ខេត្តប៉ៃលិន ៖ តារាកំប្លែង និងចម្រៀង សុខ មេសា រហស្សនាម នាយចឺម ត្រូវបានយុវជនម្នាក់យកដំបងឈើវាយឲ្យេបួសក្បាល និងដៃជាច្រើនកន្លែង នៅវេលាម៉ោង ៤ និង ២០នាទីរសៀល ថ្ងៃពុធទី១៨ ខែធ្នូ ឆ្នាំ២០១៩ នៅចំណុចបុរីម្កុដពេជ្រ ស្ថិតក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។

សមត្ថកិច្ចបានឱ្យដឹងថា បុរសដែលត្រូវគេវាយឲ្យរបួសនោះឈ្មោះ សុខ មេសា ហៅ នាយចឺម ភេទប្រុស អាយុ២២ឆ្នាំ មុខរបរជាតារាចម្រៀង ប្រចាំនៅផលិតកម្មសាន់ដេ រស់នៅភូមិត្រាចកោះ ឃុំមហាឫស្សី ស្រុកគងពីសី ខេត្តកំពង់ស្ពឺ។ ដោយឡែក យុវជនដៃដល់ក៏សង្ហារមិនចាញ់ នាយចឺម ប៉ុន្មានទេ គេឈ្មោះ ង៉ែត លីទី ភេទប្រុស អាយុ២២ឆ្នាំ មុខរបរជាបុគ្គលិកក្រុមហ៊ុនឯកជនមួយ រស់នៅភូមិផ្សារព្រំជើង ឃុំស្ទឹងកាច់ សាលាក្រៅ ខេត្តប៉ៃលិន ។

សមត្ថកិច្ចបន្តថា ជនដៃដល់ ង៉ែត លីទី បានយកកំណាត់ឈើប្រវែងប្រហែល ១ម៉ែត្រ ទៅវាយលើជនរងគ្រោះ បណ្តាលឱ្យរងរបួសជាច្រើនកន្លែងដូចជា កំភួនដៃទាំងសងខាង និងបែកក្បាលដេរ ៥ថ្នេរ ព្រមទាំងបែកទូរស័ព្ទ ម៉ាកអាយហ្វូន អិច មួយគ្រឿង។

យុវជន ង៉ែត លីទី ប្រាប់ថា ខ្លួនប្រច័ណ្ឌខឹងជាខ្លាំងពេក ព្រោះ «នាយចឺម» បានឆាតហ្វេសប៊ុក សាងសងអូសទាញស្នេហាទៅរកសង្សារបស់ខ្លួនជាញឹកញាប់។

បច្ចុប្បន្ន យុវជនដៃដល់ត្រូវបានសមត្ថកិច្ចឃាត់ខ្លួននៅអធិការដ្ឋាននគរបាលស្រុកសាលាក្រៅ ជាបណ្តោះអាសន្ន ដើម្បីកសាសំណុំរឿងបញ្ជូនទៅតុលាចាត់ការតាមនីតិវិធី តែរឿងហេតុលម្អិតយ៉ាងណាទៀតនោះ សមត្ថកិច្ចមិនបានបញ្ជាក់ទេ។

ចំណែក លោក សុច មេសា ហៅនាយចឺម ភ្នាក់ងារព័ត៌មានមិនអាចទាក់ទងដើម្បីសុំការពន្យល់ពាក់ព័ន្ធនឹងរឿងដ៏អាម៉ាស់ដូចខាងលើនេះបាននៅឡើយទេ ព្រោះអ្នកដែលស្គាល់លោក សុខ មេសា មិនហ៊ានប្រាប់លេខទូរស័ព្ទ៕

ភ្នំពេញ ៖ ក្រុមកម្មករ កម្មការិនីអនាម័យរបស់ក្រុមហ៊ុនស៊ិននទ្រីនិងកម្មករនិងមន្ទីរសាធារណការនិងដឹកជញ្ជូនរាជធានីភ្នំពេញជាង២៦០០នាក់ទទួលបានជំនួយមនុស្សធម៌ពីកាកបាទក្រហមកម្ពុជា ដើម្បីជួយសម្រាលទុក្ខលំបាកក្នុងជីវភាពប្រចាំថ្ងៃ។

ថ្លែងក្នុងពិធីផ្តល់អំណោយជាស្បៀង និងសម្ភារប្រើរបស់កាកបាទក្រហមកម្ពុជា ដល់បងប្អូន កម្មករ កម្កម្មការិនី អនាម័យស៊ិនទ្រីនារសៀលថ្ងៃទី ១៨ ខែធ្នូឆ្នាំ២០១៩នេះ លោក ឃួង ស្រេង អភិបាលរាជធានីភ្នំពេញបានអោយដឹងថា ការផ្តល់អំណោយមនុស្សធម៌មានគ្រឿងឧបភោគបរិភោគនិងសម្ភារប្រើប្រាស់ប្រចាំថ្ងៃ ដល់ប្អូនកម្មករ កម្មការិនី សំអាតអនាម័យនាពេលនេះ ដើម្បីជាការលើកទឹកចិត្តដល់ប្អូនដែលបានខិតខំប្រឹងប្រែងសំអាតទីក្រុងពិសេសក្នុងព្រឹត្តិការណ៍ព្រះរាជ ពិធីបុណ្យអុំទូកបណ្តែតប្រទីបសំពះព្រះខែនិងអកអំបុកនាពេលកន្លងមក ដែលធ្វើអោយរាជធានីភ្នំពេញនៅតែរក្សាបានភាពស្អាតជាប់ជាប្រចាំ សម្រាប់បង្អួតភ្ញៀវទេសចរ។ ឯកឧត្តមបន្ថែមថា ទោះបីអំណោយទាំងនេះមានលក្ខណៈតិចតួចក៏ពិតមែន ប៉ុន្តែ អាចដោះស្រាយជីវភាពរបស់បងប្អូនបានមួយកម្រិតផងដែរ។
លោកជំទាវកិតិ្តសង្ហបណ្ឌិត ឃួន សុដារី អនុប្រធានកាកបាទក្រហមកម្ពុជាបានសម្តែងការកោតសរសើរដល់បងប្អូនកម្មករ កម្មការិនី ដែលជាអ្នកសំអាតអនាម័យ និងដឹកជញ្ជូនសំរាមបានបំពេញការងារយ៉ាងល្អប្រសើរ ទោះស្ថិតក្នុងកាលៈទេសៈនិងការប្រឈម យ៉ាងណាក៏ដោយ នៅតែធានាអោយរាជធានីភ្នំពេញមានសោភ័ណភាពស្រស់ស្អាត គ្មានគំនរសំរាមស្អុយរលួយរាយប៉ាយឡើយ។
លោកជំទាវបានណែនាំដល់ប្រជាពលរដ្ឋទាំងអស់ បន្តចូលរួមថែរក្សាអនាម័យនៅក្នុងទីក្រុងរបស់អោយកាន់តែល្អបន្ថែមទៀត តាមរយៈការទុកដាក់សំរាមអោយបានត្រឹមត្រូវនិងមិនបោសសំរាមចោលរាយប៉ាយជាដើម។
សូមបញ្ជាក់ថា នេះគឺចាលើកទី៤ហើយដែលកាកបាទក្រហមកម្ពុជា ក្រោមគំនិតផ្តួចផ្តើមរបស់សម្តេចកិតិ្តព្រឹទ្ធបណ្ឌិតប៊ុនរ៉ានីហ៊ុនសែនប្រធានកាកបាទក្រហមកម្ពុជា ផ្តល់អំណោយមនុស្សធម៌ ដល់ប្អូនកម្មករ កម្មការិនី បោសសំអាតសំរាម បន្ទាប់ពីពួកគាត់បានបំពេញការងារបានជោគជ័យ ក្រោយព្រះរាជពិធី បុណ្យអុំទូកបណ្ដែតប្រទីបសំពះព្រះខែនិងអកអំបុករួចរាល់៕

ភ្នំពេញ ៖ នាយករដ្ឋមន្រ្តីនៃកម្ពុជា សម្តេចតេជោ ហ៊ុន សែន ប្រាប់ទៅមន្ត្រីមួយចំនួនកុំឲ្យចេះតែពូកែរាយការណ៍ និងបន្ទោសថ្នាក់ក្រោម ដោយគ្មានភាពម្ចាស់ការ ប៉ុន្តែត្រូវប្រឹងប្រែងដោះស្រាយនៅនឹងកន្លែងឲ្យបានទាន់ពេលវេលា និងមានប្រសិទ្ធភាព។ ចំពោះមន្ត្រីដែលពូកែតែរាយការណ៏ និងបន្ទោសថ្នាក់ក្រោម នឹងត្រូវដាក់ចូលឃ្លាំង មិនអាចឱ្យកាន់ការងារឡើយ។
សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជំរុញឲ្យមន្ត្រីថ្នាក់ជាតិ និងថ្នាក់ខេត្តខិតខំដោះស្រាយបញ្ហាបន្ទាន់នៅនឹងកន្លែង ឲ្យ មានប្រសិទ្ធភាព កុំចាំតែរាយការណ៏មកថ្នាក់លើ ដោយមិនបានប្រឹងប្រែងដោះស្រាយឲ្យអស់លទ្ធភាព។ សម្តេចតេជោ បានបញ្ជាក់ថា បទពិសោធន៏នៃករណីរលំអគារនៅខេត្តព្រះសីហនុ អាជ្ញាធរខេត្តបានធ្វើការងារយ៉ាងល្អ ក្នុង ការដោះស្រាយបញ្ហានៅចំពោះមុខភ្លាមៗ ប៉ុន្តែបែរជាមន្ត្រីថ្នាក់ជាតិរាយការណ៏មិនត្រឹមត្រូវទៅវិញ។ សម្តេចតេជោ បានឲ្យដឹងថា មន្រ្តីថ្នាក់ដឹកនាំមូលដ្ឋានមានពីរប្រភេទ ១ប្រភេទគឺមន្ត្រីពូកែតែរាយការណ៍ និងបន្ទោសកូនចៅ និងមួយប្រភេទទៀត គឺជាមន្រ្តីដែលមានភាពម្ចាស់ការ ដោះស្រាយបញ្ហានៅនឹងក្លែង ទោះបីជាមិនទាន់មានអន្តរាគមន៍ពីថ្នាក់លើក៏ដោយ។
បើតាមសម្តេចតេជោ ហ៊ុន សែន ការអន្តរាគមន៍ពីថ្នាក់ជាតិ នៅឆ្ងាយណាស់ ដូច្នោះមានតែមន្ត្រីថ្នាក់មូលដ្ឋាន ថ្នាក់មូលដ្ឋានទទួលបន្ទុក ទទួលខុសត្រូវក្នុងការធ្វើគឺជារឿងចាំបាច់បំផុត។ នោះហើយជាហេតុផលដែលរាជរដ្ឋាភិបាល ខិតខំក្នុងការផ្ទេរមុខងារ ភារកិច្ចទៅថ្នាក់ក្រោមជាតិ ដើម្បីឆ្លើយតបទៅនឹងតម្រូវការ និងការដោះស្រាយទាន់ពេលវេលា៕

ខេត្តសៀមរាប ៖ លំហាត់សមយុទ្ធសង្គ្រោះគ្រោះមហន្តរាយរៀបចំឡើងដោយអាកាសចរស៊ីវិល សហការជាមួយគណៈកម្មាធិការជាតិគ្រប់គ្រងគ្រោះមហន្តរាយ រួមទាំងកងកម្លាំងចម្រុះ នាព្រឹកថ្ងៃទី១៨ធ្នូនេះ បានលើកឡើងពី ករណីយន្ដហោះដឹកអ្នកដំណើរ មួយគ្រឿងជួបឧបទ្ទវហេតុ បន្ទាប់ពីបានចុះដល់ដីនៅអាកាសយានដ្ឋានអន្ដរជាតិខេត្តសៀមរាប ដោយត្រូវមានកិច្ចអន្តរាគមន៍ភ្លាមៗពីក្រុមអ្នកជួយសង្គ្រោះក្នុងករណីដែលយន្ត ហោះត្រូវបានឆាបឆេះនៅពេលចុះដល់ដីនោះ។
ក្នុងសមយុទ្ធនេះ លោក ឡាំ អេងហ៊ួត អនុប្រធានទី១ គណៈកម្មាធិការជាតិគ្រប់គ្រងគ្រោះ មហន្ដរាយ តំណាងឯកឧត្តមទេសរដ្ឋមន្ដ្រី គន់ គីម បានបញ្ជាក់ថា នេះជាការរៀបចំលំហាត់សមយុទ្ធ ទ្រង់ទ្រាយធំមួយសម្រាប់ការគ្រប់គ្រងគ្រោះអាសន្នប្រចាំឆ្នាំ ដោយធ្វើការហ្វឹកហាត់សាកល្បង និងផ្តល់ បទពិសោធន៍ដល់ស្ថាប័នពាក់ព័ន្ធនានា សំដៅលើកកម្ពស់ការជួយសង្គ្រោះជនរងគ្រោះ ឱ្យបានទាន់ពេល វេលានៅពេលមានឧបទ្ទវហេតុគ្រោះថ្នាក់យន្តហោះដែលអាចកើតមានឡើងជាយថាហេតុ។
លោក ឡាំ អេងហ៊ួត ថ្លែងថា គណៈកម្មាធិការជាតិគ្រប់គ្រងគ្រោះមហន្តរាយ ជាសេនាធិការ របស់រាជរដ្ឋាភិបាល ដើម្បីដឹកនាំ គ្រប់គ្រង និងសម្របសម្រួលលើការងារគ្រប់គ្រងគ្រោះមហន្តរាយជាមួយ ស្ថាប័ន ក្រសួងពាក់ព័ន្ធនានា។ គណៈកម្មាធិការជាតិគ្រប់គ្រងគ្រោះមហន្តរាយ ធ្វើការយ៉ាងជិតស្និទ្ធក្នុងនាម ជាដៃគូសហការជាមួយ កាកបាទក្រហមកម្ពុជា ពីថ្នាក់ជាតិដល់សហគមន៍ ភ្នាក់ងារសហប្រជាជាតិ ដៃគូ អភិវឌ្ឍន៍ អង្គការជាតិ-អន្តរជាតិ ដើម្បីកាត់បន្ថយផលប៉ះពាល់ ដោយគ្រោះមហន្តរាយ និងរួមចំណែកក្នុង ការកាត់បន្ថយភាពក្រីក្រនៅកម្ពុជា៕

ខេត្តស្វាយរៀង ៖ យោងតាមកិច្ចព្រមព្រៀងនៃកិច្ចសហប្រតិបត្តិការរវាងប្រទេសទាំងពីរកម្ពុជា-វៀតណាម, ក្រសួងការ ពារជាតិកម្ពុជា និងក្រសួងការពារប្រទេសវៀតណាម បានសហការរៀបចំធ្វើលំហាត់រួមគ្នាស្តីពីការជួយសង្គ្រោះគ្រោះមហន្តរាយតំបន់ព្រំដែនគោក និងការងារមនុស្សធម៌ឆ្នាំ២០១៩ រវាងប្រទេសទាំងពីរនៅព្រឹកថ្ងៃទី១៨ ខែធ្នូ ឆ្នាំ២០១៩ នេះ ស្ថិតនៅក្នុងភូមិសាស្ត្រឃុំទួលស្តី ស្រុកចន្រ្ទា ខេត្តស្វាយរៀង។

ពិធីនេះបានប្រព្រឹត្តទៅស្ថិតក្រោមអធិបតីភាពសម្តេចពិជ័យសេនា ទៀ បាញ់ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជានិងឯកឧត្តម នាយឧត្តមសេនីយ៍ ង៉ូស៊ុនលិច្ស រដ្ឋមន្ត្រីក្រសួងការពារប្រទេសវៀតណាម។

នេះគឺជាគំនិតផ្តួចផ្តើមរបស់សម្តេចតេជោ ហ៊ុន សែន ផ្ទាល់ ដែលមានបំណងត្រៀមសហការបង្ការជួយសង្គ្រោះប្រជាពលរដ្ឋនៅតាមព្រំដែនក្នុងករណីមានគ្រោះមហន្តរាយផ្សេងៗ។ សម្តេចពិជ័យសេនា ទៀ បាញ់ និងឯកឧត្តម នាយឧត្តមសេនីយ៍ ង៉ូ ស៊ុនលិច្ស បានអញ្ជើញកាត់ខ្សែបូរបើកសម្ពោធដាក់ឲ្យប្រើប្រាស់ជាផ្លូវនូវអគារមណ្ឌលសុខភាពមិត្តភាពកម្ពុជា-វៀតណាម១ខ្នងជាអំណោយរបស់ក្រសួងការពារប្រទេសវៀត ណាម ដោយចំណាយអស់ថវិកាប្រមាណ១៥ម៉ឺនដុល្លាអាមេរិកដើម្បីជាចំណងដៃសម្រាប់ប្រជាពលរដ្ឋកម្ពុជាលើការជួយទ្រទ្រង់វិស័យសុខាភិបាល។ ភាគីវៀតណាម បានផ្តល់សម្ភារៈឧបករណ៍សម្ភារៈបរិក្ខារពេទ្យដល់មណ្ឌលសុខភាពរួមមានម៉ាស៊ីនអេកូសាស្ត្រទូទៅ ម៉ាស៊ីនព្យាបាលធ្មេញ ម៉ាស៊ីនគីណា(ស្អំសរសៃ) ឧបករណ៍ ពិនិត្យត្រចៀក និងបំពង់ កនិងឧបករណ៍សង្គ្រោះបន្ទាន់ព្រមទាំងសម្ភារៈឧបករណ៍សង្គ្រោះគ្រោះមហន្តរាយមានទូកអ៊ុប័រចំនួន៤០គ្រឿងផងដែរ។ លំហាត់នេះបានប្រើប្រាស់កម្លាំងរបស់ភាគីវៀតណាមចំនួន២៥០នាក់ក្នុងនោះកម្លាំងចូលរួមលំហាត់ចំនួន៦៥នាក់ (មានពេទ្យ២៥នាក់និងកម្លាំងគីមីសាស្រ្ត៤០នាក់)  ភាគីកម្ពុជាចំនួន១,៦២៤នាក់ ក្នុងនោះក្រុមការងារដឹកនាំលំហាត់ចំនួន២១នាក់កម្លាំងធ្វើលំហាត់ចំនួន៧៩នាក់កម្លាំងបម្រើការក្នុងលំហាត់ចំនួន៣៨១នាក់និងកម្លាំងចូលរួមក្នុងពិធីបើក-បិទចំនួន១,១៤៣នាក់។

លោក នាយឧត្តមសេនីយ៍ ង៉ូ ស៊ុនលិច្ស រដ្ឋមន្ត្រីក្រសួងការពារប្រទេសវៀតណាមបានមានប្រសាសន៍ថា ការធ្វើលំហាត់យោធានេះគឺជាការចែករំលែកបទពិសោធន៍រួមគ្នានិងផ្តល់នូវផលប្រយោជន៍ដល់ប្រជាជននៃប្រទេសទាំងពីរនៅពេលដែលមានគ្រោះមហន្តរាយកើតឡើងដូចជាគ្រោះធម្មជាតិទឹកជំនន់ភ្លើងឆេះព្រៃឬគ្រោះធម្មជាតិផ្សេងៗដែលកើតឡើងជាយថាហេតុព្រមជាមួយនឹងការចូលរួមចំណែកលើកកម្ពស់កិច្ចសហប្រតិបត្តិការនិងការអភិវឌ្ឍនៅតាមតំបន់ព្រំដែនឲ្យមានការរីកចម្រើន។ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការជាតិ បានគូសបញ្ជាក់ថា លំហាត់ហ្វឹកហ្វឺននេះ គឺជាការផ្លាស់ប្តូរបទពិសោធន៍មួយ ក្នុងការធ្វើលំហាត់រួមគ្នាលើការជួយសង្គ្រោះគ្រោះមហន្តរាយ និងកិច្ចការមនុស្សធម៌ សំដៅរក្សាសន្តិភាព សន្តិសុខ សុវត្ថិភាព តាមបណ្តោយព្រំដែន នៃប្រទេសទាំងពីរ និងជាភារកិច្ចដែលបន្តរៀបចំជារៀងរាល់ឆ្នាំ ដោយឈរលើមូលដ្ឋានពិធីសារ នៃកិច្ចសហប្រតិបត្តិការរវាងកងទ័ពប្រទេសទាំងពីរ។

សម្តេចពិជ័យសេនា ទៀ បាញ់ បានលើកទឹកចិត្តដល់ថ្នាក់ដឹកនាំក្រសួង ស្ថាប័ន អាជ្ញាធរពាក់ព័ន្ធ នៃប្រទេសទាំងពីរ បន្តធ្វើឱ្យកិច្ចសហប្រតិបត្តិការនេះកាន់តែជិតស្និទ្ធ និងស៊ីជម្រៅថែមទៀត ដើម្បីឆ្លើយតបបានទាន់ពេលវេលាទៅនឹងការគំរាមកំហែងផ្សេងៗ នៅតាមព្រំដែន និងបញ្ហាប្រឈមនានា ដែលកំពុងកើតមានទាំងពេលបច្ចុប្បន្ន និងទៅអនាគត៕

ខេត្តកំពង់ចាម ៖ គណៈប្រតិភូទីក្រុង ណាំយ៉ាងជូ នៃសាធារណរដ្ឋកូរ៉េ បានអញ្ជើញ​ចូលជួបសម្ដែងការគួរសម នឹងពិភាក្សាការងារជាមួយលោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម នាថ្ងៃទី១៨ ខែធ្នូ ឆ្នាំ២០១៩។

អភិបាលខេត្តកំពង់ចាម ជួបពិភាក្សាជាមួយប្រតិភូទីក្រុងណាំយ៉ាងជូ របស់កូរ៉េខាងត្បូងគោលបំណងរបស់គណៈប្រតិភូទីក្រុងណាមយ៉ាងជូនៃសាធារណរដ្ឋកូរ៉េ នាពេលនេះគឺដើម្បីផ្សារភ្ជាប់ចំណង​មិត្តភាពរវាង​ខេត្តកំពង់ចាម នៃព្រះរាជាណាចក្រកម្ពុជាជាមួយនឹងទីក្រុងណាមយ៉ាងជូនៃសាធារណរដ្ឋកូរ៉េ ។

បន្ថែមលើនៅការផ្សារ​ភ្ជាប់ចំណង​មិត្តភាពរវាងខេត្តទាំងពីរ ទីក្រុងណាមយ៉ាងជូក៏មានគោលបំណង​ដើម្បីអញ្ជើញគណៈប្រតិភូខេត្តកំពង់ចាម ទៅចូលរួមទស្សនកិច្ចនៅទីក្រុងរបស់ខ្លួននាពេលខាងមុខផងដែរ ។

ព្រមទាំងពិភាក្សាទៅ​លើការងារអភិវឌ្ឍន៍ក្នុងទីក្រុងខេត្តកំពង់ចាម ដើម្បីឱ្យខេត្តកំពង់ចាម មានការរីកចម្រើនទៅមុខជាលំដាប់។

លោក អ៊ុន ចាន់ដា អភិបាលនៃគណៈ​អភិបាល​ខេត្តកំពង់ចាមមានប្រសាសន៍ឆ្លើយតបទៅនិងគណៈប្រតិភូនៃសាធារណរដ្ឋកូរ៉េផងដែរឲ្យដឹងថា ខេត្តកំពង់ចាម គឺជាខេត្តដែលកំពុងផ្អែកទៅលើវិស័យកសិកម្ម ដូចមានដំណាំរួមផ្សំជាច្រើន រួមមានកៅស៊ូ ម្រេច ពោតសណ្ដែក និងដំណាំជាច្រើនមុខទៀត ។

តម្លៃដំណាំស្រូវ គឺជាផ្នែកមួយដ៏សំខាន់សម្រាប់បងប្អូនប្រជាកសិករក្នុងខេត្តកំពង់ចាមផងដែរ។ លោកបានស្នើទៅដល់គណៈប្រតិភូនៃទីក្រុងណាមយ៉ាងជូ សូមជួយផ្សព្វផ្សាយដល់អ្នក​វិនិយោគិនដែលមានគោលបំណងចង់វិនិយោគក្នុងទឹកដីខេត្តកំពង់ចាម លោករីករាយនឹងទទួលយក៕ ដោយ : ប៉ែន សុផល

ភ្នំពេញ ៖ គណៈកម្មាធិការអចិន្ត្រៃយ៍រដ្ឋសភា នាព្រឹកថ្ងៃទី១៨ ខែធ្នូ ឆ្នាំ២០១៩នេះ  បានបើកកិច្ចប្រជុំក្រោម អធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា ដោយកិច្ចប្រជុំបាន កំណត់កាលបរិច្ឆេទបន្តសម័យប្រជុំលើកទី៣ នីតិកាលទី៦ នៅព្រឹកថ្ងៃចន្ទ ទី២៣ ខែធ្នូ ឆ្នាំ២០១៩ ដើម្បីពិភាក្សា និងអនុម័តនូវរបៀបវារៈចំនួន៦ បន្ថែមទៀត។

របៀបវារៈមានដូចជា៖ សេចក្តីព្រាងច្បាប់ស្តីពីការ អនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជាឱ្យក្រុមហ៊ុន ហ្រ្គីន សឺស្តែនណេប៊ល វេនឈ័រ (ខេមបូឌា) ឯ.ក សម្រាប់គម្រោងសាងសង់ស្ថានីយផលិតអគ្គិសនីដើរដោយ ពន្លឺព្រះអាទិត្យ អានុភាព២០មេហ្គាវ៉ាត់ នៅខេត្តស្វាយរៀង។ សេចក្តីព្រាងច្បាប់ស្តីពីការអនុម័តយល់ព្រម លើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន រ៉ាយ ផៅវ័រ សឹបផ្លាយ ឯ.ក សម្រាប់គម្រោងសាងសង់ស្ថានីយផលិតអគ្គិសនី ដើរដោយពន្លឺព្រះអាទិត្យ អានុភាព ៣០មេហ្គាវ៉ាត់ នៅខេត្តបន្ទាយមានជ័យ។ សេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់ របស់រាជរដ្ឋាភិ បាលនៃព្រះរាជាណាចក្រកម្ពុជា ឱ្យក្រុមហ៊ុន រ៉ាយសិន អេនើជី (ខេមបូឌា) បាត់ដំបង ឯ.ក សម្រាប់ គម្រោងសាងសង់ស្ថានីយផលិតអគ្គិសនី ដើរដោយពន្លឺព្រះអាទិត្យ អានុភាព ៦០មេហ្គាវ៉ាត់ នៅខេត្ត បាត់ដំបង។ សេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់ របស់រាជរដ្ឋាភិបាលនៃព្រះរា ជាណាចក្រកម្ពុជា ឱ្យក្រុមហ៊ុន ស្នេថេក អ៊ីនហ្វីនីត ឯ.ក សម្រាប់គម្រោងសាងសង់ស្ថានីយផលិតអគ្គិសនី ដើរដោយពន្លឺព្រះអាទិត្យ អានុភាព ៣០មេហ្គាវ៉ាត់ នៅខេត្តពោធិ៍សាត់។ សេចក្តីព្រាងច្បាប់ស្តីពីការ អនុម័តយល់ព្រមលើការធានាទូទាត់ របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ធីអេស ប៊ីភី សេកុង ផៅវ័រ អ៊ែន មីនើរ៉ល ខមភេនី លីមីធីត នៃសាធារណរដ្ឋប្រជាធិបតេយ្យប្រជាមានិតឡាវ និង សេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់ របស់រាជរដ្ឋាភិបាលនៃព្រះរាជាណាចក្រ កម្ពុជា ឱ្យក្រុមហ៊ុន សេកុង សឺមម័ល ផៅវ័រ ផ្លេន ខមភេនី លីមីធីត នៃសាធារណរដ្ឋប្រជាធិបតេយ្យប្រជា មានិតឡាវ។

សូមជម្រាបថា កាលពីសម័យប្រជុំរដ្ឋសភាលើកទី៣ នីតិកាលទី៦  នាថ្ងៃទី២៦ ខែវិច្ឆិកា ឆ្នាំ ២០១៩ កន្លងទៅ រដ្ឋសភានៅមានសល់នូវរបៀបវារៈចំនួនមួយគឺ សេចក្តីព្រាងច្បាប់ស្តីពី ការអនុម័តយល់ ព្រមឱ្យព្រះរាជាណាចក្រកម្ពុជា ចូលជាសមាជិកនៃកិច្ចព្រមព្រៀងសម្រាប់អនុវត្តបទបញ្ញត្តិនៃអនុសញ្ញាសហប្រជាជាតិស្តីពីច្បាប់សមុទ្រ ចុះថ្ងៃទី១០ ខែធ្នូ ឆ្នាំ១៩៨២ ទាក់ទងនឹងការគ្រប់គ្រង និងការអភិរក្ស ផលស្តុកត្រីផ្លាស់ទីមធ្យម និងផលស្តុកត្រីផ្លាស់ទីឆ្ងាយ។ ដូច្នេះសម័យប្រជុំពេញអង្គនាថ្ងៃទី២៣ ខែធ្នូ ឆ្នាំ២០១៩ ខាងមុខនេះ នឹងត្រូវអនុម័តនូវរបៀបវារៈសរុបទាំងអស់ចំនួន៧៕

ភ្នំពេញ ៖ បុរសម្នាក់ជាអ្នករត់ម៉ូតូកង់បីឥណ្ឌាមួយគ្រឿងធ្វើដំណើរតាមបណ្តោយផ្លូវលេខ៥១ខណមកដល់ក្បែរនឹងវត្តភ្នំត្រូវបានពស់ថ្លាន់មួយក្បាលយ៉ាងធំវារឡើងចូលសងំលើម៉ូតូបង្កការភ្ញាក់ផ្អើលពេញតែផ្លូវតែម្តង។

ហេតុការណ៍នេះបានកើតឡើងកាលពីវេលាម៉ោង ៨នឹង៣៥នាទីយប់ថ្ងៃទី១៧ខែធ្នូឆ្នាំ២០១៩តាមបណ្តោយផ្លូវលេខ៥១នៅចំណុចក្បែរនឹងវត្តភ្នំស្ថិតនៅក្នុងសង្កាត់វត្តភ្នំខណ្ឌដូនពេញ។

តាមព័ត៍មានពីម្ចាស់កង់បីបានឲ្យដឹងថាមុនពេលកើតហេតុខ្លួនគាត់ជាអ្នករត់ម៉ូតូកង់បីកង់បីឥណ្ឌាពណ៌សពាក់ស្លាកលេខភ្នំពេញ1GT-0818 បើកបរតាមបណ្តោយផ្លូវលេខ៥១ក្នុងទិសដៅពីជើងទៅត្បូងខណពេលដែលគាត់ទើបចេញមកពីហូបបាយរួចក៏បើកម៉ូតូមកដល់ក្បែរនឹងវត្តភ្នំបានប្រទះឃើញមានពស់ថ្លាន់មួយក្បាលដ៏ធំនឹងមានប្រវែងវែងប្រហែលជា៣ម៉ែត្រកន្លះវារកាត់ផ្លូវពេលភ្លាមៗនោះគាត់ឈប់ម៉ូតូដើម្បីឲ្យពស់ថ្លាន់វារទៅផុតក៏ប៉ុន្តែពស់ថ្លាន់នោះបែជាវារឡើងម៉ូតូកង់បីហើយលូនចូលក្នុងចង្កូតសង្ងំជាងមួយម៉ោងធ្វើអោយម្ចាស់និងអ្នកធ្វើដំណើរតាមដងផ្លូវគាត់នាំគ្នាចោមរោមមើលនឹងនាំគ្នាទាញយកសត្វពស់ចេញក៏ប៉ុន្តែពស់ថ្លាន់នោះអត់ព្រមចេញសោះរយះពេលជិតមួយម៉ោងទើបយកចេញបានតែម្តង។

ក្រោយពេលកើតហេតុបុរសជាអ្នករត់ម៉ូតូកង់បី គាត់បានយកពស់ថ្លាន់នោះទៅលែងនៅឯវត្តភ្នំវិញផងដែរ៕

ភ្នំពេញ ៖ ចាប់តាំងពីឆ្នាំ២០១៦ មកដល់បច្ចុប្បន្ន កម្ពុជាបានទទួលថវិកាចំនួន ១១,៦ លានដុល្លារ អាមេរិក ពីការលក់ឥណទានកាបូន ឱ្យទៅក្រុមហ៊ុនអន្តរជាតិធំៗមានដូចជា Disney និង Shall និងក្រុមហ៊ុន Gucci»។ លោករដ្ឋមន្ត្រីឲ្យដឹងទៀតថា កម្ពុជា កំពុងតែធ្វើការសិក្សា និងបន្តលក់ កាបូននៅក្នុងដែនជម្រកសត្វព្រៃព្រៃឡង់ ក្នុងភូមិសាស្ត្រខេត្តស្ទឹងត្រែង បន្ថែមទៀត»។ នេះជាការ ថ្លែងឲ្យដឹងពីរដ្ឋមន្ត្រីក្រសួងបរិស្ថាន ឯ.ឧ សាយ សំអាល់ ។

រដ្ឋមន្ត្រីក្រសួងបរិស្ថាន សាយ សំអាល់ បានបញ្ជាក់ថា តំបន់ទាំងបីដែលកម្ពុជាលក់កាបូន ទៅ ឲ្យក្រុមហ៊ុនអន្តរជាតិធំៗ ទាំងពីរនេះ គឺមានតំបន់ដែនជម្រកសត្វព្រៃកែវសីមា ដែនជម្រកសត្វព្រៃ ក្រវ៉ាញ ខាងត្បូង និងដែនជម្រកសត្វព្រៃតាតៃ ក្នុងក្របខណ្ឌទីផ្សារស្ម័គ្រចិត្ត។ នៅក្នុងតំបន់អាស៊ី អាគ្នេយ៍ មានតែកម្ពុជា និងឥណ្ឌូនេស៊ី ប៉ុណ្ណោះដែលមាន លទ្ធភាពក្នុងការលក់ឥណទានកាបូន ក្នុងទីផ្សារកាបូនស្ម័គ្រចិត្ត។ ឯកឧត្តមរដ្ឋមន្ត្រីឲ្យដឹងទៀតថា កម្ពុជា កំពុងតែធ្វើការសិក្សា និងបន្ត លក់កាបូននៅក្នុងដែនជម្រកសត្វព្រៃព្រៃឡង់ក្នុងភូមិសាស្ត្រខេត្តស្ទឹងត្រែងបន្ថែមទៀត»។ លោក សាយ សំអាល់ បន្តថា ថវិកាទាំងអស់ ដែលបានមកពីការលក់ឥណទានកាបូន នេះត្រូវ បានយកទៅប្រើប្រាស់សម្រាប់ការពារ និងអភិរក្សព្រៃឈើ និងអភិវឌ្ឍន៍ជីវភាព សហគមន៍ក្នុង តំបន់ការពារធម្មជាតិទាំង៣ ដើម្បីធ្វើជាគំរូសម្រាប់ឈានទៅទទួល បានថវិកា«ការទូទាត់ ផ្អែកតាម លទ្ធផល»ពីមូលនិធិអាកាសធាតុបៃតងនៃអនុសញ្ញាក្របខណ្ឌសហប្រជាតិស្តីពីការប្រែប្រួល អាកាសធាតុ ដែលគ្រោងនឹងអនុវត្តចាប់ពីឆ្នាំ២០២០។

រដ្ឋមន្ត្រីបរិស្ថាន បានបន្ថែមថា ចំពោះការទូទាត់ទីផ្សារកាបូនស្ម័គ្រចិត្ត ផ្អែកតាមលទ្ធផល កម្ពុជានឹង បញ្ចប់ការត្រៀមលក្ខណៈ (REDD+ Readiness) ក្នុងពាក់កណ្តាលឆ្នាំ២០២០ ដើម្បីមានសិទ្ធិ ដាក់គម្រោងយកថវិកាពីមូលនិធិអាកាសធាតុបៃតង។ ក្នុងពេលបច្ចុប្បន្ន កម្ពុជាគឺជាប្រទេសមួយ ក្នុង ចំណោមប្រទេសកំពុងអនុវត្តកម្មវិធីរេដបូកបានល្អដទៃទៀត មានដូចជាម៉ាឡេស៊ី វៀតណាម ឥណ្ឌូនេស៊ី ប្រេស៊ីល អេក្វាទ័រ កូឡំប៊ី ឈីលី ម៉ិកស៊ីកូ កេនយ៉ា ដែលនឹងមានសិទ្ធិដាក់គម្រោងយក ថវិកាពីមូលនិធិអាកាសធាតុបៃតង។ ផ្អែកតាមកម្រិតយោងព្រៃឈើ (Forest Referral Level) កម្ពុជាអាចផលិតឥណទានកាបូនលើសពី១០លានតោន/ឆ្នាំ សម្រាប់ទទួលបានថវិកាក្នុងក្របខណ្ឌ ការ ទូទាត់ផ្អែកតាមលទ្ធផលពីមូលនិធិអាកាសធាតុបៃតង។

សូមជម្រាបដែរថា បច្ចុប្បន្នកម្ពុជា មានព្រៃឈើគ្របដណ្តប់ប្រមាណ៥០% នៃផ្ទៃប្រទេស ដែលជា អត្រា ខ្ពស់បំផុតនៅក្នុងតំបន់អាស៊ីអាគ្នេយ៍។ មកទល់បច្ចុប្បន្ននេះ រាជរដ្ឋាភិបាលបានបង្កើនផ្ទៃដី តំបន់ការពារធម្មជាតិ ដែលស្ថិតនៅក្រោមយុត្តាធិការរបស់ក្រសួងបរិស្ថាន រហូតដល់ប្រមាណ ៤១% នៃផ្ទៃប្រទេស គឺស្មើនឹងប្រមាណ៧,២លានហិកតា ដែលធ្វើឱ្យកម្ពុជាឈរលំដាប់ទី២ នៅ អាស៊ីបន្ទាប់ពីប្រទេសប៊ូតាន៕

ភ្នំពេញ ៖ សម្ដេចតេជោ ហ៊ុន សែន នៅព្រឹកថ្ងៃទី១៧ ធ្នូនេះ បានអនុញ្ញាតឲ្យលោក តាន់ស៊្រី ចាម៉ា លូឌីន អ៊ីប្រាហ៊ីម ប្រធាននាយកប្រតិបត្តិក្រុមហ៊ុន Axiata group Berhad រួមនិងនាយកប្រតិបត្តិ ក្រុមហ៊ុន smart axiata នៅកម្ពុជា ចូលជួបសំដែងការគួរសម។ សម្តេចតេជោ ហ៊ុន សែន ស្នើឲ្យ ក្រុមហ៊ុនស្មាត ពិចារណា ពង្រីកវិសាលភាពរបស់ក្រុមហ៊ុននៅក្នុងដណ្ដប់ទៅលើទីជនបទ។

លោក អ៊ាង សុផល្លែត ជំនួយការសម្ដេចតេជោ បានឱ្យដឹងថាក្នុងជំនួបនេះ តាន់ស៊្រី បាន គោរពរាយការណ៍ជូនសម្ដេចតេជោថា ក្រុមហ៊ុនស្មាត បានបោះទុនវិនិយោគ នៅកម្ពុជាអស់ ១. ៤០០ លានដុល្លារ ហើយក្រុមហ៊ុនកំពុងតែមានគម្រោងបង្កើត វិនិយោគថែមទៀតនោះ គឺការ វិនិ យោគ ទៅលើបច្ចេកវិទ្យាថ្មី ទំនើបដូចជាប្រពន្ធហ្វាយជី (5G) ផងដែរ។ តាន់ស៊្រី បានបន្តថា ការ វិនិយោគរបស់ក្រុមហ៊ុនស្មាត គឺមិនត្រឹមតែដើម្បីរកផលចំណេញនោះទេ គឺដើម្បីចូលរួមចំណែក ក្នុងការអភិវឌ្ឍសេដ្ឋកិច្ចកម្ពុជា ក៏ដូចជាសង្គមកម្ពុជាផងដែរ។ ជាអាទិ៍ក្រុមហ៊ុនបានចូលរួមចំណែកយ៉ាងច្រើនទៅលើវិស័យអប់រំនិងវិស័យសុខាភិបាលក៏ដូចជាវិស័យបរិស្ថាននិងកីឡាផងដែរ។ លោកតាន់ស៊្រី បានគោរពជម្រាបជូនសម្ដេច ផងដែរថាក្រុមហ៊ុន នឹងបន្តពង្រីកវិសាលភាពរបស់ក្រុមហ៊ុនទៀតទៅគ្របដណ្តប់នៅតាមទីជនបទ។ ពីនោះទៅទៀត តាន់ស៊្រី ក៏បានស្នើសុំអនុសាសន៍ ដ៏ខ្ពង់ខ្ពស់អំពីសម្ដេចតេជោ ដើម្បីធ្វើយ៉ាងណាឲ្យក្រុមហ៊ុន អាច ចូលរួមចំណែកកាន់តែខ្លាំងឡើងថែមទៀតនៅក្នុងការអភិវឌ្ឍន៍សង្គមកម្ពុជា។

សម្ដេចតេជោ បានថ្លែងអំណរគុណចំពោះតាន់ស៊្រី និងក្រុមហ៊ុន ដែលបានចូលរួមចំណែកក្នុង ការ អភិវឌ្ឍកម្ពុជា ជាពិសេសលើវិស័យអប់រំ វិស័យបរិស្ថាន វិស័យសុខាភិបាលជាដើម។ សម្ដេចបាន ផ្ដល់អនុសាសន៍ឱ្យក្រុមហ៊ុន ពិចារណា ពង្រីកវិសាលភាពរបស់ក្រុមហ៊ុន នៅក្នុងដណ្ដប់ទៅលើទី ជនបទ ឲ្យបានច្រើនជាទីបំផុតព្រោះប្រជាជនកម្ពុជា ជាពិសេសសិស្សានុសិស្សកម្ពុជាត្រូវការបច្ចេក វិទ្យា នេះ ដើម្បីស្រូបយកចំណេះដឹងថែមទៀត។ សម្ដេចតេជោ ក៏បានស្នើសុំឲ្យក្រុមហ៊ុនពិចារណា ផងដែរ ក្នុងការជួយដល់សាលារៀនក៏ដូចជាមន្ទីរពេទ្យ ដើម្បីឲ្យគ្រូបង្រៀន និងសិស្ស មានឱកាស បាន ប្រើប្រាស់អ៊ីនធឺណិត ដើម្បីស្រូបយកចំណេះវិជ្ជា ផងដើម្បីស្វែងយល់អំពី កត្តាសង្គមផ្សេង ៗ ទៀតផង ហើយតាមរយៈការផ្ដល់សេវាគ្របដណ្ដប់ទៅតាមសាលារៀននេះ អាចទាក់ទាញការ ចាប់ អារម្មណ៍ពីសិស្ស និងពីប្រជាជនកម្ពុជាកាន់តែខ្លាំងឡើង ទៅលើប្រព័ន្ធស្មាតដែលមានស្រាប់នេះ ៕