បាល់ទាត់៖ក្រុមញញួរយក្ស West Ham បានឡើងទៅវគ្គ១៦ក្រុមចុងក្រោយសម្រាប់ពានរង្វាន់ FA Cup បន្ទាប់ពីយកឈ្នះក្រុមហង្សក្រហម Liverpool ២-១ នៅនាទី១២០+១ ក្នុងការប្រកួតជើងទី២យប់មិញ។
លទ្ធផល១-១បានបន្តរហូតដល់ចប់ការប្រកួតពេញ៩០នាទី ដែលតម្រូវឲ្យក្រុមទាំង២បន្ថែមម៉ោង១៥នាទី២ដងទៀត ប៉ុន្តែដល់នាទី១២០ ខណៈដែលមានការរំពឹងថា នឹងមានការទាត់បាល់ប៉េណាល់ទីកាត់សេចក្ដីហើយនោះ ស្រាប់តែ Angelo Ogbonna មានឱកាសតែតបំប៉ោងសំណាញ់ទីហង្សក្រហម ឲ្យចុកឈាម និងធ្វើឲ្យ Liverpool ធ្លាក់ហាលអាវត្រឹមវគ្គនេះតែម្ដង។
គួរបញ្ជាក់ថា កាលជើងទី១នៅ Anfield ក្រុមទាំងពីរបញ្ចប់លទ្ធផលស្មើគ្នា ០-០។ លុះដល់ជើងទី២យប់មិញ ម្ចាស់ផ្ទះ West Ham បាននាំមុខមុននៅនាទី៤៥ ដោយ Michail Antonio ប៉ុន្តែត្រូវខ្សែបម្រើឆ្នើម Philippe Coutinho ដែលទើបវិលពីរបួសស៊ុតបាល់ហ្វ្រីឃីតតាមស្មើ ១-១ វិញនាទី៤៨។ដូច្នេះញញួរយក្ស West Ham នឹងត្រូវធ្វើដំណើរទៅប៉ះ Blackburn នៅ Championship ក្នុងការប្រកួតជុំទី៥ ជាបន្ត នាថ្ងៃអាទិត្យ ទី២១ ខែកុម្ភៈ៕
