ភ្នំពេញ ៖ នារសៀលថ្ងៃទី៣០ តុលានេះ សម្ដេចតេជោ ហ៊ុន សែន នាយករដ្ឋមន្ត្រី បានអនុញ្ញាតឱ្យ ឯកឧត្តម ឧត្តមសេនីយ៍ឯកបម្រុង ផាន វ៉ាន់ហ្សាង (Phan Van Giang) អនុរដ្ឋមន្ត្រី និងជាប្រធានអគ្គសេនាធិការនៃកងទ័ពប្រជាជនវៀតណាមជួបសំដែងការគួរសម នៅវិមានសន្តិភាព។ ឯកឧត្តម ឧត្តមសេនីយ៍ឯកបម្រុង ថា កម្ពុជា និងវៀតណាមនឹងធ្វើសមយុទ្ធសង្គ្រោះរួមគ្នា នៅខែធ្នូខាងមុខ។

លោក អ៊ាង សុផល្លែត ជំនួយការសម្ដេចតេជោបានឲ្យដឹងថា ក្នុងជំនួបនេះ លោកផាន់ វ៉ាន់ហ្សាង បញ្ជាក់ជូនសម្តេចតេជោថា កិច្ចសហប្រតិបត្តិការរវាងក្រសួងការពារជាតិ និងក្រសួងការពារជាតិទាំងពីរ គឺបានប្រព្រឹត្តទៅយ៉ាងល្អប្រសើរ ជាពិសេសលើការរៀបចំសមយុទ្ធសង្គ្រោះរួមគ្នាពេលមានគ្រោះមហន្តរាយ ដោយគ្រោងនឹងប្រព្រឹត្តទៅនៅខែធ្នូខាងមុខ។ ការថែរក្សាសន្តិសុខនិងសណ្ដាប់ធ្នាប់តាមព្រំដែន និងការស្វែងរកអដ្ឋិធាតុរួមជាមួយនឹងការហ្វឹកហាត់បណ្ដុះបណ្ដាលនាយទាហាន សុទ្ធសឹងជាកិច្ចសហប្រតិបត្តិការ នៃក្រសួងទាំងពីរអនុវត្ត។ សម្ដេច បានបង្ហាញនូវការរីករាយ ជាមួយនឹងទំនាក់ទំនងរវាងកងទ័ពទាំងពីរ ដែលបាននាំមកនូវផលប្រយោជន៍ជូនដល់ប្រជាជនជាពិសេសប្រជាជនដែលកំពុងតែរស់នៅតាមព្រំដែន។ ចំពោះការរៀបចំសមយុទ្ធសង្គ្រោះពេលមានគ្រោះមហន្តរាយ សម្ដេចតេជោបានមានប្រសាសន៍ថានេះជាការអនុវត្តមួយ ដែលផ្ដល់នូវផលប្រយោជន៍ដល់ប្រជាជនទាំងពីរ នៅពេលដែលមានគ្រោះមហន្តរាយជាពិសេសនៅពេលដែលមានភ្លើងឆេះព្រៃ និងមានទឹកជំនន់ជាដើម។ សម្ដេចបន្តថា ភ្លើងឆេះព្រៃ វាមិនស្គាល់ព្រំដែនទេ ដូច្នេះការអនុវត្តសមយុទ្ធនេះ ត្រូវតម្រូវអោយកងទ័ពកម្ពុជា ចូលទៅក្នុងទឹកដីវៀតណាម ហើយកងទ័ពវៀតណាមចូលនៅក្នុងទឹកដីកម្ពុជា។

ដើម្បីជៀសវាងដល់ការយល់ច្រឡំ និងអោយមានការយល់ដឹងទូលំទូលាយ សម្តេចតេជោបានផ្តល់អនុសាសន៍ឲ្យមានសកម្មភាពមនុស្សធម៌ជាមួយគ្នា នៅក្នុងសមយុទ្ធនេះ មានន័យថា ភាគីកម្ពុជាអាចចូលទៅព្យាបាលប្រជាជនវៀតណាម ហើយប្រជាជនវៀតណាមចូលមកព្យាបាលប្រជាជនកម្ពុជាដើម្បីត្រៀមនៅពេលមានគ្រោះមហន្តរាយ ហើយក៏អាចជំរុញឲ្យមានកម្មវិធីដូចជាកីឡា សិល្បៈរួមគ្នាផងដែរ ។

សំខាន់ជាងនេះទៀតធ្វើយ៉ាងណាបន្តកិច្ចសហប្រតិបត្តិការដែលមានស្រាប់ និងជំរុញបង្កលក្ខណៈ ធ្វើយ៉ាងណាឲ្យប្រជាជនប្រទេសទាំងពីរប្រទេសអាចប្រកបអាជីវកម្មតាមព្រំដែនបានដោយងាយស្រួល៕

ភ្នំពេញ ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានទទួលជួបសវនាការជាមួយ លោក គ្រឹស្ទៀន បើហ្គើ (Christian Berger) ឯកអគ្គរដ្ឋទូត នៃសាធារណរដ្ឋសហព័ន្ធអាល្លឺម៉ង់ប្រចំានៅព្រះរាជាណាចក្រកម្ពុជានាព្រឹកថ្ងៃទី៣១ ខែតុលា ឆ្នាំ២០១៩នេះ នៅវិមានរដ្ឋសភា។

នៅក្នុងជំនួបនេះ លោក គ្រឹស្ទៀន បើហ្គើ បានជម្រាបសម្តេចប្រធានរដ្ឋសភាថា ក្នុងបេសកកម្មការទូតរបស់ឯកឧត្តមនៅកម្ពុជានេះ ឯកឧត្តមនឹងខិខំជំរុញកិច្ចសហប្រតិបត្តិការ ព្រះរាជាណាចក្រកម្ពុជានិងអាល្លឺម៉ង់ ឲ្យកាន់តែរឹងមាំឡើង នៅគ្រប់វិស័យ មានវិស័យ អប់រំ សុខាភិបាល និងអភិបាលកិច្ច ជាដើម។

ឯកអគ្គរដ្ឋទូតបានកត់សម្គាល់ថា ទំនាក់ ទំនងកិច្ចសហប្រតិបត្តិការកម្ពុជា អាល្លឺម៉ង់ បានកំពុងដំណើរល្អដោយនៅក្នុងនោះប្រទេសទំាងពីរបានធ្វើការផ្លាស់ប្តូរដំណើរទស្សនកិច្ចគ្នាទៅវិញទៅមក ជាបន្តបន្ទាប់។

សម្តេចអគ្គមហាពញាចក្រី ហេង សំរិន បានស្វាគមន៍បេសកកម្មការទូតរបស់លោក គ្រឹស្ទៀន បើហ្គើ នៅកម្ពុជា។ សម្តេចបានគូសបញ្ជាក់ថា រដ្ឋសភាកម្ពុជា សូមគាំទ្រ និងសន្យាធ្វើកិច្ចសហ ប្រតិបត្តិការឲ្យបានពេញលេញ ដើម្បីបេសកកម្មការ ទូតរបស់លោកនៅកម្ពុជាទទួលបានជោគជ័យ ។

សម្តេចប្រធានរដ្ឋសភា បានលើកឡើងថា អាល្លឺម៉ង់ ជា ប្រទេសមួយ នៅក្នុងចំណោមប្រទេសសមាជិកសហ ភាពអឺរ៉ុប ដែលបាននំាចូលទំនិញពីកម្ពុជា ច្រើនជាងគេ ក្នុងចំណោមប្រទេសសមាជិកសហភាពអ៊ឺរ៉ុប។ ហើយអាល្លឺម៉ង់ ជាប្រទេស ដែលបានផ្តល់ជំនួយយ៉ាងច្រើនសន្ធឹកសន្ធាប់ដល់កម្ពុជា លើគំរោងការអភិវឌ្ឍន៍ នានា ជាង៧០គម្រោងកន្លងមកនេះ។

សូមជម្រាបថា កម្ពុជានិងសហព័ន្ធអាល្លឺម៉ង់ មានទំនាក់ទំនងការទូត ជាមួយគ្នាតាំងពីចុងឆ្នាំ១៩៦៧ ហើយទំនាក់ទំនង ដ៏ល្អនេះត្រូវបានបន្តលើកកម្ពស់កាន់តែល្អប្រសើរពី មួយថ្ងៃទៅមួយថ្ងៃ៕

ខេត្តកំពង់ចាម ៖ អភិបាលនៃគណៈអភិបាលខេត្តកំពង់ចាម លោក អ៊ុន ចាន់ដា បានថ្លែងថា នៅក្នុងឆ្នាំ២០២០ខាងមុខនេះ គឺជាឆ្នាំយុទ្ធសាស្ត្រ នៃការអនុវត្តន៍នូវផែនការគំណែទំរង់ថ្មីមួយ ដែលគ្រប់ឃុំ-សង្កាត់ នឹងទទួលបានកញ្ចប់ថវិកាពីរាជរដ្ឋាភិបាល ក្នុង១ឆ្នាំៗ អាចលើសពី ៧៣.០០០ដុល្លារ ដើម្បីធ្វើការអភិវឌ្ឍន៍ ថ្នាក់មូលដ្ឋាន ដោយមិនគិតលើកិច្ចការងាររដ្ឋបាលនោះទេ ដូច្នេះធ្វើយ៉ាងណាត្រូវចាយវាយឲ្យបានត្រឹមត្រូវ និងស្របទៅតាមបំណងប្រាថ្នារបស់ប្រជាពលរដ្ឋ ដើម្បីឲ្យការប្រើប្រាស់ថវិកាមានតម្លាភាព គណនេយ្យភាព ឲ្យចំគោលដៅ ហើយប្រេីឲ្យអស់ក្នុង១ឆ្នាំៗ ឆ្នាំទៀតនោះ ត្រូវទាមទារឲ្យមានការបណ្ដុះបណ្ដាល និងបើកវគ្គតំរង់ទិសមន្ត្រីរបស់យើង ជាពិសេសគឺស្មៀន និងក្រុមព្រឹក្សាឃុំ ផងដែរ។

ការថ្លែងយ៉ាងដូច្នេះក្នុងឱកាសដែល លោក អញ្ជើញជាអធិបតីក្នុងពិធីបើកសិក្ខាសាលាសមាហរណកម្មវិធីវិនិយោកបីឆ្នាំរំកិល(២០២០-២០២២) នៅស្រុកកំពង់សៀម នាព្រឹកថ្ងៃទី៣០ ខែតុលា ឆ្នាំ២០១៩ ។

ថ្លែងក្នុងឱកាសនោះដែរ លោក អ៊ុន ចាន់ដា បានលើកឡើងថា សិក្ខាសាលានេះ ជាសូចនាករមួយបង្ហាញពីការចូលរួមក្នុងការអភិវឌ្ឍន៍តាមបែបប្រជាធិបតេយ្យរបស់រដ្ឋបាលថ្នាក់ក្រោមជាតិ។ ការវិវត្តនៃកិច្ចដំណើរការ កំណែទម្រង់តាមបែបប្រជាធិបតេយ្យនៅថ្នាក់ក្រោមជាតិ តាមរយៈគោលនយោបាយវិមជ្ឈការ និងវិសហមជ្ឈការ ប្រកបដោយការជឿជាក់យ៉ាងខ្លាំងចំពោះតួនាទីដ៏មានសារៈសំខាន់ របស់រដ្ឋបាលថ្នាក់ក្រោមជាតិ ក្នុងការផ្តល់សេវាសាធារណៈ និងការអភិវឌ្ឍន៍សេដ្ឋកិច្ច នៅតាមមូលដ្ឋាន សំដៅលើកកម្ពស់ជីវភាពរបស់ប្រជាពលរដ្ឋ និងចូលរួមចំណែកការបន្ថយភាពក្រីក្រ ប្រកបដោយប្រសិទ្ធភាព។

លោកអភិបាលខេត្ត បានបន្តថា ផ្តើមចេញពីឆន្ទៈ និងជំនឿជឿជាក់នេះ ក្នុងអំឡុងជិត២ទសវត្សរ៍ កន្លងមកនេះ រាជរដ្ឋាភិបាលបានជំរុញ និងគាំទ្រយ៉ាងសកម្មដល់ការរៀបចំ និងការអនុវត្តកម្មវិធីកំណែទម្រង់ ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ ក្នុងន័យនេះ រដ្ឋបាលឃុំ-សង្កាត់បានក្លាយទៅជា រដ្ឋបាលថ្នាក់មូលដ្ឋានដែលមានមុខងារសំខាន់ ក្នុងការផ្តល់សេវាសាធារណៈ និងកិច្ចអភិវឌ្ឍសេដ្ឋកិច្ច នៅតាមមូលដ្ឋាន ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ នៅក្នុងដែនសមត្ថកិច្ចរបស់ខ្លួន ដោយផ្អែកតាមផែនការអភិវឌ្ឍន៍របស់រដ្ឋបាលឃុំ-សង្កាត់ដែលបានរៀបចំ និងអនុវត្តនូវគម្រោងហេដ្ឋារចនាសម្ព័ន្ធ ដូចជា ការសាងសង់ផ្លូវលំ ស្ពាន អណ្តូងទឹក ប្រឡាយទឹក អគារសាលារៀន និងគម្រោងផ្តល់សេវាផ្សេងៗទៀតពាក់ព័ន្ធនឹងការផ្តល់សេវាសាធារណៈ ការផ្សព្វផ្សាយព័ត៌មានអំពីបញ្ហាសុខភាព និងអនាម័យតាមជនបទ ការផ្សព្វផ្សាយចំណេះដឹងអំពីបញ្ហាយេនឌ័រ ការទប់ស្កាត់អំពើហឹង្សាក្នុងគ្រួសារ ដោយប្រើប្រាស់មូលនិធិឃុំ-សង្កាត់ និងធនធានពីប្រភពផ្សេងទៀត ដើម្បីឆ្លើយតបទៅនឹងតម្រូវការជាអាទិភាពនានា របស់ប្រជាជននៅតាមមូលដ្ឋាន។

ដោយបច្ចុប្បន្ននេះរាជធានី និងគ្រប់ខេត្តនៅទូទាំងប្រទេស កំពុងតែសកម្មប្រយុទ្ធយ៉ាងក្លៀវក្លា ក្នុងការអនុវត្តគោលនយោបាយយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាល ដែលដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕ ប៉ែន សុផល

ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ នៅថ្ងៃទី៣០ ខែតុលា ឆ្នាំ២០១៩នេះ បានដាក់ចេញវិធានការចំនួន៨ចំណុច ដើម្បីបង្កើនការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាព ក្នុងឱកាសពិធីខួបអនុស្សាវរីយ៍ លើកទី៦៦ នៃទិវាបុណ្យឯករាជ្យជាតិ ៩ វិច្ឆិកា និងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០១៩៕

​ខេត្ត​ប៉ៃលិន ៖ មាន​ករណី​ហិង្សា​ក្នុង​គ្រួ​សារបាន​កើតឡើង​កាលពី​រសៀល​ម្សិលមិញ បណ្តាល​ឲ្យ​បុរស​ម្នាក់​ជា​ឪពុក​បាន​រងរបួស​ធ្ងន់​ធ្ង​រ​ត្រូវបាន​គេ​ប្រញាប់​បញ្ជូនទៅ​សង្គ្រោះ​នៅ​មន្ទីរពេទ្យបង្អែក​ខេត្ត ខណៈ​ឈ្លោះប្រកែក​គ្នា​តិចតួច​ពី​រឿង​ដីធ្លី ស្រាប់តែ​ត្រូវ​ជនសង្ស័យ​ជា​កូន​កាប់​ប្រហារ បណ្តាល​ឲ្យ​រងរបួស​តែម្តង។​

ហេតុការណ៍​នេះ​បាន​កើតឡើង​កាលពី​វេលា​ម៉ោង​៦ ​និង​៥០​នាទី​ល្ងាច ថ្ងៃទី​២៩ ខែតុលា​នេះ នៅ​ចំណុច​អូរ​ខ្យង ស្ថិតក្នុង​ភូមិ​វត្ត សង្កាត់​ប៉ៃលិន ក្រុងប៉ៃលិន ខេត្ត​ប៉ៃលិន បណ្តាល ឲ្យ​ឪពុក​រងរបួស​ធ្ងន់ ចំ​ថ្ងាស​រយះ​សាច់ដុំ​ដៃស្តាំ ប្រអប់​ដៃស្តាំ និង​ភ្លៅ​ស្តាំ។​

ចំណែក​ជនសង្ស័យ​ជា​កូនបង្កើត​ឈ្មោះ ភឹ​ក ភ័​ណ្ឌ អាយុ​៤៣​ឆ្នាំ មុខរបរ​មិន​ពិតប្រាកដ​រស់នៅ ភូមិ​វត្ត​សង្កាត់​ប៉ៃលិន ។​ ជនរងគ្រោះ​មានឈ្មោះ ថា​ន់ ផន អាយុ​៧៥​ឆ្នាំ មុខរបរ​កសិករ រស់នៅ​ភូមិ​វត្ត សង្កាត់​ប៉ៃលិន ក្រុងប៉ៃលិន (​ត្រូវជា​ឪពុក​បង្កើត​) ។

​តាម​ព័ត៌មាន​ទទួលបាន​ករណី​ខាងលើនេះ​កើតឡើង​ដំបូង​ពី​ជម្លោះ​ពាក្យសំដី​រឿង​ចែក​ដីធ្លី​ឲ្យ​កូន​មិន​ស្មើគ្នា​បង្ក​ឲ្យ​ជនសង្ស័យ​មាន​កំហឹង ហើយដោយ​ជនសង្ស័យ​ជា​អ្នកញៀន​ថ្នាំ​ផង​នោះ​ក៏​ហ៊ាន​ទាញ​កាំបិត​កាប់​ប្រហារ​ឪពុក​តែម្តង។ ប៉ុន្តែ​ជនសង្ស័យ​ត្រូវបាន​កម្លាំង​សមត្ថកិច្ច​ចាប់ខ្លួនបាន​ផងដែរ៕

ភ្នំពេញ ៖ តបតាមការអញ្ជើញរបស់លោក ប្រាយុទ្ធច័ន្ទអូចា នាយករដ្ឋមន្រ្តីនៃព្រះរាជាណាចក្រថៃ សម្តេចតេជោនាយករដ្ឋមន្រ្តី ហ៊ុន សែន នឹងដឹកនាំគណៈប្រតិភូជាន់ខ្ពស់អញ្ជើញទៅចូលរួមកិច្ចប្រជុំកំពូលអាស៊ានលើកទី៣៥ និងកិច្ចប្រជុំកំពូលពាក់ព័ន្ធ ដែលនឹងប្រព្រឹត្តទៅក្រោមមូលបទ «ជំរុញភាពជាដៃគូសម្រាប់ចីរភាព» នៅទីក្រុងបាងកក ពីថ្ងៃទី០២ ដល់ថ្ងៃទី ០៥ ខែវិច្ឆិកា ឆ្នាំ២០១៩។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិដែលទទួលបាននៅព្រឹកថ្ងៃទី៣០ ខែតុលា ឆ្នាំ២០១៩នេះ៕

ព័ត៌មានលម្អិតសូមអានសេចក្តីប្រកាសព័ត៌មានខាងក្រោម ៖

ខេត្ត​ព្រះសីហនុ ៖ រហូតមកដល់ពេលនេះការបាត់​ខ្លួន​ស្ត្រី​ជនជាតិ​អង់គ្លេស​វ័​យ​ក្មេង​ម្នាក់នៅលើ​ដែន​កោះកុង​សន្លឹមស្ថិតក្នុង​ក្រុង​កោះរ៉ុង ខេត្ត​ព្រះសីហនុ នៅតែស្ថិតក្នុង​អាថ៌កំបាំង​នៅឡើយ បើ​គិតពី​ថ្ងៃ​បាត់​ខ្លួន​មក​រយៈពេល​៤​ថ្ងៃ​ហើយ ។​

​មន្ត្រីរដ្ឋបាល​ក្រុង​កោះរ៉ុង​ឲ្យដឹងថា គិត​មក​ត្រឹម​ល្ងាច​ថ្ងៃទី​២៨ ​ខែតុលា ​ឆ្នាំ​២០១៩​នេះ ការស្វែងរក​ស្ត្រី​ជនជាតិ​អង់គ្លេស​មួយរូប ដែល​បាត់​ខ្លួន​នៅលើ​កោះរ៉ុង​នោះ មិនទាន់​ប្រទះឃើញ​នៅឡើយ សូម្បីតែ​តម្រុយ​អ្វី​បន្តិច​ក៏​មិន​ទទួល​បានដែរ។​

​ទោះជា​យ៉ាងនេះ​ក្តី កម្លាំង​សមត្ថកិច្ច​ចម្រុះ​គ្រប់ផ្នែក រួមជាមួយ​ក្រុម​អ្នក​ស្ម​គ្រ័​ចិត្ត​ផង កំពុង​ធ្វើ​ប្រតិបត្តិ​ការស្វែងរក​បន្ត​ដោយ​ថ្មើរជើង​នៅលើ​ដីគោក​ក្នុង​តំបន់​ព្រៃភ្នំ​ផង ក្នុងនោះ​មានការ​ប្រើប្រាស់​កាមេរ៉ា​ពីលើ​អាកាស ហើយ​នៅក្នុង​ទឹក​ក្បែរ​ឆ្នេរសមុទ្រ​ក៍មាន​ក្រុម​អ្នក​មុជទឹក​ស្វែងរក​ផងដែរ​។

​រំលឹកថា ស្ត្រីជន​បរទេស​ដែល​បាត់​ខ្លួន​នេះ ឈ្មោះ​Amelia Bambridge អាយុ ២១​ឆ្នាំ ដែល​យោង តាម​របាយការណ៍​ពី​សមត្ថកិច្ច​បញ្ជាក់ថា បាន​បាត់​ដំណឹង​ក្នុងភូមិ​សាស្ត្រ​ក្រុង​កោះរ៉ុង ចាប់ពី​វេលា​ម៉ោង​ជិត​៤​ទៀបភ្លឺ​ថ្ងៃទី​២៤​តុលា​២០១៩ មិនទាន់​ដឹងថា​ជាការ​វង្វេង​ដូច ករណី​ជនបរទេស​ខ្លះ​ធ្លាប់​វង្វេង​បាត់​ក្នុងព្រៃ​លើ​កោះ​កន្លងមក ឬ​ដោយហេតុ​ការណ៍​មួយ នៅឡើយ​៕