ភ្នំពេញ ៖ លោក ឱម យ៊ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយនៅកម្ពុជា បានថ្លែងថា ACU គាំទ្រគ្រប់រូបភាពក្នុងសមត្ថកិច្ចរបស់ខ្លួនដល់វិស័យឯកជន ក្នុងការប្រកបធុរកិច្ចស្អាតស្អំនៅកម្ពុជា។

លោក ឱម យិនទៀង បានថ្លែងយ៉ាងដូចនេះ នាព្រឹកថ្ងៃទី០២ ខែតុលា ឆ្នាំ២០១៩ ក្នុងឱកាសដែលលោកបានអញ្ជើញជាអធិបតី ក្នុងសិក្ខាសាលាស្តីពី«ការចូលរួមរបស់ធុរកិច្ចក្នុងការប្រយុទ្ធប្រឆាំងអំពើពុករលួយនៅកម្ពុជា» ដែលបានធ្វើឡើងនៅសណ្ឋាគារសាន់វេភ្នំពេញ។ ដោយមានការចូលរួមពីឯកឧត្តម Luke Arnold អនុប្រធានបេសកកម្មការទូត នៃស្ថានទូតអូស្ត្រាលីប្រចាំនៅកម្ពុជា លោក Francesco Chechi ទីប្រឹក្សាការប្រឆាំងអំពើពុករលួយ អង្គការសហប្រជាជាតិទទួលបន្ទុកគ្រឿងញៀន និងបទឧក្រិដ្ឋ (UNODC) ប្រចាំតំបន់អាស៊ីអាគ្នេយ៍និងប៉ាស៊ីហ្វិក និងធុរកិច្ចក្នុងវិស័យឯកជនជាច្រើនទៀតផងដែរ។

ប្រធានអង្គភាពប្រឆាំងអំពើពុករលួយ បានបញ្ជាក់ទៀតថា សិក្ខាសាលាខាងលើនេះ ត្រូវបានរៀបចំឡើងក្នុងគោលបំណងកៀងគរ ការចូលរួមរបស់សហគមន៍ធុរកិច្ចនៅកម្ពុជា រួមជាមួយតំណាងរាជរដ្ឋាភិបាល សង្គមស៊ីវិល ដើម្បីពិភាក្សាលើការរួមគ្នា ដោះស្រាយបញ្ហាអំពើពុករលួយក្នុងវិស័យឯកជនដោយកំណត់នូវ ឧត្តមានុវត្តន៍នៃការពង្រឹងការបង្ការទប់ស្កាត់អំពើពុករលួយក្នុងកិច្ចលទ្ធកម្មសាធារណៈ និងបញ្ហាអំពើពុករលួយនៃភាពជាដៃគូរវាងវិស័យឯកជន និងសាធារណៈ , ដំណោះស្រាយ និងការពង្រឹងសុចរិតភាពធុរកិច្ចក្នុងវិស័យឯកជន។

លោក ឱម យិនទៀង បានបញ្ជាក់ទៀតថា សិក្ខាសាលានេះ ក៏បានចែករំលែកបទពិសោធន៍ពីភាគីពាក់ព័ន្ធជាអ្នកជំនាញ អ្នកអនុវត្តផ្ទាល់លើការងារ មកពីអង្គការអន្តរជាតិស្ថាប័នសាធារណៈ វិស័យឯកជន និងសង្គមស៊ីវិលយ៉ាងប្រទាក់ក្រឡាគ្នា ក្នុងក្របខ័ណ្ឌបទដ្ឋានអន្តរជាតិនៃការប្រឆាំងអំពើពុករលួយក្នុងវិស័យឯកជន, ក្របខ័ណ្ឌច្បាប់សម្រាប់ការដោះស្រាយអំពើពុករលួយ ប្រឈមដោយធុរកិច្ចនៅកម្ពុជា, អភិក្រមក្រុមហ៊ុនធានានូវសុចរិតភាពធុរកិច្ច និងការអនុវត្តការបង្ការទប់ស្កាត់អំពើពុករលួយ ក៏ដូចជាលើកកម្ពស់សកម្មភាពរួម សម្រាប់សុចរិតភាពធុរកិច្ច។

ស្របនឹងសភាពការក្នុងប្រទេស និងអន្តរជាតិ បន្តពង្រឹងការចូលរួមរបស់វិស័យឯកជនក្នុងការប្រយុទ្ធប្រឆាំងអំពើពុករលួយ ដើម្បីកម្ពុជាបន្តរក្សាបាន និងធ្វើឱ្យប្រសើរឡើងនូវបរិយាកាសធុរកិច្ចអំណោយផល ដល់ការវិនិយោគប្រកបដោយចីរភាព ជំរុញកំណើនសេដ្ឋកិច្ចគួរជាទីគាប់ចិត្តបន្តទៀត ក៏ដូចជាការឆ្លើយតបទៅនឹងកាតព្វកិច្ចរបស់កម្ពុជា ក្នុងឋានៈជារដ្ឋភាគីនៃអនុសញ្ញាអង្គការសហប្រជាជាតិប្រឆាំងអំពើពុករលួយ (UNCAC) ពាក់ព័ន្ធការបង្ការទប់ស្កាត់អំពើពុករលួយក្នុងវិស័យឯកជន និងក្នុងកិច្ចលទ្ធកម្មសាធារណៈ ការត្រួតពិនិត្យការអនុវត្តសម្រាប់ជុំទី២នេះ។

សិក្ខាសាលានេះ ក៏បានឆ្លុះបញ្ចាំងនូវឆន្ទៈ ការប្តេជ្ញា សហការរួមគ្នាបន្តប្រយុទ្ធប្រឆាំងអំពើពុករលួយពីគ្រប់ភាគីពាក់ព័ន្ធបន្ថែមលើកិច្ចសហការកន្លងមក ដូចជា ការចូលរួមគោរពច្បាប់ ការចូលរួមក្នុងគំនិតផ្តួចផ្តើមប្រឆាំងអំពើពុករលួយផ្សេងៗដាក់ចេញដោយអង្គភាពប្រឆាំងអំពើពុករលួយ ការចូលរួមរៀបចំនិងដាក់ចេញនូវសៀវភៅណែនាំស្តីអំពីកម្មវិធីប្រឆាំងអំពើពុករលួយសម្រាប់ធុរកិច្ចនៅកម្ពុជា និងកិច្ចសហការផ្សេងៗទៀត ។

ជាមួយគ្នានោះក៏លើកទឹកចិត្តដល់អ្នកចូលរួមទាំងអស់ ទាញយកប្រយោជន៍ពីសិក្ខាសាលានេះ តាមរយៈការទទួលយកបទពិសោធន៍ ដែលបានចែករំលែកដោយភាគីពាក់ព័ន្ធកម្រិតជាតិ អន្តរជាតិ ពីវិស័យសាធារណៈឯកជន និងអង្គការសង្គមស៊ីវិល លើកឡើងពិភាក្សារកដំណោះស្រាយលើបញ្ហាដែលខ្លួនជួបប្រទះ និងរួមគ្នាកំណត់នូវឧត្តមានុវត្តន៍នៃការបង្ការទប់ស្កាត់អំពើពុករលួយតាមរយៈគំនិតផ្តួចផ្តើមផ្សេងៗស្របតាមបរិបទ និងកាលៈទេសៈជាក់ស្តែង។

សូមបញ្ជាក់ដែរថា សិក្ខាសាលាស្តីពីការចូលរួមរបស់វិស័យធុរកិច្ចក្នុងការប្រយុទ្ធប្រឆាំងអំពើពុករលួយនៅកម្ពុជា សហការរៀបចំដោយស្ថាប័នចំនួន៥រួមមាន ការិយាល័យអង្គការសហប្រជាជាតិទទួលបន្ទុកគ្រឿងញៀន និងបទឧក្រិដ្ឋ(UNODC), អង្គភាពប្រឆាំងអំពើពុករលួយ, សភាពាណិជ្ជកម្មអឺរ៉ុប (EuroCham), តំបន់សេដ្ឋកិច្ចពិសេសភ្នំពេញ (PPSEZ), សហព័ន្ធនិយោជកនិងសមាគមពាណិជ្ជកម្មកម្ពុជា (CAMFEBA) និងគាំទ្រដោយរដ្ឋាភិបាលអូស្ត្រាលី៕

ខេត្តប៉ៃលិន ៖ អ្នកនាំពាក្យអយ្យការអមសាលាដំបូងខេត្តប៉ៃលិន បានសេចក្តីប្រកាសព័ត៌មាន នាល្ងាចថ្ងៃទី១ ខែតុលា ឆ្នាំ២០១៩ នេះថា អយ្យការអមសាលាដំបូងខេត្តប៉ៃលិន បានសម្រេចចោទប្រកាន់មនុស្ស ៤នាក់ ពីបទ «រួមគំនិតក្បត់» ក្នុងផែនការផ្ដួលរំលំរាជរដ្ឋាភិបាលកម្ពុជា តាមការអំពាវនាវរបស់ឧក្រិដ្ឋជន សម រង្ស៊ី និងបក្ខពួក។

មនុស្សទាំង៤នាក់នោះ រួមមាន ទី១ ៖ ឈ្មោះ វ៉ែន ដារ៉ា ហៅប៉ុច ភេទស្រី អាយុ៦០ឆ្នាំ, ទី២ ៖ ឈ្មោះ ឈុន សិទ្ធី ហៅគ្រូធី ភេទប្រុស អាយុ៤០ឆ្នាំ, ទី៣ ៖ ឈ្មោះ ឃិន ប៉ុន ភេទប្រុស អាយុ៦៤ឆ្នាំ និងទី៤ ៖ ឈ្មោះ ហ៊ុយ ហួន ភេទប្រុស អាយុ៦៨ឆ្នាំ ប៉ុន្ដែទោះបីជាយ៉ាងណា មនុស្សទាំង៤នាក់ខាងលើនេះ មិនទាន់ត្រូវបានចាប់ខ្លួននៅឡើយទេ ដោយពួកគេ បានចាកចេញពីលំនៅឋានរបស់ខ្លូនបាត់អស់ទៅហើយ។

បើតាមសេចក្ដីប្រកាសព័ត៌មាន របស់អ្នកនាំពាក្យ បានបញ្ជាក់ថា មនុស្សទាំង៤នាក់នេះ ត្រូវបានចោទប្រកាន់ ពាក់ព័ន្ធនឹងអំពើរបស់ឈ្មោះ វ៉ែន ដារ៉ា ហៅ ប៉ុច បានផ្តល់នូវបទសម្ភាស៍ តាមវិទ្យុអាស៊ីសេរី កាលពីអំឡុងខែសីហា ឆ្នាំ២០១៩។ ចំណែកឈ្មោះ ឈុន សិទ្ធី ហៅគ្រូធី, ឈ្មោះ ហ៊ុយ ហួន និងឈ្មោះ ឃិន ប៉ុន គឺពាក់ព័ន្ធនឹងការ ផ្ដល់ទីកន្លែងសម្រាប់ជួបជុំ និងការផ្សព្វផ្សាយតាមរយៈបណ្ដេញ Facebook រួមជាមួយអត្ថបទ ដែលមានលក្ខណៈជាការកៀរគរ បំផុសឲ្យមហាជនចូលរួម ក្នុងផែនការផ្តួលរំលំរដ្ឋាភិបាល នៃកម្ពុជា ជាមួយក្រុមឧទ្ទាមក្រៅច្បាប់ ក្រោមឧបាយកល «ផែនការ នៃការវិលត្រឡប់មកកម្ពុជាវិញ របស់ឧក្រិដ្ឋជន សម រង្ស៊ី» ដោយអនុវត្តតាមការអំពាវនាវ របស់ឧក្រិដ្ឋជន សម រង្ស៊ី និងបក្ខពួក ។

គួរជម្រាបថា អ្នកពាក់ព័ន្ធនឹងការគាំទ្រ ឬចូលរួមអនុវត្តផែនការប៉ុនប៉ងការធ្វើរដ្ឋប្រហារខាងលើនេះ នឹងត្រូវប្រឈមមុខការចោទប្រកាន់បញ្ជូនទៅតុលាការកាត់ទោសតាមច្បាប់ពីបទរួមគំនិតក្បត់ ដែលរងនូវការជាប់ពន្ធនាគារពី ៥ឆ្នាំ ទៅ១០ឆ្នាំ តាមមាត្រា៤៥៣ នៃក្រមព្រហ្មទណ្ឌ នៃព្រះរាជាណាចក្រកម្ពុជា លើកលែងអ្នកពាក់ព័ន្ធទាំងនោះ ចូលមកសារភាពបានទាន់ពេលវេលា ដែលអាចនឹងត្រូវលើកលែងឲ្យរួចពីទោសតាមប្បញ្ញត្តិពិសេស នៃមាត្រា៤៥៤ នៃក្រមព្រហ្មទណ្ឌ នៃព្រះរាជាណាចក្រកម្ពុជាផងដែរ៕

ប្រទេសថៃ ៖ ពលករខ្មែរម្នាក់ដែលទៅធ្វើការផ្នែកប្រមូលសំរាមនៅក្នុងក្រុង Pattaya ប្រទេសថៃ ត្រូវរថយន្តបុកដាច់ជេីងទាំងសងខាង កាលពីវេលាម៉ោង២ រំលងអាធ្រាត្រ ឈានចូលថ្ងៃទី២ ខែតុលា ឆ្នាំ២០១៩ នៅត្រង់ចំណុចស្របផ្លូវរថភ្លេីងជិតភូមិខៅតាឡូ សង្កាត់ណង់ព្រឺ ស្រុកបាងឡាលុង ខេត្តឈុនបុរី ប្រទេសថៃ។

សមត្ថកិច្ចមូលដ្ឋានបានឲ្យដឹងថា ចំណាកស្រុកខ្មែរដែលបានរងគ្រោះមានឈ្មោះ ឈួន ប៊ុនរឿន ភេទប្រុស ២៨ ឆ្នាំ សញ្ជាតិខ្មែរ ស្រុកកំណើតរស់នៅស្រុកមង្គលបូរី ខេត្តបន្ទាយមានជ័យ បានរងរបួសដាច់ជេីងទាំងសងខាង។

ចំណែកឯរថយន្តបង្កម៉ាក Nissan Sylphy ពាក់ស្លាកលេខ 4 กฌ 4462 បាងកក បេីកបរដោយបុរសជនជាតិថៃម្នាក់ស្រវឹងជោកជាំ បានបេីកទៅបុកគូទពីក្រោយរថយន្ដប្រមូលសំរាម ពាក់ស្លាកលេខ 73-3948 របស់ក្រុមហ៊ុនEastern Green World គ្រាដែលជនរងគ្រោះកំពុងធ្វើសកម្មភាពប្រមូលសំរាមតាមទីសាធារណៈ នីងកំពុងឈរនៅពីក្រោយគូថរថយន្តប្រមូលសំរាម ក៏បុកបណ្ដាលអោយរងរបួសធ្ងន់ក្រោយពេលកេីតហេតុជនរងគ្រោះត្រូវសមត្ថកិច្ចសង្គ្រោះដឹកបញ្ជូនយកទៅព្យាបាលបន្ទាន់នៅមន្ទីរពេទ្យក្នុងស្រុកបាងឡាលុង ប៉ុន្តែជាអកុសល ដោយសាររបួសមានស្ថានភាពធ្ងន់ធ្ងរពេក បណ្តាលឲ្យជនរងគ្រោះបានស្លាប់បាត់បង់ជីវិតតែម្តង។

រហូតមកដល់ថ្ងៃទី២ ខែតុលា នេះ មិនទាន់មានប្រភពព័ត៌មានណាមួយបញ្ជាក់លម្អិតពីដំណោះស្រាយ ចំពោះជនរងគ្រោះនៅឡើយទេ៕

ភ្នំពេញ ៖ លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប.) នៅរសៀលថ្ងៃទី០១ ខែតុលាឆ្នាំ ២០១៩នេះ បានអនុញ្ញាតិឱ្យគណៈប្រតិភូក្រុមប្រឹក្សាអ្នកដឹកនាំនយោបាយវ័យក្មេង មកពីសហរដ្ឋអាមេរិកហៅកាត់ថា (ACYPL) ចូលជួបសវនាការ ដើម្បីស្វែងយល់ពីតួនាទីរបស់ គ.ជ.ប នីតិវិធី និងដំណើរការបោះឆ្នោត នៅកម្ពុជា នាទីស្តីការ គ.ជ.ប.។

បើតាម លោក ហង្ស ពុទ្ធា សមាជិក និងជាអ្នកនាំពាក្ស គ.ជ.ប. បានឱ្យដឹងនៅក្រោយជំនួបសវនាការនោះថា ឯកឧត្តម ស៊ិក ប៊ុនហុក បានជម្រាបប្រតិភូអំពីស្ថាប័ន គ.ជ.ប.ដែលជាស្ថាប័នឯករាជ្យ មិនចំណុះឱ្យបុគ្គលណានោះទេ ស្ថាប័នមួយនេះ បង្កើតឡើងបានចំនួន២២ឆ្នាំមកហើយ មានអាណត្តិ៥ឆ្នាំ ព្រមទាំងបានដំណើរការបោះឆ្នោតទាំង សកល និងអសកលបានចំនួន១៦លើករួចមកហើយ។បន្ថែមពីនេះ ឯកឧត្តមក៏បានជម្រាបអំពីស្ថានភាពនិងសភាពការណ៍ពិតនៅកម្ពុជា ក្នុងរបបខ្មែរក្រហម ដែលបានបំផ្លិចបំផ្លាញប្រទេសទាំងស្រុង គ្មានសល់អ្វី ហើយបានចាប់ផ្តើមកសាងប្រទេសឡើងវិញចាប់ពីចំណុចសូន្យ រហូតមានអ្វីៗសព្វថ្ងៃនេះ។

ក្រៅពីពន្យល់ពីសភាពការណ៍ការពិតនៅកម្ពុជា ឯកឧត្តមប្រធានគ.ជ.ប.ក៏បានបញ្ជាក់ផងដែរ ថា ប្រទេសប្រជាធិបតេយ្យ ត្រូវតែផ្តល់ព័ត៌មានដោយប្រសិទ្ធភាពទៅគ្រប់ភាគីពាក់ព័ន្ធទាំងអស់ ចំណែកគ.ជ.ប. គឺត្រូវតែមានចរិក វិជ្ជាជីវៈ តម្លាភាព ក្នុងការបំពេញភារកិច្ច ដោយមានការចូលរួមពីភាគីពាក់ព័ន្ធជាតិ និងអន្តរជាតិ នឹងឈលើគោលការណ៍សំខាន់ៗ គឺ សាកល សេរី សំងាត់ និងការបោះឆ្នោត ដោយផ្ទាល់។

លោកប្រធាន គ.ជ.ប. មានសុទិដ្ឋិនិយមថា ឆ្លងតាមកិច្ចពិភាក្សាគ្នា រវាង គ.ជ.ប. និង ក្រុមប្រឹក្សា ACYP នឹងមានប្រទេសជាច្រើនទៀត នៅលើពិភពលោក បានដឹងពីការពិតកាន់តែច្រើនថែមទៀតពីកម្ពុជា។

សូមបញ្ជាក់ថា ក្រុមប្រឹក្សា ACYP គឺជាអង្គការមិនមែនរដ្ឋាភិបាលដែលរៀបចំកម្មវិធីផ្លាស់ប្តូរ សម្រាប់អ្នកដឹកនាំនយោបាយ ដែលមានអាយុក្រោម៤០ឆ្នាំ ឱ្យទទួលបានបទពិសោធន៍ទាក់ទងនឹងបរិយាកាសនយោបាយ នៃបណ្តាប្រទេសផ្សេងទៀត។ ប្រតិភូនេះ មានសមាជិកចំនួន ៧រូប ដឹកនាំដោយលោក ប៊ិន ស្រ្តាមែន អ្នកជំនាញជាន់ខ្ពស់ផ្នែក អភិវឌ្ឍសេដ្ឋកិច្ច កិច្ចការប្រតិបត្តិធនធានធម្មជាតិ ការដឹកជញ្ជូន និងការអប់រំ ក្នុងនោះមានសមាជិក ៣រូប មកពីគណបក្សប្រជាធិបតេយ្យ និង៤រូបទៀត មកពីគណបក្សសាធារណរដ្ឋ៕

ភ្នំពេញ ៖ បន្ទាប់ពីវិស្សមកាលរយៈពេលបីខែមក រដ្ឋសភា នឹងបើកសម័យប្រជុំរដ្ឋសភាលើកទី៣ នីតិកាលទី៦ នៅព្រឹកថ្ងៃទី៤ ខែតុលា ឆ្នាំ២០១៩ ខាងមុខនេះ។ នេះបើតាមសេចក្តីសម្រេចរបស់កិច្ចប្រជុំគណៈកម្មាធិការ អចិន្រ្តៃយ៍រដ្ឋសភា នៅព្រឹកថ្ងៃទី១ ខែតុលា ឆ្នាំ២០១៩នេះ ក្រោមអធិបតីភាពដ៍ខ្ពង់ខ្ពស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា។

កិច្ចប្រជុំគណៈកម្មាធិការអចិន្រ្តៃយ៍រដ្ឋសភា ក៏បានសម្រេចរបៀបវារៈសម្រាប់ថ្ងៃបើកសម័យប្រជុំរដ្ឋសភាលើកទី៣ នីតិកាលទី៦ ចំនួន៧ ដែលរួមមាន៖ ១-ព្រះរាជសារព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជូនសម័យប្រជុំរដ្ឋសភាលើកទី៣ នីតិកាលទី៦, ២-របាយ ការណ៍ស្តីពីសកម្មភាពរបស់រដ្ឋសភា ចន្លោះសម័យប្រជុំរដ្ឋសភាលើកទី២ និងលើកទី៣ នីតិកាលទី៦, ៣-ការ ពិភាក្សា និងអនុម័តសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងរវាងព្រះរាជាណាចក្រកម្ពុជា និងអង្គការហាមឃាត់អាវុធគីមី ស្តីពីបុព្វសិទ្ធិ និងអភ័យឯកសិទ្ធិរបស់អង្គការហាមឃាត់អាវុធគីមី, ៤-ការពិភាក្សា និងអនុម័តសេចក្តីព្រាងច្បាប់ស្តីពីសំណង់, ៥-ការពិភាក្សា និងអនុម័តសេចក្តីព្រាងច្បាប់ស្តីពីពាណិជ្ជកម្មតាម ប្រព័ន្ធអេឡិចត្រូនិក, ៦-ការពិភាក្សា និងអនុម័តសេចក្តីព្រាងច្បាប់ស្តីពីកិច្ចការពារអ្នកប្រើប្រាស់ និង៧-ការពិភាក្សា និងអនុម័តសេចក្តីព្រាងច្បាប់ស្តីពីរបបសន្តិសុខសង្គម៕

ភ្នំពេញ ៖ គិតត្រឹមថ្ងៃទី៣០ ខែកញ្ញា កន្លងទៅនេះ មានសកម្មជនអតីតគណបក្សសង្គ្រោះជាតិនៅកម្ពុជា ជិត៣០រូបហើយ ដែលត្រូវបានចាប់ និងឃុំខ្លួនបណ្តោះអាសន្នដោយជាប់ពាក់ព័ន្ធនឹងការកៀរគរប្រជាពលរដ្ឋ ដើម្បីចូលរួមគាំទ្រគម្រោងវិលត្រឡប់មកកាន់មាតុប្រទេសវិញរបស់លោក សម រង្ស៊ី នៅថ្ងៃទី៩ វិច្ឆិកា ខាងមុខនេះ។អ្នកទាំងនោះ ត្រូវតុលាការចោទពី បទ «រួមគំនិតក្បត់ និងញុះញង់ឲ្យមានភាពវឹកវរដល់សង្គម»។

(លោក ម៉ោញ សារ៉ាត់ ប្រធាន​ក្រុមការងារ​គណបក្ស​សង្គ្រោះ​ជាតិ​ប្រចាំខេត្ត​ឧត្តរមានជ័យ)

ដោយឡែក សមត្ថកិច្ចស្រុកបាធាយ ក្នុងខេត្តកំពង់ចាម នៅថ្ងៃអង្គារ ទី១ ខែតុលា នេះ បានចាប់ខ្លួនលោក ដុង សុវណ្ណរិទ្ធិ ប្រធានយុវជនអតីតគណបក្សសង្រ្គោះជាតិ ដល់គេហដ្ឋានដោយមិនទាន់បញ្ជាក់ពីមូលហេតុនៅឡើយ។ ចំណែកសកម្មជន ១៦១នាក់ទៀត ត្រូវបានតុលាការចេញដីកាកោះហៅ និងចោទប្រកាន់ជាបន្តបន្ទាប់ ពីបទប៉ុនប៉ងផ្ដួលរលំរដ្ឋាភិបាល។ នេះបើតាម លោក ឃិន ជំរឿន ប្រធានយុវជនអតីតគណបក្សសង្គ្រោះជាតិប្រចាំរាជធានីភ្នំពេញ បានប្រាប់បណ្តាញព័ត៌មានក្នុងស្រុក នៅថ្ងៃអង្គារ នេះ។

ពោះលោក ម៉ោញ សារ៉ាត់ ប្រធានក្រុមការងារអតីតគណបក្សសង្គ្រោះជាតិប្រចាំខេត្តឧត្តរមានជ័យ បានភៀសខ្លួនទៅប្រទេសថៃ ដែលលោកក៏ស្ថិតក្នុងចំណោមសកម្មជនទាំង៣០នាក់នោះដែរ ដែលត្រូវបានអយ្យការអមសាលាដំបូងខេត្តចំនួន ៤ រួមមាន ខេត្តស្វាយរៀង កំពង់ចាម ឧត្តរមានជ័យ រតនគិរី កាលពីពេលថ្មីៗនេះ ចេញដីកាចោទប្រកាន់ នៅក្នុងសំណុំរឿងដូចគ្នាពីបទ “រួមគំនិតក្បត់” តាមមាត្រា ៤៥៣ នៃក្រមព្រហ្មទណ្ឌកម្ពុជាបន្ទាប់ពីធ្វើសកម្មភាពប្រមូលផ្តុំឃោសនាគាំទ្រផែនការលោក សម រង្ស៊ី វិលត្រឡប់មកកម្ពុជាវិញ។

លោក សម រង្ស៊ី តាមរយៈបណ្តាញសង្គម Facebook បានបញ្ជាក់ថា មាតុភូមិនិវត្តន៍របស់លោក នៅថ្ងៃទី៩ ខែវិច្ឆិកា ឆ្នាំ២០១៩ ខាងមុខនេះ គឺមិនមែនជាបដិវត្តន៍ពណ៌ទេ ហើយក៏មិនមែនជារដ្ឋប្រហារ ដូចអ្វីដែលប្រុខរាជរដ្ឋាភិបាលសម្តេចតេជោ ហ៊ុន សែន បានអះអាងនោះដែរ។

ប៉ុន្តែអ្នកនាំពាក្យក្រសួងយុត្តិធម៌ និងអ្នកនាំពាក្យគណបក្សកាន់អំណាច រួមទាំងរាជរដ្ឋាភិបាលកម្ពុជា នៅតែចាត់ទុកគម្រោងរបស់លោក សម រង្ស៊ី នេះថា ជាផែនការបដិវត្តពណ៌ និងជារដ្ឋប្រហារ ដើម្បីផ្តួលរំលំរដ្ឋាភិបាល។ ជាមួយគ្នានេះ

ក្រសួងយុត្តិធម៌កម្ពុជាបានព្រមានថា បុគ្គលទាំងឡាយណាដែលមានចេតនាគាំទ្រអតីតមេបក្សប្រឆាំង ត្រូវតែបញ្ឈប់សកម្មភាពជាបន្ទាន់ បើមិនចង់ឲ្យមានការចាប់ខ្លួន ជាបន្តបន្ទាប់ទៅតាមច្បាប់របស់កម្ពុជា៕

ភ្នំពេញ ៖ រយៈពេល១៥ថ្ងៃ នៃពិធីបុណ្យភ្ជុំបិណ្ឌ ចាប់ពីថ្ងៃទី១៤ ដល់ ២៩ ខែកញ្ញា ឆ្នាំ២០១៩ មានករណីគ្រោះថ្នាក់ចរាចរណ៍ នៅទូទាំងប្រទេសបានកើតឡើងចំនួន ១៩៩លើក ដែលបានបណ្តាលឲ្យមានមនុស្សស្លាប់ចំនួន ១១០នាក់ និងរងរបួសធ្ងន់ស្រាល ២៧៤នាក់។ ក្រៅពីបណ្តាលឲ្យមនុស្សស្លាប់ និងរបួសដ៏ច្រើននេះ ក៏បានបង្កឲ្យខូចខាតម៉ូតូ និងរថយន្ដជាច្រើនគ្រឿងទៀតផង។ នេះបើយោងតាមរបាយការណ៍របស់អគ្គស្នងការដ្ឋាននគរបាលជាតិ។

តាមរបាយការណ៍របស់ប៉ូលីសបានឲ្យដឹងថា មូលហេតុដែលបណ្ដាលឲ្យកើតមានគ្រោះថ្នាក់ចរាចរណ៍ រួមមានល្មើសល្បឿនមិនគោរពសិទ្ធិ មិនប្រកាន់ស្ដាំប្រជែង បត់គ្រោះថ្នាក់ និងស្រវឹង៕

ភ្នំពេញ ៖ គ្រោះអគ្គិភ័យរយៈពេល១៥ថ្ងៃនៃពិធីបុណ្យភ្ជុំបិណ្ឌចាប់ពីថ្ងៃទី១៤ ដល់ថ្ងៃទី២៩ ខែកញ្ញា ឆ្នាំ២០១៩ បានកើតឡើងចំនួន ៣០លើក ក្នុងនោះនៅរាជធានីភ្នំពេញ បានកើតឡើងចំនួន ១០លើក, បាត់ដំបង ៥លើក, ស្ទឹងត្រែង ១លើក, ព្រះសីហនុ ៣លើក, ត្បូងឃ្មុំ ១លើក, សៀមរាប ២លើក, កំពង់ធំ ៣លើក, ព្រៃវែង ២លើក,កំពង់ស្ពឺ ២លើក និងកំពង់ចាម ១លើក។

ក្នុងរបាយការណ៍របស់នាយកដ្ឋានកណ្តាលសណ្តាប់ធ្នាប់សាធារណៈ និងនាយកដ្ឋាននគរបាលបង្ការពន្លត់អគ្គិភ័យ និងសង្គ្រោះការិយាល័យហ្វឹកហ្វឺន និងពន្លត់អគ្គិភ័យ នៃក្រសួងមហាផ្ទៃ ឲ្យដឹងថា ចំពោះសម្ភារៈ ដែលបានខូចខាតក្នុងហេតុការណ៍គ្រោះអគ្គិភ័យនោះរួមមាន ៖ឆេះផ្ទះ ២៩ខ្នង,បន្ទប់ ១បន្ទប់,បឹងហ្គាឡូ ២ខ្នង,តូបលក់គ្រឿងទេស ២តូប,រោងសិប្បកម្មបាយក្តាំង ១ខ្នង ព្រមទាំងស្លាប់មនុស្ស ២នាក់ និងរងរបួស ៨នាក់។ ចំពោះមូលហេតុដែលបណ្តាលឲ្យកើតមានគ្រោះអគ្គិភ័យរួមមាន ៖ ឆ្លងចរន្តអគ្គិសនី ១៥លើក,ភ្លើងទៀនធូប ១លើក,ផ្ទុះហ្គាស ៣លើក,ក្មេងលេងភ្លើង ២លើក,ដុតខ្លួនធ្វើអត្តឃាត ៤លើក,ឆាបសាំង ១លើក,បាក់បំពង់បឺតផ្សែង១លើក ,រថយន្តបុកម៉ូតូ ១លើក និងក្តាប់មិនបានពីមូលហេតុ ចំនួន ២លើក។

នៅក្នុងរបាយការណ៍ដដែលក៏បានបញ្ជាក់ដែរថា គ្រោះអគ្គិភ័យក្នុងឱកាសបុណ្យភ្ជុំបិណ្ឌ នៅក្នុងឆ្នាំ២០១៩ នេះ មានការកើនឡើងចំនួន ១២លើក បើធៀបទៅនឹងរយៈពេលដូចគ្នាកាលពីឆ្នាំ២០១៨ ៕

ខេត្តស្វាយរៀង ៖ មានមនុស្ស៦នាក់ បានរងរបួសធ្ងន់ស្រាល ខណៈដែលបាញ់កាំជ្រួច ដើម្បីបូជាសពខុសបច្ចេកទេស ផ្ទុះឆេះត្រូវមនុស្ស បង្កឲ្យមានការភ្ញាក់ផ្អើល កាលពី វេលា ម៉ោង៦និង៤០នាទីយប់ថ្ងៃទី២៣ ខែកញ្ញា ឆ្នាំ២០១៩ នៅចំណុចផ្ទះ របស់ឈ្មោះទេព សុង ភេទស្រី ស្ថិតក្នុងភូមិត្បែង ឃុំគគីសោម ស្រុកស្វាយទាប ខេត្តស្វាយរៀង។

យោងតាមសមត្ថកិច្ចស្រុកស្វាយទាប បានឲ្យដឹងថា នៅមុនពេលកើតហេតុ មានពិធីបូជាសពនៅផ្ទះឈ្មោះ ទេព សុង ភេទស្រី រស់នៅភូមិឃុំខាងលើ ហើយនៅពិធីបូជាសព ក៏មានដាក់មេន និងដុតកាំជ្រួច ខណៈដែលកំពុងតែបូជាសពនោះ ក៏ដុតកាំជ្រួចឡើង ស្រាប់តែដួលកាណុងជ័របាញ់កាំជ្រួច បណ្តាលឲ្យផ្ទុះរងរបួសធ្ងន់ស្រាល មនុស្ស៦នាក់រួមមាន៖
ទី១- ឈ្មោះ សារុន សំណាង ភេទប្រុស អាយុ២៨ឆ្នាំ មានទីលំនៅភូមិឬស្សីអម ឃុំខ្សែត្រ ស្រុកកំពង់រោទិ៍ ខេត្តស្វាយរៀង ។

ទី២- ឈ្មោះឆាយ សូវ៉ាត ភេទប្រុស អាយុ៤២ឆ្នាំ,

ទី៣- ឈ្នាន់ សុរ៉ាវី ភេទប្រុស,

ទី៤- ឈ្មោះ មិន សាវ៉ាន់ ភេទប្រុស អាយុ៤៨ឆ្នាំ,

ទី៥- ឈ្មោះ គង់ សាខឿន ភេទប្រុស អាយុ៥១ឆ្នាំ,

ទី៦- ឈ្មោះ ប៉ែង គួ ភេទប្រុស អ្នកទាំង៥នាក់ រស់នៅភូមិត្បែង ឃុំគគីសោម ស្រុកស្វាយទាប ខេត្តស្វាយរៀង។

បច្ចុប្បន្ន ជនរងគ្រោះទាំងអស់ ត្រូវបានក្រុមគ្រួសារបញ្ជូនទៅព្យាបាលនៅមន្ទីរពេទ្យ បង្អែកខេត្តស្វាយរៀង។ សមត្ថកិច្ចបានបញ្ជាក់ថា មូលហេតុ មកពីម្ចាស់ដុតកាំជ្រួច ជីកដីដាក់បង្គោលរាក់ បណ្តាលឲ្យដួល និងបែកកាណុងជ័រ ផ្ទុះតែម្តង៕ ដោយ ៖ សុផល