ភ្នំពេញ ៖ ក្រសួង​ការងារ និង​បណ្តុះបណ្តាល​វិជ្ជាជីវៈ​នៅ​ថ្ងៃទី​២៨ ខែតុលា ឆ្នាំ​២០១៩ នេះ បានចេញ​សេចក្ដីជូនដំណឹង​ស្ដីពី​ថ្ងៃ​ឈប់សម្រាក​របស់​កម្មក​រ​និយោជិត​ទាំងអស់​ដោយមាន​ប្រាក់​ឈ្នួល​ក្នុងឱកាស​ព្រះរាជ​ពិធីបុណ្យ​អុំទូក បណ្តែតប្រទីប និង​សំពះ​ព្រះ​ខែ អក អំបុក ខាងមុខនេះ រយៈពេល​០៤​ថ្ងៃ គឺ​ថ្ងៃទី​១០-១១-១២ និង​ថ្ងៃទី​១៣ ខែវិច្ឆិកា ឆ្នាំ​២០១៩ ជំនួស​ឲ្យ​ថ្ងៃទី​១០ ដែល​ត្រូវចំ​ថ្ងៃអាទិត្យ​៕

ភ្នំពេញ ៖ ប្រធានាធិបតី ហុងគ្រី លោក យ៉ាណូស អាឌ័រ នៅរសៀលម្សិលមិញ ក៏បានជួបពិភាក្សាការងារជាមួយ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅវិមានសន្តិភាព។ លោកប្រធានាធិបតី បញ្ជាក់ថា ហុងគ្រី នឹងបញ្ជូនអ្នកជំនាញផ្នែកទឹកស្អាត និងអ្នកជំនាញផ្នែកកែច្នៃសំរាម ឲ្យមកជួយអភិវឌ្ឍកម្ពុជា។

ក្នុងជំនួបនេះលោកប្រធានាធិបតីហុងគ្រី បានមានប្រសាសន៏ថា នេះជាលើកទី៣ ហើយដែលឯកឧត្តមបានជួបជាមួយ សម្ដេចតេជោ តែក្នុងរយៈពេល ៦ខែប៉ុណ្ណោះ ហើយជំនួបនេះ គឺជាជំនួបដ៏ពិសេស ។ ក្នុងដំណើរទស្សនកិច្ចរបស់លោកមកកាន់កម្ពុជានៅពេលនេះ លោក មិននឹកស្មានដល់ថា ភ្នំពេញមានការអភិវឌ្ឍន៍រីកចម្រើនយ៉ាងឆាប់រហ័ស គួរជាទីចាប់អារម្មណ៍បែបនេះទេ។ នេះបើតាម លោក អ៊ាង សុផល្លែត ជំនួយការផ្ទាល់សម្តេចតេជោ ហ៊ុន សែន បញ្ជាក់ប្រាប់អ្នកកាសែតនៅក្រោយជំនួប។ លោក ប្រធានាធិបតីថា ដើម្បីចូលរួមអភិវឌ្ឍកម្ពុជាបន្តទៀត ឯកឧត្តម នឹងបញ្ជូនអ្នកជំនាញការរបស់ហុងគ្រីដើម្បីមកជួយកម្ពុជាយើងក្នុងការសិក្សាលើបញ្ហាទឹកស្អាត លើបញ្ហាសំរាមទាំងសំរាមសំណល់រឹង និងសំណល់រាវ ដែលជាបញ្ហាពាក់ព័ន្ធនឹងការអភិវឌ្ឍទីក្រុង។ អ្នកជំនាញរបស់ហុងគ្រី នឹងផ្ដល់នូវបច្ចេកវិទ្យា និងដំណោះស្រាយ បញ្ហាទឹកស្អាត បញ្ហាសំណល់រឹង សំណល់រាវនៅកម្ពុជា និងដើម្បីជំរុញការអភិវឌ្ឍន៍កម្ពុជារយៈពេលវែង ។ ឯ.ឧ បញ្ជាក់ថា ហុងគ្រី នៅតែបន្តគាំទ្រកម្ពុជា និងស្នើសុំឱ្យមិនឱ្យមានការដកហូត ប្រព័ន្ធអនុគ្រោះពន្ធ។

សម្ដេចតេជោ បានជម្រាបជូនឯកឧត្តមប្រធានាធិបតី ថា កម្ពុជាមានការបែកបាក់គ្នាយ៉ាងយូរឆ្នាំ ប៉ុន្តែកម្ពុជាទទួលបានសុខសន្តិភាព និងស្ថេរភាពពេញលេញថែមទាំងមានកំណើនសេដ្ឋកិច្ច មិនតិចជាង៧ភាគរយក្នុងរយៈពេលជាង២០ឆ្នាំកន្លងមកនេះ។

សម្ដេចតេជោ អរគុណហុងគ្រី ដែលបានផ្ដល់នូវការគាំទ្រដល់កម្ពុជា ជាពិសេសលើឯកសារ ដែលបានចុះហត្ថលេខាកន្លងមកនោះគឺ គម្រោងតេជោភូមិ១០០ និងផែនការសកម្មភាពដោះមីន ដើម្បីជំរុញនៅកម្ពុជាដែលជាប្រទេសគ្មានមីននៅឆ្នាំ ២០២៥ ជាមួយនឹងការផ្ដល់អាហារូបករណ៍ជូនដល់សិស្សកម្ពុជាចំនួន១៥នាក់ក្នុងមួយឆ្នាំ។ ពាក់ព័ន្ធនឹងបញ្ហាទឹក និងសំរាមសម្ដេចតេជោ បានស្នើសុំឲ្យភាគីហុងគ្រី បញ្ជូនអ្នកជំនាញ ដើម្បីមកធ្វើការសិក្សា និងចូលរួមសហការជាមួយមន្ត្រីកម្ពុជា លើការដោះស្រាយទឹកស្អាត បញ្ហាសំណល់រឹង និងសំណល់រាវនៅទីក្រុងភ្នំពេញ និងទីក្រុងផ្សេងទៀត។ បញ្ហាសំរាមនៅតាមដងសមុទ្រ និងតាមដងទន្លេមេគង្គ សម្ដេចតេជោ បានផ្ដល់ការងារនេះជូនដល់ក្រសួងបរិស្ថានដើ ម្បីបន្តការពិភាក្សាជាមួយភាគីហុងគ្រី ក្នុងការបញ្ជូនប្រតិភូអ្នកជំនាញការហុងគ្រីមកកម្ពុជា នៅពេលឆាប់ៗខាងមុខ៕

ភ្នំពេញ ៖ នៅថ្ងៃទី ២៩ ខែតុលា ឆ្នាំ ២០១៩ នេះ កាលពី១៥ឆ្នាំមុន គឺជាថ្ងៃនៃការយាងសោយរាជសម្បត្តិរបស់ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈ ដ៏ខ្ពង់ខ្ពស់បំផុត ។ ខាងក្រោមនេះ គឺជាព្រះរាជ្យជីវប្រវត្តិសង្ខេប របស់ព្រះអង្គ។

*** កុមារភាព និងការសិក្សា

ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ប្រសូត នៅថ្ងៃទី១៤ ខែឧសភា ឆ្នាំ១៩៥៣ នារាជធានីភ្នំពេញ ជាព្រះរាជបុត្រារបស់ ព្រះករុណា ព្រះបាទ សម្ដេចព្រះនរោត្ដម សីហនុ និងព្រះមហាក្សត្រី មុនិនាថ សីហនុ ។ ព្រះអង្គមានព្រះរៀម និងព្រះអនុជ មាតាទីទៃសរុបចំនួន ១៣ អង្គ ប៉ុន្តែព្រះអង្គមានព្រះអនុជបង្កើត តែមួយអង្គប៉ុណ្ណោះ គឺសម្តេចនរោត្តម នរិន្ទ្រពង្ស ។

ពីឆ្នាំ១៩៥៩ ដល់ឆ្នាំ១៩៦២ ព្រះអង្គបានចូលសិក្សា នៅសាលាបឋមសិក្សា នរោត្ដម និងវិទ្យាល័យដេកាត នៅរាជធានីភ្នំពេញ ។ បន្ទាប់មក ព្រះអង្គ ត្រូវបានព្រះរាជបិតា បញ្ជូនទៅទីក្រុងប្រាគ ប្រទេសឆេកូស្លូវ៉ាគី នាឆ្នាំ១៩៦២ ។ នៅទីនោះ ព្រះអង្គបានសិក្សាផ្នែកតន្ត្រី និងរបាំបុរាណ រហូតដល់ឆ្នាំ១៩៧៥ ។

ព្រះអង្គ ស្ទាត់ជំនាញខាងភាសាសាស្ត្រ ដោយទ្រង់ចេះភាសាបារាំង និងភាសាឆែក យ៉ាងស្ទាត់ជំនាញ ហើយព្រះអង្គ ក៏ជាក្សត្រខ្មែរ តែមួយព្រះអង្គគត់ ដែលចេះភាសាឆែក ។ ទីទៃពីនេះ ទ្រង់ក៏អាចប្រាស្រ័យភាសាអង់គ្លេសនិងរុស្សីបានយ៉ាងប្រសើរផងដែរ។

អំឡុងរដ្ឋប្រហារ ដឹកនាំដោយលោក សេនាប្រមុខ លន់ នល់ នាឆ្នាំ១៩៧០ ព្រះអង្គគង់នៅប្រទេសឆេកូស្លូវ៉ាគី ។ ក្នុងឆ្នាំ១៩៧៥ ព្រះអង្គ បានយាងចាកចេញ ពីទីក្រុងប្រាគ ប្រទេសឆេកូស្លូវ៉ាគី និងបានចាប់ផ្តើមសិក្សា វិស័យភាពយន្ត នៅប្រទេសកូរ៉េខាងជើង ។

លុះដល់ឆ្នាំ១៩៧៧ ព្រះអង្គ បានយាងមាតុភូមិនិវត្តន៍មកកាន់ប្រទេសកម្ពុជាវិញ ។ ភ្លាមៗនោះ ខ្មែរក្រហមដែលកំពុងកាន់អំណាចនៅកម្ពុជា បានប្រឆាំងនឹងរាជានិយម ក៏បានឃុំព្រះអង្គនៅក្នុងព្រះបរមរាជវាំង ជាមួយព្រះរាជវង្សានុវង្សដទៃទៀត រហូតដល់ ឆ្នាំ១៩៧៩ ជាពេលដែលរបបខ្មែរក្រហមត្រូវបានផ្តួលរំលំ ។

*** ការបំពេញការងារ និងព្រះគោរមងារ

ឆ្នាំ១៩៨១ ព្រះអង្គ បានយាងទៅកាន់ទីក្រុងប៉ារីស ដើម្បីបង្ហាត់បង្រៀន របាំបាឡេ និងបានទទួលព្រះតួនាទី ជាប្រធានសមាគមរបាំខ្មែរ។ ព្រះអង្គ គង់នៅប្រទេសបារាំងជិត ២០ ឆ្នាំ ប៉ុន្តែជាញឹកញាប់ ព្រះអង្គក៏យាងទៅទីក្រុងប្រាគ ជាទីដែលព្រះអង្គបានចំណាយពេលជាច្រើន កាលព្រះអង្គ នៅវ័យក្មេងផងដែរ ។

ឆ្នាំ១៩៩៣ ព្រះអង្គ ត្រូវបានតែងតាំង ជាប្រតិភូកម្ពុជា ប្រចាំអង្គការយូណេស្កូ ដែលមានទីស្នាក់ការ នៅទីក្រុងប៉ារីស ប្រទេសបារាំង ជាទីដែលព្រះអង្គ មានប្រជាប្រិយភាពចំពោះការតស៊ូ ធ្វើការយ៉ាងស្វិតស្វាញ និងភក្តីភាព ចំពោះវប្បធម៌ខ្មែរ ។

ឯកសារនានា បានអះអាងថា ព្រះអង្គ ធ្លាប់បានបដិសេធចំពោះការតែងតាំង ជាឯកអគ្គរាជទូតខ្មែរ ប្រចាំប្រទេសបារាំង ប៉ុន្តែឯកសារទាំងនោះ មិនបានបញ្ជាក់ អំពីកាលបរិច្ឆេទ និងហេតុអ្វីឡើយ .

ព្រះអង្គ ទទួលបានព្រះគោរមងារ ជាស្ដេចក្រុមឃុន នាថ្ងៃទី១ ខែកុម្ភៈ ឆ្នាំ១៩៩៤ ហើយត្រូវបានដំឡើងជាសម្ដេចព្រះបរមនាថ នាថ្ងៃទី៣១ ខែសីហា ឆ្នាំ ២០០៤ ។

***  ការយាងសោរាជ្យសម្បត្តិ និងគ្រឿងឥស្សរិយយស

បន្ទាប់ពីបានសោយរាជ្យ ជាលើកទី២ អស់រយៈពេល ១១ ឆ្នាំមក ព្រះករុណា ព្រះបាទ សម្ដេចព្រះនរោត្តម សីហនុ បានប្រកាសដាក់រាជ្យ នៅថ្ងៃទី៦ ខែតុលា ឆ្នាំ២០០៤ គឺជាការប្រកាសដាក់រាជ្យយ៉ាងភ្លាមៗ និងបង្កឱ្យមានការភ្ញាក់ផ្អើល ពីជនានុជន គ្រប់មជ្ឈដ្ឋាន ជាពិសេសនៅក្នុងសង្គមខ្មែរ ។មួយសប្តាហ៍ក្រោយមក ពោលគឺនៅថ្ងៃទី១៤ ខែតុលា ឆ្នាំ២០០៤ សម្ដេចព្រះបរមនាថ នរោត្តម សីហមុនី ត្រូវបានសមាជិកទាំង ៩ រូប នៃក្រុមប្រឹក្សារាជបល្ល័ង្ក ជ្រើសតាំងជាឯកច្ឆន្ទ ដើម្បីសោយរាជ្យ ជាព្រះមហាក្សត្រ នៃកម្ពុជា ស្នងព្រះបិតារបស់ព្រះអង្គ ។ ដោយហេតុនោះ ព្រះរាជពិធីរាជាភិសេកព្រះអង្គ ជាព្រះមហាក្សត្រ នៃព្រះរាជាណាចក្រកម្ពុជា បានប្រារព្ធឡើង ជាផ្លូវការ នៅក្នុងព្រះបរមរាជវាំង រាជធានីភ្នំពេញ នាថ្ងៃទី២៩ ខែតុលា ឆ្នាំ២០០៤។ ចាប់ពីពេលនោះមក ថ្ងៃទី ២៩ ខែតុលា បានក្លាយជាថ្ងៃសម្រាកសាធារណៈ ។

***  គ្រឿងឥស្សរិយយស

ព្រះអង្គទទួលបានគ្រឿងឥស្សរិយយស ព្រះរាជាណាចក្រកម្ពុជា ថ្នាក់មហាសេរីវឌ្ឍន៍ , គ្រឿងឥស្សរិយយស មុនីសារាភ័ណ្ឌ ថ្នាក់មហាសេរីវឌ្ឍន៍ , មន្ត្រីធំនៃកងពលកិត្តិយស នៃសាធារណរដ្ឋបារាំង និងមេដាយប្រាក់ នៃក្រុងប៉ារីស នៃសាធារណរដ្ឋបារាំង ៕

ខេត្តកំពង់ចាម ៖ កំលាំងអធិការនគរបាលស្រុកបាធាយបានឃាត់ខ្លួនបុរសម្នាក់បានធ្វើសកម្មភាពដុតបំផ្លិចបំផ្លាញទ្រព្យសម្បិត្តនិងគំរាមអារក សម្លាប់ជនរងគ្រោះជាម្ចាស់ផ្ទះ ដោយគ្មានមូលហេតុ។  អ្វីដែលហួសចិត្តទៀតនោះគឺជនសង្សយ័បានឆ្លើយប្រាប់សមត្ថកិច្ចនៅ ពេលឃាត់ខ្លួនថា (គាត់គ្មានគំនុំអ្វីជាមួយជនរងគ្រោះទេគឺវាចង់ធ្វើអីគឺធ្វើនឹងហើយ)។

លោក សំ ណាល់ អធិការនគរបាលស្រុកបាធាយបានអោយដឹងថា ករណីទំនើងហួសហេតុនេះគឺបានកើតឡើងនៅថ្ងៃទី២៧ខែតុលាឆ្នាំ វេលាម៉ោង៦ព្រឹកនៅផ្ទះឈួន ណារី ភូមិភ្នំធំ ឃុំជាលា ស្រុកបាធាយ  ខេត្តកំពង់ចាមដោយជនសង្ស័យឈ្មោះគុណ សាយ ភេទប្រុសអាយុ៣៣ឆ្នាំ មានទីលំនៅភូមិភ្នំធំ ឃុំជាលា ស្រុកបាធាយ ខេត្តកំពង់ចាម បានធ្វើសកម្មភាពយកសាំងចាក់ដុតទ្វារផ្ទះរបស់ឈ្មោះឈួន ណារីភេទស្រីអាយុ៣១ឆ្នាំ មានទីលំនៅភូមិឃុំកើតហេតុ បណ្តាលអោយឆេះរោលពីក្រៅ។  បន្ទាប់មកក៍បើកកញ្ចក់បង្អួចយកដបទឹកសុទ្ធដាក់សាំងដុតឆេះបោះ ចូលកណ្តាលផ្ទះតែពុំបណ្តាលអោយឆេះសំភារក្នុងផ្ទះទេម្ចាស់ផ្ទះពន្លត់ទាន់។

ប៉ូលិសបានបន្តថា ពេលនោះឈ្មោះ ឈួន ណារី បើកទ្វារផ្ឋះខាងក្រោយចេញយកទឹកមកបន្លត់ភ្លើងក៍ជួបនឹងឈ្មោះ គុណ សាយ ឈរកាន់កាំបិតខ្វែវចាំមាត់ទ្វារយារកាំបិត រកកាប់ឈ្មោះ ឈួន ណារី  តែឈ្មោះឈួន ណារីទាញទ្វារបិតវិញរួចក៍ស្រែកប្រាប់ប្តីរបស់ខ្លួន ឈ្មោះ សែម ចិន្តាដែលនៅខាងក្រៅផ្ទះ។ ពេលប្តីរបស់ខ្លួនឮដូច្នោះ គាត់ក៏រត់មកក្នុងផ្ទះ រួចបើកទ្វារចេញមកក្រៅ ឃើញឈ្មោះ គុណ សាយ កាន់កាំបិតខ្វែវដើរទៅផ្ទះរបស់វាវិញ ហើយស្រែកថាអញសម្លាប់ពួកឯងចោលមួយពូជ។    ប៉ូលិសបានបញ្ជាក់ថា ពេលទទួលបានព័ត៌មានភ្លាម កំលាំងជំនាញ ស្រុកនិងប៉ុស្តិ៍ចុះដល់កន្លែងកើតហេតុ បាននាំខ្លួនជនសង្ស័យមកកាន់ប៉ុស្តិ៍នគរបាលលរដ្ឋបាលជាលា ដើម្បីសាកសួរ។

នៅចំពោះមុខសមត្ថកិច្ច ឈ្មោះគុណ សាយបានឆ្លើយបែបឈ្លើយថា(វាគ្មានគំនុំអ្វីជាមួយម្ចាស់ផ្ទះទេ គឺវាចង់ធ្វើអី ធ្វើនឹងហើយ)។ ជនសង្ស័យ ប័ណ្ណ សន ឃាត់ខ្លួននៅអធិការដ្ឋាននគរបាលស្រុកបាធាយដើម្បីបំពេញសំណុំឯកសារតាមនីតិវិធី៕

ភ្នំពេញ ៖ សួនទឹកកំបូល ហ៊ីហោ សួនទឹកខេបបូឌាន វ៉ធើរ យ្យូប លេហ្សីរ ផាក មានការធ្វេសប្រហែស បណ្តាលឲ្យក្មេងប្រុសអាយុ៦ឆ្នាំម្នាក់លង់ទឹកស្លាប់ តែត្រូវបានថៅកែជនជាតិចិន លាក់បាំងព័ត៌មាន ប្រញាប់ដឹកសាកសពចេញ ប្រគល់ឲ្យគ្រួសារ ដោយមិនមានសហការជាមួយសមត្ថកិច្ច កាលពីល្ងាចថ្ងៃទី២៧ ខែតុលា ឆ្នាំ២០១៩ នៅក្នុងអាងទឹកកន្លែងលេង នៅសួនទឹកខាងលើ ក្នុងភូមិទួលសាម៉ សង្កាត់កំបូល ខណ្ឌកំបូល រហូតដល់ព្រឹកថ្ងៃទី២៨ ខែតុលា ឆ្នាំ២០១៩ ទើបបែកធ្លាយរឿង នាំគ្នាភ្ញាក់ផ្អើល ។

ក្មេងប្រុស ដែលស្លាប់ដោយសារការធ្វេសប្រហែសរបស់អ្នកគ្រប់គ្រង នៅកន្លែងខាងលើ អាយុ៦ឆ្នាំ ។ តាមប្រភពបានឲ្យដឹងថា នៅល្ងាចថ្ងៃទី២៧ ខែតុលា ម្សិលមិញ ក្មេងរងគ្រោះ បានទៅលេងសួនទឹកខាងលើ រួមជាមួយឪពុកម្តាយ តែដោយសារការធ្វេសប្រហែស ពីក្រុមគ្រួសារ ពីអ្នកគ្រប់គ្រងកន្លែងលេងខាងលើ ឪពុកម្តាយ រវល់តែសប្បាយ ហូបចុក ផឹកស៊ី ក្មេងប្រុសចុះទៅលេងទឹកអាង ណ្តាលឲ្យលង់ស្លាប់ ។

ក្រោយកើតហេតុភ្លាមៗ ជនជាតិចិន ជាម្ចាស់ទីតាំងដឹកយកសពក្មេងចេញ រួមទាំងក្រុមគ្រួសារ ទៅបាត់តែម្តង ដោយមិនបានរាយការណ៍ទៅអាជ្ញាធរ សមត្ថកិច្ចឡើយ ។

តែបើតាមប្រជាពលរដ្ឋ ដែលចេញចូលទីតាំងសួនទឹកកម្សាន្តខាងលើ បានឲ្យដឹងថា សួនទឹករបស់ជនជាតិចិនខាងលើ ចូលហ៊ុនគ្នា៦នាក់ សុទ្ធតែជនជាតិចិន មានស្ត្រីអ្នកបកប្រែម្នាក់ និងមានសន្តិសុខ យាមច្រកមុខ តែប៉ុណ្ណឹងទេ ដោយឡែក កន្លែងលេងទឹក ពុំមានបុគ្គលិក ប្រចាំការ មើលការខុសត្រូវ ផ្តល់សុវត្តិភាព ក្មេងត្រូវចុះលេងទឹកក្នុងអាងឡើយ ឲ្យតែបង់ថ្លៃ ចូលហើយ ជាការស្រេច ក្មេង ចុះក្នុងអាងតាមចិត្ត ដែលប្រឈមនឹងគ្រោះថ្នាក់ ដោយប្រការណាមួយ ដូចក្មេងប្រុស៦ឆ្នាំ ខាងលើអិញ្ចឹង ។

ក្រោយពីបែកធ្លាយខ្ចរខ្ចាយរឿង មានក្មេងលង់ទឹកស្លាប់ក្នុងអាង កន្លែងលេងទឹក រួចមក ម្ចាស់ទីតាំង មិនបានរាយការណ៍ប្រាប់អាជ្ញាធរ សមត្ថកិច្ច ឲ្យដឹងឡើយ ។ ហើយជុំវិញករណីក្មេងលង់ទឹកស្លាប់ក្នុងអាង នៅសួនទឹកកំបូលខាងលើ នៅព្រឹកថ្ងៃទី២៨ ខែតុលា ឆ្នាំ២០១៩នេះ អ្នកសារព័ត៌មាន ទៅសាកសួររឿងអង្គហេតុ ដល់ចំណុចខាងលើ តែសន្តិសុខ ឆ្លើយថាមិនដឹង សួរទៅសមត្ថកិច្ច ក៏ឆ្លើយមិនដឹងទៀត ព្រោះគ្មានអ្នករាយការណ៍ ប្តឹងផ្តល់ ថៅកែម្ចាស់សួនទឹកលាក់បាំងព័ត៌មាន៕

ភ្នំពេញ ៖ នៅថ្ងៃសៅរ៍-អាទិត្យចុងសប្តាហ៍នេះ មហាព្រឹត្តិការណ៍ដ៏ធំប្រចាំឆ្នាំគឺ ៖ “ពិព័រណ៍ការងារ និងផលិតភាពជាតិឆ្នាំ២០១៩” នឹងត្រូវបានរៀបចំឡើងជាទីកន្លែងជួបជុំគ្នាដោយងាយស្រួលសម្រាប់និយោជក អ្នកផ្តល់ការអប់រំបណ្តុះបណ្តាល អ្នកស្វែងរកការងារធ្វើ និងកម្មករនិយោជិតក្នុងការទទួលបានឱកាសការងារ ជ្រើសរើសបុគ្គលិក និងចែករំលែកព័ត៌មានទីផ្សារការងារ។

បន្ថែមលើនេះ ព្រឹត្តិការណ៍ពិព័រណ៍នឹងនាំមកនូវសិក្ខាសាលាផលិតភាពជាតិក្រោមប្រធានបទ៖ “យុទ្ធសាស្ត្រផលិតភាពសម្រាប់កម្ពុជា-ការត្រួសត្រាយផ្លូវសម្រាប់ការប្រកួតប្រជែងជាសកល” ដែលនឹងចែករំលែកបទពិសោធន៍ដោយវាគ្មិនជាតិ និងអន្តរជាតិល្បីៗស្របពេលនឹងព្រឹត្តិការណ៍ពិព័រណ៍នេះផងដែរ។

សន្និសីទសារព័ត៌មានស្តីពីពិព័រណ៍ការងារ និងផលិតភាពជាតិ ឆ្នាំ២០១៩ ត្រូវបានរៀបចំ នាព្រឹកថ្ងៃទី២៨ ខែតុលា នេះ ដើម្បីផ្សព្វផ្សាយជាផ្លូវការអំពីដំណើរការនៃការរៀបចំពិព័រណ៍នាថ្ងៃទី២-៣ វិច្ឆិកាខាងមុខនេះ។ ផ្តល់ព័ត៌មានទៅកាន់អ្នកសារព័ត៌មាន និងតំណាងក្រុមហ៊ុនអញ្ជើញចូលរួមតាំងបង្ហាញជាច្រើនរូបក្នុងឱកាសនោះរួមមានវត្តមាន លោក ហៃ ហ៊ុនឡេង ប្រធានទីភ្នាក់ងារជាតិមុខរបរ និងការងារ, លោក សុំ មនោរម្យ ប្រធានលេខាធិការដ្ឋាន សហភាពសហព័ន្ធយុវជនកម្ពុជា រាជធានីភ្នំពេញ និងលោក កាំង ម៉ូនីកា អគ្គលេខាធិការរង សមាគមរោងចក្រកាត់ដេរនៅកម្ពុជា (GMAC)។

គួរបញ្ជាក់ថា ពិព័រណ៍នេះ ត្រូវបានរៀបចំដោយទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវៈ ក្រោមកិច្ចសហការជាមួយសហភាពសហព័ន្ធយុវជនកម្ពុជារាជធានីភ្នំពេញ និងសមាគមរោងចក្រកាត់ដេរនៅកម្ពុជា (GMAC) ដោយមានរយៈពេលពីរថ្ងៃគឺ ថ្ងៃសៅរ៍-អាទិត្យទី០២-០៣ ខែវិច្ឆិកា ឆ្នាំ២០១៩ ចាប់ពីម៉ោង៨ព្រឹក ដល់៨យប់នៅអគារពាណិជ្ជកម្ម និងពិព័រណ៍កោះពេជ្រ។

ឱកាសការងារសរុបជាង២ម៉ឺននឹងត្រូវបានផ្តល់ដោយក្រុមហ៊ុន/សហគ្រាសធំៗជាង១៥០មកពីវិស័យសំខាន់ៗដូចជា៖ ធនាគារ និងគ្រឹះស្ថានមីក្រូហិរញ្ញវត្ថុ, សំណង់, សណ្ឋាគារនិងបដិសណ្ឋារកិច្ច,ទូរគមនាគមន៍,ការអប់រំនិងបណ្តុះបណ្តាលបច្ចេកទេសវិជ្ជាជីវៈ, កម្មន្តសាល និងភ្នាក់ងារជ្រើសរើសឯកជននៅក្នុងបញ្ជរសរុបចំនួន៣០០។

ក្រៅពីទទួលបានឱកាសការងាររាប់ម៉ឺនកន្លែង អ្នកចូលរួមនឹងទទួលបានព័ត៌មានពីផែនការ តម្រូវការ និងគោលនយោបាយក្នុងការជ្រើសរើសកម្លាំងពលកម្មនាពេលបច្ចុប្បន្ន និងអនាគត កម្មវិធីសិក្សា អាហារូបករណ៍ វគ្គសិក្សា និងកម្មវិធីអភិវឌ្ឍជំនាញ។

ពិព័រណ៍ការងារ និងផលិតភាពជាតិឆ្នាំ២០១៩ គឺជាការជំរុញយន្តការវេទិកាការងាររបស់រាជរដ្ឋាភិបាលកម្ពុជាដូចបានចែងក្នុងយុទ្ធសាស្ត្រចតុកោណដំណាក់កាលទី៤ ដើម្បីលើកកម្ពស់វិស័យការងារ និងព័ត៌មានទីផ្សារការងារនៅកម្ពុជាជាពិសេសសំដៅផ្តល់ ឱកាសទូលំទូលាយដល់កម្លាំងពលកម្មទាំងមានជំនាញ និងមិនមានជំនាញឲ្យទទួលបានការងារកាន់តែប្រសើរចំណេញពេលវេលាកាត់បន្ថយចំណាយ និងទទួលបានប្រាក់ចំណូលខ្ពស់។

លើសពីនេះ ពិព័រណ៍ការងារ និងផលិតភាពជាតិ ក៏រួមចំណែកកាត់បន្ថយគម្លាតរវាងការផ្គត់ផ្គង់ និងតម្រូវការជំនាញនៅក្នុងទីផ្សារការងារព្រមទាំងបង្កភាពងាយស្រួលដល់យុវជនដែលត្រូវឈានចូលទីផ្សារការងារក្នុងការទទួលបាការងារបន្ទាប់ពីបញ្ចប់ការសិក្សានៅកម្រិតឧត្តមសិក្សា ឬជំនាញបច្ចេកទេស និងវិជ្ជាជីវៈ។ ពិព័រណ៍ដ៏ធំនេះ ត្រូវបានរំពឹងថាមានអ្នកចូលរួមទស្សនាជាង ៣ម៉ឺននាក់ ដែលភាគច្រើនជាសិស្ស-និស្សិត យុវជន អ្នកស្វែងរកការងារ និងកម្មករនិយោជិតពីគ្រប់វិស័យ។

ដូច្នេះដើម្បីទទួលបានឱកាសការងារល្អៗ និងការយល់ដឹងអំពីការបង្កើនផលិតភាពសូមយុវជន សិស្ស-និសិ្សតអ្នកស្វែងរកការងារធ្វើនិងកម្មករនិយោជិតទាំងអស់ចូលរួមទស្សនា និងកុំភ្លេចយកប្រវត្តិរូបសង្ខេប (CV) មកជាមួយដើម្បីដាក់ពាក្យស្នើសុំការងារដោយផ្ទាល់ជាមួយនិយោជក ដែលកំពុងត្រូវការជ្រើសរើសកម្លាំងពលកម្ម៕

ភ្នំពេញ ៖ រសៀល ថ្ងៃទី២៨ ខែតុលា ឆ្នាំ២០១៩នេះ លោក យ៉ាណូស អាឌ័រ (Janos Ader) ប្រធានាធិបតីនៃសាធារណរដ្ឋហុងគ្រីនឹងមានជំនួបពិភាក្សាជាមួយ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅវិមានសន្តិភាព។

តាមការប្រកាសរបស់ក្រសួងការបរទេសកម្ពុជា បានឱ្យដឹងថា នៅក្នុងជំនួបនោះ នឹងមានកិច្ចសហប្រតិបត្តិការទ្វេភាគីលើវិស័យជាច្រើន រួមទាំងបញ្ហាតំបន់ និងអន្តរជាតិដែលជាការយកចិត្តទុកដាក់រួម នឹងត្រូវបានលើកយកមកពិភាក្សា។

ក្រសួងការបរទេស បានបញ្ជាក់ថា៖ ទស្សនកិច្ចផ្លូវរដ្ឋលើកដំបូងមកកាន់កម្ពុជារបស់លោក យ៉ាណូស អាឌ័រ មកកាន់កម្ពុជា នឹងក្លាយជាព្រឹត្តិការណ៍ដ៏សំខាន់មួយក្នុងទំនាក់ទំនងទ្វេភាគីកម្ពុជា-ហុងគ្រី ហើយនឹងរួមចំណែកយ៉ាងសំខាន់ដល់ការពង្រឹងបន្ថែមទៀតនូវចំណងមិត្តភាព និងសាមគ្គីភាព ក៏ដូចជាបង្កើនវិសាលភាពនិងជម្រៅនៃកិច្ចសហប្រតិបត្តិការរវាងប្រទេសទាំងពីរ.

សូមជម្រាបថា ប្រធានាធិបតីនៃសាធារណរដ្ឋហុងគ្រី និងភរិយាបានអញ្ជើញមកដល់កម្ពុជាហើយ នៅយប់ថ្ងៃអាទិត្យម្សិលមិញនេះ ដើម្បីបំពេញទស្សនកិច្ចផ្លូវរដ្ឋ រយៈពេល៤ថ្ងៃ ចាប់ពីថ្ងៃទី២៧ ដល់ ៣០ ខែតុលា ឆ្នាំ២០១៩ តាមការអញ្ជើញរបស់ព្រះមហាក្សត្រកម្ពុជា៕

​ភ្នំពេញ ៖ ក្រសួង​ធនធានទឹក និង​ឧតុនិយម នៅ​ព្រឹក​ថ្ងៃទី​២៨ ខែតុលា ឆ្នាំ​២០១៩​នេះ បានចេញ​សេចក្ដីជូនដំណឹង​បន្ថែម​ស្តីពី​ស្ថានភាព​អាកាសធាតុ​នៅ​កម្ពុជា ចាប់​ពីថ្ងៃ​ទី​១ ដល់​ថ្ងៃទី​៧ ខែវិច្ឆិកា បណ្ដា​រាជធានី ខេត្ត​នានា​នឹងមាន​ភ្លៀង​ធ្លាក់​រាយ​ប៉ោយ​ជា​បន្តបន្ទាប់​ក្នុង​កម្រិត​ ៖