​ដោយ ៖ សហការី

ភ្នំពេញ ៖ អង្គភាពអ្នកនាំពាក្យរាជរដ្ឋាភិបាល ដែលទើបត្រូវបានរាជរដ្ឋាភិបាលបង្កើតកាលពីសប្តាហ៏មុននេះ បានបើកកិច្ចប្រជុំជាលើកដំបូង ដើម្បីពិភាក្សាយន្តការនានាក្នុងការផ្សារភ្ជាប់រវាងអ្នកនាំពាក្យ ជាមួយនឹងអ្នកកាសែត។ បើតាម លោក ផៃ ស៊ីផាន អង្គភាពអ្នកនាំពាក្យរាជរដ្ឋាភិបាល កំណត់ធ្វើសន្និសីទកាសែត នៅរៀងរាល់មួយសប្តាហ៏ម្តងជាទៀងទាត់ ដើម្បីផ្តល់ព័ត៌មានទៅលើប្រធានដែលក្តៅបំផុត សម្រាប់សង្គម និងអ្នកសារព័ត៌មាន។

រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការនាំពាក្យរាជរដ្ឋាភិបាល និងជាប្រធានអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន បានបញ្ជាក់ប្រាប់អ្នក កាសែតថា អង្គភាពសម្រេចជាគោលការណ៏ថា នឹងរៀបចំសន្និសីទកាសែតជា ទៀងទាត់រៀងរាល់មួយសប្តាហ៏ម្តង និងរៀបចំជំនួបអ្នកនាំពាក្យ និងអ្នកកា សែតឲ្យបាន១ខែម្តង ដើម្បីផ្តល់ព័ត៌មានដល់អ្នកកាសែត និងផ្តល់ឱកាសឲ្យអ្នកកាសែតបានសួរសំណួរទៅលើប្រធានបទនានានៅតាមក្រសួង ស្ថាប័ននីមួយ។

ការបញ្ជាក់នេះ ធ្វើឡើងនៅក្នុងសម័យប្រជុំលើកដំបូងរបស់អង្គភាពអ្នកនាំពាក្យរាជរដ្ឋាភិបាល នៅព្រឹកថ្ងៃទី២០ មិថុនា នៅទីស្តីការគណៈរដ្ឋមន្ត្រី។ បើតាមប្រធានអង្គភាពអ្នកនាំពាក្យរាជរដ្ឋាភិបាល នឹងផ្តើមអនុវត្តយន្តការមួយ នៅខែកក្កដាខាងមុខ ដោយប្រមូលមតិ និងការចង់បានរបស់អ្នកកាសែត ទៅលើប្រធានបទជាក់លាក់ អ្នកកាសែតចង់ដឹង និងផ្តល់ព័ត៌មានទៅសាធារណៈជន។

លោក ផៃ ស៊ីផាន បានបញ្ជាក់ដែរថា អង្គភាពអ្នកនាំពាក្យរាជរដ្ឋាភិបាលនេះ គឺជាយន្តការមួយសម្រាប់ពង្រឹងសមត្ថភាពឆ្លើយឆ្លងរបស់អ្នកនាំពាក្យ ជាមួយ នឹងអ្នកសារព័ត៌មាន និងធ្វើយ៉ាងណាឲ្យព័ត៌មានដែលផ្តល់ដោយក្រសួងនីមួ យទៅដល់អ្នកសារព័ត៌មាន និងបន្តផ្តល់ជូនទៅដល់ប្រជាពលរដ្ឋទូទៅ។ អង្គ ភាពមួយនេះ ក៏ទទួលផងដែរ នូវលិខិតរបស់អ្នកកាសែត ចំពោះក្រសួង ស្ថាប័ននានាដែលមិនបានផ្តល់ព័ត៌មាន មិនឆ្លើយឆ្លងជាមួយអ្នកព័ត៌មានទៅលើប្រធានបទអ្វីមួយ រឺលំបាកក្នុងការទាក់ទងសុំព័ត៌មានពីក្រសួង ស្ថាប័នទាំងនោះ។

គួរបញ្ជាក់ថាកាលពីថ្ងៃទី១០ ខែមិថុនាកន្លងទៅ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសម្រេចតែងតាំងសមាសភាពអង្គភាពអ្នកនាំពាក្យ រាជរដ្ឋាភិបាល ចំនួន៣០រូប ដែលជាមន្ត្រីនៅគ្រប់ក្រសួងទាំងអស់នៅកម្ពុជា។ នៅក្នុងសេចក្តីសម្រេចបានតែងតាំង លោក ផៃ ស៊ីផាន ជាប្រធានអង្គភាពអ្នកនាំពាក្យរាជរដ្ឋាភិបាល លោក ឯក ថា ជាអនុប្រធានប្រចាំការ អមដោយអនុប្រធានបីរូបមាន លោកនាយឧត្តមសេនីយ៏ ខៀវ សុភ័គ ដែលជាអ្នកនាំពាក្យ ក្រសួងមហាផ្ទៃ លោក ឈុំ សុជាតិ អ្នកនាំពាក្យក្រសួងការពារជាតិ និង លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ រួមនិងសមាជិកជាអ្នកនាំពាក្យគ្រប់ក្រសួងចំនួន២៥រូប ផ្សេងទៀតជាសមាជិក៕

ដោយ៖ សុត្ថារ៉ា

ភ្នំពេញ ៖ កម្ពុជា ជាប្រទេសស្ថិត នៅក្នុងចំណោមប្រទេសដែលប្រឈមហានិភ័យគ្រោះមហន្តរាយខ្ពស់ ដោយឈរនៅលំដាប់ទី៤ នៅ ទ្វីបអាស៊ី និងទី១២ នៅទូទាំងពិភពលោក។ យោងតាមរបាយការណ៍ហានិភ័យពិភពលោកឆ្នាំ២០១៨។

តាមការលើកឡើងរបស់លោកស្រី ហ៊ុន បូរមី នាយិកាប្រចាំប្រទេសនៃអង្គការអាក់សិនអេតកម្ពុជា ក្នុងសិក្ខាសាលាអន្តរវិស័យថ្នាក់ជាតិស្តីពីការ លើកកម្ពស់សុវត្ថិភាពស្ត្រី និងការបញ្ជ្រាបយេនឌ័រនៅក្នុងការកាត់បន្ថយហានិភ័យគ្រោះមហន្តរាយ និងការបន្សាំទៅនឹងការប្រែប្រួលអាកាសធាតុ ដែលរៀបចំឡើងដោយគណៈកម្មាធិការជាតិគ្រងគ្រង គ្រោះមហន្តរាយ នាព្រឹកថ្ងៃទី២០ មិថុនានេះ។

លោកស្រី ហ៊ុន បូរមី បានគូសបញ្ជាក់ថា ទឹកជំនន់ គ្រោះរាំងស្ងួត និងខ្យល់ព្យុះ ជាគ្រោះមហន្តរាយចម្បងនៅកម្ពុជា ដែលគ្រោះមហន្តរាយទាំងនេះបានធ្វើឱ្យប៉ះពាល់ទៅលើជីវភាពរស់នៅ និង ស្ថានភាពសេដ្ឋកិច្ចរបស់សហគមន៍ ជាពិសេសចំពោះស្ត្រី និងកុមារ។ លោកស្រីថា យោងតាមការ សិក្សារបស់វិទ្យាស្ថានសេដ្ឋកិច្ចទីក្រុងឡុងដ៏ ចក្រភពអង់គ្លេស បានរកឃើញថា ស្ត្រី និងកុមារងាយ រងគ្រោះពីការប្រែប្រួលអាកាសធាតុធ្ងន់ធ្ងរជាងបុរសដល់ទៅ ១៤ដង ក្រោមកត្តាអវិជ្ជមានមួយចំនួន រួមមាន គំនាបសង្គម ភាពក្រីក្រ ការពុំបានទទួលព័ត៍មានគ្រប់គ្រាន់ និងការអប់រំសម្រាប់ស្ត្រីនៅមាន កម្រិតជាដើម។

នាយិកាប្រចាំប្រទេសនៃអង្គការអាក់សិនអេតកម្ពុជា លោកស្រី ហ៊ុន បូរមី បានកត់ សម្គាល់ពីសារៈសំខាន់ ដែលរាជរដ្ឋាភិបាលកម្ពុជាបានព្យាយាមឆ្លើយតបទៅនឹងការគម្រាមកំហែងនេះ តាមរយៈការបញ្ជ្រាបយេនឌ័រទៅក្នុងផែនការយុទ្ធសាស្ត្រជាតិ គោលនយោបាយ និងកម្មវិធីអភិវឌ្ឍន៍ ផ្សេងទៀត។

លោកបណ្ឌិត ញឹម វណ្ណដា ទេសរដ្ឋមន្ត្រី អនុប្រធានប្រចាំការគណៈកម្មាធិការជាតិគ្រប់គ្រង គ្រោះមហន្តរាយមានប្រសាសន៍ថា ជាការពិតស្ត្រី និងកុមារ តែងតែជាអ្នកទទួលរងគ្រោះធ្ងន់ធ្ងរជាង បុរសពីគ្រោះមហន្តរាយដែលបង្កឡើងដោយធម្មជាតិ និងដោយមនុស្ស។ ឯកឧត្តមថា កម្ពុជាធ្លាប់ ទទួលរងគ្រោះដោយសារគ្រោះធម្មជាតិធ្ងន់ធ្ងរបំផុតកាលពីឆ្នាំ១៩៧៨ ហើយក៏ជាឆ្នាំដែលពលរដ្ឋ កម្ពុជាកំពុងរងគ្រោះមហន្តរាយដែលបង្កឡើងដោយមនុស្សផងដែរ នោះគឺការកាប់សម្លាប់មកលើពល រដ្ឋខ្មែរស្លូតត្រង់ដោយបនប្រល័យពូជសាសន៍ ប៉ុល ពត ដែលជាអ្នកទទួលខុសត្រូវចំពោះការកាប់ សម្លាប់ដ៏យង់ឃ្នងមកលើពូជសាសន៍ឯងប្រហែល ៣លាននាក់ ក្នុងអំឡុងពេលដែលពួកគេកាន់កាប់ ប្រទេសកម្ពុជាទាំងស្រុងពីឆ្នាំ១៩៧៥ ដល់ឆ្នាំ១៩៧៩ ដោយក្នុងគ្រានោះមានស្ត្រី និងកុមារបានស្លាប់ ច្រើនជាងគេ។

លោកបណ្ឌិតទេសរដ្ឋមន្ត្រី ញឹម វណ្ណដា បានបន្តថា ជាការពិត រាជរដ្ឋាភិបាលកម្ពុជាតែង បានយកចិត្តទុកដាក់ខ្ពស់ទៅលើស្ត្រី តាមរយៈការគិតគូអំពីបញ្ហាយេនឌ័រ ដែលជាការឱ្យតម្លៃស្មើគ្នា រវាងបុរស និងស្ត្រី ដោយយើងបានផ្តល់ឱកាសដល់ស្ត្រីក្នុងការកសាងសមត្ថភាពស្ត្រី ការផ្តល់តួនាទី ដល់ស្ត្រីជាដើម ដើម្បីឱ្យពួកគាត់បានចូលរួមក្នុងគ្រប់កិច្ចការរបស់សង្គម ដោយបានបិទបញ្ចប់នូវពាក្យ ថា ស្ត្រីវិលចង្ក្រានមិនជុំ៕

ភ្នំពេញ ៖ លោក ថៃ នរៈសត្យា ស្របពេលដែលត្រូវបានបញ្ចប់មុខតំណែងជារដ្ឋលេខាធិការ នៃក្រសួងវប្បធម៌ និងវិចិត្រសិល្បៈ តាមព្រះរាជក្រឹត្យចុះថ្ងៃទី ១៩ ខែមិថុនា ឆ្នាំ២០១៩ នេះ លោកបានសរសេររៀបរាប់ ពីដំណើរជីវិតរបស់លោកជាមួយអតីតភរិយាដើមរបស់លោក ដែលបានលែងលះគ្នា១០ឆ្នាំរួចហើយ ដោយលោកអះអាងថា ដើម្បីបកស្រាយឲ្យមហាជនទូទៅបានដឹងជាសាធារណៈពីជម្លោះដ៏អាថ៌កំបាំងរបស់លោក។

លោក ថៃ នរៈសត្យា បានសរសេរសង្ខេបយ៉ាងជ្រាលជ្រៅពីជីវិតគ្រួសារដ៏គួរភ្ញាក់ផ្អើលថា ៖ «… ខ្ញុំខ្ពើមរអើមណាស់ជម្លោះ ខ្ញុំខ្ពើមមនុស្សប្រើល្បិច រករឿងទម្លាក់កំហុសលើគេ ដើម្បីបិទបាំងភាពអាក្រក់ជួរជាតិរបស់ខ្លួនឯង ហើយខ្ញុំក៏មិនបន្ទោសអ្នកហៃអើដែរ ព្រោះគ្នាស្តាប់សម្លេងរងាវតែម្ខាង មើលទៅហាក់លង់ក្នុងដ្រាម៉ា នៃអ្នកនិពន្ធណាស់ ! ខ្ញុំខ្ពើម តែខ្ញុំចាំបាច់បំភ្លឺខ្លះវិញ ព្រោះតែហាមឃាត់ស្រីនោះមិនបាន ដើម្បីឲ្យមហាជន លោកបានឃើញនូវចំណុច គួរឲ្យខ្ពើមជាច្រើនដែលកំពុង បិទបាំងលាក់ពួន នៅក្នុងជ្រុងម្ខាងទៀត នៃជង្រុកពុតត្បុតរបស់នាង។ ខ្ញុំបានអរគុណរួចហើយ ដល់ប្រព័ន្ធផ្សព្វផ្សាយ អេឡិចត្រូនិច ទាំងអស់់ដែលបាន យករឿងរ៉ាវជីវិត៧០ឆ្នាំរបស់ខ្ញុំនេះ ទៅបង្ហាញជូនដល់ ពីភពលោកទាំងមូលឲ្យបានដឹង បើទោះបីជាពិតខ្លះ និងមិនពិតជាច្រើនយ៉ាងណាក៏ដោយចុះ ព្រោះថានៅក្នុងលោកនេះ គឺវាមានតែពីរហ្នឹងឯង គឺ ពិត real និង ក្លែងក្លាយឬមិនពិត fake។ មិនអីទេ មុខរបរជាអ្នកកាសែត គឺអីចឹងហើយ ហើយខ្ញុំក៏ធ្លាប់ជា ចាងហ្វាងកាសែតឡូកាល់ និងជាអគ្គនាយក នៃប្រព័ន្ធផ្សព្វផ្សាយដ៏ធំមួយដែរ។ ខ្ញុំចងចាំយ៉ាងជាប់លាប់នូវ ប្រសាសន៍របស់មេខ្ញុំ ដែលខ្ញុំគោរពស្រឡាញ់បំផុតគាត់ថា ” អាមនុស្សខ្លះ បើដេញទាន់ហើយ មិនជាន់កែងវាទេ វានៅតែថាឯងដេញវាមិនទាន់ដដែល ” គឺហេតុផលនេះហើយ ដែលខ្ញុំសម្រេចចិត្ត” ជាន់កែងតែម្តងដើម្បីបង្ហាញតថភាព។
លោក ថៃ នរៈសត្យា លើកឡើងថា “អាណិតកូនៗណាស់ Silence is over” ។

“ប៉ុន្មានថ្ងៃនេះខ្ញុំត្រូវរងការវាយប្រហារពីសំណាក់ស្រីកំណាច ម្នាក់ជាអតីតភរិយា ដែលដាច់អហង្ការបានប្តឹងសុំលែងលះខ្ញុំតាមផ្លូវច្បាប់ជាស្ថាពរ ជាងដប់ឆ្នាំហើយ គឺតាំងពីអំឡុងឆ្នាំ ២០០៨ ដែលកាលនោះ លោកប្រធានគណ:មេធាវីនៃរាជរដ្ឋាភិបាល ឃី តិច លោកបានដឹងច្បាស់ ព្រោះស្រីនោះបានទៅពឹងពាក់នៅស្ថាប័ននេះ ព្រមទាំងគំរាមដោយត្រង់ៗកាលពីពេលនោះថា នឹងធ្វើឲ្យខ្ញុំអស់ទាំងការងារ និងទាំងជីវិតនយោបាយ ។

ដោយអំណាចច្បាប់ ខ្ញុំបានចាកចេញមករស់នៅតាមសមត្ថភាពដែលខ្ញុំអាច ខ្ញុំខំដោយលំបាកលំបិនណាស់អស់ជាច្រើនឆ្នាំ ជាមួយភរិយាក្រោយទើបសាងបានដោយលំបាកនូវជម្រកដ៏ធួនល្មមមួយនៅ ដាច់ស្រយាលឯជាយក្រុង។ខ្ញុំបានរៀបចំកម្មវិធីឡើងផ្ទះនោះទៅតាម លទ្ធភាពស្តួចស្តើងរបស់ខ្ញុំ តែបែរជាស្រីកំណាចនោះផុសបរិហារកេរ្តិ៍ខ្ញុំបំភ័ន្តមតិមហាជន ឲ្យមើលមកខ្ញុំនេះដូចជាមនុស្សអាវាសែ ដែលទើបដើរចោលក្រុមគ្រួសារអីចឹង។ ឃើញដូចនេះខ្ញុំក៏បានពិភាក្សាជាមួយកូនៗទាំងអស់ចង់សរសេរបកពីរឿង នាងនោះដើម្បីកុំឲ្យងងើលក្នុងការឈ្លានពានខ្ញុំមិនលើកលែងជារហូតមក ពេក ព្រោះយើងបានលែងលះគ្នាតាមផ្លូវតុលាការ”ច្បាប់រដ្ឋ”ជាង១០ឆ្នាំ ហើយ តែកូនៗខ្ញុំគាត់សុំខ្ញុំថាកុំអាលអី បើប៉ាសរសេរសុំត្រឹមផ្ញើចូលឆាតគាត់សិនចុះ ដើម្បីកុំឲ្យគាត់យល់ថាគាត់ perfect ពេក ហើយចេះតែមានគំនិតបំផ្លាញគេមិនឈប់ដូចនេះ។ ខ្ញុំបានសរសេរហើយផ្ញើចូលឆាតនាងនោះ តែនាងមិនត្រឹមតែមិនយកទៅពិចារណាទេ គឺថែមទាំងឆាតមកជេរប្រមាថខ្ញុំ ដូចទម្លាប់ដែលនាងធ្លាប់តែកៀបសង្កត់មើលងាយខ្ញុំ ដូចកាលពីមុន (ខ្ញុំមានសម្លេងជេរប្រមាថនេះ)ហើយបន្តចេតនាអាក្រក់ជាមួយបន ភឿនក្នុងការបំផ្លាញ់ខ្ញុំថែមទៀតឥតដកដៃតាមចរិតអាក្រក់របស់គាត់។ ខ្ញុំធន់ទ្រាំរងការប្រមាថក្រោយការលែងលះច្រើនឆ្នាំ មិនបើកកាយអីទេព្រោះអាណិតកូនដែលនៅតូចៗ តែពេលនេះកូនៗខ្ញុំគេធំដឹងក្តីអស់ហលយ ដូចនេះដើម្បីកុំឲ្យយល់ច្រឡំមកលើខ្ញុំខ្លាំងពេក ខ្ញុំសុំបង្ហាញជូននូវសំណេររបស់ខ្ញុំទៅនាងនោះដូចខាងក្រោមនេះ ៖” បើមិនបិទមាត់ទេ កុំថាខ្ញុំខ្វះការយោគយល់ ។ ខ្ញុំសម្រេចចិត្តនឹងនិទានរឿងល្បិចកលនៃអំពើផិតក្បត់ដ៏សាហាវរបស់ ស្រីអំនួតម្នាក់ ដែលចេះតែបំផ្លាញច្រើនជាងកសាង។ ខ្ញុំនឹងបកបង្ហាញសាធារណជនក្នុងឲ្យពួកគេបានដឹងតាំងពី ក ដល់ អ ។ ពីប្រុសសហាយទាំងមកពីអាមេរិក ទាំងនៅខ្មែរ ទាំងអាម្នាក់នៅតាខ្មៅ ទាំងអាម្នាក់ដែលខ្ញុំទៅធាក់ទ្វារចាប់បានរួមគ្នានៅបន្ទប់លេខ 14 នៃផ្ទះសំណាក់មួយនៅត្រើយម្ខាង។ ចាប់បានប៉ុណ្ណឹងហើយគ្មានញិនអីបន្តិចគឺហ៊ានជេបញ្ចោរខ្ញុំនៅ ចំពោះមុខប្រុសសាហាយដែលកំពុងភ័យស្លន់នោះទៀត ម្នាក់នោះខ្ញុំស្គាល់ទាំងប្រពន្ធរបស់គេទៀត ប្រពន្ធម្នាក់នេះគោរពរាប់អានខ្ញុំណាស់ ហើយគឺប្រពន្ធម្នាក់នោះឯងដែលតេមកប្រាប់ខ្ញុំពីការលួចជួបគ្នា នេះ។ គឺបង្ហាញទាំងអស់ រាប់ទាំងអាសង្ហារឈ្មោះ ដួង តារា ដែលល្បីថាពូកែខាង IT ម្នាក់ថែមទៀត ដែលវានេះមានទំនាក់ទំនងគ្នាស្អិតរមួតរាប់ឆ្នាំមកហើយ ហើយទើបតែមានការងារ និងមានប្រពន្ធមិនជាយូរប៉ុន្មាននេះ។ គឺវានោះហើយដែលឃុបឃិតជាមួយស្រីនោះនាំដល់ការបំផ្លាញ villa របស់កូនៗខ្ញុំ ឲ្យក្លាយជាផ្ទះការ៉ាអូខេ…បន្ទាប់មកក៏គឺវានេះទៀតដែរ ដែលទើបនឹងមានមុខមានមាត់មានលុយ ជាអ្នកនៅពីក្រោយការកម្ទេចវីឡានេះឲ្យទៅជាផ្ទះល្វែងទៀត។ ដោយវាជាម្ចាស់លុយក្នុងការជួយឲ្យស្រីនោះវាយផ្ទះវីឡាចោលដើម្បី ធ្វើជាផ្ទះល្វែងនោះ វាមានអាទិភាពជ្រើសរើសយកអាល្វែងកណ្តាលទៀតផង ឥឡូវកំពុងដាក់លក់។ និយាយពីការហិនហោចការបញ្ចាំផ្ទះវីឡានៅធនាគារ Acleda ជាមួយ អង្គរជុំកាត់ដេរ យកលុយមកចាយវាយមិនដឹងមុខ រហូតដល់វ័ណ្ឌក ត្រូវធនាគារបង្ខំអនុវត្តនិតិវិធីធនាគារ ក៏មកអង្វរខ្ញុំឲ្យលក់ដីជាទីស្រឡាញ់របស់ខ្ញុំមួយកន្លែងនៅ កំពង់សោម ឲ្យទៅម្ចាស់ផ្សារទំនើប Samudara តម្លៃបាន៣១ម៉ឺនដុល្លារ ដោយសន្យាថាឲ្យតែខ្ញុំព្រមលក់ដីខ្ញុំបន្តិចជាប់ថែម ដើម្បីយកប្លង់ផ្ទះមកវិញទុកឲ្យកូនៗនៅគេឈប់ប៉ះពាល់ផ្ទះនេះទៀត ហើយ។ ស្រីម្នាក់នោះប្រើល្បិចអោនលំទោនដាក់ខ្ញុំដោយសន្យាជាមួយខ្ញុំថា មិនកាន់ប្លង់ផ្ទះនោះទៀតទេទុកឲ្យខ្ញុំកាន់ការពារចុះ ប៉ុន្តែគ្រាន់តែបានប្ល្ង់ផ្ទះនោះមកដល់ដៃវិញ ក៏យកទៅទុកធ្វើមិនដឹងទៅ ! មិនដឹងថាក្រោយមក ប្លង់នេះត្រូវដាក់បញ្ចាំនៅកន្លែងណាទៀតដែរ ព្រោះឃើញតែខ្វះតែរហូត។

និយាយពីលុយលក់ដីផ្ទះនៅកំពង់សោមនោះវិញ គឺគ្រាន់តែបានលុយភ្លាមស្រីល្បិចនោះបានទារយក១ម៉ឺនភ្លាមយ៉ាង តក់ក្រហល់ដោយនិយាយថាមានការត្រូវដោះស្រាយជាបន្ទាន់ផ្សេងទៀតភ្លាម ។ ក្រោយពីខ្ញុំឲ្យលុយ១ម៉ឺននោះទៅ ភាពហ៊ឹកហ៊ាក់ក៏ត្រឡប់មកវិញភ្លាម ដោយឃើញបនភឿនពួកគេជិះពេញៗឡានដោយទឹកមុខរីករាយភ្លាមដែរ។

ចំណែកលុយ៣០ម៉ឺន ខ្ញុំមានភារកិច្ចត្រូវយកទៅទូទាត់ជាមួយធនាគារ អេស៊ីលីដា ជ្រោយចង្វារដើម្បីលោះប្លង់ផ្ទះ villa នោះមកវិញនិងត្រូវចេញជំនួសចំណែករបស់អង្គរជុំថែមទៀត ដោយហេតុថាស្រីម្ចាស់ផ្ទះនេះវាថ្លៃថ្នូរពេក ដែលសូម្បីតែការយកប្លង់ផ្ទះរបស់ខ្លួនឯងទៅបញ្ចាំធនាគារចំនួន ២០ម៉ឺននោះ ក៏គេមិនទទួលដែរ ព្រោះក្រេឌីតវាឡើងកប់ពេក ដូចនេះត្រូវពឹងពាក់ទៅលើអ្នកមេអណ្តើក co-between ម្នាក់ទៀតគឺអង្គរជុំ ដោយព្រមឲ្យគេបន្ថែមពីលើ ១០ម៉ឺនទៀត សារុបទាំងស្រីនោះយក និងមេអណ្តើកយកបន្ថែមគឺ ៣០ម៉ឺនដុល្លា USA ដូចនេះលុយនោះខ្ញុំមិនបានប៉ះពាល់សូម្បីតែមួយសេនឡើយ ។

សូមសាធារណៈជនលោកមេត្តាពិចារណារកហេតុផលដោយអធ្យាស្រ័យផងចុះថា ” បើគង់តែនិងវ៉ៃបំផ្លាញ villa ធុនមធ្យមដ៏ល្អច្រឡឹងមួយនេះចោល ហើយសង់ផ្ទះល្វែងដូចសព្វថ្ងៃដដែល តើចាំបាច់ទេដែលសុំអង្វរខ្ញុំឲ្យលក់ដីនៅកំពង់សោមយកមកសង្គ្រោះ វាដើម្បីវាយចោលហើយសង់ជាផ្ទះល្វែងជាមួយអាសំណព្វចិត្ត ដួង តារា ដែលក្រោយសងើហើយវាពុះយកល្វែងកណ្តាលនោះធ្វើអី បើវាត្រូវរលាយតែទាំងពីរអ៊ីចឹងនោះ ? តើជាភាពងងើល អំនួត អត្តនោម័ត ល្ងង់ ឬឆ្លាតខ្លាំង ដែលវ៉ៃផ្ទះធំចោលទៅធ្វើជាផ្ទះល្វែងបានតែ៣ល្វែង ហើយឲ្យ ដួង តារា យកអាល្វែងកណ្ដាលអីចឹងនោះ? ។ អំពើរបៀបអីក៏នាងនោះអាចធ្វើបានដែរ រាប់ទាំងការប្រមាថមកលើក្រុមគ្រួសារខ្ញុំ និងអំពើហឹង្សាគ្មានគតិមកលើរូបខ្ញុំឥតឈប់ឈរ ដែលកូនៗរបស់ខ្ញុំធ្លាប់បានឃើញដោយផ្ទាល់ភ្នែកនូវរឿងខ្លះនៃករណីនេះ ហើយថ្មីៗនេះគំរាមសម្លាប់ខ្ញុំថែមទៀត ខ្ញុំមានសម្លេង។ . ខ្ញុំមិនមែនដើរចោលផ្ទះដូចការបរិហារនោះទេ ខ្ញុំត្រូវបង្ខំចិត្តចាកចេញដោយអំណាចសាលក្រមតុលាការ ព្រោះតែការប្តឹងសុំលែងលះរបស់ស្រីនោះ ទោះបីជាខ្ញុំខំសម្រុះសម្រួលយ៉ាងណាក៏មិនព្រមដាច់ខាត ព្រោះតែកំពុងជក់សូរក្នុងការចង់លែងខ្ញុំ ដើម្បីសេរីភាព និងគោលបំណងមួយ ឬច្រើនជាងនេះ។ តាមផ្លូវច្បាប់ នាងនោះអស់សិទ្ធិពាក់ព័ន្ធគ្នាជាមួយខ្ញុំ តាមសាលដីការតុលាការនៃប្រទេសផង និងតាមបំណងដែលស្រីនោះចង់បានផង ដូចនេះការបរិហារកេរ្តិ៍ខ្ញុំ គឺជាបទល្មើសព្រហ្មទណ្ឌ ចំណែកឯការកសាងគ្រួសារ និងសំបុកទ្រមុំថ្មីរបស់ខ្ញុំ វាជាសតិរបស់មនុស្សជាតិ ដោយហេតុថា “សត្វត្រូវមានសំបុក មនុស្សត្រូវមានផ្ទះ”ខ្ញុំ ខ្ពើមរអើមណាស់ជម្លោះ ខ្ញុំខ្ពើមមនុស្សប្រើល្បិចរករឿងទម្លាក់កំហុសលើគេដើម្បីបិទបាំង ភាពអាក្រក់ជួរជាតិរបស់ខ្លួនឯង ហើយខ្ញុំក៏មិនបន្ទោសអ្នកហៃអើដែរ ព្រោះគ្នាស្តាប់សម្លេងរងាវតែម្ខាង មើលទៅហាក់លង់ក្នុងដ្រាម៉ា “Drama” នៃអ្នកអ្នកនិពន្ធណាស់ ! ខ្ញុំខ្ពើម តែខ្ញុំចាំបាច់បំភ្លឺខ្លះវិញព្រោះតែហាមឃាត់ស្រីនោះមិនបាន ដើម្បីឲ្យមហាជនលោកបានឃើញនូវចំណុចគួរឲ្យខ្ពើមជាច្រើនដែលកំពុង បិទបាំងលាក់ពួននៅក្នុងជ្រុងម្ខាងទៀតនៃជង្រុកពុតត្បុតរបស់នាង។ ខ្ញុំបានអរគុណរួចហើយដល់ប្រព័ន្ធផ្សព្វផ្សាយ អេឡិចត្រូនិច ទាំងអស់់ដែលបានយករឿងរ៉ាវជីវិត៧០ឆ្នាំរបស់ខ្ញុំនេះ ទៅបង្ហាញជូនដល់ពីភពលោកទាំងមូលឲ្យបានដឹង បើទោះបីជាពិតខ្លះ និងមិនពិតជាច្រើនយ៉ាងណាក៏ដោយចុះ ព្រោះថានៅក្នុងលោកនេះគឺវាមានតែពីរហ្នឹងឯង គឺ ពិត real និង ក្លែងក្លាយឬមិនពិត fake។ មិនអីទេ មុខរបរជាអ្នកកាសែតគឺអីចឹងហើយ ហើយខ្ញុំក៏ធ្លាប់ជាចាងហ្វាងកាសែតឡូកាល់ និងជាអគ្គនាយកនៃប្រព័ន្ធផ្សព្វផ្សាយដ៏ធំមួយដែរ។ ខ្ញុំចងចាំយ៉ាងជាប់លាប់នូវ ប្រសាសន៍របស់មេខ្ញុំ ដែលខ្ញុំគោរពស្រឡាញ់បំផុតគាត់ថា ” អាមនុស្សខ្លះបើដេញទាន់ហើយមិនជាន់កែងវាទេ វានៅតែថាឯងដេញវាមិនទាន់ដដែល ” គឺហេតុផលនេះហើយ ដែលខ្ញុំសម្រេចចិត្ត”ជាន់កែងតែម្តងដើម្បីបង្ហាញតថភាព” ចិត្តវិទ្យានៃរបបអ្នកនាំពាក្យ គឺមិននាំរឿងទេ ! តែវគ្គសិក្សាជាទ្រឹស្តីបទមូលដ្ឋាននៃអ្នកនៃពាក្យបានបង្ហាញថា ៖ ” បើចង់រម្ងាប់ព័ត៌មានក្លែងក្លាយ ត្រូវប្រតិកម្មរហ័សដោយព័ត៌មាន ” Kill the fake News is push out the Real News”។

សូមជម្រាបថា លោក ថៃ នរៈសត្យា រដ្ឋលេខាធិការក្រសួងវប្បធម៌ និងវិចិត្រសិល្បៈ ត្រូវបានបញ្ចប់មុខតំណែង តាមព្រះរាជក្រឹត្យរបស់ព្រះមហាក្សត្រ ចុះថ្ងៃទី១៩ ខែមិថុនា ឆ្នាំ២០១៩។ ករណីដកតំណែងលោក ថៃ នរៈសត្យា ដែលជាអ្នកនាំពាក្យក្រសួងវប្បធម៌ផងដែរនោះ កើតឡើងក្រោយមានរឿងរ៉ាវផ្ទាល់ខ្លួនក្នុងគ្រួសារនារយៈពេលចុងក្រោយ នេះ៕

ភ្នំពេញ ៖ អង្គភាពប្រឆាំងអំពើពុករលួយ ថ្ងៃទី១៩ ខែមិថុនាឆ្នាំ២០១៩ បានចេញសេចក្តីជូនដំណឹង ស្តីពី ការប្រកាសទ្រព្យសម្បត្តិ និងបំណុលដល់សមាជិកក្រុមប្រឹក្សារាជធានីខេត្តក្រុង ស្រុក ខណ្ឌអាណត្តិទី៣ ឆ្នាំ២០១៩ ឱ្យមកប្រកាសទ្រព្យសម្បត្តិ និងបំណុល ដើម្បីបំពេញកាតព្វកិច្ចជាមន្ត្រីស្ថាប័នរដ្ឋ។

សូមអានខ្លឹមសារទាំងស្រុងដូចខាងក្រោម ៖

ដោយ ៖ សុផល

ខេត្តកំពង់ចាម ៖ រថយន្ដមួយគ្រឿង ដែលដឹកជ្រូកចេញពីប្រទេសវៀតណាម ឆ្លងកាត់តាមស្ពានគីហ្សូណា ខេត្តកំពង់ចាម ត្រូវកម្លាំងសមត្ថកិច្ចចម្រុះ សហការគ្នាតាមចាប់បាន នៅវេលាម៉ោង៩និង៣០នាទីយប់ថ្ងៃទី១៨ ខែមិថុនា ឆ្នាំ២០១៩ ស្ថិតក្នុងភូមិ៣ ឃុំល្វា ស្រុកចំការលើ។

បេីតាមការិយាល័យផលិតកម្មនិងបសុព្យាបាលខេត្តកំពង់ចាមបានអោយដឹងថានៅវេលាម៉ោង៩និង៣០នាទីយប់បានទទួលពត៏មានរាយការណ៍មកថា មានរថយន្តដឹកជ្រូកម៉ាកសាំយ៉ុងព៌ណស ស្លាកលេខភ្នំពេញ 2F -4776ហើយបានប្រដេញដល់ស្រុកចំការលើហើយបានសហការណ៍ជាមួយកងរាជអាវុធហត្ថស្រុកចំការលើ ស្នាក់ការកងរាជអាវុធហត្ថ៧១០និងបានសុំសហការណ៍ជាមួយការិយាល័យផលិតកម្មនិងបសុព្យាបាលខេត្តកំពង់ធំ កងរាជអាវុធហត្ថស្រុកបារាយប្រដេញព័ទ្ធស្ទាក់ឃាត់ចាប់បាននៅវេលាម៉ោង១២និង២៥នាទីដែលស្ថិតនៅក្នុងចំការកៅស៊ូ ភូមិ៣ឃុំល្វា ស្រុកចំការលើក្នុងនោះសត្វជ្រូករស់មានចំនួន ១៣ ក្បាល។

ប្រភពពដដែបានបន្ដទៀតថា សត្វជ្រូករស់ទាំអស់នេះដឹកចេញពីប្រទេសវៀតណាមតាមខេត្តត្បូងឃ្មុំកាត់តាមស្ពានគីហ្សូណាខេត្តកំពង់ចាមហើយរថយន្តនិងជ្រូកទាំងអស់នោះបានឃាត់ទុកនៅការិយាល័យផលិតកម្មនិងបសុព្យាបាលនឹងយកវត្ថុវិភាគផ្ញើទៅវិទ្យាស្ថាoនស្រាវជ្រាវបសុព្យាបាលនៃអគ្គនាយកដ្ឋានសុខភាពសត្វនិងផលិតកម្មសត្វហេីយបានប្រគល់អោយវិទ្យាស្ថានការិយាល័យនិងអនុវត្តន៍បន្តតាមនិតិវិធីច្បាប់៕ 

ភ្នំពេញ ៖ មន្ទីរសុខាភិបាលខេត្តតាកែវ នៅថ្ងៃទី១៩ ខែមិថុនា ឆ្នាំ២០១៩នេះ បានចេញសេចក្ដីបំភ្លឺជុំវិញការបង្ហោះនៅលើបណ្ដាញសង្គម Facebook ថាពេទ្យឆ្មប់ពេលសម្រាលកូនគេហើយ ភ្លេចយកបង់រុំរបួស (កុំប្រេស) ចេញពីក្នុងពោះ បណ្ដាលឲ្យជនរងគ្រោះចុកពោះធ្ងន់ធ្ងរ ហើយត្រូវបញ្ជូនទៅសង្គ្រោះនៅមន្ទីរពេទ្យកាល់ម៉ែត នារាជធានីភ្នំពេញ។

សូមបញ្ជាក់ថា បើតាមគណនីហ្វេសប៊ុក នួន ឈិន ដែលជាប្តីរបស់ស្ត្រីម្នាក់បានឆ្លងទន្លេនោះ បានសរសេរលើហ្វេសប៊ុក ឲ្យដឹងថា ភរិយាខ្ញុំរួចផុតពីគ្រោះថ្នាក់ហើយ ខ្លាចហើយពេទ្យផ្នែកសម្ភព នៅមន្ទីពេទ្យបង្អែកខេត្តតាកែវ សំអាតមិនស្អាតហើយថែម ទាំងមានបង់រុំរបួសក្នុងស្បូនទៀត។

លោកបានបន្តថា ស្វាគមន៍កូនប្រុស និន វិសុទ្ធារ័ត្ន ទំងន់ ៣,៣គ.ក្រ កើតនៅវេលាម៉ោង ១០ ៖ ៥០ នាទីព្រឹកថ្ងៃសុក្រទី៧ ខែមិថុនា ឆ្នាំ២០១៩។

លោក មុន ឈិន ជាប្ដីស្ត្រីរងគ្រោះ បានឲ្យដឹងថា ប្រពន្ធរបស់ខ្លួនបានមកឆ្លងទន្លេកាលពីថ្ងៃទី៧ ខែមិថុនា ឆ្នាំ២០១៩ នៅមន្ទីរពេទ្យបង្អែកខេត្តតាកែវ ដោយឆ្លងទន្លេធម្មតា ដោយមានពេទ្យឆ្មបស្ត្រីម្នាក់ឈ្មោះ សុធា ជាអ្នកបង្កើត។

លុះបង្កើតហើយបាន ៣ថ្ងៃ ខ្លួននាំប្រពន្ធមកសម្រាកនៅផ្ទះក្នុងស្រុកសំរោង បានមួយថ្ងៃ ស្រាប់តែប្រពន្ធរបស់ខ្លួនចុកពោះយ៉ាងខ្លាំង ហើយក្រុមគ្រូសារបានយកទៅពេទ្យកជនក្នុងឃុំ ត្រូវពេទ្យពិនិត្យឃើញកំប្រេសនៅក្នុងស្បូន ហើយក៏វះយកតែហូឈាមចេញច្រើនពេក ពេលនោះក្រុមគ្រូសារ ក៏បានបញ្ជូនបន្តមកព្យាបាល នៅមន្ទីរពេទ្យកាល់ម៉ែត។

បុរសជាប្ដីស្ត្រីរងគ្រោះ បានអះអាងថា នៅមន្ទីរពេទ្យកាល់ម៉ែត ពេទ្យបានប្រាប់ថា ប្រពន្ធរបស់ខ្លួនមានមេរោគឆ្លងនៅក្នុងស្បូន ហើយត្រូវបញ្ចូលឈាមអស់ជាច្រើន និងកំពុងសំរាកព្យាបាល ក្នុងសភាពធ្ងន់ធ្ងរ។

បើតាមសេចក្ដីបំភ្លឺរបស់មន្ទីរពេទ្យបង្អែកខេត្ត បានពន្យល់ថា ករណីសម្រាលកូនរបស់ស្ត្រីរូបនេះ ត្រូវបានវះកាត់ទ្វារមាស និងបូមជំនួយ ដូច្នេះដំណើរការសម្រាល់មានការហូរឈាមខុសធម្មតា ដែលត្រូវកុំប្រេស ដើម្បីឃាត់ទប់ឈាម ដោយរក្សាទុកកុំប្រេសនោះ រយៈពេលជាមធ្យមពី ២៤ទៅ ៤៨ម៉ោង។

មន្ទីរពេទ្យបង្អែកខេត្ត បានបកស្រាយទៀតថា ពេលសម្រាលរួច ស្ដ្រីខាងលើ បានចេញពីមន្ទីរពេទ្យ ដោយសន្យាថា នឹងមករកពេទ្យឆ្មបសំអាតតាមក្រោយ តែផ្ទុយទៅវិញ គាត់មិនបានហៅពេទ្យមកសំអាតទេ គាត់សំអាតដោយខ្លួនគាត់ ដោយយកកុំប្រេស២ដុំ៕

​ដោយ ៖ សុត្ថារ៉ា

ភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិកម្ពុជា នៅព្រឹកថ្ងៃទី១៩ ខែមិថុនា នេះ បាន កិច្ចប្រជុំពិគ្រោះយោបល់នយោបាយកម្ពុជា-សិង្ហបុរីលើកទី១ ដឹកនាំដោយលោកជំទាវ ទួត បញ្ញា អនុរដ្ឋលេខាធិការក្រសួងការបរទេស និងលោក ភីទ័រ តាន់ អគ្គលេខាធិការរង ទទួលបន្ទុកកិច្ចការអាស៊ី និងអាស៊ាន នៃក្រសួងការបរទេសសឹង្ហបុរី នៅទីក្រុងភ្នំពេញ។

កិច្ចប្រជុំនេះ បានផ្ដោតទៅលើកិច្ចពិគ្រោះយោបល់ តាមអនុស្សារណៈនៃការយោគយល់គ្នា ស្ដីពី កិច្ចពិគ្រោះយោបល់ នយោបាយកម្ពុជា សិង្ហបុរី ដែលបានចុះហត្ថលេខា ក្នុងឱកាសទស្សនកិច្ចផ្លូវការ នៅកម្ពុជា របស់លោក វីវៀន បាឡាក់គ្រីស្ហ្សណាន់ រដ្ឋមន្ត្រីការបរទេសសឹង្ហបុរី កាលពីឆ្នាំ២០១៧ ក្នុងគោលបំណងតាម ដាន និងជំរុញកិច្ចសហប្រតិបត្តិការទ្វេភាគី គ្រប់និស្ស័យ នឹងបន្តពង្រីកកិច្ចសហ ប្រតិបត្តិការ ក្នុងក្រប ខណ្ឌតំបន់ និងការផ្លាស់ប្ដូរទស្សន:គ្នា លើបញ្ហាតំបន់និងអន្តរជាតិ ដែលជាអត្ថប្រយោជន៍រួម រវាងកម្ពុជា និងសិង្ហបុរី ដែលប្រទេសកម្ពុជា-សិង្ហបុរី គឺជាមិត្តភក្កិដ៏យូរលង់ណាស់មកហើយ ក្នុងនោះកម្ពុជា គឺជាប្រទេសទី១ ដែលបានទទួលស្គាល់សិង្ហបុរី បន្ទាប់ពីទទួលបានឯករាជ្យក្នុងឆ្នាំ ១៩៦៥។

ទំនាក់ទំនងកម្ពុជា-សិង្ហបុរី ផ្ដើមចេញពីអតីតព្រះមហាក្សត្រព្រះបាទ នរោត្តម សីហនុ ព្រះបរមរតនកោដ្ឋដោយផ្អែកលើគោលការណ៍ គោរពគ្នាទៅវិញទៅមក ការជឿទុកចិត្តលើកិចច្ចសហប្រតិបត្តិការដ៏ល្អរវាងគ្នា។ទំនាក់ទំនងនេះត្រូវបានថ្នាក់ដឹកនា នៃប្រទេសទាំងពីរ បន្តពង្រឹងពង្រីកកាន់តែស៊ីជម្រៅ ស្ដែងចេញតាមរយៈការផ្លាស់ប្ដូរដំណើរទស្សនកិច្ច នៅគ្រប់កម្រិត មានការកើនឡើង នៃទំហំពាណិជ្ជកម្ម ទៅវិញទៅមក។

ក្រសួងការបរទេសកម្ពុជា បានបញ្ជាក់ថា កិច្ចពិគ្រោះយោបល់លើកទីមួយនេះនិងលើកកម្ពស់ទំនាក់ទំនងមិត្តភាពនិងកិច្ចសហប្រតិបត្តិការដ៏ជិតស្និទ្ធ រវាងប្រទេសទាំងពីរទាំង ក្នុងក្របខណ្ឌទ្វេភាគី និងពហុភាគី ការវាយតម្លៃរួមគ្នាលើកិច្ចសហប្រតិបត្តិការទ្វេភាគី ក្នុងវិស័យមួយចំនួន ដូចជា សន្តិសុខនយោបាយ ការពារជាតិ ពាណិជ្ជកម្ម វិនិយោគ ការអប់រំ ការអភិវឌ្ឍធនធានមនុស្ស ទេសចរណ៍ វប្បធម៌ ការងារ ការតភ្ជាប់ ហេដ្ឋារចនាសម្ព័ន្ធរូបវ័ន្ត និងរចនាសម្ព័ន្ធស្ថាប័ន ក្នុងវិស័យសុខាភិបាល និងការដាក់ចេញនូវវិធានការចាំបាច់នានា សំដៅពង្រឹងពង្រីកទំនាក់ទំនងទ្វេភាគី ឱ្យឈានឆ្ពោះឡើងមួយកម្រិតទៀត៕

​ដោយ ៖  សុត្ថារ៉ា

ភ្នំពេញ ៖ មន្រ្តីជាន់ខ្ពស់ ក្រសួងអប់រំ យុវជននិងកីឡា បានជំរុញឱ្យថ្នាក់ដឹកនាំ លោកគ្រូ អ្នកគ្រូ យកចិត្តទុកដាក់បន្ថែមទៀត ទៅលើចលនាជម្រុញឱ្យសាលារៀន មានបរិស្ថានល្អ មានអនាម័យល្អ ធានាដល់ការពង្រឹងសុខមាលភាពរបស់សិស្សានុសិស្សនៅតាមសាលារៀន។

លោក បណ្ឌិត សភាចារ្យ ណាត ប៊ុនរឿង រដ្ឋលេខធិការនិងជាតំណាង ឯកឧត្តមរដ្ឋមន្រ្តីក្រសួងអប់រំ យុវជន និងកីឡា បានលើកឡើងថា សាលារៀនជាកន្លែងបណ្តុះគ្រាប់ពូជន៍ដ៏មានសក្កដានុពលបំផុតក្នុងការកសាងប្រទេសជាតិ ដូច្នេះក្រៅពីមានគ្រូបង្រៀនល្អ សាលារៀនក៏ត្រូវតែស្អាត ពោលគឺ មានសោភណ្ឌមាន បរិស្ថាន អនាម័យ និងសុវត្ថិភាពចំណីអាហារដែលជាមូលដ្ឋានដ៏សំខាន់ ក្នុងការពង្រឹងធនធានមនុស្ស ជាពិសេសឆ្លើយតបកំណែទម្រង់ស៊ីជម្រៅរបស់រាជរដ្ឋាភិបាល ក្នុងវិស័យអប់រំ ដើម្បីប្រសិទ្ធភាព នៃការអប់រំ ក្នុងសម័យទំនើប និងបច្ចេកវិទ្យា។

លោក រដ្ឋលេខាធិការបានលើកឡើងដូច្នេះ នៅក្នុងពិធីបិទសិក្ខាសាលាផ្សព្វផ្សាយ គោលការណ៍ និងនិតិវិធីនៃការវាយតម្លៃ នាយកសាលាល្អ គ្រូបង្រៀនល្អ គ្រូបង្រៀនថ្នាក់ល្អ ថ្នាក់ទី១ ទី២ និងទី៣ ភាសាខ្មែរ គណិតវិទ្យា សាលាស្អាត និង អង្គភាពផ្តល់សេវាសាធារណៈគំរូ ក្នុងវិស័យអប់រំ កាលពីរសៀលថ្ងៃទី១៨ខែ មិថុនា នេះ នៅវិទ្យាស្ថានជាត់អប់រំ។

ឯកឧត្តម រដ្ឋលេខាធិការ បានស្នើឱ្យភាគីពាក់ព័ន្ធ ទាំងអស់ ដោយផ្តើមចេញពីនាយកសាលាលោកគ្រូ អ្នកគ្រូ បន្តយកចិត្តទុកដាក់ អនុវត្តឱ្យបានល្អ តាមគោលការណ៍ សាលារៀនជំនាន់ថ្មី ដើម្បីធ្វើការប្រកួតប្រជែង និងទទួលបានការវាយតម្លៃល្អ ជាអង្គភាពសាធារណៈគំរូ ក្នុងវិស័យអប់រំ។

ឯកឧត្តមបណ្ឌិត សភាចារ្យ ណាត ប៊ុនរឿន ក៏បានជម្រុញឱ្យប្រធានមន្ទីរ បន្តពិនិត្យ តាមដាន នៅតាមសាលារៀន ក្នុងខេត្តនីមួយៗ មុននិងផ្ញើរបាយការណ៍ ឬ បញ្ជូនឈ្មោះមក ចូលរួមប្រកួតប្រជែងមកក្រសួង៕

ភ្នំពេញ ៖ នាព្រឹកមិញនេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានជួបពិភាក្សាជាមួយលោក វ៉ានកាង អនុប្រធានសភាប្រឹក្សាប្រជាជនចិន និងជាអតីតរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យាចិន។ ក្នុងជំនួបនេះ សម្ដេចតេជោ បានស្នើឲ្យភាគីចិនជួយបណ្ដុះបណ្ដាលធនធានមនុស្សលើបច្ចេកវិទ្យា និងវិទ្យាសាស្រ្តដល់កម្ពុជា។

នេះបើតាមការដូចបញ្ជាក់របស់លោក អ៊ាង សុផល្លែត ជំនួយការផ្ទាល់សម្ដេចតេជោនាយករដ្ឋមន្ត្រី។ លោក វ៉ាន់ កាង បានគោរពជម្រាបជូន សម្តេចតេជោថា ក្នុងដំណើរទស្សន កិច្ចរបស់ឯកឧត្តម មកកាន់ប្រជាណាចក្រកម្ពុជានៅពេលនេះ គឺមានទិសដៅពីរ ទី១ គឺដើម្បីសំដែងនូវការគោរពជូនចំពោះសម្ដេចតេជោ និងទី២ គឺដើម្បីពង្រឹងនូវកិច្ចសហប្រតិបត្តិការ រវាងប្រទេសទាំងពីរ ជាពិសេសលើវិស័យវិទ្យាសាស្ត្រ និងបច្ចេកវិទ្យា។ ក្នុងឱការនេះ លោកបានគោរពស្នើសុំទស្សនៈរបស់សម្ដេចតេជោលើកិច្ចសហប្រតិបត្តិការ លើវិស័យវិទ្យាសាស្ត្រនិងបច្ចេកវិ ទ្យានេះ ។

សម្តេចតេជោ មានប្រសាសន៍ថា កិច្ចសហប្រតិបត្តិការ លើវិស័យវិទ្យាសាស្ត្រ និងបច្ចេកវិទ្យាគឺចាំបាច់ត្រូវការ ធនធានមនុស្ស ការស្រាវជ្រាវនិងជំរុញការអភិវឌ្ឍ , ក្នុងយុគសម័យឌីជីថល ឬក៏ក្នុងសម័យបដិវត្តន៍ឧស្សាហ កម្មទី៤ នេះ គឺចាំបាច់ណាស់ត្រូវមានការសិក្សា ការស្រាវ ជ្រាវនិងការប្រើប្រាស់បច្ចេកវិទ្យា IT ប្រើប្រាស់បច្ចេកវិទ្យានិងវិទ្យាសាស្ត្រដទៃទៀត ៕

​ដោយ ៖ សុត្ថារ៉ា

ភ្នំពេញ ៖ សំណុំរឿងរបស់អតីតបុគ្គលិកវិទ្យុ អាស៊ីសេរី (RFA)ចំនួនពីររូប លោក អ៊ួន ឈិន និងលោក យាង សុធារិន្ទ ហៅ សុជាមេត្តា នឹងត្រូវសាលាឧទ្ធរណ៍បើកសវនាការនៅថ្ងៃទី២១ ខែមិថុនា ខាងមុខនេះ ពាក់ព័ន្ធបទចោទ «ប្រគល់ឲ្យរដ្ឋបរទេសនូវព័ត៌មានជាអាទិ៍ដែលអាចធ្វើឲ្យអន្តរាយ ការការពារជាតិ»។

យោងតាមលិខិតអញ្ជើញរបស់ក្រឡាបញ្ជីសាលាឧទ្ធរណ៍ចុះថ្ងៃទី ១៦ មិថុនា បានឲ្យដឹងថា សំណុំរឿងរបស់លោក អ៊ួន ឈិន និងលោក យាង សុជាមេត្តា នឹងបើកសវនាការនៅថ្ងៃទី២១ មិថុនា ឆ្នាំ២០១៩ វេលាម៉ោង ៨ព្រឹកនៅបន្ទប់សវនាការទី៣។

សូមជម្រាបថា លោក យាង សុជាមេត្តា អតីតអ្នកសារព័ត៌មានវិទ្យុអាស៊ីសេរី (RFA) បានថ្លែងថា នៅថ្ងៃទី ២១ មិថុនា សាលាឧទ្ធរណ៍នឹងបើកសវនាការលើសំណុំរឿងចំនួន ២ គឺរឿងលោកទាំង២នាក់ស្នើសុំឲ្យតុលាការបញ្ឈប់ការដាក់ពួកលោក ស្ថិតនៅក្រោមការត្រួតពិនិត្យតាមផ្លូវតុលាការនិងបណ្ដឹងទាមទារយក សម្ភារដែលតុលាការបានរឹបអូសនោះមកវិញ។

លោក សំ ចំរើន មេធាវីការពារក្ដីលោក អ៊ួន ឈិន និងលោក យាង សុជាមេត្តា បានថ្លែងថា លោកនឹងចូលរួមក្នុងសវនាការនេះ ហើយខំប្រឹងឲ្យអស់ពីលទ្ធភាពដើម្បីកូនក្ដីលោកមានសេរីភាពពេញលេញ៕

ភ្នំពេញ ៖ ថ្ងៃទី១៨ មិថុនានេះ ជា មន្ត្រីរាជការក្នុងស្ថាប័នរដ្ឋ ឯកជន និងប្រជារាស្ត្រខ្មែរគ្រប់លំដាប់ថ្នាក់ត្រូវបានឈប់សម្រាកនៅថ្ងៃទី១៨ មិថុនានេះ ដើម្បីអបអរព្រះរាជពិធីចម្រើនព្រះជន្មរបស់សម្តេចព្រះវររាជមាតាជាតិខ្មែរព្រះមហាក្សត្រី នរោត្តម មុនិនាថ សីហនុ គម្រប់៨៣ យាងចូល៨៤ព្រះវស្សា។

ថ្ងៃនេះ ប្រជាពលរដ្ឋ សិស្សានុសិស្ស និងមន្ត្រីរាជការក៏ត្រូវបានឈប់សម្រាកមួយថ្ងៃ។ក្នុងឱកាសទិវាចម្រើន ព្រះជន្មប្រកបដោយនក្ខត្តឫក្សដ៏ឧត្តមនេះ ប្រជារាស្ត្រខ្មែរប្រុស-ស្រី ក៏បាននាំគ្នាថ្វាយសព្ទសាធុការយ៉ាងកងរំពង ចំពោះព្រះមាតាជាតិដ៏ជាទីគោរពស្រឡាញ់របស់ខ្លួនផងដែរ។

ក្នុងឱកាសនេះ «មេគង្គប៉ុស្តិ៍» សូមលើកយកឯកសារសង្ខេបពីព្រះរាជជីវប្រវត្តិរបស់សម្តេចម៉ែ មកជម្រាបជូន ដូចខាងក្រោម ៖

ព្រះមហាក្សត្រី នរោត្តម មុនិនាថ សីហនុ មានព្រះនាមដើមថា ប៉ូល-ម៉ូនិក អ៊ីហ្សហ្ស៊ី Paule Monique IZZI ប្រសូតនៅថ្ងៃទី១៨ ខែ មិថុនាឆ្នាំ១៩៣៦ នាទីក្រុងសាយហ្គន ឬហូជីមិញ។ ព្រះបិតាព្រះនាម ហ្សង់ ហ្វ្រង់ស្វ័រ អ៊ីហ្សហ្ស៊ី (Jean François Izzi) ជាជនជាតិបារាំង ដើមកំណើតអ៊ីតាលី បានទទួលមរណភាពនៅសង្គ្រាមលោកលើកទី២។ ព្រះមាតាព្រះនាម ប៉ុម ពាង (Pomme Peang) ជាជនជាតិវៀតណាម។ទ្រង់មានជេដ្ឋភគិនី ឬបងស្រីម្នាក់នាម អាន-ម៉ារី អ៊ីហ្សហ្ស៊ី Anne-Marie IZZI ។

កាលពីនៅវ័យកុមារភាព ទ្រង់បានសិក្សារៀនសូត្រនៅសាលាបឋមសិក្សាព្រះនរោត្តម និង មធ្យមសិក្សា នៅវិទ្យាល័យព្រះស៊ីសុវត្ថិ និង នៅវិទ្យាល័យដេកាត ក្រុងភ្នំពេញ។កញ្ញាចេះ និង ប្រើប្រាស់ភាសាខ្មែរបារាំង និង អង់គ្លេស។នៅចុងទសវត្សរ៍ឆ្នាំ១៩៦០ ព្រះអង្គជាប្រធានកាកបាទក្រហមខ្មែរ ហើយមកដល់បច្ចុប្បន្ន ជាប្រធានកិត្តិយសកាកបាទក្រហមកម្ពុជា។

នៅខែមេសា ឆ្នាំ១៩៥២ កញ្ញា ប៉ូល ម៉ូនិក អ៊ីស៊ី បានរៀបអភិសេកជាមួយព្រះមហាក្សត្រ នរោត្តម សីហនុ ជាលក្ខណៈឯកជន ហើយរៀបអភិសេកជាផ្លូវការ នៅឆ្នាំ១៩៥៥។ ក្រោយរាជាភិសេក ទ្រង់មានបុត្រា២ព្រះអង្គ គឺព្រះបាទ នរោត្តម សីហមុនី ជាមហាក្សត្របច្ចុប្បន្ន និង ព្រះបាទ នរោត្តម នរិន្ទ្រពង្ស ដែលបានសោយទិវង្គតដោយសាររោគាពាធ។

លុះដល់ឆ្នាំ១៩៩២ អ្នកម្នាង ម៉ូនិក ត្រូវបានព្រះករុណាសម្ដេចនរោត្តម សីហនុ ប្រទានគោរមងារជាសម្ដេចព្រះជាយា។ មួយឆ្នាំបន្ទាប់មក អ្នកម្នាងទទួលគោរមងារជាសម្ដេចព្រះមហេសី ហើយនៅឆ្នាំ១៩៩៦ ទ្រង់ទទួលបរមងារជា សម្ដេចព្រះរាជអគ្គមហេសី។ ក្រោយមកទៀត ទ្រង់ត្រូវបានថ្វាយព្រះបរមងារថាជា ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល។

គួរបញ្ជាក់ថា សម្តេចព្រះវររាជមាតាជាតិខ្មែរ ឬ សម្តេចម៉ែ ទ្រង់ជាមហេសីតែមួយក្នុងចំណោមមហេសីនិង អ្នកម្នាងទាំង៧ របស់អតីតព្រះមហាក្សត្រខ្មែរ ដែលបានទទួលព្រះស្រឹង្គារ ក្តីស្រឡាញ់ មេត្តា ប្រោសប្រណីយ៉ាងខ្លាំងក្លាពីព្រះស្វាមីក្នុងរយៈពេលដ៏យូរលង់ជាង កន្លះសតវត្សរ៍កន្លងទៅនេះ។

ព្រះអង្គបានយាងតាមអតីតព្រះមហាក្សត្រទៅស្ទើរគ្រប់ទិសទីក្នុងគ្រប់ កាលៈទេសៈ មិនថាក្នុងសម័យតស៊ូក្រោយរដ្ឋប្រហារ ១៨ មីនា ១៩៧០ សម័យកម្ពុជាប្រជាធិបតេយ្យខ្មែរក្រហម សម័យការតស៊ូត្រីភាគីនៅតំបន់ជាយដែនខាងលិច ឬសម័យព្រះរាជាណាចក្រកម្ពុជាទី២ នោះឡើយ។

នៅថ្ងៃទី១៨ មិថុនា ឆ្នាំ២០១៩ នេះ គឺជាព្រះរាជពិធីបុណ្យចម្រើនព្រះជន្មគម្រប់៨៣ យាងចូល៨៤ ព្រះវស្សារបស់សម្តេចព្រះមហាក្សត្រី នរោត្តម មុនីនាថ សីហនុ៕