ក្រសួង​វប្បធម៌​តាំងពិព័រណ៍​គ្រឿង អលង្ការបុរាណ​ខ្មែរ​ធ្វើ​អំពី​មាស និង​ប្រាក់ នៅ​សារមន្ទីរ​ជាតិ​
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 4 January, 2018

ភ្នំពេញ ៖ លោកជំទាវ​ឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួង​ទំនាក់ទំនង​ជាមួយ​រដ្ឋ​សភា ព្រឹទ្ធសភា និង​អធិការកិច្ច តំណាង​ដ៏​ខ្ពង់ខ្ពស់​សម្តេច​តេ​ជោ​នាយករដ្ឋមន្ត្រី នា​ព្រឹក​ថ្ងៃទី​៤ ខែមករា ឆ្នាំ​២០១៨ នេះ បាន​អញ្ជើញ​ជា​អធិបតី​ក្នុង​ពិធី​ដ៏​មាន​សារសំខាន់​ចំនួន​២ ដែល​បានរៀបចំ​ធ្វើឡើង​ដោយ​ក្រសួង​វប្បធម៌ និង​វិចិត្រសិល្បៈ​នៅ​សារមន្ទីរ​ជាតិ​កម្ពុជា គឺ​ពិធី​សំពះគ្រូ និង​ការ បើក​ពិព័រណ៍​គ្រឿងអលង្ការ​លំអ បុ​រា ណ​ខ្មែរ​ធ្វើ​អំពី​មាស និង​ប្រាក់ ដែល​សារមន្ទីរ​ជាតិ​ទទួល បានជា​បន្តបន្ទាប់​ចាប់តាំងពី​សារមន្ទីរ បាន បើកទ្វារ​នា​ឆ្នាំ​១៩២០​មកជា​ពិសេស​គ្រឿងអលង្ការ​មាស សម្រាប់​បំពាក់​ព្រះ​បដិមា​នា​សម័យអង្គរ ដែល ប្រទេស​កម្ពុជា​ទើប​ធ្វើ​មាតុភូមិនិវត្តន៍​ពី​ទីក្រុង​ឡុង​ដ៏ ចក្រភព​អង់គ្លេស​កាលពី​ថ្ងៃទី​២ ខែធ្នូ ឆ្នាំ​២០១៧ កន្លងទៅនេះ​។​
​រដ្ឋមន្ត្រីក្រសួង​វប្បធម៌ និង​វិចិត្រ​លោកជំទាវ ភឿង ស​កុ​ណា មានប្រសាសន៍ថា ថ្ងៃនេះ​ក្រសួង​បាន សម្ពោធ​ចាប់ផ្តើម​ការតាំងពិព័រណ៍​ពិសេស​មួយ​ដោយ​ជ្រើសរើស​គ្រឿងអលង្ការ​ប្រណិតៗ ជា​មាស និង​ប្រាក់ ដែល​សារមន្ទីរ​ជាតិ​កម្ពុជា​ទទួលបាន​ពី​សប្បុរសជន ពី​ការ​កំណាយ​ស្រាវជ្រាវ​បុរាណវិទ្យា ដែល​វត្ថុ​នេះ​មួយចំនួនធំ ក្រសួង​រក្សាទុក​ក្នុង​ឃ្លាំង​សុវត្ថិភាព​ដោយ​កម្រ​បាន​តាំង​បង្ហាញ​ជា​សាធារណៈ ជាពិសេស​ថ្មីៗ​នេះ​ប្រទេស​កម្ពុជា​ទើប​ទទួលបាន​នូវ គ្រឿងអលង្ការ​ធ្វើ​អំពី​មាស​សម្រាប់ បំពាក់​លំអ​លើ ព្រះ​បដិមា​ថ្ម​នៃ​សម័យអង្គរ ដែល​បាន​បាត់បង់​ពី​កម្ពុជា​ជា​យូរណាស់ មក​ហើយពី​ចក្រភព​អង់គ្លេស​មក វិញ​ដែល​ត្រូវ​ដាក់តាំង​បង្ហាញជូន​សាធារណជន​ទស្សនា​ស្វែងយល់​នៅ​សារមន្ទីរ​ជាតិ​កម្ពុជា​រយៈពេល​មួយខែ​ចាប់ពី​ថ្ងៃទី​៤ ខែមករា ដល់​ថ្ងៃទី​៣ ខែកុម្ភៈ ឆ្នាំ​២០១៨​។​
​លោកជំទាវ​រដ្ឋមន្ត្រី បាន​គូសបញ្ជាក់ ថា គ្រឿងអលង្ការ​បុរាណ​ទាំងនេះ​គឺជា​ដួងព្រលឹង របស់​ខ្មែរ​ដែល មិនអាច​កាត់ថ្លៃ​បាន ដែល​ខ្មែរ​ទាំងអស់គ្នា​ត្រូវ​ចូលរួម​ថែរក្សា​អោយបាន​គង់វង្ស បន្ទាប់​យើង​យកបាន មកវិញហើយ​នោះ​។​
​ចំណែក​លោកជំទាវ​ឧបនាយករដ្ឋមន្ត្រី ម៉ែន សំអន មានប្រសាសន៍ថា ពិព័រណ៍​នាពេលនេះ បាន​បង្ហា ញ​អោយឃើញ​នូវ​វត្ថុ​អស្ចារ្យៗ ជា​គ្រឿងអលង្ការ​ធ្វើ​ពី​មាស និង​ប្រាក់​ដែលជា​ស្នាដៃ​សិល្បៈ ខ្មែរ​បុរាណ ដ៏​ល្អ​ឯក និង​គំនិត​ច្នៃប្រឌិត​នៃ​គ្រូ និង​សិល្បករ​ខ្មែរ​ពី​ជំនាន់​មួយ​ទៅ​ជំនាន់​មួយ ជាពិសេស​គ្រឿង​អ​ល ង្កា​រមាស​សម្រាប់​បំពាក់​ព្រះ​បដិមា​នា​សម័យអង្គរ ដែល​កម្ពុជា​ទើប​ធ្វើ​មាតុភូមិនិវត្តន៍​ពី​ទីក្រុង​ឡុង​ដ៏ ចក្រភព​អង់គ្លេស និង​បាន​បង្ហាញជូន​ដល់​សាធារណ​ជនជាតិ និង​អន្តរជាតិ​បាន ទស្សនា​ស្វែងយល់ អំពី​អតីត កាល​នៃ​សម័យបុរាណ​របស់​ខ្មែរ ហើយ​ជាមួយគ្នា​វត្ថុ​ទាំងនេះ​អាចអោយ​សិស្ស និង​និស្សិត កម្ពុជា ធ្វើការ​ស្វែងយល់​សម្រាប់​ការសិក្សា​របស់ខ្លួន​ថែម​ទៀតផង​។ ជាមួយគ្នានេះ​លោកជំទាវ​ឧបនាយករដ្ឋមន្ត្រី ម៉ែន សំអន ក៏បាន​អំពាវនាវ​ជាទូទៅ​អោយ​រួមគ្នា​ថែរក្សា និង​លើកស្ទួយ​តម្លៃ​នៃ​សិល្បៈ វប្បធម៌​ខ្មែរ​ឱ្យបាន​គង់វង្ស​ផងដែរ​៕