ភ្នំពេញ ៖ នៅព្រឹកថ្ងៃទី០៧ ខែឧសភា ឆ្នាំ២០២០នេះ តុលាការយោធាប្រកាសសាលក្រមកាត់ទោសអតីតយោធា២នាក់ ពាក់ព័ន្ធការបង្កើតកងកម្លាំងប្រដាប់អាវុធខុសច្បាប់ នៅខេត្តកំពង់ឆ្នាំង ខេត្តកំពង់ស្ពឺ និងរាជធានីភ្នំពេញ។

សូមជម្រាបថា កាលពីថ្ងៃទី២៨ ខែមេសា ឆ្នាំ២០២០ ក្រុមប្រឹក្សាជំនុំជម្រះ នៃតុលាការយោធា បានបើកសវនការជំនុំជម្រះក្តីជាសាធារណៈ លើសំណុំរឿងព្រហ្មទណ្ឌលេខ០០៨ ចុះថ្ងៃទី២៥ ខែឧសភា ឆ្នាំ២០១៦ ដែលមានជនជាប់ចោទ២រូប រួមមាន៖ ១៖ ឈ្មោះ សុខ ប៊ុនសឿន ភេទប្រុស អាយុ៦៣ឆ្នាំ ជនជាតិខ្មែរ មុខរបរយោធា និង២៖ ឈ្មោះ រ័ត្ន ច័ន្ទមន្នី ហៅ ជ័យ មឿន ភេទប្រុស អាយុ៤៧ឆ្នាំ ជនជាតិខ្មែរ មុខរបរយោធា។

ជនទាំងពីរនេះ បានជាប់ចោទពីបទ៖ បង្កើតដោយខុសច្បាប់នូវកងកម្លាំងប្រដាប់អាវុធដោយគ្មានសិទ្ធិ និងគ្មានការអនុញ្ញាត ពីអាជ្ញាធរស្របច្បាប់ ប្រព្រឹត្តនៅខេត្តកំពង់ឆ្នាំង កំពង់ស្ពឺ និងរាជធានីភ្នំពេញ កាលពីអំឡុងឆ្នាំ២០១៦ ដល់ខែមិថុនា ឆ្នាំ២០១៨៕

ភ្នំពេញ ៖ ពេញ១ថ្ងៃ នៅថ្ងៃទី០៦ ខែឧសភា ឆ្នាំ២០២០នេះ នគរបាលចរាចរណ៍ទូទាំងប្រទេស បានរកឃើញយានយន្តល្មើស ចំនួន៩៣០គ្រឿង ក្នុងនោះមានម៉ូតូ៥៩៨គ្រឿង និងរថយន្ត ៣៣២គ្រឿង។ នេះបើតាមរបាយការណ៍ របស់អគ្គស្នងការដ្ឋាននគរបាលជាតិ។

សម្រាប់បទល្មើសម៉ូតូ គឺភាគច្រើនមិនពាក់មួកសុវត្ថិភាព និងល្មើសផ្សេងៗ។ ដោយឡែកបទល្មើសរថយន្ត ភាគច្រើនអត់ខ្សែក្រវាត់ បើកលើសល្បឿន ផ្ទុកលើសចំណុះ និងអត់ស្លាកលេខជាដើម។

បើសរុបយានយន្តល្មើសទាំងរយៈពេល៦ថ្ងៃ (ថ្ងៃទី០១-០៦ ខែឧសភា) មានចំនួន១២,៤៤១គ្រឿង ក្នុងនោះម៉ូតូចំនួន៩,៣៥៧គ្រឿង និងរថយន្ត៣,០៨៤គ្រឿង៕

ខេត្តកំពង់ចាម ៖ អភិបាលនៃគណៈអភិបាល ខេត្តកំពង់ចាម លោក អ៊ុន ចាន់ដា អមដំណើរ ដោយ ថ្នាក់ដឹកនាំ អជ្ញាធរ មាន សមត្ថកិច្ច នាល្ងាចថ្ងៃទី៥ ខែឧសភា ឆ្នាំ២០២០ បាន អញ្ជើញ ចុះត្រួតពិនិត្យ កង កម្លាំងអន្តរាគមន៍ កម្លាំងប្រជាការពារ ដែលប្រចាំការ នៅតាមបណ្ដោយផ្លូវជាតិលេខ៦ និង លេខ ៧ ចាប់ពី ចំណុច ព្រំប្រទល់ខេត្តកណ្តាល រហូត មកដល់ស្ពានគីហ្ស៊ូណា ព្រំប្រទល់ខេត្តត្បូងឃ្មុំ ដេីម្បីពង្រឹង លេី កិច្ចការ ការពារ សន្តិសុខ សុវត្ថិភាព សណ្ដាប់ធ្នាប់ សាធារណៈ ក្នុងពិធីដង្ហែបុណ្យសព អ្នកឧកញ៉ាព្រឹទ្ធមហាឧបាសិកា ធម្មញ្ញាណវិវឌ្ឍនា ប៊ុន ស៊ាងលី ដែល ត្រូវធ្វើការដង្ហែ ចេញ ពីរាជធានីភ្នំពេញ នាព្រឹកថ្ងៃទី០៦ ខែឧសភា ឆ្នាំ២០២០នេះ ដើម្បីប្រារព្ធពិធីបុណ្យទៅតាម គន្លង ប្រពៃណីសាសនា នៅភូមិគ្រឹះស្រុកកំណើតសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ស្ថិត នៅ ក្នុង ភូមិទី២ ឃុំរការខ្នុរ ស្រុកក្រូចឆ្មារ ខេត្តត្បូងឃ្មុំ។

ក្នុងដំណើរអញ្ជេីញចុះត្រួតពិនិត្យនោះដែរ លោកអភិបាលខេត្ត និងលោកឧត្តមសេនីយ៍ស្នងការ ក៏បានធ្វើការណែនាំដល់មន្ត្រីកងកម្លាំងឈរជើងគ្រប់គោលដៅដែលមាននៅក្នុងស្រុកបាធាយ ស្រុកជើងព្រៃ ស្រុកព្រៃឈរ ស្រុកកំពង់សៀម និងក្រុងកំពង់ចាមធ្វើយ៉ាងណាត្រូវយកចិត្តទុកដាក់រួមសហការគ្នាក្នុងការអនុវត្តតួនាទីរបស់ខ្លួនដើម្បីការពារសន្តិសុខ សុវត្ថិភាព សណ្តាប់ធ្នាប់ សាធារណៈ ជូនដល់ប្រមុខថ្នាក់ដឹកនាំនៅតាមបណ្តាស្ថាប័នកំពូលៗរបស់ជាតិ និងថ្នាក់ដឹកនាំមកពីក្រសួង ស្ថាប័ននានា រួមទាំងភ្ញៀវជាតិ អន្តរជាតិក្នុងពិធីដង្ហែសពអ្នកឧកញ៉ាព្រឹទ្ធមហាឧបាសិកា ធម្មញ្ញាណវិវឌ្ឍនា ប៊ុន ស៊ាងលី ត្រូវជាមាតាក្មេកសម្តេចតេជោ ហ៊ុន សែន និង ជាមាតាបង្កើត សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែល បានទទួលមរណភាពនាថ្ងៃចន្ទ ១៣កើត ខែពិសាខ ឆ្នាំជូត ទោស័ក ព.ស.២៥៦៣ ត្រូវនឹងថ្ងៃទី៤ ខែឧសភា ឆ្នាំ២០២០ វេលាម៉ោង២៖១២នាទីទៀបភ្លឺ ក្នុងជន្មាយុ៩៦ឆ្នាំ ដោយជរាពាធ។ ហើយត្រូវ ប្រារព្ធពិធីបុណ្យទៅតាម គន្លង ប្រពៃណីសាសនា នៅភូមិគ្រឹះស្រុកកំណើតសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ស្ថិត នៅ ក្នុង ភូមិទី២ ឃុំរការខ្នុរ ស្រុកក្រូចឆ្មារ ខេត្តត្បូងឃ្មុំ។

ជាមួយគ្នា នោះលោកអភិបាលខេត្ត និង លោកឧត្តមសេនីយ៍ស្នងការក៏បានឧបត្ថម្ភជាថវិកាដល់កងកម្លាំងដែលឈរជេីងនៅតាមគោលដៅទាំងនោះផងដែរ៕ ដោយ ៖ ប៉ែន សុផល

ខេត្តបន្ទាយមានជ័យ ៖ រាជរដ្ឋាភិបាលកម្ពុជា ប្រព័ន្ធស្បៀងបម្រុងកម្ពុជា(ប.ស.ប.ក) បានរៀបចំបើកសិក្ខាសាលាស្តីពី ការផ្សព្វផ្សាយ និងផ្គត់ផ្គង់គ្រាប់ពូជបន្លែដោយឥតគិតថ្លៃដល់កសិករ និងកម្មករដែលរងផលប៉ះពាល់ពីជំងឺកូវីដ-១៩ ដើម្បីជំរុញការដាំដុះបន្លែសុវត្តិភាព។ ពិធីនេះប្រព្រឹត្តទៅក្រោមអធិបតីភាព លោកបណ្ឌិត វង់ សណ្តាប់ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងលោក លី សារី អភិបាលរងខេត្តបន្ទាយមានជ័យ នៅសាលប្រជុំសាលាខេត្តបន្ទាយមានជ័យ រសៀលថ្ងៃទី៥ ខែឧសភា ឆ្នាំ២០២០។
ជាមួយគ្នានោះ លោក លី សារី អភិបាលរងខេត្តបន្ទាយមានជ័យ បានមានប្រសាសន៍លើកឡើងថា៖គោលការណ៍ក្នុងការបែងចែកគ្រាប់ពូជបន្លែ គឺដើម្បីផ្តល់គ្រាប់ពូជបន្លែដល់គ្រួសារកសិករដោយឥតគិតថ្លៃ ដើម្បីជំរុញការដាំដុះបន្លែសុវត្តិភាពជាលក្ខណៈគ្រួសារ ជាពិសេសផ្តល់អាទិភាពដល់គ្រួសារកសិករក្រីក្រ និងងាយរងគ្រោះនិងគ្រួសារកម្មករ និយោជិកក្នុងវិស័យកាត់ដេរ និងវាយនភណ្ឌ វិស័យទេសចរណ៍ និងវិស័យផ្សេងៗ ដែលត្រូវបានផ្អាក ឫព្យួរការងារដោយសារផលប៉ះពាល់ជមងឺកូវីដ១៩

ថ្លែងក្នុងឱកាសនោះ លោកបណ្ឌិត វង់ សណ្តាប់ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍លើកឡើងថា៖តាមរយៈរាជរដ្ឋាភិបាល ប្រព័ន្ធស្បៀងបម្រុងកម្ពុជារបស់ក្រសួងសេដ្ឋកិច្ច និងហិរញ្ញវត្ថុសហការជាមួយស្ថានីយ៍ពិសោធន៍ពូជបន្លែក្បាលកោះនៃអគ្គនាយកដ្ឋានកសិកម្មបានផលិតគ្រាប់ពូជបន្លែសុទ្ធល្អចំនួន២៥តោនជារៀងរាលឆ្នាំសម្រាប់កិច្ចអន្តរាគមន៍ផ្សេងៗ។

ពាក់ព័ន្ធទៅនឹងសិក្ខាសាលាស្តីពីការផ្សព្វផ្សាយ និងផ្គត់ផ្គង់គ្រាប់ពូជបន្លែដោយឥតគិតថ្លៃដល់កសិករ និងកម្មករដែលរងផលប៉ះពាល់ពីជំងឺកូវីដ-១៩ គឺដើម្បីជំរុញការដាំដុះបន្លែសុវត្តិភាព។

គួរបញ្ជាក់ថ សម្រាប់កាចែកគ្រាប់ពូជបន្លែរួមមាន៖ពោតដំណើប,ល្ពៅ,ស្ពៃចង្កឹះ,ស្ពៃខៀវ, ត្រកួន, សណ្តែកគួរ,ត្រប់វែង,ត្រប់ក្រាំងរមាស,និងប៉េងបោះ សម្រាប់ចែកជូនបងប្អូនប្រជាកសិករយើងនៅតាមបណ្តាស្រុក ឃុំ ដើម្បីយកទៅធ្វើការដាំដុះក្នុងការចិញ្ចឹមជីវភាពគ្រួសាររបស់ពួកគាត់ ក្នុងរយៈពេលការបង្ការ និងទប់ស្កាត់នៃការរីករាលដាល ជំងឺកូវីដ-១៩ ក្នុងនោះមួយគ្រួសារទទួលបាន៤មុខដំណាំស្មើនឹង៦កញ្ចប់ និងកសិករដែលចង់បានគ្រាប់ពូជត្រូវមានវត្តមានផ្ទាល់នៅនឹងកន្លែងបែងចែក សម្រាប់ការចែកជូននាពេលខាងមុខឆាប់ៗនេះ៕

ភ្នំពេញ ៖ នៅព្រឹកថ្ងៃពុធ ទី០៦ ខែឧសភា ឆ្នាំ២០២០នេះ សពអ្នកឧកញ៉ា ព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី ត្រូវបានដង្ហែទៅបញ្ចុះនៅស្រុកកំណើតស្ថិតនៅភូមិទី២ ឃុំរការខ្នុរ ស្រុកក្រូចឆ្មារ ខេត្តត្បូងឃ្មុំ បន្ទាប់ពីបានតម្កល់ធ្វើពិធីបុណ្យទក្ខិណានុប្បទានតាមប្រពៃណីព្រះពុទ្ធសាសនាខ្មែរអស់រយៈពេលពេល២យប់៣ថ្ងៃនៅគេហដ្ឋានក្នុងរាជធានីភ្នំពេញ ។

ពិធីដង្ហែសពប្រកបដោយភាពក្តុកក្តួល និងសោកសៅត្រូវបានធ្វើឡើងទៅតាមបែបបទព្រណៃណីព្រះពុទ្ធសាសនា ដោយមានការសូត្រមន្តឧទ្ទិសកុសលពីកុសលពីសំណាក់ព្រះសង្ឃ។ ក្រៅពីក្រុមគ្រួសារសាច់ញាតិ និងកូនចៅហើយនោះ ពិធីដង្ហែសពក៏មានការអញ្ជើញចូលរួមពីមន្ត្រីរាជការខ្មែរផងដែរ។

សូមជម្រាបថា អ្នកឧកញ៉ាព្រឹទ្ធមហាឧបាសិកាធម្មញ្ញាណវិវឌ្ឍនាបានទទួលមរណភាព នៅវេលាម៉ោង ២ និង១២នាទីទៀបភ្លឺ ថ្ងៃ១៣កើត ខែពិសាខ ឆ្នាំជូត ទោស័ក ពុទ្ធសករាជ ២៥៦៣ ត្រូវនឹងថ្ងៃទី៤ ខែឧសភា ឆ្នាំ២០២០ ក្នុងជន្មាយុ ៩៦ឆ្នាំ ដោយជរាពាធ៕

ខេត្តបន្ទាយមានជ័យ ៖ ស្របពេលដែលស្ថានភាពជម្ងឺកូវិដ១៩ មិនមានសកម្មភាពរីករាលដាល អតីតអនុប្រធានមន្ទីរសុខាភិបាល លោក ឡេ ចន្ទ័សង្វាត ត្រូវបានប្រកាសអោយចូលកាន់តំណែងជាប្រធានមន្ទីសុខាភិបាលខេត្តបន្ទាយមានជ័យជំនួសលោក កែវ សុភក្ត្រា ដែលត្រូវចូលនិវត្តន៍។ ពិធីប្រកាសធ្វើឡើងនៅថ្ងៃទី០៥ ខែឧសភា ឆ្នាំ២០២០នៅសាលប្រជុំសាលាខេត្តបន្ទាយមានជ័យ។

លោក អ៊ុ រាត្រី អភិបាលខេត្តបន្ទាយមានជ័យបានមានប្រសាសន៍កោតសរសើរចំពោះមន្ត្រីសុខាភិបាលខេត្តបន្ទាយមានជ័យ បានខិតខំយកចិត្តទុកដាក់ធ្វើការងារបម្រើប្រជាពលរដ្ឋនៅពេលវីរូសកូរូណារឺកូវីដ១៩កំពុងរាតត្បាត ត្រូវបានពិនិត្យនិងពន្យាបាលដោយយកចិត្តទុកដាក់ដោយមិនខ្លាចនឿយហត់ឡើយ។

លោកសាស្ត្រាចារ្យ អេង ហួត រដ្ឋលេខាធិការក្រសួងសុខាភិបាលបានមានប្រសាសន៍ថា៖ក្រោយពេលប្រកាសតែងតាំងប្រធានមន្ទីសុខាភិបាលខេត្តបន្ទាយមានជ័យថ្មី ដោយប្រធានមន្ទីចាស់ត្រូវបានចូលនិវត្តន៍ ក្រោយពេលទទួលភារកិច្ចថ្មី ត្រូវសហការគ្នាល្អជាមន្ត្រីស្ថាប័នពាក់ព័ន្ធ និងមន្ត្រីក្រោមឱវាទអោយល្អ។

លោកសាស្ត្រាចារ្យបានជម្រុញអោយមន្ត្រីសុខាភិបាលត្រូវខិតខំយកចិត្តទុកដាក់ស្របពេលបណ្តាប្រទេសទូទាំងពិភពលោកបានកំពុងរាតត្បាតជំងឺឆ្លងកូរូណារឺកូវីដ១៩ ដែលរាជរដ្ឋាភិបាលកម្ពុជា ក្រោមការដឹកនាំដោយសម្តេចតេជោ ហ៊ុន សែន នាយករដ្ឋមន្ត្រី នៃព្រៈរាជាណាចក្រកម្ពុជា កំពុងយកចិត្តទុកដាក់និងមានវិធានការបង្កានិងទប់ស្កាត់វីរូសកូរូណារឺកូវីដ១៩។

លោកសាស្ត្រាចារ្យ អេង ហួត តឿនរំលឹកដល់មន្ត្រីសុខាភិបាលត្រូវខិតខំផ្សព្វផ្សាយណែនាំនិងណែនាំដល់បងប្អូនប្រជាពលរដ្ឋអោយមានការយល់ដឹងបង្កានិងទប់ស្កាត់វីរូសកូរូណារឺកូវីដ១៩ ដោយអនាម័យខ្លួនប្រាណ និងលាងដៃដោយសាប៊ូ និងអាកុល ពាក់ម៉ាស់អោយបានគ្រប់គ្នា បើមានបងប្អូនមកពីស្រុកក្រៅសំុអោយគាត់នៅឆ្ងាយពីសាច់ញាតិរយៈពេល១៤ថ្ងៃ៕

ភ្នំពេញ ៖ ថ្ងៃ១៥ កើត ខែវិសាខ គឺជាទិវាប្រវត្តិសាស្ត្រដ៏សំខាន់មួយ ដែលពុទ្ធសាសនិកជនគ្រប់រូបទូទាំងពិភពលោក តែងប្រារព្ធរលឹកជារៀងរាល់ឆ្នាំ តាមរយៈកម្មវិធីបុណ្យប្រពៃណីពុទ្ធសាសនា វិសាខបូជា។ វិសាខបូជា ដែលប្រារព្ធឡើងថ្ងៃទី០៦ ខែឧសភា ឆ្នាំ២០២០នេះ ដើម្បីរំលឹកដល់ថ្ងៃខួបកំណើត (ខួបទី២៦៤២) ខួបថ្ងៃត្រាស់ដឹង (ខួបទី២៦០៧) និងខួបថ្ងៃចូល បរិនិព្វាន (២៥៦២) របស់ព្រះសមណគោត្តម ដែលជាព្រះអរហន្តសម្មាសម្ពុទ្ធបរមគ្រូនៃយើង។ អភិលក្ខិតសម័យទាំងបីនេះ កើតឡើងនៅចំថ្ងៃ១៥កើត ខែវិសាខតែមួយខុសគ្នាតែឆ្នាំប៉ុណ្ណោះ។

ថ្ងៃនេះដែរក៏ជាថ្ងៃអង្គការសហប្រជាជាតិ បានកំណត់យកវិសាខបូជា ជាទិវាអន្តរជាតិ ចាប់តាំងពីថ្ងៃ១៥ ធ្នូ ១៩៩៩ មកម្ល៉េះ ដែលជាការទទួលស្គាល់ជាសាកលអំពីការរួមចំណែក របស់ព្រះពុទ្ធសាសនាក្នុង ពិភពលោកជាងពីរពាន់ប្រាំរយឆ្នាំមកនេះហើយ និងកំពុងបន្តនូវ ឥទ្ធិពលរបស់ខ្លួនក្នុងការលើកស្ទួយចិត្តវិញ្ញាណ របស់មនុស្សជាតិតទៅទៀត។

ជាធម្មតាក្នុងថ្ងៃនេះ ប្រជាពុទ្ធសាសនិកជនតែងតែធ្វើដំណើរ ទៅវត្តណាមួយដែលខ្លួនពេញចិត្ត ដើម្បីចូលរួមក្នុងការប្រារព្ធពិធី មានការដើរហែប្រទក្សិណជុំវិញព្រះវិហារ ការថ្វាយភ្ញីផ្កា ការសូត្រធម៌រំឭកសសើរ ការស្តាប់ ធម្មទេសនា និងការសាកសួរសាកច្ឆាធម៌ជាដើម។ កិច្ចការទាំងនេះក៏ជាការប្រសើរហើយ ព្រោះបាននូវអានិសង្ស ដែលកើតមកពីការធ្វើទាន រក្សាសីលជាដើម តែជាពិសេសទៅទៀតនោះ គឺការដែលប្រជាពុទ្ធបរិស័ទ គប្បីយល់ឱ្យកាន់តែបានច្បាស់ថែមទៀតអំពី សារៈសំខាន់របស់ថ្ងៃទាំងបីនេះ ដើម្បីជាប្រយោជន៍សម្រាប់យកមកប្រតិបត្តិ និងអនុវត្តក្នុងជីវិតប្រចាំថ្ងៃរបស់ខ្លួន។

១- ថ្ងៃប្រសូត៖ កើតមកជាមនុស្ស ត្រូវតាំងចិត្តធ្វើអ្វីមួយក បង្កើតអ្វីថ្មីមួយក្នុងជីវិតឲ្យទាល់តែបានសម្រេច ដោយការសិក្សា ហ្វឹកហាត់ អប់រំខ្លួន តាមជំហានទាំង៧ គឺសត្តពោជង្ឈង្គ៧ ជាផ្លូវឆ្ពោះទៅរកជោគជ័យក្នុងជីវិត ជាផ្លូវមធ្យម តាមអរិយសច្ច៤ ដែលព្រះពុទ្ធអង្គបានឈានមុនយើង និងបានសម្រេចរួចមកហើយ។

២- ថ្ងៃត្រាស់ដឹង៖ កាលបានសម្រេចនូវអ្វីដែលខ្លួនបានតាំងចិត្តហើយ គប្បីធ្វើឲ្យការសម្រេចបាននោះ ទៅជាប្រយោជន៍ដល់ខ្លួន និងមនុស្សជាតិ និង ចែកចាយការសម្រេច ព្រមទាំងវិធីដែលនាំឲ្យសម្រេចគោលដៅនោះដល់មនុស្សជាតិទូទៅ។

៣- ថ្ងៃបរិនិព្វាន៖ សេចក្តីស្លាប់គឺជាធម្មជាតិរបស់មនុស្ស-សត្វ។ ក្នុងឋានៈជាមនុស្ស មុននឹងស្លាប់គប្បីមានមត៌កណាមួយដែលមនុស្សជំនាន់ក្រោយ អាចយកទៅប្រើជាប្រយោជន៍សម្រាប់កសាងខ្លួន សង្គម និងបរិស្ថានឲ្យស្ថិតស្ថេរយូរអង្វែងតទៅ៕