សៀរ៉ាឡេអូ ៖ មនុស្សជិត៤០០នាក់បានស្លាប់ និង៦០០នាក់ផ្សេងទតៀកំពុងបាត់ខ្លួនដោយសារគ្រោះរអិលបាក់ដី និងទឹកជំនន់នៅតំបន់ ភ្នំ រីជែន ស្ថិតនៅក្បែររដ្ឋធានីហ្វ្រីថោន នៃប្រទេសស្ថិតនៅក្នុង សៀរ៉ាឡេអូ ដែលកើតឡើងកើតតាំងពីសប្តាហ៍មុន។ នេះបើតាមទីភ្នាក់ងារសារព័ត៌មានចិន ស៊ីនហួរ។
តាមអាជ្ញាធរនៅក្នុងតំបន់ភ្នំរីជែនបានិយាយថា ភ្លៀងធ្លាក់បានបង្កជាការរអិលបាក់អី និងទឹកជំនន់យ៉ាងគំហុក បណ្ដាលឱ្យផ្ទះជាច្រើនខ្នងត្រូវកប់នៅក្រោមគំនរភក់។ អាជ្ញាធរបន្តថា ក្រុមអ្នកជួយសង្គ្រោះ រួមទាំងយោធាជាច្រើននាក់បាន និងកំពុងបន្តធ្វើប្រតិបត្តិការស្វែងរកប្រជាជនដែលបាត់ខ្លួនសរុប ៦០០នាក់ ដែលត្រូវបានគេជឿជាក់ថា ចំនួនអ្នកសា្លប់អាចនឹងកើនឡើងច្រើនជាងចំនួនខាងលើនេះ៕
ភ្នំពេញ ៖ លោក ឃួង ស្រេង បានស្នើដល់រដ្ឋបាលខណ្ឌទាំង១២ ត្រូវត្រួតពិនិត្យទីតាំងកុងស៊ីបញ្ចាំ ដែលគ្មានច្បាប់អនុញ្ញាត ត្រូវចាត់វិធានការ ណែនាំឲ្យម្ចាស់អាជីវកម្ម ត្រូវបញ្ឈប់ បិទកុងស៊ីបញ្ចាំ ដែលគ្មានច្បាប់អនុញ្ញាត ត្រូវចាត់វិធានការបិទភ្លាម និងណែនាំឲ្យម្ចាស់អាជីវកម្មត្រូវបញ្ឈប់ជាបន្ទាន់ ឬ ទៅសុំច្បាប់សាជាថ្មី ដោយមន្ត្រីទាំងអស់ អនុវត្តការងារនេះឱ្យបានម៉ឺងម៉ាត់ជាទីបំផុត ។
លោក ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ បានលើកឡើងបែបនេះក្នុងពេលលោកដឹកនាំកិច្ចប្រជុំ ស្តីពី ការធ្វើឲ្យមានវឌ្ឍនភាព នៃការតម្លើងកាម៉េរាសុវត្ថិភាព ក្នុងរាជធានីភ្នំពេញ ដែលមានការចូលរួមពីលោកអភិបាលខណ្ឌទាំង១២និងប្រធានមន្ទីរជំនាញជាមួយតំណាងក្រុមហ៊ុនឯកជនទាំងពីរខាងលើកាលពីព្រឹកថ្ងៃទី១៦ខែសីហាឆ្នាំ២០១៧នៅរដ្ឋបាលរាជធានីភ្នំពេញ។
លោកអភិបាលបញ្ជាក់ទៀតថា ក្នុងករណីដែលមិនព្រមស្តាប់តាមការណាំនាំទេ អភិបាលខណ្ឌខ្លួនឯងត្រូវមានវិធានការរដ្ឋបាល បិទទីតាំងកុងស៊ីបញ្ចាំនោះតែម្តង។ ដូចគ្នានេះដែរបើទោះជាទីតាំងហាងបញ្ចាំ ឬ ក៏កុងស៊ីបញ្ចាំ មានច្បាប់ក៏ដោយ ត្រូវធ្វើការត្រួតពិនិត្យផងដែរ ដើម្បីអោយដឹងថា ការអនុវត្តច្បាប់លើកុងស៊ីបញ្ចាំ នេះមានលក្ខណគ្រប់ជ្រុងជ្រោយហើយឬនៅ? ។
លោកអភិបាលបានលើកជាឧទារណ៍ ចំពោះកុងស៊ីរបស់ពួកគាត់មានច្បាប់អនុញ្ញាតត្រឹមត្រូវ ក្នុងការប្រកបអាជីវកម្មបញ្ចាំ ប៉ុន្តែមានករណីយករបស់របរ រថយន្ត ម៉ូតូ ដោយគ្មានលិខិតស្នាមបញ្ជាក់អំពីភាពជាម្ចាស់ទ្រព្យសម្បត្តិទាំងអស់នេះ ដោយកុងស៊ីមួយចំនួនក៏ទទួលយកដែរ ។ បញ្ហានេះជាការបង្ហាញអំពីការមិនទទួលខុសត្រូវចូលរួមថែរក្សាសន្តិសុខសណ្តាប់ធ្នាប់ក្នុងសង្គម ដូចជាករណីចោរលួច ចោរប្លន់ ក្រោយពេលធ្វើសកម្មភាពបានហើយ គឺមិនមានឯកសារលើទ្រព្យសម្បត្តិនោះទេ ហើយកុងស៊ីទាំងអស់នោះហើយ គឺជាអ្នករកស៊ីទទួលបញ្ចាំនិងទិញផលចោរកម្មនេះ ។
យ៉ាងណាលោកអភិបាលរាជធានី បានសង្កត់ធ្ងន់ចំពោះរដ្ឋបាលខណ្ឌទាំងអស់ ត្រូវលុបបំបាត់ និងធ្វើការងារនេះឲ្យបានស្អាត ក្នុងរយៈពេលយ៉ាងយូរ២សប្តាហ៍ ហើយការកំណត់ រយៈពេល២សប្តាហ៍នេះ គឺដើម្បីឲ្យខណ្ឌទាំង១២ ចាត់តាំងអនុវត្តន៍ ទៅលើការងារកុងស៊ីបញ្ចាំនេះ ឲ្យមានប្រសិទ្ធភាព និងចៀសឲ្យបាននិងបញ្ឈប់វប្បធម៌អន្តរាគមន៍។
សូមបញ្ជាក់ផងដែរថា ក្រោពីមានបទបញ្ជានេះ មានហាងបញ្ចាំខ្លះ រត់គេចដោយដឹកម៉ូតូចេញទៅខណ្ឌក្រៅក្រុង ប៉ុន្តែត្រូវបាន លោក ឃួង បញ្ជាភ្លាមដល់អភិបាលខណ្ឌទាំងអស់ ត្រូវតែតាមចាប់ឲ្យបានទាំងម្ចាស់ និងអ្នកនៅពីក្រោយខ្នង ។ អនុវត្តតាមការណែនាំនេះ នៅព្រឹកថ្ងៃទី១៦ ខែសីហានេះ អាជ្ញាធរខណ្ឌទួលគោក ដឹកនាំដោយ លោក ប៉ាង លីដា អភិបាលខណ្ឌ បានចុះឆែកឆេរ និងត្រួតពិនិត្យហាងបញ្ចាំក្នុងមូលដ្ឋាន បានរកឃើញម៉ូតូគ្មានលិខិតស្នាមត្រឹមត្រូវចំនួន៤២គ្រឿង បញ្ជូនទៅប៉ូលីសក្រុង ហើយកុងស៊ីដែលមិនមានច្បាប់អនុញ្ញាតិក៏ត្រូវបានបិទអាជីវកម្មបណ្តោះអាសន្នផងដែរ។
ដោយឡែកខណ្ឌសែនសុខ ដឹកនាំដោយ លោក ប៉ឹល កុសល អភិបាល បានបង្កើតគណៈកម្មការចំរុះចុះឆែកឆេ ឃ្លាំងរក្សាទុកនូវម៉ូតូនិងរថយន្ត របស់ហាងទទួលដាក់បញ្ចាំ ឬហៅថា”កុងស៊ី”មួយកន្លែង រកឃើញម៉ូតូនិងឡាន៨៤គ្រឿង នៅភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ ដែលគេសង្ស័យថា មិនស្របច្បាប់ ឬ អាចមានការពាក់ព័ន្ឋទទួលផលចោរកម្ម។
ក្នុងប្រតិបត្តិការឆែកឆេនេះដែរ សមត្ថកិច្ចបានរកឃើញម៉ូតូគ្រប់ប្រភេទនិងស៊េរីទំនើបចំនួន៧៤គ្រឿង និងរថយន្តចំនួន១០គ្រឿងទៀត ដែលក្នុងចំណោមនោះ គេរកឃើញមានម៉ូតូចំនួន៥១គ្រឿង គ្មានផ្លាកលេខនិងឯកសារគ្រប់គ្រាន់ ចំណែកឯរថយន្ត១០គ្រឿងមានឯកសារគ្រប់គ្រាន់ចំនួន២គ្រឿង។ ក្រៅពីនេះកម្លាំងមានសមត្ថកិច្ចតាមខណ្ឌនីមួយៗ កំពុងបន្ត អនុវត្តបទបញ្ជានេះនៅក្នុងមូលដ្ឋានរបស់ខ្លួនរៀងៗខ្លួនដោយមិនរារែកនោះឡើយ៕
ខេត្តកណ្តាល ៖ កាលពីការប្រឡងសញ្ញបត្រមធ្យមសិក្សាទុតិយភូមិឆ្នាំ២០១៦កន្លងទៅស្រុកលើកដែក ខេត្តកណ្តាលមានសិស្សដែលបានប្រឡងជាប់ក្នុងអត្រា ៥៣,៨៧% តែសម្រាប់ឆ្នាំ២០១៧នេះ ការិយាល័យអប់រំស្រុកមានជំនឿថា អត្រានៃការប្រឡងជាប់របស់សិស្សអាចកើនខ្ពស់ជាងឆ្នាំ ទៅមិញ ដោយហេតុថាបេក្ខជហាក់មានការត្រៀមលក្ខណៈគ្រប់គ្រាន់ ពិសេសពួកគេទទួល បានការរៀនបំប៉នបន្ថែមពិសេសចាប់តាំងពីខែកុម្ភៈរហូតដល់ខែសីហានេះ។
ប្រធានការិយាល័យអប់រំ យុវជន និងកីឡាស្រុកលើកដែក ខេត្តកណ្តាល លោក រុន ប៉ូលី ក្នុងពិធីចែករង្វាន់ជ័យលាភីសិស្សពូកែថ្នាក់ទី៩ និងថ្នាក់ទី១២ និងពិធីសំណេះសំណាល ជាមួយសិស្សថ្នាក់ទី១២ ត្រៀមប្រឡងសញ្ញបត្រមធ្យមសិក្សាទុតិយភូមិនៅស្រុកលើកដែក ព្រឹកថ្ងៃទី១៦ ខែសីហា ឆ្នាំ២០១៧ ក្រោមអធិបតីភាពលោក ហេង រតនា ប្រតិភូរាជរដ្ឋាភិ បាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា(CMAC) និងជា ប្រធានក្រុមការងារថ្នាក់ជាតិចុះជួយស្រុកលើកដែកបានឲ្យដឹងថានៅទូទាំងស្រុកមានសិស្សត្រូវប្រឡងសញ្ញបត្រមធ្យមសិក្សាទុតិយភូមិសរុបចំនួន ២៧៧នាក់(ស្រី ១៤៧នាក់)។ លោក ថា សម្រាប់ការប្រឡងនេះបេក្ខជនហាក់បីមានការត្រៀមលក្ខណៈគ្រប់គ្រាន់អស់ហើយ ដោយ ពួកគេបានទទួលការបំប៉នបន្ថែមពិសេសរយៈពេល ២០សប្តាហ៍ចាប់ពីខែកុម្ភៈដល់ខែសីហា នេះ ដែលនាំឲ្យការិយាល័យអប់រំស្រុកមានជំនឿថាឆ្នាំនេះសិស្សថ្នាក់ទី១២ នៅស្រុកលើក ដែកអាចនឹងប្រឡងជាប់ក្នុងអត្រាខ្ពស់ជាងឆ្នាំមុន។
លោក ហេង រតនា មានប្រសាសន៍ថា ការប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី២១ ខែសីហាខាងមុខនេះ គឺជាម៉ែត្រសម្រាប់វាស់ស្ទង់សមត្ថភាពរបស់ក្មួយៗសិស្ស ថ្នាក់ទី១២ផង និងជាការបើកផ្លូវឲ្យក្មួយៗបន្តការសិក្សានៅថ្នាក់មហាវិទ្យាល័យផងនេះបើ
ក្មួយៗប្រឡងជាប់។ លោកបានបញ្ជាក់ថា នៅពេលនេះប្រទេសជាតិមានសុខសន្តិភាព មានការអភិវឌ្ឍ ជីវភាពគ្រួសាររបស់ប្រជាពលរដ្ឋមានភាពប្រសើរឡើង ក្មួយៗជាកុមារ និង យុវជនមានពេលវេលាគ្រាប់គ្រាន់ក្នុងការសិក្សារៀនសូត្រ ហើយថាក្នុងវ័យសិក្សា និងជាអ្នក កំពុងសិក្សាក្មួយៗត្រូវផ្ចង់ស្មារតីទៅលើការសិក្សាឲ្យបានច្រើនជាងបញ្ហាអ្វីៗផ្សេងទៀតនោះ ទើបជាការជោគជ័យ។
ប្រតិភូរាជរដ្ឋាភិបាល ហេង រតនា បានលើកឡើងពីការកែទម្រង់ស៊ីជម្រៅ របស់រាជរដ្ឋាភិបាលនៅក្នុងវិស័យអប់រំដើម្បីពង្រឹងគុណភាពអប់រំ ពង្រឹងគុណភាពនៃការ កសាងធនធានមនុស្ស ពិសេសការរឹតបន្តឹងនៅក្នុងការប្រឡងសមដូចក្រសួងអប់រំ យុវជន និងកីឡាបានបញ្ជាក់ច្បាស់ៗថា ចេះជាប់ មានន័យថា ចេះគឺប្រឡងជាប់៕
តេហេរ៉ង់ ៖ ប្រធានាធិបតីអ៊ីរ៉ង់ លោក ហាស្សាន រូហានី កាលពីម្សិលមិញបាននិយាយថា នឹងដើរចេញពីកិច្ចព្រមព្រៀងនុយក្លេអ៊ែរ ដែលត្រូវបានចុះហត្ថលេខាជាមួយបណ្តាប្រទេសមហាអំណាចពិភពលោក កាលពីឆ្នាំ២០១៥ បើអាមេរិក នៅតែបន្តដាក់ទណ្ឌកម្មថ្មីជាបន្តបន្ទាប់ទៀតនោះ។ នេះបើតាមទីភ្នាក់ងារព័ត៌មានចិន ស៊ីនហួរ។
លោក Rouhani បានព្រមានថា អ៊ីរ៉ង់បានត្រៀមចិត្តត្រៀមកាយរួចជាស្រេច ដើម្បីចាកចេញពីកិច្ចព្រមព្រៀងឆ្នាំ២០១៥ ដែលប៉ុន្មានឆ្នាំកន្លងទៅនេះ បានជួយដកទណ្ឌកម្មអន្តរជាតិជាច្រើន ចេញពីទីក្រុងតេហេរ៉ង់ ជាថ្នូរនឹងការបញ្ឈប់កម្មវិធីអាវុធនុយក្លេអ៊ែរ។ លោកប្រធានាធិបតីអ៊ីរ៉ង់បានបន្ថែមថា អ៊ីរ៉ង់ ពិតជាចង់នៅបន្តគោរពតាមកិច្ចព្រមព្រៀងឆ្នាំ២០១៥នេះ ដែលរូបលោកបានចាត់ទុកជា គំរូនៃភាពជោគជ័យមួយ សម្រាប់សន្តិភាព និងការទូតទៅលើសង្គ្រាម និងឯកតោភាគីនិយម ក៏ប៉ុន្តែវាពុំមែនជាជម្រើសតែមួយគត់នោះឡើយ។ លោក Rouhani បានបន្តថា «លោក ដូណាល់ ត្រាំ បានស្តែងឲ្យឃើញថា លោកពុំអាចធ្វើជាដៃគូគួរឲ្យចិត្តបាន មិនត្រឹមសម្រាប់អ៊ីរ៉ង់ប៉ុណ្ណោះទេ តែសម្រាប់សម្ព័ន្ធមិត្តរបស់សហរដ្ឋអាមេរិកថែមទៀតផង»។
គួរបញ្ជាក់ថា ការអត្ថាធិប្បាយរបស់ លោក Hassan Rouhani ត្រូវបានធ្វើឡើង ស្របពេលដែលកិច្ចព្រមព្រៀងនុយក្លេអ៊ែររវាងអ៊ីរ៉ង់ និងមហាអំណាចពិភពលោក ៥+១ គឺសមាជិកអចិន្ត្រៃយ៍នៃក្រុមប្រឹក្សាសន្តិសុខ នៃអង្គការសហប្រជាជាតិរួមមាន ចិន បារាំង រុស្ស៊ី ចក្រភពអង់គ្លេស សហរដ្ឋអាមេរិក បូកជាមួយនិងអាល្លឺម៉ង់ កំពុងតែមានសម្ពាធកើនឡើង៕
ហ្សាការតា ៖ ប៉ូលិសឥណ្ឌូនេស៊ីកាលពីម្សិលមិញបានឃាត់ខ្លួនមនុស្ស០៥នាក់ ដោយសង្ស័យជាប់ពាក់ព័ន្ធនឹងពួក ISIS និងរឹបអូសសារធាតុគីមីមួយចំនួននៅក្បែររដ្ឋធានីហ្សាការតា ដែលគ្រោងយកទៅប្រើប្រាស់ដើម្បីផលិតជាគ្រាប់បែកវាយប្រហារលើ វិមានប្រធានាធិបតីនៅចុងខែសីហានេះ។ នេះបើយោងតាមទីភ្នាក់ងារសារព័ត៌មាន Reuters។
ប៉ូលិសបាននិយាយថា ក្នុងចំណោមមនុស្សទាំង០៥នាក់ខាងលើ មានពីរនាក់ជាប្ដីប្រពន្ធនឹងគ្នាត្រូវបានគេនិទេសពីទីក្រុងហុងកុង សម្រាប់ការចោទប្រកាន់ថា បានផ្សព្វផ្សាយ មនោគមវិជ្ជាជ្រុលនិយម ហើយក្រុមមនុស្សទាំងនេះទៀតសោតបានសិក្សារៀនសូត្រពីបច្ចេកទេស ផលិតគ្រាប់បែកតាមរយៈគេហទំព័រមួយគ្រប់គ្រងដោយជនជាតិឥណ្ឌូនេស៊ីម្នាក់ ដែលគេសង្ស័យថា មានទំនាក់ទំនងជាមួយពួក ISIS នៅក្នុងប្រទេសស៊ីរី។
តែយ៉ាងណាក៏ដោយ អត្តសញ្ញាជនសង្ស័យ មិនទាន់ត្រូវបានបញ្ជាក់លម្អិតនៅឡើយទេ ខណៈអាជ្ញាធរឥណ្ឌូនេស៊ី កំពុងព្រួយបារម្ភលើការកើនឡើង នៃសកម្មភាពជ្រុលនិយមនៅក្នុងប្រទេស នារយៈពេលប៉ុន្មានឆ្នាំចុងក្រោយនេះ៕
ភ្នំពេញ ៖ លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត(គ.ជ.ប) បានបង្ហាញក្ដី សង្ឃឹម ថា ភាគីពាក់ព័ន្ធនឹងការបោះឆ្នោតទាំងអស់ នឹងបន្តចូលរួមជាមួយគ.ជ.ប ក្នុងការរៀបចំការ បោះឆ្នោតជ្រើសតាំងតំណាងរាស្ដ្រនីតិកាលទី៦ ឆ្នាំ២០១៨ខាងមុខទៀត ខណៈដែលការបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្ដិទី៤ កាលពីថ្ងៃទី៤ ខែមិថុនា ឆ្នាំ២០១៧កន្លងទៅនេះ បាន ប្រព្រឹត្ដទៅដោយជោគជ័យ។
ក្នុងកិច្ចប្រជុំផ្សព្វផ្សាយប្រតិទិន នៃការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោត ឆ្នាំ ២០១៧ នាព្រឹកថ្ងៃទី១៥ ខែសីហានេះ ឯកឧត្ដមស៊ិក ប៊ុនហុក ប្រធានគ.ជ.ប បានលើកឡើង ថា ការ បោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្ដិទី៤ កាលពីថ្ងៃទី៤ ខែមិថុនា ឆ្នាំ២០១៧កន្លងទៅ នេះ បានប្រព្រឹត្ដទៅដោយជោគជ័យ ក៏ព្រោះតែមានការចូលរួមយ៉ាង សកម្មពីគ្រប់ភាគីពាក់ព័ន្ធទាំង អស់ ដូចជា៖គណបក្សនយោបាយ,អង្គការមិនមែនរដ្ឋាភិបាលជាតិ-អន្ដរជាតិ,តំណាងក្រសួង-ស្ថាប័ន នានា ក៏ដូចជាអ្នកសារព័ត៌មានផងដែរ។ ក្នុងនោះឯកឧត្ដមសង្ឃឹម ថា ភាគីពាក់ព័ន្ធនឹងការបោះឆ្នោត ទាំងអស់ នឹងបន្ដចូលរួមជាមួយគ.ជ.ប ក្នុងការរៀបចំការបោះឆ្នោតជ្រើសតាំងតំណាងរាស្ដ្រនីតិកាល ទី៦ ឆ្នាំ២០១៨បន្ដទៀត។
លោក ស៊ិក ប៊ុនហុក ប្រធានគ.ជ.ប បានឲ្យដឹង ថា នាថ្ងៃនេះគឺលើកទី១ ដែល គ.ជ.ប ជួបជុំជាមួយ ភាគីពាក់ព័ន្ធ ដើម្បីប្រកាសផ្សព្វផ្សាយប្រតិទិននៃការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះ បោះឆ្នោតឆ្នាំ២០១៧ និងដើម្បីផ្សព្វផ្សាយស្ថិតិប្រជាពលរដ្ឋ ក៏ដូចជាចំនួនការិយាល័យបោះឆ្នោតប៉ាន់ ស្មាន សម្រាប់បម្រើឲ្យការរបោះឆ្នោតជ្រើសតាំងតំណាងរាស្ដ្រនីតិកាលទី៦។
ក្នុងកម្មវិធីដដែលនេះឯកឧត្ដមស៊ិក ប៊ុនហុក បានអំពាវនាវដល់តំណាងអង្គការ មិនមែន រដ្ឋាភិបាលទាំ ងអស់ ដែលមានបំណងចង់ចូលរួមសង្កេតការណ៍ ដំណើរការចុះឈ្មោះបោះឆ្នោត សូមរួសរាន់ដាក់ ពាក្យនៅ គ.ជ.ប ចាប់ពីថ្ងៃទី១ ខែសីហា ឆ្នាំ២០១៧ ដល់ថ្ងៃទី១៤ ខែមករា ឆ្នាំ២០១៨។ ចំណែកគណ បក្សនយោបាយ ដែលចង់ដាក់ភ្នាក់ងារសង្កេតការណ៍ មើលដំណើរការចុះឈ្មោះបោះឆ្នោត ត្រូវដាក់ ពាក្យនៅក្រុមប្រឹក្សាឃុំ-សង្កាត់ ចាប់ពីថ្ងៃទី២៥ ខែសីហា ឆ្នាំ២០១៧ ដល់ទី១៤ ខែមករា ឆ្នាំ២០១៨៕
ភ្នំពេញ ៖ ដើម្បីពិភាក្សា និងសម្រេចលើកសំណើររបស់គណៈកម្មការទី៦ ព្រឹទ្ធសភា សុំដាក់សេចក្តីស្នើវិសោធនកម្មបទបញ្ជាផ្ទៃក្នុងព្រឹទ្ធសភា នៃព្រះរាជាណាចក្រកម្ពុជា ក្នុងរបៀបវារៈប្រជុំ វិសាសាមញ្ញព្រឹទ្ធសភានិតិកាលទី៣ អគ្គលេខាធិការព្រឹទ្ធសភាបានកំណត់យកថ្ងៃទី១៨ ខែសីហា ឆ្នាំ២០១៧ នេះ ដើម្បីបើកកិច្ចប្រជុំគណៈអចិន្ត្រៃយ៍ព្រឹទ្ធសភា ក្រោមអធិបតីយភាព ឯកឧត្តម នៃ ប៉េណា ប្រធានស្តីទីព្រឹទ្ធសភា នៃព្រះរាជាណាចក្រកម្ពុជា។
យោងតាមសេចក្តីជូនដំណឹងរបស់អគ្គលេខាធិការព្រឹទ្ធសភា បានឱ្យដឹងនៅថ្ងៃនេះថា កិច្ចប្រជុំគណៈអចិន្ត្រៃយ៍លើកទី២នេះ នឹងលើកយកវបៀបវារៈសំខាន់ៗចំនួន៤មកពិភាក្សា និងសម្រេច ដែលក្នុងនោះមាន៖
១-ពិនិត្យនិងសម្រេចលើកសំណើររបស់គណៈកម្មការទី៦ព្រឹទ្ធសភាសុំដាក់សេចក្តីស្នើវិសោធនកម្មបទបញ្ជាផ្ទៃក្នុងព្រឹទ្ធសភានៃព្រះរាជាណាចក្រកម្ពុជាក្នុងរបៀបវារៈប្រជុំវិសាសាមញ្ញព្រឹទ្ធសភានិតិកាលទី៣។
២-អំពីនិតិវិធីបោះឆ្នោត ជ្រើសរើសបំពេញសមាជិក គណៈកម្មការទី១០ព្រឹទ្ធសភា។
៣- ពិនិត្យលើសំណើររបស់ សមាជិកព្រឹទ្ធសភា ស្នើសុំកោះប្រជុំព្រឹទ្ធសភាជាវិសាមញ្ញ។
៤-កំណត់របៀបវារៈនិងកាលបរិច្ឆេទប្រជុំវិសាមញ្ញ ព្រឹទ្ធសភា និតិតិកាលទី៣របស់ខ្លួន៕
ភ្នំពេញ ៖ ទោះបីយើងមិនទាន់អាចសម្រេចបាននូវការនាំអង្ករចេញ ១លានតោន គិតមកទល់ នឹង ពេលនេះក្តី តែយើងបានសម្រេចធ្វើឱ្យអង្ករកម្ពុជាត្រូវបានទទួលស្គាល់ជាអន្តរជាតិនៅ ឆ្នាំ២០១៥ ហើយផលិតផលស្រូវលើសពីសេចក្តីត្រូវការបានកើនឡើងដល់ប្រមាណ ៥លាន តោននៅក្នុងប៉ុន្មានឆ្នាំចុងក្រោយនេះ ដែលបានក្លាយជាប្រភពដ៏សំខាន់នៅក្នុងការធានាបាន នូវស្ថិរភាពនៃប្រភពស្រូវ ដើម្បីធ្វើការកែច្នៃសម្រាប់នាំអង្ករចេញ។ ទន្ទឹមនឹងនេះ ប្រព័ន្ធខ្សែ ចង្វាក់ស្រូវអង្ករកម្ពុជាក៏បានបង្កើតនូវស្ថានភាពមួយដែលតួអង្គពាក់ព័ន្ធទាំងអស់កាន់តែមាន ការយល់ដឹង និងសមត្ថភាពជំនាញ ដែលជាមូលដ្ឋានដ៏សំខាន់សម្រាប់ពង្រីកលទ្ធភាពនាំ ចេញរបស់កម្ពុជាទៅថ្ងៃមុខតាមរយៈការដោះស្រាយនូវបញ្ហាប្រឈមនានា និងពង្រឹងភាពទន់ ខ្សោយរបស់កម្ពុជានៅក្នុងប្រព័ន្ធខ្សែចង្វាក់កែច្នៃអង្ករទាំងមូល។
នេះជាការបញ្ជាក់របស់លោក វង្សី វិស្សុត រដ្ឋមន្ត្រីស្តីទីក្រសួងសេដ្ឋកិច្ច និងហិរញ្ញវត្ថុក្នុងសិក្ខាសាលាផ្សព្វផ្សាយអំពីយន្តការអន្តរាគមន៍របស់រាជរដ្ឋាភិបាលនៅក្នុងការប្រមូលទិញស្រូវ ដែលរៀបចំដោយគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ របស់រាជ រដ្ឋាភិបាលកាលពីថ្ងៃច័ន្ទដែលមានការចូលរួមពីផ្នែកពាក់ព័ន្ធនានា។ លោក រដ្ឋមន្ត្រីស្តីទីក៏បានគូសបញ្ជាក់ផងដែរថា ទោះបីកន្លងមកធាតុចូលនៃផលិតកម្មដូចជា ពូជ ជី ថ្នាំកសិកម្មជាដើមមានការឡើងថ្លៃក៏ពិតមែន តែថ្លៃស្រូវរបស់យើងនៅតែមានភាពប្រកួតប្រជែងធៀបនឹងប្រទេសជិតខាង ហើយគុណភាពទៀតសោតក៏ចាប់ផ្តើមកាន់តែប្រសើរឡើង ដោយសារកសិករភាគច្រើនចាប់ផ្តើមងាកទៅផលិតស្រូវក្រអូប,ការកើនឡើងនូវយន្តូបនីយកម្ម, ប្រព័ន្ធស្រោចស្រព, ការទទួលបានបច្ចេកទេសថ្មី, ការធ្លាក់ចុះថ្លៃដឹកជញ្ជូនក្នុងស្រុកខ្លះ រួមទាំងការធ្លាក់ចុះថ្លៃអគ្គិសនីទោះបីនៅខ្ពស់បន្តិចក្តី។
លោក វង្សី វិស្សុត ថា បញ្ហារបស់យើងគឺចាប់ពីការសម្ងួត និងការកែច្នែ រហូតទៅដល់ការដឹកជញ្ជូន ដល់កំពង់ផែ ដែលធ្វើឱ្យ ថ្លៃអង្ករនាំចេញរបស់កម្ពុជាខ្ពស់ជាងគេវិញ។ លើសពីនេះឱ្យតែដល់ រដូវប្រមូល ផលគឺថ្លៃស្រូវ ច្រើនតែធ្លាក់ចុះដូចធ្លាប់បានកើតឡើងនៅក្នុងប៉ុន្មានឆ្នាំចុងក្រោយនេះ ហើយតាមការសិក្សា មូលហេតុនៃការធ្លាក់ចុះនេះគឺបណ្តាលមកពីកត្តា Market failure នៅក្នុងប្រព័ន្ធទីផ្សារស្រូវ ក្នុងស្រុក របស់ យើង ពោលគឺមិនមែនបណ្តាលមកពីកត្តាទីផ្សារ ឬកត្តាសេដ្ឋកិច្ចនោះទេ៕
ខេត្តកំពង់ធំ ៖ យ៉ាងហោចណាស់ ក៏មនុស្ស២នាក់ បានស្លាប់ នៅនឹងកន្លែងកើត ហេតុ ដោយសារតែរថយន្តដឹកឈើក្រញូង បុកយ៉ាងពេញទំហឹង កាលពីវេលម៉ោង៧ និង៥៥នាទីយប់ ថ្ងៃទី១៤ ខែសីហា ឆ្នាំ ២០១៧ នៅកំណាត់ផ្លូវអាស៊ាន ស្ថិតនៅភូមិព្រៃតាហ៊ូ សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ។
ជនរងគ្រោះ ក្នុងករណីគ្រោះថា្នក់ចរាចរនេះ នៅភូមិពាមក្រែង ឃុំកំពង់គោ ស្រុកកំពង់ស្វាយ ខេត្តកំពង់ធំ ភេទប្រុសទាំង២នាក់ ប៉ុន្តែអត្ដសញ្ញាណលំអិត នៅពុំទាន់ដឹងនៅឡើយទេ នៅពេលភា្លមៗនោះ។
យោងតាមសក្សីដែលឃើញហេតុនេះ បាននិយាយឲ្យដឹងថា នៅមុនពេលកើតហេតុ គេឃើញបុរស ២នាក់នេះ ជិះម៉ូតូ១គ្រឿង ម៉ាកទ្រីមសង់ ព៌ណខ្មៅ ចេញពីភូមិពាមក្រែង ក្នុងទិសដៅ ពីលិចទៅកើត លុះ មកដល់កន្លែងកើត ក៏ឆ្លងផ្លូវអាស៊ាន ជិតផុតទៅហើយ ស្រាប់រថយន្តម៉ាកលុចស៊ីស ៤៧០ មួយគ្រឿង បើក លុះលឿនដូចព្យុះ លើកំណាត់ផ្លូវអាស៊ាន ក្នុងទិសដៅពីជើងទៅត្បូង ហើយក៏ទៅបុកបុរស២នាក់នោះតែម្ដង បណ្ដាលមនុស្សខ្ទាតចេញពីម៉ូតូ ចំណែកម៉ូតនៅគៀបអូសជាប់នឹងកាង ខាងមុខផ្នែកខាងឆ្វេង តែម្ដង។
ប្រភពព័ត៌មានពីសក្សីដដែល បានបន្តថា ភា្លមៗនេះ ស្ថិតនៅក្នុងសភាពជ្រួលច្របល់ តៃកុងបានចុះរត់គេចខ្លួនបាត់ បន្សល់ទុកសាកសព និងវត្ថុតាង លុះបន្តិចក្រោយមក ទើបសមត្ថកិច្ចមកដល់ ក៏ដឹងថា រថយន្តផ្ទុកឈើក្រញូងពេញ ហើយនៅកៅអីមុខ មានឧបករណ៍ជក់ ថ្នាំញៀតទៀតផង។
ក្រុមសមត្ថកិច្ចដែលចុះអន្តរាគមន៍ នៅកន្លែងកើតហេតុនេះ គឺដឹកនាំ ដោយលោកព្រះរាជអាជ្ញា អ៊ិត សុធា ដែលគេស្គាល់ថា ធ្លាប់បានបង្ក្រាប ឈ្មួញឈើក្រញូងធំៗ និងមានឥទ្ធិពល ជាច្រើនករណីមកហើយ រួមទាំងជនចែកចាញគ្រឿងញៀងផង៕
ភ្នំពេញ ៖ លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា បានពន្យល់អំពីការធ្វើវិសោធនកម្មច្បាប់ស្ដីពីគណបក្សនយោបាយ និងការបង្កើតច្បាប់ស្ដីពី សមាគម និងអង្គការមិនមែនរដ្ឋាភិបាល ជូនមន្ដ្រីនៃក្រសួង ការ បរទេសជប៉ុន។ ការពន្យល់នេះ បានធ្វើឡើងគ្រាដែលលោក កែវ រ៉េមី បានអនុញ្ញាតឲ្យលោក ម៉ាសាតូ អូតាកា អគ្គនាយករងនៃការិយាល័យកិច្ចការបរទេស នៃក្រសួងបរទេសជប៉ុន ចូលជួបពិភាក្សាការងារ នៅព្រឹកថ្ងៃទី១៥ ខែសីហា នេះ។
ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានថ្លែងប្រាប់អ្នកសារព័ត៌មាន ថា ក្នុងជំនួបនេះ លោក ម៉ាសាតូ អូតាកា បានលើកឡើងអំពីការធ្វើវិសោធនកម្មច្បាប់ស្ដីពីគណបក្សនយោបាយ”និងការបង្កើតច្បាប់ ស្ដីពីសមាគម និងអង្គការមិនមែនរដ្ឋាភិបាល ដោយស្នើឲ្យរាជរដ្ឋាភិបាលកម្ពុជា រៀបចំកិច្ចប្រជុំជាមួយភាគីពាក់ព័ន្ធ ដូចជា៖ អង្គការសង្គមស៊ីវិល និងតំណាងគណបក្សនយោបាយ ដើម្បីឲ្យភាគីទាំងនោះយល់ច្បាស់អំពីបំណង និង ខ្លឹមសារពិតប្រាកដនៃការធ្វើវិសោធនកម្ម និងការបង្កើតច្បាប់ទាំងពីរនេះ។
ជាការឆ្លើយតបលោក កែវ រ៉េមី បានពន្យល់ ថា ការបង្កើតច្បាប់ស្ដីពី”សមាគម និងអង្គការមិនមែនរដ្ឋាភិបាល” និងការធ្វើវិសោធនកម្មច្បាប់ស្ដីពី”គណបក្សនយោបាយ”កាលពីពេលថ្មីៗនេះ គឺរាជរដ្ឋាភិបាលបានស្រាវជ្រាវ យ៉ាង យកចិត្ដទុកដាក់ និងម៉ត់ចត់ជាទីបំផុត ហើយបានយកលំនាំតាមបណ្ដាប្រទេសមួយចំនួននៅលើពិភពលោកដូចជា ដាណឺម៉ាក,ម៉ាឡេស៊ី,ឥណ្ឌូនេស៊ី,និងប្រទេសក្នុងសហគមន៍អឺរ៉ុបមួយចំនួនទៀតផងដែរ។
ចំណែកការបង្កើតច្បាប់ស្ដីពី”សមាគម និងអង្គការមិនមែនរដ្ឋាភិបាល”គឺរាជរដ្ឋាភិបាលកម្ពុជាបានស្រាវជ្រាវ យកលំនាំ តាមបណ្ដាប្រទេសរីកចំរើនមួយចំនួន ដូចជា៖ប្រទេសបារាំង,ជប៉ុន,អូស្ដ្រាលី,និងប្រទេសសិង្ហបុរីជាដើម ហើយក៏មានការចូលរួមរៀបចំពីអ្នកជំនាញការទូត និងអ្នកពាក់ព័ន្ធនានា ដែលចំណាយពេលរៀបចំប្រមាណជា ២០ឆ្នាំ៕
ខេត្តមណ្ឌលគិរី ៖ ដើម្បីជាការផ្តល់កំលាំងចិត្ត និងលើកទឹកចិត្តដល់សិស្សទាំងអស់ ដែលជាប់និទ្ទេស A ក្នុងការប្រលង បាក់ឌុប អភិបាលខេត្តមណ្ឌលគិរី ឯកឧត្តម ស្វាយ សំអ៊ាង នឹងផ្តល់ម៉ូតូ០១គ្រឿងជូន ថ្លែងក្នុងពិធីជួបសំ ណេះសំណាលជាមួយលោកគ្រូ អ្នកគ្រូ និងសិស្សនុសិស្សរៀនបំប៉ន់ ដើម្បីត្រៀមប្រលងសញ្ញាប័ត្រមធ្យម សិក្សាទុតិយភូមិ នៅវិទ្យាល័យហ៊ុនសែនមណ្ឌលគិរី កាលពីរសៀលថ្ងៃទី១៤ ខែសីហា ឆ្នាំ២០១៧។
ក្នុងពិធីសំណេះសំណាល និងផ្តល់ការលើកទឹកចិត្តនោះដែរ ឯកឧត្តម ស្វាយ សំអ៊ាង អភិបាលខេត្ត
បានផ្តល់នូវបទពិសោធន៍ និងអនុសាសន៍ល្អៗមួយចំនួនដល់សិស្សានុសិស្សទាំងអស់ ដើម្បីយកទៅអនុវត្តក្នុងថ្ងៃប្រលងអោយទទួលបានជោគជ័យ។ ឯកឧត្តម បានបញ្ជាក់ថា នេះគឺជាឆ្នាំទី៤ហើយ ក្នុង ការកែទម្រង់ស៊ីជម្រៅរបស់ក្រសួងអប់រំយុវជននិងកីឡា ក្នុងការរឹតបន្តឹងលើវិស័យអប់រំ ដើម្បីធ្វើយ៉ាងណាឲ្យសិស្សា នុសិស្សមានចំណេះដឹង និងបញ្ចេញនូវសមត្ថភាពពិតប្រាកដ។ ជាមួយគ្នានេះដែរ ឯកឧត្តម អភិបាលខេត្ត បានណែនាំដល់ប្អូនៗសិស្សានុសិស្សទាំងអស់ ត្រូវខិតខំសិក្សាស្រាវជ្រាវរកឯកសារផ្សេងៗ និងត្រូវរំលឹកមើលមេរៀនឡើងវិញ ដើម្បីជាមូលដ្ឋានក្នុងការប្រលង ជាពិសេស ត្រូវប្រឹងប្រែងបញ្ចេញឲ្យ អស់ពីសមត្ថភាពរបស់ខ្លួន ដើម្បីទទួលបានជោគជ័យ។ ដូច្នេះ ដើម្បីជាការផ្តល់កំលាំងចិត្ត និងលើកទឹកចិត្តដល់សិស្សទាំងអស់ ដែលជាប់និទ្ទេស A ក្នុងការប្រលងបាក់ឌុប ក្នុងនាមឯកឧត្តម អភិបាលខេត្ត មណ្ឌលគិរី នឹងផ្តល់ម៉ូតូ០១គ្រឿងជូន ហើយសង្ឃឹមថា នៅឆ្នាំនេះប្អូនៗនឹងបន្តយកជ័យលាភីបន្ថែមទៀត ដើម្បីលើកស្ទួយកិត្តិយសរបស់ខេត្ត សាលារៀន គ្រួសារ និងខ្លួនឯងផ្ទាល់តែម្តង។ ទន្ទឹមនឹងនោះ ឯកឧត្តម ក៏បានថ្លែងអំណរគុណចំពោះ លោកគ្រូ អ្នកគ្រូទាំងអស់ ដែលបានចំណាយពេលវេលា ទាំងកំលាំងកាយចិត្តខិតខំបង្ហាត់បង្រៀនបំប៉នដល់សិស្សបន្ថែមសម្រាប់ត្រៀមប្រលងសញ្ញាប័ត្រមធ្យមសិក្សាទុតិយភូមិឆ្នាំនេះ អោយទទួលបានជោគជ័យ ។
`តាមការបញ្ជាក់របស់ប្រធានមន្ទីរអប់រំយុវជននិងកីឡាខេត្ត លោក ទឹម សង្វាត បានឲ្យដឹងថាការប្រលងសញ្ញាប័ត្រមធ្យមសិក្សាទុតិយភូមិឆ្នាំនេះ នឹងប្រព្រឹត្តទៅនៅថ្ងៃទី២១ខែសីហា មានរយៈពេល២ថ្ងៃ បែកចែកជាពីរមណ្ឌលប្រលង មានថ្នាក់វិទ្យសាស្ត្រ និងថ្នាក់វិទ្យាសាស្ត្រសង្គម ហើយបេក្ខជនទាំងអស់មកពីវិទ្យាល័យក្រុង/ស្រុក ទាំង៥ទូទាំងខេត្ត ចំនួន៣២០នាក់ ស្រី១៦៨នាក់ ត្រូវមកប្រលងនៅវិទ្យាល័យ ហ៊ុនសែនមណ្ឌលគិរី។
ក្នុងឱកាសនោះ ឯកឧត្តម អភិបាលខេត្ត បាននាំយកថវិកា និងសម្ភារៈសិក្សាមួយចំនួនផ្តល់ជូនដល់ លោកគ្រួ អ្នកគ្រូ ដែលបានបង្រៀនបំប៉នសិស្ស ថែមទាំងផ្តល់ជូនដល់សិក្សានុសិស្សទាំងអស់ផងដែរ៕
កែប ៖ ឆេះទូ អេធីអឹម របស់អនាគារ ABA អស់លុយរាប់ម៉ឺនដុល្លារ ខណះក្រុមចោរយក ធុងហ្គាសមកផ្លុំទម្លុះសោ និងជញ្ជាំងទូ អេធីអឹម មិនបានសំរេច។
ចោរមួយក្រុម បានប្រើប្រាស់វិធីម្យ៉ាងដោយយកធុងហ្គាស ទៅផ្លុំទម្លុះជញ្ជាំងទូ អេធីអឹម មួយកន្លែងរបស់ធនាគារ ABA ប៉ុនប៉ងយកលុយក្នុងទូអេប៊ីអឹម នោះ តែមិនបានសំរេច ដោយសារ ភ្លើងបានឆាបឆេះឡើង ក្នុងពេលពួកគេបានបញ្ឆេះភ្លើងហ្គាសដើម្បីទម្លុះទូ អេធីអឹម នោះ។
ហេតុការណ៍ ឆេះទូ អេប៊ីអឹម នេះ បានកើតឡើងកាលពីវេលាម៉ោង3ទៀបភ្លឺ ថ្ងៃទី15 ខែ សីហា ឆ្នាំ 2017 នៅភូមិថ្មីផ្លូវចូលផ្សារក្ដាម សង្គាត់ព្រៃធំ ក្រុងកែប ខេត្តកែប។ លោកវរៈសេនីទោ សូង ស៊ិន អធិការនគរបាលក្រុង បានប្រាប់អោយដឹងថា ក្រុមជនមិនស្គាល់អត្តសញ្ណាណនោះ បាន ធ្វើសកម្មភាពយកធុងហ្គាសមកផ្លុំបញ្ឆេះទម្លុះទូយកលុយក្នុងធុងអេប៊ីអឹមនៅចន្លោះម៉ោង3 ទៀបភ្លឺ ថ្ងៃទី15 ខែសីហា។ តែមិនដឹងថា មានមូលហេតុយ៉ាងម៉េចទេ បានជាធ្វើឱ្យ ឆ្លងឆេះទូ អេធីអឹម ហើយលុយរាប់ម៉ឺនដុល្លារ ដែលមាននៅក្នុងនោះ ក៍ត្រូវបានឆេះខ្លោចអស់ដែរ។
លោកវរះសេនីទោ សូង ស៊ិន អធិការក្រុងកែប បានប្រាប់បន្តថា កាមេរ៉ាសុវត្ថិភាព ត្រូវបាន ក្រុមចោរយកស្ព្រាយកំប៉ុងព័ណខ្មៅ ទៅបាញ់បិទកញ្ចក់ ដើម្បីកុំឱ្យថតជាប់រូបភាពទៀតផង។ ពេល នេះ នគរបាលកំពុងតែធ្វើការពិនិត្យយ៉ាងយកចិត្តទុកដាក់ ខណះដែលឆេះទូ អេធីអឹម ហើយចោរ រត់បាត់បន្សល់ទុកតែដែកកេះ និងបំពង់ហ្គាសមួយប៉ុណ្ណោះ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
