ប៉ៃលិន ៖ បុរសចំណាស់ម្នាក់បានរងរបួសធ្ងន់ ខណៈនាំកូនចៅទៅកាប់ព្រៃស្រែដែលដុះក្រាស់ ក៍ត្រូវពស់ស្រកាចាស់ឈ្មោលមួយក្បាលចឹកចំជើងខាងធ្វេង ហើយត្រូវសាច់ញាតិដឹកបញ្ជូនមកព្យាបាលនៅមន្ទីរពេទ្យបង្អែកខេត្តប៉ៃលិនភ្លាមៗ ។ហេតុការណ៍ខាងលើនេះ បានកើតឡើងកាលពីវេលាម៉ោង១០និង៣០នាទីព្រឹកថ្ងៃទី២៣ ខែមករា ឆ្នាំ២០១៨ ស្ថិតនៅចំការមួយកន្លែង ក្នុងភូមិសំបូរ ឃុំសាលាក្រៅ ស្រុកសាលាក្រៅ ខេត្តប៉ៃលិន ។
បុរសចំណាស់ ដែលត្រូវពស់ចឹកឈ្មោះ តាប់ ឃឿន ហៅខាំ អាយុ៦០ឆ្នាំ ជាកសិករ មានប្រពន្ធឈ្មោះ លឹម ឡុង អាយុ៥៨ឆ្នាំ មានកូនចំនួន៥នាក់ ប្រុស៣ ស្រី២នាក់ក្នុងបន្ទុក រស់នៅភូមិ/ឃុំ កើតហេតុខាងលើ ។
បើតាមព័ត៌មានពីជនរងគ្រោះ បានរៀបរាប់ថា៖ មុនដំបូងគាត់បាននាំកូនៗ របស់គាត់ទៅមើលស្រែ ដោយធ្វើដំណើរតាមគោយន្តកន្ត្រៃ លុះទៅដល់ស្រែ ដោយឃើញស្មៅឡើងក្រាស់ ក៍នាំកូនៗ ព្រមទាំងរូបគាត់នាំគ្នាកាប់ព្រៃ តាមភ្លឺស្រែ ដែលក្រាស់ ។ បុរសរងគ្រោះ បន្តថា កំពុងតែកាប់បានប្រហែលពាក់កណ្តាល លុះដល់កន្លែងដែលស្មៅក្រាស់ជាងគេ គាត់ក៍ឈានជើងជាន់លើពស់ ដែលនៅទីនោះ បណ្តាលឲ្យវាខាំចំប្រអប់ជើងខាងងធ្វេងជាប់ ហើយគាត់ក៍ស្ទុះរត់ឡើងលើគោយន្តកន្ត្រៃភ្លាមៗ ព្រមទាំងហៅកូនៗ អោយដឹកយកទៅផ្ទះ ព្រមទាំងបញ្ជូនបន្តទៅកាន់មន្ទីរពេទ្យ ដើម្បីព្យាបាល ។
បើតាមសាច់ញាតិជនរងគ្រោះ បានឲ្យដឹងថា៖ ពេលបញ្ជូនមកដល់ផ្ទះ គឺបុរសរងគ្រោះ បានសន្លប់មួយសន្ទុះ រួចក៍ដឹងខ្លួនក៍កូនដឹកមកព្យាបាលនៅមន្ទីរពេទ្យបង្អែកខេត្តប៉ៃលិន តែម្តង ។ស្របពេល ដែលដឹកបុរសរងគ្រោះមកព្យាបាលនោះ ពស់ដែលចឹក គឺត្រូវបានអ្នកភូមិនាំគ្នាវ៉ៃងាប់ ខណៈពស់មួយងាប់ហើយ ស្រាប់តែមានពស់មួយទៀតអើតក្បាលចេញមក ក៍ត្រូវបានប្រជាពលរដ្ឋនាំគ្នាវាយអោយងាប់មួយទៀតផងដែរ ។
បច្ចុប្បន្ន បុរសរងគ្រោះត្រូវក្រុមគ្រូពេទ្យនៃមន្ទីរពេទ្យបង្អែកខេត្ត យកចិត្តទុកដាក់ព្យាបាល រហូតបានធូរស្រាលផងដែរ៕
