រាជធានីភ្នំពេញ៖បុរសម្នាក់ស្លាប់ និងក្មេងប្រុសម្នាក់ទៀតរងរបួសដោយសារឆក់ខ្សែភ្លើងដែលម្ចាស់ផ្ទះរាយជុំវិញផ្ទះដើម្បីការពារចោរលួចទ្រព្យសម្បត្តិរបស់ខ្លួន ដែលករណីបង្កឲ្យមានការភ្ញាក់ផ្អើលនៅរសៀលថ្ងៃទី២ ខែមេសា ឆ្នាំ២០១៧ នៅត្រង់ចំណុចជួរមាត់ទន្លេ ស្ថិតក្នុងក្រុម៤ ភូមិក សង្កាត់ច្រាំងចំរេះ២ ខណ្ឌឫស្សីកែវ។
បើតាមអ្នកភូមិខាងលើបាននិយាយថា ករណីនេះ បានកើតឡើងដោយសារតែ នៅមុនពេលកើតហេតុ ជនជាតិវៀតណាម ជាម្ចាស់ផ្ទះបង្កហេតុ បានតខ្សែភ្លើង ដែលមានមុខតំណរ រាយព័ទ្ធជុំវិញដីរបងស័ង្កសីទាំងលើ ទាំងក្រោមផ្ទះ ដើម្បីការពារទ្រព្យសម្បត្តិរបស់ខ្លួន ហើយស្របពេលមានទឹកភ្លៀងផងនោះ ក៏មានក្មេងប្រុសជាជនជាតិវៀតណាមម្នាក់ បានរត់មកលេងនៅក្បែរនោះ មួយសន្ទុះ ក៏ឮសូរសំឡេងស្រែកឆោឡោ ស្រាប់តែបុរសរងគ្រោះបានឃើញ និងរត់ទៅជួយក្មេង ក៏ត្រូវឆក់ខ្សែភ្លើងបណ្ដាលឲ្យដួលក្នុងភក់ជ្រាំ ហើយស្លាប់ភ្លាមៗ នៅនឹងរបងផ្ទះតែម្ដង។
ប្រភពបន្តថា ជនរងគ្រោះដែលត្រូវខ្សែភ្លើងឆក់ បណ្ដាលឲ្យស្លាប់ មានឈ្មោះ វន ភេទប្រុស អាយុប្រហែល៤០ឆ្នាំ ជនជាតិខ្មែរ និងជាជនគ្មានទីពឹង ស្នាក់នៅជាមួយគេក្បែរចំណុចកើតហេតុខាងលើ និងក្មេងប្រុសរងគ្រោះម្នាក់ទៀត ជាជនជាតិវៀតណាម មានឈ្មោះ ចាំង មិនជី រងរបួសស្រាល។ ចំណែកម្ចាស់ផ្ទះឈ្មោះ បិន ជនជាតិវៀតណាម ក្រោយកើតហេតុបានរត់គេចខ្លួនបាត់ភ្លាមៗ៕
ដោយ៖ប៉ែនសុផល
បាត់ដំបង៖យោងតាមរបាយការណ៍ស្តីពីលទ្ធផលអនុវត្តន៍ផែនការយុទ្ធនាការប្រយុទ្ធប្រឆាំងគ្រឿងញៀនប្រចាំខែមីនាចាប់ពីថ្ងៃទី១រហូតដល់ថ្ងៃទី៣១ខែមីនា ឆ្នាំ២០១៧សមត្ថកិច្ចនគរបាលខេត្តបាត់ដំបងបានចុះប្រតិបតិ្តការបង្ក្រាបករណីជួញដូរ និងប្រើប្រាស់គ្រឿងញៀនចំនួន៨០ករណី ដោយឃាត់ខ្លួនជនសង្ស័យចំនួន១៣១នាក់ចាប់យកគ្រឿងញៀនICE ចំនួន៩៩៧,៦៨ក្រាមនិងwyចំនួន១១៧៥៥គ្រាប់ស្មើរ១០៩៧,៧១ក្រាម។
លោក ស៊ាន សុណាល់ នាយការិយាល័យប្រឆាំងគ្រឿងញៀនខេត្តបានប្រាប់អោយដឹងនៅថ្ងៃទី២ មេសា នេះថា៖នៅក្នុងយុទ្ធនាការបង្ក្រាបករណីជួញដូរនិងប្រើប្រាស់គ្រឿងញៀនទាំង៨០ករណីក្នុងនោះករណីជួញដូរចំនួន២០ករណីឃាត់ខ្លួនជនសង្ស័យ២៩នាក់ក្នុងនោះស្រី៥នាក់។ លោកបញ្ជាក់ថា ករណីប្រើប្រាស់៦០ករណីឃាត់ខ្លួន១០២នាក់ក្នុងនោះស្រី១នាក់ បញ្ជូនទៅមណ្ឌលស្តារនីតិសម្បទា ១៨ករណីមានចំនួន១៨នាក់ អប់រំត្រឡប់ទៅសហគមន៍វិញ៤២ករណីមនុស្សចំនួន៨៤នាក់។
ដោយឡែកវត្ថុតាងដកហូតបានរួមមាន ថ្នាំញៀនICE ចំនួន៩៩៧,៦៨ក្រាម ថ្នាំញៀនwyចំនួន១១៧៥៥គ្រាប់ស្មើរ១០៩៧,៧១ក្រាម ដើមកញ្ឆាចំនួន១៦០ដើម -កញ្ឆាក្រៀមចំនួន៣គីឡូក្រាម ដើមកញ្ឆាស្រស់ចំនួន១គីឡូក្រាម រថយន្តចំនួន២គ្រឿង ម៉ូតូចំនួន៣គ្រឿង និងទូរស័ព្ទដៃចំនួន២១គ្រឿង៕
រាជធានីភ្នំពេញ៖ចាប់ពីថ្ងៃទី០៤ ដល់ថ្ងៃទី០៩ ខែមេសា ឆ្នាំ២០១៧ ភ្លៀងនឹងបន្តធ្លាក់ស្ទើរពាសពេញផ្ទៃប្រទេស ពីមធ្យមទៅច្រើន។ នេះបើយោងតាមសេចក្តីជូនដំណឹងពីការព្យាករណ៍អាកាសធាតុរបស់ក្រសួងធនធានទឹក និងឧតុនិយម។
សេចក្តីជូនដំណឹងដដែលបញ្ជាក់ថា មូលហេតុដែលនាំឱ្យមានភ្លៀងធ្លាក់ខ្លាំងបែបនេះ ដោយសារតែជ្រលងសម្ពាធទាប ដែលរុញមកពីផ្នែកខាងត្បូង នៃសមុទ្រចិនខាងត្បូង បានប្រសព្វគ្នាជាមួយនឹងជ្រលងសម្ពាធខ្ពស់ ដែលរុញមកពីភាគខាងត្បូងនៃប្រទេសចិន ត្រត់តំបន់ដីសណ្តរទន្លេមេគង្គ៕
អូស្ត្រាលី៖យោងតាមទីភ្នាក់ងារព័ត៌មាន AFP បានផ្សាយថា ព្យុះស៊ីក្លូនដ៏ខ្លាំងក្លាមួយបានវាយប្រហាររដ្ឋពីររបស់អូស្ត្រាលី បង្កជាភ្លៀងធ្លាក់ជោកជាំ ដោយបណ្តាលឲ្យស្ត្រី២នាក់បានស្លាប់ និងរាប់ម៉ឺននាក់ផ្សេងទៀតត្រូវបានគេជម្លៀសទៅកន្លែងសុវត្ថិភាព។
ព្យុះស៊ីក្លូន Debbie បានបោកបក់ទៅលើភាគឦសានកាលពីថ្ងៃអង្គារកន្លងមក ដោយបានផ្ដួលរំលំដើមឈើ បោកបក់ទូកទៅទើនៅលើឆ្នេរ និងបង្កឲ្យមានការខូចខាតយ៉ាងធំធេង។ ទោះជាយ៉ាងណាព្យុះនេះបានថមថយឥទ្ធិពលមកនៅកម្រិតទាបវិញ នៅពេលវាបោកបក់សំដៅទៅភាគអាគ្នេយ៍អូស្ត្រាលី។ ប៉ុន្តែវានៅតែបន្តបង្កមហន្តរាយ និងនាំមកនូវភ្លៀងធ្លាក់យ៉ាងជោកជាំ នៅពេលវាបោកបក់កាត់ឆ្នេរភាគខាងកើត សំដៅទៅរដ្ឋ New South Wales ភាគខាងត្បូងទីក្រុង Queensland និងទីក្រុងស៊ីដនី៕
ប៉ាគីស្ថាន៖គ្រូពេទ្យម្នាក់ប្រចាំនៅមន្ទីរពេទ្យក្នុងតំបន់បានឲ្យដឹងថា សពមនុស្ស២២នាក់ត្រូវបានគេបញ្ជូនទៅដល់មន្ទីរពេទ្យ និងមានអ្នករបួស៥៧នាក់ ក្នុងនោះមានទាំងស្ត្រី និងក្មេងៗផងដែរ បន្ទាប់ពីរថយន្តផ្ទុកគ្រាប់បែកមួយគ្រឿង បានផ្ទុះឡើងកម្ទេចផ្សារមួយកន្លែង នៅតំបន់កុលសម្ព័ន្ធនិកាយស៊ីអ៊ីត។ នេះបើយោងតាមទីភ្នាក់ងារ AFP។
ការវាយប្រហារនេះបានកើតឡើងក្រោយពីរលកអំពើហិង្សាបង្កឡើងដោយពួកឧទ្ទាមបានសម្លាប់មនុស្ស១៣០នាក់នៅទូទាំងប្រទេសប៉ាគីស្ថាន កាលពីខែកុម្ភៈកន្លងមក ដែលបង្កភាពភ័យខ្លាចដល់ប្រជាពលរដ្ឋ។
ជុំវិញករណីនេះនាយករដ្ឋមន្ត្រីប៉ាគីស្ថាន លោក ណាវ៉ាស ហ្សារីហ្វ បានប្រកាសថ្កោលទោសចំពោះការវាយប្រហារនេះ ដោយលោកជំរុញឲ្យកម្ទេចចោលទាំងស្រុងនូវក្រុមភេរវកម្មនៅក្នុងប្រទេសប៉ាគីស្ថាន។
គួរបញ្ជាក់ថា ពួកឧទ្ទាមតាលីបង់បានប្រកាសទទួលខុសត្រូវចំពោះការវាយប្រហារនេះផងដែរ៕
ដោយ៖បក្សីចាំក្រុង
ភ្នំពេញ៖ប្រជាពលរដ្ឋប្រទះឃើញសាកសពបុរសម្នាក់ស្លាប់ក្នុងថ្លុកឈាម សង្ស័យជាករណីឃាតកម្មវាយសម្លាប់រួចយកទៅប្លុងចោលកណ្តាលវាលស្រែកក្រោមដំនក់ទឹកភ្លៀង ហេតុការណ៍នេះផ្អើលកាលពីវេលាម៉ោង៦ព្រឹកថ្ងៃទី១ខែមេសាឆ្នាំ២០១៧ នៅចំណុចភូមិព្រែកសណ្តែក សង្កាត់កាកាប ខណ្ឌពោធិ៍សែនជ័យ។
សាកសពបុរសដែលវាយប្រហាររហូតដល់ស្លាប់នោះឈ្មោះ ជួន ស៊ីវុធថារិន អាយុ២១ មុខជាកម្មករសំណង់ ស្នាក់នៅក្នុងរោងសំណង់ ក្នុងភូមិចំការឱឡឹក សង្កាត់កាកាប ខណ្ឌពោធិ៍សែនជ័យ ដែលមានស្រុកកំណើតនៅ ភូមិអា៣ ឃុំពាមជរ ស្រុកព្រៃវែង ខេត្តព្រៃវែង។ ចំណែកប្រពន្ធឈ្មោះ វ៉ាន់ ណូ អាយុ២៤ឆ្នាំ មានកូនស្រីអាយុ៣ឆ្នាំម្នាក់ និងកំពុងមានទម្ងន់៥ខែ ស្នាក់នៅក្នុងរោងសំណង់ ក្នុងភូមិព្រែកសណ្តែក សង្កាត់កាកាប ខណ្ឌពោធិ៍សែនជ័យ ស្រុកកំណើតនៅ ភូមិចាក់ខ្លាញ់ ឃុំពាមរោរិ៍ ស្រុកពាមរោរិ៍ ខេត្តព្រៃវែង។
តាមការរៀបរាប់ស្ត្រីដែលជាប្រពន្ធបានអោយដឹងថា នៅមុនពេលកើតហេតុវេលាម៉ោង១០យប់ ថ្ងៃទី៣១ ខែមីនា ឆ្នាំ២០១៧ ប្តីរបស់គាត់បានត្រលប់មកពីផឹកស្រានៅផ្ទះបងថ្លៃក្នុងអាការៈស្រវឹងតិចតួច ប៉ុន្តែគាត់មិនបានចូលសម្រាកជាមួយប្រពន្ធនិងកូនទេ គាត់បានហួសទៅរោងសំណង់ខាងមុខប្រមាណ១០០ ទៅសុំបារីពីក្រុមសំណងដែលកំពុងផឹកស៊ីក្នុងនោះ។ ដោយចាំប្តីយូរពេករូបខ្លួនជានប្រពន្ធក៏បានទៅតាមប្តី ដល់រោងដល់រោងសំណងនោះ តែនៅក្នុងរោងសំណងនោះមិនមានមនុស្សទេហើយងងឹត ណាមួយទុកកូនតូចអោយនៅផ្ទះម្នាក់ឯងទើបរូបខ្លួនជាប្រពន្ធបានទៅកន្លែងសម្រាកវិញ។ លុះព្រឹកឡើងស្រាប់មានប្រជាពលរដ្ឋបានប្រទះឃើញសាកសពប្តីរបស់ខ្លួនស្លាប់នៅក្នុងថ្លុកឈាមយ៉ាងអណោចអាធ័ម។
ក្រោយពេលកើតហេតុសមត្ថិកិច្ចបានឃាត់ខ្លួនជនសង្ស័យ៤នាក់ដើម្បីធ្វើការសាកសួរ ហើយសាច់ញាតិជនរងគ្រោះកំពុងរង់ចាំមើលថាតើសមត្ថិកច្ចមានវិធានការយ៉ាងណាចំពោះករណីនេះ៕
ខេត្តប៉ៃលិន៖បុរសម្នាក់បានស្លាប់បាត់បង់ជីវិតភ្លាមៗនៅនឹងកន្លែងគួរឲ្យអាណោចអាធ័ម ខណៈកំពុងតែជិះម៉ូតូសុខៗស្រាប់តែជំងឺស្កន់ជាន់ (ឆ្កួតជ្រូក) រើឡើង បណ្តាលឲ្យរេចង្កូតទៅបុកនឹងដើមឈើពេញទំហឹងតែម្តង។ ហេតុការណ៍គ្រោះថ្នាក់នេះកើតឡើងកាលពីវេលាម៉ោង១១ និង១៥នាទីថ្ងៃទី៣១ ខែមីនា ឆ្នាំ២០១៧ ស្ថិតនៅភូមិសួនអំពៅលិច សង្កាត់ប៉ៃលិន ក្រុងប៉ៃលិន ខេត្តប៉ៃលិន។
ក្រោយកើតហេតុសមត្ថកិច្ចបានចុះមកធ្វើការត្រួតពិនិត្យនៅកន្លែងកើតហេតុ និងបានប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណី៕
រាជធានីភ្នំពេញ៖យោងតាមសេចក្តីប្រកាសរបស់ក្រសួងធនធានទឹក និងឧតុនិយម បានឲ្យដឹងនារសៀលថ្ងៃទី៣១ ខែមិនា ឆ្នាំ២០១៧ នេះថា បាតុភូតធម្មជាតិចំនួន៣ក្នុងនោះមាន កំណួចខ្យល់ ជ្រលងសម្ពាធខ្ពស់ខ្សោយ និងការបំភាយកំដៅចេញពីសំបកផែនដី នឹងជួបគ្នានៅក្នុងបរិយាកាសនៃព្រះរាជាណាចក្រកម្ពុជានាថ្ងៃទី០១ ខែមេសា ឆ្នាំ២០១៧ ដែលនឹងបង្កឲ្យធាតុអាកាសនៅព្រះរាជាណាចក្រកម្ពុជាមានស្ថានភាពដូចខាងក្រោម៖
ខេត្តឧត្តរមានជ័យ៖អាជ្ញាធរថៃបានបញ្ជូនពលរដ្ឋខ្មែរចំនួន៥នាក់ ដែលបានលួចឆ្លងដែនខុសច្បាប់ ហើយលួចកាប់ឈើគ្រញូងក្នុងទឹកដីថៃត្រូវបានអាជ្ញាធរថៃចាប់កាលពីឆ្នាំ២០១៦ និងឆ្នាំ២០១៧កន្លងទៅនេះ មកស្រុកវិញកាលពីព្រឹកថ្ងៃទី៣១ ខែមីនា ឆ្នាំ២០១៧។
សមត្ថកិច្ចកម្ពុជាបន្ត ពលរដ្ឋខ្មែរទាំង៥នាក់ ទី១ ឈ្មោះ សែន ម៉ៅ ភេទប្រុស អាយុ១៥ឆ្នាំ រស់នៅភូមិទួលគ្រួស ឃុំថ្លាត ស្រុកអន្លង់វែង ទី២ ឈ្មោះ វុទ្ឋ ធី ភេទប្រុស ១៦ឆ្នាំ រស់នៅភូមិគោកធ្លុក សង្កាត់កូនក្រៀល ក្រុងសំរោង ទី៣ ឈ្មោះ ហៀន ថីត ភេទប្រុស អាយុ១៣ ឆ្នាំ រស់នៅភូមិអូរស្វាយ ឃុំអូរស្វាយ ស្រុកត្រពាំងប្រាសាទ នាក់ ទាំង ៣នាក់ អាជ្ញាធរចាប់ខ្លួនថ្ងៃទី០៦ ខែកុម្ភៈ ឆ្នាំ២០១៦ ពីបទឆ្លងដែនកាប់ឈើគ្រញូង ចូលតាមច្រកអូរស្វាយ ជាប់គុកខេត្តអូរប៊ុន ទី៤ ឈ្មោះ ពៅ តុលា ភេទប្រុស អាយុ១៥ឆ្នាំ រស់នៅភូមិស្រែល្អ ឃុំបាក់អន្លុង ស្រុកត្រពាំប្រសាទ ទី៤ ឈ្មោះ អ៊ី ហុង ភេទប្រុស អាយុ១៦ឆ្នាំ រស់នៅភូមិត្រនប់អភិវឌ្ឍន៍ ឃុំអូរស្វាយ ស្រុកត្រពាំប្រសាទ ពលរដ្ឋទាំង២នាក់នេះ អាជ្ញាធរចាប់ខ្លួនថ្ងៃទី០៥ ខែកុម្ភៈ ឆ្នាំ២០១៧ ពីបទកាប់ឈើគ្រញូងខុសច្បាប់ ចូលតាមច្រកអូរឫស្សី ជាប់គុកនៅខេត្តស៊ីសាគេត ប្រទេសថៃ។
ក្រោយពីសមត្ថកិច្ចថៃ បញ្ជូលពលរដ្ឋទាំង៥នាក់ សមត្ថកិច្ចកម្ពុជាបានធ្វើការអប់រំ និងណែនាំបញ្ហាលួចឆ្លងដែនខុសច្បាប់ ចូលទៅលួចកាប់ឈើគ្រញូង សំណាងណាស់ដែលសមត្ថកិច្ចថៃមិនបានផ្ទុះអាវុធ បង្ករងគ្រោះថ្នាក់ដល់អាយុជីវិត៕
រាជធានីភ្នំពេញ៖មន្ត្រីអ្នកនាំពាក្យ គ.ជ.ប ត្រូវបានគេស្រង់សំដីថា គ.ជ.ប គ្រោងនឹងចេញបម្រាម មិនឲ្យមានការស្ទង់មតិ ពីប្រជាប្រិយភាពគណបក្សនយោបាយ នៅអំឡុងពេល១សប្តាហ៍ មុនថ្ងៃបោះឆ្នោត ក្រុមប្រឹក្សាឃុំ-សង្កាត់។ មន្ត្រីដដែលបញ្ជាក់ថា បម្រាមនោះមានន័យថា នៅមុនការបោះឆ្នោត អំឡុង៧ថ្ងៃ គឺហាមដាច់ខាត មានការស្ទង់មតិថា គណបក្សនយោបាយមួយណា ឈ្នះ, ចាញ់ នោះឡើយ។
មន្ត្រីអ្នកនាំពាក្យបន្ថែមថា បម្រាមនោះ គឺដើម្បីចៀសវាង កុំឲ្យមានការច្របូលច្របល់នៅមុន ការបោះឆ្នោតឈានចូលមកដល់។ ទន្ទឹមនោះគឺកុំឲ្យមាន គណបក្សនយោបាយមួយចំនួន ឆ្លៀតឱកាសគេងចំណេញនយោបាយទៅឲ្យគណបក្សរបស់ខ្លួន៕
ដោយ៖បក្សីចាំក្រុង
ភ្នំពេញ៖សាលារាជធានីភ្នំពេញបានបើកស្ពានអាកាសថ្មើរជើង២កន្លែង អោយប្រើប្រាស់ជាបណ្តោះអសន្នដែលស្ថិតនៅតាមបណ្តោយផ្លូវជាតិលេខ៤ក្នុងសង្កាត់ចោមចៅ ខណ្ឌពោធិ៍សែនជ័យ។
រយៈពេលកន្លងមកនេះប្រជាពលរដ្ឋរួមទាំងសិស្សានុសិស្ស បានបង្ហាញអារម្មណ៍ខកបំណង ដោយសារតែពួកគាត់នៅតែ ដើរឆ្លងកាត់ផ្លូវដដែល ដើម្បីឆ្លងទៅកាន់ស្ពានអាកាសថ្មើរ ទើបអាចឡើងឆ្លងកាត់ស្ពាននេះបាន។
ទោះយ៉ាងណា រដ្ឋបាលរាជធានីភ្នំពេញបានឲ្យដឹងថា “ដោយមានបញ្ហាចម្ងល់ក្នុងបណ្តាញ Facebook ស្តីពីករណីស្ពានអាកាសថ្មើរជើងនៅផ្លូវជាតិលេខ ៤ មន្ទីរសាធារណការ និងដឹកជញ្ជូនរាជធានីភ្នំពេញ សូមថ្លែងអំណរគុណនូវមតិយោបល់ និងសូមធ្វើការបំភ្លឺជូនសាធារណជន ដូចខាងក្រោម៖ ១-ការសិក្សាគម្រោងឈរលើហេតុផលបច្ចេកទេស និងផលប៉ះពាល់ជាចម្បង គឺជាការសិក្សាដោះស្រាយបញ្ហាចរាចរដោយរៀបចំជាហេដ្ឋារចនាសម្ព័ន្ឋក្នុងតំបន់ រួមមានបញ្ហាលំហូរចរាចរ បញ្ហាចំណតរថយន្ត បញ្ហាសុវត្ថិភាព បញ្ហាថ្មើរជើង បញ្ហាបណ្តាញប្រឡាយបង្ហូរ និងរៀបចំសណ្តាប់ធ្នាប់អោយបានល្អ។ ២-បញ្ហាផលប៉ះពាល់ផ្សេងៗ ដូចជាបណ្តាញអគ្គិសនី បណ្តាញទឹក បណ្តាញប្រៃសណីយ៍…និងផលប៉ះពាល់ប្រជាពលរដ្ឋ ជារឿងសំខាន់ ។ ករណីនេះ បើជណ្តើរស្ពានថ្មើរជើងចុះ ឬឡើងចំពីមុខផ្ទះកៀកមាត់ទ្វារ ម្ចាស់ផ្ទះនឹងជំទាស់ដាច់ខាតដោយសារជណ្តើរបិទមុខផ្ទះប្រជាពលរដ្ឋ។ ៣-ផ្លូវក្រៅសងខាង សម្រាប់តែយានយន្តចេញនិងចូលផ្ទះប្រជាពលរដ្ឋសងខាងផ្លូវប៉ុណ្ណោះជាផ្លូវចរាចរមិនច្រើនទេ ហើយបើធ្វើដំណើរផ្លូវឆ្ងាយ យានយន្តត្រូវបត់ទៅគន្លងផ្លូវកណ្តាលចំនួន ៦ខ្សែ ដែលជាផ្លូវល្បឿនលឿន គ្មានឧបសគ្គ។ ៤-ជួររត់ត្រង់នឹងគន្លងជណ្តើរស្របផ្លូវនេះ យើងបង្កើតបានចំណតរថយន្តជាច្រើនរួមទាំងរៀបចំសួនច្បារផងដែរ។ ទីតាំងនេះ បើដោះស្រាយបញ្ហាចំណតមិនបាន ការកកស្ទះចរាចរច្បាស់ជាកើតមានដដែល។ ៥-ការរៀបចំប្រឡាយបង្ហូរទឹកនិងបណ្តាញលូ។ ដោយសារទីតាំងនេះ ជាតំបន់រងនូវទឹកជំនន់លិច យើងបានសិក្សាទីតាំងគ្រឹះស្ពាន មិនអោយប៉ះពាល់ដល់បណ្តាញផ្លូវទឹក និងបណ្តាញបំពង់ក្រោមដីទឹកស្អាតផងដែរ”
សូមបញ្ជាក់ថា រហូតមកដល់ពេលនេះ ស្ពានអាកាសថ្មើរជើងទាំង២កន្លែងស្ថិតនៅតំបន់ជម្ពូវន្ត័ សម្រេចបាន៩០% ដោយគ្រោងនឹងបញ្ចប់នៅពេលឆាប់ៗឬយ៉ាងយូរបំផុតឲ្យរួចរាល់មុនបុណ្យចូលឆ្នាំខ្មែរខាងមុខនេះ៕
ដោយ៖ប៉ែន សុផល
បាត់ដំបង៖កម្លាំងមន្ទីរប្រឆាំងគ្រឿងញៀនក្រសួងមហាផ្ទៃសហការជាមួយកម្លាំងនៃស្នងការដ្ឋាននគរបាលខេត្តបាត់ដំបងដោយមានការសម្របសម្រួលដោយលោក នួន សាន ព្រះរាជអាជ្ញាអមសាលាដំបូងខេត្តនិងលោកឧត្តមសេនីយ៍ទោ ស ថេត ស្នងការខេត្តផងនោះ បានចុះប្រតិបត្តិការបង្ក្រាបករណីជួញដូរថ្នាំញៀនពីរករណីផ្សេងគ្នាដោយឃាត់ខ្លួនជនសង្ស័យ៥នាក់រួមនិងថ្នាំញៀនប្រភេទយ៉ាម៉ាចំនួន៥៨ថង់ធំស្មើ១១៥៨៦គ្រាប់និងប្រភេទម៉ាទឹកកកចំនួន១០ថង់ធំទម្ងន់៩៧៦,៧០ក្រាម។
លោក កុយ ហៀង ស្នងការ រងទទួលផែនប្រឆាំងបទល្មើសបានប្រាប់អោយដឹងថា៖ក្នុងកិច្ចប្រតិបត្តិការបង្ក្រាបករណីជួញដូថ្នាំញៀនខាងលើនេះបានធ្វើឡើងនៅរសៀលថ្ងៃទី៣០ ខែមីនា ឆ្នាំ២០១៧នៅចំណុចភូមិព្រះពុទ្ធ ឃុំបឹងរាំង និងចំណុចភូមិ ស្រឡៅទង ឃុំកំរៀង ក្នុងស្រុកកំរៀង ដោយក្នុងបទ ល្មើសជាក់ស្តែងសមត្ថកិច្ចជំនាញឃាត់ខ្លួនជនសង្ស័យចំនួន៥នាក់រួមមាន៖ទី១ឈ្មោះ ញែម សារឿន ភេទប្រុសអាយុ៣៨ឆ្នាំជាមន្ត្រីយោធាការពារព្រំដែន៥០៤ ជាម្ចាស់ថ្នាំរស់នៅភូមិអូរដា ឃុំអូរដា ស្រុកកំរៀង។ ទី២ឈ្មោះ.ឡុង ចន្ធូ ហៅចយ ភេទប្រុសអាយុ៣៧ឆ្នាំជាបក្សពួករស់នៅភូមិស្វាយវែង ឃុំកំរៀង ស្រុកកំរៀង។ ទី៣ឈ្មោះ.ម៉ីល សុគង់ ភេទប្រុសអាយុ៣២ឆ្នាំជាបក្សពួករស់នៅភូមិសំរោង ឃុំអូរដា ស្រុកកំរៀង។ ចំណែកវត្ថុតាងដកហូតបានរួមមាន ៖ ថ្នាំញៀនប្រភេទមេតំហ្វេតាមីន(ម៉ាទឹកកក)ចំនួន១០ថង់ធំទម្ងន់៩៧៦,៧០ក្រាម។ ថ្នាំញៀនប្រភេទមេតំហ្វេតាមីន(យ៉ាម៉ាwy)ចំនួន៥៨ថង់ស្មើនិងជាង១១៥៨៦គ្រាប់មានទម្ងន់១០៨១,៦០ក្រាម។ រថយន្តចំនួន២គ្រឿង និងទូរស័ព្ទដៃចំនួន៤គ្រឿង។
បច្ចុប្បន្នជនសង្ស័យរួមនិងវត្ថុតាងសមត្ថកិច្ចកំពុងសាកសួរបន្ថែម និងកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមនីតិវិធី៕
ខេត្តសៀមរាប៖ឌីជេរប្រចាំក្នុងក្លិប «ឆេ» ម្នាក់ ត្រូវជនមិនស្គាល់មុខបាញ់ប្រហារ បណ្តាលឱ្យត្រូវចំ.ពោះខាងស្តាំ១គ្រាប់របួសធ្ងន់ ខណៈជនរងគ្រោះចេញពីធ្វើការត្រឡប់ទៅផ្ទះវិញ ។ ហេតុការណ៍នេះកើតឡើង កាលពីវេលាម៉ោង០៣ និង៤០នាទីព្រឹកថ្ងៃទី៣១ មីនា ស្ថិតនៅចំណុចជិតផ្សារត្រាំនាគ ក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប។
ជនរងគ្រោះត្រូវបានគេស្គាល់ ឈ្មោះ មាស សុធារ័ត្ន អាយុ៣៤ឆ្នាំ ជាឌីជេរនៅក្នុងក្លិប «ឆេ» ម្តុំផ្សារចាស់ មានទីលំនៅក្នុងភូមិធ្លកអណ្តូង សង្កាត់ស្លក្រាម ខេត្តសៀមរាប ។ ចំណែកជនបង្កពុំស្គាល់មុខទេ មានចំនួន៤នាក់ ស្លៀកពាក់ឯកសណ្ឋាន និងស៊ីវិល ជិះម៉ូតូពុំស្គាល់ម៉ាក បានបាញ់ទៅលើជនរងគ្រោះរួច ជិះម៉ូតូគេចទៅទិសខាងត្បូងបាត់៕
សុខភាព៖ភ្លៅកង្កែប មិនមែនគ្រាន់តែជាល្បោយ និងអន្លក់ប៉ុណ្ណោះទេ តែអាចយកមកធ្វើជាភេសជ្ជៈទទួលទានបានផងដែរ។ ងាយស្រួលបំផុត គ្រាន់តែចាប់យកវាមួយចានចង្កឹះលាងឱ្យស្អាត រួចដាក់ចូលក្នុងម៉ាស៊ីនក្រឡុក បន្ទាប់មថែមស្ករមួយពែង និងទឹកធម្មតាពីរពែងកិនក្រឡុកឱ្យម៉ដ្ឋ។ បន្ទាប់មកយកក្រណាត់ស្ពៃត្រងយកកាកចេញ ថែមរសជាតិតាមចំណូលចិត្ត បើចង់ផ្អែមថែមស្ករបន្តិចទៀតជាការស្រេច។
អត្ថប្រយោជន៍របស់វា គឺជួយបន្ថយសម្ពាធធាម ព្យាបាលជម្ងឺក្រូសក្នុងតម្រងនោម ឬបត់ជើងតូចមានឈាមជាដើម។ ក្រៅពីនេះ វាអាចបណ្តេញខ្យល់ជាថ្នាំបំបាត់ការឈឺចាប់តាមសន្លាក់ថែមទៀតផង៕
សេអ៊ូល៖ទីភ្នាក់ងារសារព័ត៌មានយ៉ុនហាប់ចេញផ្សាយមុននេះបន្តិចថា អតីតប្រធានាធិបតីកូរ៉េខាងត្បូង លោកស្រី ផាក គឺនហេ ត្រូវបានចាប់ខ្លួនបញ្ជូនទៅកាន់មន្ទីរឃុំឃាំងក្នុងទីក្រុងសេអ៊ូល បន្ទាប់ពីចំណាយពេលអស់ជាង៩ម៉ោងកាលពីថ្ងៃព្រហស្បតិ៍ក្នុងសវនាការ។
លោកស្រីត្រូវបានតុលាការបង្គាប់ឱ្យចាប់ខ្លួននៅថ្ងៃសុក្រនេះពាក់ព័ន្ធសំណុំរឿងពុករលួយនយោបាយជាមួយលោកស្រី ឆយ ស៊ូនស៊ីល ដែលធ្វើឱ្យលោកស្រីត្រូវបានតុលាការធម្មនុញ្ញទម្លាក់ចេញពីតំណែង កាលពីថ្ងៃទី១០ ខែមីនា បើទោះជាលោកស្រីធ្លាប់បានបដិសេធការចោទប្រកាន់នានាជាច្រើនដងក៏ដោយ។
លោកស្រី ផាក គឺនហេ បានក្លាយជាប្រធានាធិបតីកូរ៉េខាងត្បូងទី០៣ បន្ទាប់ពីលោក Roh Tae-woo និងលោក Chun Doo-hwan ដែលត្រូវបានតុលាការឃាត់ខ្លួនក្នុងសំណុំរឿងបទឧក្រិដ្ឋ ដែលអាចនឹងប្រឈមមុខជាប់ពន្ធនាគារយ៉ាងតិច ១០ឆ្នាំ ឬច្រើនជាងនេះ បើសិនតុលាការរកឃើញថា លោកស្រីបានប្រព្រឹត្តកំហុសដូចការចោទប្រកាន់មែននោះ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
