ភ្នំពេញ ៖ ហេតុការភ្ញាក់ផ្អើលមួយបានកើតឡើងនៅវេលាម៉ោង៣និង២៧នាទីទៀបភ្លឺថ្ងៃទី២០ ខែកុម្ភៈឆ្នាំ២០១៨ អ្នករត់តាក់ស៊ីម្នាក់ត្រូវបានបុរសម្នាក់ចេញពីក្លឹបកាហ្សា ទំនងស្រវឹងស្រាផងបានហៅ រថយន្តតាក់ស៊ីជិះចេញមកដល់ចំណុចមុខរោងកុនអង្គរមិនដឹងថាមានទំនាស់រឿងអ្វីបានដកកាំភ្លើងខ្លីបាញ់១គ្រាប់ទៅលើជនរងគ្រោះបណ្ដាលឲ្យរបួសធ្ងន់ នៅចំណុចមុខអតីតរោងកុនអង្គរ ស្ថិតក្នុងខណ្ឌ៧មករា រាជធានីភ្នំពេញ ។
ជនរងគ្រោះបានប្រាប់អោយដឹងថា នៅមុនពេលកើតហេតុ ជនសង្ស័យបានចេញពីក្លឹបកាហ្សាទំនងស្រវឹងស្រាផងបានទាក់ទងមកក្រុមហ៊ុននគររាជដើម្បីរកតាក់ស៊ីជិះ ទើបជនរងគ្រោះដែលជាអ្នកបើករថយន្តតាក់ស៊ី នគររាជដែលប្រចាំការក្បែរនោះ បើករថយន្តទៅដឹកជនសង្ស័យលក្ខណៈជាភ្ញៀវធម្មតាប៉ុណ្ណោះ ។
ប្រភពបន្តថា នៅពេលធ្វើដំណើរមកដល់ចំណុចមុខអតីតរោងកុនអង្គរមិនដឹងថាកើតមានរឿងអ្វីនោះទេ ស្រាប់តែជនសង្ស័យបានដកកាំភ្លើងខ្លីបាញ់១គ្រាប់ សំដៅលើអ្នកបើកបរតាក់ស៊ីជាជនរងគ្រោះ ចំចង្កេះខាងស្ដាំ បណ្ដាលឲ្យរបួសធ្ងន់។បន្ទាប់ពីធ្វើសកម្មភាពរួច ជនសង្ស័យបានចុះពីលើរថយន្ត រត់គេចខ្លួនចូលទៅពួនលើផ្ទះជាន់ទី២ នៅម្ដុំក្រោយសាលាសង្កាត់អូរឫស្សី១ទើបបង្កឲ្យមានការភ្ញាក់ផ្អើលដល់សមត្ថកិច្ច ចុះធ្វើការដេញចាប់តែម្ដង។
ជនរងគ្រោះឈ្មោះ ជុំ គា ភេទ ប្រុស អាយុ ៤៨ ឆ្នាំ ខ្មែរ មុខរបរ រត់ឡានតាក់ស៊ី ទីលំនៅ ភូមិ ត្រពាំងអញ្ចាញ សង្កាត់ត្រពាំងក្រសាំងខណ្ឌ ពោធិ៍សែនជ័យ ។ចំណែក ជនសង្ស័យឈ្មោះប៉ែនសាយវ័ន្ត ភេទ ប្រុស អាយុ ៣៣ ឆ្នាំ ខ្មែរ មុខរបរ យោធា ឋានន្តរសក្តិ វរសេនីយ៍ឯក អគ្គនាយកដ្ឋានសម្ភារៈបច្ចេកទេសទីលំនៅផ្ទះលេខ២៨២ភូមិម័លសង្កាត់ដង្កោខណ្ឌដង្កោ ។
បច្ចុប្បន្នជនសង្ស័យកំពុងស្ថិតក្នុងការឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌ៧មករា ដើម្បីសមត្ថកិច្ចធ្វើការសាកសួរ និងកសាងសំណុំរឿងតាមនីតិវិធី ៕
