ដោយ ៖ កូវ ប៊ុនហេង

ព្រះវិហារ ៖ ប្រធានមន្ទីរសាធារណការ និងដឹកជញ្ជូនខេត្តព្រះវិហារ លោក សំ លាងទ្រី បានដឹកនាំកិច្ចប្រជុំលើកទី១២នៅសាលប្រជុំនៃមន្ទីរសាធារណការនិងដឹកជញ្ជូនខេត្ នៅថ្ងៃទី១៧ ខែធ្នូ​ ឆ្នាំ២០១៩ នេះ ដើម្បីឆ្លងរបាយការណ៍ស្តីពីលទ្ធផលការងារប្រចាំខែធ្នូ និងទិសដៅអនុវត្តបន្តសម្រាប់ខែមករា ឆ្នាំ២០២០ ខាងមុខ។​ កិច្ចប្រជុំនេះ បានផ្សព្វផ្សាយបទបញ្ជាផ្ទៃក្នុងរបស់មន្ទីរសម្រាប់ឆ្នាំ២០២០ និងអនុក្រឹត្យលេខ១៩១ស្តីពីការដំឡើងប្រាក់កម្រៃប្រចាំខែ ជូនមន្ត្រីជាប់កិច្ចសន្យា។

លោកប្រធានមន្ទីរ សំ លាងទ្រី បានថ្លែងអំណរអរគុណ ដល់មន្ត្រីសាធារណការ និងដឹកជញ្ជូន ក្រុង-ស្រុក -ខេត្ត នៃខេត្តព្រះវិហារ ទាំងអស់ ដែលបានខិតខំបំពេញភារកិច្ចបានល្អប្រសើរក្នុងរយៈពេលមួយខែកន្លងមកនេះ រួមទាំងការងារជួសជុលថែទាំផ្លូវថ្នល់ ការផ្ដល់សេវាសាធារណ: ជូនប្រជាពលរដ្ឋ និងការផ្សព្វផ្សាយច្បាប់ចរាចរជាដើម ៕

ដោយ ៖ កូវ ប៊ុនហេង

ព្រះ វិហារ ៖ កាលពីព្រឹកថ្ងៃទី១៧ ខែធ្នូ ឆ្នាំ២០១៩ មន្ទីរ កសិកម្ម រុក្ខាប្រមាញ់ និងនេសាទ ខេត្ត បានបើកសិក្ខាសាលា ស្តីពីការរៀបចំពង្រាងផែនការយុទ្ឋសាស្ត្រអភិវឌ្ឍន៍វិស័យ កសិកម្មឆ្នាំ២០១៩ . ២០២៣។សិក្ខាសាលា នេះ រៀបចំគាំទ្រ ដោយកម្មវិធីផ្សព្វផ្សាយបច្ចេកទេសថ្មីដែលមានភាពធន់នឹង ការប្រៃប្រួលអាកាសធាតុ (Aspire) ។

លោក ពឹង ទ្រីដា ប្រធានមន្ទីរកសិកម្ម រុក្ខាប្រម៉ាញ់ និង នេសាទ ខេត្តព្រះវិហារ បានឱ្យដឹងថា ការបើកសិក្ខាសាលា នេះ គោលបំណងដើម្បីចូលរួមជំរុញកំណើនកសិកម្ម ប្រកបដោយការប្រកួតប្រជែង។ ជាមួយនោះ ធ្វើឱ្យផលិតផល មានគុណភាព សុវត្ថិភាព និងអាហារូបត្ថម្ភ ព្រមទាំងបង្កើន ប្រ សិទ្ឋភាពនៃការគ្រប់គ្រងធនធានធម្មជាតិ ដីធ្លី ព្រៃឈើ និងជលផល ប្រកបដោយនិរន្តរភាព ។

សមាសភាព ចូលរួមមាន ៖ គ្រប់ការិយាល័យក្រោមឱវាទមន្ទីរ, សង្កាត់ , ផ្នែក , ខណ្ឌ រដ្ឋបាល ព្រៃឈើ , ខណ្ឌ រដ្ឋបាល ជលផល , គ្រប់ ការិយាល័យ កសិក ម្ម ក្រុង / ស្រុក ថ្នាក់ដឹកនាំ មន្ទីរ និងទីប្រឹក្សាកម្មវិធី Aspire ផងដែរ ៕

ភ្នំពេញ ៖ អង្គភាពស៊ីម៉ាក់ កម្ពុជា បានចុះកិច្ចព្រមព្រៀងទទួលជំនួយពីអង្គការ អាប៉ូប៉ូ ប្រចាំនៅកម្ពុជា ប្រមាណ ៣០ម៉ឺនដុល្លារសហរដ្ឋអាមេរិករយៈពេលមួយឆ្នាំ ដើម្បីអនុវត្តគម្រោង សមាហរណកម្មកណ្តុរហិតរកមីន ក្នុងប្រតិបត្តិការបោសសម្អាតមីន។

ពិធីចុះហត្ថលេខាលើអនុស្សារណៈយោគយល់គ្នានេះត្រូវបានធ្វើឡើង នៅទីបញ្ជាការស៊ីម៉ាក់ ដោយមានវត្តមាន លោក ហេង រតនា អគ្គនាយកស៊ីម៉ាក់ និងលោក Michael Heiman ប្រធានអង្គការ APOPO ប្រចាំកម្ពុជា។  គម្រោងសមាហរណកម្មកណ្តុរហិតរកមីន រួមជាមួយការបោសសម្អាតមីនរបស់ស៊ីម៉ាក់ នឹងអនុវត្តរយៈពេលមួយឆ្នាំ ចាប់ផ្តើមពីថ្ងៃទី០១ ខែមករា ឆ្នាំ២០២០ ដល់ថ្ងៃទី៣១ ខែធ្នូ ឆ្នាំ២០២០ ដោយប្រតិបត្តិការនៅកងឯកភាពកំចាត់មីនទី៦ ខេត្តព្រះវិហារ។ លោក ហេង រតនា អគ្គនាយកស៊ីម៉ាក់ បានបញ្ជាក់ថា តាមរយៈ ជំនួយនេះ អង្គភាពស៊ីម៉ាក់នឹងធ្វើការពង្រាយកំលាំងអ្នកដោះមីន សុនខ និងសត្វកណ្តុរដោះមីន ដែលមានផែនការរំដោះផ្ទៃដីចំការមីនជិត៣០០ហិចតា នៅខេត្តព្រះវិហារ និងខេត្តសៀមរាប លោក អគ្គនាយកស៊ីម៉ាក់ នាពេលកន្លង ទៅធ្លាប់បានបញ្ជាក់ថា ការយកសត្វកណ្ដុរជាច្រើនក្បាលពីទ្វីបអាហ្វ្រិក ដើម្បីមកធ្វើការសាកល្បងឲ្យជួយបោសសម្អាតគ្រាប់មីនក្រោមដីឲ្យបានឆាប់រហ័ស ។ សត្វកណ្ដុរអាប៉ូប៉ូ បានជួយបោសសម្អាតមីនដែលកប់នៅក្រោមដី មានប្រសិទ្ធភាពច្បាស់លាស់ជាងការប្រើឧបករណ៍រាវរកមីនទៅទៀត និងប្រសិទ្ធភាពបីដង។

គួរបញ្ជាក់ដែរថា មជ្ឈមណ្ឌលសកម្មភាពកម្ចាត់មីនកម្ពុជា ស៊ីម៉ាក់ (CMAC) សហការជាមួយអង្គការអន្តរជាតិ ហើយបានយកសត្វកណ្ដុរម្យ៉ាងឈ្មោះ អាប៉ូប៉ូ (Apopo) ពីប្រទេសតង់ហ៊្សានី (Tanzania) នៃទ្វីបអាហ្វ្រិក ដើម្បីប្រតិបត្តិការ បោសសំអាតមីន។ កម្ពុជាជាប្រទេសដំបូងគេ ដែលនាំយកសត្វកណ្ដុរអាប៉ូប៉ូ (Apopo) ពីទ្វីបអាហ្វ្រិក ឲ្យជួយធ្វើការបោសសម្អាតគ្រាប់មីនមុនគេនៅក្នុងតំបន់អាស៊ី។

អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា បញ្ជាក់ថា កម្ពុជានៅសល់ផ្ទៃដីដែលមានគ្រាប់មីនប្រមាណ៨០០គីឡូម៉ែត្រក្រឡាទៀត ដែលមិនទាន់ធ្វើការបោសសំអាត។ តាមផែនការយុទ្ធសាស្ត្រជាតិរបស់ខ្លួន កម្ពុជាមានមហិច្ចតា រំដោះផ្ទៃដីដែលមានមីនឲ្យអស់នៅត្រឹមឆ្នាំ២០២៥ ស្របទៅតាមអនុសញ្ញាអូតាវ៉ា ដែលបានកំណត់ទុក៕

ខេត្តព្រះសីហុន ៖ បន្ទាប់ពីចាប់ខ្លួនជនជាតិចិន៧នាក់ ហើយត្រូវបានបញ្ជូនទៅតុលាការ ពាក់ព័ន្ធករណីចាប់បង្ខាំងមនុស្ស និងនាំចូលអាវុធដោយខុសច្បាប់ នៅខេត្តព្រះសីហនុហើយនោះ, កម្លាំងនគរបាលជំនាញ បានបន្ដស្រាវជ្រាវស៊ើបអង្កេតយ៉ាងយកចិត្តទុកដាក់ រហូតឈានដល់ការចាប់ខ្លួនជនសង្ស័យ៧នាក់ បន្ថែមទៀត ក្នុងនោះជនជាតិចិន៣នាក់ និងខ្មែរ៤នាក់ ពាក់ព័ន្ធករណីនេះ។

រសៀលថ្ងៃទី១៧ ខែធ្នូ ឆ្នាំ២០១៩នេះ ប្រតិបត្តិការដ៏ក្ដៅគគុកជាបន្ដបន្ទាប់នេះ ត្រូវបានធ្វើឡើងក្រោមការបញ្ជាផ្ទាល់ពី នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ , លោក គួច ចំរើន អភិបាលខេត្ត និងជាប្រធានគណៈបញ្ជាការឯកភាពខេត្ត និងក្រោមការសម្របសម្រួលពីលោក សៀង សុខ ព្រះរាជអាជ្ញាអមសាលាដំបូងខេត្ត។

ប្រតិបត្តិការនេះធ្វើឡើងនៅថ្ងៃទី១៣-១៤ ខែធ្នូ ដោយកម្លាំងជំនាញតាមចាប់ជនសង្ស័យនៅរាជធានីភ្នំពេញផង និងនៅក្រុងព្រះសីហនុផង បានជាបន្តបន្ទាប់សរុបចំនួន៧នាក់ បន្ថែមទៀត (ជនជាតិខ្មែរ៤នាក់,ជនជាតិចិន៣នាក់ ស្រីម្នាក់) ព្រមទាំងចាប់យកវត្ថុតាង កាំភ្លើង៥ដើម (កាំភ្លើងវែង១ដើម និងកាំភ្លើងខ្លី៤ដើម) និងគ្រាប់រំសេវមួយចំនួនទៀត។

វត្ថុតាងចាប់យកបានរួមមាន ៖ កាំភ្លើងវែង AK47 ១ដើម, កាំភ្លើងខ្លី៤ដើម (ម៉ាកGLOCK17 ១ដើម ពណ៌ខ្មៅ, ម៉ាក GLOCK19 ១ដើម ពណ៌ខ្មៅ, ម៉ាក GLOCK19 KILLER ១ដើម ពណ៌ខ្មៅ និងម៉ាកK59 ១ដើម ពណ៌ខ្មៅ, បង់កាំភ្លើងប្រភេទ១៥គ្រាប់ ចំនួន៤បង់, បង់កាំភ្លើងប្រភេទ៣០គ្រាប់ ចំនួន២បង់ (ថ្មីមិនទាន់ហែកប្រើ), គ្រាប់កាំភ្លើង១៨១គ្រាប់ (គ្រាប់ប្រភេទ៩mm ចំនួន៦៦គ្រាប់, គ្រាប់ប្រភេទ K59 ចំនួន៥គ្រាប់), រឺស័របង់កាំភ្លើងចំនួន២ (ថ្មីមិនទាន់ហែកប្រើ), តួកាំភ្លើងម៉ាក GLOCK ចំនួន១ និងគ្រឿងបន្លាស់កាំភ្លើងមួយចំនួន (សម្រាប់កែឆ្នៃកាំភ្លើងខ្លីម៉ាក GLOCK ធម្មតា ទៅជាអូតូរ៉ាស់ហ្វាល់) និងម៉ាស៉ីនស្វាន១គ្រឿង និងគ្រឿងបន្លាស់១ប្រអប់។

គួរជម្រាបថា កាលពីថ្ងៃទី០៦ ខែធ្នូ ឆ្នាំ២០១៩កន្លងទៅ កម្លាំងជំនាញផែននគរបាលព្រហ្មទណ្ឌ បានធ្វើការស្រាវជ្រាវបង្ក្រាបឃាត់ខ្លួនបានជនសង្ស័យ ជនជាតិចិនចំនួន៧នាក់ ដែលជាប់ពាក់ព័ន្ធ ករណីចាប់ឃុំឃាងបង្ខាំងមនុស្សខុសច្បាប់, ផ្តល់ទីតាំងប្រព្រឹត្តបទល្មើសឧក្រិដ្ឋ និងនាំចូលអាវុធ ដោយគ្មានការអនុញ្ញាត នៅចំណុចផ្ទះសំណាក់ស៊ែងឆីង ស្ថិតនៅភូមិ២ សង្កាត់២ ក្រុងព្រះសីហនុ ព្រមទាំងដកហូតបានកាំភ្លើងខ្លីចំនួន២ដើម, កាំភ្លើងវែង១ដើម (M16) គ្រាប់កាំភ្លើង និងគ្រឿងញៀនមួយចំនួនធំ។ ជនសង្ស័យរួមទាំងវត្ថុតាង កម្លាំងជំនាញបានកសាងសំណុំរឿង បញ្ជូនទៅសាលាដំបូងខេត្តព្រះសីហនុ៕

ភ្នំពេញ ៖ រដ្ឋបាលរាជធានីភ្នំពេញ នៅថ្ងៃទី១៧ ខែធ្នូ ឆ្នាំ២០១៩នេះ បានចេញសេចក្តីជូនដំណឹងមួយដោយបញ្ជាក់ថា ខ្លួននឹងជួសជុលសំណង់ឡៅតឿក្នុងផ្សារអូរឫស្សីឡើងវិញ បន្ទាប់ពីឡៅតឿនេះមានសភាពបែកប្រេះស្រាំ។

ក្នុងសេចក្តីជូនដំណឹងនេះ រដ្ឋបាលរាជធានីភ្នំពេញ បានស្នើអាជីវករ ដែលកំពុងលក់ដូរនៅលើឡៅតឿ ក្រោមឡៅតឿ និងជុំវិញបរិវេណទីតាំងនេះទាំងអស់ ផ្ទេរការលក់ដូរជាបណ្តោះអាសន្នក្នុងរយៈពេលខ្លី ទៅទីតាំងថ្មីនៅក្រៅផ្សារ ដើម្បីរក្សាសន្តិសុខ សុវត្ថិភាព និងចៀសវាងរាល់ហានិភ័យ ដែលកើតមានឡើងជាយថាហេតុ៕

ភ្នំពេញ ៖ រដ្ឋមន្រ្តី​ក្រសួងយុត្តិធម៌ លោក អង្គ វង្ស វឌ្ឍានា និង​ថ្នាក់ដឹកនាំក្រសួងយុត្តិធម៌ បាន​ទទួល​ជាមួយ​លោក W. Patrick Murphy ឯក​អគ្គរដ្ឋ​ទូតសហរដ្ឋអាមេរិក​ប្រចាំ​កម្ពុជា និង មន្រ្តី​ស្ថានទូត​សហរដ្ឋ​អាមេរិក​ប្រចាំកម្ពុជា ដើម្បី​ចូល​ជួបសម្តែងការគួរសម និង​ពិភាក្សាការងារ កាលពី​ថ្ងៃទី១៦ ខែធ្នូ នៅ​ក្រសួងយុត្តិធម៌។

ជាលទ្ធផលនៃកិច្ចពិភាក្សា ភាគីទាំងពីរសម្តែងនូវ សេចក្តីសោមនស្សរីករាយចំពោះកិច្ច​សហ​ប្រតិ​បត្តិការ ប្រកប​ដោយលទ្ធផល ជាទី​មោទនៈ​រវាងកម្ពុជា និង​សហរដ្ឋអាមេរិក​កន្លងមក ជាពិសេសពាក់​ព័ន្ធនឹង ការពង្រឹងសមត្ថភាពមន្រ្តី ជំនាញ​ការបង្ក្រាបបទលើ្មស​ការផ្ទេរទណ្ឌិត និង​ការ​ផ្តល់​ជំនួយទៅ​វិញទៅមកនៅក្នុង​វិស័យ​ព្រហ្មទណ្ឌ។

ជាមួយគ្នានោះភាគីទាំងពីរបាន​ឯកភាព និងប្តេជ្ញា​ក្នុងការពង្រឹង និង​ពង្រីកកិច្ចសហប្រតិបត្តិការរវាងកម្ពុជា និង​សហរដ្ឋអាមេរិក តាមរយៈការបន្តការបណ្តុះបណ្តាលធនធានមនុស្ស ការ​ផ្ដល់​ជំនួយ​ទៅ​វិញ​ទៅ​មក​ក្នុងវិស័យព្រហ្មទណ្ឌការប្រយុទ្ធប្រឆាំងបទល្មើសឆ្លងដែន និងបទល្មើសលាងលុយ ការ​ការ​ពារកុមារ និងការអនុវត្តច្បាប់៕

ខេត្តកំពង់ចាម ៖ ស្ដ្រីថៅកែតន្ដ្រីសម័យ ហេង សម្បត្តិតន្ដ្រី ហៅនាយ៨៥ នៅខេត្តកំពង់ចាម ដែលអំពើហឹង្សាលើនារីជាអ្នកចម្រៀងរបស់ខ្លួន រហូតមានរបួសធ្ងន់ធ្ងរនោះ ត្រូវបានចៅក្រមស៊ើបសួរ នៃសាលាដំបូងខេត្តកំពង់ចាម លោក ធន់ ដារិទ្ធ ចេញដីកាបង្គាប់ឲ្យឃុំខ្លួនដាក់ពន្ធនាគារ នៅថ្ងៃទី១៦ ខែធ្នូ ឆ្នាំ២០១៩នេះ។

យោងតាមដីកាបង្គាប់ឲ្យឃុំខ្លួន ដែលទទួលបាននៅរសៀលថ្ងៃនេះ បានឲ្យដឹងថា ស្ដ្រីថៅកែតន្ដ្រីសម័យ នាយ៨៥នេះ ឈ្មោះ ជន យ៉ារី អាយុ៣៨ឆ្នាំ ត្រូវដាក់ឲ្យស្ថិតនៅក្រោមការពិនិត្យពីបទ «ហិង្សាដោយចេតនា» ប្រព្រឹត្តនៅភូមិស្ដេចនន ឃុំក្រឡា ស្រុកកំពង់សៀម ខេត្តកំពង់ចាម កាលពីថ្ងៃទី១២ ខែធ្នូ ឆ្នាំ២០១៩។

តាមការរៀបរាប់ពីស្ដ្រីរងគ្រោះឈ្មោះ ចាន់ លក្ខិណា ហៅស្រីពេជ្រ ជាស្ដ្រីមេម៉ាយកូន៣នាក់ បានឲ្យដឹងថា ខ្លួនទើបចូលច្រៀងឲ្យក្រុមតន្ដ្រី ហេង សម្បត្តិតន្ដ្រី ហៅនាយ៨៥ អំឡុងខែ១១ ឆ្នាំ២០១៩កន្លងទៅ លុះដល់ថ្ងៃទី១២ ខែធ្នូ ឆ្នាំ២០១៩ដែលជាថ្ងៃកើតហេតុ ខ្លួនបានឡើងច្រៀងធម្មតា។ ប៉ុន្ដែពេលកំពុងច្រៀងនោះ កូនតូចរបស់ខ្លួនមានជំងឺចុកពោះខ្លាំង ហើយខ្លួនក៏សម្រាកបន្ដិចដើម្បីមើលកូន។

លុះត្រឡប់មកកន្លែងច្រៀងវិញ ក៏ត្រូវចៅកែស្រី ឈ្មោះ ជន យ៉ារី ជេរស្ដីហើយដល់ថ្នាក់ប្រើប្រាស់អំពើហិង្សាមកលើខ្លួន ដោយបង្គាប់ឲ្យកូនចៅប្រុសជាច្រើននាក់ មកចាប់ខ្លួនដើម្បីឲ្យគាត់វាយដំ រហូតរងរបួសពេញផ្ទៃមុខ និងដងខ្លួនតែម្ដង៕ ដោយ ៖ ប៉ែន សុផល

ភ្នំពេញ ៖ រយៈពេល៥ថ្ងៃ ពោលគឺចាប់ពីថ្ងៃទី៩ ដល់ថ្ងៃទី១៣ ខែធ្នូ ឆ្នាំ២០១៩ គណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំពិធីប្រកាសតែងតាំងប្រធាន និងអនុប្រធានលេខាធិការដ្ឋានរាជធានី ខេត្តរៀបចំការបោះឆ្នោត (លធ.ខប) ចំនួន៣៥រូប ដើម្បីឱ្យចូលកាន់តំណែងថ្មីជំនួសប្រធាន និងអនុប្រធាន ដែលត្រូវបានបញ្ចប់មុខតំណែង នៅតាមបណ្តារាជធានី-ខេត្តចំនួន១៩។

ដោយឡែកប្រធាន និងអនុប្រធាន លធ.ខប ដែលត្រូវបានបញ្ចប់មុខតំណែង គ.ជ.ប បានសម្រេចចាត់តាំងធ្វើជាជំនួយការ គ.ជ.ប ឱ្យប្រចាំការនៅតាម លធ.ខបទាំងនោះ។ នេះបើតាមសេចក្តីប្រកាសព័ត៌មានរបស់ គ.ជ.ប៕

ភ្នំពេញ ៖ ក្នុងឱកាសនៃការអញ្ជើញចូលរួមកិច្ចប្រជុំក្រុមប្រឹក្សាប្រតិបត្តិលើកទី២ និងមហា សន្និបាតលើក ទី១២ នៃសភាតំបន់អាស៊ី នៅទីក្រុងអានតាលីយ៉ា នៃសាធារណរដ្ឋតួកគី លោក ងួន ញ៉ិល អនុប្រធានទី១រដ្ឋសភា នៃព្រះរាជាណាចក្រកម្ពុជា និងជាប្រធានក្រុមជាតិរដ្ឋសភាកម្ពុជា-សភាតំបន់អាស៊ី បានទទួលជួបជាមួយលោក ហ្គេនណាឌី អ៊ី អ័រឌីណូវ ប្រធានក្រុមមិត្តភាពសភារុស្ស៊ី-កម្ពុជា និងជា សមាជិកគណៈកម្មការកសិកម្ម និងចំណីអាហារ នៃព្រឹទ្ធសភាសហព័ន្ធរុស្ស៊ី ដោយក្នុងជំនួបនេះលោក ហ្គេនណាឌី អ៊ី អ័រឌីណូវ មានប្រសាសន៍ថា ក្នុងនាមសភាជាន់ខ្ពស់របស់សហព័ន្ធរុស្ស៊ី លោកផ្ទាល់ បានចូលរួមសង្កេតការណ៍ការបោះឆ្នោតជ្រើសតាំងតំណាងរាស្ត្រ នីតិកាលទី៦ ក្នុងឆ្នាំ២០១៨ នៅកម្ពុជា និងសូមចូលរួមអបអរសាទរចំពោះគណបក្សប្រជាជនកម្ពុជា ដែលទទួលបានជោគជ័យក្នុងការបោះឆ្នោតនេះ។

លោក ហ្គេនណាឌី អ៊ី អ័រឌីណូវ បានលើកឡើងអំពីទំនាក់ទំនង និងកិច្ចសហប្រតិបត្តិការរវាង សភាកម្ពុជា និងរុស្ស៊ី ដែលមានភាពស្អិតល្មួត ហើយលោកមានការពេញចិត្តណាស់ចំពោះទំនាក់ទំនង កិច្ចសហប្រតិបត្តិការនេះ គឺថា មិនត្រឹមតែស្ថាប័នសភាប៉ុណ្ណោះទេ គឺមានការសហការលើគ្រប់វិស័យថែមទៀតផង។

ជាការឆ្លើយតប លោកបណ្ឌិត ងួន ញ៉ិល បានគាំទ្រចំពោះការលើកឡើងរបស់លោក ហ្គេនណាឌី អ៊ី អ័រឌីណូវ ពិសេសគឺការលើកឡើងអំពីទំនាក់ទំនង និងកិច្ចសហប្រតិបត្តិការប្រកបដោយ ភាពស្អិតល្មួតរវាងព្រះរាជាណាចក្រកម្ពុជា និងសហព័ន្ធរុស្ស៊ី។ លោកបណ្ឌិតមានប្រសាសន៍ទៀតថា ប្រទេសទាំង២ កម្ពុជា-រុស្ស៊ី បានភ្ជាប់ទំនាក់ទំនងការទូតនឹងគ្នាតាំងពីឆ្នាំ១៩៥៦ ហើយឆ្នាំនេះគឺជា ខួប៦៣ឆ្នាំ ដោយឯកឧត្តមបានគូសបញ្ជាក់ថា សម្តេចអគ្គមហាសេនាបតីតេជោ ហ៊ុន សែន នាយករដ្ឋ មន្ត្រីនៃព្រះរាជាណាចក្រកម្ពុជាបានចាត់ទុកទំនាក់ទំនងរវាងកម្ពុជា និងរុស្ស៊ី គឺជាទំនាក់ទំនងប្រវត្តិសាស្ត្រ ជាពិសេសរុស្ស៊ីធ្លាប់បានជួយកម្ពុជាក្នុងគ្រាលំបាកបំផុត បន្ទាប់ពីបានរំដោះខ្លួនរួចផុតពីរបបប្រល័យពូជសាសន៍ ប៉ុល ពត កាលពីថ្ងៃទី៧ ខែមករា ឆ្នាំ១៩៧៩៕

ខេត្តកំពង់ចាម ៖ អភិបាលខេត្តកំពង់ចាម លោក អ៊ុន ចាន់ដា បានកំណត់ថា នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទត្រូវទទួលបានសេវាផ្គត់ផ្គង់ទឹកស្អាត១០០% ព្រមទាំងរស់នៅក្នុងបរិស្ថានដែលមានអនាម័យល្អ១០០% ប្រកបដោយនិរន្តភាព។

ការថ្លែងយ៉ាងដូច្នេះ ក្នុងឱកាសបើកអង្គសន្និសីទប្រចាំឆ្នាំ លើកទី១ ក្រោមប្រធានបទអ្នកដឹកនាំឆ្នើមដើម្បីនិរន្តភាពការងារវិស័យទឹកស្អាត និងអនាម័យជនបទដែលបានរៀបចំឡើងដោយមន្ទីរអភិវឌ្ឍន៍ជនបទខេត្តកំពង់ចាម សហការជាមួយអង្គការដៃគូ នាព្រឹកថ្ងៃទី១៦ ខែធ្នូ ឆ្នាំ២០១៩ នេះ។

ថ្លែងក្នុងពិធីនោះដែរ លោក អ៊ុន ចាន់ដា អភិបាលខេត្តកំពង់ចាម បានចាត់ទុកថា ការរៀបចំអង្គសន្និសីទនេះ គឺពិតជាមានសារៈសំខាន់ណាស់ ជាពិសេសលោកអភិបាលស្រុក និងលោកមេឃុំទាំងអស់ត្រូវរួមគ្នា ដើម្បីឈានទៅសម្រេចគោលដៅ នៃយុទ្ធសាស្ត្រជាតិ ស្តីពីវិស័យផ្គត់ផ្គង់ទឹកស្អាត និងអនាម័យជនបទដែលបានកំណត់ថា៖ នៅឆ្នាំ ២០២៥ ប្រជាពលរដ្ឋគ្រប់រូបនៅសហគមន៏ជនបទ ត្រូវទទួលបានសេវាផ្គត់ផ្គង់ទឹកស្អាត១០០% ព្រមទាំងរស់នៅក្នុងបរិស្ថានដែលមានអនាម័យល្អ១០០% ប្រកបដោយនិរន្តរភាព។

ដើម្បីសម្រេចឲ្យបានតាមទិសដៅនៃគោលនយោបាយជាតិ ស្តីពីវិស័យផ្គត់ផ្គង់ទឹកស្អាត និងអនាម័យជនបទ ឯកឧត្ដមអភិបាលខេត្ត បាន ផ្តល់នូវ អនុសាសន៍ ថា ៖ ១- មន្ទីរអភិវឌ្ឍន៍ជនបទខេត្តត្រូវបន្តជម្រុញការជួសជុលអណ្តូងស្នប់ និងលើកផែនការសម្រាប់សាងសង់អណ្តូងទឹក និងបង្គន់អនាម័យជាប្រចាំ ។
២- លោកអភិបាលស្រុក និងលោកមេឃុំត្រូវបញ្ចូលការងារទឹកស្អាត និងអនាម័យទៅក្នុងផែនការប្រចាំឆ្នាំរបស់ខ្លួន ចាប់ពីឆ្នាំ ២០២០ទៅ ។
៣- មេឃុំ មេភូមិនីមួយៗត្រូវធ្វើបច្ចុប្បន្នភាពអណ្តូងទឹក និងបង្គន់អនាម័យឲ្យបានច្បាស់លាស់ជារៀងរាល់ខែ ។
៤- ត្រូវរួមសហការគ្នាឲ្យបានជាប់ជាប្រចាំរវាងរដ្ឋបាលខេត្ត ស្រុក ឃុំ មន្ទីរជំនាញ និងអង្គការដៃគូរ។
៥- អាជ្ញាធរស្រុក ឃុំ និងមេភូមិត្រូវចុះជុំរុញ និងតាមដានជាប្រចាំអំពីការសាងសង់បង្គន់អនាម័យ និងអណ្តូងទឹកនៅតាមភូមិនីមួយៗ ហើយត្រូវរាយការណ៏មកមន្ទីរអភិវឌ្ឍន៏ជនបទជារៀងរាល់ខែ ។
៦- ត្រូវបញ្ចូលការងារទឹកស្អាត និងអនាម័យនៅក្នុងរបៀបវារៈប្រជុំប្រចាំខែរបស់រដ្ឋបាលស្រុក និងឃុំ។

តាម របាយការណ៍ របស់ លោក ហាន កុសល អភិបាលរងខេត្ត និងជាប្រធានក្រុមការងារបច្ចេកទេសវិស័យផ្គត់ផ្គង់ទឹកស្អាត និងអនាម័យជនបទ បានគូសបញ្ជាក់ថា៖ នៅក្នុងឆ្នាំ២០១៨ ប្រជាពលរដ្ឋដែលទទួលបានសេវាអនាម័យ (មានបង្គន់អនាម័យប្រើប្រាស់) មានចំនួន១៧៩.៩៨៤ខ្នង ផ្ទះស្មើ ៦៧% និងខ្នងផ្ទះដែលទទួបានសេវាទឹកស្អាតប្រើប្រាស់មានចំនួន១ ៩២,៤០១ខ្នងផ្ទះ ស្មើ ៧២% ។

ដូច្នេះ ផ្នែកអនាម័យយើងនៅខ្វះ ៣៣% ទៀត ហើយផ្នែកទឹកស្អាតយើងនៅខ្វះ ២៨% ដោយ គិតចាប់ពីឆ្នាំ២០២០ ដល់ឆ្នាំ២០២៥ គឺ មាន រយៈពេល ៦ឆ្នាំ ទៀត ដែល ត្រូវរួមគ្នា ដើម្បីឈានទៅសម្រេចគោលដៅ នៃយុទ្ធសាស្ត្រជាតិ ស្តីពីវិស័យផ្គត់ផ្គង់ទឹកស្អាត និងអនាម័យជនបទ ៕