រាជធានីភ្នំពេញ ៖ នៅថ្ងៃនេះសមត្ថកិច្ចបានចាប់បញ្ជូនបុរសម្នាក់ដែលជាអង្គរក្សលោក សួន សេរីរដ្ឋា មកតុលាការរាជធានីភ្នំពេញ ដើម្បីសាកសួរករណីរក្សាទុកអាវុធខុសច្បាប់និងធ្វើតេស្តទឹកនោមរកឃើញមានសារធាតុញៀន។
មន្ត្រីនគរបាល បញ្ជាក់ថា ជនសង្ស័យឈ្មោះ ម៉ុម សួង អាយុ៤៤ឆ្នាំ អនិកជនខ្មែររស់នៅសហរដ្ឋអាមេរិក ហើយត្រូវបាននគរបាលឃាត់ខ្លួនកាលពីល្ងាចថ្ងៃទី១២ ខែសីហា នៅក្នុងផ្ទះលោកសួន សេរីរដ្ឋាតែម្តង ៕
កូរ៉េខាងជើង ៖ ទីភ្នាក់ងារព័ត៌មាន KCNA របស់កូរ៉េខាងជើងបាននិយាយនៅព្រឹកនេះថា មេដឹកនាំប្រទេសកូរ៉េខាងជើងបានទទួលរបាយការណ៍ពីកងទ័ពរួច ហើយពាក់ព័ន្ធនឹងផែនការបាញ់មីស៊ីលទៅលើកោះហ្គ័មរបស់សហរដ្ឋអាមេរិក ប៉ុន្តែលោកបាននិយាយថា លោកនឹងឃ្លាំមើលសកម្មភាពរបស់សហរដ្ឋអាមេរិកបន្តិចសិនមុនពេលធ្វើការសម្រេចចិត្តចំពោះផែនការនេះ។
យោងតាមទីភ្នាក់ងារព័ត៌មាន KCNA ប្រមុខដឹកនាំកូរ៉េខាងជើងបានធ្វើការត្រួតពិនិត្យ និងពិភាក្សាលើគម្រោងនេះយ៉ាងហ្មត់ចត់ កាលពីថ្ងៃចន្ទសប្តាហ៍នេះ ក្នុងអំឡុងនៃការចុះធ្វើអធិការកិច្ចនៅទីបញ្ជាការកងកម្លាំងយុទ្ធសាស្ត្រកូរ៉េខាងជើង បន្ទាប់ពីយោធានៃរដ្ឋកុម្មុយនិស្តមួយនេះ បានប្រកាសកាលពីសប្តាហ៍មុនថា ខ្លួននឹងបង្ហើយផែនការលម្អិតក្នុងការបាញ់គ្រាប់មីស៊ីលផ្លោងចំនួន ០៤គ្រាប់ ព្រមានកោះហ្គាំ នៅត្រឹមពាក់កណ្តាលខែសីហានេះ ហើយបញ្ជូនបន្តទៅឲ្យលោក គីម ជុងអ៊ុន ដើម្បីរង់ចាំការសម្រេចចិត្តចុងក្រោយ។ យ៉ាងណាមិញ លោក គីម ជុងអ៊ុន ទំនងជានឹងពន្យារពេលនៃការអនុវត្តន៍គម្រោងនេះ ដោយនិយាយថា រូបលោកនឹងនៅរង់ចាំមើលអាកប្បកិរិយារបស់ទីក្រុងវ៉ាស៊ីនតោន បន្តិចទៀតសិន។
ផែនការរបស់ប្រទេសកូរ៉េខាងជើងនេះបានធ្វើឲ្យប្រទេសជប៉ុនមានការមិនពេញចិត្ត និងបានត្រៀមខ្លួនដើម្បីទប់ទល់នឹងស្ថានភាពនេះដោយបានដាក់ពង្រាយប្រព័ន្ធការពារមីស៊ីលនៅផ្នែកមួយចំនួននៅខេត្តហ៊ីរ៉ូស៊ីម៉ា ខេត្តស៊ីម៉ាណេ ខេត្តកូឈីនៅភាគខាងលិចប្រទេសជាទីដែលប្រទេសកូរ៉េខាងជើងនិយាយថា ខ្លួននឹងបាញ់មីស៊ីលឲ្យឆ្លងកាត់តាមខេត្តទាំងនោះឆ្ពោះទៅរកកោះហ្គ័ម៕
រាជធានីភ្នំពេញ ៖ ខណៈនេះកម្លាំងនគរបាលប្រឆាំងភេរវកម្ម និងឧក្រិដ្ឋកម្មឆ្លងដែនដឹកនាំលោក សៀង សុខ ព្រះរាជអាជ្ញាអាជ្ញារងអមសាលាដំបូងរាជធានីភ្នំពេញ និងបញ្ជាកម្លាំងដោយ លោកឧត្តមសេនីយ៍ អ៉ី សុខឃី ប្រធានាយកដ្ឋាន ប្រឆាំងភេរវកម្ម និង ឧក្រិដ្ឋកម្មឆ្លងដែន កំពុងចុះឆែកឆេរទីស្នាក់ការគណបក្សអំណាចខ្មែរ ស្ថិតនៅក្នុងសង្កាត់ទឹកល្អក់ទី២ ខណ្ឌទួលគោក៕
អាមេរិក ៖ តាមរយៈរូបភាពថ្មីចេញពីផ្កាយរណបអាមេរិកបង្ហាញថា យោធាកូរ៉េខាងជើង កំពុងធ្វើការជួសជុលត្រៀមគ្រាប់មីស៊ីលបាញ់ចេញពីកងនាវាជើងទឹករបស់ខ្លួន ខណៈដែលភាពតានតឹងកើនឡើងក្នុងជម្លោះនុយក្លេអ៊ែរ រវាងមេដឹកនាំកូរ៉េខាងជើង និងសហរដ្ឋអាមេរិក។
រូបភាពនេះបង្ហាញពីសកម្មភាពនៅទីតាំងបាញ់សាកល្បង ដែលដូចគ្នាទៅនឹងរូបភាពកាលពីខែសីហា ឆ្នាំ២០១៦កន្លងទៅនេះ ដោយកាលនោះ កូរ៉េខាងជើងកំពុង ត្រៀមរៀបចំសម្រាប់ការបាញ់សាកល្បងគ្រាប់មីស៊ីល Pukguksong-1 ចេញពីនាវាមុជទឹករបស់ខ្លួន។
ទាក់ទិននឹងបញ្ហានេះ មន្ទីរបញ្ជកោណបានលើកឡើងថា សហរដ្ឋអាមេរិក និងកូរ៉េខាងត្បូង នឹងនៅតែបន្តដំណើរការទៅតាមគម្រោងរបស់ខ្លួនដោយការធ្វើសមយុទ្ធ យោធារួមគ្នាក្នុងរយៈពេល១០ថ្ងៃ ដែលសកម្មភាពនេះច្បាស់ជាបញ្ឆេះកំហឹងរបស់កូរ៉េខាងជើងកាន់តែខ្លាំង៕
សៀរ៉ាឡេអូន ៖ អាជ្ញាធរសៀរ៉ាឡេអូនបានឱ្យដឹងថា មនុស្សច្រើនជាង២០០នាក់បានស្លាប់ ដោយសារគ្រោះរអិលបាក់ដី និងទឹកជំនន់ដែលបានវាយប្រហារមកលើតំបន់ភ្នំ Regent ស្ថិតនៅក្បែររដ្ឋធានីហ្វ្រីថោន។ នេះបើតាមការចេញផ្សាយដោយទីភ្នាក់ងារសារព័ត៌មាន AP។
អាជ្ញាធរបានបន្តថា នៅក្នុងតំបន់ ភ្នំRegent បានបាក់ស្រុតនៅព្រឹកព្រលឹមថ្ងៃចន្ទ បន្ទាប់ពីមានភ្លៀងធ្លាក់យ៉ាងខ្លាំង បណ្ដាលឱ្យផ្ទះជាច្រើនខ្នងត្រូវកប់នៅក្រោមគំនរ ភក់ ខណៈពេលមនុស្សម្នាកំពុងដេកលក់នៅឡើយ។
ដោយឡែក ក្រុមអ្នកជួយសង្គ្រោះ រួមទាំងយោធាជាច្រើននាក់បាននិងកំពុង បន្តធ្វើប្រតិបត្តិការជួយសង្គ្រោះរបស់ពួកគេ គ្រាដែលគេជឿជាក់ថាចំនួនអ្នកសា្លប់អាចនឹងកើនឡើងច្រើនជាងនេះ៕
រាជធានីភ្នំពេញ ៖ លោក សួន សេរីរដ្ឋា ប្រធានគណបក្សអំណាចខ្មែរ ត្រូវបានតុលាការសម្រេចចេញដីកាឃុំខ្លួនបណ្តោះអាសន្ន និងបន្តបើកសវនាការនៅថ្ងៃទី២៤ ខែសីហា ឆ្នាំ២០១៧ខាងមុខនេះ។ ការចេញដីកាឃុំខ្លួនលោក សួន សេរីរដ្ឋា ធ្វើឡើងបន្ទាប់ពីព្រះរាជអាជ្ញារង លោក សៀង សុខ បានសម្រេចចោទប្រកាន់ជាផ្លូវការ និងបញ្ជូនទៅចៅក្រម រស់ ពិសិដ្ឋ បើកសវនាការកាត់ក្តីភ្លាមៗតែម្តង ដោយសារតែករណីនេះជាបទល្មើសជាក់ស្តែង។
លោក សួន សេរីរដ្ឋា ត្រូវបានតុលាការចោទប្រកាន់ចំនួន៣បទល្មើសរួមមាន ៖ ១ ៖ បទ ញុះញង់កុំឱ្យយោធិនស្តាប់បង្គាប់ តាមបញ្ញត្តិមាត្រា៤៧១នៃក្រមព្រហ្មទណ្ឌ។ ២ ៖ បទ ធ្វើឱ្យខូចទឹកចិត្តកងទ័ព តាមបញ្ញត្តិមាត្រា៤៧២ នៃក្រមព្រហ្មទណ្ឌ។ ៣ ៖ បទ ញុះញង់ឱ្យប្រព្រឹត្តបទឧក្រិដ្ឋជាអាទិ៍ តាមបញ្ញត្តិមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ។ នេះបើយោងតាមអ្នកនាំពាក្យសាលាដំបូងរាជធានីភ្នំពេញលោក លី សុផាណា។
គួរបញ្ជាក់ថា ការចាប់ខ្លួនលោក សួន សេរីរដ្ឋា បានធ្វើឡើងខណៈដែលលោកកំពុងធ្វើដំណើរពីខេត្តកំពង់ចាម ចូលមករាជធានីភ្នំពេញ ត្រង់ចំណុចស្ពានព្រែកព្នៅ ខណ្ឌព្រែកព្នៅ រាជធានីភ្នំពេញ។ បន្ទាប់ពីចាប់ខ្លួនវ៉ៃខ្នោះហើយ លោក សួន សេរីរដ្ឋា ត្រូវបានបញ្ជូនទៅកាន់ស្នងការដ្ឋាននគរបាលរាជធានីភ្នំពេញ និងបញ្ជូនបន្តទៅកាន់តុលាការ ដើម្បីកាត់ទោសភ្លាមៗតែម្តង៕
ភ្នំពេញ ៖ លោក ឱម យ៉ិនទៀង ទេសរដ្ឋមន្ដ្រី និងជាប្រធានអង្គភាពប្រឆាំងអំពើពុករលួយ និងលោកបណ្ឌិតសភាចារ្យហង់ ជួនណារ៉ុន រដ្ឋមន្ដ្រីក្រសួងអប់រំយុវជន និងកីឡា បានបញ្ជាក់ដូចគ្នាថា ការប្រឡងសញ្ញាបត្រមធ្យមសិក្សាទុតិយភូមិ ឬហៅថាប្រឡងបាក់ឌុបនាឆ្នាំ២០១៨ ខាងមុខ ដែលចំឆ្នាំរៀបចំការបោះឆ្នោតជ្រើសតាំងតំណាងរាស្ដ្រ គឺការប្រឡងមិនមានការធូររលុង ដូចមតិមួយចំនួនលើកឡើងឡើយ។ ការបញ្ជាក់នេះបន្ទាប់ពីមានមតិមួយចំនួន បានលើកឡើង ថា ឲ្យតែដល់ពេលបោះឆ្នោតម្ដងៗ គឺការប្រឡងបាក់ឌុបនឹងមានការធូររលុង ហើយសិស្សនឹងអាចមានលទ្ធភាពជាប់ច្រើនជាងធ្លាក់។
ក្នុងពិធីណែនាំដល់អ្នកសង្កេតការណ៍ស្ម័គ្រចិត្ត សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី២១ ខែសីហា នៅសាលសហសិក្សាសម្តេចតេជោហ៊ុន សែន នៃវិទ្យាស្ថានបច្ចេកវិទ្យាកម្ពុជា នារសៀលថ្ងៃទី១៤ ខែសីហានេះ លោកបណ្ឌិតសភាចារ្យហង់ ជួនណារ៉ុន បានថ្លែង ថា នេះជាឆ្នាំទី៤ហើយ ដែលក្រសួងអប់រំយុវជន និងកីឡា បានធ្វើកំណែទម្រង់ទៅលើការប្រឡងសញ្ញាបត្រមធ្យមសិក្សាទុតិយភូមិ ដោយទទួលបានលទ្ធផលជាបន្តបន្ទាប់ តាមរយៈការដាក់ពាក្យស្លោក ថា”អ្នកចេះគឺជាប់”។
លោកបន្ត ថា លទ្ធផលកំណែទម្រង់ដែលទទួលបានផ្លែផ្កានេះ គឺដោយសារមានការចូលរួមពីអ្នកសង្កេតការណ៍របស់អង្គភាពប្រឆាំងអំពើពុករលួយ និងអ្នកសង្កេតការណ៍របស់សហភាពសហព័ន្ធយុវជនកម្ពុជា តែងតែជួយដល់ក្រសួងអប់រំយុវជន និងកីឡា។ ជាមួយគ្នានេះឯកឧត្ដមបណ្ឌិតសភាចារ្យហង់ ជួនណារ៉ុន បានស្នើឲ្យអង្គភាពប្រឆាំងអំពើពុករលួយ និងសហភាពសហព័ន្ធយុវជនកម្ពុជា បន្តសហការជាមួយក្រសួងអប់រំយុវជន កីឡា ក្នុងការដាក់អ្នកសង្កេតការណ៍ប្រឡងបាក់ឌុបនាឆ្នាំ២០១៨ខាងមុខបន្តទៀត បើទោះបីជាចំឆ្នាំនៃការបោះឆ្នោតជ្រើសតាំងតំណាងរាស្ដ្រនីតិកាលទី៦ក៏ដោយ ក៏ការប្រឡងបាក់ឌុបនេះ នឹងមិនមានការធូររលុងនោះដែរ។
ចំណែកលោកបណ្ឌិត ឱម យ៉ិនទៀង ប្រធានអង្គភាពប្រឆាំងអំពើពុករលួយ បានថ្លែងឲ្យដឹងដែរ ថា មានមតិខ្លះលើកឡើង ថា នៅពេលមានការបោះឆ្នោតម្ដងៗគឺការប្រឡងបាក់ឌុប នឹងមិនមានការរឹតបណ្តឹងដូចឆ្នាំ ដែលមិនមានការបោះឆ្នោះនោះទេ ពិសេសការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០១៧កន្លងទៅនេះ និងការបោះឆ្នោតជ្រើសតាំងតំណាងរាស្ដ្រនីតិកាលទី៦ នាឆ្នាំ២០១៨ខាងមុខ។
លោកបានបញ្ជាក់ ថា ការលើកឡើងខាងលើនេះគឺមិនត្រឹមត្រូវទេ ព្រោះការប្រឡងបាក់ឌុបនៅឆ្នាំនេះ និងនៅឆ្នាំក្រោយ គឺនៅតែមានការរឹតបណ្តឹងដូចរាល់ឆ្នាំដែរ ហើយអ្នកសង្កេតការណ៍របស់អង្គភាពប្រឆាំងអំពើពុករលួយ ក៏នៅតែសហការជាមួយក្រសួងអប់រំយុវជន និងកីឡា ដើម្បីធ្វើកំណែទម្រង់ការប្រឡងនេះបន្តបន្ទាប់ទៀត។ ប្រធានអង្គភាពប្រឆាំងអំពើពុករលួយ បានបញ្ជាក់បន្ថែម ថា យើងមិនអាចយកគុណភាពអប់រំ របស់ប្រទេសជាតិទៅលេងសើចនោះទេ ខណៈដែលកេរ្ដិ៍ឈ្មោះរបស់ប្រទេសកម្ពុជាកំពុងតែមានកម្រិតខ្ពស់ឡើងនៅលើឆាកអន្ដរជាតិ ដូច្នេះការប្រឡងបាក់ឌុបមិនមានហេតុផលអ្វីដែលត្រូវធូររលុងនោះឡើយ។
សូមជម្រាប ថា ក្រសួងអប់រំយុវជន និងកីឡា ក្រោមការដឹកនាំរបស់លោកបណ្ឌិត ហង់ ជួនណារ៉ុន ជារដ្ឋមន្ដ្រី បានធ្វើកំណែទម្រង់ការប្រឡងបាក់ឌុប រយៈពេល៣ឆ្នាំមកហើយ ដោយទទួលបានការគាំទ្រពីគ្រប់មជ្ឈដ្ឋានជាពិសេសមាតា-បិតា អាណាព្យាបាលសិស្ស ក៏ដូចជាបេក្ខជនប្រឡងផងដែរ៕
ភ្នំពេញ ៖ តាមគម្រោងផែនការ ដើម្បីរៀបចំសណ្តាប់ធ្នាប់នៅក្នុងរាជធានីភ្នំពេញ រដ្ឋបាលរាជធានី គ្រោង នឹងកាត់ទម្លាក់បណ្ដាញខ្សែកាប្លិ៍អាកាសក្នុងរាជធានីភ្នំពេញជំហានទី២ នៅឆ្នាំ២០១៧នេះ បន្ថែមចំនួន៦ខ្សែទៀត ដោយធ្វើការកប់ដីជំនួសវិញ។
ដើម្បីឱ្យដំណើរការកាត់ទម្លាក់បណ្ដាញខ្សែកាប្លិ៏អាកាសលើមហាវិថីសំខាន់ៗ ទាំង៦នៅក្នុងភូមិសាស្ត្ររាជធានីភ្នំពេញនេះទទួលបានជោគជ័យ លោក ស៊ុយ សេរិទ្ធ អភិបាលរងរាជធានីភ្នំពេញ ធ្លាប់បានឱ្យដឹងនៅក្នុងកិច្ចប្រជុំគណៈកម្មការត្រួតពិនិត្យលក្ខណៈបច្ចេកទេសនៃការជីកកប់បណ្ដាលក្រោមដី និងទម្លាក់ខ្សែបណ្ដាញលើអាកាសគ្រប់ប្រភេទ តាមដងផ្លូវក្នុងរាជធានីភ្នំពេញថា ក្រុមការងារចម្រុះរដ្ឋបាលរាជធានីភ្នំពេញ នឹងធ្វើការរៀបចំកាត់ទម្លាក់បណ្ដាញខ្សែកាប្លិ៏អាកាសតាមបណ្ដោយមហាវិថីសំខាន់ៗទាំង៦ ដែលត្រូវកាត់ទម្លាក់ក្នុងជំហានទី២នេះដោយតម្រូវឱ្យអង្គភាពរដ្ឋ និងបណ្ដាក្រុមហ៊ុនឯកជនដែលមានបណ្ដាញខ្សែកាប្លិ៏លើអាកាសទាំងអស់ត្រូវចូលរួមសហការក្នុងការអនុវត្តន៍យន្តការនេះអោយបានម៉ឺងម៉ាត់ និងម៉ត់ចត់។
គួរបញ្ជាក់ថា ការកាត់ទម្លាក់និងត្រូវបញ្ចូលក្នុងបណ្ដាញក្រោមដី នៅតាមបណោ្ដយមហាវិថីទាំង៦រួមមាន មហាវិថីព្រះនរោត្តម មហាវិថីសហព័ន្ធរុស្ស៊ី មហាវិថីព្រះសីហនុ មហាវិថីកម្ពុជាក្រោម មហាវិថីព្រះមុនីវង្ស និងមហាវិថីម៉ៅសេទុង។
លោក ស៊ុយ សេរិទ្ធ បានស្នើដល់ក្រុមហ៊ុនដែលទទួលការងារកាត់ទម្លាក់ខ្សែកាប្លិ៏លើអាកាសមកចូលបំពង់បណ្ដាញក្រោមដី ត្រូវដាក់ស្លាកសញ្ញាសម្គាល់ជាភាសាខ្មែរ ដើម្បីមានភាពងាយស្រួលដល់បងប្អូនប្រជាពលរដ្ឋធ្វើដំណើរតាមដងផ្លូវ។
សូមបញ្ជាក់ថា ការដាក់ឱ្យដំណើរការស្តុបថ្មីមួយកន្លែងទៀតនេះ គឺស្ថិតក្នុងគម្រោង តម្លើងភ្លើងស្តុបចំនួន១០០ទីតាំង ដែលបានអនុវត្តន៏កាលពីដើមឆ្នាំ២០១៦ ហើយមកដល់ពេលនេះ ត្រូវការតម្លើងជិតរួចរាល់ហើយ នៅសល់តែការតភ្ជាប់ប្រពន្ធ័ខ្សែភ្លើង ពីភ្លើងស្តុបទាំងអស់ជាប្រព័ន្ឋទៅ បន្ទប់បញ្ជារត្រួតពិនិត្យរួមប៉ុណ្ណោះ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ ជាពិសេសកាត់បន្ថយការកកស្ទះចរាចរឲ្យកាន់តែប្រសើរឡើង៕
រាជធានីភ្នំពេញ ៖ សមត្ថកិច្ចត្រៀមបញ្ជូនខ្លួនជនសង្ស័យ លោក សួន សេរីរដ្ឋា ប្រធានគណបក្សអំណាចខ្មែរ អាចនឹងត្រូវបញ្ជូនទៅអយ្យការអមសាលាដំបូងរាជធានីភ្នំពេញ នៅរសៀលថ្ងៃទី១៤ ខែសីហានេះ ពាក់ព័ន្ធការប្រមាថធ្ងន់ធ្ងរដល់កងទ័ពកម្ពុជា ។
យ៉ាងណាក៏ដោយ ក្រោយការចាប់ខ្លួនក៏លេចចេញនូវការបង្ហោះឯកសារសម្ងាត់របស់លោក សួន សេរីរដ្ឋា ដែលប្រមាថព្រះមហាក្សត្រថែមទៀត ខណៈដែលឯកសារសម្ងាត់នោះត្រូវបានមនុស្សជំនិតម្នាក់របស់លោកបង្ហោះតាមប្រព័ន្ធ Facebook ៕
បាត់ដំបង ៖ ម៉ោង១០ព្រឹក ថ្ងៃទី១៣ខែសីហាឆ្នាំ២០១៧ ឯកឧត្តម ឈាង វុន សមាជិករដ្ឋសភា ឯកឧត្តម ច័ន្ទ សុផល អភិបាលខេត្តបាត់ដំបង លោកជំទាវ ញឹក សាគុន្ធ អភិបាលរងខេត្តបាត់ដំបង លោក សឿម ប៊ុនរឹទ្ធិ នាយករដ្ឋបាលសាលាខេត្តបាត់ដំបង លោក សៀងឯម វូនស្ហី អភិបាលក្រុងបាត់ដំបង ព្រមទាំងសមាជិកក្រុមប្រឹក្សាសង្កាត់អូរចារនិងយុវជនសង្កាត់អូរចារ បានអញ្ជើញជួបសំណេះសំណាលជាមួយ លោកយាយ លោកតា បងប្អូនប្រជាជននៅទីតាំងអតីតសាលាមត្តេយ្យអូរចារ នឹងបានប្រគល់ប្លង់ដីកម្មសិទ្ធិសាលាជូនទៅលោក ងី សែត ប្រធានមន្ទីរអប់រំ យុវជន និងកីឡាខេត្តបាត់ដំបងវិញ ដើម្បីគ្រប់គ្រង និងទុកសាងសង់សាលារៀនមត្តេយ្យសិក្សាដល់ក្មួយៗជំនាន់ក្រោយបានបន្តការសិក្សារៀនសូត្រនៅក្នុងភូមិអូរចារ សង្កាត់អូរចារ ក្រុងបាត់ដំបង ខេត្តបាត់ដំបង៕
ភ្នំពេញ ៖ សមត្ថកិច្ចខណ្ឌដង្កោឃាត់ខ្លួនមុខសញាកាច់ករម៉ូតូយ៉ាងសកម្មបាន២នាក់ទាំងព្រឹកកាលពីវេលាម៉ោង០៨ និង០០នាទី ថ្ងៃទី១៤ ខែសីហា ឆ្នាំ២០១៧ ត្រង់ចំណុចមុខសាលាសង្កាត់សាក់សំពៅ ផ្លូវទំនប់៧មករា ស្ថិតនៅភូមិក្រាំងតាផូ សង្កាត់សាក់សំពៅ ខណ្ឌដង្កោ។
ជនសង្ស័យដែលសមត្ថកិច្ចឃាត់ខ្លួនបាមឈ្មោះទី១.ឈ្មោះ សុខ ភឿន ហៅ ស្វិត ភេទប្រុស អាយុ៣៩ឆ្នាំ មុខរបរមិនពិតប្រាកដ ស្នាក់នៅផ្ទះសំណាក់ ឃុំសៀមរាប ស្រុកកណ្តាលស្ទឹង ខេត្តកណ្តាល។ ២.ឈ្មោះ ចាន់ ធឿន ភេទប្រុស អាយុ៤៣ឆ្នាំ មុខរបរមិនពិតប្រាកដ ស្នាក់នៅផ្ទះសំណាក់ ឃុំសៀមរាប ស្រុកកណ្តាលស្ទឹង ខេត្តកណ្តាល ។
បើតាមសមត្ថកិច្ចបានប្រាប់អោយដឹងថា កម្លាំងសមត្ថកិច្ចនគរបាលខណ្ឌដង្កោហសការជាមួយកម្លាំងប៉ុស្តិ៍ បានជិះម៉ូតូល្បាតក្នុងភូមិសាស្ត្រខណ្ឌដង្កោ តាមផ្លូវជាតិលេខ២០A ស្ថិតនៅសង្កាត់ទៀន ខណ្ឌដង្កោ បានឃើញជនសង្ស័យឆ្នាំ ជិះម៉ូតូ០១គ្រឿងម៉ាកហុងដាសេ១២៥ ពណ៌ខ្មៅ សេរីឆ្នាំ២០១៦ ពាក់ស្លាកលេខ ភ្នំពេញ 1FV-1468 លេខតួ និងលេខម៉ាស៊ីន9572486 ឌុបគ្នាពីកើតទៅលិច សមត្ថកិច្ចយើងមានការសង្ស័យ ក៏ជិះដេញតាមពីក្រោយ រហូតដល់ចំណុចខាងមុខសាលាសង្កាត់សាក់សំពៅ ស្ថិតនៅភូមិក្រាំងតាផូ សង្កាត់សាក់សំពៅ ខណ្ឌដង្កោ សមត្ថកិច្ចយើងក៏បានធ្វើការឃាត់ខ្លួនជនសង្ស័យទាំង២នាក់ខាងលើ ធ្វើការត្រួតពិនិត្យ រកឃើញដែកជ្រុងចុងសំប៉ែតស្រួចសម្រាប់កាច់សោរកម៉ូតូចំនួន០២ នៅក្នុងហោប៉ៅអាវខាងស្តាំ និងសោរខ្សៀលេខ០៨ចំនួន០១ នៅចង្កេះខោរបស់ជនសង្ស័យឈ្មោះ ចាន់ ធឿន ហើយសមត្ថកិច្ចយើងក៏បាននាំខ្លួនជនសង្ស័យទាំង០២នាក់ខាងលើ រួមនិងវត្ថុតាង យកមកធ្វើការសាក សួរនៅអធិការដ្ឋាននគរបាលខណ្ឌដង្កោ។
សំភារៈដែលសមត្ថកិច្ចដកហូតបានរួមមានដែកជ្រុងចុងសំប៉ែតស្រួចចំនួន០២ ២.សោខ្សៀលេខ៨ចំនួន០១ ៣. កូនសោម៉ូតូចំនួនមួយ ៤.ម៉ូតូម៉ាកហុងដាសេ១២៥ ពណ៌ខ្មៅ សេរីឆ្នាំ២០១៦ ពាក់ស្លាកលេខ ភ្នំពេញ 1FV-1468 ៥.សោដោះម៉ូតូមួយចំនួន ។
បច្ចុប្បន្នជនសង្សយ័ទាំង២នាក់កំពុងធ្វើការសាកសួរនៅអធិការដ្ឋាននគរបាលខណ្ឌដង្កោដើម្បីកសាងសុំនុំរឿងបញ្ជូនទៅតុលាការចាត់ការតាមនីតិវិធី៕
រាជធានីភ្នំពេញ ៖ សមត្ថកិច្ចបានធ្វើការចាប់ខ្លួនលោក សួន សេរីរដ្ឋា ប្រធានគណបក្ស អំណាចខ្មែរ កាលពីថ្ងៃទី១៣ ខែសីហា ឆ្នាំ២០១៧ បន្ទាប់ពីប្រធានគណបក្សរូបនេះបានបង្ហោះ សារតាមបណ្តាញ Facebook ផ្ទាល់ខ្លួនកាលពីថ្ងៃទី១២ ខែសីហា ឆ្នាំ២០១៧ ដែលមានខ្លឹមសារ ជេរប្រមាថនឹងមាក់ងាយដល់កងទ័ពជាតិយ៉ាងធ្ងន់ធ្ងរ រួមទាំងមានចរិកញុះញង់បំបែកបំបាក់ជាតិ ថែមទៀត ។
ក្រោយការឃាត់ខ្លួនក្រុមសមត្ថកិច្ចបានចុះទៅឆែកឆេរផ្ទះលោក សួន សេរីរដ្ឋា នៅក្នុងបុរីប៉េងហួត ផ្លូវ៥៩៨ ខ័ណ្ឌឫស្សីកែវ រាជធានីភ្នំពេញ ។ លទ្ធផលនៃការ ឆែកឆេរនោះមិនទាន់ត្រូវបានបញ្ចេញនៅឡើយទេ រហូតមកដល់ពេលនេះ ។ ប៉ុន្តែក្រោយការចាប់ខ្លួនលោក សួន សេរីរដ្ឋា ក៏ស្រាប់តែមានមនុស្សជំនិតលោកម្នាក់បាន ចេញមុខបង្ហោះឯកសារសម្ងាត់មួយរបស់លោក សួន សេរីរដ្ឋា ដែលមានខ្លឹមសារប្រមាថព្រះចេ ស្តាព្រះមហាក្សត្រខ្មែរយ៉ាងធ្ងន់ធ្ងរ មិនអាចទទួលយកបាននោះឡើយ ។
យោងតាម Facebook មួយមានឈ្មោះ « កូននាគអាស៊ី » ដែលបានអះអាងថា ខ្លួនជា មនុស្សជំនិតលោក សួន សេរីរដ្ឋា បានសរសេរយ៉ាងដូច្នេះថា ៖ «សូមក្រុមសមាជិក KPPM នៅបារាំង ជួយស្រាវជ្រាវរកឯកសារមួយឲ្យបានមកឲ្យខ្ញុំ ឲ្យបានកាន់តែឆាប់កាន់តែល្អ។ គឺឯកសារ ដែលបង្ហាញបញ្ជាក់ថា នរោត្តម សីហមុនី ជាសញ្ជាតិបារាំង មែនឬមិនមែន? ខ្ញុំ នឹងវ៉ៃមួយឈុតនេះឲ្យល្អមើលកក្រើកក្នុងឆ្នាំ២០១៦នេះ។ សូមជួយរកឲ្យឃើញ យកឲ្យបានឯកសារឲ្យខ្ញុំ ។
ហ៊ុន សែន ចង់មានច្បាប់កំណត់សញ្ជាតិតែមួយសម្រាប់មេបក្សនយោបាយ គឺជាឱកាសរបស់ KPP ធាក់ឲ្យធ្លាយវាំងតែម្ដង។ ចាំមើលស្ដេច និងអាមាត្យវាំង ហ៊ានលាសញ្ជាតិបារាំងទេ? ហើយពួកយួន នៅក្នុងបក្សប្រជាជន រត់ទៅពួននៅកន្លែងណា? ចាប់កន្ទុយរបស់ពួកវា ញាត់ចូលមាត់ពួកវា ឲ្យខាំកន្ទុយខ្លួនឯងវា ហើយយើងចាំឈរមើល!» ។
ពាក់ព័ន្ធការចាប់ខ្លួនលោក សួន សេរីរដ្ឋា នេះផងដែរ នាយទាហាន នាយទាហានរង និងពលទាហានគ្រប់ស្ថាប័ន និងមូលដ្ឋានកងទ័ពបានផ្ទុះកំហឹងឈឺចាប់និងថ្កោលទោសយ៉ាង ដាច់អហង្ការ ចំពោះទង្វើរបស់លោក សួន សេរីរដ្ឋ ហើយក៏បានទាមទារឲ្យថ្កោលទោសនិងផ្តន្ទា ទោសធ្ងន់ធ្ងរបំផុតចំពោះបុគ្គលរូបនោះថែមទៀត ៕
រាជធានីភ្នំពេញ ៖ នៅថ្ងៃនេះសម្តេច ហ៊ុន សែន បានបង្ហាញជំហរម៉ឺងម៉ាត់និងព្រមានធ្ងន់ៗ ចំពោះអ្នកណាដែលបានធ្វើអត្ថាធិប្បាយចោទថា ព្រឹត្តការណ៍ឈ្លានពានបរទេសណាមួយ មកលើកម្ពុជា ដើម្បីសន្លឹកឆ្នោត ។ សម្តេចព្រមានថា នឹងចាត់ខ្លួនពួកគេប្រសិនបើនិយាយដូច្នេះ ៕
ការ៉ាកាស់ ៖ ទីភ្នាក់ងារព័ត៌មានចិនស៊ីនហួរចេញផ្សាយនៅព្រឹកនេះថា មនុស្ស១៨នាក់ដែលជាប់ពាក់ព័ន្ធទៅនឹងរៀបចំគំរោងការវាយប្រហារលើមូលដ្ឋានយោធាសំខាន់ៗ នៅក្នុងរដ្ឋ Carabobo ភាគខាងជើងប្រទេសវេណេស៊ុយអេឡាត្រូវបានចាប់ខ្លួន។
នាយកទីភ្នាក់ងារស៊ើបការណ៍សម្ងាត់វេណេស៊ុយអេឡា លោក ហ្គូស្តាវ៉ូ ហ្គនហ្សាឡែស ឡូប៉ែស បានឲ្យដឹងថា កងកម្លាំងបានធ្វើការចាប់ខ្លួនជនសង្ស័យទាំង១៨នាក់ ខាងលើនេះក្រោយពីពួកគេបានបញ្ចេញសកម្មភាពដ៏គួរឲ្យសង្ស័យជាច្រើន ហើយ Sebin ក៏មានភស្តុផ្សេងទៀតដែលបញ្ជាក់ថា ជនជាតិវេណេស៊ុយអេឡាទាំង ១៨នាក់នេះ បានចូលរួមនៅក្នុងសកម្មភាពភេរវកម្ម ដែលជាគំរោងត្រៀមធ្វើការវាយប្រហារ ទៅលើមូលដ្ឋានយោធាខាងលើនេះ។ លោកបញ្ជាក់ថា ក្នុងចំណោមជនសង្ស័យទាំងនោះ មាន ០៦នាក់ គឺជាមន្ត្រីយោធា ហើយប្រមាណ ១២នាក់ផ្សេងទៀត គឺជាអ្នកដើរតាមការបង្គាប់បញ្ជារបស់ពួក។
បច្ចុប្បន្ន Sebin កំពុងតែធ្វើការស៊ើបអង្កេតរឿងនេះបន្ត ដែលវាអាចមានជាប់ពាក់ព័ន្ធធ្ងន់ធ្ងរទៅនឹងក្រុមប្រឆាំង ដែលកំពុងតែតទល់នឹងរដ្ឋាភិបាល លោក នីកូឡាស់ ម៉ាឌូរ៉ូ៕
ខេត្តក្រចេះ ៖ រថយន្ដសាំយ៉ុងដឹកឈើប្រណិតជាច្រើនគ្រឿង ផ្ទុកឈើពេញៗប្រៀប បានធ្វើចរាចរណ៍ដឹកជញ្ជូនជារៀងរាល់យប់ចេញពីទឹកដីនៃស្រុកចិត្របុរី ក្នុងខេត្តក្រចេះ តម្រង់ឆ្ពោះទៅលក់នៅប្រទេសវៀតណាម ប៉ុន្តែគេសង្កេតឃើញថា នាយផ្នែករដ្ឋបាលព្រៃឈើក្រចេះ ដែលទើបនឹងប្តូរមកថ្មីនោះ មានភាពសកម្ម ហាក់បីដូចជាគ្មានចំណាត់ការ ឬអើពើ ធ្វើការបង្ក្រាប ទប់ស្កាត់ បទល្មើយព្រៃឈើឡើយ ។
សកម្មភាពរថយន្តដឹកជញ្ជូនបទល្មើសព្រៃឈើទាំងនោះ គឺលើកដាក់នឹងដឹកចេញពីចំណុចមាត់ទន្លេមេគង្គ ឋិតក្នុងភូមិកាកុត ឃុំសំបុក ស្រុកចិត្របុរី ដោយដឹកឆ្លងកាត់មុខសង្កាត់រដ្ឋបាលព្រៃឈើថ្មគ្រែ ឆ្លងកាត់ទឹកដីក្រុងក្រចេះ តាមផ្លូវជាតិលេខ៧ (ក្រចេះ- ស្នួល) ដោយឆ្លងកាត់ សង្កាត់រដ្ឋបាលព្រៃឈើកន្ទួត មេព្រៃស្វាយជ្រះ មេព្រៃឈើឃ្សឹម មេព្រៃឈើស្នួល នឹងផ្នែករដ្ឋបាលព្រៃឈើឆ្លូងផងដែរ ប៉ុន្តែគេមិនដែលឃើញមន្ត្រីជំនាញសង្កាត់រដ្ឋបាលព្រៃឈើ និងសមត្ថកិច្ចចម្រុះ អង្គភាពពាក់ព័ន្ធណាមួយចេញធ្វើការបង្ក្រាបនោះឡើយ គឺបណ្តែតបណ្តោយទុកឲ្យរថយន្តល្មើសច្បាប់ទាំងនោះដឹកជញ្ជូនយកទៅលក់ដល់គោលដៅយ៉ាងរលូនប្រកបដោយសុវត្ថិភាព។
ជាក់ស្តែងកាលពីយប់ថ្ងៃទី១៤ ខែសីហា ឆ្នាំ២០១៧ យប់មិញនេះ វេលាម៉ោង០២យប់ មានរថយន្ដសាំយ៉ុងដឹកឈើសុក្រំពេញៗ ២គ្រឿង ជារបស់ថៅកែស្រីដ៏ល្បីឈ្មោះបោះសំលេងប្រចាំខេត្តក្រចេះ គឺឈ្មោះចែ មុំ ហៅ ម៉ាប់ និងប្តីឈ្មោះ ធី ចំណែកឯមន្ត្រីជំនាញ សមត្តកិច្ចពាក់ព័ន្ធនៅតាមដងផ្លូវ ដែលគេឃើញដាក់ក្បាលឡានចេញក្រៅគ្រប់កន្លែង តាមស្នាក់ការនីមួយៗនោះ គឺចាំតែរាប់ក្បាលឡានយកលុយតែប៉ុណ្ណោះ ហើយគេមិនដែលឃើញសមត្ថកិច្ចទាំងនោះ ចាប់បង្ក្រាបបានម្ដងណាឡើយ ។
ប្រភពពីសមត្ថកិច្ច បានខ្សឹបប្រាប់អោយភ្នាក់ងារមេគង្គប៉ុស្តិ៍ថា រថយន្តដឹកឈើល្មើសច្បាប់ខាងលើនេះ គឺជាកម្មសិទ្ធរបស់ស្ត្រីជើងខ្លាំងម្នាក់ឈ្មោះចែ មុំ ហៅ ចែម៉ាប់ ដែលមានប្តីឈ្មោះ ធី រស់នៅភូមិអន្តែងដូន សង្កាត់ក្រគរ ក្រុងក្រចេះ និងជាឈ្មួញឈើដុះស្លែរយូរឆ្នាំមកហើយ គ្មានសមត្ថកិច្ចជំនាញ ឬស្ថាប័នពាក់ព័ន្ធណាហ៊ានបង្ល្រាបឡើយកន្លងមក ព្រោះតែអំណាចមាន បងប្អូន ធ្វើការធំនៅក្នុងខេត្តក្រចេះ ហើយតែងតែជេរបញ្ចោរ និងប្រើសម្តីមើលងាយមើលថោកមកលើសមត្ថកិច្ចរហូតនាពេលកន្លងមក ។
សូមបញ្ជាក់ថា កាលពីថ្ងៃទី៧ ខែសីហា ឆ្នាំ២០១៧ មេព្រៃសង្កាត់រដ្ឋបាលព្រៃឈើស្នួល សហការជាមួយកម្លាំងនគរបាលស្រុកធ្វើការចាប់ឃាត់រថយន្តដឹកឈើ ១គ្រឿង ក្នុងចំណោមរថយន្ត២គ្រឿងរបស់ ថៅកែស្រីឈ្មោះចែ មុំ ហៅម៉ាប់ និងប្តីឈ្មោះ ធី ម្តងរួចមកហើយ ស្ថិតនៅចំនុចភូមិស្នួល ឃុំស្នួល ស្រុកស្នួល ខេត្តក្រចេះ ដោយដឹកលោតឆ័ត្របំរុងយកទៅលក់ក្នុងប្រទេសវៀតណាម តាមច្រកត្រពាំងស្រែ ៕
