បាល់ទាត់ ៖ ទីបំផុតកីឡាករបាល់ទាត់អាជីព Cristiano Ronaldo បានជាប់ជាកីឡាករលេងល្អបំផុតប្រចាំទ្វីបអឺរ៉ុប ប្រចាំរដូវកាលឆ្នាំ២០១៦-២០១៧ ដោយទទួលបានសំឡេងបោះឆ្នោតគាំទ្រលើគូប្រជែង Lionel Messi របស់ក្លឹប FC Barcelona និងអ្នកចាំទី Gianluigi Buffon នៃក្លឹប Juventus កាលពីយប់មិញនៃកម្មវិធីចាប់ពូល URFA Champions League។
យោងតាមសារព័ត៌មាន Dailymail បានអោយដឹងថា កីឡាករសញ្ជាតិព័រទុយហ្គាល់ វ័យ៣២ឆ្នាំ Ronaldo ទទួលបានការគាំទ្រ៤៨២សំឡេង Messi បាន១៤១សំឡេង ខណៈដែល Buffon ទទួលបាន១០៩សំឡេង។
គួរបញ្ជាក់ថា នេះគម្រប់លើកទី៣ហើយសម្រាប់ Ronaldo ដែលឈ្នះពាន UEFA Best Player in Europe ច្រើនជាងគេ បន្ទាប់ពីលេងបានយ៉ាងល្អកាលពីរដូវកាលមុន ដោយស៊ុតបញ្ចូលទីបាន៤២គ្រាប់ ពីការចូលលេង ៤៦ប្រកួត ជួយក្លឹប Real Madrid របស់អេស្ប៉ាញឈ្នះជើងឯក La Liga និងការពារពាន UEFA Champions League បានសម្រេចផងដែរ៕
