆ្នាំ២០២០នេះក្រសួងសុខាភិបាល បានចេញសេចក្តីប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១២០នាក់។

ចំណែកអ្នកកំពុងសម្រាកព្យាបាលជំងឺកូវីដសរុបចំនួន២នាក់ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី០៧ ខែឧសភា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាលដែលទទួលបានមុននេះបន្តិច៕

ភ្នំពេញ ៖ យុទ្ធនាការអនុវត្តរឹតបន្តឹងច្បាប់ចរាចរណ៍ផ្លូវគោករយៈពេល០៦ថ្ងៃ ពីសំណាក់កម្លាំងនគរបាលសេចក្តីរាយការណ៍ពីការិយាល័យនគរបាលចរាចរណ៍ រាជធានីភ្នំពេញ ឱ្យដឹងថា គ្មានមនុស្សស្លាប់ដោយគ្រោះថ្នាក់ចរាចរណ៍នោះឡើយមានតែអ្នកទទួលរងរបួសប៉ុណ្ណោះ។

រាជធានីភ្នំពេញ មុននឹងអនុវត្តច្បាប់ចរាចរណ៍ផ្លូវគោកត្រូវបានអ្នកជំនាញប៉ាន់ប្រមាណថា ក្នុង០១ថ្ងៃគិតជាមធ្យមគ្រោះថ្នាក់ចរាចរណ៍បណ្តាលមនុស្សស្លាប់ម្នាក់។ក្នុងអំឡុងពេលរឹតបន្តឹងច្បាប់ចរាចរណ៍០៦ថ្ងៃ ចំនួនបទល្មើសគ្រោះថ្នាក់ចរាចរណ៍ក៏មានការថយចុះផងដែរ។

លទ្ធផលកិច្ចប្រតិបត្តិការនៃយុទ្ធនាការចាប់ពីថ្ងៃទី០១ ដល់ថ្ងៃទី០៦ ខែឧសភា ឆ្នាំ២០២០ សមត្ថកិច្ចបានឃាត់យានយន្តល្មើសច្បាប់សរុប ៥,២៨១គ្រឿង ក្នុងនោះម៉ូតូ ៤,៤៩០គ្រឿង, រថយន្តតូចធំ ៧៩១គ្រឿង ដើម្បីអនុវត្តតាមអនុក្រឹត្យលេខ៣៩ ស្តីពីការផាកពិន័យអន្តរការណ៍ចំពោះអំពើល្មើសច្បាប់ចរាចរណ៍ផ្លូវគោក។ ក្នុងពេលវេលានៃយុទ្ធនាការរឹតបន្តឹងច្បាប់ចររាចរណ៍ផ្លូវគោកនៅក្នុងរាជធានីភ្នំពេញនោះផងទៀត មនុស្សប្រុសស្រី០៣នាក់ ត្រូវបានកម្លាំងនគរបាលការិយាល័យប្រឆាំងបទល្មើសបច្ចេកវិទ្យាផែនការងារសន្តិសុខ ក៏ត្រូវបានឃាត់ខ្លួន និងអប់រំឱ្យដោយឱ្យធ្វើកិច្ចសន្យាបញ្ឈប់កម្មភាព ហើយឱ្យត្រឡប់ទៅផ្ទះវិញ។

ក្រោយពីពួកគេទាំង០៣នាក់នោះ បានបង្ហោះតាមហ្វេសប៊ុកព័ត៌មានមិនពិតរឿងចាស់, បង្ហោះរូបភាពវីដេអូការប្រមាថ និងចោទប្រកាន់គ្មានមូលដ្ឋានច្បាស់លាស់ធ្វើឱ្យមហាជនមានការភាន់ច្រឡំ បង្កឱ្យប៉ះពាល់កិត្តិយស និងសេចក្តីថ្លៃថ្នូរមកលើសមត្ថកិច្ចអនុវត្តច្បាប់ដែលបានបំពេញភារកិច្ចត្រឹមត្រូវអនុវត្តតាមគោលការណ៍ច្បាប់ បទបញ្ជា និងគោរពវិជ្ជាជីវៈនគរបាលជាតិ។ សំដៅការអនុវត្តច្បាប់ចរាចរណ៍ឱ្យមានប្រសិទ្ធភាព តម្លាភាព និងកាត់បន្ថយអត្រាគ្រោះថ្នាក់ចរាចរណ៍ នាំមកនូវសុវត្ថិភាព អាយុជីវិត ទ្រព្យសម្បត្តិប្រជាពលរដ្ឋអ្នក់ប្រើប្រាស់ផ្លូវថ្នល់ទូទៅ។

គ្រាដែលគេមើលឃើញថាបញ្ហាគ្រោះថ្នាក់ចរាចរណ៍បណ្តាលឱ្យមនុស្សស្លាប់ជារៀងរាល់ថ្ងៃ រាជធានីភ្នំពេញ នៅឆ្នាំ២០១៩កន្លងទៅនេះ មានអ្នកស្លាប់ចំនួន ៣៣៨នាក់ អ្នករងរបួសធ្ងន់ និងស្រាល ១,៧៣២នាក់ មូលហេតុដោយការបើកបរបំពានច្បាប់ចរាចរណ៍ផ្លូវគោក។

ទន្ទឹមដែលការចុះរឹតបន្តឹងច្បាប់ចរាចរណ៍ផ្លូវគោកនោះផងដែរ គឺមានមនុស្សមួយចំនួនមិនពេញចិត្តហើយរិះគន់ទៅលើការអនុវត្តច្បាប់ដោយមិនបានយល់អំពីសារៈសំខាន់នៃការអនុវត្តច្បាប់ក្នុងការធានា ស្ថិរភាព សុវត្ថិភាព អាយុជីវិត និងទ្យព្យសម្បត្តិ។ ដោយឡែកការអនុវត្តច្បាប់ចរាចរណ៍នោះ ក៏ត្រូវគេមើលឃើញថាមានប្រជាពលរដ្ឋជាច្រើនបានគាំទ្រនូវចំណាត់ការរបស់រាជរដ្ឋាភិបាលកម្ពុជា សំដៅកាត់បន្ថយអ្នកស្លាប់និងអ្នករងរបួស។

បើយោងតាមរបាយការណ៍របស់ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញឱ្យដឹងថា ប្រៀបធៀបក្នុងរយៈពេល០៥ថ្ងៃមុន ថ្ងៃអនុវត្តនិងអំឡុងពេលអនុវត្តច្បាប់ចរាចរណ៍ផ្លូវគោកនៅក្នុងរាជធានីភ្នំពេញ បទល្មើសគ្រោះថ្នាក់ចរាចរណ៍មានការថយចុះ០២លើក ថយអ្នកស្លាប់០៤នាក់ ចំណែកអ្នករងរបួសធ្ងន់និងស្រាល១៣នាក់ស្មើគ្នា។

ការថយចុះអ្នកស្លាប់ និងថយចុះបទល្មើសគ្រោះថ្នាក់ចរាចរណ៍បែបនោះ ត្រូវគេមើលឃើញថាប្រជាពលរដ្ឋភាគច្រើនកំពុងតែបាននឹងចូលរួមគោរពច្បាប់ចរាចរណ៍ផ្លូវគោកយ៉ាងខ្ជាប់ខ្ជួន។ ប៉ុន្តែមានប្រជាពលរដ្ឋមួយចំនួនតូចប៉ុណ្ណោះនៅតែបើកបរយានយន្តល្មើសច្បាប់ចរាចរណ៍។ ការអនុវត្តរឹតបន្តឹងច្បាប់ចរាចរណ៍ផ្លូវគោករយៈពេល០៦ថ្ងៃ នៅរាជធានីភ្នំពេញដំណើរការទៅបានរលូនអនុវត្តដោយតម្លាភាព ប្រសិទ្ធភាព និងគ្មានអំពើហិង្សាដែលបង្កការរាំងស្ទះដល់ការអនុវត្តច្បាប់នោះឡើយ៕