កីឡា៖ខ្សែប្រយុទ្ធដ៏ឆ្នើមរបស់ក្រុមអ្នកមានបុណ្យ Barcelona កីឡាករ Lionel Messi បានបាត់បង់់ឱកាសជាកីឡាករល្អប្រចាំឆ្នាំ២០១៦ បន្ទាប់ពី កីឡាករ Novak Djokovic តារាឆ្នើមវាយកូនបាល់ ត្រូវបានគេបោះឆ្នោតឲ្យជាប់ជាអ្នកកីឡាល្អបំផុតប្រចាំឆ្នាំ២០១៦ កាលពីយប់មិញ នៅទីក្រុងប៊ែរឡាំង ប្រទេសអាល្លឺម៉ង់។
កីឡាករសញ្ជាតិសែប វ័យ២៨ឆ្នាំរូបនេះ បានឈ្នះលើតារាបាល់ទាត់ Lionel Messi កីឡាករប្រណាំងរថយន្ត Lewis Hamilton កំពូលកីឡាកររត់ប្រណាំង Usain Bolt កីឡាករវាយកូនហ្គោល Jordan Spieth និងតារាបាល់បោះ Stephen Curry ដើម្បីលើកពានអ្នកកីឡាករល្អបំផុតប្រចាំឆ្នាំនេះ ២ឆ្នាំជាប់ៗគ្នា។
Djokovic បច្ចុប្បន្នគឺជាកំពូលកីឡាករវាយកូនបាល់លេខ១លើលោក បន្ទាប់ពីប្រកួត៨៨ដងចុងក្រោយ ឈ្នះ៨២ និងឈ្នះពាន Grand Slams ៣ដង ក្នុងចំណោមពានទាំង៤។
រីឯ Messi ទោះមិនបានឈ្នះពានអ្នកកីឡាល្អបំផុតប្រចាំឆ្នាំ២០១៦នេះ ប៉ុន្តែកីឡាករជម្រើសជាតិអាហ្សង់ទីនរូបនេះ បានឈ្នះពានអ្នកកីឡាលេងសហការក្នុងក្រុមបានល្អបំផុតប្រចាំឆ្នាំ២០១៦។ ដោយឡែកសម្រាប់ពានរង្វាន់កីឡាការិនីល្អបំផុតប្រចាំឆ្នាំ២០១៦ គឺបានលើតារាវាយកូនបាល់របស់អាមេរិក Serena Williams៕
