រាជធានីភ្នំពេញ៖ទាំងមន្ត្រីគណបក្សនយោបាយ និងសង្គមស៊ីវិលបានធ្វើការរិះគន់ជាបន្តបន្ទាប់ទៅលើសេចក្តីព្រាងបទបញ្ជានិងនីតិវិធីសម្រាប់ការបោះឆ្នោតឃុំ-សង្កាត់ឆ្នាំ២០១៧ ខណៈដែលការបោះឆ្នោតគ្រោងធ្វើនៅថ្ងៃទី៤ ខែមិថុនា ឆ្នាំនេះ។
លោកស្រី ម៉េង សុភារី ប្រធាននាយកដ្ឋានកិច្ចការបោះឆ្នោតនិងនីតិកម្មនៃគណបក្សសង្គ្រោះជាតិ បានថែ្លងថា គណបក្សលោកស្រីបានដាក់សំណើមួយសុំឲ្យកែប្រែជិត៤០ចំណុចលើសេចក្តីព្រាងបទបញ្ជានោះ ប៉ុន្តែជាងពាក់កណ្តាលនៃចំណុចនោះត្រូវបាន គ.ជ.ប ច្រានចោល ហើយសុទ្ធសឹងជាជាចំណុចសំខាន់ៗ ថែមទៀត ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ក៏បានថ្លែងដែរថា គណបក្សលោកចង់ឲ្យ គ.ជ.ប បកស្រាយឲ្យបានច្បាស់ពីតួនាទីមេភូមិនិងការចេញមកធ្វើសកម្មភាពនយោបាយរបស់មន្ត្រីអង្គការសង្គមស៊ីវិលរួមទាំងការអនុវត្តច្បាប់ទៅលើអ្នកល្មើសច្បាប់បោះឆ្នោត ព្រោះអង្គការសង្គមស៊ីវិលមិនមានម៉ោងស្នូលនោះទេ ។ អញ្ចឹងពួកគេមានពេលវេលាច្រើនក្នុងការចូលរួមឃោសនានយោបាយ ។
ចំណែកលោក សួន យុធ្យា មន្ត្រីផ្នែកច្បាប់និងតស៊ូមតិនៃអង្គការខុមហ្វ្រែលបានបង្ហាញការយល់ឃើញថាសេចក្តីព្រាងនេះនៅមានភាពខ្វះចន្លោះច្រើនក្នុងនោះរួមមានការរាប់សន្លឹកឆ្នោត ហិរញ្ញវត្ថុនយោបាយនៃការឃោសនា និងការដោះស្រាយបណ្តឹង។ លោកបញ្ជាក់ថាចំណុចមួយចំនួនខាងលើនេះបានចែងធ្វើឲ្យមិនច្បាស់លាស់ ។
យ៉ាងណាក៏ដោយ លោក ហង្ស ពុទ្ធា អ្នកនាំពាក្យគណកម្មការជាតិរៀបចំការបោះឆ្នោតបានបញ្ជាក់ថា រាល់បញ្ហា និងកង្វល់របស់អ្នកនយោបាយ និងសង្គមស៊ីវិល ទៅលើសេចក្តីព្រាងនេះ គឺ គ.ជ.ប នឹងពិចារណា ដាក់បញ្ជូលទៅក្នុងសេចក្តីព្រាងនីតិវិធីនេះ ។ លោកបន្ថែមថា ពីមួយជំពូកទៅមួយជំពូកគឺយើងនឹងពិភាក្សាគ្នាលំអិត ហើយការពិភាក្សានេះទៀតក៏ គ.ជ.ប នឹងទទូលយកដើម្បីពិនិត្យទៅលើទិដ្ឋភាពច្បាប់ និងពិនិត្យទៅលើថ្ងៃបោះឆ្នោតផង អ្វីដែលទទួលយកបានគឺគ.ជ.ប នឹងទទួលយកទៅក្នុងនីតិវិធីនៃការបោះឆ្នោតនេះ
គួរបញ្ជាក់ថា សេចក្តីព្រាងបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ ឆ្នាំ២០១៧ មាន១៥ជំពូក ត្រូវបានតាក់តែងដោយ គ.ជ.ប កាលពីឆ្នាំ២០១៦ ហើយត្រូវបានដាក់ឲ្យមានការចូលរួមយោបល់ជាបន្តបន្ទាប់ពីគណបក្សនិងសង្គមស៊ីវិល៕
