ខេត្តព្រះសីហនុ៖ស្ត្រីជនជាតិចិនម្នាក់ដេកស្លាប់ក្នុងរថយន្តតាក់ស៊ីខណៈចេញដំណើរពីក្រុងព្រះសីហនុឆ្ពោះទៅក្រុងភ្នំពេញ។
ហេតុការណ៍នេះកើតទ្បើង នៅម៉ោង០៦និង០៥នាទី ថ្ងៃទី១៥ ខែកុម្ភះ ឆ្នាំ២០១៨ រថយន្តតាក់ស៊ីលុចស៊ីស Lexus RX 300 ពណ៌ខ្មៅ ពាក់ស្លាកលេខ ពោធិសាត់ 2A-0808 បើកបរដោយឈ្មោះ ឡាន សុខ ភេទប្រុស អាយុ២៦ឆ្នាំ មានទីលំនៅភូមិបាត់ដំបង សង្កាត់លលកស ក្រុងពោធិសាត់ ខេត្តពោធិ៍សាត់ មានមុខរបររត់តាក់ស៊ី បានដឹកភ្ញៀវជនជាតិចិនមួយគ្រួសារមានគ្នា ចំនួន០៣នាក់ ចេញពីហាងម៉ាត ភ្នំខៀវខេត្តព្រះសីហនុ ទៅភ្នំពេញ ។ មកដល់ចំណុចចន្លោះគីឡូម៉ែត្រលេខ ១៤០-១៤១ ភូមិអូរជ្រៅ ឃុំបឹងព្រាវ ស្រុកស្រែអំបិល ខេត្តកោះកុង អ្នកបើកបរក៏បានចូលទៅចាក់សាំងនៅស្ថានីយ៍ប្រេងឥន្ធនៈស៊ូគីមិច ទើបដឹងថាមានអ្នកដំណើរស្លាប់ក្នុងរថយន្ត ជនរងគ្រោះដែលស្លាប់ក្នុងរថយន្តនេះមានឈ្មោះ XIAO FENGZHU ភេទស្រី អាយុ ៤៩ឆ្នាំ ស្នាក់នៅក្រុង-ខេត្តព្រះសីហនុ ។
បើតាមការបញ្ជាក់បន្ថែមពីកំលាំងអាវុធហត្ថស្នាក់ការសន្តិសុខ៤០២ សាកសួរព័ត៌មានពីក្រុមគ្រួសារថា ជនរងគ្រោះមានជំងឺប្រចាំកាយផង ហើយបំណងរបស់ក្រុមគ្រួសារគឺដឹកយកទៅព្យាបាលនៅប្រទេសចិនវិញ តែទោះបីមានការអះអាងរបស់ក្រុមគ្រួសារក៏ដោយ ក៏សមត្ថកិច្ចស្នាក់ការសន្តិសុខ៤០២ សហការជាមួយកំលាំងអធិការដ្ឋាននគរបាលស្រុកកំពង់សិលា នៅការពារកនែ្លងកើតហេតុ រងចាំជំនាញធើ្វកោសល្យវិច្ឆ័យទៅលើសាកសពសិន ទើបប្រគល់ទៅអោយក្រុមគ្រួសារយកទៅធ្វើបុណ្យនៅពេលក្រោយ ៕
