ភ្នំពេញ ៖ រដ្ឋបាលរាជធានីភ្នំពេញ បានជូនដំណឹងដោយអំពាវនាវឲ្យរៀបចំទុកដាក់សំរាមបានត្រឹម ត្រូវក្នុងទីតាំងសមស្របណាមួយ ព្រោះសេវាប្រមូលសំរាមក្នុងរាជធានីភ្នំពេញ មិនបានពេញលេញទេ ដោយសារកម្មករក្រុមហ៊ុនស៊ីនទ្រី ត្រូវបានសម្រាកក្នុងឱកាសបុណ្យចូលឆ្នាំថ្មី រយៈពេល ៤ថ្ងៃចាប់ពីថ្ងៃទី១៤ ថ្ងៃទី១៧ ខែមេសា ឆ្នាំ ២០១៩។

បើតាមសេចក្តីជូនដំណឹងរបស់រដ្ឋបាលរាជធានីភ្នំពេញ បានបញ្ជាក់ថា ដើម្បីថែរក្សាសោភ័ណភាពអនាម័យ និងបរិស្ថាននារាជធានីភ្នំពេញក្នុងឱកាសពិធីបុណ្យចូលឆ្នាំប្រពៃណីខ្មែរឆ្នាំ ២០១៩ នេះ សូមបងប្អូនប្រជាពលរដ្ឋជាម្ចាស់លំនៅឋានក្នុងរាជធានីភ្នំពេញទាំងអស់ មេត្តាយោគយល់ ដោយ កុំបញ្ចេញសំរាមមកដាក់នៅតាមផ្លូវសាធារណៈនៅក្នុងអំឡុងពេលដែលការផ្ដល់សេវាមិនបានពេញ លេញនេះ ដោយរក្សាទុកសំរាមរបស់ខ្លួនឲ្យបានត្រឹមត្រូវនៅក្នុងទីតាំងរៀងខ្លួនជាបណ្ដោះអាសន្នសិន ព្រោះកម្មករប្រមូលសំរាមក្រុមហ៊ុនស៊ិនទ្រី ក៏ត្រូវបានអនុញ្ញាតឲ្យឈប់សម្រាកក្នុងថ្ងៃ បុណ្យ ចូលឆ្នាំថ្មីនេះដែរ ហើយការប្រមូលសំរាមនឹងចាប់ផ្តើមជាថ្មីឡើងវិញនៅថ្ងៃទី១៨ ខែមេសា ក្រោយ ពេលបញ្ចប់ពិធីបុណ្យចូលឆ្នាំប្រពៃណីជាតិខ្មែរ៕ 

ភ្នំពេញ ៖ ទណ្ឌិតចំនួន ១៣៤នាក់នឹងត្រូវបានលើកលែង និងបន្ធូរបន្ថយទោសសម្រាប់ឱកាសបុណ្យចូលឆ្នាំប្រពៃណីជាតិខ្មែរនៅពេលខាងមុខនេះ ។

លោក គឹម សន្តិភាព អ្នកនាំពាក្យក្រសួងយុត្តិធម៌ បានប្រាប់ឲ្យដឹងថា
សម្រាប់ឱកាសនៃពិធីបុណ្យចូលឆ្នាំប្រពៃណីជាតិ២០១៩នេះ គណៈកម្មការជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោសបានស្នើសុំទៅប្រមុខរាជរដ្ឋាភិបាល ដើម្បីពិនិត្យ និងសម្រេចស្នើសុំព្រះមហាក្សត្រផ្តល់ការអនុគ្រោះទោសដល់ទណ្ឌិតសរុប១៣៤នាក់ (ស្ត្រី២៨នាក់) ក្នុងចំណោមបញ្ជីទណ្ឌិតស្នើសុំសរុប៤៦០នាក់ (ស្ត្រី៤៩នាក់) ដើម្បីលើកលែងនិងបន្ធូរបន្ថយទោស។ ក្នុងចំណោមទណ្ឌិតទាំងនោះនឹងត្រូវ ១-ស្នើបន្ថយទោស៦ខែចំនួន៧នាក់ (ស្រី៦នាក់) ២-ស្នើបន្ថយទោស៩ខែ ចំនួន១៩នាក់ (ស្រី២នាក់) ៣-ស្នើបន្ថយទោស១២ខែ ចំនួន៤០នាក់ (ស្រី១៧នាក់) ៤-ស្នើបន្ថយទោសពីមួយជីវិតមកត្រឹម២០ឆ្នាំ ចំនួន២នាក់ (ស្រី២នាក់) ៥-ស្នើលើកលែងទោសចំនួន១៦នាក់ (ស្រី១នាក់)។

កាលពីថ្ងៃទី៤មេសាកន្លងទៅ គណៈកម្មការថ្នាក់ជាតិត្រួតពិនិត្យ និងវាយតម្លៃដល់ទណ្ឌិតក្នុងការលើកលែង និងបន្ធូរបន្ថយទោសថ្ងៃបុណ្យចូលឆ្នាំខ្មែរបានទៅក្រសួងជំនាញ នូវទណ្ឌិតចំនួន៤៦០នាក់ ក្នងនោះមានស្ត្រី៤៩នាក់ មកពីអប់រំកែប្រែខេត្តក្រុងរាជធានីចំនួន ១៨ និងមណ្ឌលអប់រំកែប្រែទាំងបួនបានស្នើសុំបន្ធូរបន្ថយ និងលើកលែងទោសថ្ងៃបុណ្យចូលឆ្នាំខ្មែរ។ ការជួបពិភាក្សាជាមួយប្រធានតុលាការប្រធានព្រះរាជអាជ្ញាររួមមកស្ត្រីដែលកំពុងជាប់ក្នុងពន្ធនាគារសរុប២៤៤១នាក់ ក្នុងនោះស្ត្រីដែលមានគត៍៤៤នាក់ ស្ត្រីមានកូនតាមម្តាយ១២៦នាក់ ។

លោកក៏បានលើកឡើងទៀតថា សម្រាប់ការលើកលែងទោសចំពោះស្ត្រីដែលតាមគោលការណ៍របស់រាជរដ្ឋាភិបាលក្នុងការលើកលែង និងបន្ធូរបន្ថយទោសចំពោះស្ត្រីមិនមែនធ្វើតែសម្រាប់ថ្ងៃចូលឆ្នាំនោះទេ គឺធ្វើជានិរន្ត ។ ទី១.ទាក់ទងនឹងនីតិវិធីតុលាការខាងក្រសួងយុត្តិធម៌ជំរុញឱ្យពន្លឿនលើបណ្ដឹងរបស់ស្ត្រី ទី២.រកឯកសារទាក់ទងនឹងសាលក្រមជាស្ថាពរ ដើម្បីនឹងងាយស្រួលបន្ទូលបន្ថយទោស និងលើកលែងទោស ។

លោកបញ្ជាក់ថា«ការលើកលែងទោសធ្វើជារៀងរាល់ឆ្នាំមានចំនួនបីដងមានថ្ងៃចូលឆ្នាំវិសាខបូជានឹងថ្ងៃបុណ្យអុំទូក ។ តែយើងឃើញហើយថ្នាក់ដឹកនាំពិសេសសម្ដេចតេជោលោកតែងតែផ្ដល់អាទិភាពដល់ស្ត្រីជានិច្ចក្នុងការលើកលែង និងបន្ថូរបន្ថយទោស៕

ភ្នំពេញ ៖ ប្រជាពលរដ្ឋដែលធ្វើដំណើរឆ្លងកាត់ស្ពានមិត្តភាពកម្ពុជាជប៉ុន បានប៉ះទង្គិច និងបានដួលជាបន្តបន្ទាប់។ ក្រសួងសាធារណៈការ និងដឹកជញ្ជូន និងវិស្វករស្ពាន បានដាក់បង្គោលជ័រ និងគូសគំនូសពណ៌ស ដិតជាងមុន ដើម្បីងាយស្រួលដល់អ្នកដំណើរកុំឲ្យជួបគ្រោះថ្នាក់។

ប្រធានគោលដៅចរាចរណ៍ជ្រោយចង្វារ លោកអនុសេនីយ៍ឯក ឆា សំអុល បានឲ្យដឹងថា អ្នកដំណើរជាច្រើននៅតែបន្តដួល ជាបន្តបន្ទាប់ ដោយសារមិនបានប្រុងប្រយ័ត្ន និងមិនបានបែងចែកគំនូសសញ្ញាឲ្យបានច្បាស់លាស់។ លោក បញ្ជាក់ថា នគរបាលបានធ្វើការពន្យល់ណែនាំប្រជាពលរដ្ឋដែលបើកបរឆ្លងកាត់ស្ពាន ឲ្យបានយល់ដឹងពីសញ្ញាចរាចរណ៏ និងគំនូសបែងចែកផ្លូវម៉ូតូ ជាមួយនឹងការដាក់បង្គោលសញ្ញានៅដើមស្ពាន ដើម្បីកុំឲ្យជួបបញ្ហាចរាចរណ៏។

ប្រជាពលរដ្ឋដែលធ្វើដំណើរតាមស្ពានមិត្តភាពកម្ពុជាជប៉ុន សាទរចំពោះការ ដាក់បង្គោលសញ្ញា ដើម្បីបញ្ចៀសការគ្រោះថ្នាក់ជាយថាហេតុនានា។ ប៉ុន្តែយ៉ាងណាប្រជាពលរដ្ឋបានសំណូមពរឲ្យមានការគោរពច្បាប់ចរាចរណ៏ទាំង អស់គ្នា ដើម្បីកាត់បន្ថយគ្រោះថ្នាក់នៅលើស្ពានមួយនេះ។

គួរបញ្ជាក់ថា ស្ពានមិត្តភាពកម្ពុជាជប៉ុន ត្រូវបានសម្ពោធបើកឲ្យដំណើរការ ឡើងវិញកាលបីថ្ងៃទី០៣ មេសាកន្លងទៅ ដោយប្រមុខរាជរដ្ឋាភិបាលកម្ពុជា និងឯកអគ្គរាជទូតជប៉ុនប្រចាំកម្ពុជា ក្រោយដំណើរការជួសជុលរយៈពេលជិត ៣ឆ្នាំ ដោយចំណាយថវិកាប្រមាណ៣០លានដុល្លារ៕ (​រូបភាព ៖ ខ្លីៗ)

ភ្នំពេញ៖ ករណីឃាតកម្មបង្កឲ្យមានភ្ញាក់ផ្អើល នៅវេលាម៉ោងជិត៩យប់ ថ្ងៃទី០៩ ខែមេសា ឆ្នាំ២០១៩នេះ ដោយបុរសជាប្តីបានអារ.កសម្លាប់ប្រពន្ធរបស់ខ្លួន ហេីយបានរត់ទៅចង.កសម្លាប់ខ្លួន តាមក្រោយ ស្ថិតនៅក្នុងផ្ទះល្វែង មួយកន្លែង ក្នុងភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ដោយបន្សល់ទុកកូនស្រីអាយុ៣ឆ្នាំម្នាក់ឲ្យនៅកំព្រា។

លោក ជឹម ស៊ីថា អធិការនគរបាលខណ្ឌដង្កោ បានបញ្ជាក់បន្ថែមថា នារីរងគ្រោះដែលត្រូវប្ដីអារកសម្លាប់ បម្រើការងារនៅធនាគារ ABA ហើយបុរសជាប្ដីបម្រើការងារ ជាបុគ្គលិកក្រុមហ៊ុនឯកជនមួយកន្លែង។

លោកអធិការបានឲ្យដឹងទៀតថា មូលហេតុជំហានដំបូងដោយយោងតាមការសាកសួរទៅកាន់សាច់ញាតិ គឺគ្រួសារលើនេះតែងតែឈ្លោះគ្នាជារឿយៗ ហើយរហូតដល់ប្រពន្ធសុំលែងលះ ទើបកើតមានករណីនេះតែម្ដង។

ក្រោយពេលកើតហេតុសមត្ថកិច្ចខណ្ឌដង្កោបានសហការណ៍ជាមួយកម្លាំងការិយាល័យជំនាញកោសល្យវិច្ច័យស្នងការនគរបាលរាជធានីភ្នំពេញបានចុះទៅធ្វើការពិនិត្យសពទាំង២នាក់ប្តីប្រពន្ធខាងលើសមត្ថកិច្ចបានបញ្ជាក់ថាករណីខាងលើនេះពិតជាករណីឃាតកម្មអារ កសម្លាប់ទៅលើប្រពន្ធរបស់ខ្លួននិងករណីអត្តឃាតចង កសម្លាប់ខ្លួនឯងពិតប្រាកដមែន។

ហើយសពត្រូវបានប្រគល់ទៅឲ្យក្រុមគ្រួសារទាំងសងខាងយកទៅធ្វើបុណ្យតាមប្រពៃណី៕

ក្រសួងយុត្ដិធម៌ បានបញ្ជាក់ថា ដើម្បីចៀសវាងបញ្ហាកាន់តែស្មុគស្មាញបន្ថែមទៀត ក្រសួងសូមលោកប្រធានសាលាដំបូងខេត្ដព្រះសីហនុ ពិនិត្យលទ្ធភាពបង្អង់ការ អនុវត្ដមួយអន្លើសិន រួចរាយការណ៍អំពីចំណាត់ការនៃការអនុវត្ដមកក្រសួង ដើម្បីក្រសួងមានវិធានការបន្ដ។

ការផ្ញើទៅកាន់សាលាដំបូងខេត្តព្រះសីហនុ ពីសំណាក់រដ្ឋមន្រ្តីក្រសួងយុត្តិធម៌ ធ្វើឡើងបន្ទាប់ទទួលបានលិខិតសុំអន្តរាគមន៍ របស់លោកស្រី គង់ មាលា ចុះថ្ងៃទី២៧ ខែមីនា ឆ្នាំ២០១៩ ស្នើឲ្យជួយអន្តរាគមន៍ចំពោះរឿងវិវាទនេះ, លោកស្រី គង់ មាលា បានរៀបរាប់ថា លោកស្រីបានខ្ចីប្រាក់លើកទី១ នៅថ្ងៃទី១៩ ខែមីនា ឆ្នាំ២០១២ ពីធនាគារកាពីតាល់ចំនួន ៩៥០.០០០ដុល្លារ (កៅសិបប្រាំម៉ឺនដុល្លាអាមេរិក) ហើយក្រោយមក ក៏បានរៀបចំខ្ចីបន្ថែមលើកទី២ ចំនួន ៣៨០.០០០ដុល្លារ (សាមសិបប្រាំបីម៉ឺនដុល្លាអាមេរិក)ទៀត។ ផ្ទុយទៅវិញ ចំពោះចំនួនទឹកប្រាក់ ៣៨០.០០០ដុល្លារ លើកទី២នេះ គឺភាគីខាងធនាគារពុំបានទម្លាក់ជូនលោកស្រីទេ ពីព្រោះលោកស្រីមានទំនាស់ជាមួយភាគីធនាគារ ហើយស្រាប់តែក្រោយមកភាគីធនាគារ ក៏បានដាក់ពាក្យប្ដឹង ដោយទាមទារប្រាក់សរុបទាំងលើកទី១ និងទី២ ចំនួន ១.៣៣០.០០០ដុល្លារ (មួយលានសាមសិបបីម៉ឺនដុល្លារអាមេរិក) ទៅសាលាដំបូងរាជធានីភ្នំពេញតែម្ដង តាមសាលក្រមលេខ៧៧៤”ឍ”ភ.ព.រ.វ ចុះថ្ងៃ២៩ ខែមិថុនា ឆ្នាំ២០១៥។ ចំពោះសាលក្រមនេះ លោកស្រីពុំអាចទទួលយកបាននោះទេ ហើយក៏បានប្ដឹងឧទ្ទរណ៍បន្ដទៀតផងដែរ ដោយមានការបោះត្រាចូលលេខ៣៩៤ ចុះថ្ងៃទី១ ខែកញ្ញា ឆ្នាំ២០១៥ ។

ស្ថិតត្រង់ចំនួនទឹកប្រាក់លើកទី២នេះ ដែលពុំបានទទួលនេះ លោកស្រី គង់ មាលា បានបញ្ជាក់ថា លោកស្រីគឺអត់បានទទួលសែកដើម្បីបើកប្រាក់ ឬទទួលជាសាច់ប្រាក់សុទ្ធនោះទេ។ ហេតុនេះបើធនាគារចោទលោកស្រីថា បានទទួលប្រាក់លើកទី២នេះមែននោះ គឺសូមឲ្យភាគីធនាគារបង្ហាញភស្ដុតាង ពីព្រោះរាល់ការដកប្រាក់ពីធនាគារ គឺសុទ្ធតែមានមូលទានប័ត្រ។

លោកស្រី បន្ដថា ម្យ៉ាងទៀតចំពោះសំណុំរឿងអនុវត្ដដោយបង្ខំលេខ២៩ ចុះថ្ងៃទី២ ខែវិច្ជិកា ឆ្នាំ២០១៥នេះទៀតសោត គឺជារឿងអយុត្ដិធម៌បំផុតមកលើលោកស្រី ពីព្រោះសំណុះរឿងនេះគឺលោកស្រី ក៏ប្ដឹងឧទ្ទរណ៍ផងដែរ ហើយសាលាឧទ្ទរណ៍ ក៏ពុំទាន់កាត់ក្ដីនៅទ្បើយទេ។ ស្រាប់តែមានការអនុវត្ដដោយលួចលាក់ ដោយបង្ខំទៅវិញ។

ចំពោះការរឹបអូសអចលនទ្រព្យនេះផងដែរ ក៏លោកស្រី ពុំបានដឹង និងចូលរួមនោះទេ។ បើហេតុនេះ ចំពោះដីកាលេខ៥៤ តរ/១៨ ចុះថ្ងៃទី១៤ ខែមិថុនា ឆ្នាំ២០១៨នេះ គឺជាការមិនត្រឹមត្រូវនិងអយុត្ដិធម៌បំផុតមកលើលោកស្រី ពីព្រោះតម្លៃអចលនទ្រព្យ មានតម្លៃលើសលុបដែលតុលាការសម្រេច។ ម្យ៉ាងទៀត ចំពោះការចុះទៅអនុវត្ដរបស់ព្រះរាជអាជ្ញារងនេះទៀតសោត ក៏ជាការបំពាននឹងសេចក្ដីប្រកាសរបស់ក្រសួងយុត្ដិធម៌ផងដែរ ដែលការចុះអនុវត្ដនេះ គឺប្រៀបបាននឹងការចុះប្លន់ដីរបស់លោកស្រី អីចឹង!។

លោកស្រី គង់ មាលា ក៏បានសំណូមពរទៅក្រសួងយុត្ដិធម៌ ពិសេសសម្ដេចតេជោ ហ៊ុន សែន សូមមេត្ដាជួយរកយុត្ដិធម៌ជូនលោកស្រីផងដែរ។

ខាងក្រោមនេះជាលិខិតរបស់ រដ្ឋមន្រ្តីក្រសួងយុត្តិធម៌ ផ្ញើជូនប្រធានតុលាការខេត្តព្រះសីហនុ៖

ខេត្តកំពង់ឆ្នាំង ៖ ក្មេងស្រីអាយុ ១៦ ឆ្នាំម្នាក់ បានរងរបួសរយះកំភួនជើងឆ្វេង ដោយសារតែជនវ័យចំនាស់ប្រមឹកម្នាក់ បានរត់ដេញកាប់ប្រពន្ធមិនទាន់ ហើយងាកមកកាត់ក្មេងស្រីបណ្ដាលឲ្យរងរបួស។ ហេតុការណ៍នេះ បានកើតឡើងនៅវេលាម៉ោង ៧យប់ថ្ងៃទី ៧ ខែមេសា ឆ្នាំ ២០១៩ នៅភូមិតាកាន់ ឃុំព្រៃគ្រី ស្រុកជលគីរី។

លោក ប៉ែន សំអាត មេបញ្ជាការកងរាជអាវុធហត្ថស្រុកជលគីរីបានឱ្យដឹងថានៅមុនពេលកើតហេតុជនបង្ករ ឈ្មោះសូត្រ សេក អាយុ៥៦ឆ្នាំ បានផឹកស្រាស្រវឹងហើយបានស្រែកឡូឡានិងដេញកាប់ប្រពន្ធ រត់ពេញភូមិ ។ប៉ុន្តែនៅពេលដេញកាប់ប្រពន្ធមិនទាន់ក៏ត្រឡប់បកក្រោយវិញស្រាប់តែឃើញជនរងគ្រោះឈ្មោះ ជ្រឿន គិមបួយ អាយុ ១៦ឆ្នាំ កំពុងអង្គុយលើជណ្តើ បានស្ទុះទៅកាប់ចំកំភួនជើងឆ្វេង បណ្ដាលឲ្យរងរបួសស្ទើរដាច់កំភួនជើងតែម្ដង។

ក្រោយពេលកើតហេតុប្រជាពលរដ្ឋនិងប្រជាការពារក៏បានដេញចាប់ជនដៃដល់ប្រគល់ឲ្យសមត្ថកិច្ចដើម្បីកសាងសំណុំរឿងទៅតាមផ្លូវច្បាប់ ។ចំណែកក្មេងស្រីរងគ្រោះត្រូវបានដឹកទៅសង្គ្រោះនៅមណ្ឌលសុខភាពស្រុកជលគីរី ។

ជុំវិញករណីខាងលើត្រូវបានសមត្ថកិច្ចកងរាជអាវុធហត្ថបានបញ្ជាក់ថា ជនដៃដល់គឺផឹកស្រាស្រវឹងជេរនិងរករឿងប្រពន្ធជារៀងរាល់ថ្ងៃ៕

ខេត្តកំពង់ចាម ៖ លោក គួច ចំរើន អភិបាលនៃគណៈអភិបាលខេត្តកំពង់ចាម នៅព្រឹកថ្ងៃទី៨ ខែមេសា ឆ្នាំ២០១៩ បានដឹកនាំកិច្ចប្រជុំត្រួតពិនិត្យការងារ ស្តីពីការត្រៀមរៀបចំរក្សាសន្តិសុខ សណ្តាប់ធ្នាប់ បង្កលក្ខណៈងាយស្រួល និងផ្តល់ភាពសប្បាយរីករាយ ជូនប្រជាពលរដ្ឋក្នុងឱកាសចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់នៅថ្ងៃទី១៤-១៥-១៦ ខែមេសា ឆ្នាំ២០១៩ ខាងមុខនេះ។

កិច្ចប្រជុំដ៏មានសារសំខាន់នេះ បានធ្វើឡើងនៅសាលប្រជុំសាលាខេត្តកំពង់ចាម ដោយមានការអញ្ជើញ ចូលរួមពីឯកឧត្តម អភិបាលរងខេត្ត លោក លោកស្រី មន្ទីរអង្គភាព ពាក់ព័ន្ធ អភិបាល អភិបាលរងក្រុង-ស្រុកទាំង១០ និងថ្នាក់ដឹកនាំកងកម្លាំងប្រដាប់ផងដែរ។

គួររំលឹកថា ជារៀងរាល់ឆ្នាំ អាជ្ញាធរខេត្តកំពង់ចាម តែងតែរៀបចំកិច្ចប្រជុំដើម្បីលើកផែនការត្រៀមរៀបចំការងារមួយចំនួនសម្រាប់ចូលរួមក្នុងពិធីបុណ្យចូលឆ្នាំប្រពៃណីខ្មែរ មានដូចជា ការតុបតែងលម្អទីក្រុង រៀបចំសណ្តាប់ធ្នាប់សាធារណៈតាមទីប្រជុំជន ការរៀបចំកម្មវិធីកម្សាន្តនានា ការរក្សាសន្តិសុខ សុវត្ថិភាព ដើម្បីប្រជាពលរដ្ឋបាន ជួបជុំបងប្អូនសាច់ញាតិដោយក្តីសប្បាយរីករាយក្នុងឱកាសបុណ្យចូលឆ្នាំថ្មីខាងមុខនេះ៕

ភ្នំពេញ ៖ លោក លឺ ឡាយស្រេង អតីតឧបនាយករដ្ឋមន្រ្តី នៅព្រឹកថ្ងៃទី៧ ខែមេសា នេះ បានវិលត្រឡប់មកទឹកដីកម្ពុជាវិញហើយ តាមជើងហោះហើរពីប្រទែសថៃ មកព្រលានយន្តហោះអន្តរជាតិភ្នំពេញ។

នៅព្រលានយន្តហោះអន្តរជាតិភ្នំពេញ លោក លឺ ឡាយស្រេង បានបង្ហាញទឹកមុខសប្បាយរីករាយ ដែលបានវិលមកស្រុកកំណើតវិញទាំងគ្មានក្តីបារម្ភ ដើម្បីបានចូលរួមពិធីបុណ្យចូលឆ្នាំខ្មែរនាពេលខាងមុខនេះ។

សូមជម្រាបថា ការអញ្ជើញវិលមកមាតុភូមិវិញលោក លឺ ឡាយស្រេង គឺបន្ទាប់ពីសម្តេចតេជោនាយករដ្ឋមន្រ្តី បានប្រកាសកាលពីថ្ងៃទី១ ខែមេសា កន្លងទៅ ដោយបញ្ជាក់ថា អញ្ជើញលោក លឺ ឡាយស្រេង ឱ្យចូលមកក្នុងប្រទេសវិញដោយមិនមានការចាប់ខ្លួន និងមិនចាំបាច់ធ្វើលិខិតលើកលែងទោសនោះទេ ដោយសម្តេចតេជោ លើកឡើងថា លោក លឺ ឡាយស្រេង បានប្រមាថព្រះមហាក្សត្រដោយខ្លួនឯង ហើយបានចាកចេញទៅក្រៅប្រទេសដោយខ្លួនឯង។

គួររំលឹកថា បន្ទាប់ពីលោក លឺ ឡាយស្រេង អតីតឧបនាយករដ្ឋមន្រ្តី វ័យ៨៥ឆ្នាំ និងជាអតីតមន្ត្រីជាន់ខ្ពស់គណបក្សហ្វ៊ុនស៊ិនប៉ិច បានបញ្ចេញវីដេអូមួយនៅលើបណ្តាញសង្គម ហ្វេសប៊ុក កាលពីថ្ងៃទី២៩ ខែមីនា កន្លងទៅ ដោយស្នើសុំសម្តេចតជោ ហ៊ុន សែន អនុញ្ញាតឱ្យលោកបានវិលត្រឡប់មកស្រុកកំណើតវិញ ក្រោយពីលោកចាកចេញពីប្រទេសជិត ២ឆ្នាំ ដោយឯកឯងដើម្បីគេចពីបណ្តឹងពីមេធាវីសម្តេចតេជោ ហ៊ុន សែន និងមេធាវីតំណាងគណបក្សហ៊្វុនស៊ិនប៉ិច ក្នុងករណីប្រមាថព្រះមហាក្សត្រ និងមាក់ងាយគណបក្សហ៊្វុនស៊ិនប៉ិច៕