កំពង់ចាម ៖ ករណីឃាតកម្មដ៏សាហាវ សម្លាប់កាត់ក្បាលជនរងគ្រោះ ២នាក់ មានម្នាក់ជា ជីដូន និងចៅស្រីម្នាក់ បង្កឲ្យភ្ញាក់ផ្អើលកាលពីព្រឹកថ្ងៃទី៣ ខែមេសា ឆ្នាំ២០១៩ ក្នុងភូមិត្រពាំងបឹង ឃុំថ្មពូន ស្រុកព្រៃឈរ ខេត្តកំពង់ចាម រួចមកកម្លាំងសមត្ថកិច្ចរបស់ស្នងការខេត្ត និងកម្លាំងជំនាញ ជនជាតិបរទេសជាច្រើននាក់ បានចុះស្រាវជ្រាវពិនិត្យកោសល្យវិច័យ ស្លាកស្នាមយ៉ាងយកចិត្តទុក ដាក់ អស់រយៈពេល៤ថ្ងៃ ទីបំផុតឃាតករ ត្រូវបានចាប់ខ្លួន ជាអ្នករស់នៅក្នុងភូមិឃុំជាមួយគ្នា។

សមត្ថកិច្ចបានឲ្យដឹងថា ជនសង្ស័យឈ្មោះ ស៊ឹម ខេង ភេទប្រុស អាយុ៥៥ឆ្នាំ នៅភូមិត្រពាំងបឹង ឃុំថ្មពូន ស្រុកព្រៃឈរ ខេត្តកំពង់ចាម ក្បែរផ្ទះជនរងគ្រោះ។

ចំណែកជនរងគ្រោះទាំង២នាក់ ដែលត្រូវបានឃាតករកាត់ក្បាលយកទៅបាត់នោះ ឈ្មោះ ពូ អូន ភេទស្រី អាយុ៦៥ឆ្នាំ និងចៅស្រីឈ្មោះ ខេង សាវឿន ភេទស្រី អាយុ៦ឆ្នាំ នៅភូមិទួលថ្ម ឃុំថ្មពូន ស្រុកព្រៃឈរ ខេត្តកំពង់ចាម។

សមត្ថកិច្ចបង្ហើបឲ្យដឹងថា ករណីខាងលើជារឿងគំនុំ ឈានរហូតដល់កាប់សម្លាប់យ៉ាងព្រៃផ្សៃ បែប នេះ។

ក្រោយពីចាប់ខ្លួនបានជនសង្ស័យ ក្នុងករណីឃាតកម្មខាងលើ កាលពីព្រឹកថ្ងៃទី៦ ខែមេសា ឆ្នាំ២០១៩នេះ សមត្ថកិច្ចនាំខ្លួនទៅស្នងការខេត្ត ដើម្បីសាកសួរបន្តនីតិវិធី៕

ខេត្តកំពង់ចាម ៖ ពិធីឡើងគេហដ្ឋានថ្មីមួយ បានក្លាយជាពិធីបុណ្យសព ខណៈភ្ញៀវចូលរួមជាច្រើន នាក់ដែលកំពុងតែរីករាយក្នុងពិធីនេះ ស្រាប់តែបាក់រានហាលដែលជាសំណង់ បេតុងបណ្តាលឲ្យរង របួស ចំនួន១១នាក់ និងស្លាប់ម្នាក់។

មន្ត្រីប៉ូលិសមូលដ្ឋានបានអោយដឹងថា នៅវេលាម៉ោង ៤៧ នាទីថ្ងៃទី៦ ខែមេសា ឆ្នាំ២០៩ មាន កម្មវិធីឡើងផ្ទះថ្មីមួយលោក ស្រ៊ុន ប្រុស នៅភូមិខ្នាឃុំស្តើងជ័យ ស្រុកជើងព្រៃ ខេត្តកំពង់ចាម ហើយបានបាក់ វ៉េរ៉ង់ដា ខាងមុខផ្ទះដែលធ្វើពីស៊ីម៉ង់ដ៍ បណ្តាលអោយសង្កត់ស្លាប់មនុស្សម្នាក់ និង របួសចំនួន១១នាក់ ដែលជាភ្ញៀវមកចូលរួមក្នុងកម្មវិធីឡើងផ្ទះនេះ។ អ្នករងរបួសទាំងនោះរួមមាន ៖ 1/ ឈ្មោះ ញិល ប៉ុក ភេទស្រីអាយុ70 ភូមិខ្នា(ស្លាប់)។ 2/ឈ្មោះ ជ័យ ស៊ី ភេទស្រី អាយុ80 ភូមិ ប្របឹង របួសកដៃឆ្វេង។ 3/ឈ្មោះ ចិន សាំង ភេទស្រី អាយុ70 ភូមិប្របឹង ឃុំស្តើងជ័យ របួសស្មា ខាងស្តាំ។ 4/ ឈ្មោះ ជា ប្រុស អាយុ34ឆ្នាំ នៅភូមិខ្នា(របួសក្បាលជង្គង់-ចង្កេះ-ក្បាល។ 5/ ឈ្មោះ រស់ រៀម ភេទប្រុស អាយុ 70ឆ្នាំ ភូមិខ្នា(បាក់ជើងស្តាំ)។ 6/ ឈ្មោះ រស់ ទូច ភេទស្រីអាយុ70 ឆ្នាំ ភូមិខ្នា(របួសដៃឆ្វេង)។ 7/ឈ្មោះ សុត ហយ ភេទស្រី អាយុ64ឆ្នាំ ភូមិខ្នា(របូសមុខ)។ 8/ឈ្មោះ វ៉ែន សាត ភេទស្រី អាយុ80ឆ្នាំ ភូមិខ្នា(បាក់ដែឆ្វេង-របួសជើងស្តាំ។ 9/ឈ្មោះ ផែ អូន ភេទស្រី អាយុ70 ឆ្នាំ ភូមិខ្នា(បាក់ដៃឆ្វេងនិងរបួសមុខ)។10/ ឈ្មោះ ម៉ែន សឿភេទ ស្រីអាយុ68ឆ្នាំ នៅភូមិខ្នា (បែក ក្បាល)។ 11/ ឈ្មោះ ស៊ីម សៀយ ភេទស្រីអាយុ70ឆ្នាំ បាក់ជើងឆ្វេង និងរបួសជើងស្តាំ។ 12 / ឈ្មោះ ជឹម ជីម ភេទប្រុស អាយុ65ឆ្នាំ ភូមិត្រពាំងស្នោ ឃុំទំនប់ ស្រុកបាធាយ (របួសចង្កេះ)។

មន្ត្រីប៉ូលិសបានអោយដឹងថា ក្រោយកើតហេតុសមត្ថកិច្ចបានបញ្ជូនជនរងគ្រោះ ទៅសង្គ្រោះនៅ មន្ទីរពេទ្យ ចំណែកស្ត្រីចំណាស់ដែលបានរងគ្រោះធ្ងន់ធ្ងររហូតដល់ស្លាប់នោះ ត្រូវបានបងប្អូនសាច់ ញាតិក្នុងភូមិនាំយកទៅរៀបចំពិធីបុណ្យតាមគន្លងប្រពៃណី៕ ដោយ ៖ អ សុផល

ភ្នំពេញ ៖ ក្នុងអំឡុងបុណ្យចូលឆ្នាំថ្មីប្រពៃណជាតិខ្មែរ ឆ្នាំ២០១៩ នេះ ក្រសួងយុត្តិធម៌ បានបើកកិច្ច ប្រជុំដើម្បីត្រួតពិនិត្យ និងវាយតម្លៃដល់ទណ្ឌិតក្នុងការលើកលែងលែង និងបន្ធូរបន្ថយទោស ចំនួន ៤៦០នាក់ ក្នុងនោះមានស្ត្រី ៤៩នាក់ មកពីមណ្ឌលអប់រំកែប្រែ រាជធានី ខេត្ត ចំនួន១៨ នៅទូទាំងប្រទេស។

បច្ចុប្បន្ននេះ ស្ត្រីកំពុងជាប់ពន្ធនាគារ និងមណ្ឌលអប់រំកែប្រែនៅតាមរាជធានី ខេត្ត មានជាង ២ពាន់នាក់ ដែលភាគីច្រើនពាក់ព័ន្ធនឹងគ្រឿងញៀន ក្នុងនោះក៏មានស្ត្រីទណ្ឌិតដែលមានកូន តូចរស់នៅ ជាមួយជាង ១២០នាក់ផងដែរ។ នេះបើតាមការបញ្ជាក់របស់លោក សុច សុផាន់ណារ៉ា អគ្គនាយក រងនៃអគ្គនាយករដ្ឋាន និងអយ្យការ នៃក្រសួងយុត្តិធម៌ កាលពីថ្ងៃទី៤ ខែមេសា នៅទីស្តីក្រសួង ។

លោក សុខ សុផាន់ណារ៉ា បានឲ្យដឹងថា សម្ដេចតេជោ ហ៊ុន សែន លោកតែងតែយកចិត្តទុកដាក់ចំពោះជនជាប់ទោសជាស្ត្រី ។ ជាពិសេសស្ត្រីដែលមានកូននៅជាមួយម្ដាយ ស្ត្រីដែលមានគភ៌ ស្ត្រីដែលចាស់ និងស្ត្រីដែលមានជំងឺធ្ងន់ធ្ងរ ។ ក្រោយពីមានការផ្តល់អនុសាសន៍សម្តេចនាយករដ្ឋមន្ត្រីមកក្រសួងយុត្តិធម៌បានបើកកិច្ចប្រជុំដោយបានកោះហៅស្ថាប័នតុលាការដែលមានប្រធានតុលាការ ប្រធានរាជអាជ្ញា ដើម្បីសុំទិន្នន័យស្ត្រីដែលកំពុងជាប់ក្នុងពន្ធនាគារ ។ ក្នុងកិច្ចប្រជុំក្រសួងយុត្តិធម៌ក៏បានជំរុញឲ្យប្រធានតុលាការ ប្រធានរាជអាជ្ញាការចាត់ការលើសំណុំរឿងស្ត្រីឲ្យបានឆាប់ផងដែរ ។

បើតាមការបញ្ជាក់របស់លោក សុច សុផាន់ណារ៉ា បានឱ្យដឹងថា ស្ត្រីដែលកំពុងជាប់ក្នុងពន្ធនាគារ គីរមកទល់ពេលនេះ មានសរុបចំនួន ២ ៤៤១នាក់ ក្នុងនោះស្ត្រីដែលមានគត៌៤៤នាក់ និងស្ត្រីមាន កូនតាមមកនៅជាមួយចំនួន ១២៦នាក់ ។

លោកក៏បានលើកឡើងទៀតថាសម្រាប់ការលើកលែងទោសចំពោះស្ត្រីដែលតាមគោលការណ៍របស់រាជរដ្ឋាភិបាលក្នុងការលើកលែង និងបន្ធូរបន្ថយទោសចំពោះស្ត្រីមិនមែនធ្វើតែសម្រាប់ថ្ងៃចូលឆ្នាំនោះទេ គឺធ្វើជានិរន្ត ។ ទី១- ទាក់ទងនឹងនីតិវិធីតុលាការខាងក្រសួងយុត្តិធម៌ជំរុញឱ្យពន្លឿនលើបណ្ដឹងរបស់ស្ត្រី ទី២- រកឯកសារទាក់ទងនឹងសាលក្រមជាស្ថាពរ ដើម្បីនឹងងាយស្រួលបន្ទូលបន្ថយទោស និងលើកលែងទោស​។

សូមជម្រាបថា ការលើកលែងទោសត្រូវបានរៀបចំធ្វើជារៀងរាល់ឆ្នាំមានចំនួនបីដង រួមមានថ្ងៃចូល ឆ្នាំ វិសាខបូជា និងថ្ងៃបុណ្យអុំទូក ។ តែប្រការគួរឲ្យកត់សម្គាល់ គឺសម្ដេចតេជោ លោកតែងតែផ្ដល់អាទិភាពដល់ស្ត្រីជានិច្ចក្នុងការលើកលែង និងបន្ថូរបន្ថយទោស ព្រោះថាអ្វីដែលចាប់អារម្មណ៍និងលំបាកចំពោះភ្នែកនោះ គឺស្ត្រីដែលមានកូននៅជាមួយម្ដាយក្នុងពន្ធនាគារ៕

ភ្នំពេញ ៖ រដ្ឋបាលរាជធានីភ្នំពេញ បានធ្វើការអំពាវនាវអោយបងប្អូនប្រជាពលរដ្ឋទាំងអស់ត្រូវម្ចាស់ការនិងប្រុងប្រយ័ត្នខ្ពស់ចំពោះគ្រោះអគ្គីភ័យ ខណៈរយៈពេល២ខែនេះ កំដៅនឹងឡើងដល់ ៤០អង្សាសេ ដែលងាយនឹងរងគ្រោះដោយគ្រោះអគ្គីភ័យជាយថាហេតុ។

នេះបើយោងតាមសេចក្តីជូនដំណឹងស្ដីពី ការបង្ការគ្រោះអគ្គីភ័យ ក្នុងរដូវប្រាំង ដែលចុះហត្ថលេខាដោយ លោក ឃួង ស្រេង អភិបាលរាជធានីភ្នំពេញ កាលពីថ្ងៃទី០៣ មេសានេះ។

សេចក្តីជូនដំណឹងនេះ បានបញ្ជាក់ថា តាមការព្យាករណ៍ឧតុនិយមបានឲ្យដឹងថាអាកាសធាតុនៅប្រទេសយើងនឹងឡើងកំដៅរហូតដល់លើស ៤០ អង្សាសេ ចាប់ពីពេលនេះតទៅរហូតដល់ពេលប្រមាណ២ ខែទៅមុខទៀត ដែលធ្វើឲ្យអាកាសធាតុក្តៅស្ងួតហួតហែងងាយនឹងបណ្ដាលឱ្យកើតគ្រោះអគ្គីភ័យជាយថាហេតុ។

អាស្រ័យហេតុនេះ រដ្ឋបាលរាជធានីភ្នំពេញ សូមអំពាវនាវ ដល់បងប្អូនប្រជាពលរដ្ឋ ត្រូវម្ចាស់ការនិងប្រុងប្រយ័ត្នខ្ពស់ ចំពោះដើមចមដែលអាចបង្កើតអោយមានគ្រោះអគ្គីភ័យដូចជា ភ្លើងចង្ក្រាន ភ្លើងចង្កៀង ភ្លើងធូបទៀន ការដុតសំរាម ដុតព្រៃចំការ វាលស្រែ ការបោះចោលកន្ទុយបារីផ្ដេសផ្ដាស ការតភ្ជាប់ឬប្រើចរន្តអគ្គិសនី មិនត្រឹមត្រូវតាមបច្ចេកទេស ការទុកដាក់ប្រេងឥន្ធនៈ ឧស្ម័នចំហេះ វត្ថុងាយឆេះឬងាយផ្ទុះឆេះ។ល។ ដោយត្រូវពិនិត្យឲ្យបានហ្មត់ចត់បង្ការកុំឲ្យមានការឆេះរាលដាលបង្កើតជាគ្រោះអគ្គីភ័យដែលធ្វើអោយមានការឆេះរាលដាលបង្កើតជាគ្រោះអគ្គីភ័យ ដែលធ្វើអោយបាត់បង់ទាំងទ្រព្យសម្បត្តិ និងអាចដល់អាយុជីវិត។

ដោយឡែកចំពោះអាជ្ញាធរមូលដ្ឋាន និងកងកម្លាំងមានសមត្ថកិច្ចទាំងអស់ ត្រូវត្រៀមរៀបចំនឹងត្រូវរិះរកគ្រប់មធ្យោបាយ ឲ្យបានគ្រប់គ្រាន់ ក្នុងការបង្ការទប់ស្កាត់ការកើតមានជាយថាហេតុ នូវអគ្គិភ័យក្នុងមូលដ្ឋានរបស់ខ្លួន ស្របតាមសេចក្តីអំពាវនាវរបស់ក្រសួងមហាផ្ទៃ៕

ភ្នំពេញ ៖ ម៉ាស៊ីន និងឧបករណ៍ផលិតគ្រឿងញៀន ជាច្រើនត្រូវបានសមត្ថកិច្ចក្រសួងមហាផ្ទៃចុះបង្ក្រាបក្នុងទីតាំងមួយកន្លែង នៅខណ្ឌសែនសុខ តែម្ចាស់ទីតាំងបានរត់គេចខ្លួនបាត់។

មិនគួរឲ្យជឿទាល់តែសោះថា មានឧក្រិដ្ឋជនហ៊ានលួចផលិតគ្រឿងញៀនកណ្តាលក្រុងភ្នំពេញ
កម្លាំងនគរបាលប្រឆាំងគ្រឿងញៀនក្រសួងមហាផ្ទៃបានស្រាវជ្រាវ និងស្ទូចយកម៉ាស៊ីនផលិតគ្រឿងញៀនជាច្រើនប្រភេទ កាលពីវេលាម៉ោង ១រសៀលថ្ងៃទី២ ខែមេសា ឆ្នាំ២០១៩ ស្ថិតនៅចំនុចផ្ទះគ្មានលេខតាមបណ្តោយផ្លូវ ៣៧១សឡា ភូមិអូរបែកក្អមសង្កាត់អូរបែកក្អម ខណ្ឌសែនសុខ រាជធានីភ្នំពេញ បង្កឲ្យមានការកកស្ទះចរាចរណ៏ដោយពលរដ្ឋជាច្រើននាក់ ដែលធ្វើដំណើរនៅតាមបណ្តោយផ្លូវ ៣៧១សឡា បាននាំគ្នាចោមរោមមើលហើយហួសចិត្តស្ទើរ តែមិនគួរឲ្យជឿថា ឧក្រិដ្ឋជនដែលជាម្ចាស់ទីតាំងខាងលើនេះហ៊ានអីក៏ហ៊ានយ៉ាងនេះ ដោយហ៊ានយកម៉ាស៊ីនផលិតគ្រឿងញៀនមកផលិតនៅទីសារធារណះជាប់នឹងផ្លូវធំ សូម្បីតែសមត្ថកិច្ចមូលដ្ឋានក៏ពុំបានដឹង។

នេះ សូមសរសើរហើយដែលកម្លាំងនគរបាលមន្ទីរប្រឆាំងគ្រឿងញៀនក្រសួងមហាផ្ទៃស្រាវជ្រាវរកឃើញទាន់ កុំអីមិនដឹងជាឧក្រិដ្ឋជនមានឱកាសផលិតចេញគ្រឿងគ្រឿងជាច្រើនគីឡូដើម្បីយកទៅចែកចាយបន្តបំពុលយុវជនដែលជាទំពាំងស្នងឬស្សីវង្វេងវង្វាន់អស់ប៉ុន្មាននាក់នោះទេ។

ជុំវិញករណីបង្រ្កាបទីតាំងផលិតគ្រឿងញៀនខាងលើនេះ សមត្ថកិច្ចនគរបាលមន្ទីរប្រឆាំងគ្រឿងញៀនមិនអាចបញ្ជាក់ប្រាប់ថា បានដកហូតថ្នាំញៀនប៉ុន្មានគីឡូនោះទេ។ ដោយគ្រាន់តែបង្ហើបថាសមត្ថកិច្ចកំពុងស្រាវជ្រាវចាប់មេក្លោងឲ្យបាននាពេលឆាប់ៗខាងមុខនេះ ដើម្បីយកមកផ្តន្ទាទោសតាមផ្លូវច្បាប់៕

ភ្នំពេញ ៖ អ្នកឧកញ៉ា គិត ធាង ម្ចាស់មជ្ឈមណ្ឌលកម្សាន្ដរ៉ុក នៅព្រឹកថ្ងៃទី២ ខែមេសា ឆ្នាំ២០១៩ នេះ ត្រូវបានបញ្ជូនមកសម្រាកព្យាបាលជំងឺនៅមន្ទីរពេទ្យរុស្ស៊ី ដោយសារជំងឺសួត បន្ទាប់ពីលោកស្រីមេធាវី ពឹង ធីតា ដាក់ពាក្យស្នើសុំទៅលោក កែវ សុធា ព្រះរាជអាជ្ញាអមសាលាដំបូង រាជធានីភ្នំពេញ ។

សូមរំលឹកថា លោក គិត ធាង ត្រូវបានតុលាការសម្រេចដាក់ពន្ធនាគារប៉េហ្សី ជាបណ្តោះអាសន្ន កាលពីរសៀលថ្ងៃទី១២ ខែមីនា ឆ្នាំ២០១៩ ពីបទសម្រួលឲ្យមានការប្រើប្រាស់គ្រឿងញៀនក្នុងអាជីវកម្មក្លឹបកម្សន្តរ៉ុក ដែលជាកម្មសិទ្ធិរបស់លោក៕

ភ្នំពេញ ៖ លោក ផែង វណ្ណៈ អ្នកប្រើប្រាស់បណ្តាញសង្គមដ៏ល្បីម្នាក់ ត្រូវបានព្រះរាជអាជ្ញាសម្រេចចោទប្រកាន់ពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបរិហារកេរ្តិ៍ជាសាធារណៈ» ហើយបញ្ជូនទៅកាន់ទីបញ្ជាការដ្ឋានអាវុធហត្ថវិញ ហើយគ្រោងបន្តសាកសួរបន្ថែមនៅថ្ងៃស្អែកទី៣ ខែមេសា។

ការនាំលោក ផែង វណ្ណៈ ទៅសួរ និងឈានដល់ការបញ្ជូនទៅតុលាការ គឺកើតឡើងក្រោយមានបណ្តឹងពីលោក គី តិច មេធាវីរបស់សម្តេចនាយករដ្ឋមន្រ្តី ហ៊ុន សែនដែលលោកមេធាវី បានបញ្ជាក់ឲ្យដឹងថា៖«គាត់មានចេតនាបរិហារកេរ្តិ៍ និង ចោទសម្តេច ថា ជាអ្នកនៅពីក្រោយឃាតកម្មលើលោក កែម ឡី»។

គួររំលឹកថា លោក ផែង វណ្ណៈ ត្រូវបានលោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះនិងផ្តល់យោបល់ ប្តឹងទៅអង្គភាពប្រឆាំងអំពើពុករលួយ (ACU) ដោយសារសង្ស័យថាលោកប្រព្រឹត្តអំពើពុករលួយ ខណៈដែលលោក ផែង វណ្ណៈ ធ្វើជាតំណាងឲ្យគ្រួសាររបស់កញ្ញា យិន ម៉ាណា ដែលបានបើករថយន្តបុកនិស្សិតឆ្នើមកញ្ញា ឌុំ រីដា ឲ្យស្លាប់ ដោយពេលនោះ លោក ផែង វណ្ណៈ បានយកថវិកា៥ពាន់ដុល្លារពីគ្រួសាររបស់កញ្ញា យិន ម៉ាណា ទៅចូលបុណ្យសពកញ្ញា ឌុំ រីដា។

លោក ផែង វណ្ណៈ បានសរសេរឆ្លើយតបលើបណ្តាញសង្គម ទៅលោក ពេជ្រ ស្រស់ ដោយភ្ជាប់រឿងនេះ ទៅនឹងសម្តេចតេជោដែលបានចូលបុណ្យសពលោក កែម ឡី ដោយលើជាសំណួរថា «ចុះហេតុអ្វី បានជាលោក ពេជ្រ ស្រស់ មិនប្តឹងសម្តេច ហ៊ុន សែន ពីបទប្រព្រឹត្តអំពើពុករលួយដែរទៅ ព្រោះសម្តេច បានឲ្យគេយកថវិកាទៅចូលបុណ្យលោក កែម ឡី? »។ ក្រៅបណ្តឹងនេះ លោក ផែង វណ្ណៈ ក៏រងបណ្តឹងមួយទៀត ពីអង្គភាពព័ត៌មាន Fresh News ផងដែរ៕

ភ្នំពេញ ៖ លោក ផែង វណ្ណៈ ដែលជាអ្នកលេង Facebook ដ៏ល្បីម្នាក់ ត្រូវបានកម្លាំងអាវុធហត្ថលើផ្ទៃប្រទេស ចាប់ឃាត់ខ្លួននៅព្រឹកថ្ងៃទី២ ខែមេសា ឆ្នាំ២០១៩នេះ ពាក់ព័ន្ធនឹងករណីបង្ហោះលើ Facebook នូវការវិភាគមួយចំនួន ដែលនាំឲ្យសាធារណជនយល់ច្រឡំថា សម្តេចនាយករដ្ឋមន្ត្រីនៃកម្ពុជា ពាក់ព័ន្ធទៅនឹងឃាតកម្មលើលោក កែម ឡី។

បើតាមលោកឧត្តមសេនីយ៍ត្រី គង់ សត្ថារិន ស្នងការរង ស្នងការដ្ឋានស្រាវជ្រាវបង្ក្រាបបទល្មើស ប៉េអឹមលើផ្ទៃប្រទេស បានបញ្ជាក់ថា លោក ផែង វណ្ណៈ ជាមន្ត្រីយោធានៅក្រសួងការពារជាតិ និងជាអ្នកលេងហ្វេសប៊ុកដ៏ល្បីឈ្មោះម្នាក់ ត្រូវបានប៉េអឹមលើផ្ទៃប្រទេសចាប់ខ្លួនហើយ នៅព្រឹកថ្ងៃទី២ ខែមេសា នេះ ដើម្បីបន្តនីតិវិធីបញ្ជូនទៅតុលាការ។

ការចាប់ខ្លួននេះ ក្រោយមានពាក្យបណ្តឹងរបស់លោក គី តិច ជាមេធាវីតំ៥ណាងដោយអាណត្តិរបស់សម្តេចនាយករដ្ឋមន្រ្តី ហ៊ុន សែន កាលពីថ្ងៃទី១ ខែមេសា ឆ្នាំ២០១៩ ទៅកាន់សាលាដំបូងរាជធានីភ្នំពេញ ដោយប្តឹងលោក ផែង វណ្ណៈ ពីបទប្រើប្រាស់បណ្តាញសង្គម Facebook ផ្សព្វផ្សាយដល់ សាធារណជន គោលបំណងបរិហាកេរ្តិ៍ ជាសាធារណៈលើ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងមានចេតនាពេញទី គោលបំណងញុះញង់ឲ្យប្រព្រឹត្ត បទឧក្រិដ្ឋជាអាទិ៍ ដែលជាអំពើផ្ទុយនឹង បញ្ញត្តិមាត្រា៣០៥ និងបញ្ញត្តិមាត្រា ៤៩៤-៤៩៥ នៃក្រមព្រហ្មទណ្ឌ។

មេធាវីសម្តេចតេជោ ហ៊ុន សែន បានអះអាងថា សំណេរនេះបានបញ្ជាក់ច្បាស់ថា ឈ្មោះ ផែង វណ្ណៈ ពិតជាមានផែនការច្បាស់លាស់ និង ចេតនាទុច្ចរិតពិតប្រាកដធ្វើការ ប្រៀបធៀប ក្នុងបំណងចោទប្រកាន់ និងទម្លាក់កំហុសទៅលើសម្តេចអគ្គមហាសេនាបតីតេជោ ហ៊ុន សែន ថា ជាឃាតកសម្លាប់លោកបណ្ឌិត កែម ឡី។

មេធាវីសម្តេចតេជោ ហ៊ុន សែន បានប្តឹង និងធ្វើសំណូមពរឲ្យលោកព្រះរាជអាជ្ញា ធ្វើការពិនិត្យសម្រេចឃាត់ខ្លួន ឬចាប់ខ្លួន និងឃុំខ្លួន ឈ្មោះ ផែង វណ្ណៈ ជាបន្ទាន់ដើម្បីទប់ស្កាត់ការប្រព្រឹត្តអំពើល្មើសជាបន្តបន្ទាប់ ដែលអាចនាំឲ្យមានភាពវឹកវរធ្ងន់ធ្ងរដល់សន្តិសុខសង្គម៕

ភ្នំំពេញ ៖ សម្តេចនាយករដ្ឋមន្រ្តី ហ៊ុន សែន បានបញ្ជាឱ្យអគ្គិសនីកម្ពុជា កាត់ផ្តាច់ភ្លើងផ្ទះអ្នកដែលវិភាគថា «រដ្ឋាភិបាលធ្វើឱ្យដាច់ភ្លើង ដើម្បីយកលេសធ្វើវារីអគ្គិសនី» ដែលសម្តេចបានហៅថា ជាការវិភាគដែលមើលឃើញតែរាជរដ្ឋាភិបាលក្នុងផ្លូវអាក្រក់។

សម្តេចបញ្ជាក់យ៉ាងដូច្នេះ នៅក្នុងពិធីសម្ពោធដាក់ឱ្យដំណើរការជាផ្លូវការនូវប្រព័ន្ធផ្គត់ផ្គង់ទឹកស្អាតខេត្តកំពត នាព្រឹកថ្ងៃទី២ ខែមេសា ឆ្នាំ២០១៩ថា ៖ «បើយើងស្គាល់វា កាត់ភ្លើងអាផ្ទះហ្នឹងហ្មង ឱ្យឯងដុតចន្លុះ ដើម្បីឱ្យឯងដឹង ថាវាខ្វះអគ្គិសនីមិនមែនយកហេតុផល ដើម្បីធ្វើវារីអគ្គិសនី។ វាថាយើងហ្នឹង ធ្វើឱ្យដាច់ភ្លើង ដើម្បីបង្កើតលេស បង្កើតវារីអគ្គិសនី»។

សម្តេចតេជោ ហ៊ុន សែន បានថ្លែងថា« បើទោះបីជាមានការវិនិយោគធ្វើវារីអគ្គិសនីបន្ថែមទៀត ក៏គ្មានកន្លែងធ្វើដែរ ហើយបើទោះជាធ្វើនៅក្បាលទឹក ក៏កន្លែងនោះខ្វះទាំងទឹកទៅទៀត។ ដោយឡែកនៅតំបន់អារ៉ែង សម្តេចបញ្ជាក់ហើយថា មិនឱ្យធ្វើវារីអគ្គិសនីដាច់ខាត»៕