ភ្នំពេញ ៖ ក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ ស្នើអោយកសិករដាំស្រូវដែលមានហាងឆេងសម្រាប់ទីផ្សារអន្តរជាតិ ព្រោះតម្រូវការស្បៀងកំពុងកើនឡើង ទៅតាមកំណើនប្រជាជននៅលើពិភពលោក ។
នៅក្នុងឱកាសបើកវេទិកាស្រូវអង្ករកម្ពុជា លើកទី៦ នៅសណ្ឋាគារ ស៊ូហ្វីតែលភ្នំពេញ ភូគីត្រា កាលពីព្រឹកថ្ងៃទី២២ ខែមករា ឆ្នាំ២០១៨ នេះ លោកឧបនាយករដ្ឋមន្ត្រីយឹម ឆៃលី ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ បានស្នើរអោយប្រជាកសិករជ្រើសរើសពូជស្រូវណា ដែលមានហាងឆេងសម្រាប់នាំចេញទៅកាន់ទីផ្សារអន្តរជាតិ និងលក់បានថ្លៃ ។ លោកឧបនាយករដ្ឋមន្ត្រី បានលើកឡើងថា កសិករគួរតែងាកមកដាំដុះ ពូជស្រូវល្អៗ និងមានហាងឆេងសម្រាប់នាំចេញ ទៅកាន់ទីផ្សារអន្តរជាតិដែលកម្ពុជាកំពុងមានស្រាប់។
បច្ចុប្បន្នស្រូវក្រអូបកម្ពុជា បានជាប់ចំណាត់ថ្នាក់ជាអង្ករបាយឆ្ងាញ់ និងមានគុណភាពលំដាប់ពិភពលោក ដូចនេះ ស្រូវរបស់កម្ពុជាក៏បានល្បីល្បាញទៅបណ្ដាប្រទេសជាច្រើនទៀត ហើយប្រទេសទាំងនោះក៏ចង់បានអង្ករកម្ពុជាទៅផ្គត់ផ្គត់ដល់ពលរដ្ឋរបស់គេដែរ ។ កត្តាទាំងនេះ ជាឱកាសដ៏ល្អសម្រាប់ប្រជាកសិករ ក្នុងការយកពូជស្រូវដែលល្អ និងមានគុណភាពមកដាំដុះ ផ្គត់ផ្គង់ និងនាំចេញ ។
ចំណែកលោក សុខ ពុទ្ធីវុធ ប្រធានសហព័ន្ធស្រូវអង្ករកម្ពុជា បានលើកឡើងថា ក្នុងនាមជាសហព័ន្ធស្រូវអង្ករ នឹងជំរុញ លើកទឹកចិត្តដល់ប្រជាកសិករ ងាកមកដាំដុះពូជស្រូវ ដែលមានហាងឆេងសម្រាប់នាំចេញទៅកាន់ទីផ្សារអន្តរជាតិ ហើយការជ្រើសរើសពូជស្រូវល្អមកដាំដុះ ដែលលក់បានតម្លៃខ្ពស់នោះ នឹងធ្វើអោយកម្រិតជីវភាព ប្រជាកសិករប្រសើរឡើងផងដែរ ។ លោក បានបង្ហាញថា កម្ពុជាជាប្រទេសដែលមានសក្ដានុពលខ្ពស់មួយ នៅក្នុងវិស័យកសិកម្ម ហើយនៅពេលខាងមុខនេះ កម្ពុជាក៏ជាប្រទេសផលិតស្បៀងដ៏សំខាន់មួយ សម្រាប់ផ្គត់ផ្គង់លើពិភពលោកផងដែរ ព្រោះកំណើនប្រជាជននៅលើពិភពលោក កំពុងបន្តកើនឡើងជាបន្តបន្ទាប់ ដូចនេះហើយតម្រូវការស្បៀងក៏កើនឡើងទៅតាមនោះដែរ ។
បើតាម លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានមានប្រសាសន៍ផងដែរថា នៅឆ្នាំនេះប្រទេសចិនបានត្រៀមនាំអង្ករក្រអូបពីកម្ពុជាចំនួន៣០០ពាន់តោន រឺ៣០ម៉ឺនតោន ព្រោះប្រទេសចិនបានដាក់គោលការណ៍លែងផលិតអង្ករដែលយកប្រភពទឹកក្រោមដីមកប្រើ ដូចនេះហើយចិនត្រូវងាកមករក អង្ករពីប្រទេសផ្សេងទៅផ្គត់ផ្គង់វិញ ក្នុងនោះក៏មានកម្ពុជាដែរ ។ លោក វេង សាខុន បានថ្លែងថាថ្មីៗនេះ កម្ពុជាក៏បានចុះអនុស្សរណៈយោគយល់គ្នាជាមួយវិទ្យាស្ថានស្រាវជ្រាវពូជស្រូវនៅខេត្តយូណានប្រទេសចិន ដើម្បីពិចារណានាំអង្ករពីកម្ពុជាទៅចិនបន្ថែមទៀត ក្នុងបរិមាណ៣០០ពាន់តោន ក្នុងមួយឆ្នាំ ជាប្រភេទអង្ករគ្រាប់ខ្លី ។
តំណាងសហគមន៍គ្រឹងលាវ ស្រុករលាប្អៀរ ខេត្តកំពង់ឆ្នាំង លោក គង់ វុទ្ធីបានអោយដឹងថា បញ្ហាប្រឈមសម្រាប់ កសិករក្នុងការផលិតពូជស្រូវក្រអូប នោះគឺកង្វះទឹកសម្រាប់ស្រោចស្រព ព្រោះស្រូវក្រអូបត្រូវការទឹកគ្រប់គ្រាន់ ខុសពីពូជស្រូវដែលកសិករ ដាំដុះសព្វថ្ងៃ ។ ដោយសារកត្តាទាំងនេះហើយ ទើបកសិករមួយចំនួន នៅតែបន្តដាំដុះពូជស្រូវដែលសល់ពីដូនតា ជាប្រភេទអង្ករបាយរឹងបន្តទៀត ។
គួរបញ្ជាក់ដែរថា អង្ករក្រអូបផ្ការំដួលរបស់កម្ពុជា បានជាប់ចំណាត់ថ្នាក់លេខ២ ក្នុងការចូលរួមប្រកួតពានរង្វាន់អង្ករល្អបំផុតលើពិភពលោកឆ្នាំ២០១៧ កាលពីខែវិច្ឆិកាកន្លងមក នៅក្នុងទីក្រុងម៉ាកាវ ប្រទេសចិន។ អង្ករផ្ការំដួលរបស់កម្ពុជា ក៏ធ្លាប់បានឈ្នះចំណាត់ថ្នាក់លេខមួយរយៈពេល៣ឆ្នាំជាប់គ្នាផងដែរ គឺក្នុងឆ្នាំ២០១២ ២០១៣ និងឆ្នាំ ២០១៤ ហើយក្នុងឆ្នាំ២០១៦ អង្ករកម្ពុជា ទទួលបានចំណាត់ថ្នាក់ស្មើគ្នានឹងអង្កររបស់ប្រទេសថៃ៕
