បន្ទាយមានជ័យ : យុវជនផ្ដាច់សារធាតុ ញៀននៅមជ្ឈមណ្ឌលកែប្រែកងរាជអាវុធហត្ថខេត្តបន្ទាយមានជ័យ ត្រូវបានព្រះគ្រូឧត្តមសីលញ្ញាន ព្រះរាជាគណៈ ធុល សុធា ព្រះមេគុណខេត្ត ព្រះគ្រូសិរីបុញ្ញោ សយ ចាន់ថន ចៅអធិការវត្តខ្មែរពុទ្ធភូមិជាយដែន លោក យិន យឿន ប្រធានមន្ទីរធម៌ការ និងសាសនាខេត្ត រួមទាំង លោកស្រី ជាវ ងួនហួយ និងក្រុមគ្រួសារ ជាសប្បុរសជន នាំយកអំណោយសំភារៈជាគឿងឧបភោគបរិភោគ និងថវិការមួយចំនួនទៅចែកជូន កាលពីរសៀលថ្ងៃទី3 ខែមករា ឆ្នាំ២០១៨។
ទន្ទឹមជាមួយនឹងការចុះសួរសុខទុក្ខនាឱកាសនោះលោកឧត្ដមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានសម្តែងការកោតសរសើរ និងអរគុណចំពោះសប្បុរសជនព្រមទាំងក្រុមការងារដែលបាននាំយកអំណោយមកចែកជូនយុវជនផ្តាច់សារជាតិញៀននៅមជ្ឈមណ្ឌលកែប្រែកងរាជអាវុធហត្ថខេត្តបន្ទាយមានជ័យដែលកំពុងផ្តាច់គ្រឿងញៀនដែលរស់នៅទីនេះដោយផ្ទាល់។
លោកមេបញ្ជាការកងរាជអាវុធខេត្តបានបន្ដថា នេះជាចំណែកមួយក្នុងការចូលរួមយក ចិត្តទុកដាក់ជួយគិតគូរដោះស្រាយរាល់ការ លំបាករបស់កងរាជអាវុធហត្ថ ក្នុងខេត្ដបន្ទាយមានជ័យ ដើម្បីឆ្លើយតបទៅនឹងគោលនយោបាយ កាត់បន្ថយកាផ្គត់ផ្គងរបស់រាជរដ្ឋាភិបាលកម្ពុជាបានមួយចំណែកផងដែរ។
លោក យិន យឿន ប្រធានមន្ទីរវប្បធម្មការ និងសាសនាខេត្ត
បានមានប្រសាសន៍ផ្តាំផ្ញើរ ក៏ដូចជាសំណូមពរដល់ក្មួយៗគ្រប់រូប សូមធ្វើយ៉ាងណាត្រូវចេះកែខ្លួនឡើងវិញដើម្បីក្លាយជាយុវជនល្អដែលសង្គមចូលចិត្តនិងត្រូវការមិនអាចខ្វះបាន ជាពិសេសត្រូវចូលរួមថែរក្សានូវសុខសន្តិភាពដែលប្រទេសជាតិកំពុងតែមានដូចសព្វថ្ងៃឲបានល្អ កុំស្តាប់ការញុះញង់ដោយជនខិលខូច កុំបង្ករចលាចលដែលអាចធ្វើឲប្រទេសធ្លាក់ចូលក្នុងភ្លើងសង្គ្រាម ព្រោះសង្គមមួយដែលមានសង្គ្រាមគឺមានតែការខាតបង់ទាំងខ្លួនឯង និងប្រទេសជាតិទាំងមូល ផ្ទុយទៅវិញប្រសិនបើប្រទេសជាតិកាន់តែអភិវឌ្ឍន៍ នោះប្រជាពលរដ្ឋក៏កាន់តែរីកចម្រើន៕ ដោយ ៖ សុផល
