បាល់ទាត់៖ខ្សែបម្រើឆ្នើមរបស់ក្រុមយក្សសរ Real Madrid កីឡាករ Gareth Bale នឹងអវត្តមានឲ្យក្រុមមួយនេះក្នុងការប្រកួត El Clasico បន្ទាប់ពីពិនិត្យឃើញថា មានបញ្ហារបួសកជើងស្ដាំធ្ងន់ធ្ងរ ត្រូវសម្រាករយៈពេលយូរ។
កីឡាករសញ្ជាតិវែលវ័យ២៧ឆ្នាំរូបនេះ បានទទួលរងរបួសកជើង ក្នុងអំឡុកពេលដែល Real ឈ្នះ Sporting ២-១ កាលពីយប់ថ្ងៃអង្គារនៅក្នុងពានរង្វាន់ UEFA Champions Leagueដោយប៉ះទង្គិចគ្នាជាមួយខ្សែការពារ Sebastián Coates នៅនាទី៥៧ ជំនួសដោយ Marco Asensio។
Bale បានធ្វើដំណើរទៅពិនិត្យនៅមន្ទីរពេទ្យ Snaitas-La Moraleja Clinic កាលពីថ្ងៃពុធម្សិលមិញ។ ក្រោយធ្វើរោគវិនិច្ឆ័យ ក្រុមយក្សសរ បានចេញសេចក្ដីថ្លែងការណ៍ថា Bale បានរងរបួសភ្លាត់សរសៃពួរកជើងស្ដាំ ដែលត្រូវសម្រាកព្យាបាលយ៉ាងតិច ៣សប្តាហ៍ ហើយក្រុមគ្រូពេទ្យនឹងតាមដានអាការៈបន្តទៀត ប៉ុន្តែបើមិនប្រសើរឡើងទេ រូបគេនឹងត្រូវវះកាត់ ហើយអាចត្រូវអវត្តមានពីទីលាន រហូតដល់២ខែ។
យ៉ាងណាមិញលទ្ធផលនេះធ្វើឲ្យ Bale នឹងអវត្តមានក្នុងជំនួប El Clasico ពេលប៉ះ Barcelona នៅថ្ងៃទី០៣ ខែធ្នូខាងមុខមែនទែនហើយនិងការប្រកួតបន្ទាប់ៗខាងមុខដែលប៉ះ Sporting, Cultural Leonesa, Borussia Dortmund, Deportivo រួមទាំងប្រកួត FIFA Club World Cup ឬអាចនឹងអវត្តមានច្រើនជាងនេះ បើឈានដល់ការវះកាត់៕
