បាល់ទាត់៖ក្លិប Bordeaux បានចេញបញ្ជាក់ថា ក្លិបបានចុះហត្ថលេខាទិញយកខ្សែប្រយុទ្ធពីក្លិប AC Milan គឺកីឡាករ Jeremy Menez ដើម្បីនាំមកកីឡដ្ឋាន Nouveau Stade នារដូវក្តៅនេះ។
ខ្សែប្រយុទ្ធសញ្ជាតិបារាំងវ័យ២៩ឆ្នាំរូបនេះ បានផ្លាស់មកកាន់ក្រុមបិសាចក្រហមអីតាលីក្នុងឆ្នាំ២០១៤ ហើយនៅរដូវកាលដំបូង Jeremy Menez ស៊ុតបញ្ចូលទីបានចំនួន១៦គ្រាប់ក្នុងការបង្ហាញ៣៤ប្រកួតឲ្យក្រុម។
យ៉ាងណាមិញ ការរងរបួសរបស់ Jeremy Menez ធ្វើឲ្យរូបគេធ្លាក់នូវទម្រង់លេងហើយនឹងបានបង្ហាញខ្លួនត្រឹមតែ១០លើកនៅក្នុងក្របខ័ណ្ឌ Serie A នៅកីឡាដ្ឋាន San Siro កាលពីរដូវកាលមុន។
យោងតាមគេហទំព័រផ្លូវការរបស់ Bordeaux បានឲ្យដឹងថាក្លិប AC Milan បានព្រមព្រៀងលក់កីឡាករ Jeremy Menez មកឲ្យក្រុម Bordeaux ជាផ្លូវការហើយពីថ្ងៃចន្ទម្សិលមិញនេះ។
គួរបញ្ជាក់ថា Jeremy Menez បានបង្ហាញខ្លួនឲ្យក្រុមជម្រើសជាតិបារាំង២៤ប្រកួតរួមទាំងក្រុម Paris Saint-Germain , Roma, AS Monaco ហើយអតីតក្រុមចាស់របស់គេ Sochaux៕
