ភ្នំពេញ ៖ ថ្ងៃទី១៨ មិថុនានេះ ជា មន្ត្រីរាជការក្នុងស្ថាប័នរដ្ឋ ឯកជន និងប្រជារាស្ត្រខ្មែរគ្រប់លំដាប់ថ្នាក់ត្រូវបានឈប់សម្រាកនៅថ្ងៃទី១៨ មិថុនានេះ ដើម្បីអបអរព្រះរាជពិធីចម្រើនព្រះជន្មរបស់សម្តេចព្រះវររាជមាតាជាតិខ្មែរព្រះមហាក្សត្រី នរោត្តម មុនិនាថ សីហនុ គម្រប់៨៣ យាងចូល៨៤ព្រះវស្សា។

ថ្ងៃនេះ ប្រជាពលរដ្ឋ សិស្សានុសិស្ស និងមន្ត្រីរាជការក៏ត្រូវបានឈប់សម្រាកមួយថ្ងៃ។ក្នុងឱកាសទិវាចម្រើន ព្រះជន្មប្រកបដោយនក្ខត្តឫក្សដ៏ឧត្តមនេះ ប្រជារាស្ត្រខ្មែរប្រុស-ស្រី ក៏បាននាំគ្នាថ្វាយសព្ទសាធុការយ៉ាងកងរំពង ចំពោះព្រះមាតាជាតិដ៏ជាទីគោរពស្រឡាញ់របស់ខ្លួនផងដែរ។

ក្នុងឱកាសនេះ «មេគង្គប៉ុស្តិ៍» សូមលើកយកឯកសារសង្ខេបពីព្រះរាជជីវប្រវត្តិរបស់សម្តេចម៉ែ មកជម្រាបជូន ដូចខាងក្រោម ៖

ព្រះមហាក្សត្រី នរោត្តម មុនិនាថ សីហនុ មានព្រះនាមដើមថា ប៉ូល-ម៉ូនិក អ៊ីហ្សហ្ស៊ី Paule Monique IZZI ប្រសូតនៅថ្ងៃទី១៨ ខែ មិថុនាឆ្នាំ១៩៣៦ នាទីក្រុងសាយហ្គន ឬហូជីមិញ។ ព្រះបិតាព្រះនាម ហ្សង់ ហ្វ្រង់ស្វ័រ អ៊ីហ្សហ្ស៊ី (Jean François Izzi) ជាជនជាតិបារាំង ដើមកំណើតអ៊ីតាលី បានទទួលមរណភាពនៅសង្គ្រាមលោកលើកទី២។ ព្រះមាតាព្រះនាម ប៉ុម ពាង (Pomme Peang) ជាជនជាតិវៀតណាម។ទ្រង់មានជេដ្ឋភគិនី ឬបងស្រីម្នាក់នាម អាន-ម៉ារី អ៊ីហ្សហ្ស៊ី Anne-Marie IZZI ។

កាលពីនៅវ័យកុមារភាព ទ្រង់បានសិក្សារៀនសូត្រនៅសាលាបឋមសិក្សាព្រះនរោត្តម និង មធ្យមសិក្សា នៅវិទ្យាល័យព្រះស៊ីសុវត្ថិ និង នៅវិទ្យាល័យដេកាត ក្រុងភ្នំពេញ។កញ្ញាចេះ និង ប្រើប្រាស់ភាសាខ្មែរបារាំង និង អង់គ្លេស។នៅចុងទសវត្សរ៍ឆ្នាំ១៩៦០ ព្រះអង្គជាប្រធានកាកបាទក្រហមខ្មែរ ហើយមកដល់បច្ចុប្បន្ន ជាប្រធានកិត្តិយសកាកបាទក្រហមកម្ពុជា។

នៅខែមេសា ឆ្នាំ១៩៥២ កញ្ញា ប៉ូល ម៉ូនិក អ៊ីស៊ី បានរៀបអភិសេកជាមួយព្រះមហាក្សត្រ នរោត្តម សីហនុ ជាលក្ខណៈឯកជន ហើយរៀបអភិសេកជាផ្លូវការ នៅឆ្នាំ១៩៥៥។ ក្រោយរាជាភិសេក ទ្រង់មានបុត្រា២ព្រះអង្គ គឺព្រះបាទ នរោត្តម សីហមុនី ជាមហាក្សត្របច្ចុប្បន្ន និង ព្រះបាទ នរោត្តម នរិន្ទ្រពង្ស ដែលបានសោយទិវង្គតដោយសាររោគាពាធ។

លុះដល់ឆ្នាំ១៩៩២ អ្នកម្នាង ម៉ូនិក ត្រូវបានព្រះករុណាសម្ដេចនរោត្តម សីហនុ ប្រទានគោរមងារជាសម្ដេចព្រះជាយា។ មួយឆ្នាំបន្ទាប់មក អ្នកម្នាងទទួលគោរមងារជាសម្ដេចព្រះមហេសី ហើយនៅឆ្នាំ១៩៩៦ ទ្រង់ទទួលបរមងារជា សម្ដេចព្រះរាជអគ្គមហេសី។ ក្រោយមកទៀត ទ្រង់ត្រូវបានថ្វាយព្រះបរមងារថាជា ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល។

គួរបញ្ជាក់ថា សម្តេចព្រះវររាជមាតាជាតិខ្មែរ ឬ សម្តេចម៉ែ ទ្រង់ជាមហេសីតែមួយក្នុងចំណោមមហេសីនិង អ្នកម្នាងទាំង៧ របស់អតីតព្រះមហាក្សត្រខ្មែរ ដែលបានទទួលព្រះស្រឹង្គារ ក្តីស្រឡាញ់ មេត្តា ប្រោសប្រណីយ៉ាងខ្លាំងក្លាពីព្រះស្វាមីក្នុងរយៈពេលដ៏យូរលង់ជាង កន្លះសតវត្សរ៍កន្លងទៅនេះ។

ព្រះអង្គបានយាងតាមអតីតព្រះមហាក្សត្រទៅស្ទើរគ្រប់ទិសទីក្នុងគ្រប់ កាលៈទេសៈ មិនថាក្នុងសម័យតស៊ូក្រោយរដ្ឋប្រហារ ១៨ មីនា ១៩៧០ សម័យកម្ពុជាប្រជាធិបតេយ្យខ្មែរក្រហម សម័យការតស៊ូត្រីភាគីនៅតំបន់ជាយដែនខាងលិច ឬសម័យព្រះរាជាណាចក្រកម្ពុជាទី២ នោះឡើយ។

នៅថ្ងៃទី១៨ មិថុនា ឆ្នាំ២០១៩ នេះ គឺជាព្រះរាជពិធីបុណ្យចម្រើនព្រះជន្មគម្រប់៨៣ យាងចូល៨៤ ព្រះវស្សារបស់សម្តេចព្រះមហាក្សត្រី នរោត្តម មុនីនាថ សីហនុ៕

ដោយ ៖ នូវី

បន្ទាយមានជ័យ ៖ កម្លាំងនគរបាលខេត្តបន្ទាយជ័យក្រោមការដឹកនាំរបស់លោកឧត្តមសេនីយ៍ទោ អាត់ ខែម ស្នងការនៃស្នងការដ្ឋាននគរបាលខេត្ត បានដាក់ពង្រាយនៅលើកំណាត់ផ្លូវជាតិលេខ៥ពីក្រុងសិរីសោភ័ណរហូតដល់ក្រុងប៉ោយប៉ែតដើម្បីធ្វើឆែកឆេរលើគ្រប់រថយន្តដែលសង្ស័យ។ការពង្រាយនេះធ្វើឡើងនៅព្រលប់ថ្ងៃទី១៧ខែមិថុនាឆ្នាំ២០១៩បង្កការភ្ញាក់ផ្អើលដល់អ្នកធ្វើដំណើរ។

ថ្លែងប្រាប់អ្នកយកព័ត៌មាននៅព្រឹកថ្ងៃទី១៨ខែមិថុនាឆ្នាំ២០១៩នេះលោកឧត្តមសេនីយ៍ត្រី សិទ្ធិ ឡោះ ស្នងការរងទទួលផែនព្រហ្មទ័ណ្ឌនៃស្នងការដ្ឋាននគរបាលខេត្តបន្ទាយមានជ័យបានអោយដឹងថា: ដោយបានទទួលព័ត៌មានពីនាយកដ្ឋាននគរបាលព្រហ្មទ័ណ្ឌអគ្គស្នងការដ្ឋាននគរបាលជាតិថាមានករណីចាប់ជំរិតទារប្រាក់ពីភ្នំពេញ ហើយជនល្មើសអាចនឹងមកដល់ខេត្តបន្ទាយមានជ័យ នៅវេលាម៉ោង១១និង៣០នាទីអាធ្រាត្រថ្ងៃទី១៧ខែមិថុនាឆ្នាំ២០១៩កម្លាំងនគរបាលជំនាញព្រហ្មទណ្ឌខេត្ត និងកំលាំងអធិការដ្ឋាននគរបាលស្រុកក្រុងពាក់ព័ន្ធ ដែលដឹកនាំផ្ទាល់ដោយលោកឧត្តមសេនីយ៍ទោអាត់ ខែម ស្នងការ និងលោកបានធ្វើការឆែកឆេរស្រាវជ្រាវ រហូតឃាត់ខ្លួនបានជនសង្ស័យបីនាក់នឹងរំដោះជនរងគ្រោះម្នាក់នៅចំនុចសណ្ឋាគារប៉ោយប៉ែតស៊ីធី។

លោកឧត្តមសេនីយ៍ត្រីសិទ្ធិ ឡោះ បន្តថា : ក្នុងនោះកម្លាំងបានស្ទាក់ចាប់បានជនល្មើស និងបក្ខពួក០៣នាក់រួមមាន :១-ឈ្មោះ ព្រាប វណ្ណាភេទ ប្រុស ២៣ឆ្នាំជាអ្នកបើកបររថយន្ត។២- ឈ្មោះ ព្រាប វណ្ណះ ភេទប្រុស អាយុ២៩ឆ្នាំ ជាអ្នកចាប់ជំរឹត។៣- ,ឈ្មោះ វ៉ាន់ ស្រេត ភេទប្រុស អាយុ២៨ឆ្នាំ ជាអ្នកសមគំនិត ។ ​រឹបអូសរថយន្តម៉ាកតូយ៉ូតាឡិចសុីស៣០០មួយគ្រឿង ពណ៌កាំម៉ៃ ស្លាកលេខ ភ្នំពេញ 2AL-8004 ដែលជាមធ្យោបាយប្រព្រឹត្តបទល្មើស៕

ភ្នំពេញ​ ៖ មនុស្សប្រុសស្រីជិត២០នាក់និងថ្នាំញៀនចំនួន១៤០កញ្ចប់តូច ត្រូវបានកម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញសហការណ៍ជាមួយអធិការដ្ឋាននគរបាលខណ្ឌដូនពេញបានធ្វើការចុះបង្ក្រាបនិងឃាត់ខ្លួន កាលពី វេលាម៉ោង១៨និង៣០នាទីយប់ ថ្ងៃទី១៧ ខែមិថុនា ឆ្នាំ២០១៩ នៅចំណុចបន្ទប់គ្មានលេខ(សំណង់មិនរៀបរយ) ផ្លូវរថភ្លើង ក្រុម២៦ ភូមិ២ សង្កាត់ស្រះចក ខណ្ឌដូនពេញ រាជធានីភ្នំពេញ ។

យោងតាមរបាយការណ៍របស់សមត្ថកិច្ចបានឲ្យដឹងថាដោយ
បានការអនុញ្ញាតតាមរយៈទូរស័ព្ទពីលោក ឡុង ជាប ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងចូលរួមផ្ទាល់ពីលោក អ៊ុ បញ្ញា ជាក្រឡាបញ្ជីអមផង ដឹកនាំដោយលោកវរសេនីយ៍ទោ រ៉ឹម ម៉ិច នាយរងការិយាល័យប្រឆាំងគ្រឿងញៀន និងលោកវរសេនីយ៍ទោ ស៊ិន វណ្ណស នាយរងការិយាល័យប្រឆាំងគ្រឿងញៀន កម្លាំងប្រតិបត្តិការសរុបចំនួន ១៥នាក់បានចុះដល់ចំណុចខាងលើធ្វើការត្រួតពិនិត្យឆែកឆេររកឃើញក្រាមពណ៌សថ្លាសង្ស័យជាគ្រឿងញៀនចំនួន ១៤០កញ្ចប់តូច និងឃាត់ខ្លួនមនុស្សចំនួន ៤នាក់ ភេទប្រុស។

បន្ទាប់មកក្រុមការងារខាងការិយាល័យប្រឆាំងគ្រឿងញៀនបានឈានទៅធ្វើការបង្រ្កាបតាមបណ្តោយផ្លូវរថភ្លើងឃាត់ខ្លួនមនុស្សបានចំនួន១៨នាក់ ស្រី១នាក់ និងម៉ូតូចំនួន ១២គ្រឿងបន្ថែមទៀត។

បច្ចុប្បន្នជនសង្ស័យខាងលើ រួមនឹងវត្ថុតាងត្រូវបានបញ្ជូនមកការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ ដើម្បីធ្វើការសាកសួរបន្តតាមនីតិវិធី៕

ដោយ ៖ សហការី
ខេត្តព្រះសីហនុ ៖ ភ្ញៀវទេសចរជាច្រើននាក់ដែលបានធ្វើដំណើរតាមទូកទេសចរណ៍របស់ក្រុមហ៊ុន ដា លី ធួរ ខេមបូឌា ហើយបានលិចនៅក្នុងសមុទ្រក្រុងព្រះសីហនុ នោះ គឺបណ្តាលមកពីរទូកមួយគ្រឿងនេះ មានសភាពចាស់ទ្រុតទ្រោមខ្លាំងពេកព្រោះ សំបកទូកធ្វើដែក ចាក់ស្មាច់ នាំមកពីប្រទេសថៃ ប៉ុន្តែ មិន មាន គ្រោះថ្នាក់ដល់អាយុជីវិតមនុស្សទេ ។

ទាក់ទិន បញ្ហា នេះ លោក ណុប បញ្ញា ស្នងការរង នគរបាល ខេត្ត ព្រះសីហនុ ទទួលបន្ទុកផែនទេសចរណ៍ បានឱ្យដឹងថា យប់ ម៉ិញ នេះ មាន ទូក ដឹក ភ្ញៀវ ទេសចរ ១ គ្រឿង របស់ ក្រុមហ៊ុន ដា លី ធួ រ ខេមបូឌា បានលិចនៅក្នុងសមុទ្រទ្រ មាន ទី តាំង នៅ ទល់មុខ ឆ្នេរ ម្លប់ជ្រៃ ស្ថិត ក្នុង ក្រុង ព្រះសីហនុ នៅ ម៉ោង ៩ យប់ ថ្ងៃទី ១៦ ខែមិថុនា ឆ្នាំ ២០១៩ ។

លោក ណុប បញ្ញា ស្នងការរង នគរបាល ខេត្ត ព្រះសីហនុ បាន ឱ្យ ប្រព័ន្ធ ផ្សព្វផ្សាយ ដឹង នៅ ថ្ងៃ ទី ១៧ ខែមិថុនា ឆ្នាំ ២០១៩ នេះ ថា ទូក ទេសចរណ៍ ១ គ្រឿង ដែល លិច នោះ ដោយសារ បញ្ហា លក្ខណៈ បច្ចេកទេស គឺ មិន ជាប់ ពាក់ព័ន្ធ បញ្ហា អាកាសធាតុ មិនល្អ មូលដ្ឋាន នេះ មាន ភ្លៀង ធ្លាក់ មាន រលក សមុទ្រ និង ខ្យល់ បោកបក់ ខ្លាំង នោះទេ ។

លោក ថា ហេតុការណ៍ ខាងលើ នេះ គឺ បណ្តាល ឱ្យ មាន ការខូចខាត ទ្រព្យសម្បត្តិ មួយចំនួន និង ខូចខាត ទូក ដឹក ភ្ញៀវ ទេសចរណ៍ ខ្លះៗ ប៉ុន្តែ មិន មាន គ្រោះថ្នាក់ ដល់ អាយុជីវិត មនុស្ស ទេ ។

បើទោះបីជាមានការលើកឡើង របស់ លោក ស្នងការ រងរូបនេះខ្វែងគំនិតគ្នា ជាមួយ ភ្ញៀវទេសចរណ៍ជាច្រើននាក់ដែលពួកគេ ធ្លាប់បានជិះទូកលិចមួយនេះក៏ដោយ ភ្ញៀវទាំងនោះនៅតែមានការប្រុងប្រយ័ត្នជានិច្ច ពួកគាត់ថា ទូកចាស់ទ្រុឌទ្រោមគាត់ លែងហ៊ាន ជិះទៀតហើយ ព្រោះមាន ហានិភ័យ ខ្ពស់ណាស់ ថ្ងៃក្រោយវាអាចលិចលង់ នៅពេលណាមួយ ដោយ យថាហេតុ។

ផ្តើម ពី បញ្ហា នេះ លោក ណុប បញ្ញា បាន ក្រើនរំលឹក ដល់ ប្រជាពលរដ្ឋ ជាពិសេស ភ្ញៀវទេសចរ ឱ្យ ប្រុងប្រយ័ត្ន ខ្ពស់ ក្នុង ការធ្វើដំណើរ តាម សមុទ្រ ។ ព្រោះថា រដូវ នេះជា រដូវវស្សា មាន ភ្លៀង ធ្លាក់ ច្រើន មាន ខ្យល់ បោកបក់ និង មាន រលក សមុទ្រ ធំៗ ផង នោះ ។ លោក សូម អំពាវនាវ ដល់ អ្នក ធ្វើដំណើរ តាម ផ្លូវ សមុទ្រ ជាពិសេស ភ្ញៀវទេសចរ ធ្វើ ដំណើរ កម្សាន្ត តាម សមុទ្រ និង ប្រជា នេសាទ ជាដើម ត្រូវ បង្កើន ការប្រុងប្រយ័ត្ន ពី សុវត្ថិភាពរបស់ ខ្លួន ឱ្យបាន ជា ប្រចាំ ។

ជាងនេះទៀត ប្រសិនបើ សង្កេតឃើញថា នៅ មូលដ្ឋាន ខេត្ត ព្រះសីហនុ កំពុងតែ មាន ភ្លៀង ខ្យល់ និង រលក សមុទ្រ បោកបក់ ខ្លាំង សូម កុំ ធ្វើ ណើ រតា ម សមុទ្រ ឱ្យសោះ ដើម្បី ការពារ សុវត្ថិភាព ទាំងអស់គ្នា ៕

ដោយ ៖ សហការី

ភ្នំពេញ ៖ ពលកម្មកុមារ គឺជាបាតុភូតសង្គមដ៏ស្មុគស្មាញ ដែលមានទំនាក់ទំនងទៅនឹងទិដ្ឋភាពសេដ្ឋកិច្ចសង្គមកម្ពុជា និងឥរិយាបថសហគមន៍។ ភាពក្រីក្រ និងការមិនយល់ដឹង របស់សហគមន៍ ដែលមានកម្រិតទាប គឺជាមូលហេតុចម្បងដែលនាំឱ្យមានពលកម្មកុមារ។រាជរដ្ឋាភិបាលមានឆន្ទះក្នុងការបញ្ចប់ពលកម្មកុមារនៅឆ្នាំ២០២៥ ជាពិសេសនៅក្នុងសិប្បកម្មផលិតឥដ្ឋ។

ដើម្បីគ្រប់គ្រង និង អភិវឌ្ឍវិស័យសិប្បកម្មផលិតឥដ្ឋ ឱ្យមានបទដ្ឋានការងារល្អប្រសើរ និងធានានិរន្តរភាព នៃការលុបបំបាត់ពលកម្មកុមារ នៅក្នុងវិស័យនេះ ក្រសួងការងារនិងបណ្តុះបណ្តាលវិជ្ជាជីវៈ នៅថ្ងៃទី១៧ ខែមិថុនា ឆ្នាំ២០១៩នេះ បានរៀបចំសិក្ខាសាលាស្តីពី យុទ្ធនាការ វិធានការទប់ស្កាត់ការប្រើប្រាស់ពលកម្មកុមារ ក្នុងវិស័យសិប្បកម្មផលិតឥដ្ឋ នៅតាមបណ្តារាជធានី\ខេត្ត នៅទីស្តីការក្រសួង។

លោកជំទាវ ស៊ើង សរសុចិត្តា រដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈ មានប្រសាសន៍ថា កុមារ គឺជាធនធានមនុស្សដែលមិនអាចខ្វះបាន សម្រាប់ការអភិវឌ្ឍប្រទេសជាតិនាពេលអនាគត ដើម្បីឱ្យធនធានមនុស្សប្រកបដោយសក្តានុពល ការផ្តល់កិច្ចការពារ និងការអភិវឌ្ឍកុមារ គឺជាភារកិច្ចយ៉ាងសំខាន់ ដែលតម្រូវឱ្យមានការអនុវត្ត តាមបែបពហុវិស័យបញ្ចូលគ្នា។

រាជរដ្ឋាភិបាលកម្ពុជា បានចាត់ទុកការលុបបំបាត់ពលកម្មកុមារជាបញ្ហាដ៏សំខាន់មួយ នៅក្នុងចំណោមបញ្ហាសំខាន់ជាច្រើនរបស់កម្ពុជា ជាពិសេសគឺកិច្ចខិតខំប្រឹងប្រែងរបស់រាជរដ្ឋាភិបាល ក្នុងដំណើឆ្ពោះទៅបញ្ចប់ពលកម្មកុមារនៅឆ្នាំ២០២៥ ដែលស្របនឹងគោលដៅអភិវឌ្ឍន៍សាកលប្រកបដោយចីរភាព២០១៥-២០៣០។

លោក វ៉េង ហៀង អគ្គលេខាធិការ និងជាប្រធាននាយកដ្ឋានការងារកុមារ បានឲ្យដឹងថា ចំនួនពលកម្ម នៅក្នុងវិស័យសិប្បកម្មផលិតឥដ្ឋនេះ មានការកើនឡើងគួរឱ្យកត់សម្គាល់ ដោយសារតម្រូវការ នៃវិស័យសំណង់នាពេលបច្ចុប្បន្ន ដែលទាមទារឱ្យអ្នកពាក់ព័ន្ធទាំងអស់ ចូលរួមពង្រឹងយន្តការការពារ ទប់ស្កាត់ និងហាមឃាត់ជាដាច់ខាត ចំពោះការប្រើប្រាស់ពលកម្មកុមារ។

លោក វ៉េង ហៀង បញ្ជាក់ថា បើសិនជារកឃើញថា មានសិប្បកម្ម ឬ ទីតាំងណា មានប្រើប្រាស់កម្លាំងពលកម្មកុមារ នឹងត្រូវអនុវត្តវិធានការផ្លូវច្បាប់ជាធរមាន ដោយមិនមានការអត់អោន។

សូមបញ្ជាក់ថា ចំនួនសិប្បកម្មផលិតឥដ្ឋ មានការកើនឡើង ពីចំនួន៧៨នៅឆ្នាំ២០០៤ ដល់ចំនួន៣៧៩ នៅឆ្នាំ២០១៦ ហើយបានកើនដល់ចំនួន ៤២៧ សិប្បកម្មផលិតឥដ្ឋ នៅឆ្នាំ២០១៩។ ជាមួយគ្នានេះ គេក៏បានរកឃើញថា មានកុមារដែលច្បាប់អនុញ្ញាតិ ឱ្យធ្វើការបាន ពោលគឺ ចាប់ពីអាយុ១៥ឆ្នាំឡើង ទៅមានចំនួន៣៩៤នាក់ កំពុងធ្វើការក្នុងសិប្បកម្មលផលិតឥដ្ឋ ប៉ុន្តែក៏អាចនឹងមានកុមារក្រោមអាយុ១៥ឆ្នាំធ្វើការផងដែរ ដោយសារពួកគេរស់នៅក្នុងសហគមន៍ផលិតឥដ្ឋបែបគ្រួសារ៕

ភ្នំពេញ ៖ រាជរដ្ឋាភិបាលក្នុងអាណត្តិទី៦នេះ បានដាក់ចេញនូវយុទ្ធសាស្ត្រចតុកោណ ដំណាក់កាលទី៤ ដោយផ្តោតលើការលើកកម្ពស់អភិបាលកិច្ចល្អ ដែលរួមបញ្ចូលទាំងការចាប់អនុវត្ត ប្រព័ន្ធគ្រប់គ្រង ផ្អែកលើសមិទ្ធកម្ម ការពង្រឹងការអនុវត្ត ការងារវិមជ្ឈការ និងវិសហមជ្ឈការ ការលើកកម្ពស់អភិបាលកិច្ចល្អ និងការបង្កើនភាពជាដៃគូ រវាងវិស័យសាធារណៈ និងឯកជន។

ដើម្បីឱ្យយុទ្ធសាស្រ្តនេះ មានប្រសិទ្ធភាព អគ្គាធិការដ្ឋាន និងនាយកដ្ឋានបឋមសិក្សា នៃក្រសួងអប់រំ យុវជន និងកីឡា នៅព្រឹកថ្ងៃទី១៧ ខែមិថុនា ឆ្នាំ២០១៩នេះ បានរៀបចំ ផ្សព្វផ្សាយ នីតិវិធីនៃការវាយតម្លៃ នាយកសាលាល្អ គ្រូបង្រៀនល្អ គ្រូបង្រៀនល្អភាសាខ្មែរ និងគណិតវិទ្យា ថ្នាក់ទី១ ទី២ និងទី៣ សាលារៀនស្អាត និង អង្គភាពផ្តល់សេវាសាធារណៈគំរូ ក្នុងវិស័យអបរំ ដើម្បីលើកកម្ពស់ អភិបាលកិច្ច និងការប្រកួតប្រជែង ឱ្យមានប្រសិទ្ធភាព និងនិរន្តរភាព។

លោក បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជននិងកីឡា បានមានប្រសាសន៍ នៅក្នុងពិធីខាងលើនេះថា ក្រសួងមានទិសដៅពង្រឹងយន្តការ តាមដានត្រួតពិនិត្យ និងវាយតម្លៃ ដោយផ្តោតការយកចិត្តទុកដាក់លើ ការកែលម្អយន្តការ ប្រមូលទិន្នន័យសម្រាប់ការត្រួតពិនិត្យ និងវាយតម្លៃឱ្យស្របនឹងគោលដៅអភិវឌ្ឍដោយចីរភាព ក៏ដូចជាការកសាងសមត្ថភាព ដើម្បីអនុវត្តការគ្រប់គ្រង តាមសាលារៀន ជាពិសេស គឺការកំណត់សូចនាករ បំពេញការងារ ដោយសាកល្បង នៅតាមអង្គភាពដែលបានជ្រើសរើស ។

លោក រដ្ឋមន្ត្រី បានបន្តថា ក្រសួងបានអនុវត្តសាកល្បង នូវកញ្ចប់សម្ភារៈអំណានថ្នាក់ដំបូងនៅតាមសាលាបឋមសិក្សាមួយចំនួន ក្នុងខេត្តកំពង់ធំ និងខេត្តសៀមរាប មួយរយៈពេលកន្លងមកឃើញថា លទ្ធផលនៃការសិក្សារបស់សិស្សមានភាពល្អប្រសើរជាងមុន។ ដូច្នេះក្រសួងនឹងពិចារណាសម្រេចដាក់ឱ្យដំណើរការជាផ្លូវការនូវការអនុវត្តកញ្ចប់សម្ភារៈអំណានថ្នាក់ដំបូង នៅតាមសាលាបឋមសិក្សាសាធារណៈ។ ហើយក៏នឹងបញ្ជ្រាបវិធីសាស្រ្តបង្រៀនថ្មីនេះ ទៅក្នុងសាលាគរុកោសល្យ និងវិក្រឹតការខេត្ត ដោយចាប់ផ្តើមសាកល្បងនៅក្នុងខេត្តសៀមរាប។

លោក ហង់ជួន ណារ៉ុន បានបញ្ជាក់ថា សម្រាប់ការវាយតម្លៃអង្គភាពផ្តល់សេវាសាធារណៈគំរូក្នុងវិស័យអប់រំ នៅឆ្នាំ២០១៩នេះវិទ្យាល័យចំនួន៥ ត្រូវបានជ្រើសរើស ជាប់ក្នុងបញ្ជីត្រូវបានវាយតម្លៃ ស្របតាម លក្ខណវិនិច្ឆ័យ ដែលបានកំណត់ និងកំពុងស្ថិតក្នុងដំណាក់កាលវាយតម្លៃ។ នៅថ្ងៃអនាគត ក្រសួងមិនត្រឹមតែជ្រើសរើសនាយកសាលារៀនល្អ គ្រូបង្រៀនល្អគ្រូបង្រៀនល្អភាសាខ្មែរ និងគណិតវិទ្យាថ្នាក់ទី១ ទី២ និង អង្គភាពផ្តល់សេវាសាធារណៈគំរូ ក្នុងវិស័យអប់រំប៉ុណ្ណោះទេ ក៏នឹងឈានទៅជ្រើសរើស នាយកសាលាគរុកោសល្យឆ្នើម ប្រធានមន្ទីរឆ្នើម ឬ អាចឈានទៅជ្រើសរើសប្រធានការិយាល័យអប់រំ យុវជន និងកីឡាក្រុង ស្រុក ខណ្ឌឆ្នើមថែមទៀតផង៕

ដោយ ៖ សុធី

ភ្នំពេញ ៖ លោក លី សុខ លេង ចៅក្រមជំនុំជម្រះសាលាដំបូងរាជធានីភ្នំពេញ នៅព្រឹកថ្ងៃទី១៧ ខែមិថុនានេះ ប្រកាសសាលក្រមផ្តន្ទាទោស លោក ផែង វណ្ណៈ អ្នកលេងហ្វេ សប៊ុកដ៏ល្បីល្បាញមួយរូប ដាក់ពន្ធនាគាររយៈពេល១ឆ្នាំ តែអនុវត្តន៍ទោសត្រឹម២ខែ ១៥ថ្ងៃ ប៉ុណ្ណោះ និងពិន័យ៤លានរៀលចូល ថវិការដ្ឋ ពាក់ បទល្មើសបរិហារកេរ្តិ៍ជាសាធារណៈ និងបទញុះញង់ឱ្យប្រព្រឹត្តបទឧក្រិដ្ឋជាអាទិ៍ តាមមាត្រា៤៩៤ មាត្រា៤៩៥ និងមាត្រា ៣០៥នៃក្រមព្រហ្មទណ្ឌ តាមបណ្តឹងរបស់លោក គី តិច មេធាវីតំណាង ដោយអាណត្តិរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។

យោងតាមដីកាសម្រេចរបស់តុលាការ បើគិតរយៈពេលនៃការឃុំខ្លួនលោក ផែង វណ្ណៈ កាលពីថ្ងៃទី៣ ខែមេសា ឆ្នាំ២០១៩ កន្លងទៅគឺលោក ផែង វណ្ណៈ នឹងត្រូវ ដោះលែងឲ្យមានសេរីភាពឡើងវិញ នៅថ្ងៃទី១៨ ខែមិថុនា ស្អែកនេះ ។

ទន្ទឹមនេះដែរ តុលាការក៏បានផ្តន្ទាទោសលោក ផែង វណ្ណៈ ដោយពិន័យជាប្រាក់ចំនួន ២លានរៀល និងសងសំណង១០០ រៀលដល់អង្គភាពសារព័ត៌មាន Fresh News ផងដែរ ។

សូមបញ្ជាក់ថា ក្នុងពេលសវនាការកន្លងមកលោក ផែង វណ្ណៈ បានសារភាពទោសកំហុសរបស់ខ្លួនដោយ ស្នើសុំតុលាការដោះលែង ព្រោះបញ្ហាសុខភាព ក្រោយបានធ្វើលិខិតសុំទោសសម្តេចតេជោ ហ៊ុន សែន ផងដែរ ។

លោក ផែង វណ្ណៈ សរសេរក្នុងលិខិតសុំទោសថា “ ខ្ញុំមានការសោកស្តាយជាពន់ពេកនូវកំហុសឆ្គងកន្លងមក និងសុំការខន្តី អភ័យទោស ពីសម្តេចតេជោ នូវអ្វីដែលខ្ញុំបានសរសេរព័ត៌មានប្រៀបធៀបមិនសមរម្យ តាមរយៈបណ្តាញសង្គមហ្វេសប៊ុក ” ។

លោក ផែង វណ្ណៈ ដែលជានិពន្ធនាយកសារព័ត៌មានមួយដែរនោះ បានសរសេរថា “ សូមសម្តេចតេជោមេត្តា យោគយល់ សណ្តោសប្រណីនូវកំហុសឆ្គង ដើម្បីឲ្យខ្ញុំបានជួបជុំក្រុមគ្រួសារ ព្រមទាំងបានឆាប់ទៅបន្ត ព្យាបាលជំងឺប្រចាំកាយ ”។

​នៅបន្ទាប់ពីលោក ផែង វណ្ណៈ បានសរសេលិខិតសុំការលើកលែងទោសពីសម្តេចនាយករដ្ឋមន្ត្រីតេជោ ហ៊ុន សែន ជាផ្លូវការរួចមក មានមជ្ឈដ្ឋាមួយចំនួនបានពីចារណាថា បើសិនជាតុលាការលើកលែងការចោទប្រកាន់មែននោះ ប្រាកដជាត្រូវគេរិះគន់ថា តុលាការកំពុងធ្វើដំណើរលើមាគ៌ា វប្បធម៌និទណ្ឌភាព ដែលអ្នកមានទោសផ្សេងទៀតក៏អាចទទួលបាននូវវិធានបែបនេះដូចគ្នា៕

ដោយ ៖ សុផល

ខេត្តសៀមរាប ៖ ជនជាតិអង់គ្លេសម្នាក់ ដេកស្លាប់ក្នុងផ្ទះសំណាក់រ៉ូយ៉ាល់សុខចាន់ នៅចំណុចក្រុមទី៧ ក្នុងភូមិវិហាចិន សង្កាត់ស្វាយដង្គំ ក្រុងខេត្តសៀមរា​ប វេលាម៉ោង១៤ និង០០នាទី ថ្ងៃទី១៦ ខែមិថុនា ឆ្នាំ២០១៩។

ប្រភពពីសមត្ថកិច្ចបានអោយដឹងថា សពជនរងគ្រោះឈ្មោះ ROWESAM ភេទប្រុស ឆ្នាំកំណេីត១៩៨៥ មុខរបរជាភ្ញៀវទេសចរណ៍ជនជាតិ អង់គ្លេស លិខិតឆ្លងដែនលេខ 527248245 បានចូលតាមច្រកទ្វារប្រលានយន្ដហោះខេត្តសៀមរាបកាលពីថ្ងៃទី០៨ខែមិថុនាឆ្នាំ២០១៩ ហេីយបានមកស្នាក់នៅក្នុងផ្ទះសំណាក់រ៉ូយ៉ាល់សុខចាន់ ភូមិឃំុកេីតហេតុខាងលើ។

ក្រោយពីការពិនិត្យលេីខ្លួនសាកសពសមត្ថកិច្ចបានឃេីញថា ពំុមានស្នាក់ស្នាមទេ។

សមត្ថកិច្ចសន្និដ្ថានថា សពជនរងគ្រោះស្លាប់ដោយសាប្រេីថ្នាំងងុយដេកហួសកំរិត បណ្ដាលអោយស្លាប់ សពជនរងគ្រោះបានយកទៅរក្សាទុកនៅមន្ទីពេទ្យខ្មែរសូវៀតភ្នំពេញ ដេីម្បីរង់ចាំក្រុមគ្រួសារមកទទួលយក៕ 

​ដោយ ៖ នូវី 

ខេត្តបន្ទាយមានជ័យ ៖ ព្រឹកថ្ងៃទី១៧ ខែមិថុនា ឆ្នាំ២០១៩នេះកម្លាំងនគរបាលការិយាល័យព្រហ្មទណ្ឌកំរិតធ្ងន់នៃស្នងការដ្ឋាននគរបាលខេត្តបន្ទាយមានជ័យបានបញ្ជូនជនសង្ស័យជាជនជាតិចិនចំនួន១២នាក់ទៅតុលាការបន្ទាប់ពីចាប់បង្ខាំងមនុស្សជំរិតទារប្រាក់ដោយខុសច្បាប់ប្រព្រិត្តនៅក្នុងក្រុងប៉ោយប៉ែត។

លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបាននិយាយថា កាលពីថ្ងៃទី១៥ ខែមិថុនា ឆ្នាំ២០១៩ កម្លាំងនគរបាលផែនការងារព្រហ្មទណ្ឌនៃស្នងការដ្ឋាននគរបាលខេត្តបន្ទាយមានជ័យសហការជាមួយកម្លាំងនគរបាលក្រុងប៉ោយប៉ែតបានចេញប្រតិបត្តិការឆ្មក់ចូលបង្រ្កាបចាប់ឃាត់ខ្លួនជនសង្ស័យជាជនជាតិចិនចំនួន១២នាក់ដែលបានធ្វើការបង្ខាំងជនជាតិចិនដូចគ្នាចំនួនបីនាក់នៅក្នុងផ្ទះសំណាក់ពីរកន្លែងគឺផ្ទះសំណាក់សុផល ថាវី និងផ្ទះសំណាក់លីហ៊ូវ ដើម្បីជំរិតទារប្រាក់ដោយខុសច្បាប់។ប្រតិបត្តិការឆ្មក់ឃាត់ចាប់ជនសង្ស័យនិងរំដោះជនរងគ្រោះធ្វើឡើងក្រោមការសម្របសម្រួលនីតិវិធីពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ។

ស្នងការរងទទួលផែនការងារព្រហ្មទណ្ឌលោកឧត្តមសេនីយ៍ត្រី សិទ្ធិ ឡោះ បានប្រាប់ឱ្យដឹងថាកម្លាំងនគរបាលបង្រ្កាបចាប់ឃាត់ខ្លួនជនជាតិចិន១២នាក់ខាងលើអនុវត្តតាមបណ្តឹងរបស់ស្ថានទូតចិនប្រចាំប្រទេសកម្ពុជាបន្ទាប់ពីទទួលព័ត៌មានពីក្រុមគ្រួសារជនរងគ្រោះនៅប្រទេសចិន។

លោកស្នងការរងប្រាប់ឱ្យដឹងទៀតថា ជនរងគ្រោះ៣នាក់ជាជនជាតិចិនត្រូវបានជនសង្ស័យជនជាតិចិនទាំងនោះបង្ខាំងទារប្រាក់និងធ្វើទារុណកម្មហើយផ្ញើរូបភាពទៅគ្រួសារជនរងគ្រោះនៅក្នុងប្រទេសចិន ក្រោយពីក្រុមជនសង្ស័យឱ្យប្រាក់ទៅជនរងគ្រោះខ្ចីលេងល្បែងចាញ់អស់ប្រាក់និងគ្មានប្រាក់សងទៅក្រុមជនសង្ស័យទាំងនោះវិញ។ជនរងគ្រោះរងការធ្វើទារុណកម្មបង្កឱ្យរបួសស្នាមពេញខ្លួន ហើយត្រូវបានកម្លាំងនគរបាលរំដោះបញ្ជូនទៅសម្រាកព្យាបាលនៅមន្ទីរពេទ្យឯកជនមួយកន្លែងក្នុងក្រុងប៉ោយប៉ែត ខេត្តបន្ទាយមានជ័យ។

ជនរងគ្រោះ១,ឈ្មោះ ឌូ ស៊ីងយុន ភេទប្រុស អាយុ២៩ឆ្នាំ ២,ធូលី ជូល ភេទប្រុស អាយុ១៨ឆ្នាំ និង៣,ធៀន ចាង ភេទប្រុស អាយុ ១៨ឆ្នាំ ជនរងគ្រោះទាំង៣នាក់ រស់នៅខេត្តកាន់ ស៊ូ ប្រទេសចិន ៕

ឧត្តរមានជ័យ ៖ ប្រជាពលរដ្ឋបានប្រទះឃើញគ្រាប់ប្រភេទ B40 ចំនួន៤គ្រាប់ ដោយគ្រាប់ទាំងនោះ សុទ្ធសឹងតែជាគ្រាប់ មានសភាពនៅល្អៗទាំងអស់ ដែលគេយកទៅដាក់ច្នៃបង្កៃកប់ក្នុងដី និងចាក់រំសេវទុកបំផ្ទុះ តែសំណាងល្អមិនមានសិស្ស ឬប្រជាពលរដ្ឋណាម្នាក់ បានប៉ះពាល់ដល់គ្រាប់ទាំងនោះឡើយ។

គ្រាប់ B40 ដែលគេដាក់ច្នៃប្លង់ទុកចោល ដោយគេសង្ស័យថា ជារឿងទំនាស់ដីធ្លី ហើយត្រូវបានប្រជាពលរដ្ឋ ប្រទះឃើញ ស្ថិតនៅខាងក្រោយសាលាអនុវិទ្យាល័យរួតចំប៉ី ហ៊ុន សែន ស្ថិតនៅភូមិរួតចំប៉ី សង្កាត់អូរស្មាច់ ក្រុងសំរោង ខេត្តឧត្តរមានជ័យ កាលពីវេលាម៉ោង១ និង៥០នាទី រសៀលថ្ងៃទី១៦ ខែមិថុនា ឆ្នាំ២០១៩នេះ។

កម្លាំងសមត្ថកិច្ចជំនាញ បានចុះដល់កន្លែងកើតហេតុពិនិត្យឃើញថា គ្រាប់ប្រភេទគ្រាប់ B40 ផលិតនៅប្រទេសសូវៀត ចំនួន ៤គ្រាប់ បានយកទៅកប់ក្នុងរណ្តៅ និងចាក់រំសែវ មានបីកន្លែងខុសគ្នា ដោយឃ្លាតពីកន្លែងមួយ ទៅកន្លែងមួយមានចម្ងាយប្រហែល ជា ១០ម៉ែត្រ និង គ្រាប់ DKចំនួន ១គ្រាប់ មានចម្ងាយ ប្រហែល ១០០ម៉ែត្រ ពីគ្រាប់ B40 ដែលដាក់ជាលក្ខណៈច្នៃបង្កៃ ទុកចោលដូចគ្នាផងដែរ។ កម្លាំងជំនាញការពារកន្លែងកើតហេតុ និងបានទាក់ទងទៅកម្លាំងស៊ីម៉ាក់ ដើម្បីប្រមូលយកគ្រាប់ទាំងនោះ យកទៅរក្សាទុក នៅកន្លែងមានសុវត្ថិភាព។

មន្ត្រីសមត្ថកិច្ចបានឲ្យដឹងថា កម្លាំងសមត្ថកិច្ចជំនាញកំពុងបន្តស្រាវជ្រាវរកមុខសញ្ញាយ៉ាងយកចិតតទុកដាក់បំផុត ដើម្បីនាំយកមកផ្តន្ទាទោសតាមផ្លូវច្បាប់៕

ភ្នំពេញ ៖ នារីម្នាក់បានលោតពីលើស្ពានអាកាសស្ទឹង មានជ័យបណ្តាលឲ្យរងរបួសធ្ងន់ បន្ទាប់ពីឈ្លោះគ្នាជាមួយសង្សារបង្កការភ្ញាក់ផ្អើលកាលពីវេលាម៉ោង ១ យប់រំលងអាធ្រាត្រ ឈានចូលថ្ងៃ អាទិត្យ ទី១៦ ខែមិថុនា ឆ្នាំ២០១៩ ត្រង់ចំណុចជិតគល់ស្ពានអាកាសស្ទឹងមានជ័យ តាមបណ្តោយផ្លូវ២៧១ ក្នុងសង្កាត់ទំនប់ទឹក ខណ្ឌចំការមន រាជធានីភ្នំពេញ។ នៅកន្លែងកើតហេតុភ្លាមៗ គូសង្សារទាំងពីរមិនត្រូវបានស្គាល់អត្តសញ្ញាណនៅឡើយទេ។

យោងតាមប្រភពពីកន្លែងកើតហេតុបានឲ្យដឹងថា មុនដំបូង គេឃើញប្រុសស្រី ២នាក់បានជិៈម៉ូតូPCX ពណ៌ស មិនចាំស្លាកលេខ ឌុបគ្នាតាមបណ្តោយផ្លូវ២៧១ទឹសដៅ ពីកើតទៅលិចឡើងលើស្ពានអាកាសស្ទឹងមានជ័យបានបន្ទិចក៏ឈប់ម៉ូតូហើយក៏លឺសូរសំឡេងឈ្លោះប្រកែកគ្នាខណៈពេលនោះក៏ស្រាប់តែខាងស្រីលោតពីលើស្ពានចុះមកក្រោមកំពួស ប្រហែល៣ម៉ែត្របណ្តាលឲ្យបែកក្បាលរងរបួសធ្ងន់។

ចំណែកឯខាងប្រុសក៏ជិៈម៉ូតូចុះមកក្រោមហើយក៏លើកសង្សារឲ្យអង្គុយនិងទាក់ទ ងទៅសមត្ថកិច្ចឲ្យជួយអន្តរាគមន៏ ភ្លាមៗសមត្ថកិច្ចក៏មកដល់ហើយក៏ទាក់ទង់ទៅរថយន្តសង្រ្គោះឲ្យមកដឹកនារីរងគ្រោះទៅមន្ទីពេទ្យដើម្បីសង្រ្គោះជីវិតផងដែរ ។

ក្រោយពីកើតហេតុបុរសជាសង្សារបានជិៈម៉ូតូតាមពីក្រោយរថយន្តសង្គ្រោះបន្ទាន់ទៅបាត់ទៅបន្សល់ទុកតែស្បែកមួយគូនៅកន្លែងកើតហេតុ៕

​ ដោយ ៖ សុផល

ខេត្តស្វាយរៀង ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនៅព្រឹកថ្ងៃទី១៦ខែមិថុនាឆ្នាំ២០១៩នេះ បានអញ្ជើញជាអធិបតី ក្នុងពិធីប្រកាសចូលកាន់មុខតំណែងក្រុមប្រឹក្សាស្វាយរៀងអាណត្តិទី៣ នៅសាលប្រជុំសាលាខេត្តស្វាយរៀង ដោយមានអ្នកចូលរួមប្រមាណ៤០០នាក់។

លោក ម៉ែន វិបុល អភិបាលខេត្តស្វាយរៀង បានលើកឡើងនូវចំណុចសំខាន់ៗមួយចំនួនដែលអាជ្ញាធរខេត្តស្វាយរៀងបានបំពេញនាពេលកន្លងមកជូន សម្ដេចក្រឡាហោម ផងដែរដូចជាស្ថានភាពរដ្ឋបាលដែនដី, និងសមិទ្ធផលសំខាន់ៗដែលគណៈអភិបាលនិងក្រុមប្រឹក្សាខេត្តស្វាយរៀង ក្នុងអាណត្តិទី២សម្រេចបានព្រមទាំងអំពីលទ្ធផលនៃការបោះឆ្នោតជ្រើសតាំងក្រុមប្រឹក្សាខេត្តស្វាយរៀងនិងក្រុមប្រឹក្សាក្រុង ស្រុកអាណត្តិទី៣ ផងដែរ។

លោកបន្តថា សមិទ្ធផល និងស្នាដៃការងារដែលគណៈអភិបាលនិងក្រុមប្រឹក្សាខេត្តស្វាយរៀងសម្រេចបានព្រមទាំងលទ្ធផលនៃការបោះឆ្នោតនាពេលនេះគឺជាមូលដ្ឋានឆ្លុះបញ្ចាំងឲ្យឃើញកាន់តែច្បាស់អំពីការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយភាពឈ្លាសវៃនិងគតិបណ្ឌិតរបស់សម្ដេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងការចង្អុលបង្ហាញជាប់ជាប្រចាំរបស់សម្ដេច។

សម្តេចក្រឡាហោ ស ខេង មានប្រសាសន៍ថា ក្នុងនាមរាជរដ្ឋាភិបាល និងក្នុងនាមសម្តេចផ្ទាល់ សូមសំដែងនូវការអបអរសាទរ កោតសរសើរ និងវាយតម្លៃខ្ពស់ ចំពោះសមាជិក សមាជិកា ក្រុមប្រឹក្សាខេត្តស្វាយរៀង ដែលត្រូវបានតំណាងប្រជាពលរដ្ឋ គឺសមាជិកក្រុមប្រឹក្សាឃុំ សង្កាត់ ដែលជាអង្គបោះឆ្នោត បានបោះឆ្នោតផ្តល់សេចក្តីទុកចិត្ត ដើម្បីបន្តដឹកនាំខេត្តឲ្យកាន់រីកចម្រើនលើគ្រប់វិស័យថែមទៀត ។

ហេតុនេះក្រុមប្រឹក្សាខេត្ត ត្រូវតែខិតខំបម្រើផលប្រយោជន៍ និងបំពេញសេចក្តីត្រូវការរបស់ប្រជាពលរដ្ឋទាំងអស់ដោយស្មើភាព យុត្តិធម៌ដោយមិនត្រូវប្រកាន់ពូជសាសន៍និងនិន្នាការនយោបាយឡើយ។

សម្តេចក្រឡាហោមស ខេងបានបន្តទៀតថា ការពង្រឹងសាមគ្គីភាពឯកភាពផ្ទៃក្នុងក្រុមប្រឹក្សា គណៈអភិបាល មន្រ្តីរាជការ និងកងកម្លាំងមានសមត្ថកិច្ច គ្រប់លំដាប់ថ្នាក់ ដោយឈរលើមូលដ្ឋានលើកកម្ពស់ប្រសិទ្ធភាពការងារ ការគោរពច្បាប់ គោលការណ៍នានារបស់រដ្ឋ និងពង្រឹងរបៀបរបបធ្វើការដើម្បីលើកកម្ពស់ការ ទទួលខុសត្រូវ និងភាពជាម្ចាស់របស់មន្រ្តីនៅក្នុងបំពេញតួនាទី ភារកិច្ចរបស់ខ្លួនសំដៅអភិវឌ្ឍមូលដ្ឋាន និងឆ្លើយតបចំពោះតម្រូវការរបស់ប្រជាពលរដ្ឋ គឺធ្វើឲ្យយើងសម្រេចគោលដៅ មូលដ្ឋានមានការអភិវឌ្ឍ និងជីវភាពរស់នៅរបស់ប្រជាពលរដ្ឋកាន់តែប្រសើរឡេីង ។

សម្តេចក្រឡាហោម ស ខេង បានបញ្ជាក់ថាគណៈបញ្ជាការឯកភាពខេត្តត្រូវដឹកនាំអាជ្ញាធរ កងកម្លាំងមានសមត្ថកិច្ចគ្រប់លំដាប់ថ្នាក់ ឲ្យបង្កើនការថែរក្សាការពារសន្តិសុខ និងសណ្តាប់ធ្នាប់សាធារណៈក្នុងក្របខណ្ឌខេត្តទាំងមូលដោយត្រូវយកចិត្តទុកដាក់លើវិធានការសំខាន់ៗក្នុងនោះត្រូវជំរុញលើកទឹកចិត្តប្រជាពលរដ្ឋគ្រប់មជ្ឈដ្ឋានឲ្យចូលរួមអនុវត្តគោលនយោបាយភូមិ ឃុំមានសុវត្ថិភាពដើម្បីរួមគ្នាបង្ការ ទប់ស្កាត់ នៅតាមមូលដ្ឋានរៀងៗខ្លួនជាពិសេសបទល្មើសគ្រឿងញៀនខុសច្បាប់ ការជួញដូរមនុស្ស សកម្មភាពលួច ឆក់ប្លន់និងល្បែងសុីសងខុសច្បាប់នៅគ្រប់មូលដ្ឋានទូទាំងខេត្ត។

សូមបញ្ជាក់ថា នៅអាណត្តិទី៣នេះក្រុមប្រឹក្សាខេត្តស្វាយរៀងមានចំនួន២៣រូបក្នុងនោះលោកជុំ ហាតត្រូវបានតែងតាំងជាប្រធានក្រុមប្រឹក្សាខេត្ត៕

ដោយ ៖ សុផល

ខេត្ដកំពង់ចាម ៖ កម្លាំងនគរបាលព្រហ្មទណ្ឌ នៃស្នងការដ្ឋាននគរបាលខេត្តកំពង់ចាម បានចាប់ខ្លួនជនសង្ស័យម្នាក់ ដែលជាមុខសញ្ញាឆក់កាបូបយ៉ាងសកម្ម ក្នុងភូមិសាស្ដ្រក្រុងកំពង់ចាម និងតាមទីប្រជុំជន។ ជនសង្ស័យបានសារភាពថា រូបគេធ្លាប់បានធ្វើសកម្មភាពចំនួន ៤លើករួចមកហើយ។

លោកឧត្តមសេនីយ៍ត្រី ហេង វុទ្ធី ស្នងការរងទទួលផែនព្រហ្មទណ្ឌខេត្តកំពង់ចាម បានឲ្យដឹងនៅថ្ងៃទី១៥ ខែមិថុនា ឆ្នាំ២០១៩នេះថា កាលពីនៅថ្ងៃទី១៣ ខែមិថុនា ឆ្នាំ២០១៩ នៅចំណុចបេនរថយន្តក្រុងជីអេសធី ស្ថិតនៅភូមិទី៤ សង្កាត់វាលវង់ ក្រុងកំពង់ចាម ខេត្តកំពង់ចាម មានជនមិនស្គាល់អត្តសញ្ញាណចំនួន០២នាក់ ជិះម៉ូតូ០១គ្រឿង ម៉ាកវ៉េវ ពណ៌ទឹកប៊ិច គ្មានស្លាកលេខ បានធ្វើសកម្មភាពឆក់កាបូបពីឈ្មោះ ឆៃ ហឿង ភេទស្រី អាយុ៦៥ឆ្នាំ ជនជាតិវៀតណាម មានទីលំនៅភូមិទី១១ សង្កាត់កំពង់ចាម ក្រុងកំពង់ចាម ខេត្តកំពង់ចាម ខណៈពេលដែលជនរងគ្រោះដើរទៅរកបង្គន់អនាម័យ។ ក្នុងនោះ សម្ភារៈបាត់បង់រួមមាន ប្រាក់រៀលចំនួន ៣០ម៉ឺនរៀល និងទូរស័ព្ទដៃម៉ាក Nokia ចុចពិលចំនួន ១គ្រឿង។

លោកស្នងការរងបញ្ជាក់ថា ទទួលបានព័ត៌មានខាងលើនេះភ្លាម និងទទួលបានបញ្ជាពីលោកឧត្តមសេនីយ៍ទោ ឯម កុសល ស្នងការនគរបាលខេត្តនោះ កម្លាំងជំនាញរបស់ការិយាល័យនគរបាលព្រហ្មទណ្ឌកម្រិតស្រាល ដឹកនាំដោយ លោកវរសេនីយ៍ឯក ថាញ់ សុខវុន នាយការិយាល័យ សហការជាមួយ កម្លាំងអធិការដ្ឋាននគរបាលក្រុងកំពង់ចាម និងអាជ្ញាធរមូលដ្ឋានចុះទៅដល់កន្លែងកើតហេតុ បើកកិច្ចប្រតិបត្តិការស្រាវជ្រាវ ឃាត់ខ្លួនជនសង្ស័យម្នាក់ ឈ្មោះ រ័ត្ន ដារិទ្ធ ហៅអាវែង អាយុ២៨ឆ្នាំ មានទីលំនៅភូមិបឹងកុក២ សង្កាត់បឹងកុក ក្រុងកំពង់ចាម ខេត្តកំពង់ចាម ចំណែកឯបក្ខពួកម្នាក់ទៀតឈ្មោះ ប៉ែន ពិសិដ្ឋ ហៅឃ្លាន អាយុ៣០ឆ្នាំ បានរត់គេចខ្លួនបាត់។

តាមចម្លើយរបស់ឈ្មោះ រ័ត្ន ដារិទ្ធ ហៅអាវែង បានឆ្លើយសារភាពថា កន្លងមកខ្លួន និងឈ្មោះ ប៉ែន ពិសិដ្ឋ ហៅឃ្លាន ធ្លាប់ធ្វើសកម្មភាពឆក់កាបូប នៅក្នុងភូមិសាស្ត្រក្រុងកំពង់ចាម និងស្រុកកំពង់សៀម បានចំនួន០៤លើកគឺលើក ទី ១៖ ឆក់កាបូប កាលពីថ្ងៃទី០៨ ខែមីនា ឆ្នាំ២០១៩ នៅចំណុចផ្លូវក្បែរផ្ទះពេទ្យគា ស្ថិតនៅភូមិនាងគង្ហីង សង្កាត់សំបួរមាស ក្រុងកំពង់ចាម, លើកទី២៖ ឆក់កាបូប កាលពីថ្ងៃទី០៣ ខែមិថុនា ឆ្នាំ២០១៩ នៅចំណុចផ្លូវចូលភូមិស្វាយក្រហ មគែ ស្ថិតនៅភូមិរកាក្រោម សង្កាត់សំបួរមាស ក្រុងកំពង់ចាម, លើកទី៣៖ ឆក់កបូប កាលពីថ្ងៃទី៤ ខែមិថុនា ឆ្នាំ២០១៩ នៅចំណុចភូមិត្រ ពាំងតាហំ ឃុំរអាង ស្រុកកំពង់សៀម និងលើកទី៤ ឆក់កាបូប កាលពីថ្ងៃទី១៣ ខែមិថុនា ឆ្នាំ ២០១៩ នៅចំណុចបេនរថយន្ដក្រុងជីអេសធី ស្ថិតនៅភូមិទី៤ សង្កាត់វាលវង់ ក្រុងកំពង់ចាម។

ផ្អែកតាមចម្លើយខាងលើ សមត្ថកិច្ចជំនាញបាននាំជនសង្ស័យទៅចង់ឲ្យបង្ហាញទីកន្លែង ដែលបោះចោលកាបូប នៅចំណុចភូមិថ្មគោល ឃុំរអាង ស្រុកកំពង់សៀម ខេត្តកំពង់ចាម ជាលទ្ធផលយើងរកឃើញកាបូបបានចំនួន០២ ដែលបានធ្វើសកម្មភាពឆក់ កាលពីថ្ងៃទី០៣ ខែមិថុនា ឆ្នាំ២០១៩ នៅចំណុចផ្លូវចូលភូមិស្វាយក្រហមគែ និងឆក់កាលពីថ្ងៃទី១៣ ខែមិថុនា ឆ្នាំ២០១៩ នៅចំណុចបេនរថយន្តក្រុងជីអេសធី ពិតប្រាកដមែន។

បច្ចុប្បន្នជនសង្ស័យ ត្រូវបានសមត្ថកិច្ចនាំមកកាន់អធិការដ្ឋាននគរបាលក្រុងកំពង់ចាម ដើម្បីធ្វើការសាកសួរ និងចងក្រងសំណុំរឿងតាមនីតិវិធី៕

​ដោយ ៖ សហការី

ខេត្តប៉ៃលិន ៖ ប្រជាពលរដ្ឋរស់នៅចំណុចវាលចែង ក្នុងភូមិអូរចិតប្រាំ ឃុំអូរអណ្តូង ស្រុកសាលាក្រៅ មានការព្រួយបារម្ភយ៉ាងខ្លាំងអំពីសុវត្ថិភាព ទ្រព្យសម្បត្តិ របស់ខ្លូន ខណៈអំពើចោរកម្ម បានកើតមានជាហូរហែរនៅក្នុងមូលដ្ឋាន របស់ពួកគាត់ ។

ជាក់ស្តែងកាលពីវេលាម៉ោង១៤ និង៤០នាទីរសៀល ថ្ងៃ ទី១៣ ខែមិថុនា ឆ្នាំ២០១៩ មានករណីចោរលួចគោមួយក្បាលដោយវះយកពោះក្នុងចេញ រួចច្រកគោទាំងមូល ចូលក្នុងការ៉ុងដឹកតាមម៉ូតូ ត្រូវប្រជាពលរដ្ឋប្រទះឃើញ មានការសង្ស័យ ក៍នាំគ្នាដេញតាម ស្រាប់លោកចោរភ័យក៍ទម្លាក់ការ៉ុងច្រកគោចោលកណ្តាលផ្លូវ ជិៈគេចខ្លូនតែម្តង ។

បើតាមលោក ចេង តូ អ្នកគ្រប់គ្រងចំណុចវាលចែង ភូមិអូរចិតប្រាំ ឃុំអូរអណ្តូង បានរៀបរាប់ឲ្យអ្នកយកព័ត៌មានយើងដឹងថា៖ សត្វគោមួយក្បាលដែលត្រូវចោរលួច ដឹកតាមម៉ូតូ យកមកទម្លាក់ចោលនេះ មានម្ចាស់ឈ្មោះ សួង ធា ភេទប្រុស រស់នៅចំណុចវាលចែង ចំណែកសត្វគោ ដែលបាត់នេះគឺជនរងគ្រោះ បានប្រវាស់ពីឈ្មោះ សាក់ រស់នៅត្រូល ក្នុងស្រុករតនៈមណ្ទល ខេត្តបាត់ដំបង យកមកមើល ។លោក បានបន្តទៀតថា៖ ករណីចោរលួចគោនេះ ដំបូងឡើយគឺជនសង្ស័យ បានជិៈម៉ូតូមួយម៉ាកឌ្រីម ០១៤ (មិនស្គាល់ស្លាកលេខ) ដោយជិៈចេញពីចំណុចខាងកើតសាលាវាលចែង ក្នុងទឹសដៅពីត្បូងទៅជើង មានន័យថាទៅត្រូល ក្នុងទឹកដីស្រុករតនៈមណ្ទល ខេត្តបាត់ដំបងវិញ ហើយចំពោះករណី ចោរលួចគោ នៅចំណុចវាលចែងនេះ បានកើតឡើងចំនួន៧លើកមកហើយ គឺសមត្ថកិច្ចជំនាញមិនទាន់បង្ក្រាបបាននៅឡើយទេ ។

លោក បានបន្តថា៖ បញ្ហចោរកម្ម នៅចំណុចវាលចែង គឺ កើតឡើងជាហូរហែរមកហើយ ជូនកាលចោរលួចព្រទ្យសម្បត្តិក្នុងផ្ទះ ដែលម្ចាស់ទៅចំការបាត់ ,ចោរ លួចគោជាដើម ធ្វើឲ្យប្រជាពលរដ្ឋ រស់នៅចំណុចខាងលើ មានការព្រួយបារម្ភយ៉ាងខ្លាំង អំពីសុវត្ថិភាព ក្នុងការរស់នៅ ប្រកបមុខរបរប្រចាំថ្ងៃ ជាមួយគ្នានេះ ពួកគាត់ស្នើសុំដល់អាជ្ញាធរមានសមត្ថកិច្ចទាំង អស់ មិនបានប៉ុស្ត៍ អធិការស្រុក ឬខេត្តនោះទេ សូមមេត្តាចុះល្បាតដល់ចំណុចវាលចែង ផង ដើម្បី ឲ្យពួកគាត់មានភាពកក់ក្តៅ ក្នុងការរសនៅផងដែរ ៕