បាល់ទាត់៖Paul Pogba បានផ្លាស់ចេញពីក្លិបសេះបង្កង់ Juventus ទៅចូលរួមជាមួយក្លឹបបិសាចក្រហម Manchester United ជាផ្លូវការហើយនៅព្រឹកនេះ ក្នុងតម្លៃបំបែកកំណត់ត្រា ថ្លៃបំផុតលើពិភពលោក ៨៩លានផោន លើកកិច្ចសន្យារយៈពេល ៥ឆ្នាំនៅកីឡដ្ឋាន Old Trafford។
ខ្សែបម្រើសញ្ជាតិបារាំងវ័យ២៣ឆ្នាំរូបនេះ បានជួយឲ្យក្រុមជម្រើសជាតិបារាំង ឡើងដល់ផ្ដាច់ព្រ័ត្រ UEFA Euro 2016 និងបានជួយក្រុម Juventus ឈ្នះជើងឯកក្របខ័ណ្ឌ អ៊ីតាលី Serie A ៤រដូវកាលជាប់ៗគ្នា។ក្រោយចុះកុងត្រានៅ Man Utd កីឡាកររូបនេះ បាននិយាយថា៖ “នេះជាក្លឹបដ៏ត្រឹមត្រូវសម្រាប់ខ្ញុំ ដើម្បីអាចសម្រេចអ្វីៗ ដែលខ្ញុំសង្ឃឹម”។
គួរបញ្ជាក់ថា Paul Pogba ជាសមាជិកទី៤ ដែលស្ថិតនៅក្រោមការដឹកនាំរបស់ Jose Mourinho បន្ទាប់ពីខ្សែការពារកូឌីវ័រ Eric Bailly, អតីតប្រធានក្រុមជម្រើសជាតិស៊ុយអែត Zlatan Ibrahimovic និងខ្សែបម្រើប្រយុទ្ធជម្រើសជាតិអាមេនី Henrikh Mkhitaryan៕
