ប៉ោយប៉ែត៖ពលករខ្មែរដែលទៅធ្វើការ ងារនៅប្រទេសថៃ រាប់ពាន់នាក់នាំគ្នាសម្រុកមកលេងបុណ្យចូលឆ្នាំប្រពៃណីខ្មែរនៅ ស្រុកកំណើត ដោយធ្វើដំណើរតាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ជាបន្តបន្ទាប់។ ពួកគេបញ្ជាក់ថា ក្នុងការធ្វើដំណើរវិលត្រឡប់មកនេះ នៅក្នុងប្រទេសថៃ ពុំមានជាបញ្ហាចោទទេ គឺជួបឧបសគ្គខ្លះនៅពេលឆ្លងដែនពីប្រទេសថៃ មកកម្ពុជា និងសំបុត្រឡានឈ្នួលនៅក្រុងប៉ោយប៉ែត ឡើងថ្លៃខ្ពស់ជាដើម។
ប្រជាពលរដ្ឋដែលទើបវិលត្រឡប់មកពីប្រទេសថៃ នៅខេត្តបន្ទាយមានជ័យ រៀបរាប់ឲ្យដឹងថា ពួកគេនាំគ្នាត្រឡប់មកខ្មែរនេះ ដើម្បីទៅលេងកម្សាន្តសប្បាយជាមួយបងប្អូនក្នុងឱកាសបុណ្យចូល ឆ្នាំប្រពៃណីខ្មែរនៅឯស្រុកកំណើត បន្ទាប់ពីធ្វើការងារនឿយហត់អស់ជាច្រើនខែនៅក្រៅប្រទេស។
ពលករម្នាក់ឈ្មោះ លោក ប៊ុន បូរ៉ា រស់នៅស្រុកមង្គលបុរី ខេត្តបន្ទាយមានជ័យ ដែលទើបវិលត្រឡប់ពីប្រទេសថៃ នៅរសៀលថ្ងៃទី៤ ខែមេសា ថ្លែងថា បងប្អូនក្នុងក្រុមគ្រួសាររបស់លោកចំនួន ៥នាក់ ទៅធ្វើការជាកម្មករសំណង់នៅទីក្រុងប៉ាតាយ៉ា ប្រទេសថៃ ប្រមាណជាង ៥ឆ្នាំមកហើយ។
លោកបន្តថា ជារៀងរាល់ថ្ងៃបុណ្យជាតិសំខាន់របស់ខ្មែរចំនួន ២លើកក្នុងមួយឆ្នាំ គឺរដូវបុណ្យភ្ជុំបិណ្ឌ និងបុណ្យចូលឆ្នាំប្រពៃណីខ្មែរ តែងនាំគ្នាវិលត្រឡប់មកលេងសប្បាយជាមួយបងប្អូននៅឯស្រុកកំណើត វិញជានិច្ច។ លោកថា ដែលលោកទៅធ្វើការនៅប្រទេសថៃ កន្លងមក គឺពុំមានលិខិតឆ្លងដែននោះទេ ហើយនៅពេលវិលត្រឡប់មកស្រុកកំណើតវិញងាយស្រួលជាងធ្វើដំណើរពី ស្រុកខ្មែរទៅប្រទេសថៃ។
លោកបន្ថែមថា ការវិលត្រឡប់ពីប្រទេសថៃ ឆ្នាំនេះ ធ្វើដំណើរតាមផ្លូវពុំជួបបញ្ហាអ្វីនោះទេ គឺជួបការលំបាកខ្លាំងនៅពេលឆ្លងដែនពីប្រទេសថៃ មកកម្ពុជា នៅចំណុចច្រករបៀងក្បែរកាស៊ីណូក្រុងប៉ោយប៉ែត៖ «អ្នកដែលនាំយើង ចេញមកនោះ មានទាហានឈុតខ្មៅថៃ និងមន្ត្រីប៉ូលិសព្រំដែនប្រចាំនៅច្រកទ្វារប៉ោយប៉ែត ដោយនាំគ្នាចេញតាមព្រៃក្នុងតម្លៃម្នាក់ ៥៥០បាតថៃ»។
លោកបន្ថែមថា ពួកគេចង់ទៅធ្វើការនៅក្រៅប្រទេសឲ្យស្របច្បាប់ដែរ ក៏ប៉ុន្តែដោយសារតម្លៃធ្វើលិខិតឆ្លងដែនខ្ពស់ហួសហេតុពេក ហើយចំណាយពេលយូរ ធ្វើឲ្យពុំមានលទ្ធភាព ក៏នាំគ្នាស្រេចចិត្តធ្វើចំណាកស្រុកទាំងប្រថុយប្រថានដោយសុខ ច្បាប់៖ «ដើម្បីងាយស្រួលដល់ពួកខ្ញុំជាពលករ កុំឲ្យទៅធ្វើការដោយខុសច្បាប់ទៀត។ ខ្ញុំសុំឲ្យសមត្ថកិច្ចជួយសម្រួលដោយធ្វើលិខិតឆ្លងដែនឲ្យបានឆាប់ និងឲ្យមានតម្លៃទាបជាងពេលបច្ចុប្បន្ន»។
ពលរដ្ឋរូបនេះបន្ថែមទៀតថា ការឆ្លងដែនពីប្រទេសថៃ មកកម្ពុជា ជួបការលំបាកជាបញ្ហាមួយទៅហើយ ប៉ុន្តែការធ្វើដំណើរត្រឡប់ទៅស្រុកកំណើត ក៏ជាបញ្ហាសំខាន់មួយដែរ។ លោកថាពលករដែលនៅខេត្តឆ្ងាយៗតែងត្អូញត្អែរចំពោះតម្លៃសំបុត្រឡាន ក្រុងពីប៉ោយប៉ែត ទៅភ្នំពេញ ថ្លៃខ្ពស់ហួសហេតុ គឺប្រមាណពី ៥ម៉ឺនរៀល (៥០.០០០) ទៅ ៧ម៉ឺនរៀល (៧០.០០០) ក្នុងម្នាក់។
ឆ្លើយតបនឹងបញ្ហានេះ អភិបាលក្រុងប៉ោយប៉ែត លោក ង៉ោ ម៉េងជ្រួន មានប្រសាសន៍បញ្ជាក់ថា អាជ្ញាធរក្រុងបានចុះណែនាំទៅដល់ក្រុមហ៊ុនឡានក្រុងដឹកអ្នកដំណើរ ទាំងអស់ មិនឲ្យយកថ្លៃពីអ្នកធ្វើដំណើរខ្ពស់ហួសពីច្បាប់កំណត់ឡើយ។ ទោះយ៉ាងនេះក្ដី លោកទទួលស្គាល់ថា នៅមានក្រុមឱកាសនិយមយកសំបុត្រឡានទៅលក់ឲ្យប្រជាពលរដ្ឋនៅក្នុង ទឹកដីថៃ តម្លៃខ្ពស់ខ្លះមែន ដែលបញ្ហានេះធ្វើឲ្យអាជ្ញាធរពិបាកក្នុងការទប់ស្កាត់៖ «សំបុត្រ រថយន្តនៅក្រុមហ៊ុនមានតម្លៃមិនដូចគ្នាទេ តែយើងខ្ញុំអនុញ្ញាតឲ្យពួកគាត់លក់ក្នុងតម្លៃទៅតាមសៀវភៅបន្ទុក របស់ក្រសួងសេដ្ឋកិច្ចទេ ហើយយើងក៏បានបិទតម្លៃលក់សំបុត្រឡានក្រុងទាំងនោះឲ្យអ្នកធ្វើ ដំណើរមើលឃើញ នៅគ្រប់ក្រុមហ៊ុនទាំងអស់»។
ទោះយ៉ាងនេះមន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា តម្លៃសំបុត្ររថយន្តដឹកអ្នកដំណើរឡើងថ្លៃនេះ កើតឡើងជារៀងរាល់ពេលមានបុណ្យជាតិសំខាន់ៗ នឹងក្លាយទៅជាប្រពៃណីទៅហើយ។
លោកថា វិធានការទប់ស្កាត់ពីសំណាក់អាជ្ញាធរហាក់ទន់ខ្សោយនៅឡើយ ធ្វើឲ្យប្រជាពលរដ្ឋក្រីក្រដែលធ្វើដំណើរដោយរថយន្តឈ្នួលជួបការ លំបាកជារៀងរាល់ឆ្នាំ៖ «កន្លងមកយើងសង្កេតឃើញមានឡានក្រុងចូល ទៅដឹកពលករទៅដល់ច្រកទ្វារអន្តរជាតិនោះតែម្ដង ប៉ុន្តែយើងពុំដឹងថា រថយន្តដឹកអ្នកដំណើរក្នុងតម្លៃប៉ុន្មាននោះទេ។ បញ្ហានេះអាជ្ញាធរក្រុងប៉ោយប៉ែត គួរគិតដល់ប្រជាពលរដ្ឋផង»។
ប្រធានក្រុមការងារទំនាក់ទំនងកម្ពុជា-ថៃ ប្រចាំច្រកទ្វារអន្តរជាតិប៉ោយប៉ែត លោក សៅ វាសនា មានប្រសាសន៍បញ្ជាក់ថា ប្រជាពលរដ្ឋខ្មែរដែលទៅធ្វើការងារនៅប្រទេសថៃ ទាំងស្របច្បាប់ និងខុសច្បាប់ នាំគ្នាសម្រុកមកលេងស្រុកកំណើតវិញ គឺចាប់តាំងពីថ្ងៃទី១ មេសា រហូតដល់ថ្ងៃបុណ្យចូលឆ្នាំខ្មែរថ្ងៃទី១៤ មេសា ទើបស្ងប់ស្ងាត់ទៅវិញ។
លោកបន្តថា រហូតមកដល់ពេលនេះ ពលករខ្មែរដែលធ្វើដំណើរពីប្រទេសថៃ តាមច្រកទ្វារអន្តរជាតិប៉ោយប៉ែត ប្រមាណ ១ពាន់នាក់ក្នុងមួយថ្ងៃ៖ «ចាប់ តាំងពីថ្ងៃ១ មេសា មក គឺក្នុងមួយថ្ងៃៗ ពលករសម្រុកមកស្រុកកំណើតច្រើន។ តែយ៉ាងណាពលករវិលត្រឡប់មកលេងចូលឆ្នាំនេះ គឺពួកគាត់ពុំបានផ្ដល់លំបាកដល់សមត្ថកិច្ចទេ»។
អភិបាលក្រុងប៉ោយប៉ែត ឲ្យដឹងថា តម្លៃសំបុត្រឡានក្រុងពីប៉ោយប៉ែត ទៅក្រុងភ្នំពេញ ក្នុងរដូវបុណ្យចូលឆ្នាំនេះ គឺសំបុត្រមួយពី ២៥.០០០ ទៅ ៣៥.០០០រៀល។ ចំណែកឯរថយន្តឈ្នួល ពិសេស ១៥កៅអីវិញ តម្លៃសំបុត្រចំនួន ៤៥.០០០រៀលក្នុងម្នាក់៕RFA
សកម្មភាពប្រជាពលរដ្ឋខ្មែរដែលអាជ្ញាធរថៃ ចាប់បញ្ជូនមកដាក់ចំណុចរង្វង់មូលខាងមុខច្រកទ្វារអន្តរជាតិ ប៉ោយប៉ែត ខេត្តបន្ទាយមានជ័យ នៅថ្ងៃទី១២ ខែមិថុនា ឆ្នាំ២០១៤។
