រាជធានីភ្នំពេញ ៖ ឯកអគ្គរដ្ឋទូតអាមេរិក ប្រចាំនៅកម្ពុជា លោក Heidt បានថ្លែងការណ៍កោតសរសើរចំពោះសម្ដេច ហ៊ុន សែន ដែលបានរៀបចំឲ្យដំណើរបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ ប្រព្រឹត្តទៅដោយរលូននិងបានអបអរសាទរចំពោះគណបក្សប្រជាជនកម្ពុជាដែលបានទទួលសំឡេងគាំទ្រច្រើនលើសលប់គ្រប់គ្រងអាសនៈឃុំ-សង្កាត់ នៅទូទាំងប្រទេស ។
ការថ្លែងកោតសរសេរនិងអបអរសាទរនោះធ្វើឡើងក្នុងឱកាសលោក Heidt ចូលជួបពិភាក្សាការងារជាមួយសម្តេច ហ៊ុន សែន នារសៀលម្សិលមិញ នៅភូមិគ្រឹះរបស់សម្តេចនាក្រុងតាខ្មៅ ៕
រាជធានីភ្នំពេញ ៖ សមាគមទូរទស្សន៍កម្ពុជា នារសៀលម្សិលមិញ បានចេញសេចក្តីថ្លែងការណ៍ ដោយបញ្ចេញប្រតិកម្មនិងឆ្លើយតបការលើកឡើងរបស់គណបក្សប្រឆាំងជុំវិញការចេញ សេចក្តីថ្លែងការណ៍ ទាក់ទងករណីជួលម៉ោងផ្សាយយុទ្ធនាការឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី៤ ឆ្នាំ២០១៧, ។
សមាគមទូរទស្សន៍កម្ពុជា បានអះអាងថា ស្ថានីយ៍ទូរទស្សន៍ឯកជន គឺមិនមែនជាកម្មសិទ្ធិរបស់គណបក្សនយោបាយណាមួយទេ។ ស្ថានីយ៍ទូរទស្សន៍ឯកជននានា មានសិទ្ធិពេញលេញដោយឯករាជ្យ ក្នុងការជួលម៉ោងផ្សាយឲ្យគណបក្សនយោបាយ ដែលមានលទ្ធភាពជួលម៉ោងផ្សាយ ៕
ខេត្តរតនគិរី ៖ បុរសវ័យចំណាស់ម្នាក់ទៅកាប់ដើមឈើក្នុងចំការដួលរលំត្រូវខ្លួនឯងបណ្តាលឲ្យស្លាប់មុនពេលបញ្ជូនទៅដល់មណ្ឌលសុខភាពស្រុកកាលពីវេលាម៉ោង៤ល្ងាចថ្ងៃទី២៦ ខែមិថុនា ឆ្នាំ២០១៧នៅចំណុចដីក្រុមហ៊ុនជាំងលីក្នុងភូមិសាស្ត្រភូមិតាំងសេ (បរខាំ) ឃុំ ញ៉ាង ស្រុកអណ្តូងមាស ខេត្តរតនគិរី ។
នគរបាលមូលដ្ឋានបានឲ្យដឹងថា ជនរងគ្រោះ ឈ្មោះ សំ ដា ភេទ ប្រុសអាយុ៥២ ឆ្នាំជនជាតិខ្មែរ មុខរបរកសិករ រស់នៅភូមិដាលឃុំញ៉ាងស្រុកអណ្តូងមាស ហើយមានស្រុកកំណើតនៅភូមិ ដើមចាន់ ឃុំ រមេញ ស្រុកកោះអណ្តែត ខេត្តតាកែវ។
ចំណែកជនរងគ្រោះត្រូវបានសាច់ញាត្តិបញ្ជូនសង្គ្រោះបន្ទាន់មកមណ្ឌលសុខភាពស្រុកហើយក៏ស្លាប់ពាក់កណ្តាលផ្លូវ។
បច្ចុប្បន្នប្រពន្ធ និងសាច់ញាតិយកសាកសពទៅធ្វើបុណ្យតាមប្រពៃណី៕
រាជធានីភ្នំពេញ ៖ គណបក្សប្រជាជនកម្ពុជាបានចេញសេចក្តីថ្លែងការណ៍ដោយច្រានចោលរាល់ការលើកឡើងរបស់ CNRP ហើយបានចាត់ទុកការនិយាយរបស់ CNRP គឺជាការមួលបង្កាច់គ្មានការពិត គ្មានមូលដ្ឋានច្បាស់លាស់ និងសូមថ្កោលទោសយ៉ាងដាច់អហង្កា។
គួរបញ្ជាក់ថា គណបក្សសង្គ្រោះជាតិ ចេញសេចក្តីថ្លែងការណ៍ ដោយចាត់ទុកការបោះឆ្នោតឃុំសង្កាត់អាណត្តិទី៤មិនទាន់បំពេញលក្ខខណ្ឌពេញលេញតាមគោលការណ៍សេរី ត្រឹមត្រូវ និងយុត្តិធម៌នោះទេ ៕
បាងកក ៖ ទីភ្នាក់ងារសារព័ត៌មាន Reuters បានផ្សាយថា សកម្មជនការពារសិទ្ធិមនុស្សថៃម្នាក់ ត្រូវបានរដ្ឋាភិបាលយោធាថៃចោទប្រកាន់ជាផ្លូវការកាលពីម្សិលមិញពីបទប្រឆាំងនឹងបទបញ្ជារបស់រដ្ឋាភិបាល។
លោក Rangsiman Rome មានអាយុ២៥ឆ្នាំ ត្រូវបានអាជ្ញាធរថៃចាប់ខ្លួនកាលពីថ្ងៃអាទិត្យ និងត្រូវបានព្រះរាជអាជ្ញាយោធាថៃម្នាក់ក្នុងទីក្រុងបាងកក ចោទប្រកាន់ចំនួន០៤ករណី ក្នុងនោះរួមមានការប្រមូលផ្ដុំការជួបជុំដោយខុសច្បាប់ កាលពីឆ្នាំ២០១៥ និងការធ្វើសកម្មភាពប្រឆាំងនឹងបទបញ្ជារបស់រដ្ឋាភិបាលយោធាថៃ តាមរយៈការចែកខិត្តប័ណ្ណ រិះគន់លើ ការបោះឆ្នោតប្រជាមតិស្ដីពីវិសោធនកម្មរដ្ឋធម្មនុញ្ញក្នុងឆ្នាំ២០១៦ជាដើម។
គួរបញ្ជាក់ថា នេះគឺជាការចាប់ខ្លួនអ្នករិះគន់ចុងក្រោយបំផុតសម្រាប់ការធ្វើសកម្មភាពជាប់បម្រាម គិតចាប់តាំងពីរដ្ឋប្រហារឆ្នាំ២០១៤មកបន្ទាប់ពីរបបយោធាបានឡើងកាន់កាប់អំណាចរបស់លោកនាយករដ្ឋមន្ត្រី ប្រាយុទ្ធ ចាន់អូចា និងចាប់ផ្ដើមបង្ក្រាប ឬរឹតត្បិតលើសកម្មជនការពារសិទ្ធិមនុស្ស និងបណ្ដាញផ្សព្វផ្សាយទាំងឡាយណាដែលហ៊ានរិះគន់ខ្លួន ព្រមទាំងបានហាមឃាត់ការជួបជុំគ្នាចាប់ពីមនុស្ស០៥នាក់ ឡើងទៀតផង៕
រាជធានីភ្នំពេញ ៖ នាព្រឹកថ្ងៃទី២៦ មិថុនា នេះ លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន,លោកឧត្តមសេនីយ៍ឯក ម៉ក់ ជីតូ អគ្គស្នងការរងទទួលបន្ទុកការងារគ្រឿងញៀន, លោកឃួង ស្រេង អភិបាលរងរាជធានីភ្នំពេញ,ប្រធានសាលាដំបូងរាជធានីភ្នំពេញ, លោកឧត្តមសេនីយ៍ឯក រ័ត្ន ស្រ៊ាង និងមន្ដ្រីពាក់ព័ន្ធជាច្រើនរូបទៀត បានចូលរួមក្នុងទិវាអន្តរជាតិប្រយុទ្ធប្រឆាំងគ្រឿងញៀន ។ ក្នុងពិធីនោះ ក៏មានការដុតបំផ្លាញគ្រឿងញៀនសរុបជាង១២៦,៣១គីឡូក្រាម ក្រោយពីកម្លាំងធ្វើការបង្ក្រាបបាន នៅក្នុងយុទ្ធនាការបង្ក្រាបគ្រឿងញៀននាពេលកន្លងមក ៕
រាជធានីភ្នំពេញ ៖ កម្លាំងសមត្ថកិច្ចត្រូវបានដាក់ពង្រាយ និងរារាំងក្រុមសមាគមកម្ពុជាក្រោមមួយចំនួន ដែលបានជួបជុំគ្នានៅវត្តចាស់ ដើម្បីត្រៀមហែញត្តិទៅកាន់រដ្ឋសភា ព្រោះតែអាជ្ញាធរមិនបានអនុញ្ញាត្តិឲ្យហែរក្បួន ។
លោក ថាច់ សេដ្ឋា ប្រធានសហគមន៍ខ្មែរកម្ពុជាក្រោម ជាអ្នកដឹកនាំការជួពជុំនោះ ។ គោលបំណង នៃការជួបជុំគ្នាហែញតិដាក់ជូនរដ្ឋសភានេះ គឺដើម្បីស្នើរដ្ឋសភា បញ្ចូលថ្ងៃទី ០៤ មិថុនា ជាថ្ងៃបុណ្យជាតិកាន់ទុក្ខ នៃការបាត់បង់ទីកដីកម្ពុជាក្រោម ដែលអាណានិគមន៍បារាំង កាត់ទៅឱ្យវៀតណាម។
គួរបញ្ជាក់ថា កាលពីថ្ងៃទី១៩ ខែមិថុនា ឆ្នាំ២០១៧ កន្លងទៅ សាលារាជធានីភ្នំពេញ ចេញសេចក្តីសម្រេចមួយ ដោយមិនអនុញ្ញាតឱ្យ លោក ថាច់ សេដ្ឋា ដឹកនាំការហែក្បួនដាក់ញត្តិនេះឡើយ ។ ទន្ទឹមនោះ សាលារាជធានី ក៏បានព្រមានដែរថា ក្នុងករណីនៅតែមានការជួបជុំដង្ហែក្បួនតាមដងផ្លូវ ធ្វើឱ្យប៉ះពាល់ដល់សន្តិសុខ សុវត្ថិភាព សណ្តាប់ធ្នាប់ និងរបៀបរៀបរយកសាធារណៈ លោក ថាច់ សេដ្ឋា ត្រូវតែទទួលខុសត្រូវចំពោះមុខច្បាប់ ៕
កូឡុំប៊ី ៖ អាជ្ញាធរកូឡុំប៊ីបានឱ្យដឹងថា យ៉ាងហោចណាស់មនុស្ស០៩នាក់បានស្លាប់បាត់បង់ជីវិត និង២៨នាក់ផ្សេងទៀតកំពុងបាត់ខ្លួន បន្ទាប់ពីទូកដឹកអ្នកទេសចរដែលមនុស្សផ្ទុកមនុស្ស១៧០នាក់បានលិចនៅក្នុងបឹង Penol ស្ថិតនៅភាគពាយ័ព្យនៃប្រទេសនៅថ្ងៃអាទិត្យ (ម៉ោងនៅក្នុងតំបន់)។
ប្រធាននាយកដ្ឋានបង្ការគ្រោះមហន្តរាយកូឡុំប៊ី លោកស្រី Margarita Moncada បានបញ្ជាក់ជាបឋមថា មនុស្ស០៩នាក់បានស្លាប់ និង២៨នាក់នៅតែបន្តបាត់ខ្លួននៅឡើយ។ ចំណែកឯមនុស្ស៩៩នាក់ ត្រូវបានជួយសង្គ្រោះភ្លាមៗបន្ទាប់ពីទូកឈ្មោះ Almirante បានចាប់ផ្ដើមលិចចូលក្នុងទឹកបឹង Penol ហើយមនុស្ស៤០នាក់ផ្សេងទៀត ក៏ត្រូវបានគេស្រង់ចេញពីទឹកទាន់ពេលវេលាផងដែរ។ នេះបើតាមការចេញផ្សាយដោយសារព័ត៌មាន Russian Today នៅព្រឹកថ្ងៃចន្ទ ទី២៦ ខែមិថុនា ឆ្នាំ២០១៧។
ទោះបីយ៉ាងណាអាជ្ញាធរពុំទាន់បញ្ជាក់ពីមូលហេតុដែលបណ្ដាលឱ្យទូកដឹកភ្ញៀវទេសចរនេះលិចនៅឡើយទេ៕
រាជធានីភ្នំពេញ ៖ សម្តេច ហ៊ុន សែន បានរម្លឹកជាថ្មីទៀតថា មន្ត្រីជាអ្នកបម្រើប្រជាជន មិនមែនចៅហ្វាយនាយ ប្រជាពលរដ្ឋទេ ស្ថានភាពនេះដែលសម្តេចតែងតែដាស់តឿន ឲ្យមន្ត្រីទាំងអស់ ធ្វើការដោយភាពស្មោះត្រង់ ត្រូវធ្វើម៉េចឲ្យចៅហ្វាយនាយពេញចិត្ត ហើយទ្រឹស្ដីនេះមិនមែនទ្រឹស្ដីដាច់ដោយឡែក របស់មន្ត្រីនោះទេ តែក្រុមហ៊ុនមួយចំនួន ក៏គេអនុវត្តអីចឹងដែរ។
សម្តេច ហ៊ុន សែន បានបញ្ជាក់ថា រឿងប្ដីសក្តិបី ប្រពន្ធសក្តិ៤ កូនសក្តិ៥នេះ ជារឿងដែលខ្ញុំស្អប់ណាស់ខណដែល ពាក្យខ្មែរសំណាបយោងដី ស្រីយោងប្រុស មានភរិយាជួយកិច្ចការប្ដី ក្នុងកិច្ចការមនុស្សធម៌មិនមែនលូកលាន់ កិច្ចការប្ដីមិនមែនត្រីមួយត្រកស្អុយមួយ ស្អុយទាំងអស់នោះទេ ។ សម្តេចបន្តថា ករណីដូចលោក ឌួង ឆាយ ដែលជាកូន ឌួង ងៀប បានក្លាយទៅជាអ្នកមនុស្សធម៌មួយរូប ប៉ុន្តែរឿងប្រវត្តិ ឌួង ឆាយ មិនតូចតាចទេកន្លងទៅ ហើយខ្ញុំបានទូរសព្ទទៅ ឌួង ងៀប ឲ្យកូនចូលមកដោះស្រាយ តាមផ្លូវច្បាប់ និងទី២លាក់កូនទៅ ឥឡូវ ងៀប អរគុណខ្ញុំ អ្នកធ្វើខុសត្រូវដាក់ទោស តាមច្បាប់ដើម្បីយុត្តិធម៌ ។ ឥឡូវនេះ ឌួង ឆាយ ក្លាយទៅជាអ្នកធ្វើកិច្ចការងារ មនុស្សធម៌ដ៏ល្អ យើងមិនត្រូវទម្រើសកូនទេ ។
សម្តេចនាយករដ្ឋមន្ត្រីក៏បានលើកឡើងនូវពាក្យខ្មែរដែលមានន័យថា ទទួលខុសត្រូវដែលពាក្យនេះមានន័យថា ទទួលទាំងខុសទាំងត្រូវ កុំស្រវ៉ាយកត្រូវ អាខុសច្រានចោលនោះទេ ត្រូវទទួលអស់ លើលោកនេះគ្មាន អ្នកណាល្អឥតខ្ចោះទេ តែយើងត្រូវមើល ខុសច្រើនជាង ឬត្រូវច្រើនជាង យើងត្រូវហ៊ានប្រឈម ជាមួយកិច្ចការនោះ កុំគិតថាជោគជ័យជារបស់យើង អាមិនជោគជ័យទម្លាក់ឲ្យគេ ៕
រាជធានីភ្នំពេញ ៖ គ.ជ.ប បានប្រកាសលទ្ធផលផ្លូវការ នៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ ឆ្នាំ២០១៧ លទ្ធផលផ្លូវការបានបង្ហាញថា គណបក្សប្រជាជនកម្ពុជាទទួលបាន ចៅសង្កាត់-មេឃុំ ចំនួន១១៥៦ ចំណែកគណបក្សសង្គ្រោះជាតិទទួលបានចៅសង្កាត់-មេឃុំ ចំនួន៤៨៩។ សូមមើលតារាងលទ្ធផលផ្លូវការពីគ.ជ.ប៕
ប៉ាគីស្ថាន ៖ យ៉ាងហោចណាស់មានមនុស្ស១៤៨នាក់បានស្លាប់ និងមនុស្សជាង១០០នាក់ផ្សេងទៀតរង របួសក្នុងហេតុការណ៍គ្រោះថ្នាក់ផ្ទុះរថយន្តដឹកប្រេង ក្នុងប្រទេសប៉ាគីស្ថាន។ នេះបើយោងតាមទីភ្នាក់ងារព័ត៌មាន CNN។
អាជ្ញាធរប៉ាគីស្ថានបានឲ្យដឹងថា ហេតុការណ៍ដ៏សាហាវនេះកើតឡើងនៅតំបន់ Baahawalpur ភាគខាងកើត ប្រទេសប៉ាគីស្ថាន ក្នុងខេត្ត Punjab នៅវេលាម៉ោង៦ និង៣០នាទីព្រឹកថ្ងៃទី២៥ ខែមិថុនា ឆ្នាំ២០១៧នេះ (ម៉ោងនៅក្នុងតំបន់)។ អាជ្ញាធរបន្តថា ក្នុងចំណោមមនុស្សជាង១០០នាក់ដែលរងរបួស មានជាង៣០នាក់រងរបួសធ្ងន់។ អាជ្ញាធរបានបញ្ជាក់ថា ហេតុការណ៍ផ្ទុះនេះដោយសារ រថយន្តដឹកប្រេង កំពុងបើកបរលើផ្លូវជាតិធំមួយ និងកំពុងមានចរាចរណ៍ច្រើនធ្វើដំណើរទៅមក, បានក្រឡាប់បណ្តាឲ្យផ្ទុះឆាបឆេះ រាលដាលដល់រថយន្ត និងម៉ូតូដទៃទៀតធ្វើឲ្យមនុស្សជាច្រើននាក់បានស្លាប់៕
ដោយ ៖ ប៉ែន សុផល
ខេត្តបាត់ដំបង ៖ សមត្ថកិច្ចបានអោយដឹងថា គ្រាប់ចំនួន២៦៣គ្រាប់ត្រូវបានពលរដ្ឋប្រទះឃើញនៅក្នុងដីខណះពេលដែលពួកគាត់កំពុងខួងរណ្តៅដាំជន្លង់ម្រេច ដែលហេតុការណ៍ខាងលើនេះបានកើតឡើងនៅវេលាម៉ោង១៣.៤៥ នាទីថ្ងៃទី២៥ ខែមិថុនា ឆ្នាំ២០១៧នៅចំណុច ចំការអូរចោតស្ថិតក្នុងភូមិស៊ុង១ ឃុំស៊ុង ស្រុកសំឡូត ខេត្តបាត់ដំបង។
សមត្ថកិច្ចបានបញ្ជាក់អោយដឹងថា គ្រាប់ទាំងចំនួន២៦៣គ្រាប់រួមមានដូចខាងក្រោម ៖ ១.គ្រាប់៨២mmចំនួន១១៣គ្រាប់ ២.គ្រាប់៦០mmចំនួន១៤៥គ្រាប់ ៣.បេ៤០ ចំនួន១គ្រាប់ ៤.គ្រាប់ដេកា៨២mmចំនួន១គ្រាប់ ៥.គ្រាប់បែកដៃចំនួន៣គ្រាប់។ សមត្ថកិច្ចបានបញ្ជាក់ទៀតថា គ្រាប់ទាំងអស់ដែលប្រទះឃើញនៅពេលនេះគឺជាគ្រាប់ដែលសេះសល់កាលពីសម័យសង្គ្រាមហើយត្រូវបានគេយកមកកប់ទុកចោលនៅក្នុងដី។
បច្ចុប្បន្នគ្រាប់ទាំងអស់នេះត្រូវបានសមត្ថកិច្ចជំនាញគាស់យករក្សាទុកនៅទីមានសុវត្ថភាពហើយខាងរដ្ឋបាលស្រុកបានទំនាក់ទំនងទៅអង្គភាពស៊ីម៉ាក់រួចហើយដើម្បីអោយចុះមកពិនិត្យមើលគុណភាពគ្រាប់់នឹងយកទៅធ្វើការដុតកំទេចចោល៕
ដោយ ៖ ប៉ែន សុផល
ខេត្តបាត់ដំបង ៖ កម្លាំងក្រុមបង្កាបង្ក្រាបនៃស្នងការដ្ឋាននគរបាលខេត្តបាត់ដំបងបានចុះប្រតិបត្តិការបង្ក្រាបឃាត់ខ្លួនជនសង្ស័យម្នាក់បន្ទាប់ពីជិះម៉ូតូធ្វើសកម្មភាពឆក់កាបូបស្ត្រីម្នាក់បានសម្រេច។
សមត្ថកិច្ចបានអោយដឹងថា ក្នុងកិច្ចប្រតិបត្តិការបង្ក្រាបឃាត់ខ្លួនទៅជនសង្ស័យរូបនេះបានធ្វើឡើងនៅវេលាម៉ោង១៧ និង៤៥នាទី ថ្ងៃទី២៥ ខែមិថុនា ឆ្នាំ២០១៧នៅចំណុចភូមិរំចេក៣ សង្កាត់រតនៈ ក្រុងបាត់ដំបង។
ជនសង្ស័យត្រូវបានឃាត់ខ្លួនឈ្មោះ សុះ ឆៃយ៉ា ភេទប្រុស អាយុ ២៩ ឆ្នាំ មានទីលំនៅភូមិ ហប់ ឃុំហប់ ស្រុកគាស់ក្រឡ ខេត្តបាត់ដំបងបានជិះម៉ូតូមួយគ្រឿងម៉ាក វេវអាល់ហ្វា ពណ៌ខ្មៅ ពាក់ស្លាកលេខ បាត់ដំបង1Q6091ធ្វើសកម្មភាពឆក់កាបូបស្ពាយពីស្ត្រីម្នាក់ ឈ្មោះ ស្វាយ វិវឌ្ឍនៈ ភេទស្រី អាយុ២៣ឆ្នាំមានទីលំនៅភូមិកម្មករ សង្កាត់ស្វាយប៉ោ ក្រុងបាត់ដំបងខណៈស្ត្រីរងគ្រោះកំពុងជិះម៉ូតូនៅចំណុចមុខបញ្ជាការដ្ឋានយោធាភូមិភាគ៥ នៅវេលាម៉ោង១៦ និង០០នាទី។
ដកហូតកាបូបបានក្នុងកាបូបនោះមានកាបូបដាក់លុយចំនួន១និងទូរស័ព្ទដៃម៉ាក iphone 6plusចំនួន១គ្រឿងនឹងបានប្រគល់អោយទៅម្ចាស់ដើមវិញ ចំណែកជនសង្ស័យត្រូវបាន ក្រុម បង្ការបង្ក្រាបប្រគល់ឲ្យទៅការិយាល័យជំនាញដើម្បីចាត់ការបន្តទៅតាមនីតិវិធី៕
រាជធានីភ្នំពេញ ៖ សម្តេច ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានថ្លែងថា ក្នុងរយះពេលនៃយុទ្ធនាការបង្ក្រាបគ្រឿងញៀនទូទាំងប្រទេស គឺសមត្ថកិច្ចបានចាប់ឧក្រិដ្ឋជនគ្រឿងញៀនប្រមាណជាង៥០០នាក់ ហើយនោះជាជោគជ័យសម្រាប់យុទ្ធនាការដំណាក់កាលទី១ផងដែរ ។
ការថ្លែងបែបនោះធ្វើឡើងក្នុងឱកាស សម្តេច ស ខេង ចូលរួមនៅក្នុងពិធី ប្រកាសតែងតាំងអភិបាលខេត្តកោះកុងថ្មីគឺលោកស្រី មិថុនា ភូថង, កាលពីព្រឹកថ្ងៃទី២៣ ខែមិថុនា ឆ្នាំ២០១៧នៅទីរួមខេត្តកោះកុង ។
ផ្តើមពីនោះសម្តេច ស ខេង ក៏បានស្នើដល់ សមត្ថកិច្ចខេត្តកោះកុង ក៏ដូចជាសមត្ថកិច្ច នៅទូទាំងប្រទេស ធ្វើយ៉ាងណាបន្តសកម្មភាពបង្ក្រាបគ្រឿងញៀននេះ ឱ្យមានប្រសិទ្ធភាពដើម្បីប្រយោជន៍សង្គមទាំងមូល ។ សម្តេចក៏បានប្រកាសថា កម្ពុជានឹងបន្តយុទ្ធនាការបង្ក្រាបគ្រឿងញៀន ដំណាក់កាលទី២ថែមទៀត ដែលនឹងចាប់ផ្តើមពី ថ្ងៃទី១ ខែសីហា រហូតដល់ ថ្ងៃទី៣១ ខែធ្នូ ឆ្នាំ២០១៧ ខាងមុខនេះ ៕
រាជធានីភ្នំពេញ ៖ បុរសម្នាក់ត្រូវបានដាច់ខ្លួនជា២កំណាត់ ចេញពោះវៀនស្លាប់យ៉ាងអាណោចអាធ័មនៅកន្លែងនឹងកន្លែង ក្នុងហេតុការណ៍គ្រោះថ្នាក់ចរាចរណ៍ រវាងរថយន្ដកូរ៉េ២តោនកន្លះបុកជាមួយគោយន្ដកន្ដ្រៃយ៍។ ហេតុការណ៍នេះកើតឡើងនៅយប់ថ្ងៃទី២៣ ខែមិថុនា ឆ្នាំ២០១៧ ត្រង់ចំណុចមុខខ្លោងទ្វារវត្តពូនភ្នំលើ ផ្លូវទំនប់កប់ស្រូវ ភូមិត្រពាំងពោធិ៍ សង្កាត់គោករកា ខណ្ឌព្រែកព្នៅ។
សមត្ថកិច្ចមូលដ្ឋានបានឲ្យដឹងថា ក្នុងហេតុការណ៍នេះរថយន្ដកូរ៉េ២តោនកន្លះ បើកបរស្របទិសគ្នាពីកើតទៅលិច ជាមួយគោយន្ដកន្រៃ្តយ៍ម៉ាក KUBOTA លុះដល់ចំណុចកើតហេតុរថយន្ដនោះបត់ ស្រាប់តែបុកកិនគោយន្ដតែម្ដង។ សមត្ថកិច្ចបញ្ជាក់ថា ជនរងគ្រោះម្ចាស់គោយន្ដកន្ដ្រៃយ៍ ដែលស្លាប់ ឈ្មោះ អ៊ិន ឃីម អាយុ៤៥ឆ្នាំ ស្នាក់នៅភូមិទួលដំណាក់ ឃុំចុងដូង ស្រុកបារាយណ៍ ខេត្តកំពង់ធំ។
ក្រោយកើតភ្លាមៗ ម្ចាស់រថយន្ដបានបើករត់គេចខ្លួនបាត់ស្រមោលតែម្ដង ដោយបន្សល់ទុកតែគោយន្ដ និងម្ចាស់ស្លាប់នៅកន្លែងតែប៉ុណ្ណោះ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
