រាជធានីភ្នំពេញ ៖ កម្លាំងសមត្ថកិច្ចបានធ្វើការឃាត់ខ្លួន បុគ្គលិកវិទ្យុអាស៊ីសេរីម្នាក់ គឺលោក អ៊ួន ឈិន ហើយបានបញ្ជូនភ្លាមៗ ទៅកាន់ស្នងការដ្ឋាននគរបាលរាជធានីភ្នំពេញ ដើម្បីធ្វើការសាកសួរ ។
សមត្ថកិច្ចបានឃាត់ខ្លួនបុគ្គលិកវិទ្យុអាស៊ីសេរី លោក អ៊ួន ឈិន នៅចំណុចបន្ទប់E04 ជាន់ទី៧ នៃសណ្ឋាគារម៉ារឌី នៅស្ពានអាកាសស្ទឹងមានជ័យ ស្ថិតក្នុងសង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ កាលពីវេលាម៉ោង៦ និង៣០នាទី នាថ្ងៃទី១៤ ខែវិច្ឆិកា ឆ្នាំ២០១៧នេះ ក្រោមបទសង្ស័យដំឡើងប្រព័ន្ធផ្សព្វផ្សាយដោយខុសច្បាប់។
មន្ត្រីនគរបាលបញ្ជាក់ថា ការឃាត់ខ្លួនបុគ្គលិកវិទ្យុអាស៊ីសេរី រូបនេះ ធ្វើឡើងដោយកម្លាំងសមត្ថកិច្ចចម្រុះ ក្រោមការសម្របសម្រួលពីព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ៕
តេហេរ៉ង់ ៖ មកទល់នឹងពេលនេះចំនួនមនុស្សស្លាប់បានកើនដល់៥៤០នាក់ហើយ ខណៈមនុស្សជាង ៨,០០០នាក់ទៀតរងរបួសក្នុងករណីគ្រោះរញ្ជួយដីកម្រិត ៧.៣រ៉ិចទ័រ ដ៏កក្រើកមួយបានវាយប្រហារចំតំបន់ព្រំដែនរវាងអ៊ីរ៉ាក់ និងអ៊ីរ៉ង់។ នេះបើតាមការចេញផ្សាយដោយសារព័ត៌មាន BBC ។
យោងតាមប្រព័ន្ធផ្សព្វផ្សាយក្នុងប្រទេសអ៊ីរ៉ង់បានបញ្ជាក់ថា ចំណុចរំញ័រនៃហេតុការណ៍រញ្ជួយផែនដីខាងលើ បានកើតឡើងកាលពីថ្ងៃអាទិត្យ នៅចម្ងាយប្រមាណ១០៣គីឡូម៉ែត្រ ភាគអាគ្នេយ៍ ទីក្រុង Sulaymaniyah នៃប្រទេសអ៊ីរ៉ាក់ និងជះឥទ្ធិពលយ៉ាងកក្រើកដល់ខេត្តចំនួន១៤ ឯណោះរបស់អ៊ីរ៉ង់ ដែលនៅជាប់ព្រំដែនជាមួយអ៊ីរ៉ាក់។
បើតាមអាជ្ញាធរអ៊ីរ៉ង់បានបញ្ជាក់ឲ្យដឹងថា សម្រាប់មនុស្សស្លាប់ និងរបួសទាំងជាង ៨,០០០នាក់ខាងលើនេះ ភាគច្រើនបំផុត ស្ថិតនៅក្នុងប្រទេសអ៊ីរ៉ង់តែម្តង។ ដោយឡែកក្រៅពីមនុស្សបាត់បង់ជីវិត អគារនិងផ្ទះច្រើនជាង ១២,០០០ខ្នង ក៏បានទទួលរងការបំផ្លិចបំផ្លាញក៏ដូចជាដួលរលំផងដែរ រីឯប្រជាជន ៧០,០០០នាក់ កំពុងត្រូវការជំនួយ និងតង់ស្នាក់នៅបណ្ដោះអាសន្នជាបន្ទាន់។
សូមបញ្ជាក់ថា គ្រោះរញ្ជួយដីខាងលើគឺបានសម្លាប់មនុស្សច្រើនជាងគេបំផុតក្នុងឆ្នាំ២០១៧នេះ បន្ទាប់ពីគ្រោះរញ្ជួយដីនៅម៉ិចស៊ីកូ ផ្ដាច់យកអាយុជីវិតមនុស្ស៣៦៩នាក់ កាលពីខែកញ្ញា៕
ខេត្តសៀមរាប ៖ តាមសេចក្តីរាយការណ៍បានឲ្យដឹងថា នៅព្រឹកថ្ងៃទី១៥ ខែវិច្ឆិកា ឆ្នាំ២០១៧នេះមានករណីគ្រោះថ្នាក់ចរាចរណ៍ ដោយរថយន្តក្រុងដឹកអ្នកដំណើរ មានទាំងភ្ញៀវជាតិ និងបរទេស បុកជាមួយរថយន្តដឹកដី នៅលើផ្លូវជាតិលេខ៦ ក្នុងស្រុកប្រាសាទបាគង ខេត្តសៀមរាប បណ្តាលឲ្យស្លាប់២នាក់ និងមានអ្នករងរបួសមួយចំនួនទៀត។ នេះបើតាមព័ត៌មានបឋមពីសមត្ថកិច្ច។
ប្រភពដដែលបន្តថា បន្ទាប់ពីបុកហើយគេរថយន្តក្រុង ត្រូវបានធ្លាក់ចូលទឹកប្រឡាយ ចំណែករថយន្តដឹកដីខូចខាតយ៉ាងដំណំ៕
ខេត្តបន្ទាយមានជ័យ ៖ ពលករខ្មែរម្នាក់បានស្លាប់នៅមន្ទីរពេទ្យក្នុងខេត្តឆាក់ឆឺនសៅ ប្រទេសថៃ ក្រោយឧប្បត្តិហេតុគ្រោះថ្នាក់ចរាចរ រថយន្តថៃកៀរម៉ូតូ ហើយត្រូវបានគេបញ្ជូនសពប្រគល់ឲ្យសាច់ញាតិតាមច្រកទ្វារអន្តរជាតិប៉ោយប៉ែត កាលពីម៉ោងជាង០៥ល្ងាច ថ្ងៃទី១៣ ខែវិច្ឆិកា ឆ្នាំ២០១៧។
ជនរងគ្រោះឈ្មោះ ស ចន្ថា អាយុ៣៤ឆ្នាំ ភេទស្រី ជាកម្មកររោងចក្រ នៅក្នុងខេត្តកើតហេតុខាងលើ និងមានទីលំនៅភូមិស្ទឹងចាស់ ឃុំគយម៉ែង ស្រុកមង្គលបូរី ខេត្តបន្ទាយមានជ័យ។
តាមសាច់ញាតិប្រាប់ថា ជនរងគ្រោះជួបឧប្បត្តិហេតុជិះម៉ូតូត្រូវរថយន្តថៃកៀរដួលរបួសធ្ងន់ ហើយបញ្ជូនទៅព្យាបាលនៅមន្ទីរពេទ្យក្នុងខេត្តកើតហេតុ តាំងពីព្រឹកថ្ងៃទី០៦ ឆ្នាំវិច្ឆិកា ឆ្នាំ២០១៧ ទើបស្លាប់នៅម៉ោងជាង០៤ទៀបភ្លឺព្រឹក ថ្ងៃទី១៣ ខែឆ្នាំដដែល ។ តាមសាច់បញ្ជាក់ថា ជនរងគ្រោះជាមនុស្សកំព្រាទៅរស់នៅប្រទេសថៃតាំងពីក្មេង ។ សពត្រូវបានសាច់ញាតិដឹកតាមរថយន្តផ្ទាល់ខ្លួនទៅលំនៅដ្ឋាន ដើម្បីធ្វើបុណ្យតាមប្រពៃណី ៕
អូស្ត្រាលី ៖ ក្រុមអ្នកគាំទ្រឲ្យមានមង្គលការសម្រាប់មនុស្សស្រឡាញ់ភេទដូចគ្នាបានប្រមូលផ្ដុំគ្នាក្នុងទឹកចិត្តរីករាយនៅទីក្រុងស៊ីដនី ប្រទេសអូស្ត្រាលីបន្ទាប់ពីប្រជាជនអូស្ត្រាលីបានបោះឆ្នោតគាំទ្រឲ្យដាក់អាពាហ៍ពិពាហ៍ស្រលាញ់ភេទដូចគ្នាស្របច្បាប់នៅក្នុងការបោះឆ្នោតស្ទង់មតិតាមប្រៃសណីយ៍។
ការិយាល័យស្ថិតិប្រទេសអូស្ត្រាលីបាននិយាយថា ការបោះឆ្នោតស្ទង់មតិរយៈពេល២ខែដ៏ចំឡែកនេះបានបង្ហាញថា ចំនួន៦២ភាគក្នុងចំណោមយុវជនដែលបានចុះឈ្មោះបោះឆ្នោតនេះបានបោះឆ្នោតគាំទ្រឲ្យមានអាពាហ៍ពិពាហ៍ស្រឡាញ់ភេទដូចគ្នា។
ជាមួយគ្នានោះរដ្ឋាភិបាលប្រទេសអូស្ត្រាលីបានសន្យាថា នឹងជំរុញឲ្យរដ្ឋសភាជាតិពិចារណាលើសេចក្ដីស្នើច្បាប់នេះដើម្បីបង្កើតសមភាពអាពាហ៍ពិពាហ៍នៅប្រទេសនេះនៅក្នុងសម័យប្រជុំរយៈពេល២សប្ដាហ៍ចុងក្រោយរបស់សភាជាតិដែលគ្រោងនឹងបិទបញ្ចប់នៅថ្ងៃទី៧ខែធ្នូខាងមុខនេះ។
បើទោះជាច្បាប់សម្រាប់អាពាហ៍ពិពាហ៍ស្រឡាញ់ភេទដូចគ្នាហាក់ដូចជាមានពន្លឺនៅប្រទេសអូស្ត្រាលីនៅត្រឹមរង្វង់ពិធីបុណ្យណូអែលក៏ពិតមែន ប៉ុន្តែក៏នៅមានសមាជិកសភាមួយចំនួនបានប្ដេជ្ញាចិត្តថានឹងបោះឆ្នោតជំទាស់នឹងសេចក្ដីស្នើច្បាប់នេះដោយមិនខ្វល់ពីលទ្ធផលបោះឆ្នោតស្ទង់មតិនេះឡើយ៕
អាមេរិក ៖ មនុស្សយ៉ាងតិច៥នាក់បានស្លាប់រួមទាំងខ្មាន់កាំភ្លើងសង្ស័យម្នាក់ដែរក្រោយពីមានការបាញ់ប្រហារជាបន្តបន្ទាប់នៅទីតាំងមួយចំនួននៅតំបន់ជនបទមួយនៅរដ្ឋកាលីហ្វ័រញ៉ាសហរដ្ឋអាមេរិក។
លោក ភីល ចនស្តន់ មន្ត្រីប៉ូលិសមូលដ្ឋានបាននិយាយថា ទីតាំងមួយក្នុងចំណោមទីតាំងទាំងនោះគឺមានសាលាបឋមសិក្សាមួយផងដែរ ហើយមានកូនសិស្សយ៉ាងហោចណាស់ចំនួន២នាក់បានរងនូវការបាញ់ប្រហារនេះ។
លោក ចនស្តន់ បាននិយាយថា ជនសង្ស័យដែលត្រូវបានសម្លាប់នោះ “បានជ្រើសរើសគោលដៅដោយចៃដន្យ” ហើយត្រូវបានគេរាយការណ៍ថា នៅមុនពេលធ្វើការបាញ់ប្រហារនេះគឺជនសង្ស័យបានមានជម្លោះហិង្សាក្នុងគ្រួសាររួចទៅហើយ។
មន្ត្រីប៉ូលិសបានបញ្ជាក់ថា ការបាញ់ប្រហារនេះក៏បានធ្វើឲ្យកូនក្មេងនិងក្មេងជំទង់យ៉ាងហោចណាស់១០នាក់រងរបួសផងដែរ៕
ភ្នំពេញ ៖ ក្រុមមេធាវីតំណាងក្រសួងមហាផ្ទៃ បានដាក់ភស្តុតាង និងឯកសារសំខាន់ៗ៣បន្ថែមទៀតទៅកាន់តុលាការកំពូល ពាក់ព័ន្ធសំណុំរឿងប្តឹងសុំរំលាយគណបក្សសង្គ្រោះជាតិ។ នេះបើតាមលោកមេធាវី គី តិច អះអាងថាភស្តុតាងដែល ក្រុមមេធាវីបានដាក់គឺច្បាស់លាស់ ហើយសង្ឃឹមថាឈ្នះក្តី១០០ភាគរយ។
ឯកសារសំខាន់ៗចំនួន៣ដែលក្រុមមេធាវីតំណាងក្រសួងមហាផ្ទៃលោក គី តិច បានដាក់ទៅតុលាការកំពូលនៅរសៀលថ្ងៃចន្ទ័ទី១៣ ខែវិច្ឆិកានេះរួមមានទី១សេចក្តីថ្លែងការណ៍របស់មេធាវីដែលមានកម្រាស់៦២ទំព័រ ទី២. ឯកសារបញ្ជីរ ឈ្មោះថ្នាក់ដឹកនាំរបស់គណបក្សសង្គ្រោះជាតិចំនួន១១៧រូបដែលខ្លឹមសារធ្វើការ ស្នើសុំផ្អាកសកម្មភាពនយោបាយចំនួន៥ឆ្នាំស្របតាមច្បាប់ស្តីពីបក្សនយោបាយ ត្រង់មាត្រាទី៤៥ថ្មី។ និងទី៣មេធាវីបានដាក់បន្ថែមភស្តុតាង៤កញ្ចប់ទៀត សរុប ចំនួន២៦កញ្ចប់។ លោក គី តិច បញ្ជាក់ថា ភស្តុតាងទាំងនោះមានជាវីដេអូរូប ភាព ជាសំលេង និងជាលាយលក្ខ័អក្សរដែលក្រុមមេធាវីទទួលបានពីក្រសួង មហាផ្ទៃជាដើមបណ្តឹង។ ភស្តុតាងទាំងនោះមានភាពរឹងមាំ ច្បាស់លាស់ ដូច្នោះ ក្រុមមេធាវីអាចវាយតម្លៃថា ខ្លួននឹងឈ្នះក្តី១០០ភាគរយ ពោលមានន័យថា គណបក្សសង្គ្រោះជាតិនឹងត្រូវរំលាយស្របទៅតាមច្បាប់ស្តីពីគណបក្សនយោ បាយ។
តុលាការកំពូល កាលពីថ្ងៃទី០៩ តុលា បានបង្គាប់ឲ្យប្រធានគណបក្សសង្គ្រោះជាតិលោក កឹម សុខា ដែលកំពុងជាប់ពន្ធនាគារពីបទ “ក្បត់ជាតិ” ដាក់ឯកសារត្រៀមឆ្លើយតបទៅនឹងពាក្យបណ្តឹងសុំរំលាយគណបក្សសង្គ្រោះជាតិ ចុះថ្ងៃទី ០៦ តុលា ឆ្នាំ២០១៧ របស់ក្រសួងមហាផ្ទៃ ក្នុងរយៈពេល២០ថ្ងៃ។ ហើយនៅថ្ងៃអាទិត្យ ទី២៩តុលាចុងសប្តាហ៍នេះ គឺជាថ្ងៃចុងក្រោយនៃឱសានវាទនេះ។ លោក ម៉ៅ មុនីវណ្ណ បានបញ្ជាក់ជំហរថា គណបក្សសង្គ្រោះជាតិមិនបានឲ្យតម្លៃទៅលើបណ្តឹងរបស់ក្រសួងមហាផ្ទៃនោះទេ ហើយមិនត្រឹមតែប៉ុណ្ណោះ គណបក្ស ក៏មិនបានពឹងពាក់មេធាវីដើម្បីការពារក្តីនោះដែរ ដោយទុកឲ្យសំណុំរឿងនេះទៅតាមដំណើរការរបស់វាទៅចុះ។
លោក គី តិច បានចាត់ទុកថាការមិនដាក់មេធាវី និងឯកសារតតាំងគ្នាមកតុលាការកំពូលនាពេលថាគណបក្សសង្គ្រោះជាតិមិនបានធ្វើអ្វីឲ្យត្រូវនឹងច្បាប់ទាល់ តែសោះ។ លោកចង់ឲ្យមានវត្តមានមេធាវី របស់គណបក្សសង្គ្រោះជាតិមកត ទល់គ្នានៅតុលាការ។
គួរបញ្ជាក់ថា ក្រុមមេធាវីតំណាងក្រសួងមហាផ្ទៃដឹកនាំដោយលោក គី តិចបាន ដាក់ពាក្យបណ្តឹងទៅតុលាការកំពូលកាលពីថ្ងៃ ទី០៦ តុលាកន្លងទៅដោយនៅក្នុងពាក្យបណ្តឹងរបស់ក្រសួងមហាផ្ទៃដែលបានដាក់នៅតុលាការកំពូល គឺមានកម្មវត្ថុប្តឹងរំលាយគណបក្សសង្គ្រោះជាតិ ស្របតាមច្បាប់ស្តីពីគណបក្សនយោបាយ នៃព្រះរាជាណាចក្រកម្ពុជា និងស្នើឲ្យតុលាការផ្អាកសិទ្ធិនយោបាយរបស់ថ្នាក់ ដឹកនាំគណបក្សសង្គ្រោះជាតិចំនួន៥ឆ្នាំ ចំនួន១១៧នាក់ផងដែរ។ តុលាការកំ ពូលនឹងបើកសវនាការលើបណ្តឹងមួយនេះនៅថ្ងៃទី១៦ ខែវិច្ឆិកាខាងមុខនេះ៕
ភ្នំពេញ ៖ នាយករដ្ឋមន្ត្រីនៃសាធារណរដ្ឋប្រជាមានិតចិន បានសន្យាថា រដ្ឋាភិបាលចិន នឹងជួយឱ្យអស់លទ្ធភាព ដើម្បីបោសសម្អាតមីន និងយុទ្ធភ័ណ្ឌមិនទាន់ផ្ទុះនៅកម្ពុជា ឱ្យបានឆាប់រហ័ស ។
នៅក្នុងជំនួបទ្វេភាគី រវាងសម្តេចនាយករដ្ឋមន្ត្រីកម្ពុជា ជាមួយ លោក លី កឺជាំង នាយករដ្ឋមន្ត្រីនៃសាធារណរដ្ឋប្រជាមានិតចិន កាលពីល្ងាចថ្ងៃទី១៣ ខែវិច្ឆិកា នៅក្នុងទីក្រុងម៉ានីល សាធារណរដ្ឋហ្វីលីពីន ភាគីទាំងពីរ បានជំរុញកិច្ចការ ដោះមីន និងយុទ្ធភ័ណ្ឌមិនទាន់ផ្ទុះនៅកម្ពុជា ដែលបានបន្សល់ទុកពីសង្គ្រាមរាំរ៉ៃនៅកម្ពុជារាប់ទស្សវត្សកន្លងមកហើយ។ លោក លី កឺជាំង បានបញ្ជាក់ថា ការដោះមីន និងយុទ្ធភ័ណ្ឌមិនទាន់ផ្ទុះជាសកម្មភាពអទិភាពមួយរបស់រដ្ឋាភិបាលចិន ក្នុងការជួយប្រទេសនានា ដែលកំពុងជួបប្រទះនូវបញ្ហានេះ។ ក្នុងបរិការនេះ រដ្ឋាភិបាលចិនសន្យាថា នឹងជួយឱ្យអស់លទ្ធភាព ដើម្បីបោសសម្អាតមីន និងយុទ្ធភ័ណ្ឌមិនទាន់ផ្ទុះឱ្យបានឆាប់រហ័ស និងស្នើឱ្យស្ថាប័នពាក់ព័ន្ធនៃប្រទេសទាំងពីរធ្វើការពិភាក្សាលើទិដ្ឋភាពជាក់ស្តែង និងដាក់ជូនថ្នាក់ដឹកនាំទាំងពីរពិនិត្យ និងសម្រេច។ ជារួមគឺត្រូវធ្វើអោយបានមុនពេលដំណើរទស្សនកិច្ចផ្លូវការរបស់លោកនាយករដ្ឋមន្ត្រីចិននៅកម្ពុជានាពេលខាងមុខនេះ។ ទន្ទឹមនេះ លោក លី កឺជាំង បានបញ្ជាក់សាជាថ្មីថា នឹងការគាំទ្រ ដល់កម្ពុជា ក្នុងការថែរក្សាសុខសន្តិភាព, ស្ថិរភាព និងការអភិវឌ្ឍរបស់កម្ពុជា។ លោកនាយករដ្ឋមន្ត្រីចិន បានបញ្ជាក់បន្ថែមផងដែរ នូវការប្តេជ្ញារួមគ្នា ក្នុងការជំរុញទំនាក់ទំនងរវាងប្រទេសទាំងពីរឱ្យដល់កម្រិតខ្ពស់មួយថែមទៀត។ ក្នុងន័យនេះ ភាគីចិនបានសន្យាថានឹងខិតខំប្រឹងប្រែងឱ្យអស់ពីសមត្ថភាព ក្នុងការជួយជំរុញឱ្យការកសាងគម្រោងផ្លូវល្បឿនលឿនភ្នំពេញ-ក្រុងព្រះសីហនុ ដែលជាផ្លូវសេដ្ឋកិច្ចដ៏សំខាន់មួយរបស់កម្ពុជា អោយបានសម្រចទៅយ៉ាងឆាប់រហ័ស ដើម្បីចូលរួមវិភាគទានជំរុញកំណើនសេដ្ឋកិច្ច និងលើកតម្កើងជីវភាពរស់នៅរបស់ប្រជាជនកម្ពុជា។ នៅក្នុងជំនួបពិភាក្សាការងារនេះដែរ នាយករដ្ឋមន្ត្រីកម្ពុជា ក៏បានអញ្ជើញលោកនាយករដ្ឋមន្ត្រី លី កឺជាំង ចូលរួមក្នុងកិច្ចប្រជុំកំពូលមេគង្គ-ឡានឆាងលើកទី ២ នៅ ដែលនឹងរៀបចំធ្វើនៅរាជធានីភ្នំពេញ នាខែ មករា ឆ្នាំ ២០១៨ ខាងមុខនេះផងដែរ៕
ភ្នំពេញ ៖ រោងចក្រកាត់ដេរសម្លៀកបំពាក់ម៉ាកាឡូត ហ្គាមិន ខូអិលធីឌី ស្ថិតក្នុងសួនឧស្សាហកម្មវឌ្ឍនអគារអូ ស្ថិតនៅតាមផ្លូវវេងស្រេង ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ ត្រូវបានភ្លើងឆេះអស់ទាំងស្រុង នៅព្រឹកព្រលឹងថ្ងៃទី១៤ វិច្ឆិកា នេះ តែមិនទាន់បញ្ជាក់ពីមូលហេតុពិត រហូតដល់អគ្គីភ័យនៅឡើយទេ។
អគ្គីភ័យបានលេបត្របាក់អគាររោងចក្រកាត់ដេរសំលៀកបំពាក់ ម៉ាកាឡូត ហ្គាមិន ខូអិលធីឌីទាំងស្រុង និងបានបំផ្លាញសម្ភារៈរោងចក្រជាច្រើនក្នុងរោងចក្រតាំងពីម៉ោង ៤ និង៣០នាទីព្រឹករហូតដល់ម៉ោង ៨ និង ៣០នាទីព្រឹកថ្ងៃទី ១៤ វិច្ឆិការនេះ ពោលភ្នាក់ងារពន្លត់អគ្គីភ័យបានប្រើពេលរហូតដល់ជាង ៤ម៉ោង ដើម្បីពន្លត់អគ្គីភ័នេះ។ រោងចក្រដែលឆាបឆេះ មានទំហំប្រមាណ៤៨ម៉ែត្រគុណ១២០ម៉ែត្រ មានចំនួន២ អគារជាប់គ្នាមានកម្មករបម្រើការងារជាង១០០០នាក់ធ្វើការ ។ ទោះយ៉ាងណា មូលហេតុពិតប្រាកដនៅមិនទាន់ដឹងនៅឡើយទេ ខណៈពេលនេះក្រុមជំនាញ កំពុងធ្វើការពិនិត្យរកមូលហេតុ។
បើតាមសន្តិសុខយាមនៅកន្លែងកើតហេតុបានឲ្យដឹងថា មុនពេលកើតហេតុពួកគាត់កំពុងតែយាមល្បាត សុខៗស្រាប់តែបានលឺសំលេងផ្ទុះចេញពីបរិវេណខាងក្រោយរោងចក្រ ដោយសារតែលឺសំលេងផ្ទុះខ្លាំង ហើយពួកគាត់ជាសន្តិសុខបានរត់ទៅមើលឃើញមានអណ្តាតភ្លើងឆេះចេញយ៉ាងសន្ធោសន្ធៅទៅហើយ ហើយពួកគាត់បានរត់ទៅយកបំពង់ពន្លត់អគ្គិភ័យមកបាញ់ពន្លត់អស់ជាច្រើន តែភ្លើងមិនរលត់កាន់តែឆេះខ្លាំងទៅៗ ។ ពួកគាត់បានផ្តល់ដំណឹងនេះទៅប្រាប់សមត្ថកិច្ចមូលដ្ឋាន និងរថយន្តពន្លត់អគ្គិភ័យបានមកជួយអន្តរាគមន៍បាញ់ពន្លត់អស់ជាច្រើនគ្រឿង។
ប៉ុន្តែបើតាមលោក យឹម សារ៉ាន់ អធិការដ្ឋានបានដឹងថា នៅពេលល្ងាចមុនថ្ងៃកើតហេតុ មានជាងដែកមកផ្សាជួសជុលដំបូល ហើយនៅវេលាម៉ោង៤ទៀបភ្លឺស្រាប់តែផ្កាភ្លើងដែលជាងដែកផ្សាបានធ្លាក់កម្ទេចធ្លាក់មក លើកម្ទេចក្រណាត់ធ្វើឲ្យឆាបឆេះម្តងរួចមកហើយ តែបានពន្លត់រលត់ទៅវិញ ។ រោងចក្របានបិទ ទ្វារស្រាប់តែវេលាទាបភ្លឺនេះក៍កើតអគ្គិភ័យតែម្តង។
ក្រោយប្រតិបត្តិរយៈពេលបួនម៉ោង គឺចាប់ពីម៉ោង ៤ និង៣០នាទីរហូតដល់ម៉ោង ៨និង៣០នាទីទើបភ្នាក់ងារពន្លត់អគ្គិភ័យគ្រប់គ្រងស្ថានការណ៍បានទាំងស្រុង ប៉ុន្តែសមត្ថកិច្ចនៅតែបន្តបាញ់ទឹកពន្លត់រហូតដល់ម៉ោង ១០ព្រឹក។ នគរបាល បានប្រើប្រាស់រថយន្តពន្លត់អគ្គីភ័យចំនួន៣២គ្រឿង និងបានបាញ់ទឹកពន្លត់អស់ ១៣៤គ្រឿង ក្នុងនោះរថយន្តរបស់នគរបាលក្រុង ២០គ្រឿង រថយន្តរបស់ ង ៧០ ចំនួន៥គ្រឿង រថយន្តរបស់ក្រុងរណបចំនួន៤គ្រឿង រថយន្តរបស់ស្របៀរកម្ពុជា ចំនួន១គ្រឿង និងរថយន្តរបស់កាណឌីយ៉ាចំនួន២គ្រឿង។គេនៅមិនទាន់ដឹងពីទំហំនៃការខូចខាតនៃអគ្គីភ័យនៅឡើយទេ៕
បាត់ដំបង ៖ កម្លាំងអន្តរាគមន៍ប្រឆាំងបទល្មើសនៃស្នងការដ្ឋាននគរបាលខេត្តបាត់ដំបងបានចុះប្រតិបត្តិការបង្ក្រាបទីតាំងល្បែងស៊ីសងអាប៉ោងខុសច្បាប់ចំនួន១កន្លែងដកហូតមេអាប៉ោង២គ្រាប់ឃាត់ខ្លួនមនុស្ស៧នាក់។
លោកវរសេនីយ៍ទោ សុខ និមល នាយការិយាល័យប្រឆាំងបទល្មើសនៃស្នងការដ្ឋាននគរបាលខេត្តបាត់ដំបងបានប្រាប់អោយដឹងថា៖ដោយមានការចង្អុលបង្ហាញពីលោកឧត្តមសេនីយ៍ទោ អ៊ុច សុខុន ស្នងការនគរបាលខេត្តក៏ដូចជាលោកវរសេនីយ៍ឯក កុយ ហៀង ស្នងការរង ទទួលផែននគរបាលប្រឆាំងបទល្មើសបានដាក់បទបញ្ជារយ៉ាងម៉ឺងម៉ាត់ក្នុងការទប់ស្កាត់បង្ក្រាបអោយបានរាល់បទល្មើសនិងល្បែងស៊ីសងខុសច្បាប់គ្រប់ប្រភេទ
ជាលទ្ធផលជាក់ស្ដែងនៅវេលាម៉ោង១១-០០នាទីថ្ងៃទី១៤ខែវិច្ឆិកា ឆ្នាំ២០១៧នេះ លោកបានដឹកនាំកម្លាំងចុះទៅលើទីតាំងនៅត្រង់ចំណុចភូមិអន្លង់វិល ឃុំអន្លង់វិល ស្រុកសង្កែដោយបានប្រតិបត្តិការបង្ក្រាបនូវល្បែងស៊ីសងអាប៉ោង ចំនួន១កន្លែង។
លោកបន្តថា៖នៅក្នុងកិច្ចប្រតិបត្តិការជាក់ស្ដែងសមត្ថកិច្ចជំនាញបានឃាត់ខ្លួនក្រុមអ្នកលេងល្បែងស៊ីសងចំនួន៧នាក់រួមនិងវត្ថុតាងរួមមាន៖ គ្រាប់អាប៉ោងចំនួន២គ្រាប់ -ចានអាប៉ោងចំនួន១ឈុត-កំរាលចាក់អាប៉ោងចំនួន១ផ្ទាំង-ប្រាក់មួយចំនួនរួមនិងសម្ភារៈប្រើប្រាស់សំរាប់លេងមួយចំនួនទៀត។
បច្ចុប្បន្នក្រុមអ្នកលេងទាំង៧នាក់រួមនិងវត្ថុតាងដកហូតបានត្រូវសមត្ថកិច្ចបញ្ជូនយកទៅការិយាល័យជំនាញនៃស្នងការដ្ឋាននគរបាលខេត្តបាត់ដំបងដើម្បីចាត់ការតាមនីតិវិធី៕
ខេត្តកំពង់ធំ ៖ កាលពីម្សិលមិញសមត្ថកិច្ចនគរបាលខេត្តកំពង់ធំ បានបង្ក្រាបរថយន្តដឹកឈើប្រណីត១គ្រឿង នៅចំណុចភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ហើយរកឃើញឈើប្រភេទធ្នង់ប្រមាណ៦២ដុំ ។
រថយន្តដឹកឈើខុសច្បាប់ជាប្រភេទរថយន្តសាំងយ៉ុង ពណ៌ស ស្លាកលេខ សៀមរាប2A-4506 ។ ចំណែកអ្នកបើកបរបានរត់គេចខ្លួនភ្លាមៗ បន្ទាប់ពីសមត្ថកិច្ចចុះទៅដល់ចំណុចខាងលើ ៕
រាជធានីភ្នំពេញ ៖ ថ្លែងនៅក្នុងសន្និសិទកាសែតព្រឹកថ្ងៃទី១៤ ខែវិច្ឆិកា ឆ្នាំ២០១៧នេះ អ្នកនាំពាក្យគណបក្ស ហ្ទ៊ុនស៊ិនប៉ិច បានអះអាងថា គណបក្សបានដាក់ពាក្យបណ្ដឹងទី២ ប្ដឹងលោក លឺ ឡាយស្រេង ពីបទចោទប្រកាន់ សម្ដេចក្រុមព្រះនរោត្តម រណឫទ្ធិ ថាបានទទួលសំណូក ចំនួន១០ម៉ឺនដុល្លារ ក្នុងការផ្ដល់តំណែងជាអភិបាលខេត្ត ដល់មន្ត្រីម្នាក់ គណបក្សហ្វ៊ុនស៊ិនប៉ិច នាអំឡុងឆ្នាំ១៩៩៣កន្លងទៅ ។
លោក ញ៉េប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច បានចាត់ទុកសម្តីលោក លឺ ឡាយស្រេង ដែលបានផ្តល់បទសម្ភាសន៍ក្នុងវិទ្យុអាស៊ីសេរីនាពេលថ្មីៗនេះ ដោយចោទសម្តេចក្រុមព្រះថា បានទទួលសំណូកជាថ្នូរនឹងការប្រគល់តំណែងនោះ គឺជាការប្រមាថ និងបរិយាកេរ្តិ៍ធ្វើឲ្យប៉ះពាល់ដល់ព្រះកិត្តិយសរបស់ព្រះប្រធានគណបក្សហ្វ៊ុនស៊ិនប៉ិច ។
គួរម្លឹកថា មេធាវីការពារក្តីសម្តេចក្រុមព្រះ នរោត្តម រណឫទ្ធិ ព្រះប្រធាន គណបក្សហ្វ៊ុនស៊ិនប៉ិច ធ្លាប់បានដាក់ពាក្យបណ្តឹងម្តងរួចហើយ ទៅកាន់សាលាដំបូងរាជធានីភ្នំពេញ ដើម្បីប្ដឹងលោក លឺឡាយស្រេង ពីបទប្រមាថព្រះចេស្តា ព្រះមហាក្សត្រ និងសម្តេចក្រុមព្រះ៕
រាជធានីភ្នំពេញ ៖ កាលពីម្សិលមិញកម្លាំងនគរបាលប្រឆាំងបទល្មើសសេដ្ឋកិច្ច នៃក្រសួងមហាផ្ទៃ សហការជាមួយកម្លាំងសមត្ថកិច្ចមូលដ្ឋានបានចុះបង្ក្រាបហាងស្តុក និងចែកចាយសាប៊ូក្លែងបន្លំពាណិជ្ជសញ្ញា (ម៉ាក) និងគ្មានច្បាប់អនុញ្ញា (រំលោភច្បាប់កម្មសិទ្ធិបញ្ញា) ជាង១១តោន នៅផ្ទះលេខ ០៩Eo ផ្លូវលំ ភូមិទ្រា សង្កាត់ស្ទឹងមានជ័យ១ ខណ្ឌមានជ័យ។
តាមសមត្ថកិច្ចបានឲ្យដឹងថា ម្ចាស់ហាងល្មើសច្បាប់ខាងលើនេះ មានឈ្មោះ តៅ ប្រសិទ្ធ អាយុ៣៨ឆ្នាំ ប៉ុន្តែក្នុងពេលចុះឆែកឆេរនោះ ម្ចាស់ហាងមិននៅនោះទេ នៅតែអ្នកមើលការខុសត្រូវម្នាក់ឈ្មោះ ញឹម ស៊ីណា។ សមត្ថកិច្ចបន្តថា ក្រោយការឆែកឆេរជាក់ស្តែងរួចមក កម្លាំងសមត្ថកិច្ចចម្រុះបានរកឃើញវត្ថុតាងជាច្រើន រួមមាន៖ សាប៊ូក្លែងបន្លំម៉ាក Viera និងម៉ាក Lavita ចំនួន១៣កេះ តាមពាក្យបណ្តឹងរបស់ក្រុមហ៊ុន ពេជ្រ ប៊ី ធី ហើយថែមទាំងរកឃើញសាប៊ូជាង ១០មុខទៀត ដែលសង្ស័យថា គ្មានច្បាប់អនុញ្ញាតជិត ៨០០កេះទៀត ស្មើនឹងជាង ១០តោន សរុបផលិតផលខុសច្បាប់ទាំងអស់មានជាង ១១តោន។
ចំពោះវត្ថុតាងទាំងអស់ លោកព្រះរាជអាជ្ញារងបានសម្រេចឲ្យកម្លាំងសមត្ថកិច្ចដកហូតសាប៊ូក្លែងបន្លំម៉ាក Viera និង Lavita ចំនួន១៣កេះ យកទៅរក្សាទុកជាបណ្តោះអាសន្ន នៅនាយកដ្ឋាននគរបាលប្រឆាំងបទល្មើសសេដ្ឋកិច្ច និងក្រៅពីនោះ កម្លាំងសមត្ថកិច្ចបានវិចខ្ចប់ទុកដាក់ក្នុងហាងខាងលើ រង់ចាំម្ចាស់ចូលខ្លួនដោះស្រាយ៕
រាជធានីភ្នំពេញ ៖ សេចក្តីរាយការណ៍បានឲ្យដឹងថា ខណៈនេះមានគ្រោះអគ្គិភ័យបាននិងកំពុងឆាបឆេះរោងចក្រកាត់ដេរសម្លៀកបំពាក់ដ៏ធំមួយកន្លែង ឈ្មោះ ម៉ាកាឡូត ហ្គាមេន ដែលមានទីតាំងស្ថិតក្នុង សួនឧស្សាហកម្មវឌ្ឍនៈ ភូមិត្រពាំថ្លឹង សង្កាត់ចោមចៅ ខណ្ឌពោធិ៍សែនជ័យ។
បើតាមសេចក្តីរាយការណ៍ករណីឆេះរោងចក្រនេះ កើតឡើងតាំងពីម៉ោងប្រមាណ៤ជាងទៀបភ្លឺ យប់រំលងអធ្រាត្រឈានចូលថ្ងៃទី១៤ ខែវិច្ឆិកា ឆ្នាំ២០១៧ រហូតមកដល់ម៉ោង៧ព្រឹក អគ្គិភ័យនេះមិនទាន់រលត់នៅឡើយទេ ខណៈការខូចខាតរោងចក្រស្ទើរទាំងស្រុងទៅហើយ។
ជាមួយគ្នានេះ គេឃើញរថយន្តពន្លត់អគ្គិភ័យ របស់សមត្ថកិច្ចពន្លត់អគ្គិភ័យចំនួន២៥គ្រឿង ធ្វើប្រតិបត្តិការបាញ់ទឹកពន្លត់ ហើយចំពោះមូលហេតុនៃការឆាបឆេះនេះ នៅមិនទាន់មានការបញ្ជាក់នៅឡើយទេ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
