កូរ៉េខាងជើង ៖ មេដឹកនាំផ្តាច់ការកូរ៉េខាងជើង លោក គីម ជុងអ៊ុន បានផ្ញើសារគំរាមធ្វើឃាតអតីតប្រធានាធិបតីកូរ៉េខាងត្បូង លោកស្រី ផាក គឺនហេ។ នេះបើយោងតាមការចេញផ្សាយពីទីភ្នាក់ងារសារព័ត៌មានបារាំង AFP។
គម្រោងនៃការធ្វើឃាតអតីតប្រធានាធិបតីកូរ៉េខាងត្បូង លោកស្រី ផាក គឹនហេ ពីសំណាក់មេដឹកនាំកូរ៉េខាងជើងនេះធ្វើឡើងបន្ទាប់ពីបែកធ្លាយនូវព័ត៌មានថា លោកស្រី ផាក គឺនហេ ធ្លាប់បានរៀបគម្រោងធ្វើឃាតលោក គីម ជុងអ៊ុន កាលពីអំឡុងពេលដែលលោកស្រីកំពុងកាន់តំណែង៕
រាជធានីភ្នំពេញ ៖ លោកស្រី គុណ លំអង ដែលជាភរិយាលោក ហុង សុខហួរ ត្រូវបានព្រឹទ្ធសភាសម្រេចទទួលស្គាល់ជាសមាជិកព្រឹទ្ធសភាពេញសិទ្ធិឲ្យជំនួសតំណែងប្តីរបស់លោកស្រី ដែលបានលាលែងពីតំណែង។ ការប្រកាសទទួលស្គាល់នេះធ្វើឡើងនៅក្នុងកិច្ចប្រជុំពេញអង្គព្រឹទ្ធសភា នាព្រឹកថ្ងៃទី២៩ ខែមិថុនា ឆ្នាំ២០១៧នេះ ក្រោមអធិបតីភាព សម្តេច សាយ ឈុំ ប្រធានព្រឹទ្ធសភា។
គួរបញ្ជាក់ថា លោកស្រី គុណ លំអង ត្រូវបានគណបក្សសមរង្ស៊ី ស្នើដាក់ជាបេក្ខភាពសមាជិកព្រឹទ្ធ ដើម្បីជំនួសតំណែង លោក ហុង សុខហួរ ជាប្តីរបស់លោកស្រី ដែលបានលាលែងពីតំណែងកាលពីខែកុម្ភៈ ឆ្នាំ២០១៧៕
រាជធានីភ្នំពេញ ៖ បុគ្គលិកទូរទស្សន៍ភីអិនអិនរបស់ឧកញ៉ាលីយុងផាត់ប្រហែល២០០នាក់បានដើរចេញឈប់ធ្វើការដោយសារតែពួកគេមិនពេញចិត្តនឹងអ្នកគ្រប់គ្រងផលិតកម្មវិធីជាជនជាតិថៃ ឈ្មោះ កាស៊ីប៉ាវកំហែង ហៅឃុនធឺត។
អតីតអ្នកផលិតកម្មវិធីម្នាក់សុំមិនបញ្ចោញឈ្មោះដែលបានចាកចេញ បានបង្ហើបប្រាប់ថា ការសម្រេចចិត្តលាឈប់ដោយសារតែមិនសប្បាយចិត្ត ចំពោះស្រីជនជាតិថៃម្នាក់ឈ្មោះ កាស៊ីប៉ាវកំហែងដែលមានតួនាទីត្រឹមតែជាប្រធានគ្រប់គ្រង តែចូលចិត្តបញ្ចោញអាកប្បកិរិយាច្រងេង ច្រងាងច្រឡោងខាមប្រើសម្តីត្រគោះបោះបោក គ្មានសីលធម៌គំរោះគំរើយមកលើផលិតករខ្មែរ បុគ្គលិកខ្មែរគ្រប់កម្មវិធីផ្សាយនានា។ ស្រីជនជាតិថៃនោះតែងតែបញ្ចោញឬកពាច្រឡោងខាមនៅមុខមហាជន ជាពិសេសនៅចំពោះមុខតារាកិត្តិយស និងនៅមុខអ្នកឧបត្ថម្ភកម្មវិធី ធ្វើហាក់ដូចជាផលិតករខ្មែរគ្មានសមត្ថភាពដឹកនាំ ល្ងង់ខ្លៅ មានតែពួកគេទើបចេះ…។ ជាពិសេសឱ្យតែមានកម្មវិធីបុណ្យជាតិខ្មែរ បុណ្យចម្រើនព្រះជន្មព្រះករុណា ព្រះមហាក្សត្រខ្មែរ ឬកម្មវិធីដែលជាប្រពៃណីជាតិផ្សេងៗ ដែលតម្រូវឱ្យមានការតុបតែងឆាកឱ្យមានលក្ខណៈសមស្របទៅតាមប្រពៃណីខ្មែរ គឺស្រីជនជាតិថៃ Kansee Paokamhaeng ធ្វើការជំទាស់មិនឱ្យយើងធ្វើអ្វីដែលទាក់ទងនឹងប្រពៃណីខ្មែរយើងឡើយ។
ដោយឡែកប្រភពមួយផ្សេងទៀតបានឱ្យដឹងថា ស្ថានីយទូរទស្សន៍ PNN ដែលដាក់ឱ្យដំណើរការតាំងពីឆ្នាំ២០១៥ ដោយមានបុគ្គលិកប្រមាណ៣០០នាក់ តែពេលបច្ចុប្បន្ននៅសល់បុគ្គលិកតែជាង១០០នាក់ប៉ុណ្ណោះ ហើយក៏នៅមានដាក់ពាក្យឈប់បន្តទៀត ដោយសារតែមិនអាចទ្រាំទ្រជាមួយការប្រើសម្តី និងអាកប្បកិរិយាច្រឡោងខាមរបស់ជនជាតិថៃ ឈ្មោះកាស៊ីប៉ាវកំហែងដែលពេលខ្លះបានស្រែកឡូឡាផ្អើលមនុស្សពេញ Studio តែម្តង៕
ហ្វីលីពីន ៖ ទីភ្នាក់ងារព័ត៌មានរ៉យទ័របានផ្សាយថា ជនស៊ីវិលដែលត្រូវចាប់ធ្វើជាចំណាត់ខ្មាំងនៅភាគខាងត្បូងប្រទេសហ្វីលីពីនត្រូវពួកក្រុមឧទ្ទាមបង្ខំឲ្យកាន់សាសនាឥស្លាម វាយបង្ខំឲ្យចូលព្រះវិហារ រៀបការជាមួយក្រុម Moute និងធ្វើជាទាសករផ្លូវភេទរបស់ពួកក្រុមប្រយុទ្ធនេះ។
អ្នកនាំពាក្យយោធាហ្វីលីពីនលោក Jo-Ar Herrera ថ្លែងថា ទាំងនេះគឺជាអ្វីដែលកំពុងកើតមានលើជនរងគ្រោះដែលត្រូវចាប់ធ្វើចំណាត់ខ្មាំង ដែលលោកថា នោះជាសារធាតុអាក្រក់ពីកំណើតរបស់ពួកក្រុមឧទ្ទាម ហើយបានបំពានធ្ងន់ធ្ងរដល់កិត្តិយស និងសេចក្តីថ្លៃថ្នូររបស់ស្ត្រី។
ដោយឡែកប្រធានាធិបតីហ្វីលីពីនបានថ្លែងថា លោកមានការសោកស្តាយ និងក្រៀមក្រំចំពោះ ហេតុការណ៍ដែលកើតឡើងនៅភាគខាងត្បូង ហើយសន្យាថា នឹងរៀបចំទីក្រុងនោះឲ្យបានប្រសើរឡើងវិញ៕
ប៉េកាំង ៖ ការសិក្សារបស់ក្រុមអ្នកជំនាញសមាគមវេជ្ជសាស្ត្ររបស់អាមេរិកបានឲ្យដឹងថា ប្រទេសចិនគឺជាប្រទេសមួយដែលប្រឈមមុខអ្នកមានជំងឺទឹកនោមផ្អែមច្រើនជាងគេលើពិភពលោក គឺមានប្រមាណ១១ភាគរយនៃប្រជាពលរដ្ឋកំពុងមានជំងឺ និងប្រមាណ៣៦ភាគរយផ្សេងទៀតប្រឈមមុខកើតជំងឺនេះ។
ក្នុងការសិក្សាស្រាវជ្រាវគេបានសិក្សាលើមនុស្ស១៧០ ២៨៧នាក់ដោយក្រុមអ្នកស្រាវជ្រាវបានវាស់វែងកម្រិតជាតិស្ករមាននៅក្នុងឈាមដែលបានចាប់ផ្តើមកាលពីឆ្នាំ២០១៣ ហើយត្រូវបានចូលរួមវិភាគលើលទ្ធផលដោយវេជ្ជបណ្ឌិតមកពីមជ្ឈមណ្ឌលត្រួតពិនិត្យ និង បង្ការជំងឺទឹកនោមផ្អែករបស់ចិនផងដែរ។ នេះបើតាមការផ្សាយពីទីភ្នាក់ងារព័ត៌មានរ៉យទ័រ។
ការសិក្សាបញ្ជាក់ថា បើសិនជាកម្រិតជាស្ករ១២៦ មីលីក្រាម ក្នុង១ដេស៊ីលីត ឈាម ឬ ច្រើនជាងនេះនោះ គេអាចបញ្ជាក់បានថា អ្នកនោះនឹងកើតមានជំងឺទឹកនោមផ្អែម ហើយបើសិនជាស្ថិតក្នុងកម្រិតចន្លោះ១០៥ទៅ១២៦ នោះត្រូវបានកំណត់ថា ប្រឈមនឹងជំងឺទឹកនោមផ្អែម៕
ដោយ ៖ ប្រុញ វិធិន
ខេត្តក្រចេះ ៖ កម្លាំងនគរបាលស្រុកសំបូរ ឃាត់ខ្លួនជនសង្ស័យម្នាក់ បន្ទាប់ពីនោះជនបានយកកាំបិត ចាក់ទៅលើបុរសម្នាក់បណ្តាលឲ្យរងរបួសធ្ងន់។ ហេតុការណ៍នេះបានកើតឡើងកាលពីរសៀលថ្ងៃទី២៧ ខែមិថុនា ឆ្នាំ២០១៧ នៅចំណុច ក្រុមហ៊ុនដុងភូរក្រចេះ អភិវឌ្ឍន៍កៅស៊ូ ស្ថិតក្នុងភូមិអូរគ្រៀងឃុំអូរគ្រៀង ស្រុកសំបូរ ខេត្តក្រចេះ។
លោក ណយ ស៊ីថាច អធិការរង ទទួលព្រហ្មទណ្ឌ័ស្រុកសំបូរបានឱ្យដឹងថា ជនសង្ស័យឈ្មោះ ភិន សុផា ភេទប្រុសអាយុ២៤ឆ្នាំជនជាតិខ្មែរ មានទីលំនៅ ចំណុចក្រុមហ៊ុនដុងភូរក្រចេះអភិវឌ្ឍន៍កៅស៊ូ ស្ថិតក្នុងភូមិអូរព្រះ ឃុំអូរគ្រៀង ស្រុកសំបូរ ខេត្តក្រចេះ រីឯជនរងគ្រោះ ឈ្មោះ ភុក ភី ភេទប្រុសរស់នៅក្នុង ភូមិឃុំជាមួយគ្នា។
លោកបានបន្តថា ករណីប្រើអំពើហិង្សានេះ ដោយជនដៃដល់ យកកាំបិតជិតបន្លែមកចាក់ចំពោះជនរងគ្រោះឈ្មោះ ភុក ភីឲរបួសធ្ងន់បែបនេះ គឺបណ្ដាលមកពី ឈ្មោះ ភុក ភី បាន រករឿង លើក្រុមគ្រួសារ លោក ភិន សុផាហើយឈ្មោះ ភុក ភីបានវាយម្តាយក្មេកលោក ភិន សុផាចំនួួនពីរដៃ ពេលនោះលោក(ភិនភា)បាន ចូលឃាត់ ស្រាប់តែឈ្មោះ ភូមិ ភី និងបក្សពួក ពីរនាក់ទៀតបាន ព្រួតវាយ ឈ្មោះ ភិន សុផា ហើយ ឈ្មោះ ភិន សុផា ខឹងពេកក៏ទៅយកកាំបិតចិតបន្លែមកចាក់ ឈ្មោះ ភុក ភី ចំពោះមួយកាំបិតតែម្ដង។
បច្ចុប្បន្នជនសង្ស័យត្រូវបានឃុំខ្លួនបណ្ដោះអាសន្ននៅ ការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តដើម្បីកសាងសំណុំរឿងបញ្ជូនទៅតុលាដើម្បីចាត់វិធានការតាមនីតិវិធីច្បាប់ ៕
ខេត្តបាត់ដំបង ៖ ក្មេងជំទង់ម្នាក់ដើរកាត់វាលស្រែទាំងមេឃភ្លៀងរលឹមត្រូវរន្ទះបាញ់ស្លាប់ ហេតុការណ៍ខាងលើបានកើតឡើងនៅម៉ោង២ និង៣០នាទីថ្ងៃទី២៧ មិថុនា ឆ្នាំ២០១៧ ត្រង់ ចំនុចភូមិទួលល្វៀង ឃុំអូរដំបង២ ស្រុកសង្កែ ខេត្តបាត់ដំបង ។
ប្រភពបានឲ្យដឹងថា ជនរងគ្រោះស្លាប់ដោយករណីរន្ទះបាញ់នេះឈ្មោះ ឈឹម ភារុណ ភេទប្រុស អាយុ១៤ឆ្នាំ រស់នៅក្នុងក្រុមទី២១ ភូមិនិងឃុំកើតហេតុខាងលើ។ ប្រភពបញ្ជាក់ថា មុនពេលកើតហេតុគេឃើញជនរងគ្រោះបានចាកចេញពីផ្ទះក្នុងគោលដៅទៅកាន់ទីវាលស្រែ ខណៈទៅដល់ចំណុចកើតហេតុស្រាប់តែរន្ទះបានបាញ់ត្រូវស្លាប់ភ្លាមៗតែម្តង៕
រាជធានីភ្នំពេញ ៖ ថ្លែងនៅក្នុងពិធីរំលឹកខួបអនុស្សាវរីយ៍លើកទី៦៦ ថ្ងៃបង្កើតគណបក្សប្រជាជនកម្ពុជា សម្តេច ហ៊ុន សែន ប្រធានគណបក្សបានបង្ហាញនូវសារនយោបាយក្តៅទាក់ទងស្ថានការនយោបាយក៏ដូចជាការវាយតម្លៃសភាពការណ៍បោះឆ្នោតក្រុមប្រឹក្សាឃុំ/សង្កាត់នាពេលថ្មីៗនេះ ។
សម្តេច ហ៊ុន សែន បានថ្លែងថា គណបក្សប្រជាជនកម្ពុជា ប្រកាន់ភ្ជាប់នូវ គោលការណ៍អព្យាក្រឹត្យ មិនប្រកាន់ពូជសាសន៍ រើសអើងភេទនោះទេ ហើយគណបក្សប្រជាជនកម្ពុជា ប្ដេជ្ញាថែរក្សាដាច់ខាត នូវសន្តិភាព យើងប្រឆាំងដាច់ខាត ចំពោះទង្វើប្រមាថមើលងាយ ជេរប្រទេចគ្នា ដែលបង្កឲ្យប្រទេស មានកលិយុគម្ដងទៀត ។ គណបក្សប្រជាជនកម្ពុជា ប្ដេជ្ញាការពារខឿនសេដ្ឋកិច្ច រដ្ឋធម្មនុញ្ញ ព្រះមហាក្សត្រ មិនឲ្យប្រទេសវិលត្រឡប់ ថយក្រោយម្ដងទៀត ។
សម្តេច ហ៊ុន សែន ក៏បានអំពាវនាវដល់សមាជិកសមាជិកាគណបក្សបន្តរួបរួមគ្នាជាធ្លុងមួយថែរក្សាសន្តិភាពការពាររដ្ឋធម្មនុញ្ញ ព្រះមហាក្សត្រតែមួយ យើងមិនត្រូវភ្លេចខ្លួន ដើរជាន់ដានអតីតកាលទៀតឡើយ ហើយត្រូវកំចាត់រាល់បាតុភាពទាំងឡាយណា ដែលនាំឲ្យប្រទេសកម្ពុជា វិលថយក្រោយ ។ សម្តេចបញ្ជាក់ថា ការទុកចិត្តរបស់ប្រជាជន លើគណបក្សយើងត្រូវផ្ដល់ជូនប្រជាជនវិញ តាមរយៈការកសាងអភិវឌ្ឍន៍ មូលដ្ឋាន ទាមទារឲ្យមន្ត្រីគ្រប់ជាន់ថ្នាក់ ត្រូវអនុវត្តឲ្យបានខ្ជាប់ខ្ជួនគណបក្ស មិនអាចបោះបង់ចោលសន្តិភាព និងការអភិវឌ្ឍន៍នោះទេ គណបក្ស បានបូជាជីវិត ដើម្បីសង្គ្រោះប្រទេសជាតិ ឲ្យមានសន្តិភាពរីកចម្រើន ដូចសព្វថ្ងៃ ។ យើងមិនអាចឲ្យការខិតខំនេះ របូតផុតចេញពីដៃ នាំទៅដល់វិនាសកម្មនោះទេ ។
ពាក់ព័ន្ធនឹងស្ថានភាពបោះឆ្នោតក្រុមប្រឹក្សា ឃុំ/សង្កាត់ សម្តេច ហ៊ុន សែន បានស្នើឲ្យយសម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ពិនិត្យមើលតាមអង្គច្បាប់ ដល់ក្រុមអង្គការក្រៅរដ្ឋាភិបាលមួយចំនួន ដែលមានឈ្មោះថា បន្ទប់ស្ថានការណ៍បោះឆ្នោត ដែលតាមដានការបោះឆ្នោតកន្លងមក ហើយវាយតម្លៃថា ស្ថានការណ៍ការបោះឆ្នោតនៅកម្ពុជា មានភាពមិនប្រក្រតី ខណដែលបន្ទប់ស្ថានការណ៍បោះឆ្នោត ដែលមានអង្គការសង្គមស៊ីវិល ជាង៤០ នោះបានចេញសេចក្ដីថ្លែងការណ៍មួយ កាលពីថ្ងៃ ទី២៤ មិថុនា វាយតម្លៃថា ការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី៤ ឆ្នាំ២០១៧ ខ្វះយុត្តិធម៌ និងមានភាពមិនប្រក្រតី ។
សម្តេចសង្កត់ធ្ងន់ថា តើអ្វីទៅដែលហៅថា បន្ទប់ស្ថានការណ៍ ដែលថាការបោះឆ្នោត នៅកម្ពុជាកន្លងមក មានភាពអាប់អួរ យើងទាមទារឲ្យអនុវត្តនូវច្បាប់ ។ ពួកគេបានខោកក្បាលគជប ។ ដូច្នេះសម្តេចស្នើឲ្យក្រសួងពិនិត្យមើលតើបន្ទប់ ស្ថានការណ៍ត្រឹមត្រូវឬទេ ពិនិត្យមើលតាមច្បាប់ អង្គការក្រៅរដ្ឋាភិបាល ព្រោះថា ខ្លួនប្រកាសពីភាពជោគជ័យ តែមកខោកក្បាលគជប ហើយគជប ក៏បានចេញសេចក្ដីថ្លែងការណ៍ ទាត់ចោល រួចហើយផងដែរ ។
ទន្ទឹមនោះសម្តេច ហ៊ុន សែន ក៏បានស្នើឲ្យសមាជិកសភា គណកូតាគណបក្សប្រជាជកម្ពុជា ពិនិត្យមើលឡើងវិញ ធ្វើវិសោធនកម្មច្បាប់ ស្ដីពីគណបក្សនយោបាយ ដោយមិនឲ្យអ្នកទោស មានសិទ្ធលូកដៃ ចូលកិច្ចការនយោបាយ ។ ការថ្លែងដូច្នេះធ្វើឡើងបន្ទាប់ពីលោក សម រង្ស៊ី អតីតប្រធានគណបក្សសង្គ្រោះជាតិ បានលូកលាន់ចូលកិច្ចការនយោបាយនៅកម្ពុជា ខណដែលលោកស្ថិតជាទណ្ឌិត ។
សម្តេចថ្លែងថា ដៃម្ខាងប្រកាស ជោគជ័យរបស់ខ្លួន ដៃម្ខាងទៀតបែរជា វាយប្រហារមកលើ គណបក្សប្រជាជន និង គជប ។ តើអ្នកទោសមានសិទ្ធផ្សារភ្ជាប់ខ្លួន ជាមួយគណបក្ស នយោបាយដែរទេ? បើវាមិនគ្រប់គ្រាន់ យើងត្រូវវិសោធនកម្មច្បាប់ គណបក្សនយោបាយបន្តទៀត ។ ដូចជាឥឡូវអ្នកទោសបានលូកលាន់ ចូលកិច្ចការ គណបក្សនយោបាយ បង្កហិង្សាមិនចេះចប់ ។ ដូច្នេះសម្តេចស្នើសុំឲ្យសភាកូតា CPP ពិនិត្យមើលលទ្ធភាព ដើម្បីធ្វើវិសោកនកម្មច្បាប់ស្តីពីគណបក្សនយោបាយ ដើម្បីកុំឲ្យអ្នកទោសមានសិទ្ធិចូលរួមនយោបាយ ។
យ៉ាងណាក៏ដោយ សម្តេច ហ៊ុន សែន ព្រមានជាថ្មីថា សង្គ្រាមអាចកើតមាន នៅកម្ពុជាដោយសារ តែសម្ដីប្រមាថមាក់ងាយ របស់មន្ត្រីគណបក្ស ប្រឆាំង មកលើគណបក្សកាន់អំណាច និងគណបក្សនយោបាយដទៃ ទាំងដែលបក្សខ្លួនមិនទាន់ នឹងឈ្នះឆ្នោតផងនោះ ។ សម្តេចបញ្ជាក់ថា សង្គ្រាមមិនចាំបាច់ តែមានអាវុធទេ សង្គ្រាមវាបានកើតឡើង តារយៈអណ្ដាតរបស់អ្នក ដែលមើលងាយមើលថោក គណបក្សប្រជាជនកម្ពុជា យើងមិនដែលមើលងាយ គណបក្សណាមួយទេ មិនថាមានកៅអី ក្នុងរដ្ឋសភា ឬគ្មាននោះទេ ៕
ប៉េកាំង ៖ ដោយសារព័ត៌មាន Channel News Asia ចេពផ្សាយថា ក្រុមហ៊ុនប្រេងរដ្ឋដ៏ធំរបស់ចិនបានសម្រេចចិត្តផ្អាកការលក់ប្រេងឥន្ធនៈឱ្យកូរ៉េខាងជើង ដោយសារតែការព្រួយបារម្ភខ្លាចក្រែងលោប្រទេសនេះ គ្មានលទ្ធភាពបង់ប្រាក់ត្រឡប់មកវិញ គ្រាដែលកំពុងជាប់ទណ្ឌកម្មពីសហគមន៍អន្តរជាតិ។
ប្រភពបានឲ្យដឹងថា ការសម្រេចផ្អាកក្រុមហ៊ុនប្រេងដ៏ធំរបស់ចិនឈ្មោះ China National Petroleum Corp (CNPC) នេះអាចនឹងធ្វើឱ្យប៉ះពាល់យ៉ាងខ្លាំងដល់ការផ្គត់ផ្គង់ ក៏ដូចជាការប្រើប្រាស់ប្រេងរបស់កូរ៉េខាងជើង ដែលនេះអាចនឹងបង្ខំឱ្យទីក្រុងព្យុងយ៉ាង ស្វែងរកអ្នកផ្គត់ផ្គង់ថ្មីជំនួសចិន នៅក្នុងករណីស្ថានភាពកាន់តែធ្ងន់ធ្ងរ ហើយបើសិនជារបបលោក គីម ជុងអ៊ុន សម្រេចចិត្តបែបនេះមែន នោះសម្ព័ន្ធភាពរវាងមិត្តទាំងពីរអាចនឹង ចាប់ផ្ដើមឃ្លាតឆ្ងាយពីគ្នាបន្តិចម្ដងៗ ដូចការចង់បានរបស់សហរដ្ឋអាមេរិកជាក់ជាមិនខាន។
ទោះបីជាយ៉ាងណាក៏ដោយ ក្រុមហ៊ុន CNPC និងក្រសួងពាណិជ្ជកម្មចិន បានបដិសេធក្នុងការធ្វើអត្ថាធិប្បាយ រីឯក្រសួងការបរទេសចិន និងស្ថានទូតកូរ៉េខាងជើង ប្រចាំទីក្រុងប៉េកាំង ក៏បានបដិសេធដូចគ្នានេះដែរ ហើយម្យ៉ាងវិញទៀត គេមិនអាចនិយាយទុកមុនបានឡើយថា នឹងមានថ្ងៃដែលចិនព្រមបោះបង់ចោលកូរ៉េខាងជើង ខណៈទីក្រុងប៉េកាំង នៅតែត្រូវការរបបដឹកនាំលោក គីម ជុងអ៊ុន ដើម្បីទប់ទល់នឹងការពង្រីកឥទ្ធិពលយោធាអាមេរិកនៅក្នុងតំបន់៕
ការ៉ាកាស់ ៖ ប្រធានាធិបតីវេណេស៊ុយអេឡា លោក Nicolas Maduro បានព្រមានប្រើប្រាស់អាវុធទប់ទល់នឹងក្រុមប្រឆាំង ដែលប៉ុនប៉ងបង្ករដ្ឋប្រហារ ទម្លាក់រូបលោកចេញពីអំណាច។ នេះបើយោងតាមទីភ្នាក់ងារសារព័ត៌មាន Reuters នៅព្រឹកថ្ងៃពុធនេះ។
ការព្រមានរបស់មេដឹកនាំប្រទេសអាមេរិកឡាទីនរូបនេះ ធ្វើឡើងបន្ទាប់ពីឧទ្ធម្ភាគចក្រមួយគ្រឿងបានបើកការវាយប្រហារលើអគារតុលាការកំពូល ក្នុងគោលបំណងដុតបញ្ឆេះបន្ថែមវិបត្តិនយោបាយបច្ចុប្បន្ន ក៏ប៉ុន្តែគ្រាប់បែកដែលបាញ់ចេញទៅលើអគារមិនបានផ្ទុះឡើយ។
ថ្លែងនៅក្នុងកញ្ចក់ទូរទស្សន៍រដ្ឋ ប្រធានាធិបតីវ័យ៥៤ឆ្នាំ លោក Maduro ដែលកំពុងប្រឈមមុខនឹងការបាតុកម្មតវ៉ាទូទាំងប្រទេស ឱ្យលោកចុះចេញពីតំណែងបានគូសបញ្ជាក់ថា « កងកម្លាំងពិសេសរដ្ឋាភិបាល បានទៅដល់កន្លែងកើតហេតុភ្លាមៗ បន្ទាប់ពីពួកភេរវករបើកការវាយប្រហារលើអគារតុលាការកំពូល… ឧទ្ធម្ភាគចក្ររបស់ពួកគេ ក៏បានហោះពីលើអគារក្រសួងមហាផ្ទៃផងដែរ។ ដូច្នេះខ្ញុំស្នើឱ្យក្រុមប្រឆាំង ថ្កោលទោសចំពោះការវាយប្រហារនេះ»។
គួរបញ្ជាក់ថា ធ្វើបាតុកម្មតវ៉ាទាមទារឱ្យលោក Maduro ចុះចេញពីតំណែងចាប់តាំងពីខែមេសាមក បានបណ្តាលឲ្យចំនួនអ្នកស្លាប់នៅក្នុងអំពើហិង្សារវាងក្រុមបាតុករ និងប៉ូលិសកើនដល់៧៥នាក់ហើយ៕
រាជធានីភ្នំពេញ ៖ គណបក្សប្រជាជនកម្ពុជា (CPP) នៅព្រឹកថ្ងៃទី២៨ ខែមិថុនា ឆ្នាំ២០១៧នេះ បានប្រារព្ធអង្គមីទ្ទិញអបអរសាទរ រំលឹកខួបអនុស្សាវរីយ៍ លើកទី ៦៦ ថ្ងៃបង្កើតគណបក្សប្រជាជនកម្ពុជា (២៨ មិថុនា ១៩៥១ – ២៨ មិថុនា ២០១៧) ។
តាមសង្កេតមើលអ្នកចូលរួមក្នុងអង្គមីទ្ទិញនោះប្រមាណជាង៥ម៉ឺននាក់ ដែលធ្វើឲ្យកម្មវិធីនោះមានភាពអធិកធមក្រៃលែង ៕
ខេត្តរតនគិរី ៖ កម្លាំងសមត្ថកិច្ចចម្រុះស្រុកអូរជុំ ចុះបង្រាបបទល្មើសព្រៃឈើនៅវេលាម៉ោង១១ និង៣០នាទីព្រឹកថ្ងៃទី២៧ ខែមិថុនា ឆ្នាំ២០១៧ កម្លាំងអធិការដ្ឋាននគរបាលស្រុកអូរជុំ សហការជាមួយកម្លាំងអាវុធហត្ថស្រុក កម្លាំងជំនាញរដ្ឋបាលព្រៃឈើព្រៃឈើអូរជុំ បានចុះទៅដល់វាលថ្មដា ស្ថិតនៅភូមិតងកាម៉ាល ឃុំអូរជុំ ស្រុកអូរជុំ ខេត្តរតនគិរី ។
សមត្ថកិច្ចចម្រុះដែលចុះបង្ក្រាបបានឲ្យដឹងថា ឈើប្រណីតដែលសមត្ថកិច្ចរឹបអូសបានឈើធ្នង់ចំនួន៨ កំណាត់ មួយដំៗមានប្រវែង១,២០ម៉ែត្រ ហើយវត្ថុតាងបានប្រគល់ទៅឲ្យ ជំនាញរដ្ឋបាលព្រៃឈើខណ្ឌដើម្បីយកទៅរក្សាទុក។ ប៉ុន្តែជនប្រព្រឹត្តបទល្មើសមិនត្រូវបានចាប់ខ្លួននោះទេ ចាប់បានតែវត្ថតាងតែប៉ុណ្ណោះ៕
រាជធានីភ្នំពេញ ៖ ជនជាតិវៀតណាមម្នាក់បានធ្វើអត្ដឃាតដោយចងកសម្លាប់ខ្លួនឯងនៅក្នុងបន្ទាប់ខារ៉ាអូខេបង្កការភ្ញាក់ផ្អើលកាលពីវេលាម៉ោង១ និង៣០នាទីរសៀលថ្ងៃទី២៧ ខែមិថុនា ឆ្នាំ២០១៧ ស្ថិតនៅក្នុងបន្ទាប់ខារ៉ាអូខេមួយកន្លែងដែលមានយីហោ គ្រួសារ MYLove169 ផ្លូវលេខ១៣ ជាន់២ បន្ទាប់៨ សង្កាត់ផ្សារកណ្តាល១ ខណ្ឌដូនពេញ ។ ជនជាតិវៀតណាមដែលចងកមានឈ្មោះLAI THAIHIEU អាយុ៣២ឆ្នាំ មុខរបរចុងភៅហាងស្នាក់នៅក្បែរកន្លែងកើតហេតុ ។
យោងតាមសាក្សីកន្លែងកើតហេតុបានឲ្យដឹងថា មុនពេលកើតហេតុបុរសជាជនជាតិវៀតណាមនោះបានឈ្លោះប្រកែកជាមួយដើមនិងខឹងប្រពន្ធដេញចេញពីផ្ទះមិនត្រូវគ្នាផង បុរសជនជាតិវៀតណាមសម្រេចចិត្តចងកសម្លាប់ខ្លួនខាងលើនេះតែម្ដង លុះមកដល់ម៉ោងកើតហេតុទើបមានអ្នកឡើងទៅឃើញបង្កកាភ្ញាក់ផ្អើលតែម្ដង ។
ក្រោយពេលកើតហេតុម្ចាស់ខារ៉ាអូខេបានទាក់ទងទៅសមត្ថកិច្ចជំនាញខាងកោសល្យវិច័យឲ្យមិនពិនិត្យលើសាកសពយ៉ាងល្អិតល្អន់បំផុតបានហើយ បានសន្និដ្ឋានថា បុរសជនជាតិវៀតណាមពិតជាបានចងកសម្លាប់ខ្លួនឯងពិតប្រាកដមែន សាកសពត្រូវសមត្ថកិច្ចប្រគល់ជូនឲ្យក្រុមគ្រួសារយកទៅធ្វើបុណ្យតាមប្រពៃណី៕
រាជធានីភ្នំពេញ ៖ គណបក្ស សម រង្ស៊ី បានស្នើដាក់លោកស្រី គុណ លំអង ជាបេក្ខភាពសមាជិកព្រឹទ្ធ ដើម្បីជំនួសតំណែងលោក ហុង សុខហួរ ជាប្តីដែលបានលាលែងពីតំណែងកាលពីខែកុម្ភៈ ឆ្នាំ២០១៧ ។
លោក ម៉ម ប៊ុននាង អ្នកនាំពាក្យព្រឹទ្ធសភា បានបញ្ជាក់ថា ការប្រកាសទទួលស្គាល់ភាពជាសមាជិកព្រឹទ្ធសភារបស់ លោកស្រី គុណ លំអង នឹងធ្វើឡើងនៅក្នុងសម័យប្រជុំព្រឹទ្ធសភា នៅថ្ងៃទី២៩ ខែមិថុនា ឆ្នាំ២០១៧ ខាងមុខនេះ ។ ប៉ុន្តែតំណែងរបស់លោកស្រី ឆ្លងកាត់សំឡេងគាំទ្រ៥០បូក១ នៅក្នុងព្រឹទ្ធសភា ៕
រាជធានីភ្នំពេញ ៖ រថយន្តម៉ាកឡិចស៊ីស Rx300 មួយគ្រឿងដែលត្រូវបានស្គាល់ថា ជារថយន្តរបស់លោកផ្កាយ១ ត្រូវរថភ្លើងបើកបុកពីក្រោយពេញទំហឹងបណ្តាលអោយរងការខូចខាតផ្នែកខាងក្រោយតែសំណាងល្អមិនមានរងគ្រោះថ្នាក់ដល់ជីវិតនោះទេ។ ហេតុការណ៍បង្កការភ្ញាក់ផ្អើលនេះកើតឡើងនៅព្រឹកថ្ងៃទី២៧ ខែមិថុនា ឆ្នាំ២០១៧នេះ នៅលើកំណាត់ផ្លូវត្រឡោកបែក ស្ថិតក្នុងសង្កាត់បឹងកក់២ ខណ្ឌទួលគោក។
ក្រោយកើតហេតុសមត្ថកិច្ចបានស្ទូចរថយន្ត Lexus Rx300 ខាងលើយកទៅកាន់ស្នងការដ្ឋាននគរបាលរាជធានីភ្នំពេញ ចំណែករថភ្លើងបានបន្តដំណើរទៅកាន់រ៉ារបស់ខ្លួន៕
