ភ្នំពេញ ៖ នៅថ្ងៃទី០៦ ខែឧសភា ឆ្នាំ២០២០នេះក្រសួងសុខាភិបាល បានចេញសេចក្តីប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១២០នាក់។
ចំណែកអ្នកកំពុងសម្រាកព្យាបាលជំងឺកូវីដសរុបចំនួន២នាក់ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី០៦ ខែឧសភា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាលដែលទទួលបានមុននេះបន្តិច៕
ភ្នំពេញ ៖ រយៈពេល១ថ្ងៃ នៅថ្ងៃទី០៥ ខែឧសភា ឆ្នាំ២០២០នេះ នគរបាលចរាចរណ៍ទូទាំងប្រទេស បានរកឃើញយានយន្តល្មើស ចំនួន១,៧៥៨គ្រឿង ក្នុងនោះមានម៉ូតូ១,២៦៥គ្រឿង និងរថយន្ត៤៩៣គ្រឿង។ នេះបើតាមរបាយការណ៍ របស់អគ្គស្នងការដ្ឋាននគរបាលជាតិ។
របាយការណ៍បន្តថា សម្រាប់បទល្មើសម៉ូតូ គឺភាគច្រើនមិនពាក់មួកសុវត្ថិភាព, អត់កញ្ចក់, បើកបញ្ជ្រាស និងល្មើសផ្សេងៗ។ ដោយឡែកបទល្មើសរថយន្ត ភាគច្រើនអត់ខ្សែក្រវាត់ បើកលើសល្បឿន ផ្ទុកលើសចំណុះ និងអត់ផ្លាកលេខជាដើម។
របាយការណ៍បញ្ជាក់ថា បើសរុបយានយន្តល្មើសទាំងរយៈពេល៥ថ្ងៃ (ថ្ងៃទី០១-០៥ ខែឧសភា) មានចំនួន ១១៥១១គ្រឿង ក្នុងនោះម៉ូតូចំនួន ៨៧៥៦គ្រឿង និងរថយន្ត២៧៥២គ្រឿង៕
បាងកក ៖ អាជ្ញាធរសុខាភិបាលថៃ នៅរសៀលនេះបានប្រកាសរកឃើញករណីឆ្លងថ្មីនៃជំងឺ COVID-19 តែម្នាក់ប៉ុណ្ណោះ និងមិនមានអ្នកស្លាប់ថ្មីទៀតនោះឡើយ សម្រាប់រយៈពេលពេញមួយថ្ងៃ។ នេះបើតាមប្រភពពី CNA។
លោក Taweesin Wisanuyothin អ្នកនាំពាក្យមជ្ឈមណ្ឌលគ្រប់គ្រងស្ថានការណ៍ជំងឺកូវីដ-១៩បានឲ្យដឹងថា ករណីថ្មីនោះគឺជាបុរសជនជាតិថៃម្នាក់មានអាយុ ៤៥ឆ្នាំ មានរស់នៅខេត្តណារ៉ាធីវ៉ាត់ ភាគខាងត្បូងនៃប្រទេសថៃ។
គួរជម្រាបថា សរុបមកទល់ពេលនេះ ករណីឆ្លង COVID-19 នៅក្នុងប្រទេសថៃ សរុបមាន ២,៩៨៨ករណី ក្នុងនោះស្លាប់ ៥៤នាក់ និង ២,៧៤៧នាក់បាន ជាសះស្បើយ ស្របពេលដែលអ្នកជំងឺ ១៨៧នាក់ កំពុងបន្តសម្រាកព្យាបាលនៅឯមន្ទីរពេទ្យ៕
ភ្នំពេញ ៖ ចោរ២នាក់ដែលគេដឹងថា បានជិះកង់១គ្រឿង មកធ្វើសកម្មភាពឆ្កឹះសោ និងវាយបំបែកទ្វារកញ្ចក់ហាងលក់កាមេរ៉ាសុវត្ថិភាព និងម៉ាស៊ីនព្រីនយីហោ «ភ្នំពេញអូហ្វីសសប្លាយ៍» ចូលលួចកុំទ្យុទ័រ ១គ្រឿង និងលេបថប១គ្រឿង បានសម្រេច រួចគេចខ្លួនដោយសុវត្ថិភាព។ ហេតុការណ៍នេះ បានបង្កការភ្ញាក់ផ្អើលកាលពីវេលាម៉ោង ១និង៣០នាទីរំលងអធ្រាត្រ ឈានចូលថ្ងៃទី៥ ខែឧសភា ឆ្នាំ២០២០ ត្រង់ចំណុចផ្ទះលេខ2Eoផ្លូវព្រះនរោត្តម ស្ថិតក្នុងសង្កាត់វត្តភ្នំ ខណ្ឌដូនពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា ហាងខាងលើ មិនមានបុគ្គលិកណាម្នាក់ នៅដេកយាមទេ ជារៀងរាល់យប់ តែងតែចាក់សោទ្វារទុកចោល។ ដោយនៅថ្ងៃកើតហេតុ ខណ:ដល់វេលាត្រូវបិទហាង បុគ្គលិកទាំងអស់ រួមជាមួយអ្នកគ្រប់គ្រង ក៏បាននាំគ្នារៀបចំចាក់សោបិទទ្វារហាង រួចចេញទៅផ្ទះរៀងៗខ្លួន។ លុះដល់ពេលកើតហេតុ ស្រាប់តែមានសមត្ថកិច្ចមូលដ្ឋាន បានទាក់ទងតាមទូរស័ព្ទ ទៅប្រាប់ថា ហាងត្រូវបានជនសង្ស័យ ធ្វើសកម្មភាពឆ្កឹះសោទ្វារ និងវាយបំបែកទ្វារកញ្ចក់ បណ្តាលឲ្យបែកអស់មួយផ្ទាំងទំហំប្រមាណ២x១ម៉ែត្រកន្លះ។
បន្ទាប់មកពួកគាត់ ក៏ប្រញាប់ប្រញាល់នាំគ្នា ចុះមកត្រួតពិនិត្យមើល នៅទីតាំងខាងលើ រួមទាំងឆែកមើលកាមេរ៉ាសុវត្ថិភាព ដែលបំពាក់នៅខាងមុខហាង ទើបដឹងថា ជនសង្ស័យមានគ្នាចំនួនពីរនាក់ បានជិះមួយគ្រឿងមកធ្វើសកម្មភាពឆ្កឹះសោទ្វារ និងវាយបំបែកទ្វារកញ្ចក់មួយជាន់ទៀត ដើម្បីចូលទៅខាងក្នុងហាងលួចយកកុំព្យូទ័រលើតុចំនួន១គ្រឿងនិងឡេបថបចំនួន១គ្រឿង ហើយបាននាំគ្នាឡើងជិះកង់ គេចចេញពីកន្លែងកើតហេតុបាត់ទៅ ៕
ខេត្តសៀមរាប ៖ ការដ្ឋានជួសជុលប្រាសាទកណ្ដាលស្រះស្រង់ ដែលដឹកនាំដោយលោក គឹម សុធិន អគ្គនាយករងអាជ្ញាធរជាតិអប្សរា ដែលមានលោក ម៉ៅ សុខនី ប្រធានការដ្ឋាន បានរាយការណ៍ស្ដីពី ក្រុមបុរាណវិទូកំពុងកំណាយស្រាវជ្រាវ បានប្រទះឃើញវត្ថុបុរាណចំនួន៣ប្រភេទ គឺចម្លាក់នាគ ខ្វាតពណ៌ស (គ្រីស្តាល់?) និងត្រីសូល៍ នៅថ្ងៃទី៤ ខែមេសា ឆ្នាំ២០២០។
តាមការបញ្ជាក់ពីក្រុមការងារបានឱ្យដឹងថា ចាប់តាំងពីផ្តើមកំណាយរហូតមកដល់ពេលនេះ ក្រុមការងារបានរកឃើញបុរាណវត្ថុជាច្រើនដែលស្ថិតនៅរាយប៉ាយលើដីជុំវិញទួលប្រាសាទ។
ក្នុងនោះបុរាណវត្ថុចំនួនបីប្រភេទដែលគេពុំធ្លាប់បានប្រទះឃើញនៅទីនេះមានជាអាទ៍៖ ត្រីសូល៍ធ្វើពីលោហៈចំនួន២ ដែល១នៅមានរូបរាងពេញលេញ និង១ទៀតនៅសល់តែបំណែកចុងស្រួចមួយចំហៀង។ ខ្វាតពណ៌ស (គ្រីស្តាល់?) ជាច្រើនគ្រាប់ ដូចធ្លាប់រកឃើញនៅក្នុងរណ្តៅកំណាយទីតាំងផ្សេងៗពីមុនដែរ និងបំណែកចម្លាក់ក្បាលនាគមួយធំដែលមួយផ្នែកធំកប់នៅក្នុងដីនៅឡើយ។
ការរកឃើញសំណល់បុរាណវិទ្យាទាំងនេះ ក្រុមបុរាណវិទូ នៅមិនទាន់អាចសន្និដ្ឋានបានថាស្ថិតនៅក្នុងសម័យកាលណា គេដាក់ដើម្បីអ្វី និងមានអ្វីបន្ថែមទៀតនោះទេ ព្រោះទើបតែជាដំណាក់កាលដំបូងនៃការធ្វើកំណាយស្រាវជ្រាវ។ លទ្ធផលនឹងបង្ហាញច្បាស់លាស់ជាងនេះនៅក្រោយបញ្ចប់ការងារស្រាវជ្រាវ។ បើសិនជាមិនមានអ្វីរារាំង និងរំខានក្នុងអំឡុងពេលកំណាយ កិច្ចការស្រាវជ្រាវនេះគ្រោងនឹងបញ្ចប់នៅក្នុងរយៈពេល៦សប្តាហ៍ ដោយគិតចាប់ពីថ្ងៃទី២៧ ខែមីនា ឆ្នាំ២០២០មក។
ក្នុងការរក្សាទុកដាក់វត្ថុបុរាណវិញលោកអគ្គនាយករងបានឱ្យដឹងថា បច្ចុប្បន្នដើម្បីរក្សាពីសុវត្ថិភាព ក្រុមការងារបាននាំយកវត្ថុទាំងនោះមកប្រគល់ជូនសារមន្ទីរព្រះនរោត្តមសីហនុ-អង្គរ ដើម្បីជួសជុល សម្អាត និងរក្សាទុក៕
ភ្នំពេញ ៖ សមាគមរោងចក្រកាត់ដេរនៅកម្ពុជា (GMAC) បានឱ្យដឹងថា រោងចក្រចំនួន ១៨០ បានព្យួរប្រតិបត្តិការរបស់ខ្លួន ហើយរោងចក្រចំនួន ៦០បន្ថែមទៀតនឹងឈានទៅរកការព្យួរផងដែរ ដែលកំពុងប៉ះពាល់ដល់កម្មករជាង១៥ម៉ឺននាក់ដែលត្រូវបានព្យួរការងារជាបណ្តោះអាសន្ន។
លើសពីនេះ កម្មករជិត ២០ម៉ឺននាក់ទៀត នឹងត្រូវព្យួរការងារនាពេលខាងមុខឆាប់ៗនេះ ដែលនឹងប៉ះពាល់ដល់សមាជិកគ្រួសារប្រមាណ ២លាននាក់ដែលពឹងផ្អែកលើពួកគេទៀតផង។ នេះបើតាមលិខិតរបស់ GMAC ចុះកាលពីថ្ងៃទី៤ ខែឧសភា ឆ្នាំ២០២០ ស្តីពីការអំពាវនាវដល់អ្នកបញ្ជាទិញដល់អ្នកបញ្ជាទិញសម្លៀកបំពាក់ ស្បែកជើង និងផលិតផលធ្វើដំណើរពីកម្ពុជា។
GMAC លើកឡើងថា៖ «យើងយល់អំពីភាពលំបាកដែលអ្នកបញ្ជាទិញកំពុងប្រឈមមុខ ប៉ុន្តែយើងពិតជាអំពាវនាវយ៉ាងខ្លាំងទៅអ្នកបញ្ជាទិញទាំងអស់មេត្តាគោរពតាមលក្ខខណ្ឌទូទាត់ប្រាក់សម្រាប់ទំនិញដែលបានទទួលរួចហើយ និង/ឬដែលកំពុងដឹកទៅឱ្យអ្នកបញ្ជាទិញ។ រោងចក្រនៅកម្ពុជា កំពុងរងគ្រោះរួចហើយពីការលុបចោលការបញ្ជាទិញជាច្រើន និងការគ្មានបញ្ជាទិញថ្មីៗ ហើយមិនអាចទ្រាំទ្រនឹងការមិនទូទាត់ប្រាក់នោះទេ»៕
សូមអានបន្ថែមក្នុងលិខិតខាងក្រោម៖ 
ភ្នំពេញ ៖ នៅថ្ងៃទី០៥ ខែឧសភា ឆ្នាំ២០២០នេះ ក្រសួងសុខាភិបាល បានចេញប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១២០នាក់។
ចំណែកអ្នកកំពុងសម្រាកព្យាបាលជំងឺកូវីដ នៅសល់តែ២នាក់ប៉ុណ្ណោះ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី០៥ ខែឧសភា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាលទទួលបានមុននេះបន្តិច៕
បរទេស ៖ អង្គការសុខភាពពិភពលោកបាននិយាយកាលពីថ្ងៃច័ន្ទថា ទីក្រុងវ៉ាស៊ីនតោនមិនបានផ្តល់ភស្ដុតាងណាមួយដើម្បីគាំទ្រការអះអាងដោយប្រថុយប្រថាន របស់ប្រធានាធិបតីអាមេរិកដែលថាវីរុសថ្មីកូវីដ១៩នេះមានប្រភពនៅក្នុងមន្ទីរពិសោធន៍ចិនទេ។ នេះបើយោងតាមប្រភពពី CNA។
ប្រធានផ្នែកសង្គ្រោះបន្ទាន់របស់អង្គការសុខភាពពិភពលោកលោក Michael Ryan បានប្រាប់សន្និសីទសារព័ត៌មានថា”យើងមិនបានទទួលទិន្នន័យឬភ័ស្តុតាងជាក់លាក់ណាមួយពីរដ្ឋាភិបាលសហរដ្ឋអាមេរិកទាក់ទងទៅនឹងប្រភពដើមនៃវីរុសនោះទេ។
អ្នកវិទ្យាសាស្ត្រជឿជាក់ថាវីរុសនេះបានឆ្លងពីសត្វទៅមនុស្សដែលកំពុងផ្ទុះឡើងនៅប្រទេសចិនកាលពីចុងឆ្នាំមុនអាចមកពីទីផ្សារមួយនៅទីក្រុងវូហានដែលលក់សត្វកម្របែបនេះ។
ប្រធានាធិបតីអាមេរិកលោក Donald Trump បានធ្វើការរិះគន់កាន់យ៉ាងខ្លាំងទៅលើប្រទេសចិន ដែលបណ្តោយឱ្យជំងឺកាចសាហាវនេះឆ្លងរាលដាលនៅទូទាំងពិភពលោក។ លោកក៏បានធ្វើការអះអាងថា ជំងឺកូវីដ១៩ គឺធ្លាយចេញពីមន្ទីរពិសោធន៍ Wuhan Institute of Virology ក្នុងខេត្តហ៊ូប៉ី ប្រទេសចិន ខណៈក្រុមអ្នកវិទ្យាសាស្ត្រជឿជាក់ថា ជំងឺនេះគឺមានដើមកំណើតចេញពីទីផ្សារលក់សាច់សត្វ នៅក្នុងទីក្រុងវូហាន ខេត្តហ៊ូប៉ី។
ហើយរដ្ឋមន្ត្រីក្រសួងការបរទេសសហរដ្ឋអាមេរិកលោក Mike Pompeo កាលពីថ្ងៃអាទិត្យបាននិយាយថា“ អាមេរិកមានភ័ស្តុតាងជាច្រើនដែលបានអះអាងវីរុសនេះមានប្រភពពីមន្ទីរពិសោធន៍ចិន ប៉ុន្តែរដ្ឋាភិបាលចិនបានបដិសេធយ៉ាងដាច់អហង្ការ។
លោក Michael Ryan បាននិយាយថា WHO នឹងមានឆន្ទៈក្នុងការទទួលបានព័ត៌មានណាដែលបញ្ជាក់ពីប្រភពដើមនៃវីរុសនេះ” ដោយលោកសង្កត់ធ្ងន់ថានេះគឺជា”ព័ត៌មានសុខភាពសាធារណៈដ៏សំខាន់សម្រាប់ការគ្រប់គ្រងជំងឺនេះអនាគត”។
លោកបានបន្ថែមថា“ប្រសិនបើទិន្នន័យនិងភ័ស្តុតាងមានពិកមែននោះថាតើ អាមេរិកអាចចែកចាយនៅពេលណាប៉ុន្តែវាពិបាកសម្រាប់អង្គការសុខភាពពិភពលោកក្នុងប្រតិបត្តិការព័ត៌មានខ្វះចន្លោះនៅក្នុងបញ្ហានោះ”៕
បរទេស ៖ គិតត្រឹមម៉ោង ៨ព្រឹកថ្ងៃអង្គារ ទី០៥ ខែឧសភា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ៣,៦៤៣,២៤២ករណីហើយ។ ក្នុងនោះអ្នកស្លាប់មានចំនួន ២៥២,២៤០នាក់ និងជាសះស្បើយឡើងវិញ ១,១៩៤,៧៣៩នាក់។ នេះបើយោងតាមទិន្នន័យពីគេហទំព័រអន្តរជាតិ Worldometer។
គេហទំព័រដដែលបានបង្ហាញថា សហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ១,២១២,៨០៦នាក់ ស្លាប់ចំនួន ៦៩,៩២០នាក់ និងជាសះស្បើយចំនួន ១៨៨,០២៧នាក់៕
ភ្នំពេញ ៖ ក្រសួងធនធានទឹក និងឧតុនិយម នៅថ្ងៃទី០៥ ខែឧសភា ឆ្នាំ២០២០នេះ បានចេញសេចក្តីជូនដំណឹង ស្តីពី ស្ថានភាពធាតុអាកាស ចាប់ពីថ្ងៃទី ០៦ ដល់ថ្ងៃទី ១២ ខែឧសភា ឆ្នាំ ២០២០។
ក្រសួងធនធានទឹកបានឲ្យដឹងថា តាមរយៈការតាមដានស្ថានភាពអាកាសធាតុជាប់ជាបន្តសង្កេតឃើញថា ជ្រលងសម្ពាធទាបខ្សោយគ្របដណ្តប់លើកម្ពុជា។ ស្ថានភាពបែបនេះ ធ្វើឲ្យចាប់ពីថ្ងៃទី០៦ ដល់ថ្ងៃទី១២ ខែឧសភា៖
១៖ បណ្តាខេត្តនៅតំបន់វាលទំនាបកណ្តាល៖
– សីតុណ្ហភាពអប្បបរមា មានពី ២៥-២៧°C
– សីតុណ្ហភាពអតិបរមា មានពី ៣៥-៤១°C ។
ផ្នែកមួយចំនួននៃបណ្តាខេត្តនៅភាគពាយ័ព្យ នឹងអាចមានភ្លៀងធ្លាក់រាយប៉ាយនៅក្នុងកម្រិតតិចទៅបង្គួរ ។ ចំណែកឯបណ្តាខេត្តដទៃទៀត នឹងអាចមានភ្លៀងធ្លាក់ខ្សោយនៅផ្នែកខ្លះ។
២៖ បណ្តាខេត្តនៅតំបន់ជួរភ្នំដងរែក និងខ្ពង់រាបឦសាន៖
– សីតុណ្ហភាពអប្បបរមា មានពី ២៤-២៦°C
– សីតុណ្ហភាពអតិបរមា មានពី ៣៤-៣៧°C ។
នៅបណ្តាខេត្តខ្លះអាចមានភ្លៀងធ្លាក់ខ្សោយ។
៣៖ បណ្តាខេត្តនៅតំបន់មាត់សមុទ្រ៖
– សីតុណ្ហភាពអប្បបរមា មានពី ២៥-២៧°C
– សីតុណ្ហភាពអតិបរមា មានពី ៣៤-៣៦°C ។
នឹងអាចមានភ្លៀងធ្លាក់រាយប៉ាយ នៅក្នុងកម្រិតពីតិចទៅបង្គួរ ។
ក្រសួងក៏បានអំពាវនាវសូមប្រជាពលរដ្ឋប្រុងប្រយ័ត្នចំពោះបាតុភូតផ្គរ រន្ទះ ខ្យល់កន្ត្រាក់ នឹងការកើនឡើងនូវ សីតុណ្ហភាពអប្បបរមា និងអតិបរមានៅបណ្តាខេត្តភាគពាយ័ព្យរហូតទៅដល់ ៤០-៤១°C នាថ្ងៃទី៨-៩-១០ ខែឧសភា៕
ភ្នំពេញ ៖ រយៈពេលពេញ១ថ្ងៃ នៅថ្ងៃទី០៤ ខែឧសភា ឆ្នាំ២០២០នេះ នគរបាលចរាចរណ៍ទូទាំងប្រទេស បានរកឃើញយានយន្តល្មើស ចំនួន១៨៤៤គ្រឿង ក្នុងនោះមានម៉ូតូ១៤០៤គ្រឿង និងរថយន្ត ៤៤០គ្រឿង។ នេះបើតាមរបាយការណ៍ របស់អគ្គស្នងការដ្ឋាននគរបាលជាតិ។
សម្រាប់បទល្មើសម៉ូតូ គឺភាគច្រើនមិនពាក់មួកសុវត្ថិភាព, អត់កញ្ចក់, បើកបញ្ជ្រាស និងល្មើសផ្សេងៗ។ ដោយឡែកបទល្មើសរថយន្ត ភាគច្រើនអត់ខ្សែក្រវាត់ បើកលើសល្បឿន ផ្ទុកលើសចំណុះ និងអត់ផ្លាកលេខជាដើម។
បើសរុបយានយន្តល្មើសទាំងរយៈពេល៤ថ្ងៃ (ថ្ងៃទី០១-០៤ ខែឧសភា) មានចំនួន ៩៧៥១គ្រឿង ក្នុងនោះម៉ូតូចំនួន ៧៤៩៤គ្រឿង និងរថយន្ត២២៥៧គ្រឿង៕
ភ្នំពេញ ៖ បើទោះបីជាជំងឺកូវីដ ១៩នេះ បានផ្ទុះឡើងរយៈពេលជិតកន្លះឆ្នាំមកហើយក្ដី តែខាងវេជ្ជសាស្ត្រនានា រួមទាំងអង្គការសុខភាពពិភពលោកនៅតែមិនទាន់រកឃើញថ្នាំវ៉ាក់សាំងសម្រាប់ចាក់ការពារជំងឺនេះនៅឡើយ វាហាក់ដូចជានៅឆ្ងាយបន្តិច ។ 
បើតាមតំណាងអង្គការសុខភាពពិភពលោកប្រចាំកម្ពុជាលោកស្រីវេជ្ជបណ្ឌិត Li Ailen បានមានប្រសាសន៍ថា ថ្វីត្បិតតែជំងឺកូវីដ ១៩នេះ មានការធូរស្រាលនៅបណ្ដាប្រទេសមួយចំនួន នៅតែមានស្ថានភាពធ្ងន់ធ្ងរសម្រាប់ប្រទេសមួយចំនួនទៀតក្ដី តែចំពោះវ៉ាក់សាំងសម្រាប់ការពារជំងឺកូវីដ ១៩នេះនៅឡើយ ។
លោកស្រីបន្តថា សម្រាប់វ៉ាក់សាំងជំងឺកូវីដ១៩នេះ វាមិនអាចចេញនៅពេលឆាប់ៗនេះទេ វានឹងអាចចេញនៅរយៈពេល១២ខែ ទៅ១៨ខែ ក៏ប៉ុន្តែពេលវេលានេះ អាចនឹងមានការប្រែប្រួលទៅតាមស្ថានភាពជាក់ស្ដែង ។
គួរបញ្ជាក់រហូតមកដល់ពេលនេះ អ្នកឆ្លងមេរោគកូវីដ១៩ ទូទាំងពិភពលោក មានជាង៣លាននាក់ ក្នុងនោះអាមេរិកមានអ្នកផ្ទុកកូវីដ ១៩ច្រើនជាងគេ ខណៈប្រទេសចិនទីដែលផ្ទុះជំងឺកូវីដ ១៩ បានធ្លាក់ចុះអ្នកឆ្លងពីចំណាត់ថ្នាក់ប្រទេសទាំង១០ ឆ្លងកូវីដ ។សម្រាប់កម្ពុជា គិតត្រឹមថ្ងៃទី០៤ ឧសភា ២០២០ មានអ្នកផ្ទុកកូវីដ១៩ ចំនួន១២២នាក់ ក្នុងនោះមានអ្នកជាសះស្បើយសរុបចំនួន១២០នាក់ និងកំពុងសម្រាកព្យាបាល២នាក់ និងមិនមានករណីស្លាប់នោះទេ ៕
ភ្នំពេញ ៖ លោក កឹម សុខា និងភរិយារបស់លោកបានផ្ញើសារជូនសម្តេច ហ៊ុន សែន នាយករដ្ឋមន្ត្រីកម្ពុជាដោយ បានសម្តែងសមានចិត្តចូលរួមរំលែកទុក្ខចំពោះមរណភាពរបស់ ឧបាសិកា ប៊ុន ស៊ាងលី ដែលត្រូវជាម្តាយបង្កើតសម្តេច ប៊ុន រ៉ានី ប្រធានកាកបាទ ក្រហមកម្ពុជា។
សូមជម្រាបថា សាររំលែកទុក្ខខាងលើរបស់លោក កឹម សុខា ត្រូវបានបង្ហោះលើ ទំព័រហ្វេសប៊ុកនៅម៉ោង៩កន្លះ នាព្រឹកថ្ងៃទី៤ ខែឧសភា ឆ្នាំ២០២០នេះ។
លោក កឹម សុខា បានសរសេរទៅកាន់សម្តេច ហ៊ុន សែន ថា៖«មរណភាពរបស់មហា ឧបាសិកា ប៊ុន ស៊ាងលី គឺជាការបាត់បង់មាតា ជីដូន ដែលជាអ្នកមានគុណដ៏ធំធេង ដែលបានចិញ្ចឹមបីបាច់ថែរក្សា និងអប់រំទូន្មានកូនចៅប្រកបដោយព្រហ្មវិហារធម៌»។លោកបន្ត ថា៖«ក្នុងឱកាសប្រកបដោយសមានទុក្ខដ៏ក្រៀមក្រំនេះ ភរិយាខ្ញុំ និងរូបខ្ញុំ សូមចូលរួមរំលែក នូវមរណទុក្ខដោយសេចក្តីសោកស្តាយជាមួយសម្តេចអគ្គមហាសេនាបតីតេជោ សម្តេចកិត្តិព្រឹទ្ធបណ្ឌិត និងបុត្រា បុត្រី ចៅ ចៅទួត ព្រមទាំងសាច់ញាតិក្រុមគ្រួសារ ទាំងអស់នៃសព ដោយសេចក្តីសង្វេគក្រៃលែង»។
លោក កឹម សុខា ក៏បានបញ្ចប់នូវឃ្លាចុងក្រោយថា លោក បួងសួងសូមឲ្យដួងវិញ្ញាណក្ខន្ធ របស់ឧបាសិកា ប៊ុន ស៊ាងលី បានទៅសោយសុខក្នុងសុគតិភព ៕
ចិន ៖ គណៈកម្មការសុខាភិបាលចិន បានប្រកាសរកឃើញអ្នកផ្ទុកវីរុសកូរ៉ូណាថ្មី ចំនួន ៣នាក់ប៉ុណ្ណោះកាលពីថ្ងៃអាទិត្យ ហើយក្នុងចំណោមករណីឆ្លងថ្មីទាំងអស់ ជាករណីឆ្លងនាំចូលពីខាងក្រៅ។ នេះបើយោងតាមប្រភពពី CNA។
ចំនួនអ្នកឆ្លងវីរុសសរុបនៅចិនបានកើនឡើងដល់ ៨២.៨៨៩ករណី ហើយមិនមានករណីស្លាប់ថ្មីនោះឡើយ។ ចំនួនអ្នកស្លាប់ដោយសារវីរុសនេះមានចំនួន ៤.៦៣៣នាក់ដដែល។
សូមជម្រាបថា COVID-19 បានផ្ទុះឡើងដំបូងចេញពីទីក្រុងវូហាន ប្រទេសចិនកាលពីចុងឆ្នាំ ២០១៩ ហើយរហូតមកដល់ពេលនេះ វាបានឆក់យកជីវិតមនុស្សច្រើនជាង ២៥០.០០០នាក់ និងឆ្លងទៅកាន់មនុស្សជាង ៣.៥០០.០០០នាក់ជុំវិញពិភពលោក៕
ភ្នំពេញ ៖ ក្រសួងពាណិជ្ជកម្មនៅថ្ងៃទី០៤ ខែឧសភានេះ បានចេញសេចក្តីជូនដំណឹងស្តីពីតម្លៃលក់រាយប្រេងឥន្ធនៈថ្មី ដែលត្រូវអនុវត្ត ពីថ្ងៃទី១ ដល់ថ្ងៃទី១៥ ខែឧសភា ឆ្នាំ២០២០ ក្នុងនោះប្រេងសាំងធម្មតា៖ ២២៥០រៀលក្នុងមួយលីត្រុ, ប្រេងម៉ាស៊ូត៖ ២១៥០រៀល ក្នុងមួយលីត្រ៕
