បាល់ទាត់៖កំពូលខ្សែប្រយុទ្ធដ៏ឆ្នើមរបស់យក្សស Real Madrid កីឡាករ Cristiano Ronaldo បានទទួលជ័យលាភីពានរង្វាន់កំពូលកីឡាករឆ្នើមមួយទៀត នៅកម្មវិធីប្រគល់ពានរង្វាន់បាល់ទាត់សកលលោកលើកទី៧ (Globe Soccer Awards) ក្នុងទីក្រុងឌុយបៃ ប្រទេសអារ៉ាប់រួម កាលពីយប់មិញនេះ។
Ronaldo ដណ្តើមបានពានរង្វាន់កីឡាករឆ្នើម បន្ទាប់ពីរូបគេបានជួយ Real Madrid ឈ្នះ Champions League លើកទី១១និងនាំព័រទុយហ្គាល់ឈ្នះពានទ្វីបអឺរ៉ុប។ យ៉ាងណាក៏ដោយម្ចាស់ពាន Ballon d’Or រូបនេះមិនបានទទួលពានដោយផ្ទាល់ទេ គឺបានត្រឹមផ្ញើវីដេអូថ្លែងអំណរគុណពីចម្ងាយប៉ុណ្ណោះ។
លោក Fernando Santos ឈ្នះពានគ្រូបង្វឹកល្អបំផុតបន្ទាប់ពីលោកដឹកនាំព័រទុយហ្គាល់ឈ្នះពានទ្វីបអឺរ៉ុប Euro ខណៈដែល Real Madrid ទទួលបានពានក្លឹបដែលល្អផ្ដាច់គេ។ចំណែកអតីតខ្សែប្រយុទ្ធកាមេរូន Samuel Eto’o ក៏ទទួលបានការសរសើរផងដែរសម្រាប់សមិទ្ធផលក្នុងវិស័យបាល់ទាត់របស់គាត់ផងដែរ។
អាជ្ញាកណ្ដាល Clattenburg ជនជាតិអង់គ្លេសឈ្នះពាន អាជ្ញាកណ្ដាលល្អប្រចាំឆ្នាំបន្ទាប់ពីលោកកាត់ក្ដីក្នុងប្រកួតធំៗ៣ នៅឆ្នាំ២០១៦ គឺវគ្គផ្ដាច់ព្រ័ត្រ Euro, UEFA Champions League និង FA Cup៕
