ភ្នំពេញ៖ ទីភ្នាក់ងារ សហប្រតិបត្តិការ អន្តរជាតិ នៃប្រទេសជប៉ុន JICA បានផ្តល់ប្រាក់កម្ចីសម្បទានសរុបប្រមាណ ១៩.៦០០.០០០.០០០ យ៉េនជប៉ុន ស្មើប្រមាណជា ១៧៨.៥០០.០០០ ដុល្លារអាមេរិក ដល់កំពង់ផែស្វយ័តក្រុងព្រះសីហនុ សម្រាប់អភិវឌ្ឍន៍ផ្នែករឹង និងផ្នែកទន់ ចាប់តាំងពីឆ្នាំ១៩៩៩ រហូតមកដល់បច្ចុប្បន្ននេះ។
បន្ទាប់ពីការបោះឆ្នោតជាសកលក្នុងឆ្នាំ១៩៩៣មករដ្ឋាភិបាលជប៉ុន ក៏ដូចជា JICA បានផ្តល់ជំនួយឥតសំណង ជំនួយសហប្រតិបត្តិការបច្ចេកទេស និងប្រាក់កម្ចីសម្បទាន ជាបន្តបន្ទាប់ ដល់រាជរដ្ឋាភិបាលកម្ពុជា ជាពិសេស ការអភិវឌ្ឍកំពង់ផែក្រុង ព្រះសីហនុ ដូចជាការស្តារឡើងវិញ និងពង្រីកនូវ រចនា សម្ព័ន្ធរូបវន្តកំពង់ផែ ដើម្បីពង្រឹងនូវសមត្ថភាព ប្រតិបត្តិការលើកដាក់ ទំនិញកុងតឺន័រ។
នៅក្នុងរបាយការណ៍របស់ Japan’s ODA នៅកម្ពុជា បានអោយដឹងថា គម្រោងអភិវឌ្ឍន៍កំពង់ផែស្វយ័តព្រះសីហនុមានចំនួន៥គម្រោង ៖
ទី១- គម្រោងស្តារបន្ទាន់កំពង់ផែក្រុងព្រះសីហនុ (២០០២-២០០៥) ប្រើប្រាស់ប្រាក់កម្ចី ODA លេខ CP-P3 ក្នុងរង្វង់ទឹកប្រាក់សរុប ៤.១៤២.០០០.០០០ យ៉េនជប៉ុន ស្មើប្រមាណជា ៣៣,៧ លានដុល្លារ សម្រាប់អភិវឌ្ឍ និងសាងសង់ ចំំណតផែកុងតឺន័រប្រវែង ២៤០ម៉ែត្រ ទីលានកុងតឺន័រ ៦ហិកតា ព្រមទាំង បូមស្តារអាង និងឃួងនាវាជម្រៅ -១១ម៉ែត្រ ជាដើម។
ទី២-សម្រាប់ពង្រីកបន្ទាប់កំពង់ផែក្រុងព្រះសីហនុ (២០០៥-២០០៩) ប្រើប្រាស់ប្រាក់កម្ចី ODA លេខ CP-P4 ក្នុងទឹកប្រាក់សរុប ៤.៣១៣.០០០.០០០ យ៉េនជប៉ុន ស្មើប្រមាណជា ៣៤,៨លានដុល្លារ សម្រាប់អភិវឌ្ឍ និងសាសង់ ចំណតផែកុតឺន័របន្ថែម ប្រវែង ១៦០ម៉ែត្រ ទីលានកុតឺន័រ ៣,៥ ហិកតា សាងសង់ អាគាររដ្ឋបាល ច្រកចេញចូលតែមួយ ព្រមទាំង ពង្រីកនិងបូមស្តារអាង និងឃួងនាវាបន្ថែម ជម្រៅ -១១ម៉ែត្រ។ ក្រៅពីនេះបានបំពាក់បន្ថែមនូវគ្រឿងចក្រ ទំនើបសម្រាប់លើកដាក់កុងតឺន័រ ប្រភេទ QC ២គ្រឿង និងប្រភេទ RTG ៥គ្រឿង រថយន្តនិងកន្ទុយសណ្តោង ៨គ្រឿង ព្រងទាំងប្រព័ន្ធកុំព្យូទ័រស្វ័យប្រវត្តិកម្ម ១កំប្លេ។
ទី៣-គម្រោងសិក្សាលទ្ធភាពអភិវឌ្ឍន៍តំបន់សេដ្ឋកិច្ចពិសេសកំពង់ ផែព្រះសីហនុ (២០០៧-២០០៩) ប្រើប្រាស់កម្ចី ODA លេខ CP-P6 ក្នុងទឹកប្រាក់សរុប ៣១៨.០០០.០០០ យ៉េនជប៉ុន ស្មើប្រមាណ ២,៨លានដុល្លារ សម្រាប់សិក្សាលទ្ធភាព និងគំនូសប្លង់លំអិត នៃការអភិវឌ្ឍតំបន់សេដ្ឋកិច្ចពិសេ កំពង់ផែព្រះសីហនុ។
ទី៤-គម្រោងសាងសង់តំបន់សេដ្ឋកិច្ចកំពង់ផែក្រុងព្រះសីហនុ (២០០៩-២០១២) ប្រើប្រាស់កម្ចី ODA លេខ CP-P8 ក្នុងទឹកប្រាក់សរុប ៣.៦៥១.០០០.០០០ យ៉េនជប៉ុន ស្មើប្រមាណ៣២,៩លានដុល្លារ សម្រាប់សាងសង់ហេដ្ឋារចនាសម្ព័ន្ធរូបវន្តតំបន់សេដ្ឋកិច្ចពិសេសកំពង់ ផែក្រុងព្រះសីហនុ ដូចជាអាគាររដ្ឋបាល ច្រកចេញចូលតែមួយ ស្ថានីយ៍ភស្តុភារកុងតឺន័រ ផ្លូវថ្នល់ចូល និងផ្លូវថ្នល់ក្នុងតំបន់ SEZ ដីជួលសម្រាប់សាងសង់រោងចក្រ ៤៥ហិកតា រោងចក្រសម្រាប់ជួល មួយខ្នង អាគារស្នាក់នៅសម្រាប់បុគ្គលិក-កម្មករ រោងចក្រចម្រោះទឹកកខ្វក់ ប្រព័ន្ធផ្គត់ផ្គង់ទឹកស្អាត អគ្គិសនីនិងទូរគមនាគមន៍ ។ល។
ទី៥-គម្រោងអភិវឌ្ឍចំណតផែពហុបំណងកំពង់ផែក្រុងព្រះសីហនុ (២០១៥-២០១៧) ប្រើប្រាស់កម្ចី ODA លេខ CP-P១០ ក្នុងទឹកប្រាក់សរុប ៧.១៧៦.០០០.០០០ យ៉េនជប៉ុន ស្មើប្រមាណ ៧៤,២លានដុល្លារ។
បន្ថែមលើឋបនីភណ្ឌមានស្រាប់ ក.ស.ស បានកំពុងសាងសង់ចំណតផែពហុបំណង ដែលមានបណ្តោយប្រវែង ៣៣០ម៉ែត្រ និងជម្រៅទឹក -១៣ម៉ែត្រ សម្រាប់ប្រតិបត្តិការ លើកដាក់ទំនិញរាយនិងទំនិញទូទៅ និងសាងសង់មូលដ្ឋានផ្គត់ផ្គង់ការរុករករ៉ែប្រេងក្នុងដែនសមុទ្រ ដើម្បីជម្រុញលើកទឹកចិត្តដល់ការ នាំចេញផលិតផលកសិកម្មកម្ពុជា ចំណាំឈើ ចំណិតដំឡូងមីក្រៀម ជាពិសេសដើម្បីឆ្លើយតបនឹងការពង្រីកយុទ្ធសាស្ត្រនាំចេញអង្កររបស់ រដ្ឋាភិបាលកម្ពុជា និងបម្រើសេវាភស្តុភារកម្ម សម្រាប់ការរុករកប្រេងក្នុងដែនសមុទ្រកម្ពុជា ក៏ដូចជា ជួយជំរុញដល់កំណើនសេដ្ឋកិច្ចរបស់ប្រទេសកម្ពុជា។
នៅក្នុងរបាយការណ៍ដដែលនោះបន្តថា បរិមាណទំនិញដែលឆ្លងកាត់កំពង់ផែក្រុងព្រះសីហនុ បានកើនឡើងជាបន្តបន្ទាប់ពី ១០ភាគរយ ទៅ១៥ភាគរយ ក្នុងមួយឆ្នាំ ហើយរយៈពេល៥ឆ្នាំចុងក្រោយនេះ ក.ស.ស បានលើកដាក់ទំនិញ ២.២១៧.១៥០ តោន នៅឆ្នាំ២០១០ និង ៣.៤២៣.៩១៩ តោន នៅឆ្នាំ២០១៤ ដែលជាមធ្យមទំនិញកើនឡើង ១២,៥ភាគរយ ក្នុងមួយឆ្នាំ ហើយនៅឆ្នាំ២០១៥នេះ រំពឹងថានឹងកើនឡើងប្រមាណ ៤.០០០.០០០ តោន កើនលើសឆ្នាំ២០១៤ ប្រមាណ ១៥ភាគរយ។
ក្នុងនោះបរិមាណទំនិញកុងតឺន័រ ក៏កើនឡើងគួរអោយកត់សំគាល់ ដោយបរិមាណកុងតឺន័រ ឆ្លងកាត់កំពង់ផែក្រុងព្រះសីហនុ នៅឆ្នាំ២០១០ គឺ ២២២.៩២៨ TEUs និង ៣៣៣.៩០៤ TEUs ពោលគឺកើនឡើងជាមធ្យម ១០ភាគរយ ក្នុងមួយឆ្នាំ ហើយរំពឹងថានៅឆ្នាំ២០១៥នេះ ក.ស.ស នឹងលើកដាក់កុងតឺន័រប្រមាណ ៣៩៤.០០០ TEUs ជាមួយអត្រាកំណើន ១៨ភាគរយ បើធៀបនឹងឆ្នាំ២០១៤។
របាយការណ៍នោះបន្តទៀតថា ការប្រើប្រាស់ប្រាក់កម្ចីសម្បទាន ODA ជំនួយឥសំណង និងជំនួយសហប្រតិបត្តិការបច្ចេកទេស ដោយរដ្ឋាភិបាលជប៉ុន ក៏ដូចជា JICA សម្រាប់អភិវឌ្ឍ ហេដ្ឋារចនាសម្ព័ន្ធផ្នែករឹង និងផ្នែកទន់ របស់កំពង់ផែក្រុងព្រះសីហនុ បានប្រែក្លាយកំពង់ផែស្វយ័តក្រុងព្រះសីហនុរបស់កម្ពុជា ជាកំពង់ផែមានលក្ខណៈអន្តរជាតិ ដែលមានគុណភាព មានសេវាល្អប្រសើរ ប្រកបដោយសន្តិសុខ និងបរិស្ថានល្អ។
កំពង់ផែក្រុងព្រះសីហនុបាននិងកំពុងដើរតួនាទីដ៏សកម្ម ជាច្រកទ្វារសេដ្ឋកិច្ចអន្តរជាតិ ក្នុការជួយសម្រួលដល់ការនាំចេញ នាំចូលទំនិញគ្រប់ ប្រភេទពីប្រទេសកម្ពុជា៕fpm
