បាល់ទាត់៖យោងតាមរបាយការណ៍ក្លិបមេឃខៀវ Manchester City បានឲ្យដឹងថា ក្លិបកំពុងត្រៀមលុយដ៏មហាសាលដើម្បីប្រមាញ់ទិញយកកំពូលខ្សែប្រយុទ្ធសញ្ជាតិអាហ្សង់ទីន Lionel Messi ពីក្លិបអ្នកមានបុណ្យ Barcelona នៅរដូវក្តៅខាងមុខនេះ ខណៈដែលកិច្ចចរចាកុងត្រាថ្មីបានជាប់គាំនោះ។
កីឡាករសញ្ជាតិអាហ្សង់ទីនវ័យ២៩ឆ្នាំរូបនេះ កិច្ចសន្យានៅឯកីឡដ្ឋាន Camp Nou សល់ត្រឹមតែ១៦ខែប៉ុណ្ណោះ ហើយត្រូវគេរំពឹងថា Messi អាចនឹងចាកចេញពីក្រុមមួយនេះ គ្រាដែលអនាគតរបស់គាត់នៅមិនប្រាកដប្រជាមួយក្រុមតាត់តាឡាននេះ។
តាមប្រភពព័ត៌មានពីកាសែត Mirror បានឲ្យដឹងថា ក្លិប Man City គ្រោងនឹងផ្តល់ជូនតម្លៃ១០០លានផោន សម្រាប់កីឡាករឆ្នើមរបស់ពិភពលោក៥សម័យកាលរូបនេះ ហើយជឿថា Messi អាចនឹងពិចារណាចំពោះតម្លៃនេះ គ្រាដែល Barcelona កំពុងតែជួបភាពតឹងតែងក្នុងការតំឡើងប្រាក់ឈ្នួលប្រាក់សម្រាប់ Messi នោះ។
គួរបញ្ជាក់ថា Messi ស៊ុតបញ្ចូលទីបានចំនួន៤៨០ ក្នុងការបង្ហាញខ្លួន៥៥៥លើកនិងឲ្យក្រុមនេះឈ្នះជើងឯកក្របខ័ណ្ឌ La Liga ៨ដង៕
